هەواڵەکان
سندوقی نێودەوڵەتی دراو هۆشداری دەدات لە درێژەكێشانی جەنگی دژ بە ئێران و دەڵێت، ئەگەر تا كۆتایی ئەمساڵ جەنگ كۆتایی نەیەت كارەساتی ئابوری رودەدات.
كریستیانا گۆرگیێڤا بەڕێوەبەری سندوقی نێودەوڵەتی دراو هۆشداری دەدات لەوەی ئەگەر جەنگ لە رۆژهەڵاتی ناوەڕاست تا كۆتایی ئەمساڵ درێژە بكێشێت و نرخی نەوت بگاتە 125 دۆلار بۆ هەر بەرمیلێك، ئەوا جیهان رووبەڕووی دەرئەنجامی زۆر خراپتر دەبێتەوە.
ئاماژەی بەوەشكردووە، ئێستا جیهان چووەتە ناو سیناریۆیەكی نەرێنیەوە، كە نرخی یەك بەرمیل نەوت لە خانەی 100 دۆلاردایە و هەڵئاوسان بەردەوام روو لە هەڵكشانە.
گۆرگیێڤا سێ ئەگەریشی بۆ كۆتایی ئەمساڵ و ساڵی داهاتوو داناوە و رایگەیاندووە، یان سیناریۆكان وەك پێشبینییەكان دەبن، یان پێشبینی دابەزینی گەشەی ئابوری بۆ رێژەی 2.5٪، كە ببێتە هۆی بەرزبوونەوەی هەڵاوسان بە رێژەی 5.4٪. یان كەمبوونەوەی گەشەی ئابوری بۆ 2٪ و زیادبوونی هەڵئاوسان بە رێژەی 5.8٪.
هەروەها جەختی لەوەشكردەوە، ناسەقامگیری بازاڕەكان و بەردەوامی جەنگ، دەبێتە هۆی تێكچوونی هاوسەنگییە داراییەكان و فشارێكی زیاتر دەخاتە سەر بژێوی خەڵك لەسەر ئاستی جیهان.
بەپێی پێشبینییەكانی كەشناسیی هەرێم كاریگەرییەكانی خۆڵبارین تا كۆتایی هەفتە درێژدەبێتەوە و پلەكانی گەرما نزم دەبنەوە.
كەشناسیی هەرێم رایگەیاند، ئەمڕۆ سێشەممە بە گشتی ئاسمانی هەرێم نیمچەهەور دەبێت و كەش فێنك دەبێت، هەروەها خۆڵبارین بەردەوام دەبێت و خێرایی با زیاد دەكات.
ئاماژەی بەوەشكردووە، لە سنوری پارێزگای هەڵەبجە و سلێمانی ئەگەری بارانبارین و هەورەبروسكە هەیە و بۆ ئەمڕۆ پلەكانی گەرما 1 بۆ 3 پلەی سیلیزی بەرزدەبنەوە.
كەشناسی راشیگەیاندووە، سبەینێ چوارشەممە، بەهەمان شێوە ئاسمان بە گشتی نیمچەهەور دەبێت و پلەكانی گەرما نزم دەبنەوە. هەروەها پێشبینی دەكرێت بەهۆی درێژبوونەوەی نزمەپاڵەپەستۆكان كاریگەریی خۆڵبارین بۆ رۆژانی چوارشەممە و پێنجشەممەش درێژ ببێتەوە.
دوای رووداوەكانی رۆژی دووشەممە، لێپرسراوانی ئەمریكا پێشبینی دەكەن ترەمپ لە ماوەی چەند رۆژێكدا رێگە بە دەستپێكردنەوەی هێرش بۆ سەر ئێران بدات.
بەپێی راپۆرتێكی وۆڵ ستریت جۆرناڵی ئەمریكی، دۆناڵد ترەمپ سەرۆكی ئەمریكا دەیویست خۆی لە شەڕ بەدوور بگرێت و لەوە زیاتر لە جەنگ تێوەنەگلێت، بەڵام بەهۆی رووداوەكانی دوێنێ لێپرسراوانی ئەمریكا فشاری زیاتریان خستووەتەسەر بۆ ئەوەی فەرمان بكات بە دەستپێكردنەوەی هێرشەكان بۆ سەر ئێران.
هەروەها لیندسی گراهام سیناتۆری كۆمارییەكان كە پشتیوانی دەستوەردانی ئەمریكای لە ئێران كردووە وتویەتی، ئێران بە تەواوی ئاگربەستی پێشێل كردووە و كردەوەكانی نیشانی دەدەن كە وڵاتێك نییە لەگەڵ دیپلۆماسیەتدا بێت، بۆیە پێویستە ترەمپ بە هێرشێكی گەورە و بەهێز و بەئازار، بەڵام كورتخایەن وەڵام بداتەوە.
خودی ترەمپ لە دوایین لێدوانیدا وتویەتی، لەگەڵ جەنگدا نییە بۆ سەر ئێران، بەڵام ناهێڵێت ببنە خاوەن چەكی ئەتۆمی، دەشڵێت ئێران كەشتیگەلی دەریایی و مووشەك و سەركردەشی نەماوە.
ئێران رایگەیاند، ئەمریكا هێرشی كردوەتە سەر دوو بەلەمی بچوك لە گەروی هورمز پێنج هاووڵاتی كوژراون.
ئاژانسی تەسنیمی ئێران بڵاویكردوەتەوە، ئەمریكا هێرشی كردووەتە سەر دوو بەلەمی بچووك لە گەروی هورمز كەلوپەلی خەڵكیان گواستووەتەوە، لە ئەنجامدا پێنج هاووڵاتی كوژراون.
سوپای پاسدارانیش رایگەیاندوە، ئەمریكا هیچ كەشتییەكی جەنگی نەكردوەتە ئامانج، بەهۆی ترسی لە چالاكی بەلەمەكانی سوپا، ێرشی كردوەتە سەر بەلەمی هاووڵاتییانی مەدەنی.
ئەوەش لە كاتێكدایە دوای دەستپێكردنی جەنگ دژی ئێران لە 28ی شوباتی رابردوو، لە 8ی نیسان بە نێوەندگیری پاكستان، ئاگربەست راگەیەنرا، لە 13ی نیسانیش ئەمریكا گەمارۆی خستووەتە سەر هاتوچۆیی دەریایی ئێران لە گەروی هورمز.
وەزارەتی تەندروستیی عیراق، ئەمڕۆ دووشەممە، رایگەیاند، بەهۆی ئەو شەپۆلی خۆڵبارینەی ناوچەکەی گرتووەتەوە هەزار و 133 حاڵەتی تەنگەنەفەسی تۆمارکراوە.
سەیف بەدر، وتەبێژی وەزارەتی تەندروستی بە ئاژانسی هەواڵی عیراقی (واع)ـی راگەیاند: لە چەند پارێزگایەک هەزار و 133حاڵەتی تەنگەنەفەسی بەهۆی شەپۆلی خۆڵبارینەکەوە تۆمارکراون، ئاماژەی بەوەش کرد کە هیچ حاڵەتێکی گیانلەدەستدان تۆمار نەکراوە
وتیشی: حاڵەتەکانی تەنگەنەفەسی لە نێوان سوک و مامناوەدابوون و زۆربەی تووشبووان دوای وەرگرتنی چارەسەر نەخۆشخانە و سەنتەرە تەندروستییەکانیان جێهێشتووە.
وەزارەتی گواستنەوەی ویلایەتە یەکگرتووەکانی ئەمریکا کارکردنی زیاتر لە 20 هەزار شۆفێری بارهەڵگری راگرت بەهۆی شارەزانەبوونیان لە زمانی ئینگلیزیدا، ئەمەش لە چوارچێوەی هەڵمەتێک بۆ رێکخستنەوەی کەرتی گواستنەوەی کاڵاکان و سنووردارکردنی دامەزراندنی کۆچبەرانی نایاسایی لەو کەرتەدا.
شۆن دەفی، وەزیری گواستنەوەی ئەمریکا لە پۆستێکدا لە تۆری "ئێکس" ئاشکرای کرد کە وڵاتەکەی نزیکەی 28 هەزار مۆڵەتی شۆفێریی کە بە شێوەی نایاسایی دەرکرابوون هەڵوەشاندووەتەوە، هەروەها جەختی کردەوە کە رێکارەکان لەمە زیاتریش دەڕۆن.
ئەم بڕیارانە پشت دەبەستن بەو رێسایانەی کە لە کۆتایی ئابی 2025دا راگەیەندران، کە شۆفێران پابەند دەکات بە هەبوونی ئاستێکی باشی زمانی ئینگلیزی تاوەکو بتوانن لەگەڵ کارمەندانی جێبەجێکردنی یاسا پەیوەندی بکەن و ناوەڕۆکی بارەکانیان لە خاڵەکانی پشکنیندا ئاشکرا بکەن.
ئەم رێکارانە لە چوارچێوەی هەوڵەکانی ئیدارەی دۆناڵد ترەمپدایە بۆ توندکردنی چاودێریی سەر بازاڕی کار لەو کەرتانەی کە هێزی کارێکی زۆریان تێدایە، لە پێش هەمووشیانەوە کەرتی گواستنەوەی وشکانی کە بە دەمارێکی سەرەکیی ئابووری ئەمریکا دادەنرێت.
لە دوای گەڕانەوەی بۆ کۆشکی سپی، ئیدارەی دۆناڵد ترەمپ هەڵمەتێکی بێپێشینەی دژی کۆچبەران دەستپێکردووە، کە تەنانەت ئەو کەسانەشی گرتووەتەوە کە چەندین دەیەیە لە ویلایەتە یەکگرتووەکان دەژین. لە سڕکردنی بەرنامەکانی پەنابەری و هەڵوەشاندنەوەی مافی وەرگرتنی ڕەگەزنامە لە ڕێگەی لەدایکبوونەوە، تاوەکو دیپۆرتکردنەوەی زۆرتر لە ٢.٥ ملیۆن کۆچبەر تەنها لە ساڵی یەکەمدا.
نەعیم قاسم ئەمینداری گشتی حزبوڵا رایدەگەیەنێت، هیچ ئاگربەستێك لە لوبنان بوونی نییە و ئیسرائیل و ئەمریكا بەردەوامن لەسەر دوژمنكارییەكانیان.
نەعیم قاسم رایگەیاند، حزبوڵا لەگەڵ رێگەچارەی دیپلۆماسییە بۆ راگرتنی هێرشەكان، بەڵام لەگەڵ دانوستانی ناراستەوخۆن، چونكە دانوستانی راستەوخۆ سازشێكی بێ بەرهەمە و خزمەت بە بنیامین ناتانیاهۆ سەرۆك وەزیرانی ئیسرائیل دەكات.
دەشڵێت، لە لوبنان ئاگربەست بوونی نییە، بەڵكو دوژمنكاری ئەمریكا و ئیسرائیل بەردەوامی هەیە و هێڵی سور و ناوچەی پارێزراویش بوونی نییە و نابێت.
نەعیم قاسم راشیگەیاند، بە بەرگریكردن و لێكتێگەیشتنی ناوخۆیی و سود وەرگرتن لە رێككەوتنی ئەمریكا و ئێران، دەتوانن ئەم قۆناغە تێبپەڕێنن.
ئەنجومەنی کێڵگە پەلەوەرییەکانی سلێمانی لە رونکردنەوەیەکدا بۆ رای گشتی، سەرجەم ئەو دەنگۆیانەی رەتکردەوە، کە باس لە گرانبوونی هێلکەی خواردن دەکەن لە بازاڕەکانی هەرێمی کوردستاندا.
ئەنجومەنەکە جەختی لەوە کردەوە، کە رێگری لە هەر بەرزبوونەوەیەکی نایاسایی نرخ دەکەن بۆ ئەوەی بارگرانی بۆ سەر شانی هاووڵاتیان دروست نەبێت.
هاوکات دڵنیایی دا، کە سەرجەم کێڵگە پەلەوەرییەکانی سنوری پارێزگای سلێمانی بەردەوامن لە پرۆسەی بەرهەمهێنان بە بڕ و کوالێتییەکی بەرز و هەموو تواناکانیان دەخەنە گەڕ بۆ تێرکردنی بازاڕ لە بەرهەمی ناوخۆیی و پاراستنی سەقامگیری نرخەکان.
دەقی رونکردنەوەکەی ئەنجومەنی کێڵگە پەلەوەرییەکانی سلێمانی
هاونيشتمانيانى خۆشەویست، دوای ئەوەی لە چەند ڕۆژی ڕابردوودا دەنگۆی ئەوە بڵاوبووەوە کە گوایە نرخی هێلکەی خواردن لە بازاڕەکانی هەرێمی کوردستان ڕوو لە گرانبوون دەکات، ئێمە لە ئەنجومەنی کێڵگە پەلەوەرییەکانی سلێمانی بە پێویستمان زانی ئەم ڕوونکردنەوەیە بۆ ڕای گشتی بڵاوبکەینەوە بۆ ڕەواندنەوەی هەر نیگەرانییەک:
١- هاوڵاتیانی ئازیزی شاری سلێمانی دڵنیا دەکەینەوە کە ئەم دەنگۆیانە دوورن لە ڕاستییەوە و ئێمە وەک ئەنجومەن، بە هەموو شێوەیەک ڕێگری دەکەین لە هەر بەرزبوونەوەیەکی نایاسایی لە نرخی هێلکەدا و ڕێگە نادەین بارگرانی بۆ سەر شانی هاوڵاتیان دروست ببێت.
٢- ئێمە وەک خاوەن کێڵگە پەلەوەرییەکان، هەمیشە خۆمان بە بەشێک لە خەم و ژیانی خەڵک زانیوە و لەم سۆنگەیەشەوە دوپاتی دەکەینەوە کە لە پشتی هاوڵاتیانی خۆشەویستی خۆمانین و بەرژەوەندی گشتی لە سەروو هەموو بەرژەوەندییەکی ترەوە دادەنێین.
٣- سەرجەم کێڵگە پەلەوەرییەکانی سنووری پارێزگای سلێمانی بەردەوامن لە پرۆسەی بەرهەمهێنان بە بڕ و کوالێتییەکی بەرز، و هەموو تواناکانمان دەخەینە گەڕ بۆ ئەوەی بازاڕەکان تێر بکەین لە بەرهەمی ناوخۆیی و ڕێگری لە هەر کورتهێنانێک بگرین.
لە کۆتاییدا، دڵسۆزی خۆمان بۆ خزمەتکردنی هاوڵاتیان دوپات دەکەینەوە و بەردەوام دەبین لە دابینکردنی پێداویستییەکانی سەر خوانەکانتان بە نرخێکی گونجاو و جێگیر.
ئەنجومەنی کێڵگە پەلەوەرییەکانی سلێمانی
رێککەوتی ٤/٥/٢٠٢٦
نوسراوی ئامادبوونی بڕی داهاتی نانەوتی بۆ مانگی چوار هەرێمی كوردستان رەوانەی بەغداد كرا.
سەرچاوەیەك لەوەزارەتی دارایی ئابووری حكومەتی هەرێمی كوردستان بە كوردسات نیوزی راگەیاند نوسراوی ئامادبوونی بڕی داهاتی نانەوتی مانگی چوار هەرێمی كوردستان بۆ وەزارەتی دارایی حكومەتی فیدراڵ نێردرا چاوەرێی رەزامەندی وەزارەتی داراین بۆ ناردنی پارەكە.
سەرچاوەك وتیشی داهاتەی نانەوتی بۆ ئەم مانگە زیاتر لە 50 ملیار دینارە، ئاماژەی بەوەشكرد، ئەگەر بەغداد هیچ كێشەیە و گرفتێكی لەگەڵ بری داهاتەكە نەبێت لەماوەی 48 سەعاتی داهاتوودا وەزارەتی درارایی هەرێم داهاتی نانەوتی دەخاتە سەر هەژماری وەزارەتی دارایی عیراق.
لایەنە سیاسییە سوننەکانی ناو "ئەنجومەنی سیاسیی نیشتمانی" کۆبوونەوەیەکی بەرفراوانیان لە ماڵی خەمیس خەنجەر ئەنجامدا، بە مەبەستی تاوتوێکردنی کارنامەی داواکارییەکانی پێکهاتەی سوننە و شێوازی بەشدارییان لە حکومەتی داهاتووی عیراق بە سەرۆکایەتی عەلی زەیدی، سەرۆکوەزیرانی راسپێردراو.
سەرچاوەیەکی ئاگادار ئاشکرای کرد کە کۆبوونەوەکە هاوپەیمانی "عەزم" بە سەرۆکایەتی موسەننا سامەڕائی تییدا بەشدار نەبوو، کە خاوەنی 15 کورسییە لە کۆی 77 کورسیی نوێنەرانی سوننە لە ئەنجومەنی نوێنەران.
تا ئێستا هۆکارە رەسمیەکانی ئامادەنەبوونی سامەڕائی رانەگەیەندراون، لە کاتێکدا لایەنە سوننەکانی دیکە هەوڵ دەدەن وەک بەرەیەکی یەکگرتوو لەگەڵ لایەنە شیعەکان بچنە ناو دانوستانەکانەوە.
لە کۆبوونەوەکەدا باس لە کۆمەڵێک مەرج و داواکاری کرا کە پەیوەستن بە قۆناغی داهاتوو، کە گرنگترینیان هاوسەنگی سیاسی لە دامەزراوەکانی دەوڵەتدا، و دابینکردنی خزمەتگوزاری بۆ پارێزگا ئازادکژراوەکان لە دەستی داعش، وگەرەنتی جێبەجێکردنی کارنامەی حکومەت.
بڕیارە ئەم داواکارییانە لە چوارچێوەی رەشنووسێکی کۆتاییدا ئاراستەی عەلی زەیدی سەرۆکوەزیرانی راسپێردراو وچوارچێوەی هەماهەنگی وەک گەورەترین کوتلەی لایەنە شیعەکان بکرێت
ئەم کۆبوونەوەیە لە کاتێکدایە کە هەنگاوەکان بۆ پێکهێنانی حکومەتی نوێ خێراتر بوونەتەوە، عەلی زەیدی هەوڵ دەدات بەشدارییەکی بەرفراوانی هەموو پێکهاتەکان مسۆگەر بکات بۆ تێپەڕاندنی ئاڵۆزییە سیاسی و ئابورییەکان.
کایا کالاس، بەرپرسی سیاسەتی دەرەوەی یەکێتی ئەوروپا، ئەمڕۆ دووشەممە، رایگەیاند کە کاتی راگەیاندنی پلانی ویلایەتە یەکگرتووەکانی ئەمریکا بۆ کشانەوەی 5000 سەرباز لە ئەڵمانیا، جێگەی سەرسوڕمان بوو.
کالاس لە کاتی گەیشتنی بۆ لووتکەی کۆمەڵگەی سیاسی ئەوروپا لە ئەرمینیا، وتی: کاتی ئەم راگەیاندنە کتوپڕە.. پێموایە ئەمە دەری دەخات کە پێویستە پایەی ئەوروپی لەناو هاوپەیمانی ناتۆدا بەهێزتر بکرێت و پێویستە هەوڵی زیاتر بدرێت، هەروەها جەختی لەوە کردەوە کە: بوونی هێزەکانی ئەمریکا لە ئەوروپا تەنها بۆ پاراستنی بەرژەوەندییەکانی ئەوروپا نییە، بەڵکو پاراستنی بەرژەوەندییەکانی ئەمریکاش دەگرێتەوە.
ئەم لێدوانانە دوای ئەوە هات کە مارک روتە، ئەمینداری گشتیی ناتۆ، سەرلەبەیانی ئەمڕۆ رایگەیاندبوو کە وڵاتانی ئەوروپا پەیامێکیان لە دۆناڵد ترەمپ، سەرۆکی ئەمریکاوە پێگەیشتووە و ئێستا کار دەکەن بۆ دڵنیابوون لە جێبەجێکردنی رێککەوتنەکانی پەیوەست بە بەکارهێنانی بنکە سەربازییەکان.
روتە لە پەراوێزی لووتکەی ئەرمینیا بە رۆژنامەنووسانی وت: هەندێک ناڕەزایەتی لە لایەنی ئەمریکاوە هەبوو، بەڵام ئەوروپییەکان گوێیان گرت.
شایەنی باسە، پێشتر ترەمپ هەندێک لە وڵاتانی ناتۆی تۆمەتبار کردبوو بەوەی کە کەمتەرخەمن لە پشتگیریکردنی ئەمریکا لە جەنگی دژ بە ئێران، هەروەها رەخنەی لێگرتبوون کە بەشداری ناکەن لە دابینکردنی ئاسایشی گەشتیاری دەریایی لە گەرووی هورمز.
بەهۆی ئەو شەپۆلە چڕەی خۆڵبارینەوە کە پارێزگای سلێمانی گرتوەتەوە، تەندرستی شارەکە چەند رێنماییەکی بڵاوکردوەتەوە و داوا لە هاووڵاتییان دەکات پابەندن بن.
ئەمڕۆ دووشەممە، بە مەبەستی پاراستنی سەلامەتی هاووڵاتیان و کەمکردنەوەی کاریگەرییە تەندروستییەکانی تەمومژ و تۆز و خۆڵ، تەندروتسی سلێمانی هەشت رێنمانیی راگەیاند وداوا لە هاووڵاتییان دەکات بۆ سەلامەتی خۆیان پابەندی رێنماییەکان بن
رێنماییەکان بۆ چۆنێتیی خۆپاراستن لەکاتی خۆڵبارین؛
یەکەم؛ لەکاتی چوونەدەرەوەدا ماسک بەکاربهێنن و زوو زوو بیگۆڕن.
دووەم؛ لەکاتی خۆڵباریندا لەماڵەوە بمێنەرەوە و مەچۆرەدەرەوە.
سێیەم؛ چاویلکە و قەترەی چاو بەکاربهێنە بۆ پاراستنی چاوەکانت.
چوارەم؛ چاوەکانت بشۆ لەبری خوراندنی چاو.
پێنجەم؛ بەباشی دەرگا و پەنجەرەی ماڵەکەت دابخە.
شەشەم؛ لەکاتی خۆڵباریندا لە پلەی گەرمی بەرزدا برێکی باش ئاو بخۆرەوە.
حەوتەم؛ لەکاتی شۆفێریدا جامەکانی ئۆتۆمبێلەکەت دابخە.
هەشتەم؛ ئەوانەی نەخۆشیی ڕەبۆیان هەیە بەبەردەوامی پەمپی ئۆکسجین هەڵبگرن لەژێر ڕێنمایی پزیشکیدا چارەسەر وەربگرن .
وەزارەتی دارایی عیراق رایگەیاند، قەبارەی داهاتەكانی لە بودجەی گشتیدا بۆ دوو مانگی یەكەمی ئەمساڵ گەیشتووەتە زیاتر لە 15 تریلیۆن دینار.
بەپێی ئەو داتا و خشتانەی وەزارەتی دارایی عیراق ئەمرۆ بڵاویكردووەتەوە، كۆی گشتی داهاتەكان لە مانگی مانونی ئەكەم و شوبان ساڵی 2026 گەیشتووەتە 15 تریلیۆن و 708 ملیار و 703 ملیۆن دینار، ئەو ژمارەیەش بەراورد بە هەمان ماوەی ساڵی 2025، بە رێژەی ١٣٪ دابەزیوە، كە ساڵی رابردوو 117 تریلیۆن و 427 ملیار دینار بووە.
سەبارەت بە وردەكاریەكانی ئەو داهاتانەش وەزارەتی نەوتی عریاق راگەیاندوە، داهاتی نەوت 13 تریلیۆن و 127 ملیار دیناربووە، داهاتی نانەوتی دوو ترلیۆن و 581 ملیار دیناربووە، داهاتی نانەوتی هەرێمی كوردستان، 120 ملیار دینار رادەستی گەنجینەی دەوڵەت كراوە.
ئاماژەی بەوەشكردوە، كۆی گشتی خەرجییەكانی دەوڵەتیش 16 ترلیۆن و 978 ملیار دیناربووە كە لەو بڕەش زیاتر لە 13 ترلیۆن دینار بۆ موچەی فەرمانبەران و موچەی خانەنشنی و تۆڕی پاراستنی كۆمەڵایەتی خەرجكراوە.
ئەمە لە كاتێكدایە، عودەی عەواد، سەرۆكی كوتلەی سادقون لە ئەنجومەنی نوێنەران رایگەیاند، حكومەت لە مانگی یەكەوە تا ئێستا بڕی نۆ تریلیۆن دیناری لەناوخۆدا قەرز كردووە بۆ پڕكردنەوەی كورتهێنانی بودجە و دابینكردنی مووچەی فەرمانبەران.
ئیسماعیل بەقایی، وتەبێژی وەزارەتی دەرەوەی ئێران، لە کۆنگرەیەکی رۆژنامەوانیدا رایگەیاند، ئەمریکا دەبێت فێری ئەوە بووبێت، کە ناتوانێت بە زمانی هەڕەشە و زۆر لەگەڵ ئێران بدوێت و هۆشداری دا کە تاران خۆی بە پارێزەری ئاسایشی گەروی هورمز دەزانێت.
بەقائی ئاماژەی بەوە کرد، کە ئاسایشی ناوچەکە پێش دەستێوەردانەکانی ئەمریکا پارێزراو بووە و ئێستاش هەر جۆرە هاتوچۆیەکی سەلامەت پێویستی بە هەماهەنگی لەگەڵ لایەنە پەیوەندیدارەکانی ئێران هەیە.
سەبارەت بە دانوستانەکان، ناوبراو رایگەیاند، کە وەڵامی ئەمریکایان لە رێگەی پاکستانەوە پێگەیشتووە، بەڵام جەختی کردەوە، کە واشنتۆن هەمیشە داواکاری بێسنوری هەیە.
ناوبراو ئاماژەی بەوەشکرد، لە ئێستادا تاران تەنیا جەخت لەسەر راگرتنی تەواوەتی شەڕ دەکاتەوە و بابەتەکانی پەیوەست بە پرسی ئەتۆمی لەم قۆناغەدا تەنیا وەک پێشبینی میدیایی دەبینێت.
ئەمڕۆ دووشەممە، لەکاتی لەحیمکردنی تانکەریکدا لەلایەن هاووڵاتییکەوە، تاکەرەکە تەقیوەتەوە و بەهۆیەوە باوک و کورێک بریندارن، بە گویرەی زانیارییەکان بەهۆی سەختی برینەکانیانەوە رەوانەی سلێمانی کراون.
سەڵاح جەمیل، پەیامنێری کوردسات نیوز رایگەیاند، لەئەنجامی کاری لەحیمکردنی تانکەرێک لەقەزای سەیدسادق، کە تانکەرێکی گواستنەوەی سوتەمەنی بووە، تەقیوەتەوە و بەهۆیەوە دوو کەس بریندارن، کە باوک و کوڕن.
بەگوێرەی زانیارییەکانی کوردسات نیوز، دوای گواستنەوەی بریندارەکان بۆ نەخۆشخانەی شەهید شەوکەت لە قەزاکە، بەهۆی سەختی برینەکانیانەوە رەوانەی نەخۆشخانەکانی سلێمانی کراون.
وەزارەتی سەرچاوە ئاوییەکانی عیراق پلانی خۆی بۆ بونیادنانی نزیکەی 40 بەنداو لە ناوچە جیاجیاکانی وڵات ئاشکرا کرد.
ئەم هەنگاوە بە مەبەستی رووبەڕووبوونەوەی وشکەساڵی و باشتر بەڕێوەبردنی سامانی ئاو دێت.
ویسام خەڵەف، بەڕێوەبەری گشتی بەنداوەکان لە وەزارەتەکە رایگەیاند: ئامانجی سەرەکی ئەم پڕۆژانە سوودوەرگرتنە لە ئاوی باران و لافاوە وەرزییەکانی زستان، تاوەکو لە وەرزی هاویندا بۆ ئاودێری و زەوییە کشتوکاڵییەکان بەکاربهێنرێنەوە.
سەبارەت بە وردەکارییەکان، ئاماژەی بەوە کرد کە 36 بۆ 40 بەنداو لە پلانەکەدایە، کە سێ دانەیان لە چوارچێوەی رێککەوتنی ستراتیژی نێوان عیراق و تورکیادان، ئەو سێ بەنداوەش بریتین لە (ئەبیەز، خەرز، و ئەبوتاقیە) کە لە ئێستادا لە قۆناغی زۆر پێشکەوتووی جێبەجێکردندان.
هەروەها باسی لەوەش کرد کە پلانەکانی وەزارەت لە ئیدارەدانی لافاوەکانی ئەمساڵ سەرکەوتوو بووە، کە بووەتە هۆی پڕبوونی بەنداوە گرنگەکانی وەک دەربەندیخان و حەمرین.