کوردستان
هاتوچۆی سلێمانی ئاگادارییەکی لەبارەی رەشکردنی جامی ئۆتۆمبێل لەلایەن شۆفێرانەوە بڵاوکردەوە و ئاماژەی بەوەکردووە، رەشکردنی جام بەدەر لە رێنماییەکان، سزای 500 هەزار دینار پێبژاردن و سێ رۆژ دەستبەسەرداگرتنی ئۆتۆمبێلی بۆ دانراوە.
هاتوچۆی سلێمانی رایگەیاندووە، دەنگۆیەک بڵاوکراوەتەوە کە گوایە رەشکردنی جامی پێشەوە و پشتەوەی ئۆتۆمبێل ئاساییە، بەڵام ئەوانە تەنها دەنگۆن و دوورن لە راستییەوە، لەبەرئەوەی رەشکردنی جام ئاستی بینین کەمدەکاتەوە و دەبێت بەپێی رێنماییەکان کاری لەسەر بکرێت.
هاتوچۆ شۆفێران و دوکانەکانی جوانکاری ئۆتۆمبێل ئاگادار دەکاتەوە، کڕین و فرۆشتنی (لۆگۆی رێژە/ ستیکەر) و گۆڕینی لەزگەی جامی ئۆتۆمبێل دوای رەزامەندی وەرگرتن بە رێژەی بەرزتر قەدەغەیە، هەروەها سەرپێچیکار رووبەڕووی یاسا دەکرێتەوە.
ئەوەش خراوەتە روو، سەرجەم مەفرەزە گەڕۆکەکانی هاتوچۆ ئاگادار کراونەتەوە ئامێری پێوەری رێژەی جام رەشکردن بەکاربهێنن تا ئەو دیاردەیە بنەبڕ بکرێت.
دەشڵێت، هەر شۆفێرێک پێچەوانەی رێنماییەکان ئۆتۆمبێلەکەی بکات بە جامڕەش، ئەوا بە بڕێ 500 هەزار دیناری عیراقی سزا دەدرێت و ماوەی سێ رۆژ دەست بەسەر ئۆتۆمبێلەکەیدا دەگیرێت.
پارتی دیموکراتی گەلان (دەم) لە راگەیاندراوێکی تایبەتدا ئاشکرای کرد، بە جێگیرکردنی ئامێرێکی تیژی ئاسنین لە تایەی ئۆتۆمبێلەکەیدا، بەر لە مردنی هەوڵی تیرۆرکردنی سری سورەیا ئۆندەر سیاسەتمەداری کورد دراوە.
بەپێی راگەیانراوی پارتی دەم، لە 2ی نیسانی ئەمساڵ، کارمەندێکی شوێنی راگرتنی ئۆتۆمبێل بە بیستنی دەنگێکی نائاسایی لە تایەی ئۆتۆمبێلەکەی ئۆندەر کەوتووەتە گومانەوە و ئۆتۆمبێلەکەی بردووە بۆ خزمەتگوزاریی چاککردنەوە.
پارتەکە روونی کردووەتەوە، "پشکنینەکان دەریانخستووە لە تایەی دواوەی ئۆتۆمبێلەکەدا ئامێرێکی تیژی لە ئاسن دروستکراو جێگیرکراوە، کە توانای هەبووە تایەکە بتەقێنێت".
لە راگەیانراوەکەی پارتی دەم'دا هاتووە: ئۆندەر لە کاتی خۆیدا رووداوەکەی بۆ پارتەکەی باسکردووە و راستەوخۆ لێکۆڵینەوە و هەڵسەنگاندنی پێویستی بۆ کراوە، هەروەها بەڵگەى رووداوەکە بۆ لایەنە پەیوەندیدارەکان نێردراوە.
پارتەکە ئەوەشی خستەڕوو، "ئێمە و ئۆندەریش لە نزیکەوە چاودێریی دۆخ و رووداوەکەمان کرد، بەڵام بەهۆی هەستیاریی دۆسییەکەوە بابەتەکەمان بۆ رای گشتی ئاشکرا نەکرد و تاوەکو ئێستا هیچ ئەنجامێک لەبارەی لێکۆڵینەوەکان بە ئێمە نەدراوە".
سری سورەیا ئۆندەر، یەکێک بوو لە سیاسەتمەدارە دیارەکانی پارتی دیموکراتی گەلان، کە رۆژی 3ی ئەم مانگە و پاش ١٨ رۆژ مانەوە لە نەخۆشخانە، بەهۆی جەڵتەی دڵەوە کۆچی دوایی کرد.
سەرۆکی کۆمەڵەی کێڵگە پەلەوەرییەکان بە کوردسات نیوزی راگەیاند، کەرتی پەلەوەر گرفتی زۆرە و بێپلانە، ئەگەر بەو جۆرەی ئێستا بەردەوام بێت، ئەوا تەمەنی ناگاتە دوو ساڵی دیکە و ئەو کەرتە لە هەرێم لەناو دەچێت.
نازم عەبدوڵا سەرۆکی کۆمەڵەی کێڵگە پەلەوەرییەکان بە کوردسات نیوزی راگەیاند، لە دوای جەژنی رەمەزانەوە کێڵگە پەلەوەرییەکان بە بڕی 10 ملیار دینار زیانیان پێگەشتووە.
ئەوەشی خستە روو، هۆکاری زیانەکە نەبونی پلانی حکومەت و پشتیوانیکردنی خاوەن کێڵگەکانە، بەتایبەت لە چاودێریکردنی ئەو پێداویستییانەی بەکاریدەهێنن لە کێڵگەکاندا، وەک جوچک و هێلکەی تروکاندن کە هاوردە دەکرێن، ئەو هێلکانەشی بۆ تروکاندن هاوردە دەکرێن خراپن و بووەتە هۆی زیانگەیاندن بە خاوەن کێڵگەکان.
دەشڵێت، رێگریکردن لە هەناردەی مریشک بۆ ناوەڕاست و خوارووی عیراق بەشێکی دیکەیە لە هۆکاری ئەو زیانەی بەر خاوەن کێڵگە پەلەوەرییەکان کەوتووە.
سەرۆکی کۆمەڵەی کێڵگە پەلەوەرییەکان وتیشی، ئەگەر بەو جۆرەی ئێستا بێت، کەرتی بەرهەمهێنانی پەلەوەر تەمەنی ناگاتە دوو ساڵی دیکە و لەناو دەچێت، کە کەرتێکی گرنگی ئاسایشی خۆراکە و چەندین هەلی کاری دابین کردووە.
کەشناسیی هەرێم پێشبینییەکانی کەشوهەوای ئەمڕۆ و سبەینێی بڵاوکردەوە و بەپێی پێشبینییەکان، کەش جێگیر دەبێت و پلەکانی گەرما بەرز دەبنەوە.
کەشناسیی هەرێم رایگەیاند، ئەمڕۆ پێنجشەممە، ئاسمان ساماڵ و پەڵەهەور دەبێت و لە هەندێک ناوچەدا نیمچەهەور دەبێت، هەروەها پلەکانی گەرما 1 بۆ 3 پلەی سیلیزی بەرز دەبنەوە.
ئەوەش هاتووە، سبەینێ هەینی، ئاسمان لە نێوان پەڵەهەور و نیمچەهەوردا دەبێت و بەهەمان شێوە، پلەکانی گەرما 2 بۆ 3 پلەی دیکە بەرز دەبنەوە.
بەرزترین پلەکانی گەرمای پێشبینیکراو بە پلەی سیلیزی بۆ سبەینێ بەم جۆرە دەبن:
هەولێر : 35 پلەی سیلیزی
سلێمانی : 32 پلەی سیلیزی
دهۆک : 34 پلەی سیلیزی
کەرکوک : 36 پلەی سیلیزی
زاخۆ : 35 پلەی سیلیزی
هەڵەبجە : 34 پلەی سیلیزی
سۆران : 32 پلەی سیلیزی
حاجی ئۆمەران : 23 پلەی سیلیزی
گەرمیان :38 پلەی سیلیزی
وتەبێژی بەڕێوەبەرایەتی كارەبای سلێمانی رایگەیاند، راگرتنی بەرهەمهێنانی كارەبا لە بەنداوەكانی هەرێم نابێتە هۆی كەمبوونەوەی كارەبای نیشتمانی و لەئێستادا رۆژانە لەنێوان 18 بۆ 19 کاتژمێر كارەبا دەدرێتە هاوبەشانی كارەبا.
سیروان محەمەد، وتەبێژی بەڕێوەبەرایەتی كارەبای سلێمانی بە كوردسات نیوزی راگەیاند، راگرتنی بەرهەمهێنانی كارەبا لە بەنداوەكانی هەرێم، لەنێویاندا بەنداوی دوكان، نابێتە هۆی كەمبوونەوەی كارەبای نیشتمانی، چونكە لە هەرێمی كوردستان ٪95ـی كارەبای نیشتمانی لە غاز بەرهەمدەهێرنێت.
ئەوەشی خستەڕو، لەئێستادا رۆژانە 18 بۆ 19 کارەبا كارەبا دەدرێتە هاووڵاتییان، بەڵام لەدوای رۆژی 15ـی ئەم مانگەوە بەهۆی زۆربوونی خواست لەسەر كارەبا و گۆڕینی خشتەی كاركردنی مۆلیدە ئەهلییەكان، کاتژمێرەکانی پێدانی كارەبای نیشتمانی كەم دەبێتەوە.
کەشناسیی هەرێم پێشبینی نوێی بۆ کەشوهەوای ئەمڕۆ و سبەینێ بڵاوکردەوە و بەپێی پێشبینییەکان، لە سبەینێوە کەش ئاسایی دەبێتەوە و پلەکانی گەرما بەرز دەبنەوە.
کەشناسیی هەرێم رایگەیاند، ئەمڕۆ چوارشەممە، ئاسمان ساماڵ و پەڵەهەور دەبێت بەگشتی، لەگەڵ نمەبارانی کەم لە ناوچە شاخاوییە سنوریەکانی باکور و باکوری رۆژهەڵات، پلەکانی گەرماش 1 بۆ 2 پلە بەرز دەبنەوە.
ئاماژەی بەوەشکردووە، سبەینێ پێنجشەممە، ئاسمان ساماڵ و پەڵەهەور دەبێت و لە هەندێک کات و ناوچەدا دەگۆڕێت بۆ نیمچەهەور، هەروەها بەهەمان شێوەی ئەمڕۆ، سبەینێ پلەکانی گەرما 1 بۆ 3 پلەی دیکە بەرز دەبنەوە.
بەرزترین پلەکانی گەرمای تۆمارکراو بە پلەی سیلیزی بۆ بەینێ بەم جۆرە دەبن:
هەولێر : 30 پلەی سیلیزی
سلێمانی : 27 پلەی سیلیزی
دهۆک : 29 پلەی سیلیزی
کەرکوک : 33 پلەی سیلیزی
زاخۆ : 30 پلەی سیلیزی
هەڵەبجە : 28 پلەی سیلیزی
سۆران : 26 پلەی سیلیزی
حاجی ئۆمەران : 17 پلەی سیلیزی
گەرمیان :33 پلەی سیلیزی
بڕیاربوو ئەمڕۆ ئەنجومەنی وەزیرانی هەرێم كۆببێتەوە و تاوتوێی پرسی موچە و نرخی كارەبای 24 سەعاتی بكات، بەڵام كۆبوونەوەكە هەڵوەشایەوە.
پەیامنێری كوردسات نیوز لە هەولێر رایگەیاند، بڕیاربوو ئەمڕۆ ئەنجومەنی وەزیران بە سەرپەرشتیی مەسرور بارزانی، سەرۆكی حكومەت و قوباد تاڵەبانی، جێگری سەرۆكی حكومەتی هەرێم بۆتاوتوێكردنی سێ پرس كۆببنەوە.
باسی لەوەشکرد، بە هۆكارێكی نادیار كۆبوونەوەكە ئەنجام نادرێت و دوادەخرێت بۆ كاتێكی دیکە.
بڕیاربوو لە کۆبوونەوەکەی ئەمڕۆیدا ئەنجومەنی وەزیرانی هەرێم، تاوتوێی خستنەڕووی دواپێشهاتەكانی دابەشكردنی موچەی مانگی چواری موچەخۆرانی هەرێم و پرسی خانەنشینیی گشتی و نرخ و دواپێشهاتەكانی پرۆژەی 24 سەعاتی كارەبا پرۆژەی رووناكی بكات.
ناوەندی روناکبیریی گەلاوێژ بە هاوبەشی لەگەڵ ئەنجومەنی باڵای گەنجانی عیراق وۆرکشۆپێکی دوو رۆژەیان لەژێر ناونیشانی "نووسین و رێنووسی کوردی لە میدیادا" بەڕێوەبرد.
لە وۆرکشۆپەکەدا دوو رۆژنامەنووسی دەزگای میدیایی کوردسات بە ناوەکانی (ئاکار ئەنوەر کەریم و سەعید سەروەت مەحمود) و بەشێک لە رۆژنامەنووسە گەنجەکانی دەزگا میدیاییەکان بەشداربوون.
لەماوەی ئەو دوو رۆژەدا رۆژنامەنووسان و رێکخەرانی خولەکە تیشکیان خستە سەر ئەو هەڵە باوانەی کە لە میدیادا دەکرێت بە ئامانجی راستکردنەوەی زمانی میدیا و نەهێشتنی هەڵەکان.
رەفعەت عەبدوڵلا جێگری سەرۆکی یەکێتیی نیشتمانیی کوردستان، بەئامادەبونی ستران عەبدوڵا ئەندامی سەرکردایەتی پێشوازی کرد لە گلین مایلز باڵیۆزی ئوسترالیا لەعیراق.
لەدەسپێکی دیدارەکە کە ئەمرۆ لە سلێمانی بەرێوەچوو هەردوولا کۆتا پەرەسەندنەکان و ئاڵۆزییەکانی ناوچەکەو عیراقیان تاوتوێکرد.
جێگری سەرۆکی یەکێتیی ستایشی رۆڵی دیپلۆماسی ئوسترالیای لەعیراق کردو روانگەی یەکێتی نیشتمانی کوردستانی لەسەر پرسە سیاسییەکانی کوردستان و عیراقی بۆ بەرێز باڵیۆز روونکردەوە.
جێگری سەرۆکی یەکێتی بەگرنگیەوە ئاماژەی بەسەقامگیری و ئاسایشی عێراق و هەرێم کرد بەدورخستنەوەی لەئاڵنگاری و ئەو ئاڵۆزییانەی ناوچەکەی پێدا تێپەڕدەبێت و وتی: کوردستان هەمیشە فاکتەری ئاسایش و سەقامگیری دەبێت لەناوچەکەدا.
پێکهێنانی حکومەتی نوێی هەرێم تەوەرێکی تری دیدارەکە بوو، رەفعەت عەبدوڵا هەوڵەکانی یەکێتی بۆ پێکهێنانی کابینەی دەیەم بۆ باڵیۆزی ئوسترالیا رونکردەوەو وتی: هەموو هەوڵێکمان بۆ ئەوەیە پێش هەڵبژاردنەکانی عیراق حکومەتێکی یەکگرتوو خزمەتگوزار پێکبێنهرێت.
لەبەرانبەردا باڵیۆزی ئوسترالیا پشتیوانی وڵاتەکەی بۆ حکومەتێکی یەکگرتوو خزمەتگوزار لەهەرێمدا دەربڕی.
جێگری سەرۆکی یەکێتی جەختی لەپەرەپێدان و تۆکمەکردنی پەیوەندیی نێوان هەرێمی کوردستان و ئوسترالیا کردەوەو رایگەیاند: برەودانی زیاتر بەپەیوەندیەکان و کارکردنی دوولایەنە لەسەر بەرژەوەندی هاوبەش.
لەبەرانبەردا گلین مایلز باڵیۆزی ئوسترالیا پشتیوانی وڵاتەکەی بۆ هەرێم دوپاتکردەوەو هیوای خواست کوردستان هەمیشە گرفتەکانی لەگەڵ بەغداد بەگفتوگۆ و لێکتێگەیشتن چارەسەر بکات. وتیشی :چارەسەرکردنی بەپەلەی گرفتەکانی نێوان هەرێم و حکومەتی فیدراڵ لەسەر بنەمای دەستور گرنگە.
رفعەت عەبدوڵا پشتیوانی بۆ وتەکانی باڵیۆز دەربڕی وتی: خواستی بەردەوامی یەکێتی چارەسەرکردنی گرفتەکان و رێککەوتنی هەرێم و حکومەتی فیدراڵە.
باڵیۆزی ئوسترالیا بەگرنگیەوە باسی پێگەی هەرێمی کوردستانی کردو سەرسامی خۆی بەپێشکەوتنی بەرچاوی سلێمانی پیشانداو خواستی وڵاتەکەی بۆ هاریکاری و پێکەوەیی دەربڕی، هەروەک پێکەوە ژیانی نێوان پێکهاتە جیاوازەکانیشی لەهەرێم بەمایەی خۆشحاڵی وەسفکرد.
باڵیۆزی ئوسترالیا رۆڵی گرنگ و کاریگەری سەرۆک مام جەلالی لەگۆڕەپانی سیاسی عیراق و کوردستاندا بەرز نرخاندو ئاماژەی بەوەدا سەرۆک مام جەلال سەرکردەیەکی ژیرو بەحیکمەت و چەتری کۆکەرەوەی هەمووان بوو.
تەوەری کۆتایی دیدارەکە باسکردنی هەڵبژاردنە پەرلەمانیەکەی عیراق بوو کەبڕیارە نۆڤەمبەری ئەمساڵ ئەنجامبدرێت. هەردوولا هاوڕابون کە ئەم وێستگە دیموکراسیەش گەشەی زیاتر بە پرۆسەی سیاسیی وڵات بدات.
لەهەولێر کەسێک بەتۆمەتی هەڕەشەکردن لە ژنان دەستگیرکرا و پۆلیسی هەولێریش دەڵێت؛ لەئێستادا تۆمەتبارەکە بە بڕیاری دادوەر راگیراوە.
بەڕێوەبەرایەتی پۆلیسی پارێزگای هەولێر بڵاویکردەوە، دوای ئەوەی ژنێک سکاڵای تۆمارکرد، پۆلیسی هەولێر تۆمەتبارێکی بە تۆمەتی هەڕەشەکردن لە ژنان دەستگیر کرد.
ئاماژەی بەوەشکرد، دوای لێکۆڵینەوە و بەدواداچوونی ورد لە لایەن تیمەکانمانەوە، شوێنی تۆمەتبار دەستنیشان دیاریکرا و دەستگیر کرا، لەئێستاشدا تۆمەتبار بە بڕیاری دادوەری لێکۆڵینەوە راگیراوە.
پۆلیسی هەولێر داواش لە هاووڵاتیان دەکات، تۆڕە کۆمەڵایەتییەکان بە هۆشیارییەوە بەکاربهێنن و وێنە و ڤیدیۆی نەشیاو بۆ کەس نەنێرن، بۆ ئەوەی توشی کێشە و گرفتی جۆراوجۆر نەبنەوە، لە کاتی بوونی هەر کێشەیەک لە تۆڕە کۆمەڵایەتییەکان و بڵاوبوونەوەی وێنە و ڤیدیۆی نەشیاو، دەتوانن پەیوەندی بە هێڵی گەرمی پۆلیسەوە بکەن بە ژمارە 07508088080
وەزیری پێشمەرگە و فەرماندەی گشتی هێزەكانی ئەڵمانیا لە هەرێمی كوردستان كۆبوونەوە و چەند پرسێكی جێی بایەخی هەردوولایان تاوتوێكرد.
لە كۆبوونەوەی نێوان شۆڕش ئیسماعیل وەزیری پێشمەرگە و كۆڵۆنێڵ كوپەر، فەرماندەی گشتیی هێزەكانی ئەڵمانیا لە هەرێمی كوردستان، رەوشی گشتی هەرێم و عیراق و ناوچەكە تاوتوێكرا، هەروەها گفتوگۆكرا لەبارەی پرۆسەی چاكسازی ناو وەزارەتی پێشمەرگە و هاوكارییەكانی ئەڵمانیا بۆ هێزی پێشمەرگە.
لە درێژەی كۆبوونەوەكەدا، وەزیری پێشمەرگە وتی، ئەڵمانیا لە رێگەی كونسوڵگەری و نێردە دیپلۆماسی و سەربازییەكانیەوە، لە هەرێمی كوردستان بەردەوام پشتیوانی وەزارەتی پێشمەرگەن، بە تایبەتی لە سەرخستنی پرۆسەی چاكسازی، جەختیشیكردەوە، لە فراوانكردنی هەماهەنگی و هاریكارییەكانی نێوان هەردوولا.
لەبەرانبەریشدا، كۆڵۆنێڵ كوپەر ئاماژەی بەوەدا، لەگەڵ وەزارەتی پێشمەرگە لە گفتوگۆدان بۆ سەرخستنی پرۆسەی چاكسازی و دڵنیایشیدا ئەنجامی زۆر باش لە پرۆسەكەدا.
شاناز ئیبراهیم ئەحمەد خانمی یەکەمی عیراق لەگەڵ د.شێخ مورشید مەعشوق خەزنەوی، کەسایەتی دیاری ئاینی و نیشتمانی رۆژئاوا – سوریا کۆبوەوە و سەبارەت بە داهاتووی كورد لە ناوچەكە گفتوگۆیان كرد.
خۆشحاڵ بووم بە دیداری دکتۆر شێخ مورشید مەعشوق خەزنەوی، کەسایەتی دیاری ئاینی و نیشتمانی رۆژئاوا - سوریا.
پێکەوە باسمان لە گرنگی یەکڕیزی و کاری دەستەجەمعی کرد بۆ خزمەتی گەلەکەمان و زامنی دوارۆژێکی دادپەروەرانە.
دوای گوێگرتن لە تێڕوانینەکانی شێخ مورشید دەربارەی دۆخی سوریا، باسمان لە پێویستی پتەوکردنی پێکەوەژیانی ئاشتیانەی نێوان پێکهاتەکان کردەوە.
هاوکات گرنگی یەکخستنی بزاوتە نیشتمانی و سیاسیەکانمان دووپات کردەوە و هاوڕابووین لەسەر پشتیوانی ڕۆڵی پێشەنگیی ژنان لە کۆمەڵگە و سیاسەتدا کە چەندین جار سەلماندوویانە بنەمای پێشکەوتن و ئاشتین.
پابەندبوونی خۆم بۆ شێخ مورشید دووپات کردەوە کە دەنگی گەلەکەمان بە ئاستەکانی ناوخۆیی و هەرێمایەتی و نێودەوڵەتی بگەیەنین.
شاناز ئیبراهیم ئەحمەد
خانمی یەکەمی عیراق
بەشێك لە مامۆستایانی گرێبەستی وەزارەتی پەروەردە زیاتر لە حەوت مانگە موچەیان وەرنەگرتووە و نوێنەری مامۆستایانی گرێبەستیش، هۆكارەكەی بۆ نەبوونی فەرمانی دارایی لە وەزارەتی دارایی دەگەڕێتەوە.
عەلی رەئوف، نوێنەری مامۆستایانی گرێبەست بە كوردسات نیوزی راگەیاند، مانگی 11ـی ساڵی رابردوو، بەشێك لە مامۆستایانی گرێبەست بە هۆكاری جیاواز گرێبەستەكانیان هەڵوەشێنرایەوە و ژمارەیەك مامۆستای وانەبێژی لادراو لە شوێنەكانیان بە گرێبەست دەستبەكاربوون، بەڵام تاكو ئێستا ئەو مامۆستایانە موچەیان پێنەدراوە.
ئەوەشی خستەڕو، ئەو مامۆستا گرێبەستانە ژمارەیان لەنێوان 250 بۆ 300 مامۆستا دەبێت و هۆكاری پێنەدانی مووچەكانیان، بۆ نەبوونی فەرمانی دارایی لەلایەن وەزارەتی داراییەوە دەگەڕێتەوە.
ئەو نوێنەرە ئاماژەی بەوەشدا، لەگەڵ هەردوو وەزارەتی پەروەردە و دارایی لە گفتوگۆدان بۆ چارەسەركردنی كێشەكە و دەركردنی فەرمانی دارایی بۆ خەرجكردنی موچەكانیان.
چەند کێشەیەک وەزیری دارایی عیراق دەڵێت؛ حکومەتی هەرێم داهاتە نانەوتییەکان وەکو خۆی رادەست ناکات و پاپەند نییە بە جێبەجێکردنی رێککەوتنەکان.
سەرچاوەیەکی باڵا لە ئەنجومەنی وەزیرانی عیراقەوە تایبەت بە کوردسات نیوزی راگەیاند، پرسی موچەی فەرمانبەرانی هەرێم چەند گرفتێکی تێدایە و تەیف سامی وەزیری دارایی عیراقیش، ناڕازیە لە هەڵسوکەوتەکانی حکومەتی هەرێم لە جێبەجێکردنی رێککەوتنەکان، بەتایبەت لە رووی رادەستکردنی داهاتی ناوخۆ وەکو خۆی.
ئەو سەرچاوە باڵایە باسی لەوەشکرد، لە دوای تەواوبوونی کۆبونەوە ئاساییەکەی ئەمڕۆی ئەنجومەنی وەزیران کە وەزیرە کوردەکان بەشداری کۆبونەوکەیان کردوە، کۆبونەوەیەکی تایبەت لە نێوان تەیف سامی و چەند وەزیرێکی حکومەتی ناوەند، لەگەڵ محەمەد شیاع سودانی سەرۆکی ئەنجومەنی وەزیران ئەنجامدراوە، تێیدا تەیف سامی ناڕەزاییەتی خۆی دەربڕیوە و وتوێتی کە حکومەتی هەرێم پابەند نیە بە جێبەجێکردنی رێککەوتنەکان و داهاتای نانەوتی وەکو خۆی رادەستی حکومەتی ناوەند ناکات.
سەرچاوەکە ئاماژەی بەوەشکرد، لە ئێستادا هەوڵەکان بەرەدوامە بۆ ئەوەی بتوانرێت ئاستەنگەکانی بەردەم خەرجکردنی موچەی مانگی نیسانی فەرمانبەرانی هەرێم نەمێنێت و جەختی لەوە کردەوە کە هەوڵدەدەن لە نێو ئەم هەفتەیەدا پارەی موچەی مانگی چوار رەوانەی حکومەتی هەرێم بکرێت.
بەپێی راگەیەندراوێکی وەزارەتی پێشمەرگە، رۆژی پێنجشەممە 8ـی ئایاری 2025، هاوکاری دارایی هاوپەیمانان بۆ مانگی 4ـی 2025 بەسەر ئەفسەر و پێشمەرگەکانی سەر بە دیوانی وەزارەت و یەکەکانی پیادەی وەزارەتی پێشمەرگە دابەشدەکرێت.
لە راگەیەندراوەکەدا هاتووە کە دوای ئەوەی هاوکاری هاوپەیمانان بۆ هێزی پێشمەرگە خراوەتە سەر هەژماری وەزارەتی پێشمەرگە، بەڕێوەبەرایەتی گشتی بوودجە و بەرنامەکان (ژمێریاری سەربازی) رێکارە دارایی و ژمێریارییەکانی بەکۆتا هێناوە.
شایەنی باسە ئەم هاوکارییە داراییە بەشێکە لەو پشتیوانییەی کە هاوپەیمانان پێشکەشی هێزەکانی پێشمەرگەی دەکەن لە چوارچێوەی هەوڵەکان بۆ بەهێزکردنی توانای سەربازی و بەرگری هەرێمی کوردستان.
لە روداوێکی هاتوچۆ لەسەر رێگەی هەڵەبجە - سەیدسادق دوو ژن و منداڵێک لە ئۆتۆمبێلێکدا گیانیان لەدەستدا.
سەڵاح جەمیل پەیامنێری کوردسات نیوز رایگەیاند: روداوەکە لەسەر رێگەی هەڵەبجە - سەید سادق رویداوە و ئۆتۆمبێلێکی جۆری توێتا وەرگەڕاوە و سێ لە سەرنشینەکانی گیانی لەدەستداوە.
پەیامنێری کوردسات نیوز وتیشی: روداوەکە بەهۆی تیژڕەوییەوە بووە و دوو ژن و منداڵێک تیایدا گیانیان لەدەستداوە.