کوردستان
کەشناسیی هەرێم ئاشکرایکرد، پێشبینی دەکرێت سبەینێ خۆڵبارینێکی کەم ناوچەکان بگرێتەوە و پلەکانی گەرماش کەمێک نزم دەبنەوە.
بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان، پێشبینییەکانی کەشوهەوای بۆ سەعاتی داهاتوو بڵاوکردەوە.
بەپێی پێشبینییەکانی کەشناسیی هەرێم، کەشی ئەمڕۆ دووشەممە ئاسمان ساماڵ دەبێت و ئاراستەی با بەرەو باکوری ڕۆژئاوا دەبێت و پلەکانی گەرماش نزیک دەبن لە تۆمارکراوەکانی دوێنێ.
سەبارەت بە کەشی سبەینێ سێشەممە، ئاماژەی بەوەکردووە، ئاسمان بە ساماڵی دەمێنێتەوە، بەڵام ئەگەری بەرزبوونەوەی تۆز و خۆڵێکی سوک لە کاتەکانی بەیانی تا دوای نیوەڕۆ لەئارادایە، هاوکات پلەکانی گەرما بە یەک بۆ دوو پلە بەراورد بە ئەمڕۆ نزم دەبنەوە.
بەرزترین پلەکانی گەرمای پێشبینیکراو بە پلەی سیلیزی
هەولێر: 42 پلەی سیلیزی
پیرمام: 38 پلەی سیلیزی
سلێمانی: 40 پلەی سیلیزی
هەڵەبجە:44 پلەی سیلیزی
چەمچەماڵ: 42 پلەی سیلیزی
دهۆک: 42 پلەی سیلیزی
زاخۆ: 43 پلەی سیلیزی
ئاکرێ:43 پلەی سیلیزی
گەرمیان:45 پلەی سیلیزی
سۆران: 40 پلەی سیلیزی
حاجی ئۆمەران:32 پلەی سیلیزی
تەندروستیی ئاکرێ ئاشکرایکرد، بەیانی ئەمڕۆ مێردمنداڵێکی تەمەن 14 ساڵ لە سنوری قەزای بەردەڕەش، لە کاتی کارکردن و هەڵگرتنەوەی پەتاتەدا کەوتووەتە ژێر تراکتۆر و بەو هۆیەوە گیانی لەدەستداوە.
نێچیرڤان فەخرەدین، لێپرسراوی راگەیاندنی بەڕێوەبەرایەتیی تەندروستیی ئاکرێ تایبەت بە کوردسات نیوزی راگەیاند؛ بەیانی ئەمڕۆ پێش سەعات 9:00، مێردمنداڵێکی تەمەن 14 ساڵ بەناوی (وەلید مەولود) لە کاتی کارکردندا لە کێڵگەیەکی پەتاتەدا لە نزیک گوندی "جوجەر"ی سەر بە ناحیەی رۆڤیا، کەوتووەتە ژێر تراکتۆرێک و بە سەختی بریندار بووە.
لێپرسراوی راگەیاندنی تەندروستیی ئاکرێ ئاماژەی بەوەشکرد، بەهۆی سەختیی برینەکەیەوە، مێردمنداڵەکە پێش ئەوەی بگەیەنرێتە نەخۆشخانە و ناوەندە تەندروستییەکان، گیانی لەدەستداوە و تەرمەکەی گواستراوەتەوە بۆ پزیشکی داد.
وەزارەتی کارەبای هەرێمی کوردستان ئاشکرایکرد، بەهۆی دروستبوونی کێشەیەکی تەکنیکی لە هێڵەکانی گواستنەوە، گرفتی کوژانەوەی گشتیی کارەبا لە بەشێکی پارێزگای دهۆک رویداوە و تیمەکانیش سەرقاڵی چارەسەرکردنین.
وەزارەتی کارەبای حکومەتی هەرێمی کوردستان لە راگەیەنراوێکدا هاووڵاتییانی ئاگادارکردەوە، کە بەهۆی دروستبوونی کێشەیەکی تەکنیکی لە هێڵەکانی گواستنەوەی وزەدا، کارەبا لە بەشێکی پارێزگای دهۆک بڕاوە.
لەمبارەیەوە، وەزارەتی کارەبا ئاماژەی بەوەکردووە، لە ئێستادا تیمە هونەرییەکانیان سەرقاڵی لێکۆڵینەوە و دۆزینەوەی هۆکاری سەرەکیی کێشەکەن، بەمەبەستی چارەسەرکردنی خێرا، راشیانگەیاندووە کە لە چەند سەعاتی داهاتوودا پێدانی کارەبا بۆ ئەو ناوچانە ئاسایی دەبێتەوە.
لە کۆتایی راگەیەنراوەکەدا، وەزارەتی کارەبا جەختی کردووەتەوە، لەگەڵ هەر پێشهاتێکی نوێ یان گەڕانەوەی تەواوەتیی کارەبا، راستەوخۆ هاووڵاتییان لە رێگەی میدیاکانەوە ئاگادار دەکەنەوە.
راوچیانی ماسی ئاگادار دەکرێنەوە، ئەگەر مۆڵەتی رەسمی و پێناسی تایبەتیان نەبێت بە راوەماسی، ئیتر ناتوانن بەردەوام بن لەکارەکەیان.
بەڕێوەبەرایەتی کشتوکاڵی دەربەندیخان لە راگەیەنراوێکدا سەرجەم راوچیانی دەریاچەکە ئاگادار دەکاتەوە، پێویستە ببنە خاوەنی مۆڵەتی رەسمی راوکردن.
ئاماژەی بەوەکردوە، لە ئەمڕۆوە بۆ وەرگرتنی مۆڵەتی راوکردن لە دەریاچەکەدا دەتوانن سەردانی بەڕێوەبەرایەتییەکە بکەن، بەمەبەستی تۆمارکردنی ناویان وەک راوچی رەسمی و دەرهێنانی پێناسی تایبەت بەو پیشەیە.
بەرێوبەرایەتیەکە داواشی کردوە، پێویستە راوچییەکان لەکاتی سەردانیکردنیاندا، کۆپیی کارتی نیشتمانیان پێبێت.
هۆشداریشدراوە، ئەم رێکارە ناچارییە و هەرکەسێک ناوی خۆی تۆمار نەکات و مۆڵەتی رەسمی وەرنەگرێت، بە تەواوی مافی راوکردنی لە دەریاچەکەدا نامێنێت.
مەزڵوم عەبدی هاوخەمی خۆی بۆ کۆچی دوایی لیندزی گراهام دەردەبڕێت و رایدەگەیەنێت، پشتگیرییە بەردەوامەکانی ئەو سیناتۆرە بۆ گەلی کورد و هەوڵەکانی بۆ ئاشتی لە سوریا هەمیشە لە یادەوەریی مێژوودا دەمێننەوە.
مەزڵوم عەبدی، فەرماندەی گشتیی هێزەکانی سووریای دیموکرات 'هەسەدە'، رایگەیاند، داکۆکیکردنە بەردەوامەکانی ئەو لە دۆزی کورد و هەوڵەکانی بۆ چەسپاندنی ئاشتی لە سووریا، لە مێژوودا دەمێننەوە.
مەزڵوم عەبدی لە پەیامێکدا ئاماژەی بەوەکردووە، "بە خەمێکی قوڵەوە هەواڵی کۆچی دوایی سیناتۆر لیندزی گراهاممان پێگەیشت؛ خزمەتە بەرفراوانەکانی، سەرکردایەتییە بنەماییەکەی، پشتگیرییە نەپساوەکانی بۆ گەلی کورد و داکۆکیکردنی سەرسەختی لە پێناو سوریایەکی ئاشتیانە و دادپەروەر، هەمیشە لە مێژوودا بە زیندوویی دەمێننەوە".
لە کۆتایی پەیامەکەشیدا، فەرماندەی گشتیی هەسەدە سەرەخۆشی و هاوخەمی قووڵی خۆی ئاراستەی خێزان، هاوڕێیان و کەسوکاری کۆچکردوو دەکات.
بافڵ جەلال تاڵەبانی، سەرۆکی یەکێتیی نیشتمانیی کوردستان، پەیامێکی هاوخەمی ئاڕاستەی شێخ نەهرۆ شێخ محەمەد شێخ عەبدولکەریم كەسنەزانی، سەرۆکی تەریقەتی قادری كەسنەزانی دەکات.
دەقی پەیامەکە
بەڕێز شێخ نەهرۆ شێخ محەمەد شێخ عەبدولکەریم كەسنەزانی، سەرۆکی تەریقەتی قادری كەسنەزانی
بە داخ و خەمێکی زۆرەوە، هەواڵی کۆچی دوایی خاتوو (سەردەشت شێخ محەمەد)ـی خوشکی بەڕێزتانمان پێگەیشت.
بۆ ئەم خەمە پرسە و سەرەخۆشی ئاڕاستەی بەڕێزتان و بنەماڵە سەربەرزەکەتان دەکەین کە رۆڵ و خزمەتەکانتان لە چاکەی گشتی و قووڵکردنەوەی پێکەوەژیاندا دیار و بەرچاوە و بەهایەکی گرنگی هەیە لای ئێمە.
لە خوای گەورە داواکارین گیانی کۆچکردوو بە بەهەشتی بەرین شادبکات، ئارامی و سەبووری بە هەموو لایەک ببەخشێت.
بافڵ جەلال تاڵەبانی
سەرۆکی یەکێتیی نیشتمانیی کوردستان
بافڵ جەلال تاڵەبانی پەیامێکی هاوخەمی بۆ كۆچی دوایی بەڕێز شێخ حەمەد بن خەلیفە ئال سانی باوکی بەڕێز شێخ تەمیم، میری دەوڵەتی قەتەر بڵاوکردەوە.
دەقی پەیامەکەی بافڵ جەلال تاڵەبانی سەرۆکی یەکێتیی نیشتمانیی کوردستان...
بە داخەوە هەواڵی كۆچی دوایی بەڕێز شێخ حەمەد بن خەلیفە ئال سانی باوکی بەڕێز شێخ تەمیم، میری دەوڵەتی قەتەرمان پێگەیشت.
بەبۆنەی ئەم كۆستەوە، سەرەخۆشی و هاوخەمی خۆمان ئاراستەی بنەماڵەی بەڕێزی میری قەتەر و گەلی دۆستی قەتەر دەكەین.
لە خوای گەورە داواكارین كۆچكردوو بخاتە بەر بەزەیی خۆی و بە بەهەشتی بەرین شادی بكات، سەبووری و ئارامیش بە كەسوكار و گەلی دۆستی قەتەر ببەخشێت.
قوباد تاڵەبانی، پەیامێکی هاوخەمی بۆ کۆچی دوایی سیناتۆر لیندزی گراهام بڵاوکردەوە و رایگەیاند، گەلی کورد هەرگیز دۆستە راستەقینەکانی خۆی لەبیر ناکات.
قوباد تاڵەبانی جێگری سەرۆک وەزیرانی هەرێم لە پەیامێکدا ئاماژەی بەوە کردووە: "بەدڵگرانییەوە هەواڵی کۆچی دوایی سیناتۆر لیندزی گراهام، دۆستی دڵسۆزی گەلی کوردمان پێگەیشت؛ ئێمە بە پێزانینەوە لە پشتگیرییە بەردەوامەکان و داکۆکیکردنی سەرسەختی ئەو لە دۆزی رەوای گەلی کورد دەڕوانین و بە زیندوویی لە یادەوەریماندا دەمێنێتەوە."
لە کۆتایی پەیامەکەشیدا، جێگری سەرۆک وەزیرانی هەرێم سەرەخۆشی ئاراستەی خێزانی کۆچکردوو و گەلی ئەمریکا دەکات.
بەرێوەبەری نەخۆشخانەی هیوا، سەركەوتنی نەشتەرگەرییەكی نوێی چاندنی مۆخی ئێسكی راگەیاند، ئاماژەی بەوەشکرد سەرەڕای ئەوەی وەک پێویست خزمەتی سەنتەری چاندنەوەی مۆخ لە سلێمانی ناكرێت، بەڵام توانیویانە یەکێک لە نەشتەرگەرییە دەگمەنەکان ئەنجام بدەن.
ئەمڕۆ یەکشەممە، د. یاد نەقشبەندی، بەڕێوەبەری نەخۆشخانەی هیوا لە کۆنفڕانسێکی رۆژنامەوانیدا رایگەیاند، بۆ یەکەمجار لەسەر ئاستی عیراق، نەشتەرگەرییەکی وردی چاندنی مۆخمان بە سەرکەوتوویی ئەنجامدا.
لە بارەی تێچوی نەشتەرگەریەکەشەوە، د. یاد وتی ئەگەر لە دەرەوە بکرایە 140 هەزار دۆلاری تێدەچوو.
بەرێوەبەری نەخۆشخانەی هیوا ئەماژەی بەوەکرد، تا ئێستا لە سەنتەرەکەیان، توانیویانە تا ئێستا 523 نەشتەرگەری مۆخ ئەنجام بدەن و رەخنەی لە حكومەتی هەرێم و عیراق گرت كە ئاوڕی پێویست لە سەنتەرەكە نادەنەوە.
ناوبراو لە کۆنفرانسەکەدا ئەوەشێخستەڕوو، تێچووی دارایی سەنتەرەكە لەلایەن قوباد تاڵەبانی، ئیدارەی گشتیی یەكێتی و خێرخوازانەوە دابین دەكرێت، لەكاتێكدا تەنها 40%ی خزمەتگوزارییەكانی بۆ نەخۆشانی سلێمانییە.
قوباد تاڵەبانی بە بۆنەی ماڵئاوایکردننی ئەندرو بیزلی، کونسوڵی گشتیی بەریتانیا پەیامێکی بڵاوکردەوە و دەڵێت؛ هاوکاری و خزمەتەکانی لەبیر ناکەین.
لە پەیامەکەی قوباد تاڵەبانیدا هاتووە؛ "ئەندرو بیزلی لە ماوەی ئەرکەکەیدا لە کوردستان رۆڵێکی بەهێزی بینی لە بەهێزترکردنی پەیوەندییەکانی نێوان بەریتانیا و هەرێم"
هەروەها ئاماژەی بەوەشکردوە، وەک هەرێمی کوردستان ناوبراو لە زۆر بواردا هاوکارمان بوو و بەتایبەتیش لە پرسی گەشەپێدانی ناوچەیی و کردنەوەی دەزگای پەرەپێدانی راپەڕین جێدەستی دیارە .
قوباد تاڵەبانی راشیگەیاندوە، هاوکاری و خزمەتەکانی لەبیر ناکەین، ئەمڕۆ ماڵئاواییمان لێ کرد و هیوای سەرکەوتنمان بۆ خواست لە ئەرکی داهاتوویدا .
دەروازەی نێودەوڵەتی باشماخ هاووڵاتیان و گەشتیاران ئاگاداردەکاتەوە، دوای راگرتنی بۆ ماوەی دوو سەعات، لە ئێستادا هاتوچۆی گەشتیاریلە دەروازەکە ئاسایی بوەتەوە.
ئەمڕۆ یەکشەممە، بەڕێوەبەرایەتی دەروازەکە رایگەیاندوە، ئەمڕۆ بۆ ماوەی دوو سەعات بەهۆی پچڕانی سیستمی ئەلەکترۆنی لە دیوی ئێران، هاتوچۆی گەشتیاری راگیرا.
ئاماژەی بەوەکردوە، لەئێستادا کێشەکە چارەسەرکراوە و هاتوچۆی گەشتیاری و بازرگانی لە دەروازەکە ئاسایی بوەتەوە.
ئەمە لە کاتێکدایە، پێشتر سەرچاوەیەک لە دەروازەکەوە بە کوردسات نیوزی راگەیاند بوو، بەهۆی بونی کێشە لە دیوی ئێران، هاتوچۆی گەشتیاری راگیراوە و ژمارەیەکی زۆر هاووڵاتیی ناتوانن بچنە ئێرانەوە.
کەشناسی هەرێم رایگەیاند، ئاسمان ساماڵ و گەرم دەبێت، بەراورد بە دوێنێ ئەمڕۆ و سبەینێش پلەکانی گەرما زیاتر بەرز دەبنەوە، گەرمیان بە 49 پلە گەرمترین و حاجی ئۆمەرانیش بە 36 پلەی سیلیزی ساردترین ناوچەی هەرێم دەبێت.
ئەمڕۆ یەکشەممە، بەڕێوەبەرایەتی گشتی کەشناسی و بوومەلەرزەزانی هەرێم، پێشبینی 48 سەعاتی داهاتوی بڵاوکردەوە بە گوێرەی پێشبینییەکان، پلەکانی گەرما بەرزدەبنەوە و زۆربەی ناوچەکانیش لە سەرو 40 پلەی سیلیزیەوە دەبن.
کەشناسی دەڵێت؛ ئەمڕۆ بەراورد بە تۆمارکراوەکانی دوێنێ دوو بۆ سێ پلەی سیلیزی بەرزدەبێتەوە و لە چەند ناوچەیەکی هەرێم نزیک دەبێتەوە لە نیوە کوڵین.
لەبارەی کەشی سبەینێشەوە، کەشانسی ئاماژەی بەوەکردوە پلەکانی گەرما بەردەوام دەبن لە بەرزبونەوە، بەراورد بە تۆمارکراوەکانی ئەمڕۆ و گەرمیان بە 49 پلە گەرمترین و حاجی ئۆمەرانیش بە 36 پلە ساردترین ناوچەی هەرێم دەبێت.
بەرزترین پلەکانی گەرمای پێشبینیکراو بە پلەی سیلیزی بۆ رۆژی دووشەممە؛
هەولێر: 45 پلەی سیلیزی
پیرمام: 41 پلەی سیلیزی
سلێمانی: 44 پلەی سیلیزی
هەڵەبجە:46 پلەی سیلیزی
چەمچەماڵ: 45 پلەی سیلیزی
دهۆک: 43 پلەی سیلیزی
زاخۆ: 44 پلەی سیلیزی
ئاکرێ:46 پلەی سیلیزی
گەرمیان:49 پلەی سیلیزی
حاجی ئۆمەران:36 پلەی سیلیزی
بەڕێوەبەرایەتی پۆلیسی دارستان و ژینگەی پارێزگای سلێمانی رایگەیاند، لە سنوری شارباژێر، بەهۆی تەقینەوەی مینەوە ئاگرێکی گەورە کەوتوەتەوە و بەتە هۆی سوتاندنی 500 دۆنم زەویی، کە داری سروشتی و پوش و پاوان بوون.
ئاماژەی بەوەشکردوە، ئاگرەکە لە سنوری گوندەکانی ( نۆرەباب ، پیرێسك ، سێوەنگ ، کانی شوان ) بووە و دەستبەجێ تیمەکانیان گەیشتونەتە شوێن ئاگرەکە.
پۆلیسی دارستان و ژینگەی سلێمانی دەڵێت؛ دوای گەیشتنی تیمەکانیان، بەهاوکاری بەرگریی شارستانی چوارتا و و خەڵکی ناوچەکە توانیویانە ئاگرەکە کۆنتڕۆڵ بکەن و بیکوژێننەوە.
بەڕێوبەرایەتی گشتیی تەندروستیی سلێمانی ئاماری شەش مانگی رابردووی کار و چالاکییەکانی خۆی راگەیاند، کە لەو ماوەیەدا زیاتر لە 20 هەزار نەشتەرگەری جۆراوجۆر بۆ هاووڵاتیان ئەنجام دراوە.
وەک لە راپۆرتەکەی تەندروستیی سلێمانیدا هاتووە؛ کۆی گشتی ئەو نەشتەرگەرییانەی لە نەخۆشخانەکان و ناوەندە تەندروستییەکانی سنورەکە ئەنجام دراون لە رێککەوتی (1ـی1ـی 2026 تا 1ـی 6ـی 2026) گەیشتووەتە 20,530 نەشتەرگەری، ئەمەش قەبارەی کار و ماندووبوونی تیمە پزیشکییەکان لەو ماوەیەدا نیشان دەدات.
لە بەشێکی تری ئامارەکەدا، وردەکاری جۆری نەشتەرگەرییەکان خراوەتەڕوو؛ بەشێوەیەک، کە 511 نەشتەرگەرییان لە جۆری تایبەت بوون و 2,773 نەشتەرگەرییان وەک نەشتەرگەری سەرو گەورە پۆلێن کراون.
هاوکات هەر لەم ماوەیەدا، 8,365 نەشتەرگەری گەورە و 5,411 نەشتەرگەری ناوەند و 3,470 نەشتەرگەری بچوک لە ناوەندە تەندروستییە جیاوازەکانی سلێمانیدا بە سەرکەوتوویی ئەنجام دراون.
دەزگای ئاسایشی هەرێمی کوردستان رایگەیاند، هێزەکانیان باندێکی سێ کەسییان لە سنووری پارێزگای هەولێر دەستگیرکردووە کە کاریان ساغکردنەوەی دراوی ساختە و فریودانی هاووڵاتیان بووە، ئاشکراشی کرد کە لە کاتی دەستگیرکردنیاندا ڕووبەڕووبوونەوەی چەکداری رویداوە.
بەڕێوەبەرایەتی ئاسایشی رۆژهەڵاتی هەولێر لە راگەیەندراوێکدا ئاماژەی بەوە کرد، دوای کۆکردنەوەی زانیاریی ورد و چاودێریکردنی توندی باندەکە، شەوی هەینی (10ی تەمموزی 2026) لە کاتژمێر 8:55ی شەو لە نزیک ناحیەی ئاشتی، ئۆپەراسیۆنی دەستگیرکردنیان جێبەجێ کراوە. لە کاتی داخرانی گەمارۆکەشدا، تۆمەتباران بە چەک روبەڕووی هێزەکانی ئاسایش بوونەتەوە و لە ئەنجامدا سێ کارمەندی ئاسایش بریندار بوون.
سەبارەت بە شێوازی کارکردنی باندەکە، ئاسایش روونی کردووەتەوە کە تۆمەتباران لە رێگەی تۆڕە کۆمەڵایەتییەکانی (تیکتۆک و سناپ چات)ەوە بانگەشەیان بۆ فرۆشتنی دراوی ساختە کردووە، و لە کاتی رێککەوتن و ئەنجامدانی مامەڵەدا، کڕیارەکانیان فریوداوە و بە زەبری چەک و هەڕەشەکردن، پارەیان لێ سەندوون.
لە ئێستادا سەرجەم تۆمەتبارانی باندەکە بەپێی ماددەکانی (406) و (56) لە یاسای سزادانی عیراقی راگیراون و پەڕاوی لێکۆڵینەوەیان بۆ کراوەتەوە بۆ گرتنەبەری رێکارە یاساییەکان لە دژیان.
بەهۆی شکانی بۆری ئاوی ئیفرازی سێ لە هەولێر بەشێکی زۆری گەڕەکەکانی ئەو شارە بێئاو دەبن، پەیامنێری کوردسات نیوزیش دەڵێت؛ ئێوارەی ئەمڕۆ پێدانی ئاو ئاسایی دەبێتەوە.
بڕیار محەمەد پەیامنێری کوردسات نیوز لە هەولێر رایگەیاند، لە ئێستادا تیمەکانی بەڕێوەبەرایەتی ئاوی هەولێر سەرقاڵی چاککردنەوەی بۆرییەکەن و چاوەڕوان دەکرێت لە چەند سەعاتی داهاتوودا بۆرییەکە چاکبکرێتەوە و پێدانی ئاو ئاسایی ببێتەوە.
وتیشی، لە چەند مانگێک پێش ئێستا لە هەمان شوێن بۆرییەکە شکابوو بەهۆیەوە زیاتر لە ٪40ـی دانیشتوانی هەولێر بەهۆیەوە بێئاو بوون.
پەیامنێری کوردسات نیوز ئەوەشی خستەڕوو، تا سەعات 8ـی ئێوارەی ئەمڕۆ سەرجەم کێشەکان لەلایەن تیمەکانەوە چارەسەر دەکرێت پێدانی ئاو ئاسایی دەبێتەوە.