کوردستان
وەزیری ژینگەی عیراق دەڵێت: وەزیرانی كورد لە ئەنجومەنی وەزیرانی عیراق كۆدەنگ بوون و لەگەڵ د.خالید شوانی پێداگریمان كردووە لانیكەم موچەیەك رەوانەی هەرێم بكرێت تا کێشەکان چارەسەر دەکرێت.
د.هەڵۆ عەسکەری وەزیری ژینگەی عیراق بە کوردسات نیوزی راگەیاند، پرسی موچەی هەرێم تەوەرێكی سەرەكی كۆبوونەوەی ئەنجومەنی وەزیرانی عیراق بوو، هەرەوەها هیچ وەزیرێك دژی ناردنی موچەی هەرێم نەبووە.
وتیشی، پێشتر سودانی لەپێناو چارەسەری كێشەكان لەسەر بەرپرسیارێتی خۆی موچەی بۆ هەرێم ناردووە، بەڵام لە ئێستادا وەزیرەكان داوایان كردووە هەرێم هاوشێوەی عیراق پابەندییەكانی جێبەجێ بكات.
وەزیری ژینگەی عیراق راشیگەیاند، ئەو دەنگۆیانە راست نین كە دەڵێن شیعە و سوننە دژی ناردنی موچە بوون بۆ هەرێم، هەروەها لە ئەنجومەنی وەزیرانی عیراق جەختكراوەتەوە لەسەر چارەسەری پرسی موچەی هەرێم.
بەپێچەوانەی چاوەڕوانییەكان، لە كۆبوونەوەی ئەمڕۆی ئەنجومەنی وەزیرانی عیراق بڕیار لەسەر ناردنی پارە بۆ موچەی مانگەكانی پێنج و شەشی موچەخۆرانی هەرێم نەدرا، بەڵام سودانی لیژنەیەكی وزاری پێنج كەسی پێكهێنا بۆ ئەوەی بەدواداچوون بۆ كێشەكە بكات .
نووسینگەی سەرۆك وەزیرانی عیراق بڵاویكردەوە، لە كۆبوونەوەكەدا لەبارەی پابەندییە داراییەكانی نێوان بەغداد و هەولێر، ئەنجومەنی وەزیران تاوتوێی دوو رەشنووسی كردووە بۆ رادەستكردنی نەوت و داهاتی نانەوتی هەرێم و پرسی موچەی فەرمانبەران و بە بانكیكردنی موچەكانیان، رەشنووسەكانیش یەكێكیان لەلایەن حكومەتی عیراق و ئەوەی تریان لەلایەن حكومەتی هەرێمەوە ئامادەكراوە.
ئەوەشی خستووەتەڕو، محەمەد شیاع سودانی سەرۆك وەزیرانی عیراق لە كۆبوونەوەكەدا بڕیاریداوە بە پێكهێنانی لیژنەیەكی وزاری، بە سەرۆكایەتی جێگری سەرۆك وەزیران و وەزیری پلاندانان و ئەندامێتی وەزیرانی ئاوەدانكردنەوە و خوێندنی باڵا و داد و تەندروستی بۆ تاوتوێكردنی ئەو دوو رەشنوسە بە هەماهەنگی لەگەڵ لایەنە پەیوەندیدارەكانی نێوان هەردوو حكومەتی عیراق و هەرێم، دواتریش لیژنەكە راپۆڕتێك بۆ ئەنجومەنی وەزیرانی بەرز دەكاتەوە بۆ تاكو لە زووترین كاتدا بڕیاری لەسەربدرێت.
هاوكات، هەڵۆ عەسكەری وەزیری ژینگەی عیراق بە كوردسات نیوزی راگەیاند، لیژنەكە كە دوو ئەندامیان كوردن رۆژی چوار شەممە یەكەم كۆبوونەوە دەكەن و بە هیوان لەماوەی 24 بۆ 48 سەعاتی داهاتوودا كارەكانیان تەواو بكەن و راپۆرتێك بۆ ئەنجومەنی وەزیران بەرز بكەنەوە، بۆ ئەوەی هەرچی زووە كۆبوونەوەی نا ئاسایی ئەنجومەنی وەزیرانی بۆ رێكبخرێت و بڕیاری لەسەر بدرێت.
لەقەزای خەبات شەڕ لە نێوان هێزە ئەمنییەکان و هۆزێکدا رویدا، بەپێی زانیارییەکانی کوردسات نیوز بەهۆی شەڕەکەوە دوو کەس کوژراون و چەند کەسێکی دیکەش برینداربوون.
پەیامنێری کوردسات نیوز رایگەیاند: لە قەزای خەبات شەڕ لە نێوان هۆزی هەرکی و هێزە ئەمنییەکان دروستبووە، بەهۆی شەڕەکەشەوە دوو کەس کوژراوە و چەند کەسێکیش برینداربوون.
ئاماژەی ەبوەشکرد، هێز ئەمنییەکان هاتبوون کەسێکی هۆزی هەرکی دەستگیربکەن و لە ئەنجامدا روبەروبونەوە رویدا و تائێستاش شەڕ بەردەوامە.
پەیامنێری کوردسات نیوز وتیشی، شەڕەکە بەهۆی کێشەی زەوی و زارەوە بووە، کە لەچەند رۆژی رابردوودا لە نێوان دوو هۆزدا دروستببوو، بەڵام ئەمڕۆ هۆزی هەرکی روبەروی هێزە ئەمنییەکان بونەوەتەوە.
ئەوەشی خستەڕو، لە شەڕەکە چەندین چەکی جۆراو و جۆر و قورس بەکارهاتووە، هەروەها کوژراوێکیان لە هێزە ئەمنییەکانە و یەکێکی دیکەشیان هاووڵاتییەکە.
وەزارەتی پەروەردەی هەرێم ئەنجامی تاقیکردنەوەی پۆلی 12ـی راگەیاند.
وەزارەتی پەروەردەی هەرێم رایگەیاند، دوای دوو رۆژ لە تەواوبوونی تاقیکردنەوە گشتییەکان، ئاگاداری سەرجەم خوێندکارانی پۆلی 12ی ئامادەیی بە هەموو بەشەکانیەوەدەکەینەوە، لە ئێستادا ئەنجامی تاقیکردنەوەی وەزاریی خولی یەکەم بۆ ساڵی خوێندنی 2024-2025، لە ئەپلیکەیشنی "ئی-هەڵسەنگاندن" (e-halsangandn) لەسەر هەردوو سیستەمی کارپێکردنی Android و IOS بەردەستە.
ئاماژەی بەوەشکردووە،کاتژمێر 10ـی ئەمشەو، (لینکێک) لە پەیجی رەسمی وەزارەت دادەنرێت بۆ سەیرکردنەوەی پەڕەی (وەڵامەکان)، کە خوێندکار دەتوانێت بە شێوازی دیجیتاڵی وەڵامەکانی خۆی و وەڵامی نموونەییی دروست سەیر بکات.
راشیگەیاندووە، خوێندکاران دەتوانێت لە خوێندنگەکان فۆرمی پەڵپ پڕ بکاتەوە، لە رۆژی 9-7-2025 تا کۆتاییی دەوامی رەسمی فەرمانگەکان لە رۆژی 17-7-2025. بەدڵنیایییەوە بەوردی لە ئەنجامەکان دەکۆڵینەوە.
خوێندکاران لەرێگەی ئەم لینکەوە
دەتوانن ئەنجامەکان ببینن
لەم لینکەوە ئەنجامەکان.....
https://e-parwarda.com/qrha
لەکۆبوونەوەی ئەنجومەنی وەزیرانی عیراق بڕیار لەسەر ناردنی موچەی فەرمانبەرانی هەرێم نەدرا، هەروەها لیژنەیەک بۆ بەدواداچون لە کێشەی موچەخوۆرانی هەرێم پێکهێنرا.
د.هەڵۆ عەسکەری وەزیری ژینگەی عیراق بەکوردسات نیوزی راگەیاند، لەکۆبونەوەی ئەمڕۆی ئەنجومەنی وەزیرانی عیراق هەوڵمماندا موچەی مانگێکی فەرمانبەرانی هەرێم خەرج بکرێت، دواتر دەست بەدانانی چارەسەری بنەڕەتی بۆ کێشەکە بکرێت بەڵام بڕیاری ئەوە نەدرا.
وەزیری ژینگەی عیراق بۆ کوردسات نیوز ئاشکرایکرد، ئەنجومەنی وەزیرانی عیراق بڕیاریدا لەسەر پێکهێنانی لیژنەیەک بۆ بەدواداچوونی کێشەکانی موچەی فەرمانبەرانی هەرێم و کۆکردنەوەی ئامار و داتای ورد لەلای وەزارەتە پەیوەندیدارەکانی عیراق و هەرێمی کوردستانیش.
د. هەڵۆ عەسکەری ئاماژەی بەوەشکرد، لیژنەکە بە سەرۆکایەتی وەزیری پلاندانان و ئەندامەتی وەزیرەکانی خوێندنی باڵا، ئاوەدانکردنەوە، تەندروستی و دادی عیراق دەبێت کەدوانیان کوردن.
راشیگەیاند، ئەنجومەنی وەزیران لیژنەکەی راسپارد لەماوەی 24 سەعات یان48 سەعاتی داهاتوو کاری خۆیان بکەن و پێشنیاز و راسپاردەکانیان بخەنە بەردەم ئەنجومەنی وەزیرانی عیراق تاوەکو بریاری لێبدرێت.
وتیشی، محەمەد شیاع سودانی سەرۆک وەزیرانی عیراق رایگەیاندووە، هەر کاتێک لیژنەکە کاری خۆی ئەنجامبدات، ئێمە ئامادەین بۆ کۆبونەوەی ئەنجومەنی وەزیران ئەگەر لەرۆژی هەینیشدا بێت.
تونێلی پێشڕەو لە ئەمشەوەوە بۆماوەی چەند کاتژمێرێک دادەخرێت.
سەرۆکایەتى شارەوانى سیتەک راگەیەنراوێکی بڵاوکردوەتەوە و ئاشکرایکردووە، بە مەبەستى سیانەکردن و پاککردنەوەى تونێلى پێشڕەو، بۆماوەیەکى کاتى رێڕەوى تونێلەکە دادەخرێت.
ئاماژەی بەوەشکردووە، ئەمشەو لە کاتژمێر 10 تا کاتژمێر 6ى بەیانى رۆژى چوارشەممە داخستنى رێڕەوى تونێلەکە بەردەوامى دەبێت.
شارەوانی سیتەک راشیگەیاندووە، داخستنى تونێلەکە بەشێکە لە ئامادەکارییەکان بۆ رەخساندنى رێگەیەکى سەلامەت و دوور لە مەترسى هاتووچۆ بۆ شۆفێران و گەشتیارانى سلێمانى و ناوچەى شارباژێڕ.
کۆبوونەوەی ئەنجومەنی وەزیرانی عیراق کۆتاییهات و هیچ بڕیارێک سەبارەت بە ناردنی موچەی موچەخۆرانی هەرێم نەدرا.
ئەمڕۆ سێشەممە 8ـی 7ـی 2025، ئەنجومەنی وەزیرانی عیراق کۆبووەوە، سەرەڕای ئەوەی کە هیچ بڕیارێک نەبوو لە کۆبوونەوەکەدا باس لە موچەی موچەخۆرانی هەرێم بدرێت، بەڵام بڕگەی موچەخۆرانی هەرێم بۆ کۆبوونەوەکە زیادکرا.
محەمەد عەبدولرەحمان، پەیامنێری کوردسات نیوز لە بەغداد رایگەیاند: لە کۆبوونەوەکەدا کاتژمێر و نیوێک باس لە کێشەی موچەی هەرێم کراوە، بەڵام بڕیار لە ناردنی موچە بۆ هەرێم نەدراوە.
ئەمە لە کاتێکدایە کە لە دوێنێوە وەفدێکی حکومەتی هەرێمی کوردستان لە بەغدادە بۆ بەدواداچوونی کێشەکانی نێوان هەولێر و بەغداد، بەڵام تا ئێستا نەگەشتونەتە رێککەوتن.
لە کۆبونەوەی ئەنجومەنی وەزیرانی عیراقدا بڕیاردراوە لەسەر پێکهێنانی لیژنەیەکی باڵا بۆ پێداچوونەوە بە رەشنووسی رێککەوتنی نێوان هەولێر و بەغداد.
هەروەها لیژنەکە لیژنەکە پێکدێت لە وەزارەتەکانی تەندروستی، داد، پلاندانان و خوێندنێ باڵا.
مەکتەبی سیاسی یەکێتیی نیشتمانیی کوردستان، پرسەنامەیەک ئاڕاستەی کەسوکارو خانەوادەی هونەرمەند (لالە عەبدە) دەکات.
دەقی پرسەنامەکە
بەڕێزان کەسوکارو خانەوادەی هونەرمەند (لالە عەبدە)
بۆ کۆچی دوایی هونەرمەندی شێوەکاری بە توانای کورد و کەسایەتی شاری سلێمانی (لالە عەبدە) ، پرسە و ماتەمی خۆمان ئاڕاستەی بەڕێزتان و گشت هونەرمەندانی هاوڕێی دەکەین
لەیەزدانی مەزن داواکارین کۆچکردوو بە بەهەشتی بەرینی شاد بکات و ئارامی بەگشت لایەک ببەخشێت
انا للە وانا الیە راجعون
مەکتەبی سیاسی
یەکێتیی نیشتمانیی کوردستان
گفتوگۆکانی نێوان حکومەتی هەرێمی کوردستان و بەغداد بۆ چارەسەرکردنی کێشەی موچە، هێشتا نەیگەیشتوەتە خاڵی هاوبەش و وابڕیارە ئەمڕۆ کاتژمێر 11 وەفدی هەرێم لەگەڵ حکومەتی عیراق کۆببێتەوە.
بەپێی زانیارییە تایبەتەکانی پەیامنێری کوردسات نیوز لە بەغداد؛ دوێنێ وەفدی هەرێم بە ئامادەبوونی سێ وەزیری کورد، بۆ ماوەی 7 کاتژمێر و35 خولەک لەگەڵ نوێنەرانی نوسینگەی تایبەتی سەرۆک وەزیرانی عیراق کۆبوەتەوە، بەڵام بێ ئەوەی بگەن بە هیچ ئەنجامێک.
بەپێی زانیارییەکان، دوای تەواوبوونی گفتوگۆکانی دوێنێ، شەوی رابردوو، بەمەبەستی راوێژکردن وەزیرە کوردەکان و چەند بەرپرسێکی دیکەی کورد، لەماڵی د.فواد حسێن کۆبوونەتەوە و کۆبوونەوەکە کەمتر لە کاتژمێرێکی خایاندووە.
پەیامنێری کوردسات نیوز سەبارەت بە ئامادەبوونی ئەمریکییەکان لە کۆبوونەوەکەی دوێنێ شەو، رایگەیاند؛ سەرچاوەیەکی تایبەت لە کۆبوونەوەکەوە ئەو زانیارییەی رەتکردەوە و پێی راگەیاندم؛ "دوورە لە راستیەوە."
پەیامنێری کوردسات نیوز ئاماژەی بەوەشدا؛ وابڕیارە ئەمڕۆ کاتژمێر11، بەر لە دەستپێکردنی کۆبونەوەی ئەنجومەنی وەزیرانی عیراق کە کاتژمێر 1 بەڕێوە دەچێت. وەفدی هەرێم کۆبونەوەکانی لەگەڵ حکومەتی عیراق لە پێناو گەییشتن بە رێکەوتن دەستپێ بکاتەوە.
سەبارەت بەو کۆبوونەوەیەی ئەمڕۆی ئەنجومەنی وەزیران کە وابڕیارە کاتژمێر یەک بەڕێوەبچێت، پەیامنێری کوردسات نیوز رایگەیاند؛ "تا ئێستا، پێناچێت لە کۆبونەوەی ئەمڕۆی ئەنجومەنی وەزیرانی عیراق، پرسی مووچەی هەرێم ببردرێتە نێو دانیشتنەکە و باس بکرێت، چوونکە گفتوگۆکانی نێوان هەرێم و بەغدا، تا ئێستا ئەنجامێکی باشی نەبوە، تا رێکەوتنی لەسەر بکرێت و بڕیاری خەرجکردنی مووچەی لێبکەوێتەوە".
ئەندامێکی پەرلەمانی کوردستان چاڵنجێک ئاڕاستەی وەزیری کاروباری کۆمەڵایەتی دەکات و داوادەکات بازاڕێكی تایبەت بە خاوەن پێداویستی تایبەت بکرێتەوە کە ئیمزای وەزیری کاروباری کۆمەڵایەتی پێویستە.
رەوەز ئەحمەد شا ئەندامی پەرلەمانی کوردستان لە فراکسیۆنی یەکێتیی نیشتمانیی کوردستان داوا دەکات، تەلارێک بکرێتە بازاڕێکی تایبەت بە (خاوەن پێداویستی تایبەت) تا ببێتە سەرچاوەی بژێوی ژیان بۆ خۆیان و خێزانەکانیان.
دەشڵێت، بەپێی ئەم پلانەی بیرمان لێکردوەتەوە بۆ بازاڕەکە، لانیکەم ماڵی 200 خێزان ئاوەدان دەکاتەوە و بژێویان بۆ دەستەبەر دەکات، کە ئەم خزمەتە گەورەیە تەنها ئیمزایەکی وەزیری کاروباری کۆمەڵایەتی پێویستە.
دەقی داواکەی رەوەز ئەحمەد شا.........
چاڵنجێک بۆ بەڕێز وەزیری کاروکاروباری کۆمەڵایەتی
بفەرموون باپێکەوە تەلارێکی گەورە بکەینە بازاری کار بۆ خاوەن پێداویستییە تایبەتەکان لەشارە حەیاتەکە.
بانگهێشت
لەپێناو باشترکردنی ژیان و گوزەرانی کەمئەندامان و خاوەن پێداویستیە تایبەتەکان لە شاری سلێمانی، وەک خۆم رەوەزی ئەحمەد شاه ، بانگەوازێک ئاراستەی وەزیری کار و کاروباری کۆمەڵایەتی دەکەم.
داواکارم ئەو تەلارەی کەوتۆتە پشت بینای قایمقامیەت و نزیک بەریدەکە و بەناوی بەڕێوەبەرایەتی دەستەبەری کۆمەڵایەتیەوە دروستکراوە لەسلێمانی و دەرگاکانی قفڵ دراون و زياتر لە ماوەی (15)ساڵە دوکانەکانی جێهێڵدراون بە چۆڵی، بەهەوڵی هەموومان بکرێتە بازاڕێکی تایبەت بە (خاوەن پێداویستی تایبەت) تا ببێتە سەرچاوەی بژێوی ژیان بۆ خۆیان و خێزانەکانیان.
داوا لە بەڕێز وەزیری کاروکاروباری کۆمەڵایەتی دەکەم لەچوارچێوەی ئەو ئامانجانەدا کە وەزارەتەکەی کاری بۆ ئەکات و لەپێناویدا دامەزراوە، دەرفەت بداتە کەمئەندامان لە سلێمانی تا لەمەودوا هەوڵ بدەین خاوەن پێداویستی تایبەت بکەینە خاوەنکار لەپێناو باشتربونی باروگوزەرانیان، بەڵکو بەپێی ئەم پلانەی بیرمان لێ کردۆتەوە بۆ بازاڕەکە کە لانیکەم ماڵی 200 خێزان ئاوەدان دەکاتەوە و بژێویان بۆ دەستەبەر دەکات، کە ئەم خزمەتە گەورەیە تەنها واژوویەکی بەڕێزیانی پێویستە.
دواجار بەناوی خۆم و سەرجەم دەنگدەرانم و هاووڵاتیان و خەمخۆران و دڵسۆزانی ئەمشارەوە داواتان لێ دەکەین دەسەڵاتی خۆتان بەکاربهێنن بۆ تەرخانکردنی ئەم تەلارە وەک بازاڕێک بۆ (خاوەن پێداویستی تایبەت)، کە هیچ تێچوویەکی نابێ لەسەر وەزارەت و حکومەت و سەرەنجام خاوەن پێداویستیە تایبەتەکان لێی سودمەند دەبن.
ڕەوەزی احمد شاە ( ئەندامی پەرلەمانی کوردستان لە فراکسیۆنی یەکێتیی نیشتمانیی کوردستان ).
دەزگای ئاسایشی هەرێم، دوو تۆمەتباری هەڵاتوو دەستگیرکرد، کە کەسێکیان بەچەقۆ کوشتبوو.
بەڕێوەبەرایەتی گشتی ئۆپراسیۆنەکانی ئاسایش رایگەیاند، بەهەماهەنگی بەڕێوەبەرایەتی ئاسایشی بازگەکان لەبازگەی دەربەندیخان دوو تۆمەتباری هەڵاتوو لەیاسایان دەستگیرکرد.
ئاماژەی بەوەشکرد، رۆژی 21-6-2025 بەهۆی دروست بوونی گرژی و ئاڵۆزی شەڕ لەنێوان سێ هاوڵاتی لەقەزای خانەقین ڕوودەدات و کەسێک بەچەقۆ لەلایەن دوو تۆمەتبارەوە دەکوژرێت و دەستبەجێ شوێنی روداوەکە بەجێ دەهێڵن و هەڵدێن.
راشیگەیاند، بەڕێوەبەرایەتی گشتی ئۆپراسیۆنەکانی ئاسایش دوای بەدواداچوون و ئەنجامدانی لێکۆڵینەوە، بەبڕیاری دادوەری لێکۆڵینەوەی ئاسایش توانیان لەبازگەی دەربەندیخان هەردوو تۆمەتباری روداوەکەی قەزای خانەقین دەستگیربکەن.
دەزگای ئاسایشی هەرێم ئەوەشی خستەڕو، لەئێستادا تۆمەتباران بەماددەی ( 406 )لەیاسای سزادان راگیراون و لێکۆڵینەوە لە دۆسیەکانیان بەردەوامە.
قوباد تاڵەبانی دەڵێت: کاتێک گەیشتینە رێککەوتن لەگەڵ بەغداد کێشەی موچە چارەسەر دەبێت.
قوباد تاڵەبانی جێگری سەرۆک وەزیرانی هەرێم لە کۆنفڕانسێکی رۆژنامەوانیدا رایگەیاند، وەفدێکی عیراق پێشتر هاتبونە هەرێم و چەندین کۆبوونەیان ئەنجامدا، بەڵام دەرئەنجامەکانی بەو شێوەیە نەبوو کە ئێمە چاوەڕیی بووین، بەڵام لە ئێستادا وەفدێکی هەرێم لە بەغدادە.
وتیشی، وەفدەکەی هەرێم بەیانی ئەمڕۆ کۆبوونەوەیەکی ئەنجامداوە و ئەم ئێوارەیەش کۆبوونەوەیەکی دیکە ئەنجامدەدات.
قوباد تاڵەبانی، راشیگەیاند چاوەڕوان دەکەین لەگەڵ بەغداد بگەین بەڕێککەوتن و کێشەی موچە چارەسەربکرێت.
بەڕێوەبەرایەتی کارەبای سلێمانی ئاشکرایکرد: ئەو 25 فیدەرەی لە سنوری پارێزگای سلێمانی بەهۆی رەشەباکەی دوێنێوە زیانیان پێگەیشت، کێشەکانیان چارەسەرکرا و لە ئێستادا رەوشی کارەبا ئاسایی بوەتەوە.
کارەبای سلێمانی رایگەیاند: دوای ئەوەی بەهۆی ئەو رەشەبایە كە لە دوێنێ شەوەوە سنوری پارێزگای سلێمانی گرتوەتەوە، زیان بە تۆڕەكانی كەوتوە و چەند گەڕەك و ناوچەیەك كارەباكەیان كوژایەوە لە ئێستادا کارەبای ئەوە گەڕەکانە ئاسایی بوەتەوە
ئەندازیار غالب محمد بەڕێوەبەری کۆنترۆڵی کارەبای سلێمانی رایگەیاند، لە ئێستادا کارەبای ئەو فیدەرانەی بەهۆی رەشەباکەی دوێنێ زیانیان پێگەیشبووە ئاسایی بوەتەوە کارەباییان بۆ گەڕاوەتەوە.
بەپێی داتاكانی بەڕێوەبەرایەتی كۆنترۆڵ و گەیاندنی كارەبای سلێمانی بەهۆی ئەو رەشەبایەی كە لە شەوی رابردوەوە سنوری پارێزگای سلێمانی گرتەوە، لە ناو شار (19) فیدەری كارەبای كێشەی هەیە و لەدەرەوەی شاریش (6) فیدەر كێشەیان بۆ دروست بوو کوژانەوە، دەسبە تیمی هۆبەكانی چاكسازیی كارەبای دەستیان کرد بە چارەسەری كێشەكان.
جێگری سەرۆک وەزیرانی هەرێم لە پارکی هەواری شار بەردی بناغەی پڕۆژەی جین بانکی دانا، پڕۆژەکە گەشتوکاڵییە و چەندین هەلی کار دەرەخسێنێت.
قوباد تاڵەبانی، جێگری سەرۆک وەزیران لە رێوڕەسمێکدا لە پارکی هەواری شاری سلێمانی بە ئامادەبوونی بێگەرد تاڵەبانی، وەزیری کشتوکاڵ و د. سەلاح، نوێنەری رێکخراوی فاو لە عیراق و د.هەڤاڵ ئەبوبەکر، پارێزگاری سلێمانی، ئەمڕۆ، بەردی بناغەی پڕۆژەی جین بانکی دانا.
جین بانک پرۆژەیەکی گرنگیی ستراتیژی گەشتوکاڵییە و بودجەکەی لەلایەن رێکخراوی فاوەوە دابین کراوە. پرۆژەکە لەسەر رووبەری 100 دۆنم زەوی جێبەجێ دەکرێت بە ئامانجی کۆکردنەوە و پاراستنی بنەتۆ و رەگەز و وەچەی ئەو رووەک و ئاژەڵ و زیندەوەرانەی کە مۆرکی رەسەنی کوردستانی و عیراقیان پێوەیە.
لە چوارچێوەی پڕۆژەکەدا ناوەندێکی زانستیش دادەمەزرێت بۆ توێژینەوە لەسەر رووەک و ئاژەڵ و زیندەوەرەکان و چۆنییەتی پاراستنیان و ژمارەیەکی بەرچاویش هەلی کار بۆ پسپۆڕانی بوارەکە دەڕەخسێنێت.
مەکتەبی سیاسی یەکێتی پرسەنامەیەک ئاڕاستەی خانەوادەی سیروان مەجید سوڵتان دەکات
مەکتەبی سیاسی یەکێتیی نیشتمانیی کوردستان پرسەنامەیەک ئاڕاستەی کەسوکار و خانەوادەی سیروان مەجید سوڵتان دەکات.
دەقی پرسەنامەکە
بەڕێزان کەسوکار و خانەوادەی کاک سیروان مەجید سوڵتان
بۆ کۆچی دوایی کاک سیروان
برای شەهیدی فەرماندە ئەنوەری مەجید سوڵتان ، لەناخی دڵەوە پرسە و ماتەمی خۆمان ئاڕاستەی بنەماڵە ناودار و تێکۆشەرەکەتان دەکەین
لە یەزدانی مەزن داواکارین کۆچکردوو بە بەهەشتی بەرین شاد بکات و ئارامی بەگشت لایەک ببەخشێت
انا للە و انا الیە راجعون
مەکتەبی سیاسی
یەکێتیی نیشتمانیی کوردستان
کەشناسیی سلێمانی ئاستی خێرایی ئەو رەشەبایەی بڵاوکردەوە کە شەوی رابردوو چەند ناوچەیەکی هەرێمی گرتبووەوە و ئاماژەی بەوەکردووە، لە چەند شوێنێک گەیشتووەتە نزیکەی 100 کیلۆمەتر لە سەعاتێکدا.
کەشناسیی سلێمانی رایگەیاندووە، بەرزترین خێرایی با لە 24 سەعاتی رابردوودا لە وێستگەی هەڵشۆ تۆمارکراوە لە قەزای پشدەر، کە خێراییەکەی 97 کیلۆمەتر بووە لە سەعاتێکدا.
ئەوەشی خستووەتە روو، لەدوای ئەویش ناحیەی مەیدان زۆرترین خێرایی بای هەبووە کە 72 کیلۆمەتر بووە لە سەعاتێکدا، دوای ئەویش بازیان بە 66 کیلۆمەتر لە پلەی سێیەمدایە.
هەروەها خێرایی با لە ناوەندی شاری سلێمانی 58 کیلۆمەتر بووە لە سەعاتێکدا.
بەپێی ئامارەکەی کەشناسیی، کەمترین خێرایی با؛ بە 23 کیلۆمەتر و 20 کیلۆمەتر لە سەعاتێکدا، لە دەربەندیخان و پارێزگای هەڵەبجە بووە.
لە ئێوارەی دوێنێوە رەشەبایەکی بەهێز چەند ناوچەیەکی هەرێمی گرتووەتەوە و بەهۆیەوە دەیان دار لە شەقام و شوێنە گشتییەکاندا شکاون و گرفت بۆ 25 فیدەری کارەباش دروست بوو لە سنوری سلێمانی، کە بەهۆیەوە کارەبای چەندین گەڕەک لە ناوەوە و دەرەوەی شاردا بڕان.