عیراق
تەندروستی زیقار رایگەیاند، ژمارەی توشبوون بە تای خوێنبەربوون بەرزبووەتەوە و گەیشتوەتە 19حاڵەت.
ئەحمەد خەفاجی سەرۆكی لیژنەی تەندروستی لە ئەنجومەنی زیقار رایگەیاند، ژمارەی ئەو كەسانەی لە ئەمساڵدا تا ئێستا توشی تای خوێنبەربوون بوون گەیشتوەتە 19حاڵەت.
وتیشی لەو ژمارە تەنها پێنجیان لە نەخۆشخانە ماونەتەوە، كە ئەوانیش تەندروسیان جێگیرە و ئەوانی دیكەش دوای وەرگرتنی چارەسەر گەراونەتەوە ماڵەوە.
پێشتر، وەزارتی تەندروستی عیراق رایگەیاندبوو، تا ئێستا زیاتر لە 40 حاڵەت تای خوێنبەربوون لە عیراق تۆماركراوە كە زۆرینەیان لە پارێزگای زیقار بووە لەو حاڵەتانەش 6 كەسیان گیانیان لەدەستداوە.
تای خوێنبەربوون نەخۆشییەكی كوشندەیە و لە ڕێگەی بەركەوتن لەگەڵ یان خواردنی گۆشتی ئاژەڵی توشبوو بۆ مرۆڤ دەگوازرێتەوە. هاوكات لە مرۆڤیشەوە بۆ مرۆڤ دەگوازرێتەوە.
نوری مالكی رایگەیاند، تا ئێستاش سەرۆكی سوریا لە عیراق داواكراوە، بۆیە خۆشحاڵ نەبوون بە چاوپێككەوتنەكەی سودانی و شەرع.
نوری مالكی سەرۆكی هاوپەیمانی دەوڵەتی یاسا لە چاوپێكەوتنێكی رۆژنامەەوانیدا، رەخنەی لە كۆبوونەوەی نێوان محەمەد شیاع سودانی، سەرۆك وەزیرانی عیراق و ئەحمەد شەرع، سەرۆكی راگوزەری سوریا لە دەوحە گرت و جەختی لەوە كردەوە كە ئەو كۆبوونەوەیە بەبێ ئاگاداری و راوێژكاری سەركردەكانی چوارچێوەی هاوپەیمانی و سەرۆكایەتی كۆمار و وەزیری دەرەوە ئەنجامدراوە.
وتیشی، ئەوان لەم كاتەدا هیچ پاساوێك بۆ ئەو كۆبوونەوەیە نابینن، بەتایبەتی كە تا ئێستاش ئەحمەد شەرع لەلایەن دەسەڵاتی دادوەری عیراقەوە داواكراوە.
هەرچەندە ئەحمەد شەرع دوای روخانی رژێمی پێشووی سوریا پۆستی سەرۆكایەتی سوریای پێدراوە، بەڵام تا ئێستاش لەلایەن دەزگای دادوەری عیراقەوە بە هۆی پشتیوانی لە داعش لە ساڵی 2023 فەرمانی دەستگیركردنی بۆ دەركراوە.
كەشناسی عیراق پێشبینی دەستپێكردنەوەی خۆڵبارین و دابەزینی پلەكانی گەرما و باران بارین دەكات لە هەرێمی كوردستان و ناوچەكانی تری عیراق .
بەپێی راگەیەندراوێكی دەستەی كەشناسی عیراق، بەهۆی كاریگەری شەپۆلێكی پەستان نزم كە لە ئەفریقاوە روو لە عیراق دەكات، ئەمرۆ لە هەندێك لە ناوچەكانی هەرێمی كوردستان بە تایبەت دهۆك لە هەندێك كاتدا ئاسمان هەور دەبێت و لە هەندێك لە ناوچەكانیش بارانێكی كەم دەبارێت، كاریگەری ئەو كەشەش لە كاتەكانی شەودا دەگاتە هەولێر و سلێمانی و كەركوك .
لە ناوچەكانی تری عیراقیش لە ئێوارە و شەودا ئاسمان دەگۆڕێت بۆ هەور، رۆژی دوو شەممەش پلەكانی گەرما چەند پلەیەك دادەبەزن و شەپۆلی خۆڵبارین دەستپێدەكاتەوە .
چاوپێكەوتنی سەرۆك كۆماری عیراق لەگەڵ كەناڵی " حەدەس"ـی سعودی، بۆ گفتوگۆكردن لەبارەی دوایین پێشهاتە نێودەوڵەتی و هەرێمی و ناوخۆییەكان و تێڕوانینی عیراق بەرانبەریان.
لە دەستپێكی چاوپێكەوتنەكەدا د. لەتیف رەشید سەرۆك كۆماری عیراق لەبارەی لوتكەی عەرەبییەوە، كە بڕیارە رۆژی 17ـی ئەم مانگە لە بەغدادی پایتەخت بەڕێوەبچیت وتی، لە سنوری وڵاتانی عەرەبی كێشە و گرفتێكی زۆر هەیە و بڕیارە لە لوتكەكەدا، ئەو كێشەو گرفتانە تاوتوێ بكرێن و بڕیاری پێویستیان لەبارەوە بدرێت، وتیشی، بانگهێشتنامەی رەسمییان ئاڕاستەی سەرجەم سەرۆكی وڵاتانی عەرەبی كردووە بۆ بەشداریكردن لە لوتكەكە لەنێویاندا سەرۆكی سوریا.
هەر لە چاوپێكەوتنەكەدا د.لەتیف رەشید لەبارەی دوایین پێشهاتەكانی سوریاوە رایگەیاند، سوریا هاوسێیەكی گرنگە بۆ عیراق و رۆڵی سەرەكی دەگێڕێت لە ئاسایش و سەقامگیری ناوچەكەدا، بەڵام وەكو عیراق نیگەرانن لە ئاسایشی سەر سنوری نێوانیان و بۆ ئەوەش داوای هەماهەنگی ئەمنی لە سوریا دەكەن.
لە بەشێكی تری چاوپێكەوتنەكەدا، سەرۆك كۆماری عیراق سەبارەت بە دانووستانەكانی ئەمریكا و ئێران ئاماژەی بەوەدا، ئومێدەوارن دانوستانەكان سەركەوتوو بن، چونكە شكستهێنانی كاریگەری نەرێنی لەسەر تەواوی ناوچەكە دەبێت، وتیشی، وەكو عیراق پەیوەندییەكی پتەویان لەگەڵ هەریەك لە ئەمریكا و ئێران هەیە.
لە درێژەی چاوپێكەوتنەكەی لەگەڵ كەناڵی " حەدەس"، د.لەتیف رەشید تیشكی خستەسەر بەشێك لە پرسە مشتومڕ هەڵگرەكانی ناوخۆی عیراق، لەنێویاندا هەڵبژاردنی خولی شەشەمی ئەنجومەنی نوێنەران، كە بڕیارە رۆژی 11ـی مانگی 11ـی 2025 بەڕێوەبچێت، لەوبارەیەوە سەرۆك كۆمار وتی، ئامادەكاری سەرجەم لایەنە پەیوەندیدارەكان بۆ هەڵبژاردنەكە دەستیپێكردووە و ئومێدەوارن هەڵبژاردنەكە لە وادەی خۆیدا بەڕێوەبچێت، وتیشی، وەكو ئەركی سەرۆك كۆمار داوا لە هەموو هێزە سیاسییەكانی عیراق دەكات بەشداری هەڵبژاردن بكەن.
سەبارەت بە پەیوەندییەكانی نێوان بەغداد و هەولێر، د.لەتیف رەشید ئاماژەی بەوەدا، پەیوەندییەكانی نێوان بەغداد و هەولێر لە ئاستێكی باشدایە و هەردوولا بەردەوام لە گفتوگۆدان بۆ چارەسەركردنی پرسە هەڵپەسێردراوەكانی نێوانیان، لەوانەش مووچە.
هاوكات، لەبارەی ئاستەنگەكانی بەردەم دەستپێكردنەوەی هەناردەی نەوتی كوردستان سەرۆك كۆمار روونیكردەوە، هۆكاری تەكنیكی لەپشت دەستپێنەكردنەوەی هەناردەی نەوتی كوردستانەوەیە، جەختیشیكردەوە، لە پێویستی یاسای نەوت و گاز بۆ چارەسەركردنی ناكۆكییە داراییەكانی نێوان بەغداد و هەولێر و لەهەمان كاتدا دەستپێكردنەوەی هەناردەی نەوتی كوردستان.
لە كۆتایی چاوپێكەوتنەكەشدا، سەرۆك كۆماری عیراق دڵنیایی دایە وڵاتانی دراوسێ و ناوچەكە، كە رێگەنادەن هیچ گروپێكی چەكداری خاكی عیراق بەكاربهێنێت بۆ هێرشكردنە سەر وڵاتانی دراوسێ.
سوپا و هێزە ئەمنییەكانی عیراق خرانە حاڵەتی ئەوپەڕی ئامادەباشییەوە بۆ پاراستنی كارەكانی كۆنگرەی لوتكەی وڵاتانی عەرەبی كە 17ی ئەم مانگە دەستپێدەكات.
فەرماندەیی ئۆپراسیۆنە هاوبەشەكانی عیراق رایگەیاند، لە ئەمڕۆوە سەرجەم یەكەكانی وەزارەتەكانی بەرگری و ناوخۆ و سەرجەم هێزە ئەمنییەكانی تر دەخرێنە حاڵەتی ئەوپەڕی ئامادەباشی، ئەوەش لە چوارچێوەی رێكارە ئەمنییەكانی كۆنگرەی لوتكەی وڵاتانی عەرەبی.
باسم عەوادی وتەبێژی حكومەتی عیراق رایگەیاند، لوتكەی وڵاتانی عەرەبی لە بەغداد یەكێك دەبێت لە گرنگترین كۆبونەوەی وڵاتانی عەرەبی و تێیدا هەموو ئەو كێشە و قەیرانانەی رووبەڕووی ناوچەكە بووەتەوە، تاوتوێدەكرێن.
بڕیارە 17ی ئەم مانگە بەغداد میوانداری كۆنگرەی لوتكەی وڵاتانی عەرەبی بكات بە بەشداری سەرۆكی وڵاتانی عەرەبی لەناویاندا ئەحمەد شەرع سەرۆكی سوریا كە بانگهێشتكردنی بۆ كۆنگرەكە لەلایەن عیراقەوە مشتومڕ و كاردانەوەی زۆری لێكەوتەوە.
وەزارەتی ناوخۆی عیراق رۆژی شەممە رایگەیاند کە لە ماوەی بەڕێوەچوونی لووتکەی کۆمکاری عەرەبی لە بەغدا، هەر جۆرە خۆپیشاندانێک بە هەر ناو و ناونیشانێک قەدەغە دەکرێت.
بەپێی راگەیەنراوێکی فەرمی کە وەزارەتی ناوخۆی عیراق لە 10ـی ئایاری 2025 بڵاوی کردەوە، هەموو جۆرە کۆبوونەوە و خۆپیشاندانێک لە مێژووی 11 تاوەکو 20ـی ئایار قەدەغە دەکرێت، ئەمەش هاوکاتە لەگەڵ بەڕێوەچوونی لووتکەی کۆمکاری عەرەبی لە پایتەختی عیراق.
لە راگەیەنراوەکەدا هاتووە: "هیچ جۆرە مۆڵەتێک بە خۆپیشاندان نادرێت و هەر هەوڵێکی لەم شێوەیەش پێچەوانەی یاسایە". هەروەها ئاماژە بەوەش کراوە کە "هەر کەسێک لە رۆژانی 11 تاوەکو 20ـی ئەم مانگە هەوڵی خۆپیشاندان بدات، دەستگیر دەکرێت و هێزە ئەمنییەکان بە پێی یاسا رێکاری بەرانبەر دەگرنەبەر".
لە لایەکی دیکەوە، فەرماندەیی ئۆپەراسیۆنە هاوبەشەکانی عیراق لە رۆژی هەینی 9ـی ئایاری 2025، فەرمانێکی دەرکرد کە بەپێی ئەو فەرمانە، لە سەرەتای هەفتەی داهاتووەوە تەواوی هێزە ئەمنی و سەربازییەکان دەخرێنە ئەوپەڕی ئامادەباشیەوە.
شایەنی باسە، لوتکەی کۆمکاری عەرەبی یەکێکە لە گرنگترین کۆبوونەوە دیپلۆماسییەکان لە ناوچەکەدا و چاوەڕوان دەکرێت ژمارەیەکی زۆر لە سەرۆک و سەرکردەکانی وڵاتانی عەرەبی بەشداری تێدا بکەن.
دەستەی دەسپاكی عیراق دەڵێت لە ساڵی رابردودا نیو ملیار دۆلار كە بە نایاسایی براونەتە دەرەوەی وڵات، گەڕێنراونەتەوە بۆ حكومەت.
محەمەد عەلی لامی سەرۆكی دەستەی دەسپاكی عیراق رایگەیاند، حكومەت هەوڵی جددی داوە بۆ نەهێشتنی گەندەڵی و ئەو بابەتەش لە پێشینەی كارەكانیدا بووە و هەوڵەكانیشی چڕكردوەتەوە بۆ گەڕاندنەوەی ئەو پارانەی بە نایاسایی براونەتە دەرەوەی وڵات.
وتیشی، لە ساڵی رابردودا حكومەت سەركەوتوبوە لە گەڕاندنەوەی نیو ملیار دۆلار و ئەو كەسانەشی هاوكاربون لە ئاشكراكردنی هەوڵی پاراستنیان دراوە.
ئەوەش لەكاتێكدایە، لە مانگی دوو ئەمساڵدا دەستەی دەسپاكی راپۆرتێكی بڵاوكردەوە و تیایدا باسی لەوە كردبوو، كاری جددی كراوە لەسەر 269 دۆسیەی تایبەت بە بردنەدەرەوەی سامانی گشتی كراوە و دەستگرتن بەسەر 13 موڵكی تۆمەتباران كە بە نایاسایی سامانی گشتییان بردووەتە دەرەوەی عیراق.
ئەندامێكی لیژنەی یاسایی ئەنجومەنی نوێنەرانی عیراق دەڵێت، حكومەت پابەندە بە ناردنی خشتەكانی بودجە لە زووترین كاتدا و دەیەوێت لەگەڵ گەیشتنی بۆ ئەنجومەنەكە بە زوویی تێبپەڕێنرێت.
عارف حەمامی ئەندامی لیژنەی یاسایی لە ئەنجومەنی نوێنەرانی عیراق رایگەیاند، حكومەت پابەندە بە ناردنی خشتەكانی بودجەی ئەمساڵ، بەڵام بەهۆی رەوشی ئابوری و سیاسییەوە تائێستا نەیناردووە.
وتیشی، حكومەت دەیەوێت لە زووترین كاتدا خشتەكانی بودجە بنێرێت و لە ئەنجومەنی نوێنەرانیش بەزوویی تێبپەڕێنرێت، دواكەوتنی ئەو بابەتەش كاریگەری هەیە لەسەر پرۆژە خزمەتگوزارییەكان و دەبێتەهۆی دروستبوونی قەیرانی ئابوری.
رەوانەنەكردنی خشتەكانی بوجەی ئەمساڵ بۆ ئەنجومەنی نوێنەرانی عیراق لە كاتێكدایە كە لە دوێنێوە وەرزی یەكەمی یاسادانانی ئەمساڵ كۆتایی هاتووە.
سوپا و هێزە ئەمنییەكانی عیراق خرانە حاڵەتی ئەوپەڕی ئامادەباشییەوە بۆ پاراستنی كارەكانی كۆنگرەی لوتكەی وڵاتانی عەرەبی كە 17ی ئەم مانگە دەستپێدەكات.
فەرماندەیی ئۆپراسیۆنە هاوبەشەكانی عیراق رایگەیاند، لەمڕۆوە سەرجەم یەكەكانی وەزارەتەكانی بەرگری و ناوخۆ و سەرجەم هێزە ئەمنییەكانی تر دەخرێنە حاڵەتی ئەوپەڕی ئامادەباشی، ئەوەش لە چوارچێوەی ڕێكارە ئەمنییەكانی كۆنگرەی لوتكەی وڵاتانی عەرەبی.
باسم عەوادی وتەبێژی حكومەتی عیراق رایگەیاند ، لوتكەی وڵاتانی عەرەبی لەبەغداد یەكێك دەبێت لە گرنگترین كۆبونەوەی وڵاتانی عەرەبی و تێیدا هەموو ئەو كێشە و قەیرانانەی ڕووبەڕووی ناوچەكە بووەتەوە، تاوتوێدەكرێن.
بڕیارە 17ی ئەم مانگە بەغداد میوانداری كۆنگرەی لوتكەی وڵاتانی عەرەبی بكات بەبەشداری سەرۆكی وڵاتانی عەرەبی لەناویاندا ئەحمەد شەرع سەرۆكی سوریا كە بانگهێشتكردنی بۆ كۆنگرەكە لەلایەن عیراقەوە مشتومڕ و كاردانەوەی زۆری لێكەوتەوە.
وەزیری نەوتی عیراق رایگەیاند، بە چەند قۆناغێك بەرهەمهێنانی نەوت زیاد دەكەن بۆ ئەو ئاستەی پێش ئەوەی ئۆپێك پڵەس سنورێك بۆ بەرهەمهێنانی نەوت دابنێت.
حەیان عەبدولغەنی وەزیری نەوتی عیراق رایگەیاند، رێككەوتنێك لە نێوان وڵاتانی ئۆپێك پڵەس كرابوو بۆ دیاریكردنی ئاستی بەرهەمهێنانی نەوت، ئەو رێككەوتنە كاتی بووە و عیراقیش پابەندی رێككەوتنەكە بووە.
وتیشی، لە دوایین كۆبوونەوەی ئۆپیك پڵەسدا باس لە زیادكردنی ئاستی بەرهەمهێنانی نەوت كرابوو بە تایبەت عیراق كە رۆژانە 220 هەزار بەرمیل نەوتی كەمكردووەتەوە.
دەشڵێت، لەمەودوا عیراق بە چەند قۆناغێك ئاستی بەرهەمهێنانی نەوت زیاد دەكات و ریگەی پێدراوە لە پابەندبوونی بە بڕیارەكەی ئۆپێك پڵەس دێتە دەرەوە.
د.لەتیف رەشید سەرۆک کۆماری عیراق بەبۆنەی هەڵبژاردنی رۆبەرت فرانسیسی ئەمریكی بە پاپای نوێی ڤاتیكان پەیامێکی بڵاوکردەوە و رایگەیاند، هیوای سەرکەوتنی بۆ دەخوازم لە جێبەجێکردنی ئەرکە مرۆڤدۆستانە گەورەکەی بۆ سەرکەوتن لە پێناو ئاشتی و چەسپاندنی بەهاکانی پێکەوەژیانی ئاشتیانە لە نێوان گەلانی هەموو جیهاندا.
دەقی پیرۆزباییەکە....
پیرۆزبایی گەرمی دڵسۆزانە ئاراستەی پاپا لیۆ چواردەهەم دەکەم drprevost بەبۆنەی هەڵبژاردنی وەک گەورەی قەشەکان و پاپای کڵێسای کاسۆلیکی و هیوای سەرکەوتنی بۆ دەخوازم لە جێبەجێکردنی ئەرکە مرۆڤدۆستانە گەورەکەی بۆ سەرکەوتن لە پێناو ئاشتی و چەسپاندنی بەهاکانی پێکەوەژیانی ئاشتیانە لە نێوان گەلانی هەموو جیهاندا.
هەروەها شانازی زۆر بەپەیوەندی نزیکی نێوان عێراق و ڤاتیکان دەکەین و پەرۆشی خۆمان بۆ پتەوکردنی هاریکاری و کاری هاوبەش دوپات دەکەینەوە که ببێته هۆی سەقامگیری و ئاسایش و پێکەوەژیان و نەهێشتنی شەڕ و ململانێکان له جیهاندا.
وەزارەتی كشتوكاڵی عیراق رایگەیاند، پێشبینی دەكەن بۆ ئەمساڵ بەرهەمهێنانی گەنم و جۆ بگاتە خودبژێوی.
مەهدی قەیسی راوێژكاری وەزارەتی كشتوكاڵی عیراق رایگەیاند، لە قۆناغی یەكەمی بەبازاڕكردنی گەنمی جوتیاران تائێستا 200 هەزار تۆن گەنم وەرگیراوە.
دەشڵێت، لەسەر بنەمای ئەو روپێویەی بۆ پێنج ملیۆن دۆنم زەوی ئەنجامدراوە و ئەو بڕە گەنمەی لە قۆناغی یەكەمدا وەرگیراوە، ئەمساڵ عیراق دەگاتە ئاستی خودبژێوی و ئاسایشی خۆراك.
وتیشی، لەمساڵدا وەزارەتی كشتوكاڵی عیراق لە رێگەی دوو كۆمپانیاوە 160 هەزار تۆن بنەتۆوی گەنم و جۆ بەسەر جوتیاراندا دابەشدەكات، ئەوەش لە چوارچێوەی پلانی كشتوكاڵی عیراقدایە بۆ بەرهەمهێنانی ئەو دوو بەروبومە بۆ ساڵی داهاتوو.
سەرۆکی ئەنجومەنی وەزیرانی عیراق بە سەردانێکی فەرمی ئەمڕۆ لە ئەنقەرەی پایتەختی تورکیا دەبێت.
ئەمڕۆ پێنجشەممە، محەمەد شیاع سودانی سەرۆکی ئەنجومەنی نوێنەرانی عیراق بە سەردانێکی رەسمی بەرەو ئەنقەرەی پایتەختی تورکیا بەڕێکەوت.
سودانی سەردانەکەی بە مەبەستی بەشداریکردنە لە کۆبوونەوەکانی ئەنجومەنی باڵای عێراق و تورکیا بۆ هاوکاریی ستراتیژی.
د. لەتیف رەشید سەرۆک کۆماری عیراق پێشوازیکرد لە جەیهون بایرامۆڤ وەزیری دەرەوەی کۆماری ئازەربایجان و وەفدی یاوەری کە فوئاد حسێن، وەزیری دەرەوە ئامادەی بوو.
لە سەرەتای دیدارەکەدا کە ئەمڕۆ لە کۆشکی بەغداد بەڕێوەچوو ، وەزیری دەرەوەی ئازەربایجان سڵاوی ئیلهام عەلیێف سەرۆک کۆماری ئازەربایجان گەیاندە سەرۆک کۆمار و سەرۆک کۆماریش سڵاوی خۆی بۆ سەرۆک کۆماری ئازەربایجان نارد و هیوای بەردەوامی پێشکەوتن و خۆشگوزەرانی بۆ گەلی ئازەربایجان خواست.
سەرۆک کۆمار جەختیکردەوە لە گرنگی پەیوەندیی نێوان هەر دوو وڵاتی دۆست، لەسەر بنەمای لێکتێگەیشتن و ڕێزگرتن و پێویستی پەرەپێدانی هاریکاریی نێوان هەر دوو وڵاتی دۆست لە ڕێگەی پڕۆژە و هەماهەنگییەوە کە خزمەت بە بەرژەوەندی هاوبەش بکات.
لای خۆیەوە جیھون بایرامۆڤ پابەندبوونی وڵاتەکەی دووپاتکردەوە بۆ پەرەپێدانی هاریکاری فراوان لەگەڵ عیراق لە بوارە جیاجیاکاندا، کە یارمەتیدەر دەبێت بۆ پتەوکردنی پەیوەندیی نێوان هەردوو وڵاتی دۆست ، هاوکات ستایشی پێشهاتی ئەرێنیی عیراق و رۆڵی بنیاتنەری لە چەسپاندنی ئاسایش و سەقامگیری لە ناوچەکە و جیهاندا کرد.
د. لەتیف رەشید سەرۆک کۆماری عیراق، ئەمڕۆ چوارشەممە 7ـی 5ـی 2025 لە کۆشکی بەغداد پێشوازی لە عەلی عەلاق، پارێزگاری بانکی ناوەندی عیراق کرد.
لە دیدارێکدا تاوتوێی رەوشی کەرتی بانکی عیراق و رێوشوێنەکانی پەرەپێدانی کرا و پاکێجی چاکسازیی بانکی ناوەندی بۆ روبەڕوبوونەوەی گۆڕانکارییە ئابورییەکان و کاریگەرییەکانیان لەسەر جوڵەی بازاڕی ناوخۆ باس و خواسی لەسەرکرا و سەرۆک کۆمار تەئکیدی لەسەر پێویستی هەوڵدان و داڕشتنی ستراتیژێکی پتەو بۆ سیاسەتی دارایی کردەوە بەشێوەیەک کە گەشەی ئابووری خوازراو بەهێز بکات.
لە کۆبوونەوەکەدا پلانەکانی هاندانی کەرتی وەبەرهێنان لە رێگەی پاڵپشتیکردنی کەرتی تایبەت تاوتوێ کرا، بەتایبەتی کە وڵات سەقامگیرییەکی بەرچاوی لە ئاستی ئەمنی و سیاسی و کۆمەڵایەتیدا بەخۆوە بینیوە.
لە بەرانبەردا عەلی عەلاق سوپاسی سەرۆک کۆمار و رێنماییە بەنرخەکانی کرد و هەوڵەکانی بانکی ناوەندی و پلانەکانی داهاتووی بۆ رونکردەوە بە مەبەستی بەهێزکردنی سیاسەتی دارایی و سەقامگیری ئابووری لە وڵاتدا.
د.لەتیف رەشید، سەرۆک کۆماری عیراق لەگەڵ د.نەعیم عوبدی وەزیری خوێندنی باڵا و توێژینەوەی زانستی کۆبووەوە و تاوتوێ رەوشی خوێندن لە زانکۆ و پەیمانگاکان و پێشکەوتنی پرۆسەی خوێندن لە وڵاتدا کرا.
لەدیدارەکەدا سەرۆک کۆمار جەختی لە گرنگی پەرەپێدانی فێرکردن و بەشداریکردن لە بەهێزکردنی پێگەی زانکۆکانی عیراقدا کردەوە.
هەروەها سەرۆک کۆمار دوپاتی لەپێویستی گرنگیدان بە خوێندکارانی دەرچوو و بەشدارپێکردنیان لەخولەکانی گەشەپێدان پێش دامەزراندنیان بۆ بەرزکردنەوەی ئەزموون و لێهاتوویی و توانا تەکنیکییەکانیان، ئەمەش وایان لێدەکات بتوانن خۆیان لەگەڵ ژینگەی کارکردندا بگونجێنن و پێشکەوتن و گەشەپێدانیش لەوڵاتدا دەستەبەربکرێت، هاوکات بەڕێزیان ئاماژەی بە پێویستی فراوانکردنی سیستمی سکۆلەرشیپ کرد بۆ هاندانی خوێندکاران بۆ بەردەوامبوون لە هەوڵەکانیان لە بواری فێرکردن و زانستدا.
لەلای خۆیەوە وەزیری خوێندنی باڵا، سوپاس و پێزانینی خۆی بۆ ڕێنماییەکانی سەرۆک کۆمار دەربڕی وڕونکردنەوەیەکی سەبارەت بە کارەکانی وەزارەت و پلانەکانی داهاتوو بۆ پەرەپێدانی کەرتی خوێندنی باڵای لەوڵاتدا خستەڕوو.