کوردستان
بە بەشداری سەرۆک کۆماری عیراق لە کەرکوک گەورەترین چالاکی هونەری و رۆشنبیریی بەڕێوەچوو، لەژێر ناوی "فێستیڤاڵی کەرکوک هێمای پێکەوەژیانە.
د. لەتیف رەشید سەرۆک کۆماری عیراق لە فێستیڤاڵەکەدا وتارێکی پێشکەشکرد و رایگەیاند: ئەم فێستیڤاڵە گرنگە بۆ بەرجەستەکردنی بەهاکانی یەکڕیزی و پێکەوە ژیان.
وتیشی، شانازیی دامەزراندنی ناوەندی رۆشنبیری کەرکوک دەگەڕێتەوە بۆ سەرۆک مام جەلال، هەروەها سەرۆک مام جەلال هەمیشە بەبێ جیاوازی خزمەتی هەموو پێکهاتەکانی کەرکوکی دەکرد.
راشیگەیاند، گرنگە هەموو پێکهاتەکان کاربکەن بۆ چەسپاندنی پێکەوەژیان لە کەرکوک، هاوکات پێویستە بەرژەوەندییەکانی کەرکوک لە سەروو ناکۆکییەکانەوە بێت
سەرۆک کۆمار ئاماژەی بەوەشکرد، لەگەڵ نزیکبوونەوەی هەڵبژاردن دەبێت کەرکوک لە جەمسەرگیری و دابەشبوون بپارێزرێت و داواش لە هەموو لایەنەکان دەکەین بەشداری لە پرۆسەی هەڵبژاردن بکەن
ئەوەشی خستەڕوو، سوپاسی پارێزگاری کەرکوک دەکەم کە خزمەتی هەموو پێکهاتەکان دەکات
سەرۆک کۆماری عیراق لەگەڵ پارێزگاری کەرکوک و ژمارەیەک لێپرسراوی شارەکە کۆبووەوە
د.لەتیف رەشید سەرۆک کۆماری عیراق لەگەڵ رێبوار تەها پارێزگاری کەرکوک و ئەندامانی ئەنجومەن کۆبووەوە.
لە کۆبوونەوەکەدا کە ئەمڕۆ بەڕێوەچوو ، د.ئەحمەد فەکاک بەدرانی وەزیری رۆشنبیری و گەشتوگوزار و شوێنەوار و ژمارەیەک لە لێپرسراوانی سەرۆکایەتی کۆمار ئامادەی بوون.
لە سەرەتای دیدارەکەدا سەرۆک کۆمار خۆشحاڵی خۆی بە سەردانی پارێزگاری کەرکوک دەربڕی و ئاماژەیکرد بە گرنگی کەرکوک لەرووی فرەچەشنی دانیشتوان و سامانە سروشتییەکانییەوە، هەروەها پێویستی وەبەرهێنانکردن لەو سەرچاوانەی هەیەتی بۆ خزمەتکردنی خەڵکی پارێزگاکە.
سەرۆک کۆمار جەختیکردەوە لە گرنگی پێشخستنی خزمەتگوزاری و پرۆژەکانی گەشەکردن و بەرزکردنەوەی ئاستی ژیانی هاووڵاتیان و دابینکردنی پێداویستیی بۆیان .
سەرۆک کۆمار ئاماژەی بەوەدا کە پارێزگای کەرکوک نموونەیەکی زیندووە بۆ پێکەوەژیانی ئاشتیانە و فرەچەشنی کۆمەڵایەتی، بۆیە پێویست بەوە دەکات کە ببێتە مۆدێلێک بۆ سەقامگیری و گەشەپێدان و بنیاتنانەوە و گەشەکردن. سەرۆک کۆمار باسی لە رۆڵی لێپرسراوان و پێویستی کاری هاوبەش و هەماهەنگی نێوان ئەندامانی ئەنجومەن و حکومەتی خۆجێی کرد بۆ پەرەپێدانی پلان و بەرنامە بۆ پەلەکردن لە هەوڵەکانی ئاوەدانکردنەوە بە شێوەیەک کە هاوتا بێت لەگەڵ پێگەی ئابوورییەکەی و ئاماژەشی بەوەکرد، کەرکوک پێویستی بە هەوڵی زیاتر و کۆکردنەوەی وزە و تواناکان هەیە بۆ پێشخستنی پرۆسەی ئاوەدانکردنەوە و پەرەپێدانی ژێرخانی ئابوریەکەی.
سەرۆک کۆمار هەروەها ستایشی قوربانیدانی خەڵکی کەرکوکی کرد و ویستیان بۆ روبەڕووبوونەوەی ئاستەنگەکان و پاراستنی پێکەوەژیانی ئاشتیانە و چاندنی بەهاکانی برایەتی و هاوپشتی و هاریکاری.
لای خۆیانەوە پارێزگار و ئەندامانی ئەنجوومەنی پارێزگا باسیان لە رەوشی کەرکوک و ئەو سەقامگیرییە ئەمنییە کرد کە بەخۆیەوە دەبینێت و هەروەها هەوڵە بەردەوامەکان بۆ پەرەپێدانی کەرتی خزمەتگوزاریی و پێشخستنی لایەنەکانی گەشەپێدان.
لەوبارەیەوە رێنماییەکانی سەرۆک کۆماریان بە گرنگەوە باسکرد بۆ پشتیوانیکردن لە چەسپاندنی ئاسایش و سەقامگیری پارێزگاکە.
هاووڵاتییەکی بیانی لە هەولێر بە تۆمەتی دزینی سەرە مەنهۆڵ دەستگیرکرا، هەروەها چەندین تاوانی دزی دیکەشی ئەنجامداوە.
بەڕێوەبەرایەتی ئاسایشی هەولێر بڵاویکردەوە، بە فەرمانی دادوەری لێکۆڵینەوەی ئاسایش، هاووڵاتییەکی بیانیان دەستگیرکردووە کە چەند تاوانێکی دزیکردنی ئەنجامداوە.
ئاماژەی بەوەشکردووە، ئەو هاووڵاتییە خەڵکی وڵاتی 'بەنگلادش'ە، بەناوی (م ، ب ، م) ،هەڵساوە بە ئەنجامدانی چەند تاوانێکی دزیکردن و بردنی چەند سەرە مەنهۆڵێکی ئاوەڕی گەڕەکەکانی شاری هەولێر.
کۆمسیۆنی باڵای سەربەخۆی هەڵبژاردنەکانی عیراق تیروپشک بۆ پێدانی ژمارە بە لیست و هاوپەیمانی و کاندیدە سەربەخۆکان ئەنجامدا و بە پێی ئەنجامی تیروپشکەکە یەکێتیی نیشتمانیی کوردستان بە ژمارە (222) بەشداری هەڵبژاردنی ئەنجومەنی نوێنەرانی عیراق دەکات.
یەکێتیی نیشتمانیی کوردستان لە پارێزگاکانی هەولێر، سلێمانی، دهۆک، هەڵەبجە، کەرکوک و دیالە بە لیستی سەربەخۆ بە ناوی لیستی (یەکێتیی نیشتمانیی کوردستان) بە ژمارە 222 بەشداری هەڵبژاردنی ئەنجومەنی نوێنەرانی عیراق دەکات.
هاوکات لە پارێزگای نەینەوا لە چوارچێوەی هاوپەیمانێتییەکدا بەناوی (هاوپەیمانی یەکێتی خەڵکی نەینەوا) بە ژمارە 281 بەشداری هەڵبژاردنەکە دەکات.
هەروەها یەکێتی لە پارێزگای سەلاحەدین یەک کاندیدی هەیە و لە چوارچێوەی هاوپەیمانی (جەماوەری نیشتمانی) دا، لە پارێزگای بەغداش یەکێتی یەک کاندیدی هەیە و بەمەش یەکێتی لە هەشت پارێزگای عیراق کاندیدی بۆ هەڵبژاردنی ئەنجومەنی نوێنەرانی عیراق هەیە، کە تاکە حزبی کوردییە لە زۆرترین پارێزگای عیراق کاندیدی هەیە.
یەکێتیی نیشتمانیی کوردستان لە بازنەی سلێمانی بە 36 کاندید و لە بازنەی هەولێر بە 30 کاندید و لە بازنەی دهۆک بە5 کاندید و لە بازنەی کەرکوک بە 24 کاندید و لە بازنەی دیالە بە 28 کاندید و لە بازنەی نەینەواش لە چوارچێوەی هاوپەیمانێتییەکدا کە لە 62 کاندید پێکهاتووە، 31 کاندیدیان کاندیدی یەکێتیی نیشتمانیی کوردستانن، بەشداری هەڵبژاردن دەکات.
هەروەها یەکێتیی نیشتمانیی کوردستان لە بازنەی بەغدا یەک کاندید و لە بازنەی سەلاحەدینیش یەک کاندیدی هەیە، کە بەتێکڕا بۆ هەڵبژاردنی ئەنجومەنی نوێنەرانی عیراق بە 156 کاندید بەشداری هەڵبژاردنەکە دەکات.
رۆژی 9ی4ی2025 ئەنجومەنی وەزیرانی عیراق بە زۆرینەی دەنگ، 11ی 11ی 2025ی وەك رۆژی هەڵبژاردنی داهاتووی ئەنجومەنی نوێنەرانی عیراق دیاریكرد.
لە کەرکوک گەورەترین چالاکی هونەری و رۆشنبیریی بەڕێوەدەچێت لەژێر ناوی "فیستیڤاڵی کەرکوک هێمای پێکەوەژیانە".
فیستیڤاڵەکە لەسەعات 7ی ئێوارە لەهۆڵی سەنتەری رۆشنبیری کەرکوک ساز دەکرێت و لەلایەن وەزارەتی رۆشنبیری عیراق و بەبەشداریی سەرۆک کۆماری عیراق ساز دەکرێت.
بەپێی ئەجێندای فیستیڤاڵەکە وتاری هەر یەک لەد. لەتیف رەشید سەرۆک کۆماری عیراق و ئەحمەد فەکاک ئەلبەدرانی وەزیری رۆشنبیری عیراق و رێبوار تەها پارێزگاری کەرکوک پێشکەش دەکرێن.
دواتر کار و چالاکیەکانی فیستیڤاڵ بەڕێوەدەچێت کەچەندین چالاکی هونەری و رۆشنبیری پێکهاتەکانی پارێزگاکە لەخۆ دەگرێت، سازدانی فیستیڤاڵەکەش هەوڵێکە بۆ مکۆمترکردنی گیانی برایەتی و پێکەوەژیان لەپارێزگای کەرکوک.
دوای شەش رۆژ لەچەند شار و شارۆچکەیەکی هەرێمی کوردستان و کەرکوک و گەرمیان، ئەمڕۆ دوایین وادەیە بۆ تۆمارکردنی سکاڵا لەسەر عەجاج کە ناسراوە بە جەلادەکەی زیندانی نوگرەسەلمان.
لە ئەمنە سورەکەی سلێمانی کە تیایدا سکاڵاکان تۆماردەکرێن، شایەتحاڵێکی ناو زیندانەکە بە کوردسات نیوزی راگەیاند، عەجاج لەهەموو کەسێکی ناو زیندانەکەی دەدا لەسەرجەم تەمەنە جیاوازەکان، دەڵێت ئێستاش کە ناوی دەهێنن لێی دەترسم چونکە زۆر دڕندە بوو.
ئەو زیندانەی ناو نوگرەسەلمان باس لەوەشدەکات، بەبەچاوی خۆمەوە پیرێژنێک بەپێ لەقە لەبەرچاوی خۆمدا گیانیلەدەستدا، جگە لە ئازاردانی جەستەیی لەڕوی دەرونییەوە زۆر ئازاردراوین.
هاوکات لە مۆنۆمێنتی ئەنفال لە چەمچەماڵ و بەڕێوەبەرایەتی شەهیدان و ئەنفالکراوانی گەرمیان وەرگرتنی سکاڵاکان بەردەوامن، کە تیایدا وتە لە شایەتحاڵ و زیندانییەکانی نوگرە سەلمان وەردەگیرێن وەکو بەڵگە لەسەر تاوانەکانی عەجاج.
بەرگری شارستانی سۆران رایگەیاند، هاووڵاتییەکی دانیشتووی هەولێر لە زێی گەورە لە نزیک گوندی قەمەریانی سنووری قەزای خەلیفان لەکاتی مەلەکردن خنکا.
بەرگری شارستانی وتیشی، هاووڵاتییەکە ناوی فرمێسک بارزانە و تەمەنی 32 ساڵە ، بەمەبەستی توێکاری تەرمەکەی رەوانەی پزیشکی دادیی کراوە.
ئەمەش لەکاتێکدایە بە تەنها لەم هەفتەیەی رابردوودا 7 هاووڵاتی دیکە لەچەند ناوچەیەکی جیاوازی هەرێم لە ئاودا خنکاون.
كۆمپانیای دانەغاز لە نیوەی یەكەمی ئەمساڵدا كۆی قازانجەكەی گەیشتووەتە 270 ملیون درهەم كە دەكاتە 171 ملیۆن دۆلار، بەهۆی توانای بەگەڕخستنی بەهێزی كار لە هەرێمی كوردستان و وەبەرهێنانی نوێ لە میسر، ئەو بڕەش بە ڕێژەی 1% زیاترە لە قازانجی نیوەی یەكەمی ساڵی 2024 كە بڕەكەی 263 ملیۆن درهەم بووە.
كۆمپانیاكە رایگەیاندووە، توانیویەتی لەو ماوەیەدا پارێزگاری لە پێگەی دارایی و ئەدای كاركردنی بكات و لە پرۆژەی فراوانكردنی (كۆرمۆر 250) و كێڵگەی چەمچەماڵ پێشكەوتنی باشی بەدەستهێناوە.
ئاماژەی بەوەشكردووە، لە نیوەی یەكەمی ئەمساڵدا ئاستەكانی بەرهەمهێنانی لە كیڵگەی كۆرمۆر بە شێوەیەكی سەركەوتووانە بەردەوامبووە و رۆژانە زیاد لە 500 ملیۆن پێ سێجا غاز بەرهەمهێنراوە.
بەپێی راگەیەنراوەكە، لە هەمان كاتدا كارەكانی پەرەپێدان و فراوانكردنی پرۆژەی (كۆرمۆر 250) بە باشی بەڕێودەچن لە كاتی تەواوبوونیدا پێشبینی دەكرێت بڕی برهەمهێنانی رۆژانە 250 ملیۆن پێ سێجا غازی تر زیاد بكات، لە كێڵگەی چەمچەماڵیش كارەكانی فراوانكردنی بە خێرایی بەرەوپێش دەچن و لە ئێستادا كاری هەڵكەندن و ئامادەكردنی یەكەی تاقیكردنەوەی بەرهەمی فراوان بۆ شوێنەكە ئەنجام دەدرێت بەو ئامانجەی بتوانرێت بڕی بەرهەمهێنانی رۆژانە بگاتە 75 ملیۆن پێ سێجا غاز.
هەولێر و بەغداد لەڕێی رادەستكردنی راپۆرتێكی هاوبەش بە سەرۆك وەزیرانی عیراق نزیك دەبنەوە لە چارەسەری كۆتایی بۆ كێشەكانی نێوانیان و ناردنی موچەی فەرمانبەرانی هەرێم.
پەیامنێری كوردسات نیوز لە بەغداد رایگەیاند، ئەو وەفدەی لە هەولێرەوە بۆ مەبەستی تاووتوێكردنی دوایین وردەكاریەكانی كێشەكانی نێوان هەرێم و عیراق سەردانی بەغدادیان كردبوو لەگەڵ وەزارەتی دارایی عیراق راپۆرتێكی هاوبەشیان ئامادە كردوو و بریارە راپۆرتەكە رادەستی محەمەد شیاع سودانی سەرۆك وەزیرانی عیراق بكرێت.
بەپێی زانیاریەكانی پەیامنێری كوردسات نیوز، عیراق پێشنیازی كردووە لەڕێی بانكی رافیدەینەوە مووچەی مووچەخۆرانی هەرێم بخرێتە سەر هەژمارەكانیان لە چوارچێوەی (هەژماری من) نەك پارەكە راستەوخۆ بنێردرێت بۆ وەزارەتی دارایی هەرێم.
باسی لەوەشكرد، لە چەند رۆژی داهاتوودا كۆمپانیایەكی ئەمریكی سەردانی كێڵگە نەوتیەكانی هەرێم دەكات و تێچووی دەرهێنانی نەوت لە كیڵگەكاندا دەخەمڵێنێت و چاوەڕوان دەكرێت حكومەتی هەرێم و عیراقیش پابەندی بڕیاری كۆمپانیاكە بن.
سەرۆک کۆماری عیراق لە بەغداد پێشوازیکرد لە لێپرسراوی مەکتەبی سیاسی یەکێتیی نیشتمانیی کوردستان-بەغداد و لە کۆبونەوەیەکدا باس لە ئامادەکاریەکان کرا بۆ هەڵبژاردنەکانی ئەنجومەنی نوێنەران.
لەکۆبونەوەکەدا، باس لەبارودۆخی سیاسی و ئەمنی عیراق و پەیوەندیەکانی نێوان حکومەتی فیدراڵی و هەرێمی کوردستان و پێویستی بەردەوامبوونی راوێژ و کۆبوونەوەکان بۆ دۆزینەوەی چارەسەر بۆ کێشە هەڵپەسێردراوەکان بە پێی یاسا کرا.
هەردوولا باسیان لە ئامادەکارییە بەردەوامەکان کرد، بۆ هەڵبژاردنەکانی ئەنجومەنی نوێنەرانی عیراق.
جەختیشیانکردەوە، لەسەر دابینکردنی کەشێکی گونجاو بۆ هاوڵاتیان بۆ ئەوەی بە ئازادی و شەفافانە نوێنەرەکانیان هەڵبژێرن.
وەزارەتی پەروەردەی حکومەتی هەرێمی کوردستان، لە رێگەی بەڕێوەبەرایەتی خوێندنی دەرەوەی وڵات، ئامادەکاری بۆ کردنەوەی چوارەمین کۆرسی ئۆنلاینی فێرکردنی زمانی کوردی دەکات بۆ کوردانی دانیشتووی دەرەوەی وڵات (دیاسپۆرا).
لە ڕاگەیەندراوێکدا، وەزارەتی پەروەردە ئاشکرای کردووە کە پرۆژەکە لە ساڵی 2022ەوە بە هاوکاری "کۆنفیدراسیۆنی رەوەندی کوردستانی" دەستیپێکردووە و تا ناوەڕاستی ئەمساڵ، سێ کۆرسی سەرکەوتووی بە بەشداریی 1000 هاونیشتیمانی لە وڵاتە جیاجیاکانی جیهانەوە بەڕێوەبردووە و بڕوانامەی فەرمیی وەزارەتیان بە بەشداربووان بەخشیوە.
کۆرسی چوارەمی فێرکارییەکە لە ڕێکەوتی 1ی تشرینی یەکەمی 2025 دەستپێدەکات و وانەکان لەلایەن مامۆستایانی کارامەی زمانی کوردییەوە بە هەرسێ شێوەزاری سۆرانی، بادینی و کرمانجی دەگوترێنەوە.
وەزارەتی پەروەردە داوا لە سەرجەم کوردانی دیاسپۆرا دەکات "وەک ئەرکێکی پەروەردەیی و نەتەوەیی" سوود لەم دەرفەتە وەربگرن و منداڵەکانیان لە هەر ئاست و تەمەنێکدا بن ناویان تۆمار بکەن، چونکە گرنگیدان بە زمانی کوردی "ئەرکێکە لە بواری پاراستنی شوناسی نەتەوەیی."
هاوڵاتیان دەتوانن لە رێگەی ئەم لینکەی خوارەوە فۆڕمی ئەلیکترۆنی پڕبکەنەوە بۆ تۆمارکردنی ناوی منداڵەکانیان:
https://kurdistanidc.org/ziman/
لە ئاکرێ پێشنوێژ و وتارخوێنێک بە تۆمەتی ئەنجامدانی سیحر و جادوو دەستگیرکرا، پۆلیسی ئاکرێش دەڵێت: سحیری گەیاندن بەیەکی ئەنجامداوە.
عیماد حوسێن لێپرسراوی راگەیاندنی بەرێوبەرایەتی پۆلیسی ئاکرێ بە کوردسات نیوزی راگەیاند، پیاوێکی تەمەن 60 ساڵیان دەستگیرکردووە بە تۆمەتی ئەنجامدانی 300 سیحری جۆراوجۆر بە تایبەتی سیحری (گەیاندنە یەک).
ئاماژەی بەوەشکرد ، ئەو هاووڵاتییە خەڵکی قەزای ئەکرێیە و لە یەکێک لە مزگەوتەکانی سنوری دەرەوەی قەزاکە پێشنویژ و وتارخوێنە، هاوکات ئەو کارانەی لەبەرانبەر وەرگرتنی پارە ئەنجامداوە.
عیماد حوسێن وتیشی، ئەو تۆمەتبارەکە دانی بە تاوانەکەیدا ناوە و دەستبەسەر چەندین کتێب و بابەتی پەیوەندیدار بە سیحر گیراوە، لە ئێستاشدا بە بڕیاری دادوەر و مادەی 240 دەستگیرکراوە و لێکۆڵینەوە لەگەڵی بەردەوامە.
لە شاری هەولێر تەرمی ژنێک لە ماڵەکەی خۆیدا دۆزرایەوە، کە ماوەی چەند رۆژێکە گیانی لەدەستداوە و پێی نەزاندراوە.
گەیلان سابیر پەیامنێری کوردسات نیوز لە هەولێر رایگەیاند، دوای ئەوەی پۆلیسی هەولێر ئاگادارکراوەتەوە لە هەبوونی بۆنێکی ناخۆش لە ماڵێکی گەڕەکی 99ـی شارەکە، دوای گەیشتنی پۆلیس و چوونە ژورەوەی هێزە ئەمنییەکان بۆ نێو ماڵەکە دەرکەوتووە تەرمی ژنێک لەماڵەکەدا هەیە.
وتیشی، تەرمی ئەو ژنەی لە ماڵەکەی خۆیدا دۆزراوەتەوە، مامۆستای زانکۆی سەڵاحەدین بووە و پێش چەند ساڵێک خانەنشینکراوە، هاوکات ماوەی زیاتر لە هەفتەیەکە گیانی لەدەستداوە و پێی نەزاندراوە.
پەیامنێری کوردسات نیوز ئەوەشی خستەڕوو، ئەو مامۆستایە هیچ کور و کچێكی نییە و تەنها چەند خوشک و برایەکی هەیە کە لە دەرەوەی وڵاتن.
راشیگەیاند، لە ئێستادا تەرمەکەی لە پزیشکی دادی هەولێرە و دوای ئەنجامدانی توێکاری رادەستی کەسوکارەکەی دەکرێتەوە.
دوای وەستانی چاپکردنی پاسپۆرت لە هەولێر، بەڕێوبەرایەتی پاسپۆرتی ئەو پارێزگایە دەڵێت: هیچ جرجێک نەچووەتە ئامێری چاپکردنی پاسپۆرتەوە و تەنها بەهۆی کێشەی تەکنیکیەوە چاپکردن راوەستاوە.
بەڕیوەبەرایەتی پاسپۆرتی هەولێر لە راگەیەنراوێکدا بڵاویکردەوە، دوای بڵاوبوونەوەی دەنگۆیەک کە گوایە بە هۆکاری چوونە ناوەوەی جرج بۆ ناو ئامێری چاپ و کاری چاپکردنی پاسپۆرت راوەستاوە، نوسینگەی دووی پاسپۆرتی هەولێر ئەو دەنگۆیانە رەتدەکاتەوە و دەڵێت، تەنها بەهۆی کێشەی تەکنیکییەوە کاری چاپکردن راوەستاوە دوای شەش کاتژمێر کێشەکە چارەسەرکراوە.
پاسپۆرتی هەولێر ئاگاداری هاووڵاتیانش دەکاتەوە، ئەوانەی سەردانی نوسینگەی دووی پاسپۆرتی هەولێریان کردبوو بەمەبەستی ئەنجامدانی مامەلەی دەرهێنانی پاسپۆرت لە 48 کاتژمێری رابردوو، ئەمرۆ تا کاتژمێر شەشی ئێوارە دەتوانن سەردانیان بکەن و پاسپۆرتەکانیان وەربگرنەوە.