رۆژنامەنووس سەباح شێخلی، سەرنووسەری رۆژنامەی (البینة الجدیدة)، دوای کۆبوونەوەیەکی تایبەت لەگەڵ د. لەتیف رەشید، سەرۆک کۆماری عیراق، لە کۆشکی بەغداد، ستایشی گرنگیدان و پێزانینی سەرۆک کۆماری کرد بۆ کاری رۆژنامەگەری و رۆژنامەنووسان. شێخلی کۆبوونەوەکەی بە "جێگەی شانازی و رێز" بۆ خۆی و رۆژنامەکەی وەسف کرد.

گرنگیدانی سەرۆک کۆمار بە رۆژنامەگەری:

سەباح شێخلی ئاماژەی بەوەدا کە ئەوەی زیاتر کاریگەر بووە لە کۆبوونەوەکەدا، "گرنگیدانێکی زۆر و نایابی سەرۆک کۆمار بووە بە رۆژنامەگەری عیراقی و پیاوانی ئەو بوارە." بە وتەی شێخلی، سەرۆک کۆمار بە قسەی پڕ بەها و کاریگەر پێزانینی خۆی دەربڕیوە بۆ رۆڵ و گرنگی رۆژنامەنووسان.

د. لەتیف رەشید لە کۆبوونەوەکەدا جەختی لەسەر چەند خاڵێکی سەرەکی کردەوە:

• ئازادی رۆژنامەگەری و مافی رۆژنامەنووسان: پێویستە دڵنیا بکرێنەوە لە ئازادی رۆژنامەگەری و پاراستنی مافەکانیان.

• رۆڵی رۆژنامەگەری: رۆژنامەگەری رۆڵێکی گرنگی هەیە لە تۆمارکردنی مێژوو، گواستنەوەی روداوەکان، و خستنەڕووی بابەتە گرنگەکانی ژیانی هاووڵاتییان.

• دابینکردنی پێداویستییەکان: پێویستە هەموو بەرپرسێک، لە لووتکەی دەوڵەتەوە تا بنکەکەی، کار بکات بۆ دابینکردنی پێداویستییەکانی ژیانێکی شایستە بۆ ڕۆژنامەنووسان.

• ئازادی رادەربڕین و یەکێتی نیشتمانی: پێویستە فراوانتری روبەری ئازادی دەربڕین دابین بکرێت بۆ ئەوەی کەشێکی ئەرێنی بۆ کاری رۆژنامەگەری دروست ببێت و کارمەندانی بوارەکە بتوانن رۆڵی خۆیان لە پەرەپێدانی یەکێتی نیشتمانی و هاوپشتی لە نێوان پێکهاتەکانی گەلدا بگێڕن.

سەرۆک کۆمار وتیشی: "پێزانینمان هەیە بۆ هەموو هەوڵەکان کە ئامانجیان ئاشکراکردنی راستی و هۆشیارکردنەوەی کۆمەڵگا و چەسپاندنی دیموکراسی و گیانی لێبوردەیی و پێکەوەژیانی هاوبەشە."

پابەندبوون بە میساقی شەرەف و چاودێریکردنی حکومەت:

د. لەتیف رەشید تیشکی خستە سەر خاڵێکی گرنگ، لە پێویستی پابەندبوون بە "میساقی شەرەفی راگەیاندن"، وەک چوارچێوەیەک کە هاوسەنگی لە نێوان ئازادی بڵاوکردنەوە و بەرپرسیارێتی پیشەیی رادەگرێت و ئاشتی کۆمەڵایەتی دەپارێزێت. هەروەها جەختی لەسەر گرنگی چاودێریکردنی ئاستی حکومەت و دیاریکردنی کەموکورتییەکان بە شێوەیەکی بابەتی و پیشەیی کردەوە، بە شێوەیەک کە یارمەتیدەر بێت لە راستکردنەوەی سیاسەتە گشتییەکانی وڵات و گواستنەوەی ڕاستییەکان بە ئەمانەت و ڕاستگۆیی.

وتیشی: "رۆژنامەگەری رۆڵێکی گەورەی هەیە لە دروستکردنی رای گشتی هۆشیار بەوەی کە لە دەوروبەری هاووڵاتیان رودەدات، لە رێگەی گواستنەوەی زانیاری بە راستگۆیی."

خزمەتکردنی وڵات: شەرەف و ئەمانەت:

سەرۆک کۆمار ئاماژەی بەوەدا کە سەردانی زۆربەی زانکۆ و پەیمانگە عیراقییەکان و فەرمانگە حکومییە جیاوازەکانی کردووە و بەشداری لە چالاکییە جۆراوجۆرەکاندا کردووە. هەروەها چاوی بە توێژە جیاوازەکانی کۆمەڵگا کەوتووە و پێشوازی لە باڵیۆزی وڵاتانی عەرەبی و بیانی کردووە، جگە لە کۆبوونەوەی لەگەڵ وەزیران و بەرپرسانی حکومەت بۆ گفتوگۆکردن لەسەر بابەتە گرنگەکان.

د. لەتیف رەشید خزمەتکردنی بەرپرسی باڵا بە وڵات و گەلەکەی بە "شەرەف و ئەمانەتێک" وەسف کرد کە دڵسۆزانە و راستگۆیانە هەوڵی جێبەجێکردنی دەدات. بەڵام ئاماژەی بەوەدا کە حەز ناکات لە شەقامەکانی بەغداد بە ڕێڕەوێکی درێژ لە ئۆتۆمبێل و پاسەوانان بڕوات و ناڕەحەت دەبێت لە بیستنی دەنگی زەنگەکان کە دەبێتە هۆی تێکدانی جوڵەی هاتوچۆ و قەرەباڵغی کە زیان بە هاووڵاتیان دەگەیەنێت. لەبەر ئەمە، مەیلی بۆ ئەنجامدانی کارەکانی بە هێمنی و ئەمانەت هەیە. سەباح شێخلی نزیکەی کاتژمێرێک گوێی لە قسەکانی سەرۆک کۆمار گرتووە.

وتارەکەی سەباح شێخلی و کاریگەرییەکەی:

سەباح شێخلی ڕایگەیاند، داوای مۆڵەتی لە سەرۆک کۆمار کردووە بۆ قسەکردن و سوپاسی کردووە بۆ تەرخانکردنی کات بۆ پێشوازیکردنی وەک هاوڵاتی و ڕۆژنامەنووسێک. بەتایبەتی سوپاسی کردووە بۆ گرنگیدانی بە وتارێک کە لە ژمارەی (4675)ی رۆژنامەی البینة الجدیدة لە رێکەوتی (دووی تشرینی یەکەمی 2025) بڵاوی کردبووەوە، بە ناونیشانی: "سەرنجی هاوڵاتییەکی عیراقی ئاڕاستەکراو بۆ بەڕێز سەرۆک کۆمار... هەموو خۆشەویستی و رێزێکمان بۆتان هەیە بەڵام دەمانەوێت لە شەقامدا بتبینین."

شێخلی ئاماژەی بەوەدا کە نووسینگەی راگەیاندنی سەرۆکایەتی کۆمار پەیوەندی پێوە کردووە و داوایان لێکردووە ئامادە بێت بۆ کۆبوونەوەکە، ئەمەش بەڵگەی گرنگیدانە بەوەی رۆژنامە رۆژانەکان بڵاوی دەکەنەوە. هەروەها، ئاماژەی بە جیاوازییەک کرد کە لە ماوەی پێنج ساڵی رابردوودا بە دەیان وتاری لەسەر روخانی پردێکی پیادەڕەو لەسەر رێگای محەمەد قاسم نووسیوە، کە لە ساڵی 2020ەوە بەهۆی پێکدادانی بارهەڵگرێکەوە روخاوە و لایەنی پەیوەندیدار هیچ چارەسەرێکی نەکردووە. ئەمەش بۆ ئەوە بوو کە جیاوازیی نێوان بەرپرسێک کە بەدواداچوون دەکات و یەکێکی تر کە بێباکە، دەربخات.

لە کۆتاییدا، سەباح شێخلی رێز و پێزانینی خۆی بۆ سەرۆک کۆمار تۆمار کرد لەسەر باشی پێشوازییەکەی، و بە دڵسۆزییەوە هیوای سەرکەوتن و لێهاتوویی بۆ خواست لە ئەرکەکەیدا بۆ خزمەتکردنی گەل و نیشتمانی عیراق. هەروەها سوپاسگوزاری خۆی ئاراستەی نووسینگەی راگەیاندنی سەرۆکایەتی کۆمار کرد لەسەر هەوڵدان و بەدواداچوونی وردیان بۆ ئەوەی لە رۆژنامە رۆژانەکاندا بڵاودەبێتەوە.

د. لەتیف رەشید سەرۆک کۆماری عیراق، ئەمڕۆ چوارشەممە 8-10-2025 سەردانی مۆزەخانەی عیراقی لە بەغداد کرد.

سەرۆک کۆمار گەشتێکی بەناو هۆڵەکانی مۆزەخانەکە و بەشە جیاوازەکان کرد و گوێی لە روونکردنەوەیەکی وردی هەوڵە نیشتمانییەکان بوو بۆ وپاراستنی شوێنەوار و  ئەو شوێنەوارانەی دۆزراونەتەوە.

لە میانەی سەردانەکەیدا سەرۆک کۆمار جەختیکردەوە کە پاراستنی ئەم کەلەپورە بەرپرسیارێتییەکی نیشتمانی و ئەخلاقییە کە پێویستی بە هاریکاری و هەماهەنگی نێوان دامەزراوە حکومی و کۆمەڵایەتییەکان هەیە، هەروەها بریتیە لە گەیاندنی هۆشیاری لەبارەی گرنگی مێژوو وەک رێنمایی و خاڵی دەستپێک بۆ گەلان بەرەو خۆشگوزەرانی و پێشکەوتن.

سەرۆک کۆمار ستایشی هەوڵەکانی ئیدارە و ستاف و کارمەندانی مۆزەخانەکەی کرد لە پاراستنی ئەم کەلەپورە مرۆییەدا، جەختیکردەوە لە گرنگی پشتگیریکردن و بەهێزکردنی مۆزەخانە بە نوێترین شێوازەکانی نۆژەنکردنەوە و بەڵگەنامەکردن و نمایشکردن.

سەرۆک کۆماری عیراق لە کۆشکی سەلام لە بەغداد، بەشداریکرد لە کۆڕبەندێکی گفتوگۆیی بەرفراواندا بە ناوی (چاودێری هەڵبژاردنەکان.. دڵنیابوون لە پاک و بێگەردییان) و رایگەیاند؛ هەڵبژاردنەکانی عیراق جێگەی بایەخی کۆمەڵگەی نێودەوڵەتی و ئیقلیمییە و پێویستە پارێزگاری لە  هەڵبژاردنێکی  پاک و دور لەدەستێوەردان بکرێت .

ئەمڕۆ چوارشەممە، د. لەتیف رەشید، سەرۆک کۆماری عیراق بەشداری کرد لە  کۆڕبەندێکی گفتوگۆیی بەرفراوان بە ناوی (چاودێری هەڵبژاردنەکان.. دڵنیابوون لە پاک و بێگەردییان) کە لەلایەن دەستەی راوێژکاران و شارەزایان لە سەرۆکایەتی کۆمار رێکخرابوو بۆ پاڵپشتیکردنی ئەنجامدانی هەڵبژاردن.

لە کۆڕبەندەکەدا نوێنەرانی تۆڕەکانی چاودێری نیشتمانی هەڵبژاردنەکان و رێکخراوەکانی کۆمەڵگەی مەدەنی و کۆمیسیۆنی باڵای سەربەخۆی هەڵبژاردنەکان و نێردەی نەتەوە یەکگرتووەکان لە عیراق ،(UNAMI) مامۆستایانی زانکۆکان و ژمارەیەک لە پسپۆڕان و یاساناسان  تێیدا ئامادەبوون.

 لە کۆڕبەندەکەدا گفتوگۆ لەسەر رۆڵی چاودێری نیشتمانی لەسەر هەڵبژاردنەکان و کاریگەرییەکەی لە بەهێزکردنی متمانەی هاووڵاتییان بە پرۆسەی هەڵبژاردن بۆ دڵنیابوون لە ئەنجامێکی پاک و بێگەرد و شەفاف کرا.

سەرۆک کۆمار ئاماژەی بە گرنگی چاودێری نیشتمانی کرد، وەک ئامرازێکی پێویست بۆ دڵنیابوون لە پاک و بێگەردی هەڵبژاردنەکان؛ کە بەشداری دەکات لە هاندان بۆ بەشداریکردنی هێزە سیاسییەکان و کاندیدان و دەنگدەران.

روونیشی کردەوە کە سەرۆکایەتی کۆمار کۆمەڵێک راسپاردەی پێشکەش کردووە کە لەلایەن چوار سەرۆکایەتییەکەوە ئیمزا کراوە و لە پێشنیازەکاندا جەختی کردوەتەوە لە دڵنیابوون لە پاک و بێگەردی پرۆسەی هەڵبژاردن و پاراستنی دەنگی دەنگدەران، کە لەلایەن کۆمیسیۆنی باڵای سەربەخۆی هەڵبژاردنەکانەوە پەسەند کران و خراونەتە ناو سیستەمەکەیانەوە

سەرۆک کۆمار جەختی لە ئەنجامدانی هەڵبژاردنەکان کردەوە لە کاتی خۆیدا و ئاماژەی بەوەکرد؛  دڵنیابوون لە پاک و بێگەردی دوو ئامانجی سەرەکین کەخوازیارە بە شێوەیەکی کردەیی جێبەجێبکرێت و هەڵبژاردنەکانی عیراق جێگەی بایەخی کۆمەڵگەی نێودەوڵەتی و ئیقلیمین و پێویستە پارێزگاری لە سەلامەتی و پاک و بێگەردییان بکرێت.

هەروەها ستایشی هەوڵەکانی تۆڕەکانی چاودێری هەڵبژاردنەکان، کۆمیسیۆنی هەڵبژاردنەکان و کارمەندانی کرد بۆ ئامادەکارییەکانیان بۆ ئەنجامدانیان لە کاتی دیاریکراودا،رۆڵی نێردەی نەتەوە یەکگرتووەکانیشی لە عیراق (UNAMI) بەرزنرخاند بۆ ئەو هەوڵە گەورانەی کە پێشکەشی دەکەن بەمەبەستی بەڕێوەچونی پڕۆسەکە بە شێوەیەکی پاک و بێگەر و  دور لە دەستێوەردان. 

د.لەتیف رەشید سەرۆک کۆماری عیراق، ئەمڕۆ لە کۆشکی بەغداد، بەئامادەبوونی فوئاد حسێن، جێگری سەرۆک وەزیران و وەزیری دەرەوە، کارنامەی ژمارەیەک باڵیۆزی نوێی وەرگرت.

سەرۆک کۆمار کارنامەی لە باڵیۆزانی، کۆماری هەنگاریا، ئوسامە ئیبراهیم نەفاع، کۆماری ڤێتنام، نگوین لۆنگ نۆک، کۆماری دیموکراتیی نیپاڵ، گانا شیام لەمسال، کۆماری کازاخستان، تەڵعەت رەحیمقولولی، کۆماری ئۆزبەکستان، ئەیوب خان، کۆماری بورکینافاسۆ، محەمەدی کابۆری ، هەریەک بەجیا وەرگرت.

سەرۆک کۆمار بەخێرهاتنی باڵیۆزە نوێیەکانی کرد و هیوای سەرکەوتنی بۆ خواستن لە جێبەجێکردنی ئەرکە دیپلۆماسییەکانیان، لەپتەوکردنی پەیوەندی دۆستانە و هاوکاری هاوبەش، جەختیشی لە پابەندبوونی عیراق کردەوە بۆ بنیاتنانی پەیوەندیەکی هاوسەنگ لەسەر بنەمای رێزگرتنی یەکتر و بەرژەوەندی هاوبەش.

لەلای خۆیانەوە باڵیۆزەکان سڵاوی سەرکردەی وڵاتەکانیان و خواستەکانیان بۆ بەردەوامی پێشکەوتن و خۆشگوزەرانی عیراق گەیاند  و پابەندبوونیان بە پتەوکردنی هاوکاری و پەرەپێدانی پەیوەندییە دووقۆڵییەکانی نێوان عیراق و وڵاتەکانیان دووپاتکردەوە.

رۆژی دووشەممە رابردوو 6ـی10ـی 2025 لە شاری بەغداد پەردە لەسەر وێنەی سەرۆ مام جەلال لادرا، کە وێنەکە لە دەروازەی ناوچەی سەرۆکایەتیی کۆماری عیراق دانراوە.

دامەزراوەی سەرۆک جەلال تاڵەبانی بڵاویکردەوە، وێنەکە لەلایەن عەقید هەردی غریب، فەرماندەی فەوج3ـی سەرۆکایەتیی کۆماری عێراق دروستکراوە و فریق گۆهدار محەمەد سەعید لێپرسراوی نوسینگەی سەرۆک کۆماری عیراقەوە لادرا.

ئاماژەی بەوەشکردووە، وێنەکەی سەرۆک مام جەلال لە دەروازەی ناوچەی سەرۆکایەتیی کۆماری عیراق لە شاری بەغداد دانراوە.

ژمارەیەک لە کەسایەتی کۆمەڵایەتی و گەنجانی پارێزگای نەینەوا پەیوەندیان بە ریزەکانی یەکێتیی نیشتمانی کوردستانەوە کرد و بەڵێن دەدەن کاربکەن  بۆ سەرخستنی لیستی ژمارە '٢٨١'ـی یەکێتی لە پارێزگاکە.

ئەمڕۆ ئاراس محەمەد ئاغا ئەندامی ئەنجومەنی سەرکردایەتی یەکێتیی نیشتمانیی کوردستان ، پێشوازی کرد لە ژمارەیەکی زۆری کەسایەتی کۆمەڵایەتی و رۆشنبیر و گەنجانی پارێزگای نەینەوا بەسەرۆکایەتی 'شێخ خالد غانم ئەحمەد جبوری' کەسایەتی و راگەیاندنکاری دیاری موسڵ، کە پەیوەندیان بەریزەکانی یەکێتی نیشتیمانی کوردستان کرد.

لەدیدارێکدا ئاراس محەمەد ئاغا،  بەخێرھاتنی گەرمی کردن و رایگەیاند، یەکێتی ھەمیشە ماڵی گەورەیە و دەرگای کراوەیە بۆ ھەموو چین وتوێژێکی کۆمەڵگە لە عیراق بە گشتی و نەینەوا بەتایبەتی،ئاماژەی بەوەشکرد، حزبەکەی سەرۆک مام جەلال خۆی بەخزمەتکاری ھەموو ھاونیشتمانیانی نەینەوا دەزانێت ، وەك یەکیتی ھەرچیان پێویست بێت درێغی ناکەن بۆیان .

هەر لە دیدارەکەدا، لەلایەن خۆیانەوە کەسایەتیەکان و خالد غانم سوپاسی ئاراس محەمەد ئاغایان کرد، بۆ ئەموپێشوازیە گەرمە و بەلێنیان دووپاتکردەوە کە لە رێزەکانی یەکێتی کاربکەن و پشتیگیری و پشتیوانی لیستی '٢٨١'ـی یەکێتی خەڵکی نەینەوا دەکەن وھەوڵی سەرخستنی کاندیدانی دەدەن .

سەرۆک کۆماری عیراق، لەوتارێکدا بۆ سی ئێن ئێن عەرەبی  رایگەیاندووە، ئامانجمان داخستنی کەمپی هۆڵ و کەمپە هاوشێوەکانی و رێگریکردنە لە گەڕانەوەی تیرۆر

د.لەتیف رەشید سەرۆک کۆماری عیراق، بابەتێکی لە سی ئێن ئێن عەرەبی بڵاوکردەوە، تیشک دەخاتە سەر ئەو هەوڵانەی کە دراون بۆ بەستنی کۆنفرانسی نێودەوڵەتی لەبارەی کەمپی هۆڵ، لە پەراوێزی 80هەمین دانیشتنی ئەنجومەنی گشتی نەتەوە یەکگرتووەکان لەنیویۆرک بەڕێوەچوو، هەروەها پلانەکانی عێراق بۆ گەڕانەوەی دانیشتوانی کەمپەکە.

ئەمەی خوارەوە دەقی ووتارەکەیە:

بەغدا سەرپەرشتی هەوڵەکان دەکات بۆ داخستنی کەمپی هۆڵ و هۆشداری دەدات لە پشتگوێ خستنی کۆمەڵگەی نێودەوڵەتی

لەنوسینی د.لەتیف جمال ڕەشید

کۆتایی هەفتەی ڕابردوو عێراق لە پەراوێزی 80هەمین دانیشتنی کۆبوونەوەی گشتی نەتەوە یەکگرتووەکان لە نیویۆرک کۆنفرانسێکی باڵای سەبارەت بە کەمپی ئەلهۆڵ سازکرد، ئەم کۆنفرانسە تەنها ڕێوشوێنێکی پرۆتۆکۆڵی نەبوو، بەڵکو بانگەوازێکی بەپەلە بوو بۆ بەرپرسیارێتی هاوبەش لە ڕووبەڕووبوونەوەی یەکێک لە جددیترین قەیرانە مرۆیی و ئەمنییەکان کە جیهان لە مێژە پشتگوێی خستووە.

کەمپی ئەلهۆڵ لە باکوری ڕۆژهەڵاتی سوریا هێشتا ژینگەیەکی ناجێگیرە و زۆر مەترسیدارە و نزیکەی ١٠ هەزار توندڕەو و خێزانەکانیان لە زیاتر لە ٦٠ وڵاتەوە نیشتەجێن، زەمینەیەکی لە بارە بۆ توندڕەویی، کارەساتێکی مرۆیی بەردەوامە و وێنایەکی زیندووە بۆ شکستی کۆمەڵگەی نێودەوڵەتی لە چارەسەرکردنی وێرانکارییەکانی جەنگ و تیرۆر و ئاوارەبوون.

عێراق زۆر باش ئەم ڕاستیانە دەزانێت، هێشتا شوێنەوارەکانی داگیرکارییە دڕندانەکانی داعش لە یادەوەرییەکەیدا ماوون، لە نێوان ساڵانی 2014 بۆ 2017 بە مەزەندەکردنی 95 بۆ 115 هەزار کەس لە عێراق کوژراون کە  کەسانی سیڤیل و سەربازی بوون، سەرەڕای ڕاگەیاندنی سەرکەوتن لەلایەن حەیدەر عەبادی سەرۆک وەزیرانی عێراق لەساڵی ٢٠١٧، بەڵام ئەو کۆمەڵگانەی کە ململانێکان ماندویان کردبوون ،بووبونە نێچیرێکی ئاسان بۆ توندڕەوەکان تەنانەت لە کاتێکدا حکومەت بەردەوامە لە هەوڵە ماندوو نەناسەکانی بۆ پڕکردنەوەی بۆشایی خزمەتگوزارییەکان و بنیاتنانی سەقامگیرییەکی بەردەوامی هیوا بەخش.

مێژوو فێری کردووین کاتێک قەیرانەکان،بەبێ چارەسەر بمێننەوە، دەبنە هەڕەشەیەکی هەمیشەیی، لە ئۆردوگای ئاوارەکانی دوای جەنگی جیهانی دووەمەوە لە ئەوروپا تا قەیرانی پەنابەران لە ڕواندا و زائیر، دەرئەنجامەکەش وەک یەک بووە: کاتێک ئاوارەکان پشتگوێدەخرێن لەلایەن کۆمە‌ڵگەی نێودەوڵەتیەوە  ئاوارەیی دەگۆڕێت بۆ بۆمبێکی کاتی.

لەبەرئەوە عێراق چاوەڕێی ئەوەی نەکرد کە ئەوانی تر هەنگاو بنێن، بەڵکو بەرپرسیارێتی تەواوی خۆی لەئەستۆ گرت، هەنگاوی سەخت و چارەنووسسازمان ناوە بۆ گەڕاندنەوەی هاووڵاتیانمان لە کەمپی ئەلهۆڵ، لە ڕێگەی پرۆسەیەکی هەماهەنگەوە کە ڕەهەندە ئەمنییەکان و مرۆیی و یاساییەکانی لەخۆگرتبوو. تا ئێستا عێراق 4,915 خێزان (18,830 تاک)ی گەڕاوەتەوە بۆ ناوەندی ئەمەل لە ناوخۆی وڵاتدا، لەنێویاندا 3,407 خێزان (12,557 تاک) کەپێشتر تێکەڵ بە کۆمەڵگە ناوخۆییەکانیان بوون. هەروەها عێراق سێ هەزار و 206 دەستگیرکراوی لەهێزەکانی سوریای دیموکراتی (هەسەدە) پێشوازی لێکرد، لەچوارچێوەی هەوڵێکی چڕ و پڕی نیشتمانی بۆ داخستنی ئەم لاپەڕە پڕ ئازارە و کردنەوەی لاپەڕەیەکی نوێ لەسەر بنەمای ئاسایش و سەقامگیری وەرگرتووە.

لە پشت ئەم ژمارانەوە چیرۆکی مرۆڤی زیندوو هەن، هەر تاکێک کە لە کەمپەکەوە گەڕێنرایەوە بۆ وڵاتەکەی نمونەی ژیانێکە کە جەنگ شێواندبووی و ئێستا دەستی بە ڕێگای چاکسازی و یەکگرتنەوە لەگەڵ کۆمەڵگە کردووە، ئێمە پلانێکی نیشتمانی گشتگیرمان داڕشتووە کە پاڵپشتی دەروونی، فێرکردن، ڕاهێنانی پیشەیی، و ئاشتەوایی کۆمەڵگە لەخۆدەگرێت، کە لەلایەن چوار گروپی تەکنیکییەوە جێبەجێ دەکرێت کەپێکهاتوون لەدامەزراوە عێراقییەکان وهاوبەشە نێودەوڵەتییەکان، ئەم مۆدێلە چوارچێوەیەکی پراکتیکی دەستەبەر دەکات کە بۆ وڵاتانی دیکە ڕووبەڕووی ئاستەنگی هاوشێوە دەبنەوە، بەکاربهێنرێت. عێراق بە هەوڵە نیشتمانییەکانی ناوەستێتەوە هەروەها پشتگیری لە لۆجستیکی ئۆپەراسیۆنەکانی گەڕانەوە بۆ وڵاتەکانی دیکە دەکات و ئامادەیی خۆی دووپات دەکاتەوە بۆ یارمەتیدانی هەر وڵاتێک کە هەوڵی بەڕێوەبردنی ئەم پرسە ئاڵۆزە بدات.

بەڵام ڕاستییە دووفاقییەکە ئەوەیە کە قەیرانی ئەلهۆڵ تەنیا بەرپرسیارێتی عێراق و سووریا نییە، قەیرانێکی جیهانییە، پشتگوێخستنی یان خراپ مامەڵەکردن لەگەڵیدا دەبێتە هۆی ئەوەی کاردانەوەکانی زۆر لە سنوورەکانمان زیاتر درێژببنەوە، هەندێک وڵات دەستیان کردووە بە گەڕاندنەوەی هاووڵاتیانیان بۆ وڵاتەکانیان، بەڵام بەشێکی زۆریان بە دوودڵی ماونەتەوە و ئاستەنگی سیاسی یان یاسایییان بۆ دەهێننەوە، لەم نێوەندەدا منداڵان لە کەمپەکاندا و بێ یاسا گەورە دەبن، کە زۆربەیان توندڕەو بوون و بە "بەچکەکانی داعش" ناسراون، ژنان لە بارودۆخێکی ناخۆشدا بە دەستبەسەری ماونەتەوە لە کاتێکدا توندڕەوەکان بەردەوامن لە پلاندانان ودامەزراندنی کارمەندان، لەوەش ترسناکتر ئەوەیە کە ڕاپۆرتەکانی دامەزراوە باوەڕپێکراوەکان و ڕێکخراوە مرۆییەکان پێشێلکارییە ترسناکەکانیان ئاشکرا کردووە، لەنێویاندا دەستدرێژی سێکسی بۆ سەر منداڵان لەناو کەمپەکەدا، هەر ڕۆژێک کە بەبێ چارەسەر تێدەپەڕێت، دەرفەتێکی لەدەستچووە و مەترسییەکی گەشەسەندووە دێتە ئاراوە.

کۆنفرانسی ئەم دواییە کەعێراق سپۆنسەری کردبوو، بانگەوازێکی بەپەلە بوو بۆ کاری بەکۆمەڵ و ئاماژەیەک بوو بۆ پەرەسەندنی کۆدەنگی نێودەوڵەتی بۆ چارەسەرکردنی ئەم قەیرانە، هاوبەشەکانمان کە لە پێشەنگییانەوە نوسینگەی بەرەنگاربوونەوەی تیرۆری نەتەوە یەکگرتووەکان (UNOCT) و زۆربەی وڵاتانی ئەندام پێشوازییان لەدەستپێشخەرییەکەمان کرد و پشتگیری خۆیان بۆ چارەسەری بەپەلە و کاریگەر دووپاتکردەوە، بەڵام بە تەنیا نیەتی باش بەس نییە، دەبێت کۆدەنگی بگۆڕدرێت بۆ هەنگاوی پراکتیکی خێراتر و فراوانتر، کاتی ئەوە هاتووە ئەوانەی  لە دورەوە  سەیر دەکەن، هەنگاو بنێن بۆ پێشەوە و جێگەی خۆیان لەسەر مێزی چارەسەر بگرن.

ئامانجی ئێمە ڕوون و بێ دوو دڵی... داخستنی کەمپی ئەلهۆڵ و کەمپەکانی هاوشێوەی، ڕێگریکردن لە گەڕانەوەی تیرۆر و گەڕاندنەوەی هیوا و کەرامەت بۆ هەموو ئەوانەی ئازاریان چەشتووە، ئێمە دان بەوەدا دەنێین کە یەکگرتنەوە و ئاشتەوایی نەکارێکی ئاسانە و نەکارێکی خێرا، چونکە گەڕاوەکان لەم کەمپانە تووشی برینێکی قووڵ دەبن کەپێویستیان بە پشتیوانی درێژخایەن هەیە، بەڵام عێراق زۆر باش باجی بێکردەوەیی دەزانێت و بڕیاریداوە هەڵەکانی ڕابردوو دووبارە نەکاتەوە، بەڵکو ئەو ئاڵنگارییانە بگۆڕێت بۆ دەرفەتێکی ڕاستەقینە بۆ بەرەوپێشبردنی ئاشتی و چەسپاندنی سەقامگیری.

بۆ ئەو هاوبەشانەی لەجەنگی لەناوبردنی داعش لەگەڵمان وەستان، دەڵێین: کاتی ئەوە هاتووە ئێوە بۆ ئاشتییەکی هەمیشەیی لەگەڵمان بوەستن. گەڕانەوەی هاوڵاتیانی کەمپەکە بەرپرسیارێتییەکی دەستەجەمعییە و پێویستە جیهان بە ئیرادە و هاوکارییەوە ڕووبەڕووی ئەم قەیرانە ببێتەوە نەک ترس و بێباکی، کارەساتی ئۆردوگای ئەلهۆڵ نابێت ببێتە پەڵەیەک لەسەر ویژدانی مرۆڤایەتی، بەڵکو چیرۆکێکی یەکگرتوویی جیهانی و توانای زاڵبوون بەسەر ناخۆشیەکانیدا.

لە ڕاگەیاندنی بانگەوازەکەی ئەمڕۆدا، عێراق تەنها بەرگری لە سنوورەکانی ناکات، بەڵکو لەداهاتووی مرۆڤایەتی بە گشتی، ڕۆڵی خۆی بەتەواوی بەجێگەیاندووە، ماوەتەوە ئەوانی تر بەرپرسیارێتی خۆیان لەئەستۆ بگرن بۆ ئەوەی ئۆردوگاکانی ئاوارە نەبنە کارگەی ڕق و کینە و تیرۆر، بەڵکو سەرەتایەکی نوێ بن کە دەرفەتی ئاشتی و کەرامەت تێیدا بنیات بنرێت.

میدیا عیراقییەكان رایانگەیاند، بەرەبەیانی ئەمڕۆ روداوێكی هاتوچۆ لەسەر رێگای بەغداد- دیالە لەنێوان سێ ئۆتۆمبێلی جۆری بارهەڵگر و هیوندای ئەكسێنت و كیا كادێنزادا رویدا و بەهۆیەوە 13 كەس گیانیان لەدەستدا.

ئاماژە بەوەشكراوە، لەناو ئۆتۆمبێلی جۆری ئەكسێنتەكەدا حەوت كەس گیانیان لەدەستداوە كە چواریان منداڵ بوون، شەش كەسەكەی تریش كە لەناو ئۆتۆمبێلی جۆری كادێنزاكەدا بوون و سەرجەمیان گیانیان لەدەستداوە.

بەپێی روونكردنەوەیەكی بەڕێوەبەرایەتی هاتوچۆی دیالەش، روداوەكە بەهۆی هەڵەی ئۆتۆمبێلی كیا كادێنزاكەوە رویداوە و شۆفێری بارهەڵگرەكەش كە لە روداوەكەدا بە سوكی بریندار بووە، لەلایەن پۆلیسەوە راگیراوە.

سەرۆك كۆماری عیراق رایگەیاند، عیراق دەستپێشخەری كردووە بۆ داخستنی كەمپی هۆل و ئەو قەیرانەی لە كەمپەكە هەیە جیهانییە و پێویستە كۆمەڵگەی مەدەنی هەنگاوی بۆ بنێت.

د. لەتیف رەشید سەرۆك كۆماری عیراق لە وتارێكدا كە لە پێگەی سی ئێن ئێنی عەرەبی بڵاوكراوەتەوە ئاماژەی بەوەكردووە، هەفتەی رابردوو عیراق كۆنگرەیەكی لە بارەی كەمپی هۆل لە چوارچێوەی كۆبوونەوەی گشتی كۆمەڵەی نەتەوە یەكگرتووەكان لە نیویۆرك ئەنجامداوە و كۆنگرەكە بانگەوازێكە بۆ ئەوەی هەموو لایەك بەرپرسیارێتی هاوبەش بگرنەئەستۆ لەبارەی قەیرانە مرۆیی و ئەمنییەكان كە جیهان پشتگوێی خستوون. 

دەشڵێت، كەمپی هۆل لە رۆژهەڵات و باكوری سوریا بووەتە ژینگەیەكی ترسناك كە 10 هەزار توندڕەوی 60 وڵات لەگەڵ خێزانەكانیان تێیدا كۆبونەتەوە، بەڵام كۆمەڵگەی مەدەنی شكستی هێناوە لە چارەسەركردنی لێكەوتەكانی جەنگ  و تیرۆر و ئاوارەبوون. 

سەرۆك كۆمار راشیگەیاند، عیراق دەستەوەستان نەوەستاوە و قورسترین هەنگاوی ناوە و تائێستا چوار هەزار و 915 خێزان كە دەكاتە 18 هەزار و 830ی عیراقی لە كەمپەكە گەڕاندوەتەوە لەپێناو داخستنی كەمپەكە. 

وتیشی، قەیرانی كەمپی هۆل لە ئەستۆی عیراق و سوریا نییە و بەشێوەیەكی هەڵە لەلایەن جیهانەوە مامەڵەی لەگەڵدا دەكرێت و ئەو منداڵانەشی لە كەمپەكە گەورە دەبن بەركەوتەی توندڕەویی دەبن.

سەرۆك كۆمار جەختی لەوەكردەوە، بەستنی كۆنگرەكە هەنگاوێكە بۆ رێگریكردن لە گەڕانەوەی تیرۆر.

د. لەتیف رەشید سەرۆک کۆماری عیراق، جەختی لەوە کردەوە کە عیراق توانای مرۆیی ناوازەی هەیە و دەتوانێت بەشداری کاریگەر بکات لەپڕۆژە جۆراوجۆرەکانی داهێنان و گەشەپێدان و هەروەها ئاماژەی بەگرنگی وەبەرهێنان لەپڕۆژە جۆراوجۆرەکان و ڕەخساندنی ژینگەیەکی گونجاو بۆ گەشەپێدانیان کرد.

سەرۆک کۆماری عیراق ئەمڕۆ دووشەممە 6ـی  10ـی 2025 لە کۆشکی بەغداد، پێشوازی لە د. تەلال ئەبوغەزالە سەرۆکی کۆنگرەی داهێنانی عەرەبی و وەفدی یاوەری کرد و چۆنیەتی پەرەپێدانی هاوکاری عەرەبی لە بوارەکانی داهێنان و تەکنەلۆژیا تاوتوێکران.

سەرۆک کۆمار تیشکی خستەسەر گرنگی بەهەندوەرگرتنی بەرنامەی کوالیتی کە یارمەتیدەرە بۆ پشتگیریکردن و بەهێزکردنی گەنجان لەبوارە تەکنیکی و زانستییە مۆدێرنەکاندا.

هەروەها سەرۆک کۆمار ئاماژەی بەوەکرد کە عیراق هەوڵی بنیاتنانی دەوڵەتێکی مۆدێرن دەدات لەسەر بنەمای کارایی و داهێنان و جەختی لەپەرۆشی هاوکاری و ئاڵوگۆڕی ئەزموون لەگەڵ کۆنگرەی عەرەبی بۆ داهێنان کردەوە بەشێوەیەک کە ئاسۆیەکی نوێ بۆ هاوبەشی لەبوارەکانی توێژینەوەی زانستی و گواستنەوەی دیجیتاڵی و ئابووری زانستی بکاتەوە و ژینگەیەک بەرجەستە بکات و هانی داهێنان و پێشکەوتنی زانستی لەناوچەکەدا بدات.

هاوکات سەرۆک کۆمار ستایشی ئامانجەکانی کۆنگرەی کرد لە بەهێزکردنی کاری هاوبەش لەبواری داهێناندا، تیشکی خستە سەر ئەزموونی عیراق بەتایبەت لە گۆڕانکاری دیجیتاڵیدا، وەک ناوەندێکی ناوچەیی ئومێدبەخش ودەستپێکردنی دەستپێشخەری لە کەرتە گرنگەکان، هاندانی وەبەرهێنانی کەرتی تایبەت، و بەرزکردنەوەی ڕۆڵی ژنان و گەنجان لە سەرکردایەتیکردنی بزووتنەوەی داهێنان و کارگێڕی و جەختیشی لەوە کردەوە کە دەستپێکردنی کۆنگرەی عەرەبی لە بەغداد پێگەی پێشەنگی عیراق وەک ناوەندێکی ناوچەیی بۆ داهێنان پشتڕاست دەکاتەوە.

لەلای خۆیەوە دکتۆر تەلال ئەبوغەزالە سوپاس و پێزانینی خۆی بۆ سەرۆک کۆمار دەربڕی بۆ پێشوازییە گەرمەکەی و ئامادەیی کۆنگرەی بۆ پەرەپێدانی هاوکاری لەگەڵ دامەزراوە عیراقییەکان لەبوارەکانی داهێنان و برێوەبەرایەتی و دابینکردنی ژینگەی نیشتمانی بەنوێترین ئەزموون و تەکنەلۆژیای عەرەبی و نێودەوڵەتی دووپاتکردەوە .

هەروەها ئەبوغەزالە، ئاماژەی بەوەشکرد، کۆنگرەی عەرەبی یەکەم کۆنگرەیە لەعێراق و ناوچەکەدا، بەو پێیەی بەرجەستەی دیدگەیەکی گەورەیە بۆ پلاتفۆرمێکی نێودەوڵەتی عێراقی پێشەنگ، کە سەرکردە و بیرمەندان و خاوەنکاران و داهێنەرانی وڵاتانی جۆراوجۆر کۆدەکاتەوە بە ئامانجی دروستکردنی چارەسەری کردەیی کە گەشەپێدانی بەردەوام بەرز بکاتەوە و پاڵپشتی ئابووری لەسەر بنەمای زانست بکات.

سەرۆك كۆماری عیراق پیرۆزبایی لە ئیزدیەكان كرد و، رایگەیاند لەم رۆژەدا  پشتگیری تەواوی خۆیان بۆ ئەو پێكهاتە دووپات دەكەنەوە، هەروەها كاردەكەن بۆ گەڕانەوەی رفێنراوەكانیان.

دكتۆر لە تیف رەشید سەرۆك كۆماری عیراق، لە ئێكسێكدا پیرۆزبایی لە پێكهاتەی ئیزدیەكان كرد بەبۆنەی هاتنەوەی جەژنی جەمایێ، هیوای جەژنێكی پڕ خێرو بەرەكەیتی بۆ خواستن.

هەر بەو بۆنەیەوە سەرۆك كۆماری عیراق رایگەیاند، لەم رۆژەدا مانای هاودەنگی و بەهێزبوونی پێكەوە ژیانی ئاشتیانە لە نێوان پێكهاتە جۆراوجۆرەكانی گەلی عیراقمان وەبیر دێنینەوە.

وتیشی، ئەوان پشتگیری خۆیان بۆ ئەو كۆمەڵگە ڕەسەنە دووپات دەكەینەوە لە زاڵبوون بەسەر ئاڵنگاریەكان و برینەكانی ڕابردوویاندا، هەروەها كار دەكەن بۆ دڵنیابوون لە گەڕانەوەی ئاوارەكان بۆ شارەكانیان و ئاشكراكردنی چارەنووسی ڕفێنراوەكان.

وەزیری كارەبای عیراق رایگەیاند، بۆ یەكەمجار لە مێژووی وڵاتەكەدا بەرهەمهێنانی كارەبا بۆ زیاتر لە 28 هەزار مێگاوات بەرز بوەتەوە . 

زیاد عەلی فازڵ وەزیری كارەبای عیراق رایگەیاند، لە ماوەی 3 ساڵی رابردوودا كەرتی كارەبا لە عیراق پێشكەوتنێكی بەرچاوی بەخۆوە بینیوە و سەرباری ئاستەنگەكان وەزارەتی كارەبا توانیویەتی بۆ یەكەمجار لە مێژووی عیراقدا ئاستی بەرهەمهێنانی كارەبا بۆ زیاتر لە 28 هەزار مێگاوات بەرز بكاتەوە .

 هەروەها ئاشكرایكردوە ، پلانەكانیان بۆ نوێكردنەوەی سیستمی گواستنەوە و دابەشكردن و جۆراوجۆركردنی سەرچاوەكانی وزە ،  رۆڵی راستەوخۆی هەبووە لە پتەوكردن و سەقامگیربونی تۆڕەكانی كارەبا.

 وتیشی، لەچوارچێوەی هەوڵەكانیاندا بۆ زیادكردنی بەرهەمهێنانی كارەبا ، چەند گرێبەستێكیان ئیمزا كردوە بۆ دروستكردنی چەند وێستگەیەكی بەرهەمهێنانی كارەبا كە بە سوتەمەنی ناوخۆ كار بكەن و لەو رێگەیەوە توانای بەرهەمهێنان بگەیەننە 48 هەزار مێگاوات. 

د. لەتیف رەشید سەرۆک کۆماری عیراق، ئەمڕۆ لە کۆشکی بەغداد، کارنامەی ژمارەیەک باڵیۆزی نوێی  لەعیراق وەرگرت، کە پێکهاتبوون لە باڵێۆزانی،  کۆماری فینلاند ئانتی پۆتکۆنین،  وەفدی یەکێتی ئەوروپا کلیمێنس سەمتنەر،  کۆماری ئەلمانیای فیدراڵ دانیال کرێبەر.

لەمیانەی پێشوازیکردنی لەباڵیۆزە نوێیەکان هەر یەک بە جیا، سەرۆک کۆمار، هەوڵی بەردەوامی عیراقی دووپاتکردەوە بۆ چەسپاندنی پەیوەندیەکی هاوسەنگ لەگەڵ وڵاتانی جیهان لەسەر بنەمای بەرژەوەندی هاوبەش و فراوانکردنی ئاسۆی هاوکاریی سیاسی و ئابوری و بازرگانی.

هاوکات هیوای سەرکەوتنی بۆ باڵیۆزە نوێیەکان لە راپەڕاندنی ئەرکەکانیان و قوڵکردنەوەی پەیوەندییە دۆستانە و هاوکارییەکانی نێوان عیراق و وڵاتەکانیان دەربڕی.

لەلای خۆیانەوە باڵوێزەکان سوپاس و پێزانینیان بۆ سەرۆک کۆمار دەربڕی و خواستی وڵاتەکانیان بۆ پتەوکردنی پەیوەندی لەگەڵ عیراق لە بوارە جیاجیاکاندا نیشاندا.

شارەزایەکی بواری ئابووری، بازدانێکی بەرچاوی لە کەرتی گەشتیاری عێراقی ئاشکرا کردوە  و رایگەیاندووە؛ ڕێژەی گەشەسەندنی کەرتی گەشتیاری ٪25 گەشەی کردوە و وڵاتی دوو رووبار لە ئێستادا بووەتە حەوتەمین وڵاتی عەرەبی لە رووی گەشتیارییەوە.

ئەمڕۆ شەممە، نەبیل ئەلمەرسومی شارەزای بواری ئابوری رایگەیاندوە، کەرتی گەشتیاری لە عیراق بەرەوپێشچونێکی بەرچاوی بەخۆیەوە بینیوە و داهاتی ساڵانەی 5.7 ملیار دۆلاری تێپەڕاندوە

ناوبراو ئاماژەی بەوەکردوە لە ساڵی  2023  داهاتی گەشتیاری 4.6 ملیار دۆلار بوە و لە ساڵی 2024 دا بۆ 5.7 ملیار دۆلار بەرزبووەتەوە، بەمەش ڕێژەی گەشەسەندنی کەرتەکە %25 زیادی کردوە.

نەبیل ئەلمەرسومی ئەوەشی خستوەتە ڕوو عێراق ئێستا لە پلەی حەوتەمی جیهانی عەرەبیدایە لە داهاتی گەشتیاری، دوای ئیمارات کە بە 57 ملیار دۆلار لە پێشەنگی لیستەکەدایە، سعودیە بە 41 ملیار دۆلار، میسر بە 15.3 ملیار دۆلار، مەغریب بە 11.3 ملیار دۆلار، قەتەر بە 8.4 ملیار دۆلار و ئوردن بە 7.2 ملیار دۆلار.

بە ئامادەبوونی شاناز ئیبراهیم ئەحمەد خانمی یەکەمی عیراق و بافڵ جەلال تاڵەبانی سەرۆکی یەکێتیی نیشتمانیی کوردستان و قوباد تاڵەبانی جێگری سەرۆکی حکومەتی هەرێمی کوردستان، رۆژی هەینی 3-10-2025، یەکەمین کۆنفرانسی زانستی نێودەوڵەتی سەرۆک تاڵەبانی لە زانکۆی سلێمانی بەڕێوەچوو.

لە دانیشتنی دەستپێکی کۆنفرانسەکەدا بە ئامادەبوونی موحسین مەندەلاوی جێگری یەکەمی سەرۆکی پەرلەمانی عیراق و د. حەیدەر عەبادی سەرۆک وەزیری پێشوتری عیراق و ژمارەیەک کەسایەتی تری سیاسی و دیپلۆماسی و حزبی بەڕێوەچوو، د. کامیل دولەیمی سەرۆکی دیوانی سەرۆکایەتی کۆمار وتارێکی بەناوی سەرۆکایەتی کۆمارەوە پێشکەش کرد، جەختیکردەوە کە جەلال تاڵەبانی سەرۆکی کۆچکردوو، باوکێکی میهرەبان و دادپەروەر بووە بۆ هەموو عیراق، پاڵپشتی و پشتیوانیان بووە، هاوکات ستایشی ژیری کرد، کە وای کرد گڕی ململانێکان بکوژێنێتەوە و بۆ عیراقییەکان بسەلمێنێت کە یەکێتیی نیشتمانیی تاکە رێگەیە بۆ پێشکەوتن.

دولەیمی سەرۆک مام جەلالی بە سەرکردە و دەنگێک وەسف کرد کە زمانی دیالۆگ و دانوستانی وەک بنەمایەکی بنەڕەتی لە باوەش گرتووە. ئەو کۆچکردووی بە میراتێکی حیکمەت و هاوسەنگی و ئەزموونێکی راستەقینەی سەرۆکایەتی و قوتابخانەی ئیمان وەسف کرد.

دواتر قوباد تاڵەبانی جێگری سەرۆکی حکومەتی هەرێمی کوردستان وتارێکی بەناوی بنەماڵەی سەرۆکی کۆچکردوو پێشکەش کرد، تیشکی خستە سەر سەرنجەکانی سەرۆک مام جەلال لە بواری پەروەردە و گەشەپێدان و داهێنان و هەروەها هەوڵەکانی بۆ گەشەسەندنی سلێمانی و زانکۆی سلێمانی. هەروەها ستایشی ئەو رۆڵەی کرد کە خاتوو هێرۆ ئیبراهیم ئەحمەد لە پاڵپشتیکردنی سەرۆک جەلال تاڵەبانی بە درێژایی ساڵانی خەباتی گێڕاویەتی.

هەروەها لە کۆنفرانسەکەدا وتاری دیکەی ئامادەبووان پێشکەشکرا کە ستایشی رۆڵی سەرەکیی سەرۆک کۆماری کۆچکردوو مام جەلالیان کرد لە بەهێزکردنی یەکڕیزی نیشتمانی عیراق و چەسپاندنی پرەنسیپی هاووڵاتیبوون لە نێو هەموو عیراقییەکان.

تائێستا زیاتر لە یەك ملیۆن بەرمیل نەوتی هەرێمی كوردستان رادەستی بەغداد كراوە وەزیری نەوتی عیراقیش دەڵێت: 650 هەزار بەرمیل نەوتی هەرێمی كوردستان باركراوە بۆ فرۆشتن.

حەیان عەبدولغەنی وەزیری نەوتی عیراق رایگەیاند، یەكەم جارە حكومەتی عیراق نەوتی هەرێمی كوردستانی وەردەگرێت و هەناردەی دەکات، تائێستاش زیاتر لە یەك ملیۆن بەرمیل نەوتی هەرێمیان رادەستكراوە.

ئەوەشی خستەڕوو، لەئێستادا 650 هەزار بەرمیل نەوتی هەرێمی کوردستان بارکراوە بۆ فرۆشتن و ئاڕاستەی ئەو شوێنانەکراوە کە گرێبەستیان لەگەڵ ئەنجامدراوە.

وەزیری نەوتی عیراق ئاماژەی بەوەشکرد، فرۆشتنی نەوتی هەرێمی کوردستان لەرێگەی سۆمۆوە دەستکەوتێکی گەورەیە بۆ هەولێر و بەغداد.