ئاسایشی ناوخۆی حەلەب رایگەیاند، بەهۆی بۆردومانە چڕەکانی چەکدارەکانی سوریاوە،  ژمارەی شەهیدەکانی گەڕەکە کوردییەکانی حەلەب گەیشتە 12 کەس و بریندارەکانیش بۆ 64 کەس بەرزبونەتەوە.

ئاسایشی ناوخۆی حەلەب، نوێترین ئاماری قوربانییەکانی بڵاوکردەوە و بە گوێرەی داتاکانیان، ژمارەی ئەو هاووڵاتییە سڤیلانەی شەهید بوون گەیشتوەتە 12 کەس، لە بەرانبەردا، ژمارەی بریندارەکانیش بەرزبوەتەوە بۆ 64 برینداری مەدەنی.

لە راگەیەندراوەکەدا هاتووە، بۆردومانی چڕی  هەڕەمەکی چەکدارەکانی سوریا بۆ سەر هەردوو گەڕەکی شێخ مەقسود و ئەشرەفییە بەردەوامی هەیە و لە رێگەی  تانک و تۆپخانە و فڕۆکەی بێفڕۆکەوانەوە بەردەوامن لە بە ئامانج گرتنی هاووڵاتییانی مەدەنی و ژمارەی قوربانییەکانیش بەردەوام لە زیادبوندایە.

شەڕ و پێکدادان لە گەڕەکە کوردییەکانی حەلەب پێی ناوەتە رۆژی سێیەمەوە و سەرەڕای هەوڵەکان بۆ ئارامکردنەوەی دۆخەکە، تا ئێستا بەردەوامی هەیە.

مەزڵوم کۆبانێ، رایدەگەیەنێت  بڵاوکردنەوەی تانک و تۆپخانە لە گەڕەکەکانی شاری حەلەب دەرفەتەکانی گەیشتن بە لێکتێگەیشتن لاواز دەکات و ئاماژەی بەوەشکردوە؛ بەردەوامبوون لەسەر رێبازی شەڕ و زمانی جەنگ بۆ سەپاندنی چارەسەری یەکلایەنە، کارێکی قبووڵکراو نییە.

فەرماندەی گشتی هێزەکانی سوریای دیموکرات راگەیەندراوێکی لەسەر پێشهاتەکانی حەلەب بڵاوکردوەتەوە و تێیدا هاتووە؛ بەردەوامبوون لەسەر رێبازی شەڕ و زمانی جەنگ بۆ سەپاندنی چارەسەری یەکلایەنە، کارێکی قبووڵکراو نییە،  لە رابردودا بووەتە هۆی کۆمەڵکوژی، کە گەیشتووەتە ئاستی تاوانی جەنگ لە کەناری سووریا و سوەیدا.

مەزڵوم کۆبانی دەشڵێت؛ بڵاوکردنەوەی تانک و تۆپخانە لە گەڕەکە کوردییەکانی شاری حەلەب و بۆردومانکردنی هاووڵاتیانی بێتاوان و دەربەدەرکردنیان، هەروەها هەوڵدان بۆ هەڵکوتانە سەر گەڕەکە کوردییەکان لە کاتی پرۆسەی گفتوگۆدا، دەرفەتەکانی گەیشتن بە لێکتێگەیشتن لاواز دەکات و زەمینە بۆ گۆڕانکاریی دیمۆگرافیی مەترسیدار خۆش دەکات.

لە بەشێکی تری راگەیەندراوەکەیدا دەڵێت؛ لە تەنیشت خەڵکی خۆمان لە شێخ مەقسود و ئەشرەفییە وەستاوین و چەند رۆژێکە لەگەڵ هەموو لایەنەکان کار دەکەن بۆ راگرتنی ئەم هێرشانە.

ناوبراو لە کۆتایشدا پرسە و سەرەخۆشی ئاراستەی کەسوکاری شەهیدەکان دەکات و هیوای زوو چاکبوونەوە بۆ بریندارەکان دەخوازێت.

روانگەی سوری بۆ مافەکانی مرۆڤ رایگەیاند دوابەدوای شکستی هێزەکانی حکومەت، فڕۆکە بێفڕۆکەوانەکانی تورکیا نەخۆشخانەکانی شێخ مەقسوود و ئەشرەفیەیان کردە ئامانج.

روانگەی سوری لەسەر زاری سەرچاوەکانیەوە رایگەیاند، فڕۆکەی بێفڕۆکەوانی تورکی بەشدارییان کردوە لە گرژییەکان حەلەب و هێرشیان کردوەتە سەر نەخۆشخانەی عوسمان و بۆردومانیان کردوە، ئەمەش لە دوای ئەوە دێت، کە چەکدارەکانی سوریا  نەیانتوانی هیچ پێشکەوتنێک لە گەڕەکە کوردییەکاندا  بەدەستبهێنن.

بەپێی سەرچاوەکانی ڕوانگەی سوری بۆ مافەکانی مرۆڤ، هێرسی فڕۆکە بێفرۆکەوانەکانی تورکیا زیانی زۆری لێکەوتوەتەوە لە نەخۆشخانەکەدا، ئەمە سەرەرای ئەوەی لە سەرەتای گرژییەکانەوە ژمارەیەکی زۆر بریندار هەیە تا ئەمڕۆ و  هۆشداری دەدرێت لە کارەساتێکی مرۆیی ئەگەر گرژییەکان بەردەوام بن.

ئەمڕۆ سێیەم رۆژە لەسەر یەک، کە پێکدادان و  گرژییەکان بە چری لە نێوان جەکدارەکانی سوریا و ئاسایشی ناوخۆی حەلەبدا بەردەوامە سەرەڕای بونی رێکەوتنی ئاگربەست لە نێوانیاندا

ئەمە لە کاتێکدایە، ناوچەکە روبەڕوو پێکدادانێکی قورس بوەتەوە، کە هەموو جۆرە چەکێکی تێدا بەکارهێنراوە لە لایەن گروپە چەکدارەکانی سوریاوە بۆ جونە ناو گەڕەکە کوردنشینەکانی حەلەب، بەڵا تا ئێستا سەرکەوتوو نەبون.

بە گوێرەی داتاکانی ئاسایشی ناوخۆی حەلەب، نۆ شەهیدی مەدەنی هەیە، کە جواریان ژنن و یەکیان منداڵە و ژامرەیەکی زۆریش خانو زیانیان بەرکەوتوە.

هاوسەرۆكی فەرمانگەی پەیوەندییەكانی دەرەوە لە ئیداری خۆسەر رایدەگەیەنێت، هەوڵە دیپلۆماسییەكان لەنێوان فەرەنسا و ئەمریكا  و تورکیادا  بەردەوامە بۆ هێوركردنەوەی رەوشی حەلەب  و پەیوەندییەكی چڕوپڕیان لەگەڵ واشنتۆن، پاریس و ئەنقەرە هەیە سەبارەت بە گۆڕانكارییەكان.

ئیلهام ئەحمەد ئاماژەی بەوەش كردوە، كە هەوڵ دەدەن ئەم وڵاتانە رۆڵی نێوەندگیر لەنێوان ئەوان و دیمەشقدا بگێڕن بۆ گەیشتن بە لێكتێگەیشتن و دوپاتیشیکردوەتەوە  لەگەڵ ئەو دەوڵەتانە هەوڵدەدەین بگەینە بەكارهێنانی زمانی عەقڵ و لۆژیك بۆ چارەسەری پرسەكان بەبێ پەنابردن بۆ ئەنجامدانی رەشەكوژی.

ناوبراو ئەوەشی خستوەتەڕوو، ئەوان وا لە پرسەکە دەڕوانن، کە پرسێکی ناوخۆیی سوریایە و دەبێت چارەسەرەکەشی هەر لە ناوخۆی سوریادا بێت.

ئیلهام ئەحمەد دەشڵێت؛ لە پەوەندیدان لەگەڵ دیمەشق بۆ ئارامکردنەوەی دۆخەکە و رێگریكردن لە ئاڵۆزی زیاتر، دوپاتیشیکردوەتەوە، ئەوان لەگەڵ ئاشتی و دیالۆگ و چارەسەری پرسەكاندان، بەڵام ژمارەیەک لە گروپەکان، کە لە لازقیەو سوەیدا رەشەكوژییان ئەنجامداوە دەیانەوێت هەمان شت بکەنەوە لە گەڕەکە کوردنشینەکانی حەلەب.

وەفدێكی باڵای پارتی دیموكراتی كوردستان سەردانی بارەگای مەكتەبی سیاسی یەكێتی كرد لە هەولێر و پرسی پێكهێنانی كابینەی نوێی حكومەتی هەرێم و هەڵبژاردنی سەرۆك كۆماری عیراق تاوتوێكرا .

پەیامنێری كوردسات نیوز لە هەولێر رایگەیاند، هیچ كام لە یەكێتی و پارتی راگەیەنراویان سەبارەت كۆبونەوەكە بڵاونەكردوەتەوە ، بەڵام بەپێی ئەو زانیاریانەی دەست كوردسات نیوز كەوتووە ، وەفدەكەی پارتی  لە كۆبونەوەكەدا داوای لە یەكێتی كردوە هەوڵەكان خێراتر بكرێن بۆ پێكهێنانی كابینەی نوێی حكومەتی هەرێم و لە بەرامبەردا پارتی لە بەغداد  دەنگ  بە كاندیدی یەكێتی دەدات بۆ پۆستی سەرۆك كۆماری عیراق  ، بەڵام  یەكێتی دوپاتیكردوەتەوە كە پرسی پێكهێنانی حكومەتی هەرێم جیاوازە لە پرسی سەرۆكایەتی كۆماری عیراق  ، هەربۆیە هیچ كام لە داواكارییەكانی یەكێتی سەبارەت بە پێكهێنانی كابینەی نوێی حكومەتی هەرێم ناگۆڕێت و ئامانجی یەكێتی ئەوەیە رێرەوی حكومرانی لە هەرێمی كوردستان راست بكرێتەوە .

بەپێی پێشبینییەکانی کەشناسی لە 48 سەعاتی داهاتوودا ئاسمان هەوری تەواو دەبێت و بارانبارین دەستپێدەکاتەوە.

بەڕێوەبەرایەتی گشتی کەشناسی هەرێم بڵاویکردەوە، ئەمڕۆ ئاسمان ساماڵ و پەڵەهەور دەبێت، لە کاتەکانی ئێوارە بۆ هەوری تەواو دەگۆڕێت.

ئاماژەی بەوەشکرد، سبەینێ هەینی ئاسمان بەگشتی هەوری تەواو دەبێت، لەکاتەکانی نیوەرۆ بارانبارین دەست پێدەکات.

کەشناسی هەرێم ئەوەشی خستەڕوو، بارانبارین سەرەتا لەناوچە سنوریەکانی رۆژئاوا لە پارێزگای دهۆک دەستپێدەکات، پاشان نمە باران سەرجەمی ناوچەکانی هەرێم دەگرێتەوە لەگەڵ بەفربارین لەناوچە شاخاوییە بەرزەکان هەروەها دابارین تا رۆژی شەممە بەردەوامی دەبێت .

بەرزترین پلەکانی گەرمای پێشبینیکراو بە پلەی سیلیزی

هەولێر :13 پلەی سیلیزی

پیرمام: 12 پلەی سیلیزی

سۆران: 9 پلەی سیلیزی

حاجی ئۆمەران: 2 پلەی سیلیزی

سلێمانی: 11 پلەی سیلیزی

چەمچەماڵ: 12 پلەی سیلیزی

دهۆک: 11 پلەی سیلیزی

زاخۆ: 9 پلەی سیلیزی

کەرکوک 13 پلەی سیلیزی

هەڵەبجە : 12 پلەی سیلیزی

گەرمیان : 15 پلەی سیلیزی

بڕیارە ئەمڕۆ وەفدێکی باڵای پارتی لە هەولێر سەردانی یەکێتی بکات و لەبارەی پرسی پێکهێنانی کابینەی نوێی حکومەتی هەرێم و عیراق کۆببنەوە.

پەیامنێری کوردسات نیوز رایگەیاند، بڕیارە ئەمڕۆ کۆبوونەوەیەکی باڵا لەنێوان یەکێتیی نیشتمانیی کوردستان و پارتی دیموکراتی کوردستان لە شاری هەولێر بەڕێوەبچێت.

سەرچاوەیەکی ئاگادار لە یەکێتی بە کوردسات نیوزی راگەیاند، کۆبوونەوەکە لە بارەگای مەکتەبی سیاسیی یەکێتی لە شاری هەولێر دەبێت.

لەلای خۆشیەوە ئاراس حەسۆ میرخان ئەندامی سەركردایەتی پارتی بە كوردسات نیوزی راگەیاند، ئەمڕۆ وەفدی یەكێتی و پارتی  لەسەر دوو تەوەر گفتوگۆ دەگەن كە بریتین لە خێراكردنی هەنگاوەكانی پێكهێنانی حكومەتی نوێی هەرێمی كوردستان و رێككەوتن لەسەر كاندیدێكی هاوبەش بۆ پۆستی سەرۆك كۆمار، چونكە جگە لە رێككەوتن هیچ بژاردەیەكی تریان لەبەردەمدا نییە.

سەرچاوەکە ئاشکرایکرد، تەوەری سەرەکیی گفتوگۆکانی نێوان وەفدی باڵای هەردوو حزب، تایبەت دەبێت بە پرسی پێکهێنانی کابینەی نوێی حکومەتی هەرێمی کوردستان و عیراق و یەکلاکردنەوەی پۆستی سەرۆک کۆماری عیراق.

بافڵ جەلال تاڵەبانی، سەرۆکی یەکێتیی نیشتمانیی کوردستان لەبارەی روداوەکانی شێخ مەقسوود و ئەشرەفییە لە حەلەب پەیامێکی بڵاوکردەوە و دەڵێت: "هیوادارم هەموولایەک دان بەخۆیاندا بگرن و ژیرانە مامەڵە لەگەڵ ئەم رووداوە نەخوازراوەدا بکەن".

دەقی پەیامەکە...

بە نیگەرانییەکی قووڵەوە لە رووداوەکانی شێخ مەقسوود و ئەشرەفییە لە حەلەب دەڕوانم، لەم کاتە سەخت و دژوارەدا دڵم لای گەلەکەمانە لە رۆژئاوای کوردستان.

هیوادارم هەموولایەک دان بەخۆیاندا بگرن و ژیرانە مامەڵە لەگەڵ ئەم رووداوە نەخوازراوەدا بکەن و لە رێگای دیالۆگ و گفتوگۆی بەرپرسیارانەوە کێشەکان چارەسەر بکەن.

پشتگیریی لە هەر هەوڵێک دەکەم بۆ هێورکردنەوەی رەوشەکە و چارەسەرکردنی ئاشتییانەی کێشەکان.

بافڵ جەلال تاڵەبانی

سەرۆکی یەکێتیی نیشتمانیی کوردستان

ئەمڕۆ چوارشەممە دەرباز كۆسرەت رەسول، ئەندامی مەكتەبی سیاسیی و لێپرسراوی مەكتەبی پەیوەندییەكانی یەكێتیی نیشتمانیی كوردستان، لە بارەگای مەكتەبی سیاسی لە شاری هەولێر، پێشوازی كرد لە "یان برایم" كونسوڵی گشتیی فەرەنسا لە هەرێمی كوردستان. 

لە دیدارەكەدا رەوشی ناوچەكە، پێشهاتە سیاسییەكان  و گفتوگۆكانی پێكهێنانی حكومەتی هەرێم و عیراق تاوتوێکرا، هەروەها گرنگی یەكڕیزی نێوان هێز و لایەنە سیاسییەكانی هەرێم دووپاتكرایەوە.

دەرباز كۆسرەت رەسول رایگەیاند:" بەرپرسیارێتی گەورەو دەرفەتمان لەپێشە، پێویستمان بەوەیە بەیەكڕیزی لەناوخۆو دەرەوە كاربكەین بۆ بەدیهێنانی مافە ڕەواكانی گەلەكەمان".

دەرباز كۆسرەت رەسول هەڵوێستی یەكێتیی نیشتمانیی كوردستانی لەبارەی رەوشی عیراق خستەڕوو، كەجەخت لەسەر چوارچێوە دەستووریی و یاساییەكان دەكاتەوە بۆ تێپەڕاندنی ئالنگارییەكان ، باشتركردنی باردۆخی هاونیشتمانیان و دەستەبەركردنی حكومڕانی تەندروست.

لە بەشێکی دیکەی دیدارەکەدا،  رەوشی سوریا و پێشهاتەكانی ناوچەكەیان تاوتوێکرد و جەختیان لە پاراستنی مافە رەواكانی گەلی كورد لە سوریا كردەوە  و بەپێویست زانرا كۆمەڵی نێودەوڵەتی بەوردی چاودێری بارودۆخی سوریا بكات.

لە کۆتایی دیدارەکەشدا، پاراستنی پەیوەندی بنیاتنەرانە لەگەڵ هاوبەشە نێودەوڵەتییەكان، بۆ پاراستنی سەقامگیری و گەشەپێدان بۆ بەرژەوەندی هەموو هاوڵاتیان لە عیراق و هەرێمی كوردستان، دوپاتكرایەوە.

هێزەکانی ئاسایشی ناوخۆی حەلەب، ئاماری نوێێ قورابانی ئەوو دوو گەڕەکەی بڵاوکردوەتەوە و رایگەیاندوە، ژمارەی گیان لەدەستدانی هاووڵاتییانی مەدەنی  بەرزبوەتەوە بۆ حەوت کەس و ژمارەی بریندارەکانیش گەیشتوەتە 54 بریندار.

ناوەندی راگەیاندن هێزەکانی ئاسایشی ناوخۆی حەلەب، لە راگەیەندراوێکدا  ئاماری نوێی قوربانییەکانی هەردوو گەڕەکی شێخ مەقسود و ئەشرەفییە بڵاوکردەوە.

لە راگەیەندراوەکەدا هاتووە؛ لە ئەنجامی ئەو تۆپبارانە دڕندانەیە کە لەلایەن گروپەکانی سەر بە حکومەتی دیمەشقەوە دەکرێتە سەر ناوچە نیشتەجێبووەکانی گەڕەکی شێخ مەقسود و ئەشرەفیەی شاری حەلەب ژمارەی قوربانییەکان  60 کەسی تێپەراند، کە زۆربەیان ژن و منداڵن.

بە گوێرەی راگەیەندراوەکە  تا ئێستا حەوت هاووڵاتی مەدەنی بەهۆی هێرش و بۆردومانەکانی سوپای سوریاوە گیانیان لەدەستداوە و 54 کەسی تریش بریندار بوون.

هێزەکانی ئاسایشی ناوخۆی حەلەب ئاماژەیان بەوەشکردوە، لەگەڵ گەمارۆیەکی خنکێنەر و تەواو، کە لەلایەن تانکەکانەوە بەسەر ئەو دوو گەڕەکەدا سەپێنراوە، ئەو دیمەنە دەسەڵاتی بەشار ئەسەدیان دێنێتەوە یاد، کە بە بیانوی هەڵبەستراو و تەواوی هێزی خۆی بەکاردەهێنا بۆ کردنە ئامانجی هاووڵاتییانی مەدەنی.

لەسەر روداوەکانی حەلەب، هەسەدە رایدەگەیەنێت ئەو هێرشە سەربازیانەی دەکرێتە سەر ئەو دوو گەڕەکە، تەنها لە حەلەبدا کاردانەوەی نابێت و تەواوی سوریا دەکاتە گۆڕەپانێکی جەنگ، داواش لە حکومەتی سوریا دەکات بەرپرسیارێتی هەڵگرێتو  کۆتای بە هێرشەکان بهێنێت.

ئەمڕۆ چوارشەممە، هەسەدە راگەیەندراوێکی بڵاوکردوەتەوە  و تێیدا هاتووە؛ زیاتر لە شەش مانگە گەڕەکەکانی شێخ مەقسود و ئەشرەفیە بەتەواوی لەلایەن هێزەکانی حکومەتی دیمەشقەوە گەمارۆ دراون و  چاودێری رەوشەکە دەكەن.

هەسەدە رایدەگەیەنێت؛ بانگەشی دەستپێکردنی ئۆپەراسیۆنی سەربازی لەلایەن هێزەکانمانەوە لە گەڕەکی شێخ مەقسوود و ئەشرەفیەوە  لەلایەن سوپای سوریاوە دورە لە راستییەوە و ئەم گەڕەکانە هیچ مەترسیەكی سەربازی دروست ناکەن و ناتوانرێت وەک خاڵی ئەنجامدانی هەر هێرشێک بۆ سەر شاری حەلەب بەکاربهێنرێن. 

لە راگەیەنداروەکەشدا هۆشداری دراوەتە حکومەتی کاتی سوریا، کاردانەوەی هێرشەکان بۆسەر ئەوو دوو گەڕەکە، تەنیا لە حەلەبدا سنوردار نابێت و تەواوی سوریا دەکاتە گۆڕەپانی جەنگ.

داواش لە حکومەتی سوریا دەکەن، بەرپرسیارێتی لە ئەستۆ بگرن و گەمارۆ هێرشەکانیان راگرن  بۆسەر ئەوو دوو گەرەکە، کە خەکی مەدەنی تێدا دەکرێتە ئامانج.

بەڕێوەبەرایەتیی گشتیی حەج و عومرەی هەرێمی کوردستان ئاگاداری کۆمپانیاکانی گواستنەوە دەکاتەوە، ئەوانەی ئارەزوی بەشداریکردنیان هەیە لە تەندەری گواستنەوەی کەلوپەلی حاجیان لە شاری مەککەی سعودیە بۆ پارێزگا و ئیدارە سەربەخۆکانی هەرێم، دەتوانن سەردانیان بکەن.

بەڕێوەبەرایەتییەکە رایگەیاندووە، کۆمپانیاکان دەتوانن لە ئەمڕۆ چوارشەممەوە (7ی کانونی دووەم) سەردانی بەشی یاسایی و گرێبەستەکان بکەن بۆ وەرگرتنی فۆرمی تەندەر.

ئاماژە بەوەشکراوە، دوا وادە بۆ گەڕاندنەوەی تەندەرەکان، سەعات 11:00ـی پێشنیوەڕۆی رۆژی یەکشەممە 18ی کانونی دووەمی 2026 دەبێت.

دوای ئەوەی بەهۆی لافاوەکەی مانگی رابردوو، زیانێکی زۆر بەر کتێبخانەی گشتیی چەمچەماڵ و ئەرشیفەکەی کەوت، لەسەر راسپاردەی خاتو گەلاوێژ، هەزاران سەرچاوەی زانستی و کتێب پێشکەش بە کتێبخانەکە دەکرێتەوە.

بۆردی وێبسایتی "خاتوو گەلاوێژ" کە پێکهاتبوون لە د. ژینۆ عەبدوڵڵا و جومعە شوانی، سەردانی کتێبخانەی گشتیی چەمچەماڵ-یان کرد و لەلایەن هێرش عەبدولڕەحمان، بەڕێوەبەری کتێبخانەکەوە پێشوازییان لێکرا.

لە دیدارەکەدا بەڕێوەبەری کتێبخانەکە باسی لەو زیانە زۆرانە کرد کە بەهۆی لافاوەکەوە بەر بینای کتێبخانەکە و سەرچاوە بەنرخەکان و ئەرشیفی رۆژنامە و گۆڤارەکان کەوتووە.

لە بەرامبەردا، بۆردی وێبسایتی خاتوو گەلاوێژ ئامادەیی هەموو هاوکارییەکیان دەربڕی و رایانگەیاند، لەسەر راسپاردەی خاتو گەلاوێژ، بە هەزاران ناونیشانی جیاواز لە کتێب و سەرچاوە بە زمانەکانی کوردی و عەرەبی لە بوارەکانی زمان و زانستە مرۆڤایەتییەکان پێشکەش بە کتێبخانەکە دەکەن.

هاوکات لەسەر داواکاریی بەڕێوەبەرایەتی کتێبخانەکە، ژمارەیەکی زۆر لە نامەی ماستەر و تێزی دکتۆرا بۆ دەوڵەمەندکردنەوەی کتێبخانەکە دابین دەکەن.

کتێبخانەی گشتیی چەمچەماڵ ساڵی 1976 دامەزراوە، پێش روداوی لافاوەکە خاوەنی 27 هەزار کتێب و 36 هەزار رۆژنامە و گۆڤار بووە، هاوکات سەرپەرشتی کتێبخانەکانی (سەنگاو، ئاغجەلەر، لەیلان، بابەگوڕگوڕ، دوبز، قەرەهەنجیر، شۆڕش، تێکیە و گۆپتەپە) دەکات.

وەزارەتی کارەبای هەرێم رایدەگەیەنێت، بەهۆی کێشەیەکی تەکنیکی لە تۆڕی کارەبا، سەعات 12:00ـی ئەمشەو کارەبای بەشێک لە پارێزگاکانی هەولێر، دهۆک و سلێمانی بڕا.

لە راگەیەندراوێکدا وەزارەتی کارەبا ئاماژەی بەوەکردووە، ئێستا دۆخەکە لەژێر کۆنترۆڵدایە و تیمەکانیان سەرقاڵی چاککردنەوەن، لە ماوەی سەعاتێکدا گرفتەکە چارەسەر دەکەن و دۆخەکە ئاسایی دەبێتەوە.

 

ساڵی رابردوو زیاتر لە 320 هەزار كەس سەردانی نەخۆشخانەی شاریان كردووە، تەندروستیی سلێمانیش دەڵێت: هەر لەو ساڵەدا زیاتر لە 14 هەزار نەشتەرگەری جۆراوجۆر ئەنجامدراوە.

بەرێوەبەرایەتی گشتی تەندروستیی سلێمانی ئاماری ساڵی رابردووی نەخۆشخانەی شاری بڵاوکردەوە و بەپێی ئامارەکە، 320 هەزار 137 کەس سەردانی نەخۆشخانەی شاریان کردووە، لەو ژمارەیەش 238 هەزار و773 نەخۆش سەردانی بەشی فریاکەوتن و 69 هەزار 632 نەخۆش سەردانی بەشی ئۆپ دی یان کردووە و چارەسەری پێویستیان بۆ کراوە.

ئاماژەی بەوەشکردووە، ساڵی رابردوو لە نەخۆشخانەی شار 68هەزار و666 نەخۆش داخڵکراون، لەو ژمارەیە 20 هەزار و 548 نەخۆش لە بەشی فریاکەوتن، 10 هەزار و 790 نەخۆش لە بەشی گورچیلەی دەستکرد، هەشت هەزار و 644 نەخۆش لەبەشی هەناوی و پێنج هەزار و 687 نەخۆش لە بەشی شکاوی بووە.

هاوکات هەر بەپێی ئامارەکە، 14 هەزار و 240 نەشتەرگەری جۆراوجۆر ئەنجام دراوە، 104 هەزار و 459 تیشک گیراوە، 41 هەزار و 615 سۆنەر، 871 هەزار و 590 شیکاری تاقیگەیی، 23 هەزار و 829 هێڵکاری دڵ، سێ هەزار و 646 ئیکۆ و حەوت هەزار و 855 چارەسەری سروشتی ئەنجام دراوە.

هاوكات ساڵی ڕابردوو لە نەخۆشخانەی شار 14,240 نەشتەرگەری جۆراوجۆر ئەنجام دراوە و 104,459 تیشك گیراوە ، هەروەها 41,615 سۆنەر و 871,590 شیكاری تاقیگەیی و 23،829 هێڵكاری دڵ و 3,646 ئیكۆ و 7,855 چارەسەری سروشتی ئەنجام دراوە.

حكومەتی عیراق دابەشكردنی بەشەخۆراكی لە هەرێم راگرت و داوادەكات ئەو پارەیەی لە هاوڵاتییان وەردەگیرێت زیاد بكرێت، بەڕێوەبەری خۆراكی سلێمانیش دەڵێت، لەگەڵ حكومەتی عیراق لە گفتوگۆدان بۆ چارەسەركردنی كێشەكە.

كامەران فەتاح، بەڕێوەبەری خۆراكی سلێمانی بە كوردسات نیوزی راگەیاند، حكومەتی عیراق داوایكردووە لەو پارەیەی كە لە هاووڵاتییان وەردەگیرێت لە بەرانبەر بەشەخۆراك بە بڕی 250 دینار زیاد بكرێت، بەجۆرێك بۆ هەر ئەندامێكی خێزان لە 750 دینارەوە بۆ هەزار دینار زیاد بكرێت، بەڵام بەهۆی جێبەجێنەكردنی ئەو داواكارییە لەلایەن حكومەتی هەرێمەوە، حكومەتی عیراق هیچ رەزامەندییەكی نیشاننەداوە بۆ دابەشكردنی سەبەتەی نوێی بەشەخۆراك .

ئەوەشی خستەڕوو، وەزارەتی بازرگانی هەرێم لەگەڵ حكومەتی عیراق لە گفتوگۆدایە بۆ چارەسەركردنی كێشەكە و چاوەڕوان دەكرێت لە چەند رۆژی داهاتوودا كێشەكە چارەسەر بكرێت.

بەڕێوەبەری خۆراكی سلێمانی وتیشی، بەشی سێ مانگ  بەشەخۆراك لە كۆگاكانی سلێمانی هەیە و هەر كاتێك حكومەتی عیراق رەزامەندی نیشان بدات، دەست بە دابەشكردنی بەشەخۆراكی مانگێك دەكرێت، وتیشی، حكومەتی عیراق ساڵی رابردوو هەشت بەشەخۆراكی دابەشكردووە، بەڵام لە هەرێم حەوت بەشەخۆراك دابەشكراوە.