بەرەبەیانی ئەمڕۆ مەزڵوم كۆبانێ رایگەیاند، لە رێگەی نێوەندگیری نێودەوڵەتی بۆ راگرتنی هێرش و پێشێلکارییەکانی دژی گەلەکەیان لە حەلەب، گەیشتونەتە لێکتێگەیشتنێک، کە دەبێتە هۆی ئاگربەست و  گواستنەوەی شەهیدان، بریندارەکان، هاووڵاتیانی مەدەنی گیریخواردوو و شەڕڤانان لە گەڕەکەکانی ئەشرەفیە و شێخ مەقسوودەوە بەرەو باکور و رۆژهەڵاتی سوریا.

مەزڵوم کۆبانێ فەرماندەی گشتی هێزەکانی سوریای دیموکرات" هەسەدە"  لە تۆڕی کۆمەڵایەتی ئێکس پەیامێکی بڵاوکردوەتەوەو رایگەیاندوە؛  بە نێوەدنگیری واتانی نێودەوڵەتی گەیشتون بە رێککەوتن.

كۆبانێ، داواشی لە وڵاتانی نێوەندگیری كردوە پابەندی بەڵێنەكانیان بن بۆ وەستاندنی پێشێلكارییەكان و كاربكەن بۆ گەڕانەوەی ئاوارەكان بە سەلامەتی بۆ سەر ماڵ و حاڵی خۆیان.

لای خۆشیەوە  ئاژانسی هەواڵی "سانا" رایگەیاند، دواین پاس كە هێزەکانی ئاسایشی ناوخۆی تێدابوون لە گەڕەكی شێخ مەقسوود شاری حەلەبیان  بەرەو باكووری رۆژهەڵاتی سوریا بەجێهێشتوە.

ئەمەش لە کاتێکدایە لە رۆژی 6ـی 1ـی ئەمساڵەوە چەکدرانی سوریا گەمارۆی گەڕەکە کوردنشینەکانی حەلەبیان داوە و بە چەکی قورس و سوک بەردەوام بوون لە هێرشکردنە سەریان و بەهۆیەوە سەدان هاووڵاتی بوون بە قوربانی  و هەزاران هاوڵاتیش ئاوارە بوون.

بافڵ جەلال تاڵەبانی، سەرۆکی یەکێتیی نیشتمانیی کوردستان لە ماڵی مام لە بەغداد پێشوازی لە رەیان کلدانی، ئەمینداری گشتیی بزووتنەوەی بابلیون کرد.

لە دیدارێکدا رەفعەت عەبدوڵا، جێگری سەرۆکی یەکێتی، دەرباز کۆسرەت رەسوڵ، شێخ ئەحمەد حەمە کەریم، رزگار حاجی حەمە، ئەندامانی مەکتەبی سیاسی و خالید شوانی وەزیری دادی عیراق ئامادەیبوون، رەوشی سیاسیی ناوچەکە خرایەبەر باس.

ئاڵۆزییەکانی سووریا و رۆژئاوای کوردستان تاوتوێکرا و بافڵ جەلال تاڵەبانی رایگەیاند، دەبێت رێز لە مافی هەموو نەتەوە و پێکهاتەکانی سوریا بگیرێت و توندوتیژیی دژی کوردانی رۆژئاوا رابگیرێت و هەمووان بگەڕێنەوە بۆ گفتوگۆکان.

سەبارەت بە پێکهێنانی حکومەتی نوێی عیراق، جەخت لە پابەندبوون بە وادەی یاسایی و بنەما دەستوورییەکان کرایەوە.

خانمی یەكەمی عیراق دەلێت، جیهان لە پرسی ئاشتیدا گیرۆدەی دووڕووییەكی نێودەوڵەتیە چونكە دژبەیەكیەكی قووڵ هەیە لەنێوان دروشمی بریقەداری ئازادی و ئەو واقیعە خوێناویەی لە جیهان هەیە، بەتایبەتیش لە حەلەب.

شاناز ئیبراهیم ئەحمەد خانمی یەكەمی عیراق، لە وتارێكی نوێیدا كە پێگەی سی ئێن ئێن عەرەبی بڵاویكردووەتەوە و وەك داكۆكیكاری مافەكانی مرۆڤ ناویبردووە، رایگەیاندووە، جیهان گیرۆدەی راستییەكی تاڵە لە سیاسەتی نێودەوڵەتیدا ئەویش ئەوەیە "ئاشتی" بووەتە كاڵایەكی سیاسی و قوربانیی یەكەمی ئەو گەمەیەش، تەنها خەڵكی مەدەنین.

خانمی یەكەم لە وتارەكەیدا باس لەوە دەكات، لە كاتی سەردانەكەیدا بۆ قوبرس، لە چركەساتێكی پڕ هەست و سۆزدا و لەكاتی چڕینی سرودی ئازادیدا، فرمێسك لە چاوەكانی قەتیس بوون، چونكە سرودەكە باس یەكڕیزی و هیوا دەكات بۆ دوورگەی قوبرس كە نیو سەدەیە بەدەست دابەشكارییەوە دەناڵێنێت، هەروەها لە كاتێكدا لە شوێنێك پیرۆزبایی ئاشتی دەكرێت، لە شوێنێكی تری وەك حەلەب لە سوریا، خەڵكی كوردی مەدەنی و كەمینەكان لەژێر بۆردومان و گەمارۆدا بەربەرەكانێ لەگەڵ مەرگ  دەكەن.

هەر لەو وتارەدا، شاناز ئیبراهیم ئەحمەد بە راشكاوی رەخنەی لە سەردانەكەی ئۆرسۆلا ڤۆن دێر لاین، سەرۆكی كۆمیسیۆنی ئەوروپا بۆ دیمەشق گرت و پرسی، چۆن دەكرێت بەڵێنی ئاوەدانكردنەوە بدرێت، بەبێ ئەوەی یەك وشە دەربارەی ئەو خەڵكە مەدەنیانە بوترێت كە رۆژانە لە حەلەب دەكوژرێن؟ ئاماژەی بەوەشكرد، ناتوانرێت باس لە بنیاتنانەوەی كۆمەڵگە بكرێت لە كاتێكدا پیشەسازیی سەربازیی جیهانی خەریكی پەرەپێدانی ئامێرەكانی لەناوبردن و وێرانكارییە.

خانمی یەكەم لە بەشێكی تری وتارەكەیدا تیشكی خستە سەر جیاكاریی لە گرنگیدان بە قەیرانەكان و وتی، لە كاتێكدا هەموو چاوەكان لەسەر ئۆكراین و غەززەن، كارەساتەكانی سودان و یەمەن، كە تیایدا ملیۆنان كەس بوونەتە قوربانی، فەرامۆش كراون، ئەوەش دووڕووییە لە پێوانەكان، ئەو دەوڵەتانەش كە ئاڵای ئاشتییان هەڵگرتووە، هەر خۆیان چەك دەفرۆشن و لە شەڕە بەوەكالەتەكاندا قازانج دەكەن.

شاناز ئیبراهیم ئەحمەد جەختیشیكردەوە، بە گۆڕینی دەسەڵات لە سوریا كۆتایی بە شەڕ نەهاتووە و رۆژانە راپۆرتەكان باس لە پێشێلكاریی بەردەوام بەرانبەر كەمینەكان دەكەن و هێشتا خوێنی بێتاوانەكان دەڕژێت. ئەوەش دەرخەری ئەوەیە ئاشتی تەنها وەهمێكە، چونكە كردار و لێپرسینەوەی جدی لەگەڵدا نییە.

لە كۆتایی وتارەكەیدا خانمی یەكەمی عیراق بانگەوازیكرد، ئاشتی نابێت تەنها دروشمێكی جوان یان دەقێكی ناو سرودەكان بێت، تا ئەو كاتەش قسە نەبێتە كردار، هیواكان بە بەدینەهاتوویی دەمێننەوە و خەڵكی بێتاوان باجی ساردوسڕی و بێدەنگیی كۆمەڵگەی نێودەوڵەتی دەدەن.

لە رووداوێکی دڵتەزێندا لە سنوری قەزای ئامێدی، دوکەڵی سۆپا بووە هۆی گیانلەدەستدانی سێ ئەندامی خێزانێک و دایکەکەش رەوانەی نەخۆشخانە کرا.

پەیامنێری کوردسات نیوز لە ناوچەکەوە رایگەیاند، رووداوەکە لە گوندی "باوەرکێ"ی سەر بە ناحیەی سەرسەنگ روویداوە، تێیدا شوانێک و دوو منداڵی بەهۆی دوکەڵی سۆپاوە خنکاون.

بەپێی زانیارییەکان، باوکەکە تەمەنی 40 ساڵە و بە رەگەز عەرەبە و خەڵکی ناوچەی رەبیعەیە، دوو منداڵەکەشی کچن.

بەڕێوەبەری تەندروستیی ئامێدی بۆ کوردسات نیوز پشتڕاستیکردەوە، جگە لەو سێ قوربانییە، دایکی منداڵەکانیش بەهۆی کاریگەری دوکەڵەکەوە دۆخی تەندروستی تێکچووە و گەیەندراوەتە نەخۆشخانە و لە ئێستادا لەژێر چاودێری پزیشکدایە.

سەعدی ئەحمەد پیرە، ئەندامی مەکتەبی سیاسیی یەکێتیی نیشتمانیی کوردستان لە لێدوانێکی تایبەتدا بۆ کوردسات نیوز، نیگەرانیی قوڵی لەبارەی دۆخی گەڕەکەکانی شێخ مەقسود و ئەشرەفییە لە حەلەب دەردەبڕێت و رایدەگەیەنێت، هیچ هێزێکی سەربازیی هەسەدە لەو ناوچەیە بوونی نییە.

سەعدی پیرە ئەندامی مەکتەبی سیاسی یەکێتی؛ ئاماژەی بەوە کرد، بەڕاستی نیگەرانن لەو دۆخەی لەو دوو گەڕەکە دێتە پێشەوە و ئەو تاوانانەی بەرامبەر خەڵک دەکرێن، لەلایەن هێزگەلێکەوە کە "کەس نازانێت چۆن ناویان بهێنێت و پەیوەندییان بە چەندین وڵاتەوە هەیە."

سەبارەت بە پاساوی هێرشەکان، ئەو ئەندامەی مەکتەبی سیاسیی یەکێتی رونکردنەوەی دا و وتی: "لە ئەشرەفییە و شێخ مەقسود هیچ هێزێکی هەسەدەی لێ نییە، ئەوەی هەیە تەنها هێزەکانی ئاسایشی ناوخۆن کە بۆ راپەڕاندنی کاروباری هاووڵاتیان و پاراستنی ئاسایشی ناوخۆیی لەوێ جێگیر کراون."

لە کۆتایی لێدوانەکەیدا، سەعدی ئەحمەد پیرە جەختی کردەوە کە یەکێتی بە توندی ئیدانەی ئەو تاوانانە دەکات کە دەرهەق بە خەڵکی مەدەنی دەکرێن، ئاماژەی بەوەش دا کە بافڵ جەلال تاڵەبانی، سەرۆکی یەکێتیی نیشتمانیی کوردستان، پێشتر ئیدانەی ئەو هێرشانەی کردووە و هەڵوێستی روونی هەبووە.

وەزارەتی کارەبای هەرێمی کوردستان رایدەگەیەنێت، ئەو گرفتەی بەهۆی کەشوهەواوە لە تۆڕەکانی گواستنەوەی کارەبا دروست ببوو، چارەسەرکراوە و لە ئێستادا دۆخەکە بەتەواوی ئاسایی بووەتەوە.

لە راگەیەندراوێکدا وەزارەتی کارەبا ئاماژەی بەوەکردووە، شەپۆلێکی بەهێزی رەشەبا، باران و بەفر شەوی رابردوو رووی لە ناوچە جیاجیاکانی کوردستان کرد و زیانی بە تۆڕەکانی پاڵەپەستۆی بەرز لە نێوان وێستگەکانی بەرهەمهێنان و گواستنەوە گەیاند، بەڵام تیمەکانی کۆنترۆڵی کارەبای هەرێم و پارێزگاکان توانیان بەخێرایی دۆخەکە کۆنترۆڵ بکەن.

وەزارەتەکە روونیکردۆتەوە، دوای چەند سەعاتێک لە پچڕانەکە، تیمەکانیان توانیویانە بەشێکی زۆری کارەبای پارێزگاکان بگەڕێننەوە و ئێستاش دۆخەکە وەک پێشووی لێهاتووەتەوە.

وەزارەتی کارەبا لە راگەیەندراوەکەدا سوپاسی هاووڵاتیان دەکات بۆ ئارامگرتنیان و دڵنیاییش دەدات کە تیمەکانیان هەمیشە لە ئامادەباشیدان بۆ چارەسەرکردنی هەر گرفتێک کە رووبەڕووی تۆڕەکانی کارەبا ببێتەوە.

 بڕیارە ئەمڕۆ لە شارەكانی هەرێمی كوردستان خۆپیشاندان بۆ پشتیوانی لە رۆژئاوای كوردستان و گەڕەكە كوردییەكانی شاری حەلەب بەڕێوەبچێت.

بڕیارە ئەمڕۆ شەممە بۆ پشتیوانیكردن لە رۆژئاوای كوردستان و گەڕەكەكانی شێخ مەقسوود و ئەشرەفیەی حەلەب، لە شاری سلێمانی و دهۆك و گەرمیان و قەڵادزێ‌ لەلایەن رێكخراوەكانی كۆمەڵی مەدەنی خۆپیشاندان و گردبونەوە ئەنجام بدرێت، داوا لە هاووڵاتییانیش دەكەن بەشداری لە خۆپیشاندانەكاندا بكەن.

ئەوەش لە كاتێكدایە پێنج رۆژە چەكدارەكانی سوریا هێرشیان بۆ سەر گەڕەكە كوردییەكانی شاری حەلەب دەستپێكردوە، لە ئەنجامدا سەدان هەزار كەس ئاوارەبوون، ژمارەیەك قوربانی لێكەتوەتەوە و رەوشی دانیشتووانی ئەو دوو گەڕەكە كەوتوەتە مەترسییەوە.

دوای ئەوەی ئەمشەو بەهۆی رەوشی کەشوهەواوە کارەبا لە زۆربەی ناوچەکانی هەرێم پچڕا، لە ئێستادا کارەبا گەڕاوەتەوە زۆربەی گەڕەکەکانی سلێمانی.

بەڕێوەبەرایەتی گشتی کارەبای سلێمانی بڵاویکردەوە، لەلایەن بەڕێوەبەری گشتی کارەبای سلێمانی و بەڕێوەبەری کۆنترۆڵی کارەبای سلێمانی، چاودێری رەوشی کارەبا دەکرێت دوای ئەوەی ئەمشەو بەهۆی باران و رەشەبا کێشەیەکی تەکنیکی دروستبوو و بووە هۆی پچڕانی کارەبا لە زۆربەی ناوچەکانی هەرێم.

ئاماژەی بەوەشکرد، لە ئێستاشدا رەوشی کارەبا بەرەو ئاسایی بوونەوە دەڕوات و کارەبا بۆ زۆربەی گەڕەکەکان گەڕاوەتەوە.

کارەبا لە زۆربەی ناوچەکانی هەرێمی کوردستان پچراوە، وەزارەتی کارەباش دەڵێت: لە چەند سەعاتی داهاتوودا رەوشەکە ئاسایی دەبێتەوە.

وەزارەتی کارەبای هەرێم رایگەیاند، بەهۆی باران و ڕەشەبای بەهێزەوە کە زیانی بە تۆڕەکانی کارەبای نیشتمانی گەیاند، ئەمشەو سەعات هەشت، گرفتی پچڕانی کارەبا لە بەشێک لە پارێزگاکانی هەولێر و دهۆک و سلێمانی درووست بوو.

ئاماژەی بەوەشکرد، ئێستا رەوشەکە لەژێر کۆنترۆڵ دایە و تیمەکانی وەزارەتی کارەبا لە ماوەی چەند سەعاتی داهاتوودا سەرجەم گرفتەکانی چارەسەر دەکەن.

ئەمڕۆ هەینی، شاخەوانێك لەكاتی ئەنجامدانی چالاكییەكی شاخەوانیدا، لە بەرزاییەكی زۆرەوە لە زنجیرە چیای پیرەمەگرون هەڵدێراو گیانی لەدەستدا.

پەیامنێری كوردسات نیوز رایگەیاند، شاخەوانەكە لەگەڵ گروپێكی هاوڕێیدا بووە و لە ناوچەیەكی سەختی شاخەكەدا سەركەوتوون، هەربۆیە توشی هەڵدێران بووەو كەوتووەتە خوارەوە.

بەوتەی شایەت حاڵەكان، قوربانیەكان سەر بە گروپێكی شاخەوانی هەولێرن، گروپەكە لە شەش كەس پێكهاتوون، لە نیوەڕۆی ئەمڕۆوە تووشی رووداوەكە بوون،

لەسەر فەرمانی نوسینگەی قوباد تاڵەبانیش، تیمەكانی بەرگری شارستانی گەیشتنە سەر ئەو لوتكەیەی پیرەمەگرون كە شاخەوانەكانی لێ هەڵدێرابون و لەماوەیەكی كەمدا تەرمەكە دەەهێنرێتە خوارەوە.

مەسعود بارزانی پێزانین بۆ تێڕوانینی ئەحمەد شەرع دەردەبڕێت و لەپەیوەندییەکی تەلەفونیدا لەگەڵ سەرۆکی سوریا، جەختیان لە بایەخی سەقامگیری و هەماهەنگیی هاوبەش كردەوە.

ناوەڕۆکی پەیوەندییە تەلەفونییەکەی نێوان مەسعود بارزانی و ئەحمەد شەرع...

ئەمڕۆ مەسعود بارزانی سەرۆکی پارتی دیموکراتی کوردستان و ئەحمەد شەرع سەرۆکی پەیوەندییەکی تەلەفونیان ئەنجامدا.

بارەگای مەسعود بارزانی بڵاویکردەوە، لەو پەیوەندییە تەلەفۆنییەدا دوایین پێشهاتە سیاسیەكانی سووریا و گۆڕانكارییەكانی ناوچەكە خرایە بەر باس و هەردوولا جەختیان لە بایەخی سەقامگیری و هەماهەنگیی هاوبەش كردەوە. هەروەها ئەحمەد شەرع ئەوەی دووپات كردەوە كە كورد پێكهاتەیەكی ڕەسەن و سەرەكیی گەلی سووریایە و جەختی لە پابەندبوونی تەواوی دەوڵەتی سووریا بۆ گەرەنتیكردنی هەموو مافە نیشتیمانی و سیاسی و مەدەنیەكانی كورد لەگەڵ پێكهاتەكانی تری سووریا بە شێوەیەكی یەكسان و بێ جیاوازی كردەوە.

هەر لەو پەیوەندییە تەلەفۆنیەدا مەسعود بارزانی پێزانینی بۆ ئەو تێروانینەی ئەحمەد شەرع هەبوو و پشتیوانی خۆی بۆ ویست و ئاواتی سووریەكان بۆ بنیاتنانی دەوڵەتێك ڕاگەیاند كە هەموو لایەن و پێكهاتەكان بگرێتەخۆ و تێیدا هاوبەش بن. هەروەها جەختیشی لە پێویستی بەردەوامیی ڕاوێژ و هەماهەنگی كردەوە ئەویش لەپێناو ڕەچاوكردنی بەرژەوەندیی هەموو لایەك و پاراستنی ئاشتەوایی كۆمەڵایەتی.

دوای ئەوەی وەزارتەی ناوخۆی سوریا داوای چۆڵکردنی گەرەکەکانی کرد، ئەنجومەنی گەڕەکەکانی شێخ مەقسود و ئەشرەفییە رایگەیاند، لە سێ رۆژی رابردودا، گەڕەکەکانیان روبەڕووی هێرشی چەکی قورس و بۆردوومانی بەهێز بووەتەوە، مزگەوت، قوتابخانە، نەخۆشخانە، ماڵی هاووڵاتییان و دامەزراوە خزمەتگوزارییەکان بە شێوەیەکی راستەوخۆ کراونەتە ئامانج و رەتی دەکەینەوە گەڕەکەکانیان چۆڵ ناکەن.

ئاماژەیان بەوەشکردوە، ئەو هێرشانە دژی ناوەرۆکی ناوەڕۆکی یەکی نیسانە و  ئامانجیش لێیان ئەنجامدانی کۆمەڵکوژییە دژ بە گەلەکەیان، کە بۆ سەدان ساڵە لەم گەڕەکانەدا نیشتەجێن و ئەمە دەستپێکردنی شەپۆلێکی نوێی راگواستنی زۆرەملێیە، واتە هەوڵدان بۆ گۆڕینی دیمۆگرافیای شار و گەڕەکەکانیان.

ئەوەشان خستوەتەڕوو، حکومەتی کاتی دیمەشق هێرشەکان بە ناوی "سوپای نوێی سووریا" ئەنجام دەدات، بە پشتیوانی دەوڵەتی تورکیا و ئەو گروپانەی سەر بەو دەوڵەتەن.

لە بەشێکی  تری راگەیەندراوەکدا هاتووە، ئەو بانگەوازەی، کە هێزەکانی حکومەتی کاتی دیمەشق ئاراستەی کردون، بانگەوازێکە بۆ خۆبەدەستەوەدان، بەڵام ئەوان سوورن لەسەر مانەوە  و بەرگریکردن.

ئەنجومەنەکە دوپاتیکردوەتەوە، لە رەوشی ئێستادا، کۆمەڵکوژی دژ بە هاوڵاتییانی مەدەنی لەو ناوچانەدا ئەنجام دەدرێت و هێرش و مەترسیی کۆمەڵکوژی دژ بە هاووڵاتیانی کورد لە گەڕەکەکانی شێخ مەقسود و ئەشرافییە تا ئێستاش بەردەوامە، کە گروپەکان پێشڕەوییان تێدا کردووە و هەمان ئەو کردار و کۆمەڵکوژییانەی کە دژ بە عەلەوییەکان و دروزییەکان ئەنجام دران، ئێستا هەوڵ دەدرێت لە گەڕەکە کوردییەکانی حەلەب جێبەجێ بکرێن.

ئەنجومەنی گەڕەکەکانی شێخ مەقسود و ئەشرەفییە، رەتیشیان کردوەتەوە گەرەکەکانیان بەجێبهێڵن، سەرەرای ئەوەی بەهۆی بۆردومانەکانەوە ژمارەیەکی زۆر قوربانی هەیە، کە منداڵ و  ژنیان تێدایە، گەرچی رەوشی ئەو دوو گەڕەکە لە قەیرانێکی قوڵدایە دوپاتی دەکەنەوە وەک بەڕێوەبەرایەتی ئەنجومەنەکانی شێخ مەقسود و ئەشرەفییە، فشاری سەپێندراو لەسەر گەلەکەیان و گەڕەکەکانیان قبوڵ ناکەن.

لانە زرار عەبدوڵا خێزانی شەهید ئاکۆ، ئەو ئاسایشەی لەکاتی دابەشکردنی هاوکارییەکان بۆ زیانلێکەوتوانی لافاوەکەی چەمچەماڵ شەهید بوو، لە ئێستادا جەڵتەی مێشک لێیداوە وچەند ئەندامیکی جەستیە بە تەواوەتی لەکارکەوتون.

 ئەمڕۆ هەینی، کەسوکاری لانە زرار بە کوردسات نیوزیان راگەیاند، بەهۆی خرواپی تەندروستییەوە لە ئێستادا لە نەخۆشخانەی شاری سلێمانییە و بەهۆی جەڵتەی مێشکەوە چەند ئەندامێکی جەستەی بەتەواوەتی لە کارکەوتون.

لانە زرار، دایکی چوار منداڵە،  کە دوو کوڕ و دوو کچن بە ناوەکانی دەنیس، رەیان، لۆنە و مینان.

ەکسوکارەکەی رایدەگەیەنن، دوای شەهیدبونی ئاکۆی هاوسەری، بە تەواوەتی رەوشی تەندروستی تێکچوە و  رۆژ لە دوای رۆژ خراپتر دەبێت، لە ئێستاشدا  دەست و قاچێکی لە کارکەوتون و چاوێکیشی بە باشی نابینێت.

دوای چوار رۆژ لە پێکدادان و هێرشکردنە سەر گەڕەکە کوردنشینەکانی حەلەب، بەرەبەیانی ئەمڕۆ هەینی وەزارەتی بەرگری سوریا ئاگربەستی لە شاری حەلەب راگەیاند و نێردی تایبەتی ئەمریکاش بۆ کاروباری سوریا دەڵێت هەوڵدەدەین ماوەی ئاگربەست درێژ بکەینەوە.

وەزارەتی بەرگری سوریا راگەیەندراوێکی بڵاوکردوەتەوە وتێیدا هاتووە؛ لەبەر سەلامەتی دانیشتوان بۆ رێگریکردن لە هەر جۆرە پەرەسەندنێکی نوێی چالاکییە سەربازییەکان لەناو گەڕەکە کوردنشینەکاندا، وەزارەتی بەرگری ئاگربەست لە دەوروبەری گەڕەکەکانی شێخ مەقسوود، ئەشرەفیە و بەنی زەید رادەگەیەنێت.

ئاگربەستەکە لە سەعات سێی بەرەبەیانەوە چوەتە بواری جێبەجێکردنەوە و تا سەعات نۆی ئەمڕۆ هەینییە و بە گوێرەی راگەیەندراوەکە، وەزارەی ناوخۆی سوریا داوا لە هێزەکانی ئاسایشی ناوخۆ دەکات ئەو گەڕەکانە چۆڵ بکەن.

لای خۆشیەوە تۆم باراکی نێردەی تایبەتی ئەمریکا رایگیاندوە، لە هەوڵدان ماوەی ئاگربەستەکە درێژبکەنەوە بۆ زیاتر لەوەی دیاری کراوە.

درەنگانێکی ئەمشەو، وەزارتەی ناوخۆی سوریا کۆنتڕۆڵکردنی گەڕەکی شێخ مەقسودی راگەیاند و بانگەشەی ئەوەیان کرد ئەم رێوشوێنە ئامانجی دەستەبەرکردنی موڵک و ماڵی گشتی و تایبەت و بەرزکردنەوەی سەقامگیریە و رێگە خۆشکردنە بۆ ئەوەی دانیشتووان بە زووترین کات بگەڕێنەوە سەر ماڵەکانیان.

ئەمە لە کاتێکدایە، بەهۆی گرژی و پێکددانەکانی چوار رۆژی رابردوەوە زیاتر لە 60 کەس بریندار بوون و نزیکەی 20 هاووڵاتی مەدەنیش شەهید بوون.

لەبارەی گرژی  و پێکدادانەکانی حەلەب، شاناز ئیبراهیم، ئەحمەد خانمی یەکەمی عیراق راگەیەندراوێکی بڵاوکردوەوە و رایگەیاند بەردەوام بەکارهێنانی چەکی قورس و بۆردوومانی هەڕەمەکی و درۆنەکان و تاکتیکەکانی ئابڵوقە خستنە سەر خەلکی سڤیل و دانیشتوانی هەر ناوچەیەک، دەستدرێژییەکی گەورە و ئاشکرایە بۆ سەر یاسا نێودەوڵەتییەکانی مرۆڤایەتی و  پێشێلکردنی سادەترین بنەما مرۆییەکانە.

شاناز ئیبراهیم ئەحمەد ئاماژەی بەوەشکردوە، ئەوەی لە گەڕەکە کوردنشینەکانی حەلەب رودەدات کارەساتێکی مرۆییە و هاووڵاتیانی مەدەنی، لە نێویاندا ژن و منداڵ و بەساڵاچوان بۆردومان دەکرێن و غەمباری قوڵی خۆی  دەردەبڕێت  بەرانبەر بەوەی رودەدات لە گەرەکە کوردنشینەکانی حەلەب.

دەقی راگەیەندراوەکەی شاناز ئیبراهیم ئەحمەد، خانمی یەکەمی عیراق

نوسینگەی خانمی یەکەمی عێراق نیگەرانی و غەمباری قوڵی خۆی  دەردەبڕێت  بەرامبەر بەو هێرش و گەمارۆ بەردەوامانەی دەخرێنە  سەر گەڕەکەکانی شێخ مەقسود و ئەشرەفیە لەشاری حەلەب لە سوریا.

ئەوەی ڕوودەدا کارەساتێکی مرۆییە. هاوڵاتیانی مەدەنی، لە نێویاندا ژن و منداڵ و بەساڵاچوان و ئەو خێزانانەی  بە هۆی کێشمەکێش و زەبرو زۆری چەندین ساڵەوە ئاوارەبوون  جارێکی تر وا سزا دەدرێن و بۆردوومان دەکرێن. ماڵ و قوتابخانەکان و نەخۆشخانەکان وێران دەکرێن و بە دەستی ئەنقەست بێبەش ئەکرێن لە ئاو و کارەبا و سوتەمەنی و چاودێری تەندروستی و خوێندن.

بەردەوام بەکارهێنانی چەکی قورس و بۆردوومانی هەڕەمەکی و درۆنەکان و تاکتیکەکانی ئابڵوقە خستنە سەر خەلکی سڤیل و دانیشتوانی هەر ناوچەییەک، دەستدرێژییەکی گەورە و ئاشکرایە بۆ سەر یاسا نێودەوڵەتییەکانی مرۆڤایەتی و  پێشێلکردنی سادەترین بنەما مرۆییەکانە.

دەست نەپاراستن لەهاوڵاتیان و رێگری کردن لەگەیاندنی هاوکارییە مرۆییەکان، دەبێتە هۆی ئازاری زیاتری منداڵانی بریندار و ژنانی دووگیان و هەموو ئەوانەی پێویستیان بەچاودێریی تەندروستیە.

نوسینگەی خانمی یەکەمی عێراق داوای بەپەلە ڕاگرتنی ئەم توندوتیژییانە و گەڕانەوە بۆ دیالۆگ و بژاردەی ئاشتی دەکات لەگەڵ هەڵگرتنی ئابڵوقە و زامنی گەیاندنی بێ ئاستەنگی هاوکارییە مرۆییەکان  بۆ هەموو کۆمەڵگە زیانلێکەوتووەکان.

هەروەها دووپاتی دەکاتەوە کە نابێت هاوڵاتیان وەک کارتی فشار بەکار بهێنرێن و  باجی ئابلوقە بدەن.

کۆمەڵی نێودەوڵەتیی بەرپرسیارێتییەکی مۆڕاڵی و یاسایی لەئەستۆیە تا کۆمەکی مرۆیی بەپەلە بگەیەنێ و هاوڵاتیان بپارێزێ و لێپێچینەوە لەگەڵ بەرپرسیارانی ئەم دەستدرێژییانە بکات..

ئاسایشی ناوخۆی حەلەب، راگەیەندراویكی لەسەر رەوشی ئێستای گەرەکە کوردنشینەکانی حەلەب بڵاوکردوەوە دەڵێت؛ شەڕ بەردەوامە و لە کاتی هەوڵدانی چەکدارەکانی سوریا بۆ ناو گەرەکەکانی شێخ مەقسود و ئەشرەفییە نۆ چەکداران کوژراوە.

هێزەكانی ئاسایشی ناوخۆی حەلەب رایگەیاند، هێزەکانیان دوو زرێپۆشیان تێکشکاند و چەند ئەندامێکی گروپە چەكدارەكانی سویایان کوشتوە،  كە ویستویانە پێشڕەوی بكەن بۆ گەڕەکەکانی شێخ مەقسودو ئەشرەفیەی حەلەب.

ئاماژەبەوەکراوە، شەڕ و پێکدادان و بەرخۆدانی قارەمانانەی هێزەکانی ئاسایشی ناوخۆ بەردەوامە، کە روربەڕوی تۆپبارانی بەردەوام بوونەتەوە لەلایەن تانک و تۆپخانە و فڕۆکەی بێفڕۆکەوانی چەکدارەکانی سوریاوە و ژمارەی کوژراوەکانیشیان گەیشتوەتە نۆ چەکدار.