کوردستان
کەشناسیی هەرێم رایدەگەیەنێت، لە ماوەی دوو رۆژی داهاتوودا ئاسمان بە ساماڵی و گەرمی دەمێنێتەوە و بۆ سبەینێش پلەکانی گەرما زیاتر بەرزدەبنەوە.
بەڕێوەبەرایەتیی گشتیی کەشناسی و بوومەلەرزەزانیی هەرێم رایگەیاند، ئەمڕۆ شەممە، ئاسمانی ناوچە جیاجیاکانی هەرێم ساماڵ و گەرم دەبێت، ئاراستەی با بەرەو باکوری رۆژئاوا دەبێت و خێراییەکەشی لەسەرخۆ بۆ مامناوەند دەبێت، پلەکانی گەرماش نزیک دەبنەوە لە تۆمارکراوەکانی دوێنێ.
سەبارەت بە کەشوهەوای سبەینێ یەکشەممە، کەشناسی ئاماژەی بەوەکردووە، ئاسمان بە ساماڵی و گەرمی دەمێنێتەوە و خێرایی و ئاراستەی با و مەودای بینین هاوشێوەی ئەمڕۆ دەبن، بەڵام پلەکانی گەرما بەراورد بە تۆمارکراوەکانی ئەمڕۆ، بە یەک تا دوو پلەی سیلیزی بەرزتر دەبنەوە.
بەرزترین پلەکانی گەرمای پێشبینیکراو بە پلەی سیلیزی
هەولێر: 42 پلەی سیلیزی
پیرمام: 39 پلەی سیلیزی
سلێمانی: 41 پلەی سیلیزی
هەڵەبجە: 43 پلەی سیلیزی
چەمچەماڵ: 42 پلەی سیلیزی
دهۆک: 41 پلەی سیلیزی
زاخۆ: 42 پلەی سیلیزی
حاجی ئۆمەران:35 پلەی سیلیزی
گەرمیان: 45 پلەی سیلیزی
گۆڤاری (دێر شپیگل)ـی ئەڵمانی بڵاویکردوەتەوە، حکومەتی بەرلین بەنیازە لە ماوەی دوو مانگدا تەواوی هێزەکانی لە هەرێمی کوردستان بکشێنێتەوە.
ئەمڕۆ هەینی، گۆڤارە ئەڵمانییەکە ئاشکرای کردوە، حوکمەتی بەرلین بەنیازی کشانەوەی تەواوی هێزەکانییەتی لەهەرێمی کوردستان و ئەم بڕیارەش دوای هەنگاوەکانی ئەمریکا دێت بۆ کشانەوەی هێزێکی پاراستن لە چوارچێوەی پلانەکانی خۆی بۆ کەمکردنەوەی ژمارەی سەربازەکانی لە ناوچەکەدا.
بەپێی زانیارییەکانی گۆڤارەکە، کە پشتی بە راپۆرتێکی لێژنەی بەرگریی لە پەرلەمانی ئەڵمانیا بەستووە، پڕۆسەی کشانەوەی هێزەکان تا کۆتایی مانگی ئەیلوول ی داهاتوو جێبەجێ دەکرێت.
ئەم کشانەوەیە لە کاتێکدایە کە ئەڵمانیا پێشتریش کەمکردنەوەیەکی بەرچاو و گەورەی لە قەبارەی هێزەکانی لە ڕۆژهەڵاتی ناوەڕاستدا ئەنجامداوە، ئەمەش بەهۆی ئەو نیگەرانییە ئەمنییە قووڵانەی کە لە لێکەوتەکانی شەڕی ئێرانەوە سەرچاوەیان گرتووە.
جیی باسە بە گوێرەی زانیارییەکان، لە ئێستادا نزیکەی 30 سەربازی ئەڵمانی لە سەربازگەیەکدا جێگیرین کە تایبەتە بە هیزەکانی ئەڵمانیا و دەکەوێتە نزیک فڕۆکەخانەی نێودەوڵەتیی هەولێر.
داهاتی نانەوتی ئەم هەفتەیەی سلێمانی و هەڵەبجە و هەردوو ئیدارەی سەربەخۆی راپەڕین و گەرمیان زیاتر لە چوار ملیار و 995 ملیۆن دینارە و بەراورد بە هەفتەی رابردوو کەمی کردوە.
ماڵپەڕی شەفافیەت بۆ خستنەڕووی داهاتی نانەوتی پارێزگاكانی سلێمانی و هەڵەبجە و هەردوو ئیدارەی سەربەخۆی راپەڕین و گەرمیان ئاشكرایكردووە، داهاتی ئەم هەفتەیە، بڕی چوار ملیار و 995 ملیۆن و 930 هەزار دینار بووە.
ماڵپەرەکە ئەوەشی خستووەتەڕوو، داهاتی ئەم هەفتەیە بەراورد بە هەفتەی رابردوو بە رێژەی زیاتر 53٪ كەمیكردووە، لەكاتێكدا هەفتەی رابردوو بڕی داهات نزیکەی نۆ ملیار دینار بوو.
بەپێی ماڵپەڕی شەفافیەت، داهاتی ئەم هەفتەیە، لە 85%ی بەشێوەی نەختینەو 15%ی بەشێوەی چەك بووە.
جێگەی ئاماژەیە، ماڵپەڕی شەفافییەت بۆ داهات و خەرجی، لەسەر راسپاردەی قوباد تاڵەبانی جێگری سەرۆک وەزیرانی هەرێم دامەزرا، ئێستا رۆژانە لە رێگەی ئەو ماڵپەڕەوە دەتوانیت سەرجەم داهاتە نانەوتییەکانی هەردوو پارێزگای سلێمانی و هەڵەبجە و ئیدارە سەربەخۆکانی راپەڕین و گەرمیان بزانیت.
لەهەنگاوێکی نوێدا بەئاراستەی خزمەتکردن بە خوێندنی دایک لەناوچە جێناکۆکەکان، فراکسیۆنی یەکێتی لە بەغداد پشتیوانی بەردەوامی خوێندنی کوردیی لە خانەقین دەکات.
سروە محەمەد پەرلەمانتاری فراکسیۆنی یەکێتی لەپەرلەمانی عیراق بەکوردسات نیوزی راگەیاند، رەزامەندی وەزیری پەروەردەی عیراقیان وەرگرتوە کە هیچ خوێندنگەیەکی سەر بەخوێندنی کوردیی لە قەزای خانەقین دانەخرێت.
بەپێی نوسراوەکەی ئەندامەکەی ئەنجومەنی نوێنەران بۆ وەزیری پەروەردە رونکراوەتەوە، خوێندنی کوردیی لە خانەقین بەدەربکرێت لە بڕیار و رێنماییەکان کە لە دەستەی نەزاهەی عیراقەوە دەرکراون و دەڵێت ژمارەی قوتابخانەکان کەمبکرێتەوە کە ژمارەی خوێندکاریان کەمە و لەخوێندنگەیەکدا کۆبکرێنەوە.
سروە محەمەد راشیگەیاند، وەزیری پەروەردەی عیراق رەزامەندیداوە کە خوندنگەکانی خوێندنی کوردیی لە خانەقین ئەو رێنماییانەی دەستەی نەزاهە نەیانگرێتەوە و لە داهاتووشدا، خوێندنگەکانی خوێندنی کوردیی لە خانەقین وەک خۆیان بمێننەوە و کەمنەکرێنەوە.
ئەو هەنگاوەی پەرەمانتارەکەی یەکێتی، خزمەتێکی گەورە بەخوێندنی کوردی لە ناوچە جێناکۆکەکان دەکات.
سەرۆكی جوڵانەوەی نەوەی نوێ رایگەیاند، لە دادگای فیدرالی سكاڵایان لەسەر حكومەتی هەرێمی كوردستان تۆماركردووە و دەبێت بڕیارەكانی لە مانگی تەمموزی 2023ەوە هەڵبوەشێنەوە.
شاسوار عەبدولواحید سەرۆكی جوڵانەوەی نەوەی نوێ لە كۆنفڕانسێكی رۆژنامەوانیدا رایگەیاند، حكومەتی هەرێمی كوردستان لە 10ی تەمموزی 2023ەوە بووەتە كاربەڕێكەر و تەواوی ئەو بڕیارانەی لە دوای ئەو وادەیە دراون دەبێت هەڵبوەشێنەوە و لەسەر ئەو بابەتەش سكاڵای یاساییان لە دادگای فیدراڵی تۆماركردووە.
دەشڵێت، ماوەی سێ ساڵە حكومەت بڕیار دەدات و بڕیارەكانیشی یاسایی نین چونكە حكومەت كاربەڕێكەرە نەك بڕیار و یاسا دەربكات.
قوباد تاڵەبانی، جێگری سەرۆک وەزیرانی هەرێمی کوردستان سەردانی پاتریارکی کڵێسای کلدانی لە عیراق و جیهان کردووە و رایگەیاند: پشتیوانی خۆیان بۆ دووپاتکردووەتەوە و جەختیشیان لە برایەتی لەناو گەلاندا کردووەتەوە.
جێگری سەرۆک وەزیران رایگەیاند: خۆشحاڵ بووم بە دیداری دووبارە لەگەڵ بەڕێز پاتریارک مارپۆڵسی سێیەم نۆنا، پاتریارکی کڵێسای کلدانی لە عێراق و جیهان.
ئاماژەی بەوەشداوە: پشتیوانیی خۆمانمان بۆ دووپات کردەوە و جەختمان کردەوە لەسەر پێویستیی پێکەوەکارکردنی پیاوانی ئایینی هەموو پێکهاتە ئایینییەکانی کوردستان بۆ قووڵکردنەوەی گیانی تەبایی و برایەتی لەناو وڵاتەکەماندا.
وەزارەتی پەروەردەی هەرێم، خوێندکارانی بەشداربوی تاقیکردنەوە گشتییەکانی پۆلی 12ـی ئامادەیی بەهەموو بەشەکانیەوە بۆ ساڵى خوێندنى (2025-2026) ئاگادار دەکاتەوە، ئەنجامی تاقیکردنەوەکان رادەگەیەندرێت.
وەزارەتی پەروەردە خوێندکاران ئاگاداردەکاتەوە، سایتی ئەزمونەکان کارا کراوە و لەگەڵ راگەیاندنی ئەنجامەکان دەتوانن لە رێگەی سایتی ئەزمونەکانەوە ئەنجامەکانیان بزانن.
ئاماژەی بەوەشکردوە، تەنها دوای یەک سەعات لە راگەیاندنی ئەنجامەکان خوێندکار دەتوانێت بینەری پەڕەی وەڵام ( سۆما )کانی ببێت، لە رێگەی لینکی سۆما ئەزمونەکان.
لینکی زانینی ئەنجامەکان
لینکی زانینی وەڵامی سۆمای خوێندکاران
بڕیاری بەعەرەبكردنی ناوی شارەكوردییەكان لە رۆژئاوای كوردستان كاردانەوەی لێدەكەوێتەوە و ئەمڕۆش بەو مەبەستە رێپێوانێكی جەماوەری لە شاری كۆبانێ بەڕێوەدەچێت.
بە پێچەوانەی خاڵەكانی رێكکەوتنەكەی نێوان مەزڵوم عەبدی فەرماندەی هێزەكانی سوریای دیموكرات و ئەحمەد شەرع سەرۆكی سوریا كە لە 29 مانگی یەكی ئەمساڵ بۆ تێكەڵكردنی هێزەكان ئیمزاکرا سیاسەتەكانی حكومەتی سوریا دژ بە كوردانی رۆژئاوا رێگەی هاوشێوەی رژێمی پێشووی بەعس دەبڕێت.
شاری كۆبانێ كە شارێكی كوردنشینە لە ساڵی 1911ـەوە بەو ناوە دەناسرێت، بەڵام لەسەردەمی بەعسدا لە چوارچێوەی پلانی بە عەرەبكردن ناوی شارەكە گۆڕدرا بۆ عەینەلعەرەب لە دوای شۆرشی رۆژئاوای كوردستان جارێكی دیكە بە رەسمی ناوی كۆبانێ گەڕایەوە سەر زمانەكان .
لە دوایین هەوڵی دژە كورد لە لایەن حكومەتی سوریاوە ناوی كۆبانێ و ناوچەكانی دەوروبەری بەعەرەبیكراوە و لە دژی ئەمەش كەمپەینێك لەسەر تۆڕە كۆمەڵاتییەكان لە ژێڕ ناوی كۆبانێ ناسنامەمانە دەستیپێكردووە و بڕیارە ئەمڕۆش لە كۆبانێ رێپێوانێكی جەماوەری رێكبخرێت.
وەزارەتی کارەبای هەرێم راگەیەندراوێکی بڵاوکردوەتەوە و دەڵێت؛ لە ئێستادا توانیویانە کارەبای بەردەوام بۆ 90%ی هاوبەشان دابین بکەن، ئاماژەی بەوەشکردوە ئەمە بوەتە هۆی کوژاندنەوەی شەش هەزار موەلیدە لە سەرناسەری هەرێمدا.
لە راگەیەندراوەکەی کارەبای هەرێمدا هاتووە؛ لەپێناو رێکخستنەوەی تۆڕی کارەبا و کەمکردنەوەی بارگرانی لەسەر هاووڵاتییان، توانراوە پرۆژەکانی بەرهەمهێنان، گواستنەوە و دابەشکردنی كارەبا بەرفراوان بکرێن، کە دەرئەنجامەکەی کوژاندنەوەی 6,000 موەلیدە و زیادبوونی بەرچاوی کاتەکانی پێدانی کارەبای نیشتمانی بووە لە سەرانسەری هەرێمی كوردستان.
ئاماژەی بەوەشکردوە، توانیویانە؛ بە بڕی 1974 مێگاوات بەرهەمهێنانی کارەبا زیاد بکەن و ئەمەش هاوکار دەبێت بۆ زیاتر پێدانی کارەبای نیشتمانی بە هاووڵاتیان.
دەقی راگەیەندراوەکەی وەزارەتی کارەبای هەرێم
لەپێناو رێکخستنەوەی تۆڕی کارەبا و کەمکردنەوەی بارگرانی لەسەر هاووڵاتییان، توانراوە پرۆژەکانی بەرهەمهێنان، گواستنەوە و دابەشکردنی كارەبا بەرفراوان بکرێن، کە دەرئەنجامەکەی کوژاندنەوەی 6,000 موەلیدە و زیادبوونی بەرچاوی کاتەکانی پێدانی کارەبای نیشتمانی بووە لە سەرانسەری هەرێمی كوردستان.
یەكەم: لە سێكتەری بەرهەمهێنانی كارەبا 1,974 مێگاوات كارەبای تازە، لەم وێستگانەی خوارەوە بەرهەم هێنرا:
1- لە وێستگەی خورماڵە (500 مێگاوات).
2- وێستگەی هەڵمیی خەبات (300 مێگاوات).
3- وێستگەی گەرمیان (165 مێگاوات).
4- وێستگەی بازیان (750 مێگاوات).
5- وێستگەی دێرەلۆك (38 مێگاوات).
6- لە وێستگەكانی هەولێر، سلێمانی، دهۆك (87 مێگاوات).
7- لە وزەی خۆر : 134 مێگاوات لە سەرانسەری هەرێمی کوردستان.
دووەم: لە سێكتەری گواستنەوەی كارەبا توانیمان 61 پرۆژە ئەنجام بدەین بە گوژمەی 372,84 ملیۆن دۆلار
1- لە هەولێر و سۆران: 31 پرۆژە، بە گوژمەی 233,72 ملیۆن دۆلار.
2- لە دهۆك و زاخۆ: 8 پرۆژە، بە گوژمەی 40,13 ملیۆن دۆلار.
3- لە سلێمانی، هەڵەبجە، گەرمیان و ڕاپەرین: 22 پرۆژە، بە گوژمەی 98,99 ملیۆن دۆلار.
سێیەم: لە سێكتەری دابەشكردنی كارەبا توانیومانە 3,880 پرۆژە ئەنجام بدەین بە گوژمەی 259،27 ملیار دینار
1- لە هەولێر و سۆران : 1,125 پرۆژە، بە گوژمەی 109,742 ملیار دینار.
2- لە دهۆك و زاخۆ : 531 پرۆژە، بە گوژمەی 35,239 ملیار دینار.
3- لە سلێمانی، هەڵەبجە، گەرمیان و ڕاپەرین: 2,224 پرۆژە، بە گوژمەی 114,286 ملیار دینار.
4- گەیاندنی كارەبا بۆ 575,000 هاوبەشی كارەبای تازە.
5- دابینكردنی كارەبای بەردەوام بۆ لە 90%ی هاوبەشانی كارەبا لە هەرێمی كوردستان.
6- كوژانەوەی 6,000 موەلیدە لەناو گەڕەكەكان.
7- لابردنی زیاتر لە 62,688 سەرپێچیكار لەسەر تۆڕی كارەبای هەرێمی كوردستان.
8- هەمواركردنەوەی گرێبەستەكانی بەرهەمهێنانی كارەبا، لە ئەنجامدا ساڵانە زیاتر لە 300 ملیۆن دۆلار بۆ گەنجینەی حكومەتی هەرێمی كوردستان گەڕایەوە.
بڕیارە ئەمڕۆ پێنجشەممە، خوێندكارانی پۆلی 12 لە هەرێم ئەنجامی كۆتایی خولی یەكەمی تاقیكردنەوە گشتییەكان وەربگرنەوە.
دوای ئەوەی دوێنێ چوارشەممە، خوێندكارانی پۆلی 12 كۆتا تاقیكردنەوەی خولی یەكەمیان ئەنجامدا، بڕیارە ئەمڕۆ وەزارەتی پەروەردە ئەنجامی تاقیكردنەوەكان بداتەوە بە خوێندكاران و لینكی وەرگرتنەوەی ئەنجامەكان كارا بكات.
چاوەڕوان دەكرێت، هاوشێوەی ساڵانی رابردوو لینكەكە لەدوای سەعات 6:00ـی ئێوارەوە كارا بكرێت و خوێندكاران دەتوانن لەرێگەی یوزەرنەیم و پاسوۆردی خۆیانەوە نمرەكانیان وەربگرنەوە.
هاوكات، بڕیارە هاوشێوەی ساڵی رابردوو، وەزارەتی پەروەردە هیچ رێوڕەسمێك ئەنجام نادات و خوێندكارە یەكەمەكان راناگەیەنێت.
پەیامنێری کوردسات نیوز رایگەیاند، دوای هەفتەیەک لەڕفاندنی هەردی زەینەڵ، ئەو جوتیارەی دانیشتوی سنوری ناحیەی پردێیە لە کەرکوک ئازادکرا و گەڕاوەتەوە ناو خێزانەکەی
ئاسۆ ئەحمەد، پەیامنێری کوردسات نیوز، لە کەرکوک رایگەیاند، هەردی زەینەڵ، کە جوتیارێکی کوردە و خەڵکی کوندی قەزنەفەری سەر بە ناحیەی پردێیە، دوای شەش رۆژ لە رفاندنی ئازاد کرا.
بە گوێرەی زانیارییەکانی کوردسات نیوز، هەردی زەینەڵ لەلایەن چەکدارانی داعشەوە رفێنرابوو، تا ئێستا نازانرێت لەبەرانبەر چێدا ئازاد کراوە و ناوبراو باوکی چوار منداڵە و لە دایکبووی ساڵی 1989ـیە.
هەردی زەینەڵ، ئێوارەی رۆژی هەینیی رابردوو، لە کاتی کارکردندا لە یەکێک لە کێڵگەکانی گەنمەشامیی، لەلایەن چەکدارانی داعشەوە رفێنرا و دواتر هێزە عیراقییەکان چونەشوێن کارەکەیو دوای گەڕان تەنها ئۆتۆمبێلەکەیان دۆزیەوە.
قوباد تاڵەبانی، جێگری سەرۆک وەزیرانی هەرێم، پەیامێکی بڵاوکردوەتەوە تێیدا هاتووە؛ نێچیرڤان بارزانی سەرکردەیەکی نێودەوڵەتی و خاوەن دیدگایە، پیرۆزبایی وەرگرتنی مەدالیای رێزلێنانی ئەستێرەی ئیتاڵیا بە پلەی سوارچاکی خاچی مەزنی لێ دەکات.
ئاماژەی بەوەشکردوە، هەموو ئەوانەی لە نزیکەوە نێچیرڤان بارزانی دەناسن، شاهیدی بۆ دەدەن کە هەمیشە هەوڵ دەدات کێشەکان لە رێگەی گفتوگۆ و لێکتێگەیشتنەوە چارەسەر بکات.
ئەوەشیخستوەتەڕوو، ئەم شێوازە سیاسەتکردنە بۆ کوردستان و عیراق و ناوچەکە، کە پڕە لە ململانێ و ناکۆکیی توند و ناپێویست، زۆر گرنگ و پێویستە.
لە کۆتایشدا قوباد تاڵەبانی پیرۆزبایی لە نێچیرڤان بارزانی دەکات بەبۆنەی وەرگرتنی مەدالیای رێزلێنانی ئەستێرەی ئیتاڵیا بە پلەی سوارچاکی خاچی مەزن.
ئامادەكردنی لیستی مووچەی مانگی حەوت دەستپێدەكات و كێشەی داهاتی نانەوتیش هێشتا بە هەڵواسراوی ماوەتەوە
لە كاتێكدا هێشتا مووچەی مانگی شەشی فەرمانبەرانی هەرێمی كوردستان دابەش نەكراوە، وەزارەتی دارایی و ئابووری هەرێم سیستەمی پەیڕۆڵی بۆ ئامادەكردنی لیستی مووچەی مانگی حەوت (تەممووز) كارا كردووە.
بەپێی زانیارییەكانی پەیامنێری كوردسات نیوز، وەزارەتی دارایی مۆڵەتی هەفتەیەك بۆ 10 رۆژی بەخشیوەتە سەرجەم وەزارەت و فەرمانگەكان بۆ ئەوەی لیستەكانیان بەپێی سیستەمەكە ئامادە بكەن و رەوانی بكەن.
سەبارەت بە شایستە داراییەكانی هەرێم و ناردنی پارە لە بەغدادەوە، سەرچاوەیەكی بەرپرس لە وەزارەتی دارایی و ئابووری هەرێم چەند زانیارییەكی گرنگی بۆ بڕیار محەمەد پەیامنێری كوردسات نیوز ئاشكرا كردووە، رایگەیاندووە، هەرێمی كوردستان بڕی زیاتر لە 60ملیار دیناری وەك داهاتی نانەوتی ئامادە كردووە تا ڕەوانەی بەغدادی بكات.
بەڵام تا ئێستا وەزارەتی دارایی حكومەتی فیدراڵ رەزامەندی پێشان نەداوە لەسەر كەمكردنەوەی ئەو 120ملیار دینارەی كە مانگانە وەك داهاتی نانەوتی لە پشكی هەرێم دەبڕدرێت.
ئەو سەرچاوەیە راشیگەیاندووە، ئەگەر بەغداد بۆ ئەم مانگەش هاوشێوەی مانگی رابردوو بڕی 120ملیار دینار لە مووچەی هەرێم ببڕێت، ئەوا كورتهێنانێكی دارایی زۆر گەورە دروست دەبێت، ئەمەش ڕاستەوخۆ كێشە و ئاستەنگی جدی بۆ پڕۆسەی دابەشكردنی مووچەی مانگی شەشی مووچەخۆران دروست دەكات.
باڵیۆزی فەرەنسا لە عیراق و وەفدێکی یاوەری، سەردانی مەزاری سەرۆک مەم جەلالیان کرد و چەپکەگوڵی رێز و وەفەیان لەسەر مەزارەکەی دانا.
رۆژی سێشەممە رێکەوتی 7ـی 7ـی 2026 باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی و بەڕێز یوسف زۆزانی، جێگری سەرۆکی دامەزراوەکە و وەفدێکی مەکتەبی سکرتاریەتی سەرۆک مام جەلال پێشوازیان لە پاتریک دۆرێل، باڵیۆزی فەرەنسا لە عیراق و وەفدی یاوەری کرد.
وەفدەکەی باڵیۆزخانەی فەرەنسا لە عیراق چەپکەگوڵی رێز و وەفایان لەسەر مەزاری سەرۆک مام جەلال دانا و لە تیانووسی یادگارییەکانی سەر مەزارەکە، بەشکۆوە ئاماژەی بە رۆڵی سەرۆک مام جەلال کرد و پەیوەندییە باشەکانی عیراق و وڵاتی فەرەنسا لەسەردەمی سەرۆکایەتیی سەرۆک مام جەلال وەک سەرۆک کۆماری عیراق بەرز نرخاند و لە کارەکانی رابردووی سەرۆک مام جەلالی لە پێشخستنی پرۆسەی ئاشتی، گفتوگۆ، دیموکراسی و نزیککردنەوەی نێوان پێکهاتە جیاوازەکانی عیراقی بە گرنگ وەسف کرد.
هاوکات، باڵیۆزی فەرەنسا سەرۆک مام جەلالی وەک سیمبولێکی یەکڕیزی، ئاشتی و هاوبەشی نیشتمانی لە یاد و هۆشی گشتیی عیراقدا پیشاندا.
دەزگای ئاسایشی هەرێم راگەیەنراوێکی لەبارەی دەستگیرکردنی سێ تیرۆرستی داعش بڵاوکردووەتەوە و تێیدا هاتووە، تیرۆستەکان لەڕێگەی تۆڕە کۆمەڵایەتییەکانەوە بانگەشەیان بۆ بیری توندڕەوی کردووە.
دەزگای ئاسایش ئاماژەی بەوەشداوە، بەڕێوەبەرایەتی گشتی ئۆپراسیۆنەکانی ئاسایش دوای بەدواداچوون لەسەر بنەمای ئاڵوگۆڕی زانیاری و هەواڵگری، لەمانگەکانی چوار و شەشی 2026دا، لە سنوری پارێزگاکانی سلێمانی و کەرکوک سێ تیرۆریستی داعشیان دەستگیرکرد.
ئەوەشی روونکردووەتەوە، لە درێژەی لێکۆڵینەوەکاندا تیرۆریستان دانیان بەوەداناوە لەتۆڕەکۆمەڵایەتیەکانەوە دەعوەیان کردووە و هانی گەنجان و هەرزەکارانیان داوە بۆ وەرگرتنی فکرەی توندڕەوی و چوونە ناو رێکخستنەکانی داعش و هیجرەتکردن بۆ ناو ڕیزەکانی داعش.
ئەوەشی خستووەتەڕوو، لەئێستادا تۆمەتباران بەماددەی دوو لە یاسای تیرۆر راگیراون و لێکۆڵینەوە لەدۆسییەکانیان بەردەوامە.
قوباد تاڵەبانی، لە دووەم رۆژی سەردانەکەیدا بۆ ئەلبانیا، چەند دامەزراوەیەکی گرنگی تەکنەلۆژی و ئابوریی ئەو وڵاتەی بەسەرکردەوە و لەگەڵ لێپرسراوانی باڵادا پرسی گواستنەوەی ئەزموونی ئەلبانیا لە بوارەکانی حکومەتی ئەلیکترۆنی، ژیریی دەستکرد و پەرەپێدانی تواناکانی تەکنەلۆژیای زانیاری بۆ هەرێمی کوردستان تاوتوێ کرد.
قوباد تاڵەبانی، جێگری سەرۆک وەزیرانی هەرێم لە دووەمین رۆژی سەردانەکەیدا بۆ ئەلبانیا هەردوو دەزگای نیشتمانیی کۆمەڵگای زانیاری و ئاژانسی ستارت ئەپی ئەو وڵاتەی بەسەرکردەوە و لەلایەن مارتن کاجۆ، بریکاری وەزیری ئابوری و داهێنان و ئیگلی تافا، بەڕێوەبەری گشتیی دەزگای نیشتمانیی کۆمەڵگای زانیاری و ئارجان یمێری، بەڕێوەبەری ئاژانسی ستارت ئەپ ئەلبانیاوە پێشوازی لێ کرا.
لە هەردوو کۆبوونەوەکەدا ئەمڕۆ بەڕێوەچوون باس لە رۆڵی ژیریی دەستکرد لە گەشەپێدانی ئابوری و باشترکردنی خزمەتگوزارییە گشتییەکان و کاراکردنی دامەزراوەکان کرا.
هەردوولا جەختیان کردەوە لەسەر پێویستیی هاوکاری و گواستنەوەی ئەزمون و شارەزایی لەنێوان هەرێمی کوردستان و کۆماری ئەلبانیا بە تایبەت لە بوارەکانی حکومەتی ئەلیکترۆنی و ژیریی دەستکرد و پاراستنی داتا و پەرەپێدانی تواناکان لە بواری تەکنەلۆژیای زانیاریدا.
لەم چوارچێوەیەدا حکومەتی ئەلبانیا ئامادەیی خۆی دەربڕی بۆ ناردنی پسپۆڕانی وڵاتەکەی بۆ هاوکاریکردنی حکومەتی هەرێم لە بەکارهێنانی ژیریی دەستکرد و بە ئەلیکترۆنیکردنی دامەزراوەکان.