کوردستان
وەزیری دادی عیراق و دەستەی ناوچە كوردستانییەكانی دەرەوەی ئیدارەی هەرێم، پێشوازی لە پەسەندكردنی پرۆژەیاسایی گەڕاندنەوەی زەوی بۆ خاوەنەكانیان دەكەن و دەشڵێن، ئەو پرۆژەیاسایە زوڵمێكی گەورە رژێمی بەعس لەسەر جوتیارانی كورد و توركی سنووری كەركوك لادەبات.
فەهمی بورهان، سەرۆكی دەستەی ناوچە كوردستانییەكانی دەرەوەی ئیدارەی هەرێم، لە پەیامێكیدا بەوبۆنەیەوە دەڵێت، ئەم هەنگاوە دەرئەنجامی هەوڵی هاوبەشی حكومەتی هەرێم و وەزیر و نوێنەرانی هەرێمی كوردستانە لە بەغداد، كە جگە لە گەڕاندنەوەی زەوی بۆ خاوەنە راستەقینەكانیان، گیانی كاری پێكەوەیی نێوان پێكهاتەكانی عیراق قوڵتر دەكاتەوە و متمانەی نێوان لایەنە سیاسییەكان فراوانتر دەكات.
هاوكات وەزیری دادی عیراق لە پەیامەكیدا دەڵێت، زیاتر لە 20 ساڵە كار لەسەر گەڕاندنەوەی ئەو زەوییانەی سنووری كەركوك بۆ خاوەنەكانیان دەكەن و دواجار بە پەسەندكردنی ئەو پرۆژەیاسایە زوڵمێكی گەورەی رژێمی بەعس لەسەر جوتیارانی كورد و توركمان لادەبرێت، هەروەها میكانیزنێكی دادپەروەرانەش بۆ مامەڵەكردن لەگەڵ لێكەوتەكانی یاساكە بۆ جوتیارە عەرەبەكان دابیندەكرێت.
دوای ئەوەی شەپۆلێکی بەفربارین ناوچە جیاجیاکانی هەرێمی گرتەوە، کەشناسیی هەرێم رێژەی بەفربارینی لە ناوچە جیاجیاکانی هەرێم بڵاوکردەوە و بەپێی ئامارەکان، زۆرترین بەفر لە حاجی ئۆمەران باریوە.
بەپێی ئاماری کەشناسیی هەرێم، لە حاجی ئۆمەران زۆرترین رێژەی بەفر باریوە کە 18 سانتیمەتر بووە، لە پلەی دووەمیشدا پێنجوێن و بەرزنجە و تەوێڵە دێن کە 11 سانتیمەتر بەفریان لێباریوە.
لەدوای ئەوانیش زۆرترین بەفر لە مێرگەسور باریوە کە 7 سانتیمەتر بووە و شوێنەکانی دیکەش بەم جۆرە بوون:
یاخسەمەر 4 سم
چۆمان 3 سم
چوارتا 2 سم
ئامێدى 1 سم
چەمانکێ 1 سم
کانى ماسى 2 سم
دەستەی پزیشكانی دانەمەزراوی هەولێر داوای دامەزراندن دەكەن و ماوەی 10 رۆژ دەدەنە حكومەت بۆ وەڵامدانەوەی داواكارییەكەیان .
لە یاداشتنامەیەكدا كە دەستەی پزیشكانی دانەمەزراو ئاراستەی سەرۆكایەتی ئەنجومەنی وەزیران و وەزارەتی تەندروستی و سەندیكای پزیشكانی كوردستانی كردووە، ئاماژە بۆ ئەوەكراوە، لە ساڵانی رابردوودا دەرچووانی كۆلێژی پزیشكی دوای ماوەیەكی كەم لە دەرچوونیان دادەمەزران، بەڵام دەرچووانی ساڵی 2024ی كۆلێژی پزیشكی گشتی- زانكۆی هەولێری پزیشكی كە ژمارەیان 273 دەرچووە، دانەمەزراون و هیچ بڕیار و رێنماییەكیش لەبارەی دامەزراندنیانەوە نییە.
دەرچووە دانەمەزراوەكان داوا دەكەن، وادەیەكی دیاریكراو بۆ دامەزراندنیان دیاری بكرێت و وەزارەتی تەندروستی و لایەنە پەیوەندیدارەكان زانیارییان پێبدەن لەبارەی رێكارەكانی دامەزراندنیان.
ماوەی 10 رۆژیشیان بۆ حكومەت دیاریكردووە بۆ ئەوەی وەڵامی داواكارییەكەیان بداتەوە، ئەوەیان خستووەتە روو، بە پێچەوانەوە رێگەی مەدەنی وەک خۆپیشاندان و چالاكی ناڕەزایی دەگرنەبەر .
شاناز ئیبراهیم ئەحمەد خانمی یەکەمی عیراق سەردانی پارێزگای سلێمانی کرد و لەلایەن د. هەڤاڵ ئەبوبەکر پارێزگاری سلێمانییەوە پێشوازی لێکرا.
لە راگەیەندراوێکیشدا کە پارێزگای سلێمانی بڵاویکردووەتەوە، تێیدا هاتووە، "د.هەڤاڵ ئەبوبەکر پارێزگاری سلێمانی، لە دیوانی پارێزگادا، پێشوازیکرد لە شاناز ئیبراهیم ئەحمەد خانمی یەکەمی عیراقی فیدراڵ، دواتر لەسەر دەستپێشخەریی و پێشنیازی کۆمپانیای ئەندازیاریی ڤیو پایۆنێر، کە بایەخ بە شوێنەوارو کولتور دەدات، کۆبوونەوەیەکی تایبەت بە دروستکردنەوەی پردی کۆنی شوێنەواریی قلیاسان کرا".
ئاماژە بەوەشدراوە، "لە کۆبوونەوەکەدا جێگری پارێزگاری سلێمانی بۆ کاروباری کارگێڕی و بەڕێوەبەری گشتی گەشتوگوزاری پارێزگای سلێمانی و بەڕێوەبەری شوێنەواری پارێزگای سلێمانی ئامادەی بوون، رێکاری پێویست دیاری کراو بە مەیدانیی شوێنی پردە کۆنەکەی قلیاسان بەسەرکرایەوەو وابڕیارە لە ئایندەیەکی نزیکدا دەست بە دروستکردنەوەی بکرێت".
بەڕێوەبەرایەتی پەرەپێدانی کــاری زانکۆی سلێمــــانی ١٧ هەلی کاری بۆ دەرچووانی بەشەکانی بەبازاڕکردن و ئەندازیاری شارستانی راگەیاند.
بەڕێوەبەرایەتی پەرەپێدانی کــاری زانکۆی سلێمــــانی رایگەیاندووە، هەلی کارەکان بە هاوبەشی لەگەڵ گروپی (تانوپۆ هۆڵدینگ) بۆ دەرچووانی بەشەکانی بەبازاڕکردن و ئەندازیاری شارستانین.
ئەوەشی خستووەتە روو، بۆ دەرچووانی بەشی بەبازاڕ کردن ١٥هەلی کــار بەردەستە و بۆ دەرچووانی بەشی ئەندازیاری شارستانی دوو هەلی کـار بەردەستە.
زانکۆی سلێمانی ئی مەیڵێکی بۆ ناردنی سی ڤی داناوە و بەم ناوە ([email protected]) دەشڵێت، دوا وادە بۆ وەرگرتنی سی ڤی ١ی ٢ی ٢٠٢٥ـە.
لیژنەی هاوبەشی یەكێتی و پارتی بۆ ئامادەكردنی رەشنووسی پێكهێنانی حكومەت لە کۆبوونەوەدان.
ئەمڕۆ هەردوو لیژنەی هاوبەشی یەكێتیی نیشتمانیی كوردستان و پارتی دیموكراتی كوردستان لە مەكتەبی سیاسی یەكێتی هەولێر کۆبوونەوە و هێشتا لە کۆبوونەوە بەردەوامن.
کۆبوونەوەکە تایبەتە بە ئامادەكردن و نووسینەوەی رەشنووسی رێکكەوتنی پێكهێنانی حكومەت و كارنامەی كابینەی داهاتووی حكومەت.
ئەوەش لە كاتێكدایە، لە كۆبوونەوەكانی رابردوودا یەكێتی جەختی لەوەكردووەتەوە، دەبێت حكومەتی داهاتووی هەرێم حكومەتێكی خزمەتگوزار بێت.
دوای ئەوەی شەپۆلێکی بەفربارین دوێنێ ناوچە جیاوازەکانی هەرێمی گرتەوە، کەشناسیی هەرێم پێشبینی نوێی لەبارەی کەشوهەوای ئەمڕۆ و سبەی بڵاوکردەوە و رایگەیاندووە، ئەمڕۆ و سبەی کەش جێگیر دەبێت و پلەکانی گەرما نزمتر دەبنەوە.
کەشناسیی هەرێم رایگەیاندووە، ئەمڕۆ سێشەممە، ئاسمان ساماڵ و کەش سارد دەبێت، پلەکانی گەرما کەمێک نزم دەبنەوە بەراورد بە تۆمارکراوەکانى دوێنێ.
ئەوەش هاتووە، سبەی چوارشەممە، ئاسمان لە ساماڵەوە بۆ پەڵەهەور و نیمچەهەور دەگۆڕێت و پلەکانی گەرما ١ بۆ ٢ پلە بەرز دەبنەوە.
بەرزترین پلەکانی گەرمای پێشبینیکراو بە پلەی سیلیزی :
هەولێر : 11 پلەى سیلیزى
سلێمانی : 9 پلەى سیلیزى
دهۆک : 12 پلەى سیلیزى
کەرکوک : 15 پلەى سیلیزى
زاخۆ : 13 پلەى سیلیزى
هەڵەبجە : 11 پلەى سیلیزى
حاجی ئۆمەران: 2- پلەى سیلیزى
سۆران: 5 پلەى سیلیزى
گەرمیان : 17 پلەى سیلیزى
وەزارەتی دارایی هەرێم و عیراق یەكشەممەی داهاتوو كۆبوونەوەی هاوبەش ئەنجام دەدەن، سەبارەت بە شایستە داراییەكانی هەرێمی كوردستان، راسپاردەی پێویستیش ئاڕاستەی ئەنجومەنی وەزیرانی عیراق دەكەن.
وەزارەتی درایی هەرێم لە راگەیەنراوێكدا بلاویكردەوە، كۆبوونەوەكانیان لەگەڵ وەزارەتی دارایی عیراق بەردەوام دەبێت یەكشەممەی داهاتوو كۆبوونەوەی هاوبەش ئەنجام دەدەن، بڕیاری پێویست لەسەر ماف و شایستە داراییەكانی هەرێمی كوردستان دەدەن، ڕاسپاردەی پێویستیش ئاڕاستەی ئەنجومەنی وەزیرانی عیراق دەكەن.
لە بەشێكی تری راگەیەنراوەكەدا هاتووە، تیمێكی هاوبەش لە هەردوو وەزارەتی دارایی عیراق و هەرێم پێكبهێنراوە، لە ئەمڕۆوە لە وەزارەتی دارایی هەرێم دەستبەكار دەبن و ئامادەكاری پێویست دەكەن بۆ كۆبوونەوەی سەرەتای هەفتەی داهاتوو لەسەر ئەرك و پابەندییەكانی هەردوولا بۆ ساڵی 2025.
فەرماندەی هێزەکانی سوریای دیموکرات ''هەسەدە'' رایدەگەیەنێت: هێزەکانیان لە باکور رۆژهەڵاتی سوریا چەک دانانێن، بەڵام ئامادەن بە دانوستان بچنە ناو سوپای داهاتووی سوریاوە.
لە چاوپێکەوتنێکی تایبەتدا لەگەڵ ''ئەلعەرەبیە'' مەزلوم کۆبانێ فەرماندەی هێزەکانی سوریای دیموکرات ''هەسەدە'' رایگەیاندووە، کە هێزەکانی بڕیاری ڕادەستکردنی چەک یان هەڵوەشاندنەوەی خۆیان نەداوە، بەڵکو دەیانەوێت بچنە ناو سوپای داهاتووی سوریاوە. وتیشی: جگە لە دانوستان بۆ رێکخستنەوەی هێزەکان لە سوریا هیچ رێگەیەکی دیکە نیەو هەر شیوازێکی دیکە تاقیبکرێتەوە کاردانەوەی خراپی لێدەکەوێتەوە.
ئاماژەی بەوەشکردوە، شەڕی بەنداوی تشرین بەردەوامە، دەشڵێت: ویستمان لە ڕێگەی دیالۆگەوە کێشەکە لەگەڵ تورکیا چارەسەر بکەین بەڵام نەگەیشتنە ئەنجام، رەتیشیکردەوە هیچ هێرشێکیان لە دژی تورکیا ئەنجامدابێت.
هەر لە چاوپێککەوتنەکەدا ئەوەشی خستەڕوو، دەبێت دەستور مافەکانی کورد لە سوریا دەستەبەر بکات، ئێمەش پشتیوانی یەکگرتوویی خاکەکانی سووریا دەکەین، هەروەها داوا دەکات دان بە زمانی کوردیدا بنرێت و وشەی عەرەبی لە (کۆماری عەرەبیی سوریا) لاببرێت.
سەبارەت بە هێزە ئەمریکییەکان لە سوریا ڕوونی کردەوە، کە بوونیان گرنگە بۆ ئەوەی بۆچوونەکان لێک نزیک بکەنەوە. راشیگەیاند، پشتیوانی مانەوەی هێزەکانی ئەمریکا لە سوریا دەکەین.
سەرۆک بافڵ جەلال تاڵەبانی لە پەیامێکی پیرۆزباییدا بەبۆنەی هەڵبژاردنی دۆناڵد ترەمپ وەک 47 هەمین سەرۆکی ئەمریکا دەڵێت: چاوەڕێم لەگەڵ ئیدارەی نوێی ئەمریکا کاربکەم بۆ بەرەوپێشبردنی ئاشتی و سەقامگیری لە ناوچەکەدا.
دەقی پەیامەکە:
لە قووڵایی دڵمەوە پیرۆزبایی خۆم ئاراستەی سەرۆک دۆناڵد ترەمپ دەکەم بەبۆنەی دەستبەکاربوونی وەک سەرۆکی ویلایەتە یەکگرتووەکانی ئەمریکا. سەرکردایەتییەکەی لاپەڕەیەکی نوێ لە پەیوەندییە بەردەوامەکانی نێوان گەلی کورد و گەلی ئەمریکادا هەڵدەداتەوە.
بەوپەڕی خۆشحاڵییەوە چاوەڕێم لەگەڵ ئیدارەی نوێی ئەمریکا کاربکەم بۆ بەهێزکردنی پەیوەندییە مێژووییەکانمان و بەرەوپێشبردنی ئاشتی و سەقامگیری لە ناوچەکەدا. گەلی کورد و گەلی ئەمریکا پێکەوە دەتوانن جیهانێکی سەلامەتتر و ئاوەدانتر بۆ هەمووان بنیادبنێن.
بافڵ جەلال تاڵەبانی
سەرۆکی یەکێتیی نیشتمانیی کوردستان
لە کۆبوونەوەی وەفدی باڵای حکومەتی هەرێم لەگەڵ حکوەمتی فیدڕاڵ تەئکید لەسەر چارەسەکردنی کێشەکانی نێوان هەردوولا کراوەتەوە، وەزارەتی دارایی هەرێمیش ئاشکرایکردووە، لەگەڵ دارایی عیراق رێککەوتن کراوە بگەنە چارەسەرێکی ریشەیی لەبارەی موچەوە.
بەپێی راگەیەندراوێکی وەزارەتی دارایی هەرێم، رۆژی دووشەممە بەسەرپەرشتیی فوئاد حسێن جێگری سەرۆك وەزیرانی عێراق و سەرۆكی ئەنجومەنی ئابوری كۆبوونەوەیەكی هاوبەش لە نێوان وەفدی هەرێمی كوردستان بە سەرۆكایەتیی ئاوات شێخ جەناب وەزیری دارایی و لەگەڵ وەفدی حكومەتی عێراق كە پێكهاتبوون لە تەیف سامی وەزیری دارایی عێراق و وەزیری ئاوەدانكردنەوە و نیشتەجێكردنی عێراق بەڕێوەچوو
ئەوەشخراوەتەڕوو، كۆبوونەوەكە لە كەشێكی ئیجابی و بەرپرسیارانەدا گفتوگۆ لەسەر ماف و شایستە داراییەكانی هەرێمی كوردستان بۆ ساڵی 2025 كراو و هەردوولا هاوڕابوون كە هەموو هەوڵەكان بخرێنەگەڕ بۆ لابردنی ئاستەنگەكانی بەردەم ناردنی موچەی فەرمانبەرانی هەرێم لەم ساڵدا، هاوكات داواكارییەكانی حكومەتی هەرێم بۆ ناردنی ئەو شایستانەی كە ساڵی رابردوو نەنێردراوە بەداتا و بەڵگەی رەسمی خرایەڕوو گفتوگۆی لەبارەوە كرا.
هەر بەپێی راگەیەندراوەکە، هەردوولا ڕێككەوتن كۆبوونەوەكان بەردەوامبێت و رۆژی یەكشەممەی داهاتوو كۆبوونەوەی هاوبەش ئەنجامبدرێت كە تیایدا بڕیاری پێویست لەسەر ماف و شایستە داراییەكانی هەرێمی كوردستان بدرێت و ڕاسپاردەی پێویستیش ئاڕاستەی ئەنجومەنی وەزیرانی عێراق بكرێت.
لە كۆبوونەوەكەدا بڕیاردرا تیمێكی هاوبەش لە هەردوو وەزارەتی دارایی عێراق و وەزارەتی دارایی هەرێم پێكبهێنرێت و لەسبەی سێشەممەوە تیمەكە لە وەزارەتی دارایی هەرێمی كوردستان دەستبەكاربن و ئامادەكاری پێویست بكەن بۆ كۆبوونەوەی سەرەتای هەفتەی داهاتوو لەسەر ئەرك و پابەندییەكانی هەردوولا بۆ ساڵی 2025 .
لە سلێمانی نرخی هەر سێ جۆرەكەی بەنزین 25 دینار دابەزی و وتەبێژی بەنزینخانەكانی سلێمانیش هۆكارەكەی بۆ كەمبوونەوەی خواست لەسەر بەنزین دەگەڕێنێتەوە.
بەهمەن قادر، وتەبێژی بەنزینخانەكانی سلێمانی بە كوردسات نیوزی راگەیاند، لە سەعات 4ی ئەمڕۆوە نرخی هەر سێ جۆرەكەی بەنزین لە سلێمانی 25 دینار دابەزیووە.
ئەوەشی خستەڕوو، نرخی یەك لیتر بەنزینی نۆرماڵ بووە بە 900 دینار و بەنزینی موحەسەن بووە 1100 دینار و نرخی یەك لیتر بەنزینی سۆپەریش بووە بە 1250 دینار.
سەبارەت بە هۆكاری دابەزینی نرخی بەنزینیش، وتەبێژی بەنزینخانەكانی سلێمانی وتی، بەهۆی هەبوونی بڕە بەنزینێكی زۆر لە سنووری پارێزگاكە و كەمبوونەوەی خواست لەسەری، نرخی بەنزین دابەزیووە.
ئەوەش لەكاتێكدایە رۆژانە لە ژمارەیەك بەنزینخانە لە شارەكانی هەرێم، بەنزینی حكومی بە نرخی پاڵپشتیكراو و بە 750 دینار دابەش دەكرێت.
وەفدی باڵای هەرێمی كوردستان بەبێ دەستكەوت لە بەغداد گەڕانەوە و وەزیری دارایی عیراقیش رەتیكردووەتەوە پارە بۆ مووچەی مانگی 12ـی ساڵی رابردووی مووچەخۆرانی هەرێم بنێرێت.
پەیامنێری كوردسات نیوز رایگەیاند، وەفدە باڵاكەی هەرێم كە شەوی رابردوو گەیشتنە بەغداد، ئەمڕۆ لەگەڵ تەیف سامی وەزیری دارایی عیراق كۆبوونەوە و تاوتوێی مووچەی مانگەكانی 12 و 1ـی مووچەخۆرانی هەرێمیان كردووە.
وتیشی، وەزیری دارایی عیراق بە وەفدەكەی هەرێمی راگەیاندووە بەهۆی كۆتاییهاتنی ساڵی دارایی 2024، بەهیچ جۆرێك ناتوانێت پارە بۆ مووچەی مانگی 12ـی ساڵی رابردووی مووچەخۆرانی هەرێم بنێرێت.
پەیامنێری كوردسات نیوز راشیگەیاند، هەر ئەمڕۆ وەفدەكەی هەرێم لە بەغداد گەڕاونەتەوە و بڕیاریشە سبەینێ تایبەت بە سەردانەكەی بۆ بەغداد لە وەزارەتی دارایی هەرێم كۆبوونەوەیەك ئەنجامبدات. ئاماژەی بەوەشدا، بەهۆی كەموكورتی و ئامادەنەبوونی لیستی مووچەی مانگی 1ەوە، تائێستا هەرێم لیستی مووچەی مانگی 1ـی رادەستی وەزارەتی دارایی عیراق نەكردووە.
ئاگرێک لە گەڕەکی تاڤگەی شاری سلێمانی کەوتەوە و لەلایەن تیمەکانی بەرگری شارستانی سلێمانیەوە کۆنتڕۆڵکرا.
پەیامنێری کوردسات نیوز لە شوێنی ئاگرکەوتنەوەکە رایگەیاند، بەهۆی ئاگرەکەوە ئۆتۆمبێلێک و دوکانێک بە تەواوی سووتان، ئاماژەی بەوەشکرد، خۆشبەختانە بەهۆی روداوەکەوە هیچ کەسێک گیانی لەدەستنەداوە و تەنها زیانی ماددی هەبووە.
پەیامنێری کوردسات نیوز راشیگەیاند: دوای ماوەیەکی کەم تیمەکانی بەرگری و فریاکەوتن گەیشتوونەتە شوێنی رووداوەکە و ئاگرەکەیان کۆنتڕۆڵکرد و نەیان هێشتووە تەشەنە بکات.
بە وتەی یەکێک لە شایەتحاڵەکان زیانی ماددی ئاگرەکە بە نزیکەی 30 هەزار دۆلار دەخەمڵێنرێت.
شاناز ئیبراهیم ئەحمەد پرسەنامەیەک ئاڕاستەی خانەوادەی محەمەد ئەمین قادر ناسراو بە (حەمەی ڕەسام) دەکات.
دەقی پرسەنامەکە
بەڕێزان خانەوادەی محەمەد ئەمین قادر
بەبیستنی هەواڵى ماڵئاوایی یەکجارەکی وێنەگری دێرینی شاری سلێمانی (محەمەد ئەمین قادر) ناسراو بە(حەمەی ڕەسام)، زۆر غەمباربووم.
بۆ ئەم خەمە پرسە و سەرەخۆشی لەخانەوادەکەتان ئەکەم و هاوبەشی خەم و پەژارەتانم، خواى گەورە سەبرو ئارامی بەهەموو لایەک ببەخشێت و ئەمە دوایین ناخۆشیمان بێت.
شاناز ئیبراهیم ئەحمەد
وتەبێژی یەکێتیی نیشتمانیی کوردستان رایگەیاند، پێویستە هەموو لایەنەکان سەقفی داواکارییەکانیان لەگەڵ دۆخەکەدا بگونجێنن، بەپێچەوانەوە خۆیان توشی کێشە دەکەن. دەشڵێت، وڵاتان تاهەتایە هاوکاریمان ناکەن، ئەوان نوێنەری وڵاتی خۆیانن، نوێنەری کورد؛ کورد خۆیەتی.
سەعدی ئەحمەد پیرە وتەبێژی یەکێتیی نیشتمانیی کوردستان رایگەیاند، "بە لەبەرچاوگرتنی بارودۆخی ناوچەکە لەبەرچاگرتنی ئەو پشتگیرییەی هەمانە لەلایەن کۆمەڵگەی نێودەوڵەتی و و هەستیاری ئەو دۆخە، پێویستە هەموو لایەکمان سەقفی داواکرییەکانمان بگونجێنین لەگەڵ دۆخەکە بەرەو رێککەوتن".
وتیشی، "ئەوە تەنها رێگەیە بۆ ئەوەی سود وەرگرین لەو دۆخە نێودەوڵەتیسازە کە بۆ کورد هاتووەتە پێشەوە، پێویستە كورد یەكڕیز بێت، وڵاتان تاهەتایە هاوکاریمان ناکەن، ئەوان نوێنەری وڵاتی خۆیانن و لە کورد کوردتر نین، نوێنەری کورد؛ کورد خۆیەتی".
ئەوەشی خستە روو، "بەپێچەوانەی ئەوانەوە بەدەستی خۆمان، خۆمان توشی کێشە دەکەین".
سەعدی پیرە ئاماژەی بەوەشکرد، هەڵبژاردنیان کردووە و خەڵک چاوەڕێیە، کێشەکانیان ئەوەند گەورە نین کە چارەسەر نەکرێن.