کوردستان
کەشناسیی هەرێم پێشبینییەکانی کەشوهەوای ئەمڕۆ و سبەی راگەیاند و ئاماژەی بەوەکردووە، پلەکانی گەرما بەشێوەیەکی بەرچاو نزمدەبنەوە و بارانی بەلێزمە و هەورەتریشقە و رەشەبای بەهێز دەستپێدەکات.
کەشناسیی هەرێم رایگەیاندووە، ئەمڕۆ پێنجشەممە، لەکاتەکانى بەیانى تاوەکو دواى نیوەڕۆ ئاسمان ساماڵ دەبێت بە گشتی، لە ئێوارەدا بۆ نیمچەهەور دەگۆڕێت. لەدرەنگانى شەودا کاریگەرى نزمەپاڵەپەستۆى دەریای ناوەڕاست روو لە ناوچەکە دەکات و دەستپێکى کاریگەرى ئەم نزمەپاڵەپەستۆیە لەسەر سنوورى پارێزگاى دهۆک دەبێت لەکاتەکانى ئێوارەدا .
ئاماژەی بەوەشکردووە، سەرەتا بەگشتى لە ناوچە شاخاوییە بەرزەکان باران بەشێوەی نمەبارانى کەم دەبارێت لەشەودا کاریگەرى شەپۆلەکە درێژدەبێتەوە بۆ سەرجەم ناوچە جیاجیاکان، ئەمڕۆ بارانبارین لەکاتەکانى شەودا بەشێوەى نمەبارانى پچڕپچڕ دەستپێ دەکات و لە هەندێک ناوچە بارانى مامناوەند دەبێت، لە ناوچە شاخاوییە بەرزە سنوورییەکان و لوتکەى شاخە بەرزەکان لە درەنگانى شەودا کەمێک بەفر دەبارێت .
ئەوەش هاتووە، بۆ ئەمڕۆ خێرایی با لەسەرخۆو مامناوەند دەبێت و پلەکانی گەرما یەک بۆ دوو پلە نزم دەبنەوە، بەڵام سبەی خێرایی با بۆ ٤٠ کیلۆمەتر لەکاتژمێرێکدا زیاد دەکات و پلەکانی گەرما ٤ بۆ ٦ پلەی سیلیزی نزم دەبنەوە.
کەشناسیی راشیگەیاندووە، سبەی هەینی، ئاسمان بەگشتى هەوری تەواو دەبێت، کاریگەرى شەپۆلى بارانبارین لەسەر ناوچەکە زیاد دەکات و سەرجەم هەرێم دەکەوێتە ژێر کاریگەرى شەپۆلەکەوە، بەتایبەت لە کاتەکانى دوانیوەڕۆى رۆژى هەینى بارانبارین بەشێوەى بارانى مامناوەند و هەندێک ناوچە لێزمەبارانى پچڕ پچڕ دەبێت، بەتایبەت لە بەشێک لە سنوورى پارێزگاى دهۆک و بەشێک لە ئیدارەى راپەرین.
ئەوەش خراوەتە روو، هەندێک کات بەتایبەت لە کاتەکانى شەوى هەینى، خێرایی با زیاددەکات و دەگاتە سەروو ٤٠ کیلۆمەتر لە سەعاتێکدا، هەروەها لەکاتى بارانە بەلێزمەکەدا هەورەتریشقەشی لەگەڵدا دەبێت.
بەرزترین پلەکانی گەرمای پێشبینیکراو بە پلەی سیلیزی
هەولێر : 15
سلێمانی : 13
دهۆک : 14
کەرکوک : 16
هەڵەبجە : 14
زاخۆ : 15
گەرمیان : 16
سۆران : 13
حاجی ئۆمەران : 7
هەسەدە وەڵامی هەڕەشەكانی ئەردۆغان دەداتەوە و دەڵێت وتەكانی ئەردۆغان تیرۆریستییە و بۆ ترساندنی كوردەكانە.
پەیامێكی تیرۆریستییە
فەرهاد شامی بەرپرسی ڕاگەیاندنی هێزەكانی سوریای دیموكرات، هەسەدە، ڕایگەیاند، قسەكانی ئەردۆغان هەوڵێكە بۆ ترساندنی دانیشتوانی باكور و ڕۆژهەڵاتی سووریا.
راشیگەیاندووە، ئەو شێوە قسە كردنەی ئەردۆغان، پەیامێكی ڕوونی تیرۆریستییە.
ئامانجی هێرشی توركیا بۆ سەر رۆژئاوای كوردستان
شامی ئاماژەی بەوەشكردووە، تەنیا ئامانج لە هێرشی توركیا بۆ سەر رۆژئاوای كوردستان، هێزەكانی سووریای دیموكرات نییە، بەڵكوو ئامانجی سەرجەم گەلی كورد و سورییەكانە كە زۆر ئازاریان لە هێرشەكانی گروپە چەكدارەكانی سوریا و داعش و سوپای ئازادی سوریا چێشتووە.
پێویستە هەسەدە چەك دابنێن
ئەم قسانەی فەرهاد شامی لەكاتێكدایە كە رۆژی چوارشەممە، رەجەب تەیب ئەردۆغان سەرۆك كۆماری توركیا لە پەرلەمانی وڵاتەكەی رایگەیاند، پێویستە هەسەدە لە رۆژئاوای كوردستان چەك دابنێن، ئەگەرنا بە توندی رووبەروویان دەبنەوە.
ئەمرۆ پرۆسەی دادگاییكردنی تۆمەتبارانی دۆسێی كوژرانی "نارین گورانی تەمەن هەشت ساڵان لە دادگای ئامەد بەڕێوەدەچێت.
پەیامنێری كوردسات نیوز رایگەیاند، دوای ئەوەی رۆژی ١٠ی مانگی رابردوو دادگای تاوانە قورسەكانی ئامەد سێیەمین دانیشتنی لەبارەی دۆسیەی كوشتنی نارین گوران بەڕێوەبرد و چوار كەسی بە تۆمەتباری سەرەكی دۆسێی كوژرانی "نارین گوران" ناساند كە ئەوانیش دایك و برا و مام و دراوسێیەكی بوون و دواتر پرۆسەی دادگاییكردنەی دواخست، ئەمرۆ ئەو چوار كەسە دادگایی دەكرێنەوە.
نارین گوران لە ٢١ی ئابی ئەمساڵ لە گوندی چولی سەر بە شارۆچكەی رەزانی ئامەد بێسەروشوێنبوو، دواتر لە 8ی ئەیلول تەرمەكەی لە ناوچەی ئۆغڵاری سەر بە ئامەد دۆزرایەوە.
ناسا بەدەریاچەی دوکان دەڵێت داری کریسمسی زەوی، وێنەیەک لە بۆشایی ئاسمانەوە کە لە ساڵی 2018 دا لەلایەن لۆرن داوفین کەشتیوانەوە گیراوە، دەریاچەیەکی “دار کریسمس” کە شێوەی سێگۆشەیە لە کوردستان نیشان دەدات، کە تێکەڵەیەکە لە سروشت و کاری دەستی مرۆڤ.
بەپێی ئاژانسی “بۆ زەوی” سەر بە ناسا، سێگۆشە گەورەکە کە لە شێوەی دارە، شەش میل (١٠ کیلۆمەتر) لە تیرەکەیەوە تا لووتکەکەی درێژدەبێتەوە، و لە وێنەکەدا وادەردەکەوێت لقێکی بچووکتری وەک ئەستێرەیەکی پێچاوپێچ بە لوتکەی دارەکەوە هەڵواسرابێت، کە رووباری زێی بچووک نیشان دەدات.
دەریاچەی دوکان لە هەرێمی کوردستانە و دەستکردی مرۆڤە، بەو پێیەی لە ساڵی 1959 دروستکراوە، ئەم بەنداوە بەنداوێکی گەورەی کارەبای ئاوییە لە نزیک قەزای دوکانی سەر بە پارێزگای سلێمانی.
هەرچەندە دەریاچەکە لە ناوخۆدا بەهۆی ئەو دیاردەیەوە ناسراو نییە، بەڵام لە جەژنەکاندا شوێنێکی گرنگە کە بۆ ئاژانسە ئاسمانییەکان کە لەناو وێستگەی بۆشایی ئاسمانی نێودەوڵەتیدا دەگەڕێن.
نوێنەرانی ناسا نووسیویانە: “کاتێک لە بۆشایی ئاسمانەوە سەیری زەوی دەکەین، شوێنەوارەکانی سەر زەوی بە چەندین شێوەی ئاشنا دەردەکەون و دەریاچەی دوکان لە دارێکی کریسمس دەچێت”.
جێگای سەرنجە کە دەریاچەکە لە دەیان ساڵی ڕابردوودا بەهۆی سەیرانگا دەستکردەکانی و ڕاوکردنی ماسی نایابەوە بووەتە شوێنێکی گەشتیاری بەناوبانگ لەگەڵ ئەوەشدا هەندێک لە شارەزایان ترسیان هەیە کە ئەم چالاکییانە مەترسی لەسەر شێوەکەی دروست بکەن.
ئەمرۆ چوار شەمە ٢٥ی ١٢ وەفدێکی یەکێتیی نیشتمانیی کوردستان بەسەرۆکایەتی ئاراس محەمەد ئاغا ئەندامی ئەنجومەنی سەرکردایەتی و لێپرسراوی مەڵبەندی حەوتی نەینەوا بەهاوریەتی وەفدێکی باڵای مەڵبەند بەمەبەستی گەیاندنی پەیامی پیرۆزبایی لەدایكبونی حەزرەتی مەسیح سەردانی خوشك و برایانی مەسیحی لە سنوری پارێزگای نەینەوا ژمارەیەك کەنیسەیان بەسەرکردەوە لە قەزای حەمدانیە و بەرتلە و بەعشيقە وبەعزانی .
لەمیانەی بەشداریان لە جەژنەکەدا ژمارەیەك کەسایەتی و ریش سپی و گەورەی پیاوانی کریستیانەکانیان بەسەرکردەوە ، لەبەسەرکردنەوەکەشدا وەفدی یەکێتی پیرۆزبایی سەرۆك بافڵ و سەرکردایەتی یەکێتیان گەیاندە خوشك و برا مەسیحیەکان و ھیوایان خواست ھەمیشە لە جەژن و خۆشی دابن .
شاناز ئیبراهیم ئەحمەد خانمی یەکەمی عیراق، ئەمڕۆ چوارشەممە ٢٥-١٢-٢٠٢٤ سەردانی کڵێسای مار یوسفی لە شاری سلێمانی کرد بەبۆنەی جەژنی کریسمسەوە پیرۆزبایی لێکردن و لەوێ لەلایەن قەشەی کڵێسای مار یوسف، قەشە ئەیمەن هورمز پێشوازی لێکرا .
لە میانەی سەردانەکەدا خانمی یەکەم پیرۆزبایی خۆی ئاراستەی مەسیحییەکانی سلێمانی و هەرێمی کوردستان و عیراق و جیهان کرد و هیوای خواست کە هەموان لە ئارامی و ئاسایشدا بژین.
خانمی یەکەم پێکەوەژیان و پەیوەندیی نێوان پێکهاتە جیاوازەکانی گەلی عیراق و موسڵمانان و مەسیحییەکانی بەرز نرخاند و بە بایەخەوە باسی لە یەکڕیزی و یەکگرتوویی هەموان کرد لە تێپەڕاندنی ئەو ئاڵەنگارییانەی کە عیراق رووبەڕووی بووەوە.
ساڵح موسلیم رایگەیاند، كورد بەشێكە لە چارەسەر لە سوریای نوێ، بەڵام بەرپەرچی سەرجەم ئەو هێرشانە دەدەنەوە كە دەكرێتە سەر رۆژئاوای كوردستان و بەرگریی لە دەستكەوتەكانیان دەكەن.
ساڵح موسلیم ئەندامی دەستەی سەرۆكایەتی پارتی یەكێتی دیموكرات پەیەدە رایگەیاند، لەگەڵ كۆتاییهێنان بە رژێمی بەعس لە دیمەشق، هاوسەنگیی نوێ لە سوریا هاتووەتەوە ئاراوە و كوردیش بەشێكە لە چارەسەریی بۆ داهاتووی وڵاتەكە، چونكە مەبەستیان نییە سوریا دابەشبكرێت.
راشیگەیاند، توركیا دەیەوێت بە هەموو شێوەیەك لەڕێی پەیوەندییەكانی لەگەڵ تەحریر شام لە دیمەشق، بە تەواوەتی سوریا كۆنتڕۆڵ بكات.
ئاماژەی بەوەشكرد، تائێستا هیچ پێكدادانێكی راستەوخۆ لەنێوان شەڕڤانان و دەستەی تەحریر شام رووینەداوە، بەڵام چەكدارانی سوری بە بەردەوامی هێرشدەكەنە سەر رۆژئاوای كوردستان و دیمەشقیش هیچ هەڵوێستێكی نەبووە.
ساڵح موسلیم وتیشی، رەتیناكەنەوە سەرجەم هێزە چەكدارەكان لە چوارچێوەی هێزێكی هاوبەش لە سوریا كۆبكرێنەوە و ئەگەر جۆلانی رێگریی لەوەبكات كە توركیا هێرشەكانی دژی كورد رابگرێت، ئەوا كورد دانوستانی لەگەڵ دەكات.
ئەمڕۆ ٢٥ / ١٢ / ٢٠٢٤ لەسەر راسپاردەی سەرۆک بافڵ جەلال تاڵەبانی، هەڤاڵ قوباد تاڵەبانی، مەکتەبی سکرتاییەتی سەرۆک مام جەلال، بەبۆنەی لەدایکبوونی حەزرەتی مەسیح (سڵاوی خوای لەسەربێت) سەردانی کەنیسەی ماریوسفیان لە سلێمانی کرد .
لەوسەردانەدا مەکتەبی سکرتارییەت وێڕای پیرۆزبایی هیوایان خواست ئەم جەژنە بەخۆشی و لەکەشێکی کامەرانیدا بەڕێبکەن و ببێتە مایەی سەقامگیری زیاتر لە ناوچەکەدا ، هاوکات بەگرنگیشەوە ئاماژەیان بە رۆڵی خوشک و برایانی مەسیحی لە قووڵکردنەوەی گیانی برایەتی و پێکەوەژیان لە هەرێم کرد و تەئکیدیانکردەوە کە لەسەر هەمان رێبازی سەرۆک مام جەلال پارێزەرەی ماف و تایبەتمەندی ئاینی مەسیحییەکان دەبن و وەک پێکهاتەیەکی گرنگی گەلەکەشمان رۆڵ و پێگەیان لەجوانترکردنی وێنای هەرێمەکەمان دیاروبەرچاوەو مایەی شانازیمانن .
کەشناسیی عێراق پێشبینییەکانی کەشوهەوای تاوەکو ٢٩ی ئەم مانگە بڵاوکردووەتەوە و بەپێی پێشبینییەکان، بەفر و باران دەبارێت.
کەشناسیی عێراق پێشبینییەکانی کەشوهەوای بەمجۆرە خستووەتە روو:
ئەمڕۆ چوارشەممە:
کەشێکی ساردی زستانی دەبێت، پلەکانی گەرما لە رۆژدا جێگیر دەبن، بەڵام شەوان سارد دەبێت و لە هەندێک ناوچە پلەکانی گەرما بۆژێر سفری سیلیزی دادەبەزن.
سبەی پێنجشەممە:
ئاسمان بەشێوەیەکی گشتی هەور دەبێت و لە ناوچە بەرزەکانی هەرێمی کوردستان و ناوەڕاستی عێراق باران دەبارێت و پلەکانی گەرما لە هەرێم جێگیر دەبن.
هەینی:
ئاسمان لە نیمچەهەورەوە دەگۆڕێت بۆ هەوری تەواو و لە هەرێم باران دەبارێت. پلەکانی گەرماش نزم دەبنەوە.
شەممە:
ئاسمان هەوری تەواو دەبێت و لە هەرێم و چەند ناوچەیەکی باکوور و ناوەڕاستی عێراق باران دەبارێت، هەروەها لە چەند شوێنێکی جیاوازی هەرێم بەفر دەبارێت، پلەکانی گەرماش نزم دەبنەوە.
یەکشەممە:
کەشوهەوا گۆرانکاری بەسەردا دێت و ئاسمان دەگۆڕێت بۆ ساماڵ، پلەکانی گەرماش هاوشێوەی رۆژی شەممە دەبن.
لەلایەکی دیکەوە کەشناسیی هەرێم رایگەیاندووە، ئەمڕۆ ئاسمان ساماڵ دەبێت و لە دهۆک نیمچەهەور دەبێت، سبەینێش بەشێوەیەکی گشتی ئاسمانی هەرێم نیمچەهەور بۆ هەوری تەواو دەبێت.
بەرزترین پلەکانی گەرمای پێشبینیکراو بە پلەی سیلیزی :
هەولێر: ١٧ پلەى سیلیزى
سلێمانی: ١٥ پلەى سیلیزى
دهۆک: ١٦ پلەى سیلیزى
کەرکوک: ١٩ پلەى سیلیزى
هەڵەبجە: ١٤ پلەى سیلیزى
گەرمیان: ٢٠ پلەى سیلیزى
سۆران: ١١ پلەى سیلیزى
زاخۆ: ١٧ پلەى سیلیزى
حاجی ئۆمەران: ٩ پلەى سیلیزى
ماوەی نۆ مانگە چارەنووسی پەنابەرێكی رۆژهەڵاتی كوردستان لە كەمپێكی كاتی دیپۆرتكردنەوەی توركیا نادیارە و ئەگەری رادەستكردنەوەی بە ئێران هەیە، هاوسەرەكەشی دەڵێت، لە دۆخێكی دەروونی نالەبەردایە.
رێكخراوی هەنگاو بۆ مافی مرۆڤ بڵاویكردەوە، ماوەی نۆ مانگە پەنابەرێكی سیاسی رۆژهەڵاتی كوردستان بەناوی" ئەژین حوسێنی" لە توركیا، لەلایەن دەسەڵاتدارانی ئەو وڵاتەوە لە كەمپی "پەهلەوان كۆی" شاری ئەدیرنە دەستبەسەركراوە و چارەنووسی نادیارە، بەجۆرێك نازانرێت رادەستی ئێران دەكرێتەوە یاخود ئازاد دەكرێت.
رەشاد محەمەدی هاوسەری ئەو پەنابەرە كوردە دەڵێت، بەهۆی بەردەوامی فشارەكانی سەر هاوسەرەكەی و نەبوونی پێداویستییە سەرەتاییەكانی ژیان لەو كەمپەی هاوسەرەكەی تێدا دەستبەسەرە، ناوبراو لەئێستادا نەخۆشكەوتووە و دۆخی تەندروستی ناجێگیرە.
دەشڵێت، تاكو ئێستا دادگای تایبەتمەندی توركیا بڕیاری كۆتایی لەبارەی دۆسییەی ئەژین حوسێنی نەداوە و لەماوەی دەستبەسەریشدا، رێگەی پێنەدراوە چاوی بە هاوسەرەكەی بكەوێت.
مەکتەبی سیاسی یەکێتی نیشتمانی کوردستان بەبۆنەی یادی لەدایكبوونی حەزرەتی مەسیحەوە پەیامێکی بڵاوکردەوە و ئاماژە بەوەدەکات مەسیحییەكان پێكهاتەیەكی دێرینی ئەم خاك و نیشتمانەن، بە درێژایی مێژوو لەگەڵ موسڵمانان و ئاینەكانی تر بە ئاشتی و ئارامی ژیاون
دەقی پەیام
بەبۆنەی یادی لەدایكبوونی حەزرەتی مەسیح(سڵاوی خوای لێ بێت)، گەرمترین پیرۆزبایی لەخوشك و برا مەسیحییەكانی هەرێمی كوردستان و عیراق دەكەین ، ئەم یادە پیرۆزە بە خۆشی و شادی بەسەربەرن
مەسیحییەكان پێكهاتەیەكی دێرینی ئەم خاك و نیشتمانەن، بە درێژایی میژوو لەگەڵ موسڵمانان و ئاینەكانی تر بەئاشتی و ئارامی ژیاون، هەر لەم سۆنگەوە یەكێتیی نیشتمانیی كوردستان هەمیشە تەئكید لە قوڵكردنەوەی گیانی پێكەوەژیان و پاراستنی ماف و دەستەبەركردنی ئازادی و ئارامی بۆ مەسیحیەكان و تەواوی پێكهاتەكانی هەرێمی كوردستان دەكاتەوە .
قوباد تاڵەبانی، جێگری سەرۆک وەزیرانی هەرێم بەبۆنەی جەژنی لەدایکبوونی حەزرەتی مەسیح، پەیامێکی پیرۆزبایی ئاڕاستەی مەسیحییەکانی کوردستان و عێراق و جیهان دەکات و دەڵێت، "لەم بۆنەیەدا جەخت دەکەینەوە لەسەر قوڵکردنەوەی گیانی پێکەوەژیانی ئاشتییانەی هەموو پێکهاتەکانی کوردستان و عێراق".
دەقی پەیامەکە..
جەژنی لەدایکبوونی حەزرەتی مەسیح لە هەموو مەسیحییەکانی کوردستان و عێراق و جیهان پیرۆزبێت و هیوای رۆژانێکی جەژنی پڕ لە خۆشی و ئارامی بۆ هەموو لایەک دەخوازم.
لەم بۆنەیەدا جەخت دەکەینەوە لەسەر قوڵکردنەوەی گیانی پێکەوەژیانی ئاشتییانەی هەموو پێکهاتەکانی کوردستان و عێراق، ئەزمونی تاڵی ساڵانێک لە ناسەقامگیری ناوچەکە پێمان دەڵێت ئاسایش و سەقامگیری و چارەنووسی هەموومان بەندە بە پێکەوەژیانی ئاشتییانه و دابینکردنی مافەکانی هەموو پێکهاتەکان.
نێچیرڤان بارزانی سهرۆكی ههرێمی كوردستان بەبۆنەی جەژنی لەدایكبوونی حەزرەتی مەسیح (سڵاوی خوای لێ بێت) پەیامێکی پیرۆزبایی بڵاوكردەوە و دەڵێت، "ههر بهم بۆنهیهوه ههموو هاووڵاتییانی مهسیحیمان دڵنیا دهكهینهوه كه وهك ههمیشه پارێزهری مافهكانیان دهبین".
دەقی پەیامەکە...
بهبۆنهی هاتنهوهی یاد و جهژنهكانی كریسمس و لهدایكبوونی حهزرهتی عیسای مهسیحهوه (سڵاوی خوای لێ بێت)، به گهرمی و له دڵهوه پیرۆزبایی له هاووڵاتییانی ئازیزی مهسیحیمان له ههرێمی كوردستان و عێراق و له تهواوی جیهانی مهسیحی دهكهم. هیوادارم جهژنی ئارامی و ئاسوودهیی بێت، ههمووان پشوویهكی خۆش بهسهر بهرن و بۆ ههموو لایهك ساڵێكی پڕ له كامهرانی و سهركهوتن بێت.
ههر بهم بۆنهیهوه ههموو هاووڵاتییانی مهسیحیمان دڵنیا دهكهینهوه كه وهك ههمیشه پارێزهری مافهكانیان دهبین و بهردهوام دهبین له کارکردن بۆ بههێزکردنی بهها هاوبهشهكانمان و قووڵکردنهوهی كولتووری فرهڕهنگیی ئایینی و نهتهوهیی، پێكهوهژیان، یهكترقبووڵكردن و لێبوردهیی لهنێوان ههموو پێكهاتهكاندا. كوردستان بێ جیاوازی به نیشتمان و لانهیهكی ئارام بۆ ههمووان دهمێنێتهوه.
جهژن له ههموو لایهك پیرۆز بێت، ههموو ساڵێك به خۆشی.
نێچیرڤان بارزانی
سهرۆكی ههرێمی كوردستان
2024/12/24
بافڵ جەلال تاڵەبانی سەرۆکی یەکێتیی نیشتمانیی کوردستان جەژنی لەدایکبوونی حەزرەتی مەسیح (سڵاوی خوای لێبێت) لە خوشک و برایانی مەسیحی لە کوردستان، عیراق و جیهان پیرۆزدەکات و دەڵێت، "هەرێمی کوردستان مێژوویەکی درەوشاوەی لە پێکەوەژیان و یەکترقبووڵکردندا هەیە، دڵخۆشین ساڵانە لەگەڵ خوشک و برایانمان لە پێکهاتەی مەسیحی و سەرجەم پێکهاتەکانیتردا یادی بۆنە و جەژنەکانمان دەکەینەوە و برایەتیی نێوانمان قووڵتر دەکەینەوە".
دەقی پەیامەکە
جەژنی لەدایکبوونی حەزرەتی مەسیح (سڵاوی خوای لێبێت) لە خوشک و برایانی مەسیحی لە کوردستان، عیراق و جیهان پیرۆزبێت، هیوادارم ئەم جەژنە ببێتە مایەی خێر و خۆشی وە ئاشتی و سەقامگیری بۆ ناوچەکە بهێنێت.
هەرێمی کوردستان مێژوویەکی درەوشاوەی لە پێکەوەژیان و یەکترقبووڵکردندا هەیە، دڵخۆشین ساڵانە لەگەڵ خوشک و برایانمان لە پێکهاتەی مەسیحی و سەرجەم پێکهاتەکانیتردا یادی بۆنە و جەژنەکانمان دەکەینەوە و برایەتیی نێوانمان قووڵتر دەکەینەوە.
یەکێتیی نیشتمانیی کوردستان پابەندیی خۆی بە رێزگرتن و بەرگریکردن لە ئازادی و جیاوازییەکان دووپاتدەکاتەوە و پارێزگاریکردن لە فرەڕەنگیی هەرێمی کوردستان بە ئەرکی خۆی دەزانێت. ئەوەی لە رابردوودا کارمان بۆ پاراستنی ماف و بەدیهێنانی خواستی سەرجەم پێکهاتەکان کردووە، لە داهاتووشدا بەردەوامیی پێدەدەین و دڵنیایی دەدەین هەرێمی کوردستان وەکچۆن لانکەی ئاشتی و پێکەوەژیان بووە، هەروا دەمێنێتەوە.
جەژنتان پیرۆزبێت و شاد و سەرفرازبن
بافڵ جەلال تاڵەبانی
سەرۆکی یەکێتیی نیشتمانیی کوردستان
د. لەتیف رەشید، سەرۆک کۆماری عیراق و بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان کۆبوونەوە.
لەدیدارەکەدا دۆخی گشتیی عیراق و هەرێمی کوردستان گفتوگۆیان لەبارەوەکرا و سەرخستنی هەوڵە نیشتمانییەکان و هەماهەنگیی نێوان لایەنە سیاسییەکان بە ئاڕاستەی چارەسەرکردنی کێشەکان و پاراستنی سەقامگیریی ناوچەکە جەختیلێکرایەوە.
لەبارەی پرسی مووچە و شایستەداراییەکانی هەرێمی کوردستان، سەرۆک بافڵ جەلال تاڵەبانی ئاماژەی بەوەکرد، کۆبوونەوەکانی چەند رۆژی رابردوومان لە بەغدا درێژکراوەی هەوڵە بەردەوامەکانمانە بۆ چارەسەرکردنی ئەم کێشەیە و گەیشتن بە ئەنجامێکی ئەرێنی. بێگومان هاوکاری و پشتیوانیی سەرۆک وەزیرانی عیراق و ئەندامانی دەسەڵاتی دادوەری بەرزدەنرخێنین بۆ هەوڵەکانیان تاوەکو پابەند بە دەستوور و یاسا، مافی خەڵکی کوردستان پارێزراوبێت و تێکەڵی ململانێ حزبی و سیاسییەکان نەکرێت. هەروەها هەوڵەکانی بەڕێزتان وەک سەرۆککۆمار کە بەردەوام هاوکارمانبوون و لە خەمی چارەسەرکردنی ئەم کێشەیە و پاراستنی مافەکانی خەڵکی کوردستاندا بوون.
لەبەرامبەردا د. لەتیف رەشید پشتیوانیی تەواوی بۆ هەموو ئەو هەوڵە نیشتمانی و بونیادنەرانە دووپاتکردەوە کە ئامانجەکەی پاراستنی سەقامگیری، پێشکەشکردنی خزمەتگوزاری و دوورخستنەوەی گرژییەکانی ناوچەکەیە لە وڵات.
یەكێتی هاوردە و ناردنكاران لە ساڵی ٢٠٢٤، بۆ كردنەوەی كارگە ١٨٣ مۆڵەتی داوە بە خاوەنكاران
مستەفا شێخ عەبدولرەحمان، سەرۆكی یەكێتی هاوردە و ناردنكارانی هەرێم لە كۆنفرانسێكی رۆژنامەوانیدا ئاماری كارەكانی ساڵی ٢٠٢٤ی بڵاوكردەوە و رایگەیاند، لە ماوەی دەستپێكردنی قۆناغی دووەمی پلانی ئابوری، توانراوە چوار هەزار و ٦٤٥ مۆڵەت بۆ دامەزراندنی كارگە بدەن بە خاوەنكاران.
وتیشی، لە ساڵی ٢٠٢٤، توانراوە ١٨٣ مۆڵەت بۆ كردنەوەی كارگە بدەن، هەرووەها دوو هەزار و ١٦٥ هەلیكاریان رەخساندوە.