كار و دەستەبەری كۆمەڵایەتیی هەرێم كەمترین كرێی مانگانەی كرێكاری ناكارامەی بۆ 450 هەزار دینار و كرێی كاركردنی رۆژانەی بۆ 15 هەزار دینار بەرزكردەوە.

بەڕێوەبەرایەتیی گشتیی كار و دەستەبەری كۆمەڵایەتیی هەرێمی كوردستان رایگەیاند، رەزامەندی دراوە لەسەر زیادكردنی كەمترین كرێی مانگانەی كرێكاری ناكارامە لە 350 هەزار دینارەوە بۆ 450 هەزار دینار.

ئاماژەی بەوەشكرد، ئەو كرێكارانەش كە بە كرێی رۆژانە كار دەكەن، نابێت كرێكانیان لە بڕی 15 پانزە هەزار دیناری رۆژانە كەمتر بێت.

مەبەست لە دەستەواژەی كرێكاری ناكارامە ئەو كەسانەیە كە ئەو كارانە ئەنجام دەدەن لە بازاڕی كاردا كە پێویستی بە بڕوانامە یان پسپۆڕیەكی ئەوتۆ نییە، بەڵام كارە سەختەكانی وەك بیناسازی و ئەوانی تر ناگرێتەوە.

کۆبوونەوەی ئەنجومەنی وەزیرانی عیراق کۆتایی هات و بڕیاردا بەزووترین کات هەناردەکردنی نەوتی هەرێم دەستپێبکاتەوە.

محەمەد عەبدولڕەحمان پەیامنێری کوردسات نیوز لە بەغداد رایگەیاند، لەدوایین ساتی کۆبوونەوەکەی ئەمڕۆی ئەنجومەنی وەزیران، محەمەد شیاع سودانی داوای کرد یەکێک لە تەوەری کۆبوونەوەکە بۆ پرسی هەرنادەکردنەوەی نەوت و موچەی فەرمانبەرانی هەرێم تەرخانبکرێت.

وتیشی، لە کۆبوونەوەکەدا وەزیری نەوتی عیراق بە سودانی راگەیاندووە، لەئێستادا ئاستی بەرهەمهێنانی نەوتی هەرێم 130 هەزار بەرمیلە لە رۆژێکدا، لەو بڕەش 80 هەزاری دەبێت رادەستی عیراق بکرێت و 50 هەزاریش بۆ پێداویستی ناوخۆی هەرێم تەرخانبکرێت، هەروەها سەرۆک وەزیرانی عیراق داوای کردووە لیژنەکانی هەردوو حکومەتی فیدراڵ و هەرێم پەلەبکەن لە تەواوکردنی کارەکانیان و بەزوترین کات هەناردەکردنی نەوتی هەرێم دەستپێبکاتەوە.

پەیامنێری کوردسات نیوز راشیگەیاند، هەر لە کۆبوونەوەکەدا د.خالید شوانی وەزیری دادی عیراق ئاماژەی بەوەکردووە، حکومەتی هەرێم پاپەندی رێککەوتنی نێوان هەرێم و بەغدادە، هاوکات 120 ملیار دیناری وەک داهاتی ناوخۆ بۆ مانگی شەش ئامادەکردووە  و ئامادەیە رەوانەی بەغدادی بکات، ئاماژەی بەوەشكرد، هەرکاتێک لیژنە هاوبەشەکانی نێوان هەرێم و بەغداد کارەکانیان تەواو کرد و راپۆرتەکانیان بەرزکردووە، ئەو کاتە بڕیار لەسەر موچەی مانگی شەشی فەرمانبەرانی هەرێم دەدرێت.

هەر میانی کۆبوونەوەکەدا محەمەد شیاع سودانی بڕیاریدا، وادەی کارەکانی لیژنە هاوبەشەکان بۆ هەفتەی داهاتوو درێژ بکاتەوە.

بەڕێوەبەرایەتیی هاتووچۆی سلێمانی ئەو دەنگۆیانە رەتدەکاتەوە کە گوایە شۆفێران بەهۆی "سەرخستنی قەرەج"ەوە سزادراون و رایدەگەیەنێت، ئەو پسوڵەیەی لە تۆڕە کۆمەڵایەتییەکاندا بڵاوکراوەتەوە ساختەیە و هیچ سەرپێچییەک بەو ناوەوە لە یاساکانی هاتووچۆدا بوونی نییە.

لە روونکردنەوەیەکدا کە ئەمڕۆ سێشەممە بڵاویکردووەتەوە، هاتووچۆی سلێمانی رایگەیاندووە، ئەو پسوڵەی سزایەی کە وێنەکەی لە بەشێکی زۆری پەیج و ئەکاونتەکاندا بڵاوکراوەتەوە و تێیدا هاتووە شۆفێرێک بەهۆی سەرپێچی "سەرخستنی قەرەج"ەوە سزا دراوە، "تەواو ناڕاستە و دوور و نزیک پەیوەندی بە بەڕێوەبەرایەتییەکەیانەوە نییە."

هاتووچۆی سلێمانی جەختیشیکردووەتەوە کە پسوڵەکە دروستکراو و "فەیکە" و لەناو سەرجەم یاسا و رێنماییەکانی هاتووچۆی هەرێمی کوردستاندا، هیچ جۆرە سەرپێچییەک لەژێر ناونیشانی "سەرخستنی قەرەج لە سوارڕەودا" بوونی نییە.

بەڕێوەبەرایەتیی گشتیی کەشناسی و بوومەلەرزەزانیی هەرێم، پێشبینییەکانی بۆ کەشوهەوای ئەمڕۆ و سبەینێی شارەکانی هەرێمی کوردستانی بڵاوکردەوە و رایگەیاند، پلەکانی گەرما نزم دەبنەوە و لە ناوچەکانی گەرمیانیش با چالاک دەبێت.

بەپێی راگەیەندراوێکی کەشناسیی هەرێم، ئەمڕۆ سێشەممە، ئاسمان پەڵەهەور دەبێت و لە دوای نیوەڕۆوە بۆ نیمچەهەور دەگۆڕێت، هاوکات پلەکانی گەرما بەراورد بە دوێنێ کەمێک نزمتر دەبنەوە.

کەشناسیی هەرێم ئاماژەی بەوەشکردووە، سبەینێ چوارشەممە، ئاسمان لە نێوان نیمچەهەور و پەڵەهەوردا دەبێت. خێرایی با لەسەرخۆ بۆ مامناوەند (10-20کم/کاتژمێر) دەبێت، بەڵام لە کاتەکانی دوای نیوەڕۆ تا ئێوارە لە ناوچەکانی گەرمیان بۆ سەرووی 25 کیلۆمەتر لە کاتژمێرێکدا چالاک دەبێت.

بەرزترین پلەکانی گەرمای پێشبینیکراو بۆ سبەینێ بەم شێوەیە دەبن:

• هەولێر: 43 پلە

• سلێمانی: 43 پلە

• دهۆک: 42 پلە

• کەرکوک: 44 پلە

• زاخۆ: 42 پلە

• هەڵەبجە: 42 پلە

• سۆران: 41 پلە

• حاجی ئۆمەران: 35 پلە

• گەرمیان: 46 پلە

 

وەزارەتی پێشمەرگەی حکومەتی هەرێمی کوردستان لە راگەیەندراوێکدا بڵاویکردەوە، ئەمڕۆ سێشەممە، هاوکارییە داراییەکەی هاوپەیمانان بۆ مانگی تەمموز گەیشتووەتە وەزارەتەکەیان و حەوتی مانگ دابەشدەکرێت.

لە راگەیەندراوەکەدا هاتووە، دوای تەواوکردنی رێکارە دارایی و ژمێریارییەکان، رۆژی پێنجشەممە حەوتی ئاب، دەست بە دابەشکردنی دەکرێت.

ئاماژە بەوەشدراوە، لەم مانگەدا نزیکەی74 هەزار ئەفسەر و پلەدار و پێشمەرگە لە رێگەی پڕۆژەی 'هەژماری من'ەوە هاوکارییەکە وەردەگرن و ئەوانی دیکەش لە رێگەی سیستمی بانکییەوە هاوکارییەکانیان پێدەگات.

ئەمڕۆ لە دوو ناوچەی هەرێمی کوردستان 6 کەس بەهۆی مەلەکردن لە پۆند و روبارەکان خنکاون و بەڕێوەبەرایەتی بەرگری شارستانی هەرێمیش ئاماری روداوەکانی خنکانی لەمساڵدا بڵاوکردەوە.

بەپێی راگەیەندراوێکی بەڕێوەبەرایەتی بەرگریی شارستانی ئاکرێ، تیمەکانیان کاتژمێر 7ی بەیانی ئەمڕۆ دووشەممە، ئاگادارکراونەتەوە لە بوونی چوار تەرم لە رووباری خازر لە سنووری گوندی قایماوە.

بەپێی زانیارییەکانی پەیامنێری کوردسات نیوز، ئەو چوار گەنجە دووانیان برای یەکترن و دووانەکەی دیکە ئامۆزان، دانیشتووی گوندی "بەردەڕەش بچووک"ی سەر بە قەزای بەردەڕەشن.

ناوی گەنجە خنکاوەکان بریتین لە:

ئوسامە محەمەد عەزیز، لەدایکبووی ساڵی 2003

مەحمود جەمال عەبدولواحید، لەدایکبووی ساڵی 2004

بیلال کەمال مستەفا، لەدایکبووی ساڵی 2007

محەمەد کەمال مستەفا، لەدایکبووی ساڵی 2008.

پەیامنێری کردستان نیوز لە پاریزگای هەڵەبجە رایگەیاند، دوو گەنج لە گوندی پریسی خواروو خنکاون، بەپێی زانیاریەکانی کوردسات نیوز یەکێک لە گەنجەکان بەهۆی خلیسکانەوە دەکەوێتە پۆندەکە پاشان یەکێک لە هاوڕێکانی هەوڵدەدات رزگاری بکات بەڵام هەردووکیان لە ئەنجامدا دەخنکێن.

پەیامنێری کوردستان نیوز راشیگەیاند، تەرمی یەکێک لە گەنجە خنکاوەکان دۆزراوەتەوە بەڵام تا ئێستا تەرمی ئەوی دیکە نەدۆزراوەتەو تیمی غەواسی قەزای دەربەندیخان سەرقاڵی گەڕانن بۆ دۆزینەوەی تەرمی ئەو گەنجە.

بەڕێوبەرایەتی بەرگری شارستانی هەرێم بڵاویکردەوە، لەسەرەتای ئەمساڵەوە تاکو ئیستا 43 کەس لە دەریاچە و روبارەکانی هەرێمی کوردستان خنکاون کە زۆربەیان تەمەنیان لە 25 ساڵ کەمترە.

بەرگری شارستانی هەرێم داوا لە هاووڵاتیان دەکات دوربکەونەوە لە مەلەکردن بەهۆی نەشیاوی سروشتی ئاوەکانی هەرێمی کوردستان بۆ مەلەکردن. 

 

 

 

 

 

 

 

 

مەکتەبی سیاسی یەکێتیی نیشتمانی کوردستان پرسەنامەیەک ئاڕاستەی کەسوکاری تێکۆشەری دێرین رزگار سابیر سەعید دەکات.

دەقی پرسەنامەکە...

بەڕێزان  خانەوادە و کەسوکاری  تێکۆشەری دێرین  رزگار سابیر  سەعید.

بۆ کۆچی دوایی   پێشمەرگەی دێرین  ڕزگار حاجی سابیری   مسگەر  ،لەناخی دڵەوە پرسە و ماتەمی  خۆمان  ئاڕاستەی  ئێوەی  بەڕێز و گشت هاوڕێیانی   دەکەین.

لەیەزدانی مەزن  داواکارین   کۆچکردوو بە بەهەشتی  بەرین  شاد  بکات  و ئارامی  بە گشت  لایەک  ببەخشێت.

انا  للە وانا الیە  راجعون

مەکتەبی   سیاسی یەکێتیی نیشتمانیی کوردستان

لە چاوپێكەوتنێكدا لەگەڵ كەناڵی سی ئێن ئێنی عەرەبی، شاناز ئیبراهیم ئەحمەد، خانمی یەكەمی عیراق باس لە قۆناغی منداڵی و پەروەردەی خێزانەكەی دەكات.

 چاوپێكەوتنەكە لە شاری سلێمانی و لە ماڵەكەی ئیبراهیم ئەحمەد گەورە نوسەر و سیاسەتمەداری گەلی كورد و باوكی خانمی یەكەمی عیراق ئەنجامدراوە، تیایدا تیشكدەخاتەسەر قۆناغی منداڵی و پەروەردە خێزانییەكەی.

شاناز ئیبراهیم ئەحمەد خانمی یەکەمی عیراق رایگەیاند، ئەم ماڵە یادگاری زۆری هەیە، چ شیرین و چ تاڵ، بەڵام كاتێك دێمە ناوییەوە، هەمیشە هەست بە سەلامەتی دەكەم، زۆر ماڵمان بەجێهێشت و چەندین جار هەڵهاتین و لە چەندین وڵات و گونددا ژیاوین، وە هەمیشە پێیان دەوتین كە دەگەڕێینەوە ماڵەوە، بەڵام هەرگیز نەگەڕاینەوە بۆ هەمان ماڵ، كەواتە ئەم ماڵە بۆ من بووەتە ماڵێك كە هەست بە سەلامەتی دەكەم تیایداو هەست بە خۆشەویستییەكی زۆر دەكەم.

لە وەڵامی پرسیارێكدا سەبارەت بە باوكی كۆچكردووی، خانمی یەكەم دەڵێت، كاتێك لەگەڵ كەسێك دەژیت رەنگە وەك پێویست قەدری نەزانیت، بەڵام لەو قۆناغەی دواییدا وەك خۆی دەڵێت، پێكەوە دەژیان، هەرچەندە بۆ ماوەیەك لە سەردەمی منداڵیدا نەیانبینیوە.

 شاناز ئیبراهیم ئەحمەدی وتیشی، دوای كۆچی دوایی باوكم، خودا لێی خۆش بێت، كاتێك دەستم كرد بە كۆكردنەوەی نوسین و كتێب و بەرهەمەكانی و دواتر سەیری چاوپێكەوتنەكانیم كرد، زیاتر هەستم بەو دەكرد، ناتوانم زۆر ستایشی بكەم، بەڵام كەسێك بوو بیری لە داهاتوو دەكردەوە، ئایندە، واتە 50 بۆ 80 ساڵ دواتر، بۆیە، ئەگەر بیبینم، لەوانەیە دڵخۆش بێت.

ئەگەر بۆ یەك جاریش بتوانم لەگەڵی بدوێم رستەیەكی پێ بڵێم، پێدەڵێم، "زۆر بیرت دەكەم، خۆزگە باشتر لەوەی دواتر تۆم ناسیبا".

لەبارەی كاریگەری خێزان و ماڵەكەی بەسەریەوە دەڵێت، شێوازی ژیانی جیاواز بووە، لەگەڵ خێزانەكەی لە وڵاتێكەوە بۆ وڵاتێكی تر و لە گوندێكەوە بۆ گوندێكی تر ماڵ و حاڵمان بەجێدەهێشت.

وتیشی، هەندێك جار لە گوندەكاندا دەژیاین، هەندێك جار لە گۆڕستانەكاندا دەژیاین، چونكە ئەوێ تاكە شوێنی سەلامەت بوو كە نەیاندەتوانی بۆردومانی بكەن.

هەموو ئەم شتانە، زۆرترین كاریگەرییان لەسەر من هەبووە، بەتایبەتی باوكم و دایكم و خێزانەكەمان سیاسەتمەدار بوون و هەمیشە لە ژێر فشاردا بووین.

لە كۆتاییدا شاناز ئیبراهیم ئەحمەد دەڵێت، زۆر پێداگرم لەسەر ئەو كارانەی كە خۆی بڕوای پێیان هەیەو گرنگی بەو سیستم و كەسانە نادات كە دەڵێت، ئەوە رێگەی تۆ نییە یان رێگاكەی بگۆڕێت.

 

 

 

دەزگای ئاسایشی هەرێم، تۆمەتبارێکی خراپ به‌كارهێنانی ئامێره‌كانی په‌یوه‌ندیكردنی دەستگیرکرد، کە هەڕەشەی لە 50 ئافرەت و پیاو کردبوو.

لە راگەیەندراوێکدا باس لەوەشدەکات، دەستگیرکردنی تۆمەتبارەکە لەسەر سکاڵای هاووڵاتیان بووە و دوای کۆکردنەوەی زانیاری ورد لەسەر چەند ئەکاونتێکی تۆڕە کۆمەڵایەتییەکان بەناوی سحر و جادووکردن، دەرکەوتووە پارەی لەچەندین هاووڵاتی وەرگرتووە و دواتریش هەڕەشەی بڵاوکردنەوەی وێنە و ڤیدیۆی لەئافرەتەکان کردبوو.

دەزگای ئاسایشی هەرێم دەشڵێت، بەڕێوەبەرایەتی ئاسایشی ڕاپەڕین، لەسەر فەرمانی دادوەری دادگای لێکۆڵینەوەی ئاسایشی ڕاپەڕین، توانیان شوێنی تۆمەتبار دەستنیشان بکەن و لەچالاکییەکەدا تۆمەتبارێک دەستگیر بکەن.

تۆمەتبارەکە تەمەنی ٢٥ ساڵە و دوای دەستگیرکردنی دەستبەسەر سەرجەم ئەکاونت و بەڵگە وێنە و ڤیدیۆکانی گیرا، لەئێستاشادا تۆمەتبار بەماددەی ٢ له‌یاسای قه‌ده‌غه‌كردنی خراپ به‌كارهێنانی ئامێره‌كانی په‌یوه‌ندیكردن راگیراوە. 

لێپرسراوێكی باڵای ئیدارەی خۆسەر جەخت دەكاتەوە لەسەر ئەوەی كە دەبێت دیمەشق دەستبەرداری مەركەزیەت بێت و ناسنامەی سەرجەم پێكهاتەكان قبوڵ بكات.

ئیلهام ئەحمەد لێپرسراوی پەیوەندییەكانی دەرەوەی ئیدارەی خۆبەڕێوەبەری باكور و رۆژهەڵاتی سوریا رایگەیاند، پێویستە حكومەتی سوریا لەجیاتی پێداگربوون لەسەر مەركەزیەت، هەوڵی قبوڵكردنی ناسنامەی تەواوی پێكهاتەكان بدات و كۆنگرەیەكی نیشتمانی بە بەشداری هەموو لایەنەكان ئەنجام بدرێت.

ئاماژەی بەوەشكرد، هەرچەندە بەپێی رێككەوتنەكانیان لەگەڵ حكومەتی سوریا دەبوایە كۆچبەران بگەڕێنرێنەوە، بەڵام تا ئێستا لیژنەی گەڕانەوەی كۆچبەران یەك كۆبوونەوەشی ئەنجام نەداوە، ئەوەش ئاستەنگ بۆ قۆناغی راگوزەر دروستدەكات و وڵاتەكە بەرەو شەڕێكی دیکەی ناوخۆیی دەبات.

بە سەرپەرشتیی بافڵ جەلال تاڵەبانی، سەرۆکی یەکێتیی نیشتمانیی کوردستان رێوڕەسمی دەستبەکاربوونی هەڤاڵ سەرکەوت زەکی وەک سەرپەرشتیاری نوێی مەڵبەندەکانی سلێمانی و چەمچەماڵ بەڕێوەچوو.

لە سەرەتای رێوڕەسمەکەدا، سەرۆک بافڵ ستایشی رۆڵ و ماندووبوونی هەڤاڵ زیاد جەباری کرد و وتی، لە ماوەی کارکردنیدا خەمخۆرانە و یەکێتییانە ئەرکەکانی راپەڕاندووە و جێگەی متمانەی هەموومان بووە. لە ئەرک و بەرپرسیارێتیی داهاتووشیدا وەک هەمیشە هاوکار و پشتیوانی دەبین.

هەروەها بافڵ جەلال تاڵەبانی پیرۆزبایی لە هەڤاڵ سەرکەوت زەکی کرد، هیوای خواست لەم ئەرکە نوێیەیدا سەرکەوتووبێت و جەختی لە گرنگیی پێگەی سلێمانی و چەمچەماڵ بۆ یەکێتیی نیشتمانیی کوردستان کردەوە و رایگەیاند، پێگەی سلێمانی بۆ ئێمە ستراتیجییە، هەم بنچینەی رێکخراوەییمانە و هەم وزەی بەردەوامیی تێکۆشانی سیاسیی گەلە، بۆیە پابەندین بە خزمەتکردنی زیاتری شارەکە و کارکردن لەگەڵ خەڵکە تێکۆشەرەکەیدا بۆ مسۆگەرکردنی داهاتوویەکی باشتر.

سەرۆک بافڵ ئاماژەی بە خەباتی خەڵکی خۆشەویستی چەمچەماڵ لە ریزەکانی یەکێتیی نیشتمانیی کوردستان کرد و وتی، ئێوە لانکەی کوردایەتین و ناوچەکانتان شایستەی ئاوەدانیی زیاترن، دڵنیابن لە جاران بە پەرۆشتر کار دەکەین تاوەکو زیاتر خزمەتتان بکەین.

وەزارەتی پێشمەرگەی حکومەتی هەرێمی کوردستان، بە فەرمانێکی وەزاری، پلەی (12،010) پێشمەرگە و ئەفسەری سەر بە دیوانی وەزارەت و لیواکانی پیادەی بەرزکردەوە.

بەپێی ڕاگەیەندراوێکی وەزارەتی پێشمەرگە، بڕیارەکە پاڵپشتە بە ماددەی چواردە لە پەیڕەوی نیزامیی راژە و خانەنشینی پێشمەرگە ژمارە (6)ی ساڵی 2011، کە تایبەتە بە یاسای ژمارە (38)ی ساڵی 2007.

راگەیەندراوەکە ئاماژەی بەوەشکردووە، ئەم پلە بەرزکردنەوەیە گوزارشتە لە خشتەی پلە بەرزکردنەوەی نەورۆزی ساڵی 2025ی کارمەندان و بەپێی ڕێنماییەکانی فەرمانی وەزاریی بەڕێوەبەرایەتیی ئیدارەی گشتی ژمارە (6033)ی دەرچوو لە 4ی کانوونی یەکەمی 2011، ئەنجامدراوە.

ئەم هەنگاوە وەک بەشێک لە پڕۆسەی کارگێڕی و رێکخستنەوەی هێزەکانی پێشمەرگە دێت و ساڵانە بەپێی خشتەی دیاریکراو بۆ ئەو ئەفسەر و پێشمەرگانە ئەنجام دەدرێت کە شایستەی پلە بەرزکردنەوەن.

 

کۆمپانیای bp ی بەریتانی بەهای 26 ملیار دۆلار لە ماوەی 25 ساڵدا لە کەرکوک خەرج دەکات، پارێزگاری کەرکوکیش دەڵێت: لەساڵی داهاتوودا شۆرشێکی ئابوریی لەکەرکوک ساز دەکەین.

رێبوار تەها پارێزگاری کەرکوک لە لێدوانێکی رۆژنامەوانیدا رایگەیاند، رەوشی کەرکوک لەبواری ئاوەدانیەوە لەساڵی 2026 لەئێستا زۆر باشتر دەبێت، هەروەها لەساڵی داهاتوودا شۆڕشێکی ئابوریی لەکەرکوک ساز دەکەین کەنمونەی نەبێت.

وتیشی، هەوڵمانداوە پاڵاوگەیەک لەچوارچێوەی کەرتی وەبەرهێنان لەکەرکوک بەتوانای 70 هەزار بەرمیل نەوت لەڕۆژێکدا دابمەزرێنین و بەتەواوبونی دوو هەزار و 500 کەس کاری تێدا دەکات.

نوسینگەی خانمی یەکەمی عیراق رونکردنەوەیەکی بڵاوکردوەتەوە و داوادەکات  ئەو کەسانەی کە شاهیدی تاوانەکانی 'عەجاج'ن و بەڵگەیان لەبەردەستدایە، بیگەیەننە تیمی تایبەتمەند بۆ ئەوەی بەڵگەکان لەسەر ئەو تۆمەتبارە کۆبکرێتەوە.

نوسینگەی خانمی یەکەمی عیراق ئاگاداری ئەو کەسانە دەکاتەوە کە شاهیدی تاوانەکانی عەجاج ئەحمەد حەردان جەلادەکەی ئەنفالن، بەڵگەکانیان کۆبکەنەوە سکاڵا و وتەی شاهیدەکان تۆماربکرێت.

نوسینگەی خانمی یەکەمی عیراق لە رونکردنەوەیەکدا ئاشکرایکرد، دوابەدوای هەوڵەکانی خانمی یەکەمی عیراق بۆ دەستگیرکردنی تۆمەتباری سەرەکی تاوانەکانی نوگرە سەلمان (عەجاج ئەحمەد حەردان) کە رۆلێکی زۆر دڕندانەو بکوژانەی هەبووە لەگەڵ ئەنفالكراوەكانى گرتوخانەى نوگره سەلمان و کەس و کارەکانیاندا، وەک لای هەموولایەکیشتان ئاشکرایە کە  دوای دادگاييكردن و سزادانى(عەلی حەسەن مەجید)و پێنج گەوره لێپرسراوی ديكەى تاوانى ئەنفال لەلايەن دادگاى باڵای  تاوانەكانى عيراق له سالى 2006 و 2007، دۆسيەیەکی سەربەخۆ بۆچەندین  تومەتبارى پەيوەندار به تاوانى ئەنفال كرايەوە كه(عجاج) يەكيك بوو لەو داواكراوانە.

ئاماژەی بەوەشکردووە، لە ئێستادا و لەم قۆناغەدا پێویستە سکاڵا و وتەی هەموو ئەو کەسانەی کە شاهیدی تاوانەکانی ئەم تاوانبارەن تۆمار بکرێت، هەر بۆیە وەک ئەرکێکی نیشتمانی و تا بارگرانی سەر شانی کەس و کار و شاهیدەکانی تاوانەکانی ئەنفال کەم بکەینەوە، لەڕێگەی تیمێکی تایبەتەوە کاری کۆکردنەوەی بەڵگەکان و وەرگرتنی وتەی شاهیدەکان جێبەجێ دەکرێت، بە مەبەستی ئەنجامدانی رێکارە یاساییەکان و دواتر ناردنیان بۆ لای دادوەر و دادگای تایبەتمەند.

‎ نوسینگەی خانمی یەکەمی عیراق داوا دەکات هەموو ئەو کەسانەی کە شاهیدی تاوانەکانی تۆمەتباری ئاماژە پێکراوەن سەردانی ئەو ناونیشانانەی لای خوارەوە بکەن لەو کاتانەی دیاری کراوە و بەڵگەنامەی یاسایی پێویست لەگەڵ خۆیاندا بەرن.

 

ناونیشانەکان...........

 

سليمانی، مۆزەخانەی نیشتیمانی ئەمنە سورەکە

کەلار، بەڕێوەبەرایەتی گشتی شەهیدانی گەرمیان 

چەمچەماڵ، مۆنۆمێنتی ئەنفال

 

رۆژ و کات.....

لە رۆژی دووشەممە 4-8-2025 تا رۆژی شەممە 9-8-2025 دەتوانن سکاڵا تۆماربکەن

 

لە کاتژمێر 'نۆ'ـی سەرلەبەیانی تا کاتژمێر 12ـی نیوەڕۆ

لە سبەینێوە بەمەبەستی قیرکردن ژێرپردی بەکری حاجی سەفەر نزیک نەخۆشخانەی بەخشین دادەخرێت، شارەوانی سلێمانیش داوا لە هاووڵاتیان و شۆفێران دەکات شەقامی جێگرەوە بەکاربهێنن.

شارەوانی سلێمانی بڵاویکردەوە، سبەینێ کاری قیرکردنی شەقامی سەرەکی ژێرپردی بەکری حاجی سەفەر نزیک نەخۆشخانەی بەخشین دەستپێدەکات و بۆ ماوەی دوو رۆژ بەردەوام دەبێت.

شارەوانی سلێمانی ئاگاداری هاووڵاتیان و شۆفێران دەکاتەوە و بۆ ماوەی دوو رۆژ شەقامەکە دادەخرێت و دەتوانن شەقامی جێگرەوە بەکاربهێنن.