کوردستان
هەڵمەتی دەستگیرکردنی دەرۆزەکەران بەردەوامە وپۆلیسی سلێمانیش دەڵێت: تا ئێستا حەوت دەرۆزەکەر دەستگیرکراون.
بەڕێوەبەرایەتی پۆلیسی سلێمانی لەراگەیەنراوێکدا بڵاویکردەوە،لە هەڵمەتێكی مەفرەزەكانی بەشی پۆلیسی نەهێشتنی تاوانی سلێمانی بەمەبەستی دەستگیركردنی ئەو كەسانەی كاری دەرۆزەكردن دەكەن لەناوشار و دەرەوەی شاری سلێمانی ، توانراوە حەوت دەرۆزەكەر لەسەر رێگای عەربەت - سلێمانی دەستگیربكرێن كەلەسەر ئەو رێگایە دەوەستان .
ئاماژەی بەوەشکردووە، لە ئێستادا سەرجەم ئەو دەرۆزەکەرانە بەبڕیاری دادوەر راگیراون و پەڕاوی لێكۆڵینەوەیان بۆ كراوەتەوە .
پۆلیسی سلێمانی راشیگەیاندووە، هەڵمەتی دەستگیركردنی ئەو كەسانەی كە كاری دەرۆزەكردن دەكەن بەردەوام دەبێت و دەرۆزەكەران دەستگیردەكرێن و روبەڕووی یاسا دەكرێنەوە .
حکومەتی هەرێم رێنمایی هاووڵاتیان دەکات لە کاتی مەلەکردندا هێلەکی تایبەت بە مەلەوانی بەکاربهێنن، دەشڵێت: مەلەکردن لە تاریکیدا رێگەپێدراو نییە.
دەستەی پاراستن و چاککردنی ژینگەی حکومەتی هەرێم بە چەند خاڵێک رێنمایی هاووڵاتیان دەکات، کە لە دەرەوەی مەلەوانگەکان مەلەدەکەن و دەڵێت: پێویستە مەلەکردن لە رۆژدا بێت و لە تاریکیدا رێگەپێدراو نییە.
ئاماژەی بەوەشکردووە، باشترە لە کاتی مەلەکردن دەوروبەرت خەڵکی لێبێت و قەرەباڵەغ بێت و تەنیا نەبیت، هەروەها هێلەکی تایبەتی مەلەوانی بەکاربهێنیت.
ئەوەشی خستوەتەڕوو، مەلەکردن لە روبار و بەنداوەکان جیاوازە لەگەڵ مەلەوانگەکان، بۆیە پێویستە ئەو شوێنەی مەلەی لێدەکەیت لەگەڵ تواناکاندا بگونجێت.
ئەمەش لە کاتێکدایە، ماوەی چەند رۆژێکە روداوەکانی خنکان لە روبار و بەنداوەکان لە ناوچە جیاوازەکانی هەرێم رووی لە زیابدبوون کردووە.
تۆمەتباری روداوەکەی گەڕەکی فەرمانبەرانی هەڵەبجە دەستگیرکرا کەتێیدا دوو کەس کوژران، پۆلیسی هەڵەبجەش دەڵێت: تۆمەتبارەکە لە دایکبووی ساڵی 2003یە.
بەڕێوبەرایەتی پۆلیسی هەڵەبجە بڵاویکردەوە، تۆمەتباری روداوەکەی رۆژی هەڵەبجە دەستگیرکرا، کە بەرەبەیانی رۆژی 5-8-2025 کەسێک کە بە سواری ماتۆڕسکیل و کڵاوی لەسەردابووە، تەقەی لە سێ گەنج کرد لە گەڕەکی فەرمانبەران، کەلەئەنجامدا دوو گەنجیان گیانیان لەدەستدا و کەسێکی دیکەیان بریندار بوو.
ئاماژەی بەوەشکرد، دوای بەدواداچوون لەلایەن هێزەکانیانەوە، تۆمەتباری روداوەکە بە ناوی (ش . ف .ع) لە دایکبووی 2003 دانیشتوی پارێزگای هەڵەبجە خۆی رادەستی هێزەکانیان کردووە.
پۆلیسی هەڵەبجە راشیگەیاند، لەبەردەم دادوەری لێکۆڵینەوە دانی بەتاوانەکەدا ناوە لەئێستادا بەبڕیاری دادوەر بەمادەی 406ـی یاسای سزادانی عیراقی راگیراوە و لێکۆڵینەوەکان بەردەوامە.
بەپێی پێشبینییەکانی کەشناسی، ئەمڕۆ پێنجشەممە ئاسمان ساماڵ دەبێت و پلەکانی گەرما نزمدەبنەوە.
بەڕێوەبەرایەتی کەشناسی هەرێم بڵاویکردەوە، ئەمڕۆ پێنجشەممە ئاسمان ساماڵ دەبێت و پلەکانی گەرما بە گشتی 1 بۆ 2 پلە نزم دەبنەوە بەبەراورد بە تۆمارکراوەکانی دوێنێ.
ئاماژی بەوەشکرد، سبەینێ هەینی ئاسمان ساماڵ دەبێت و ئەگەرى بەرزبوونەوەى تۆز و خۆڵێکى کەم هەیە.
پلەکانی گەرما بەم شێوەیە دەبێت....
هەولێر : 42 پلەی سیلیزی
سلێمانی : 41 پلەی سیلیزی
دهۆک : 40 پلەی سیلیزی
کەرکوک : 43 پلەی سیلیزی
زاخۆ : 41 پلەی سیلیزی
هەڵەبجە : 42 پلەی سیلیزی
سۆران : 39 پلەی سیلیزی
حاجی ئۆمەران : 32 پلەی سیلیزی
گەرمیان 44 پلەی سیلیزی
بریکاری پێشوی وەزارەتی دارایی عیراق دەڵێت: ئەمڕۆ وەفدێکی هەرێم و وەزارەتی دارایی عیراق بۆماوەی شەش کاتژمێر کۆبونەتەوە.
رێباز حەملان بریکاری پێشویی وەزارتی دارایی عیراق لەمیانی بەشداریکردنی لە بەرنامەی پانۆرامای کوردسات نیوز رایگەیاند، هێرشە درۆنیەکان بۆ سەر کێڵگە نەوتیەکان زیانی زۆری بە هەرێم گەیاندووە، هاوکات بووەتە هۆی کەمبوونەوەی ئاستی بەرهەمهێنانی نەوت بە رێژەی 180 هەزار بەرمیل لە رۆژێکدا.
راشیگەیاند، ئەمڕۆ وەفدێکی هەرێم لەگەڵ وەزارتی دارایی و چاودێری دارایی عیراق بۆماوەی شەش کاتژمێر کۆبونەتەوە و لێکتێگەیشتنی باش لەنێوانیاندا هەبووە.
ئاماژەی بەوەشکرد، سبەینێ وەفدەکەی هەرێم لەگەڵ تەیف سامی وەزیری دارایی عیراق کۆبونەوەیەکی گرنگ ئەنجامدەدەن، ئەگەر کۆبونەوەکە ئەنجام و لێکتێگەیشتنێکی باشی هەبوو ئەوا لە کۆبوونەوەکەی ئەنجومەنی وەزیرانی عیراق بڕیار لەسەر ناردنی موچەی مانگی شەش و حەوت دەدرێت.
بریکاری پێشوی وەزارەتی دارایی عیراق وتیشی، سەرجەم گفتوگۆکانمان لەگەڵ بەغداد بۆ ناردنی موچەی مانگی شەش و حەوتی فەرمانبەرانی هەرێمە ، ئەگەر بەغداد گەرەنتی ناردنی موچەی مانگی شەشی فەرمانبەران بکات ئەوا 120 ملیار دینار داهاتی ناوخۆی هەرێم رادەست دەکەن.
جەختیشیکردەوە، ئەگەر بەبانکیکردنی موچەی فەرمانبەرانی هەرێم ئەنجام بدرێت هێشتا کێشەی موچەی موچەخۆرانی هەرێم چارەسەرنابێت و بەغداد راستەوخۆ موچە دابەش ناکات.
لە بەنزینخانەیەکی هەولێر بەهۆی دەمەقاڵێوە سێ کەس کوژران، پۆلیسی هەولێریش دەڵێت: تۆمەتباری روداوەکە دەستگیرکراوە.
قارەمان جەوهەر پەیامنێری کوردسات نیوز رایگەیاند: بەهۆی دەمەقاڵێوە لە بەنزینخانەیەکی هەولێر لەسەر رێگای کۆیە شەڕ لەنێوان دوو کەس و کارمەندێکی بەنزینخانەکە دروستبوو، لەئەنجامدا سێ کەس کوژران.
وتیشی، کارمەندی بەنزینخانەکە بە چەک تەقەی لەو دوو کەسە کردووە کە چوونەتە بەنزیخانەکە و هاوکات، کەسێکی دیکە کە هیچ پەیوەندییەکی بە روداوەکەوە نەبووە لەوێوە تێپەڕیوە گوللـەی بەرکەوتووە و ئەویش گیانی لەدەستداوە.
پەیامنێری کوردسات نیوز ئەوەشی خستەڕوو، کێشەکە لەسەر پارەی بەنزین بووە و لە ئەنجامدا ئەو روداوەی لێکەوتووەتەوە
هاوکات بەڕێوەبەرایەتی پۆلیسی هەولێر بڵاویکردەوە، تۆمەتباری روداوەکە دەستگیرکراوە و لە ئێستاشدا بە بڕیاری دادوەر راگیراوە و لێکۆڵینەوەش لە روداوەکە بەردەوامە.
لە سلێمانی دوو تیرۆرست دەستگیرکران کە پیلانیان بۆ ئەنجامدانی تەقینەوە لە یەکێک لە بنکەکانی بەرگری و شارستانی دانابوو، دەزگای ئاسایشی هەرێمیش دەڵێت: یەکێک لەتیرۆریستەکان کارمەندی بنکەیەکی بەرگری شارستانی بووە
دەزگای ئاسایشی هەرێم بڵاویکردەوە، بەڕێوەبەرایەتی گشتی ئۆپراسیۆنەکانی ئاسایش، لەشاری سلێمانی دوو تیرۆریستیان دەستگیرکرد، پیلانیان ئەنجامدانی تەقینەوە بوو لەیەکێک لەبنکەکانی بەرگری شارستانی.
ئاماژەی بەوەشکرد، دوای بەدواداچوون و لێکۆڵینەوەی ورد و کۆکردنەوەی زانیاری هەواڵگری، لەئەنجامی بڵاوبوونەوەی گرتە ڤیدیۆیەک لەتۆڕەکۆمەڵاتییەکان لەبارەی هەڕەشەکردن و تەقینەوە، بەڕێوەبەرایەتی گشتی ئۆپراسیۆنەکان، دەستبەجێ توانیان لەئەنجامی بەدواداچوونەکان شوێنی تیرۆریستان لەشاری سلێمانی دەستنیشان بکەن.
ئەوەشی خستەڕوو، بەفەرمانی دادوەری لێکۆڵینەوەی ئاسایش لەڕۆژی 22 تا 24-6-2025 توانیویانە ئەو دوو تیرۆرستە دەستگیر بکەن و یەکێک لەتیرۆریستەکان کارمەندی بنکەیەکی بەرگری شارستانی بووە.
دەزگای ئاسایشی هەرێم راشیگەیاند، دوای دانپێدانان دەرکەوت تیرۆریستان بەنیازبوون لەپیلانی یەکەمدا ژەهر بکەنە ناو تانکی ئاوی خواردنەوەی یەکێک لە بنکەکانی بەرگری شارستانی سلێمانی، لەپیلانی دووەمدا لەڕێگەی لکاندنی بۆمب بە ئۆتۆمبێلی بنکەکە تەقینەوە ئەنجام بدەن، بەڵام بەڕێوەبەرایەتی گشتی ئۆپراسیۆنەکانی ئاسایش بەسەرکەوتوویی توانیان شکست بە پیلانی تیرۆریستان بهێنن و دەستگیریان بکەن.
ئاشکراشیکرد، لەئێستادا تیرۆریستان بەمادەی(2)تیرۆر دەستگیرکراون و لێکۆڵینەوە لەدۆسیەکانیان بەردەوامە.
بۆ بینینی ڤیدیۆی دانپێدانانی تیرۆرستەکان کلیک لێرە بکە..
کۆمەڵێک خوێندکاری زانکۆ جیاوازەکانی هەرێمی کوردستان، لە دوای تەواوکردنی مەشقی هاوینە لە زانکۆیەکی میسر بڕوانامەیان پێبەخشرا.
ژمارەیەک خوێنکاری زانکۆکانی هەرێمی کوردستان مەشقی هاوینەیان لە میسر ئەنجامدا، کە خوێندکاری هەر یەک لە زانکۆی پۆلیتەکنیکی سلێمانی پۆلیتەکنیکی گەرمیان و زانکۆی پۆلیتەکنیکی هەولێر و زانکۆی سەڵاحەدینن.
ئەو خوێندکارانە لە زانکۆی میسر بۆ زانست و تەکنەلۆژیا مەشقی هاوینەیان ئەنجامداوە، لە کۆلێژە جیاوازەکانی، ئەندازیاری، پەرستاری، کارگێری و کۆلێژەکانی دیکەبوونە.
هاوکات ئەو خوێندکارانە بە شێوەیەی مەیدانی لە نەخۆشخانەکان و کارگەکان و کۆمپانیاکان، مەشقیان ئەنجامداوە.
هەروەها لە دوای تەواوکردنی مەشقەکانیان، لەلایەن زانکۆی میسر بۆ زانست و تەکنەلۆژیا بڕوانامەی دانپێدانراویان پێبەخشرا.
جارێکی دیکە یەکێک لە بۆرییەکانی پڕۆژەی ئاوی ئیفراز لە هەولێر شکا، بەڕێوەبەری ئاوی هەولێریش دەڵێت: شکانی ئەو بۆریە هیچ کاریگەریەکی لەسەر دابەشکردنی ئاوی هەولێر نابێت.
رابەر حوسێن، بەڕێوەبەری ئاوی هەولێر بە کوردسات نیوزی راگەیاند: یەکێک لە بۆریەکانی ئاوی ئیفراز شکا و لە ئێستادا تیمەکانیان سەرقاڵی چاککردنەوەیین.
وتیشی، شکانی ئەو بۆریە هیچ کاریگەریەکی لەسەر دابەشکردنی ئاوی هەولێر نابێت و تیمەکان سەرقالی چاککردنەوەی ئەو بۆرییەن و لە نزیکترین کاتدا.
جموجۆڵەكانی روسیا لە رۆژئاوای كوردستان زیاد دەكات و پەیامنێری كوردسات نیوز رایگەیاند هەمو جموجۆڵەكانی روسیا لە قامیشلۆ بە ئاگاداریی هەسەدە دەكرێت.
پەیامنێری كوردسات نیوز لە قامیشلۆ رایگەیاند: لە دوای روخانی رژێمی بەشار ئەسەد هێزەكانی روسیا چەند جارێك لە قامیشلۆ جموجۆڵیان كردوە و ئەوەش بوەتە مایەی سەرنجی دانیشتوانی رۆژئاوای كوردستان بە تایبەت كە لە دوای روخانی رژێمی پێشو ئەو هێزانە دەركەوتن و چالاكییان نەماوە.
وتیشی، هێزەكانی سوریای دیموكراتی "هەسەدە" یاوەری زۆرینەی كاروانە سەربازییەكانی روسیا دەكەن و سەرجەم جوڵەی ئەو هێزانەی روسیا كە لە فڕۆكەخانەی قامیشلۆ جێگیرن بە ئاگاداریی ئەوان دەكرێت.
لێپرسراوێكی رۆژئاوای كوردستان كە نەیویستوە ناوی ئاشكرا بكرێت بە پەیامنێری كوردسات نیوزی راگەیاندوە، روسیا دەیەوێت رۆڵی لە گۆڕانكارییەكانی سوریای نوێدا هەبێت و ئەوەش هۆكارە بۆ زیادبونی جموجۆڵی هێزە سەربازییەكانی.
دانیشتوانی ناحیەی کەورگۆسک سەر بە قەزای خەبات دژی نەبونی خزمەتگوزارییەکان و نەبونی ئاو و کارەبا گردبوونەوە رێگای سەرەکی قەزاکەیان داخست.
پەیامنێری کوردسات نیوز رایگەیاند، بەهۆی داخستنی رێگاکەوە لۆدێکی زۆر لەسەر شەقامەکە دروستبووە و ئاستەنگی هاتوچۆی لێکەوتووەتەوە.
داواکاریی هاووڵاتیانی ناحیەکە تایبەتە بە جێبەجێکردنی پڕۆژە خزمەتگوزارییەکان و دامەزراندن، تائێستاش بەرپرسانی ناوچەکە بەدەم داواکارییەکانەوە نەچوون.
دوای دەستگیرکردنی عەجاج ناسراو بە جەلادەکەی زیندانی نوگرەسەلمان، تۆمارکردنی سکاڵا لەلایەن کەسوکاری ئەنفالکراوان بەردەوامە.
بەپێی زانیارییەکانی کوردسات نیوز، لە سلێمانی و چەندین شوێنی دیکەش سکاڵاکان تۆماردەکرێن و وتە لە شایەتحاڵ و تاقانەکانی ئەنفالی ناو زیندانەکە وەردەگیرێت.
عەجاج ناوی تەواوی عەجاج ئەحمەد حەردان تکریتییە، خەڵکی شاری تکریتی ناوەندی پارێزگای سەڵاحەدینە و بە جەلادەکەی زیندانی نوگرەسەلمان ناسراوە لەسەردەمی حوکمی رژێمی پێشووی بەعس.
رژێمی بەعس لەساڵی 1988دا لەهەڵمەتێکی سەربازی گەورەدا پلانی ئەنفالی کوردی بەچەند قۆناغێک دەستپێکرد و بەهۆیەوە زیاتر لە 182 هەزار کەس ئەنفال و بێسەروشوێن کران.
بافڵ جەلال تاڵەبانی سەرۆکی یەکێتیی نیشتمانی کوردستان پرسەنامەیەک ئاڕاستەی کەسوکار و خانەوادەی نەرمین قادر دەکات و دەڵێت: کۆشش و بەرهەمەکانی هونەرمەند نەرمین قادر، بۆ هەمیشە بە زیندوویی دەمێنێتەوە.
دەقی پرسەنامەکە.......
بەڕێزان کەسوکار و خانەوادەی کۆچکردوو خاتوو نەرمین قادر
لە دڵەوە نیگەران و غەمبارم بووم بە گیانلەدەستدانی هونەرمەندی دیاری گەلەکەمان نەرمین قادر.
بۆ ئەم خەمە پرسە و سەرەخۆشی ئاڕاستەی ئێوە دەکەم و هاوبەشی خەمتانم.
خاتوو نەرمین یەکێک بووە لە هونەرمەندە دیارەکانی کوردستان و کۆشش و بەرهەمەکانی بۆ هەمیشە بە زیندوویی دەمێنێتەوە و بە رێزەوە یاد و یادەوەرەییەکانی بەرز رادەگرین.
خودای گەورە رۆحی هونەرمەندی ئازیزمان بۆ هەمیشە شادبکات، ئارامی و سەبووریش بە هەموولایەک ببەخشێت.
بافڵ جەلال تاڵەبانی
سەرۆکی یەکێتیی نیشتمانیی کوردستان
قوباد تاڵەبانی جێگری سەرۆک وەزیرانی هەرێم پرسەنامەیەکی ئاراستەی خانەوادەی هونەرمەند نەرمین قادر کرد و رایگەیاند، کۆچکردوو خانمە هونەرمەندێکی بەئەزموونی شانۆ و نواندن بوو کە کار و پەیامەکانی بەوپەڕی وریایی و دڵسۆزییەوە بۆ خزمەتی گەلی کورد ئاڕاستە دەکرد.
دەقی پرسەنامەکەی قوباد تاڵەبانی....
بەڕێزان خانەوادەی کۆچکردوو نەرمین قادر
بەڕێزان سەندیکای هونەرمەندانی کوردستان
زۆر بەداخەوە هەواڵى کۆچی دوایی هونەرمەند (نەرمین قادر)م بیست.
کۆچکردوو خانمە هونەرمەندێکی بەئەزموونی شانۆ و نواندن بوو کە کار و پەیامەکانی بەوپەڕی وریایی و دڵسۆزییەوە بۆ خزمەتی گەلی کورد ئاراستە دەکرد و ڕۆڵیکی دیاری هەبوو لە بەرهەمهێنانی پڕبینەرترین بەرنامەکان لەمێژووی زێڕینی تەلەفزیۆن و نواندندا.
بۆ ئەم کۆچە، هاوبەشی خەمی خانەوادە و هونەرمەندان و ئازیزانی کۆچکردووم و پرسەو سەرەخۆشیان لێ ئەکەم.
خوای گەورە لەنەرمین خان خۆش بێت و جێگەی بەهەشت بێت، سەبورى و دڵنەواییش بەهەموو لایەک ببەخشێت.
انا لله وانا اليه راجعون
قوباد تاڵەبانی
جێگری سەرۆکی ئەنجومەنی وەزیران
لە ماوەی شەش مانگی رابردوودا زیاتر لە دوو هەزار حاڵەتی نوێی شێرپەنجە لە نەخۆشخانەی هیوا تۆمارکراون، بەڕێوەبەری نەخۆشخانەکەش دەڵێت: زۆربەی توشبووەکان خەڵکی خوارووی عیراق و شارەکانی دیکەی هەرێمن.
د.یاد نەقشبەندی بەڕێوەبەری نەخۆشخانەی هیوا لە سلێمانی لە میانی بەشداریکردنی لە ستۆدیۆ هەشتی کوردسات نیوز رایگەیاند، بەهۆی قەیرانی دارایی و گرفتە سیاسییەکان داهاتی سندوقی شێرپەنجە لە سەدا 60 کەمی کردووە، سەڕەرای ئەوەش چارەسەرکردنی نەخۆش و پێدانی دەرمان پێیان لە نەخۆشخانەکە بەردەوامە.
بەڕێوەبەری نەخۆشخانەی هیوا وتیشی، شاری سلێمانی پایتەختی چارەسەرە بۆ توشبووانی شێرپەنجە، هەروەها بەشێكی زۆری توشبووان لە نەخۆشخانەی هیوا چاکبوونەتەوە.
راشیگەیاند، ئەو ئامارانەی بڵاوبووەتەوە کە لەماوەی شەش مانگدا، دوو هەزار حاڵەتی توشبووی نوێ لە نەخۆشخانەی هیوا تۆمارکراون، توشبووی پارێزگاکانی دیکەی هەرێمی تێدایە و بەشێکی ئەو توشبووانەش خەڵکی ناوەڕاست و خوارووی عیراقن، نەک تەنها شاری سلێمانی.
د.یاد نەقشبەندی ئەوەشی خستەڕوو، خۆشبەختانە رێژەی توشبوون لە خوار ستانداردی جیهانییەوەیە، بەڵام دەبێت بەردەوام لە پێشکەوتندا بین بۆ چارەسەرکردن و بڵاوکردنەوەی هۆشیاری زیاتر لە کۆمەڵگەدا، هاوکات سەرەڕای زیادبوونی رێژەی توشبوون بە شێرپەنجە، لەبەرانبەردا رێژەی چاکبوونەوەش زیادیکردووە.
خانمی یەکەمی عیراق بۆ کۆچی دوایی هونەرمەند نەرمین قادر پەیامێکی هاوخەمی بڵاوکردەوە و رایگەیاند: ناو و بیرەوەری و خزمەتەکانی لەپاڵ ئەزموون و رۆڵبینینی سەنگینی لەبەرنامەی بەرنامە، لەمێژووی هونەری و ویژدانی گەلەکەماندا بەدرەوشاوەیی دەمێنێتەوە.
دەقی پەیامی هاوخەمی خانمی یەکەمی عیراق بۆ هونەرمەندی کۆچکردوو نەرمین قادر....
بەبیستنی هەواڵى ماڵئاوایی یەکجارەکی هونەرمەند (نەرمین قادر)، زۆر غەمباربووم.
بۆ ئەم خەمە پرسە و سەرەخۆشی لەخانەوادەی کۆچکردوو و هونەرمەندان و دەزگای میدیایی کوردسات ئەکەم و هاوبەشی خەم و پەژارەتانم، خواى گەورە سەبرو ئارامی بەهەموو لایەک ببەخشێت و ئەمە دوایین ناخۆشیمان بێت.
بۆ هەتایە، ناو و بیرەوەری و خزمەتەکانی لەپاڵ ئەزموون و رۆڵبینینی سەنگینی لەبەرنامەی بەرنامە، لەمێژووی هونەری و ویژدانی گەلەکەماندا بەدرەوشاوەیی دەمێنێتەوە.
شاناز ئیبراهیم ئەحمەد