عیراق
سەرۆك وەزیرانی عیراق و سەرۆكی فەرەنسا پەیوەندییەكی تەلەفۆنییان ئەنجامدا، سودانی هۆشداری لە سەرهەڵدانی شەڕێكی نوێ لە ناوچەكە دەدات.
بەپێی راگەیەنراوێكی نوسینگەكەی، محەمەد شیاع سودانی سەرۆك وەزیرانی عیراق لەگەڵ ئیمانوێل ماكرۆن سەرۆكی فەرەنسا پەیوەندیەكی تەلەفونییان ئەنجامداوە، باسیان لە پەیوەندییە دووقۆڵییەكانی نێوان هەردوو وڵات و ڕێگاكانی بەرزكردنەوەی هاوبەشی و هاریكاری لە بوارە جیاجیاكان تاوتوێ كراون، هەروەها پرسە ناوچەیی و نێودەوڵەتییەكان وبەرژەوەندی هاوبەش باسیان لێوەكراوە.
هەر لە راگەیەنراوەكەدا هاتووە، سودانی هۆشداری داوە لە مەترسییەكانی سەرهەڵدانی شەڕێكی نوێ كە هەڕەشە لە ئاسایش و سەقامگیریی ناوچەكە دەكات، ئاماژەی بەوەشكردوە، عیراق هەموو هەوڵێكی خۆی دەدات بۆ ئەوەی كێشەی ناوچەكە لە رێگای دیلۆگ و بنەما نێودەوڵەتیەكانەوە چارەسەر بكرێت.
لای خۆیەوە سەرۆكی فەرەنساش ئاستی ئاسایش و سەقامگیری عیراق و هەوڵەكانی حكومەتی بۆ پاراستنی سەقامگیری وڵاتەكەی بەرز نرخاندوە.
هاوكات سودانی و ماكرۆن باسیان لەو سەردانەش كرد، كە بڕیارە سەرۆكی فەرەنسا بۆ عیراق ئەنجامی بدات، بەوەش دەبێتە دووەم سەردانی ئەو سەرۆكەی فەرەنسا بۆ عیراق.
بافڵ جەلال تاڵەبانی، سەرۆکی یەکێتیی نیشتمانیی کوردستان، لە دەباشان پێشوازی لە حەمید شەتری، سەرۆکی دەزگای موخابەراتی عیراق کرد.
لە کۆبوونەوەکەدا، کە قوباد تاڵەبانی، جێگری سەرۆکوەزیران، جەلال شێخ ناجی، سەرۆکی ئاژانسی پاراستن و زانیاری/زانیاری و هیوا ئەحمەد، سەرۆکی دەزگای ئاسایشی هەرێم، ئامادەیبوون، دۆخی ئەمنیی عیراق و ناوچەکە گفتوگۆی لەسەر کرا. هەروەها جەخت لە فراوانکردنی هەماهەنگی و هاریکارییە هەواڵگرییەکان لە نێوان هەرێمی کوردستان و عیراق کرایەوە، بە ئامانجی زاڵبوون بەسەر ئاڵنگارییە ئەمنییەکان و پاراستنی ئاسایش و سەقامگیری لە وڵاتدا.
سەرۆک بافڵ گرنگیی پەیوەندی سەرجەم دەزگا هەواڵگریی و ئەمنییەکانی دووپاتکردەوە و وتی، دابینکردنی ژیانێکی ئارام و دوور لە تیرۆر بۆ خەڵک کاری لەپێشینەیانە. هەروەها رایگەیاند بە کاری پێکەوەیی دەتوانن باشتر رووبەڕووی مەترسییە ئەمنییەکان ببنەوە و هیچ دەرفەتێکیش بۆ تیرۆریستان نەهێڵنەوە.
سەرۆکی یەکێتیی نیشتمانیی کوردستان جەختیشی کردەوە کە هەرکەسێک لە هەر پلە و پۆستێکدا بێت، یاساشکێنی بکات و ژیان و سەقامگیریی خەڵک بخاتە مەترسییەوە، دەبێت یاسای بەسەردا بچەسپێنرێت و یاسا سەروەر بێت.
سبەینێ دوا وادەی پڕكردنەوەی فۆڕمی ئەلیكترۆنی خۆراكە و لە دوای ئەو كاتەشەوە ئەوانەی پڕیان نەكردووەتەوە پارەیان لێوەردەگیرێت بۆ پڕكردنەوەی فۆڕمەكە.
محەمەد حەنون، وتەبێژی وەزارەتی بازرگانی عیراق رایگەیاند، تائێستا 37 ملیۆن هاووڵاتی عیراقی فۆڕمی ئەلیكترۆنی خۆراكیان پڕكردوەتەوە و سبەینێش وەك دوا وادەیە بۆ پڕكردنەوەی فۆڕمەكە و پێویستە ئەوانەی پڕیان نەكردوەتەوە پەلە بكەن، لە دوای ئەو كاتەوە ئەوانەی دەیانەوێت پڕی بكەنەوە بڕە پارەیەكیان لێوەردەگیرێت.
لە بارەی هەرێمی كوردستانیشەوە وتەبێژی وەزارەتی بازرگانی عیراق وتی، 85%ی هاووڵاتیان فۆڕمەكەیان پڕكردووەتەوە، بە جۆرێك لە هەڵەبجە 89%، لە هەولێر 87%، لە سلێمانی 86% و لە دهۆكیش 82%ی هاووڵاتیان فۆڕمی ئەلیكترۆنییان پڕكردووەتەوە و بە گشتیش زیاتر لە چوار ملیۆن و 601 هەزار هاووڵاتی ناویان لەو فۆڕمە ئەلیكترۆنییە تۆماركردووە، وتیشی، دوای وردبینیكردن دوو ملیۆن و 750 هەزار ناو نادیارن یان بە هۆكاری جیاواز راگیراون.
كۆمسیۆنی هەڵبژاردنەكانی عیراق پێشبینی دەكات، ژمارەیەكی زیاتری كاندید لە هەڵبژاردنی داهاتووی ئەنجومەنی نوێنەرانی عیراق دووربخرێنەوە.
حەسەن قەباس ئەندامی تیمی راگەیاندنی كۆمسیۆنی باڵای سەربەخۆی هەڵبژاردنەكانی عیراق بە رۆژنامەی سەباحی راگەیاندووە، كۆمیسیۆن تائێستاش سەرقاڵی وردبینیكردنە لە دۆسێی كاندیدەكان و هەوڵدەدات بە زووترین تەواو بكرێت كە ژمارەیان زۆرە و دەگاتە زیاتر لە حەوت هەزار و 700 كاندید، كە وردبینی لە دۆسێكانیاندا دەكرێت.
روونیشیكردەوە، بەپێی ئەو یاسایانەی بۆ كاندیدبوون دانراوە، پێشبنی دەكرێت لیستی تریش هەبێت بۆ دوورخستنەوەی چەندین كاندید كە تائێستا 627 كاندید بە هۆكاری جیاجیا دورخراونەتەوە.
هەڵبژاردنی داهاتووی ئەنجومەنی نوێنەرانی عیراق بڕیارە لە مانگی تشرینی دووەمی ئەمساڵدا بەڕێوەبچێت.
د. لەتیف رەشید، سەرۆک کۆماری عیراق، لە چاوپێکەوتنێکدا لەگەڵ کەناڵی ئەلئولا، تیشکی خستە سەر چەندین بابەتی گرنگی پەیوەندیدار بە رەوشی سیاسی، ئابووری، کۆمەڵایەتی و دەرەوەی عیراق، لەوانە پەیوەندییەکانی نێوان حکومەتی فیدراڵی و هەرێمی کوردستان، کێشەی نەوت و غاز، دابینکردنی موچە، پرۆسەی هەڵبژاردن، رەوشی زیندانییەکان، قەیرانی ئاو، پێشنیازە یاساییەکان و پرسی پەکەکە و غەززە.
پەیوەندییەکانی بەغداد و هەولێر و کێشەی نەوت و غاز:
سەرۆک کۆمار جەختی کردەوە کە "پەیوەندی نێوان حکومەتی فیدراڵی و حکومەتی هەرێمی کوردستان لە هەموو بوارەکاندا باشە، ناکۆکییەکان لە بنەڕەتدا لە نێوان پارێزگاکان و حکومەتی فیدراڵدایە و هاوبەشییەکان لە ناکۆکییەکان زیاترن."
سەبارەت بە یاسای نەوت و غاز، ئاماژەی بە "پێویستییەکی بەپەلە بۆ پەسەندکردنی یاسای نەوت و گاز و وردەکارییە یاساییەکان لەبارەی دابەشکردنی داهاتەکان و چارەسەرکردنی کێشەکانی ئێستا" کرد. بەداخەوە پەرلەمان سەرکەوتوو نەبووە لە دەرکردنی ئەم یاسایە گرنگە.
کێشەی موچە و گۆڕانکارییەکانی بودجە:
د. لەتیف رەشید رایگەیاند، "ئەرکی حکومەتە موچەی سەرجەم فەرمانبەران دابین بکات". لە هەمان کاتدا روونی کردەوە؛ کێشەیەکی گەورەمان هەیە لەڕوی خەرجیەکانی حکومەت بۆ دابینکردنی موچە، کە دەکاتە 80%ی داهاتی دەوڵەت، لە کاتێکدا لە وڵاتانی پێشکەوتووی دیکەدا، لە 6% تێناپەڕێت، پێویستە ئەم کێشەیە چارەسەر بکەین."
هەڵبژاردنەکان و پاراستنی متمانە:
سەرۆک کۆمار داوای کرد، "لە هەڵبژاردنی پەرلەمانی داهاتوودا هەڵبژاردنێکی ئازاد و دادپەروەرانە مسۆگەر بکەین و رێگری بکەین لە بەکارهێنانی دەسەڵات بۆ مەبەستی هەڵبژاردن". هەروەها رەتی کردەوە "بانگەشەی دواخستنی هەڵبژاردن یان پێکهێنانی حکومەتی فریاگوزاری بە هیچ جۆرێک راست نییە."
رەوشی زیندانییەکان و یاسای لێبوردن:
د. لەتیف رەشید روونیکردەوە، "سەرۆکایەتی کۆمار، لە رێگەی لیژنە هاوبەشە وەزارییەکانەوە، چارەنووسی 23 هەزار دەستبەسەرکراو کە سزا نەدراون و حوکمەکانیان تەواو کردبوو و بە هۆکاری جۆراوجۆر هێشتا لە زیندان بوون، یەکلایی کردەوە." بەپێی یاسای لێبوردن 55 هەزار زیندانی ئازاد کراون.
قەیرانی ئاو و پێشنیازە یاساییەکان:
سەبارەت بە قەیرانی ئاو، سەرۆک کۆمار وتی "جیهان لە ئەنجامی گۆڕانی کەشوهەوادا رووبەڕووی قەیرانێکی گەورەی ئاو بووەتەوە، بە عیراقیشەوە." داوای کرد "پشکێکی دادپەروەرانەی ئاو لە وڵاتانی دراوسێ وەربگرین و بە فیڕۆدانی ئاو بوەستێنین."
ئاشکراشی کرد کە سەرۆکایەتی کۆمار "چەندین رەشنووسی یاسای پێشکەش بە ئەنجومەنی نوێنەران کردووە، لەوانە پێکهێنانی ئەنجومەنی باڵای ئاو و چارەسەرکردنی کێشەکانی ژنان."
پرسی پەکەکە و غەززە:
لەکۆتایی لێدوانەکەیدا، سەرۆک کۆمار تیشکی خستە سەر پرسی لەناوبردنی چەکی پەکەکە و وتی "لەناوبردنی چەکی پارتی کرێکارانی کوردستان (پەکەکە) بەپێی رێککەوتنێک لەگەڵ حکومەتی تورکیا هەنگاوێکی گرنگە بۆ بەرەوپێشبردنی ئاشتی و سەقامگیری."
سەبارەت بە غەززەش، جەختی کردەوە "دەستدرێژییە بەردەوامەکان بۆ سەر غەززە کاریگەری نەرێنی لەسەر تەواوی ناوچەکە هەیە. هەڵوێستی ئێمە لە عیراق روونە و نوێ نییە، ئێمە پشتیوانی لە گەلی فەلەستینی بۆ گەیشتن بە مافە رەواکانی تەواوی خۆی دەکەین و ئێستا دەبێت دەستدرێژییەکان رابگیرێت و هاوکاری مرۆیی بگەیەنرێت."
ئهمڕۆ پێنجشهممه، وهزارهتی كۆچ و كۆچبهرانی عیراق گهڕانهوهی (230) خێزانی عیراقی كه ژمارهیان دهگاته (839) كهس، له كهمپی هۆلۆوه بۆ ناو عیراق راگهیاند.
كهریم نووری، بریكاری وهزارهتی كۆچ و كۆچبهران، رایگهیاند: " (230) خێزانی عیراقی كه ژمارهیان دهگاته (839) كهس، كهمپی هۆلیان جێهێشتووه و بهرهو عیراق گهڕاونهتهوه."
وتیشی: "ئهمه (29)همین وهجبهی ئهو خێزانانهیه كه له كهمپی هۆلەوە دهگهڕێنهوه و ئێستا له رێگادان بۆ گهیشتنهوه به وڵات."
د. لەتیف رەشید سەرۆک کۆماری عیراق، ئەمڕۆ پێنجشەممە 28ـی 8ـی 2025، پێشوازی لە وەفدێکی فەلەستینی بە سەرۆکایەتی محەمەد ئەشتیە سەرۆک وەزیرانی پێشوو کرد، ئەوەش لە پەراوێزی کۆنگرەی هاوپەیمانی سۆسیال دیموکراتی لە جیهانی عەرەبیدا کە لە شاری سلێمانی بەڕێوەدەچێت.
لە سەرەتای دیدارەکەدا، سەرۆک کۆمار بەخێرهاتنی وەفدەکەی کرد، و لە دیدارێکدا بارودۆخی دڵتەزێن و کارەساتباری گەلی فەلەستین لە کەرتی غەززە و لە فەلەستین بە گشتی تاوتوێ کرا.
سەرۆک کۆمار جەختی لە هاوپشتی و پشتیوانی عیراق، حکومەت و گەل، بۆ گەلی فەلەستین کردەوە، و پێویستی یەکخستنی هەوڵە عەرەبی و نێودەوڵەتییەکان و گرتنەبەری هەڵوێستێکی یەکلاکەرەوەی بەرامبەر بە دەستدرێژی و سیاسەتی کوشتن و برسی کردن دژی هاوڵاتیانی سڤیل و ژنان و منداڵان و پیر و پیاوان دووپاتکردەوە، هەروەها کاریش لەسەر گەیاندنی یارمەتییە مرۆیی و پزیشکی و خۆراکییەکان بە هاوڵاتیان بکات بە شێوەیەک کە پێداویستییەکانیان دابین بکات.
لای خۆیەوە، محەمەد ئەشتیە سوپاس و پێزانینی خۆی بۆ فەخامەتی سەرۆک کۆمار دەربڕی و ستایشی هەوڵەکانی فەخامەتی و هەڵوێستی عیراقی کرد لە پشتیوانیکردنی فەلەستین و مافە ڕەواکانی گەلەکەی.
وەفدەکە قەڵغانی فەلەستینیان بەخشییە فەخامەتی سەرۆک کۆمار بۆ هەڵوێستە دیارەکانی لە پشتیوانی و پشتگیریکردنی دۆزی ڕەوای گەلی فەلەستین.
`
کۆنفرانسی هاوپەیمانی سۆسیال دیموکراتەکانی وڵاتانی عەرەبی لە سلێمانی بەڕێوەدەچێت و سەرۆک کۆماری عیراق تێیدا وتارێکی پێشکەشکرد و ئاماژەی بەوەکرد، دەبێت هاوسەنگی لە نێوان وڵاتاندا بمێنێتەوەو كێشەكان چارەسەربكرێن.
د.لەتیف رەشید سەرۆک کۆماری عیراق لە وتارەکەیدا رایگەیاند، وڵاتە گەورەکان مافی مرۆڤ پێشێل دەکەن و دەبێت کۆمەڵکوژییەکان بوەستێنرێن.
وتیشی، دەبێت ئەو دڕەندەیەی لە غەززە هەیە رابگیرێت، هاوکات گەلی عیراق هاوسۆزی فەلەستینەکانە.
سەرۆک کۆمار ئاماژەی بەوەشکرد، کێشەکانی ئەم سەردەمە کەمی ئاو و نەبوونی وزەیە، دەبێت هەموان پێکەوە کاربکەین بۆ بۆ چارەسەرکردنی ئەو کێشانە.
د. لەتیف رەشید داواشی لە میوانەکانی بەشداربووی کۆنفڕانسەکە کرد سەردانی پارێزگای هەڵەبجە بکەن، تا بۆیان دەرکەوێت رژێمی بەعس چ تاوانێکی بەرانبەر بە گەلی کورد و ئەو شارە ئەنجامداوە.
ئەنجومەنی وەزیرانی عیراق رەزامەندی نیشاندا بۆ خەرکردنی موچەی مانگی شەشی فەرمانبەرانی هەرێم بەو مەرجەی حکومەتی هەرێم 120 ملیار دینارەکە رادەست بکات.
ئەنجومەنی وەزیرانی عیراق لە راگەیەنراوێکدا بڵاویکردەوە، لە کۆبوونەوەی ئەمڕۆی ئەنجومەن، بڕیاردرا موچەی مانگی شەشی فەرمانبەران خەربکرێت، بەڵام بە مەرجێک هەرێم 120 ملیار دینار وەک داهاتی نانەوتی رادەستی حکومەتی فیدراڵ بکات.
ئاماژەی بەوەشکردووە، لیژنە هاوبەشەکان راسپێردراون بەردەوامبن لە کارەکانیان، هاوکات تیمێکی یاسایی پێکهێنرێت بۆ ئەوەی ناکۆکییەکانی پەیوەست بە داهاتە نانەوتییەکان بەپێی یاسا. چارەسەر بکرێت.
ئەمڕۆ لە کۆبونەوەی ئەنجومەنی وەزیرانی عیراق رەزامەندی لەسەر خەرجکردنی موچەی مانگی شەشی موچەخۆرانی هەرێم درا.
هەڵۆ عەسکەری وەزیری ژینگەی عیراق بە کوردسات نیوزی راگەیاند، لە کۆتا بڕگەری کۆبونەوەی ئەمڕۆی ئەنجومەنی وەزیرانی عیراق تاوتوێی پرسی موچەی مانگی شەشی موچەخۆرانی هەرێمی کوردستان کراو و لە ئەنجامی لە ئەنجامدا محەمەد شیاع سودانی بڕیاریدا دەستبکرێت بە خەرجکردنی موچەی مانگی شەشی موچەخۆرانی هەرێم.
ئاماژەی بەوەشکرد، لیژنەیەک پێکدەهێنرێت بۆ پێداچوونەوە بە خاڵەناکۆکەکانی نێوان عیراق وهەرێم چارەسەردکردنی و رێککەوتن لەبارەیەوە، ئەگەریش ئەو خاڵە ناکۆکانە چارەسەرنەکرا، پەنادەبرێتە بەر دادگای فیدراڵی و ئەنجومەنی دەوڵەت بۆ یەکلایکردەنەوەی ئەو نوسراوە یاساییانەی کە شیکردنەوەی جیاوازی بۆ دەکرێت.
هەڵۆ عەسکەری راشیگەیاند، لەنێو کۆبونەوەی ئەنجومەنی وەزیراندا بەشێوەیەکی ئەرێنی و بەپەرۆشیەوە باس لە چارەسەری کێشەی موچەی موچەخۆرانی هەرێم کراوە.
لە درێژەی فشارەکان بۆ سەر جوتیارانی کورد لە ناوچە کێشە لەسەرەکان، دادگای قەزای دووبز سزای زیندانیکردنی بۆ دوو جوتیاری کورد دەرکرد.
بەگوێرەی زانیارییەکان، دادگای دووبز لەسەر سکاڵای عەرەبی هاوردە، بڕیاری سزادانی بۆ هەردوو جوتیار، بکر مستەفا و محسن ئیسماعیل، دەرکردووە کە خەڵکی گوندی شەناغەی سەر بە ناحیەی سەرگەڕانن.
سزاکە بریتییە لە زیندانیکردن بە شێوەی راگیراو (وقف التنفيذ)، بەڵام لەگەڵ ئەوەشدا دادگاکە جوتیارە کوردەکانی بە پێدانی قەرەبوو بەو جوتیارە عەرەبانە پابەند کردووە کە سکاڵاکەیان تۆمار کردووە.
کێشەی زەویوزار لەنێوان جوتیارانی کورد و عەرەبی هاوردە لە سنووری کەرکوک و دەوروبەری، یەکێکە لە کێشە چارەسەرنەکراوەکان کە لە دوای ساڵی 2017وە جارێکی دیکە سەریهەڵداوەتەوە و بەهۆیەوە چەندین جار جوتیارانی کورد روبەڕوی دادگا و فشاری یاسایی بوونەتەوە.
وێنەی دەقی بڕیارەکە:
ئەمڕۆ ئەنجومەنی نوێنەرانی عیراق كۆدەبێتەوە و خوێندنەوەی یەكەم بۆ چەند پرۆژیاسایەك دەكات و چەند پڕۆژەیاسایەكیش دەخاتە دەنگدانەوە.
لە تەوەری یەكەمدا دەنگ لەسەر پێشنیازە یاسای هەمواری دووەمی یاسای دامەزراوەی زیندانییە سیاسییەكان دەدرێت، تەوەری دووەمیش تایبەتە بەدەنگدان لەسەر پڕۆژەیاسای وزەی نوێبووەوە.
هەر لەمیانی ئەو دانیشتنەدا خوێندنەوەی یەكەم بۆ پێشنیازە یاسای هەمواری قەرەبووی زیانلێكەوتووانی جەنگ و هەڵەی ئۆپراسیۆنە سەربازییەكان و پڕۆژەیاسای هەمواری یەكەمی یاسای چاودێری منداڵانی خوار تەمەنی یاسایی دەكرێت.
لە كۆتا تەوەری دانیشتنەكەی ئەنجومەنی نوێنەرانیشدا تاوتوێی راپۆرتی پڕۆژەیاسای دەستەی گشتی چاودێری هاوردەی فیدراڵی و پڕۆژەیاسای دراو و كاڵاكان دەكرێت.
كۆمیسیۆنی باڵای هەڵبژاردنەكانی عیراق رایگەیاند، ژماری ئەو كاندیدانەی لە هەڵبژاردنی داهاتووی عیراق دوورخراونەتەوە گەیشتە 627 كەس.
كۆمیسیۆنی باڵای هەڵبژاردنەكانی عیراق بڵاویكردەوە، ژمارەی ئەو كاندیدانەی تاوەكو ئێستا لە هەلبژاردنی خولی شەشەمی ئەنجومەنی نوێنەران دووخراونەتەوە گەیشتووەتە 627 كاندید.
سەبارەت بە هۆكاری دورخستنەوەشیان، كۆمسیۆنی هەڵبژاردنەكان رونیكردوەتەوە ،290 كاندید بەبریاری دەستەی لێپرسینەوە و دادوەری و 106 كاندیدیش بەهۆی هەبوونی پێشینەی تاوانەوە دوور خراونەتەوە، 163 كاندیدیش بەهۆی گۆرانكاری لەلیستی كاندیدەكان دورخراونەتەوە، 34 كاندیدیش بەهۆی كەموكوری لە بڕوانامەكانیان دورخراونەتەوە.
پێشتریش عیماد جەمیل سەرۆكی تیمی راگەیاندنی كۆمسیۆنی هەڵبژاردنەكان رایگەیاندبوو، بەپێی رێكارەكانی دەبێت تا سەرەتای مانگی تشرینی یەكەم دۆسیەی ئەو كاندیدە دورخراوانە یەكلایی بكرێتەوە
د. لەتیف رەشید سەرۆک کۆماری عیراق، ئەمڕۆ یەکشەممە 24ـی 8ـی 2025، لە کۆشکی بەغداد، پێشوازی لە ئەحمەد زاهد حەمیدی جێگری سەرۆک وەزیران و وەزیری گەشەپێدانی هەرێمی و ناوچەیی مالیزیا و وەفدی هاوڕێی کرد.
لەسەرەتای دیدارەکەدا، سەرۆک کۆمار بەخێرهاتنی وەفدەکەی کرد و سڵاوی خۆی بە سەرۆکی مالیزیا گەیاند، هاوکات ئاماژەی بە گرنگیی پەرەپێدانی پەیوەندییە دووقۆڵییەکان کرد بۆ بەدەستهێنانی بەرژەوەندییە هاوبەشەکانی هەردوو وڵات.
سەرۆک کۆمار جەختی لە پەرۆشیی عیراق کردەوە بۆ دروستکردنی هاوبەشیی هاوسەنگ کە لەسەر بنەمای رێزی یەکتری و هاوکاریی هاوبەش لە بوارە جیاجیاکاندا، هەروەها ئاماژەی بە پێویستیی هەماهەنگی کرد لە پرسە هەرێمی و نێودەوڵەتییەکانی جێی بایەخی هاوبەش.
سەرۆک کۆمار هەڵوێستەکانی مالیزیای لە پشتیوانیکردنی دۆزی فەڵەستین و وەستانەوە لەگەڵ گەلی فەڵەستین لە رووبەڕووبوونەوەی دەستدرێژی و بەدەستهێنانی تەواوی مافە رەواکانی بەرز نرخاند. هەروەها سەرۆک کۆمار داوای لە وڵاتانی عەرەبی و ئیسلامی و کۆمەڵگەی نێودەوڵەتی کرد کە هەوڵەکانیان چڕ بکەنەوە بۆ راگرتنی دەستدرێژی بۆ سەر کەرتی غەززە و کۆتاییهێنان بە ئازار و مەینەتییەکانی خەڵکەکەی و کارکردن بۆ گەیاندنی هاوکارییە مرۆییەکان و باشترکردنی ناوەندە تەندروستییەکان لە کەرتەکەدا.
لای خۆیەوە، ئەحمەد زاهد حەمیدی سڵاو و رێزی سەرکردایەتیی مالیزیا و پێزانینیانی بۆ سەرۆک کۆمار گەیاند، و شانازیی مالیزیاشی بەو پەیوەندییانەی کە لەگەڵ عیراقدا هەیەتی دەربڕی، لەگەڵ خواستی راستگۆیانە بۆ پەرەپێدانی رێڕەوەکانی هاریکاریی دوولایەنە بەشێوەیەک کە خزمەت بە بەرژەوەندیی هەردوو گەلی دۆست بکات
سبەی، دووشەممە، کۆتا وادەیە بۆ پڕکردنەوەی فۆرمی بەئەلیکترۆنیکردنی پسوڵەی خۆراک و تا ئێستا وەزارەتی بازرگانیی عیراق هیچ بڕیارێکی بۆ درێژکردنەوەی ماوەکە دەرنەکردووە.
سەرەڕای ئەوەی هەزاران خێزان تا ئێستا فۆرمەکەیان پڕنەکردووەتەوە، بەڵام ماوەکە وەک خۆی ماوەتەوە. پێشتر داواکاری ئاڕاستەی وەزارەتی بازرگانیی عێراق کرابوو بۆ درێژکردنەوەی وادەکە، بەڵام تا ئەم ساتە هیچ وەڵامێکی رەسمی نەدراوەتەوە.
بەپێی زانیارییەکانی کوردسات نیوز؛ لە دوای ئەم بەروارە هەر خێزانێک بیەوێت ئەو فۆڕمە پڕبکاتەوە دەبێت 11هەزار بدات.
ئاراس محەمەد، بەڕێوەبەری پسوڵەی خۆراك لە سلێمانی بە كوردسات نیوزی راگەیاند، تاوەكو ئێستا %85ی هاووڵاتیانی سنوری سلێمانی فۆڕمەكەیان پڕكردووەتەوە و داوایان لێدەكەن، پەلە بكەن لە پڕكردنەوەی فۆڕمەكەدا، چونكە دڵنیا نین كە حكومەتی عیراق جارێكی دیكە وادەكە درێژ دەكاتەوە یان نا.
ئەنجومەنی کۆمیسیاران لە کۆمیسیۆنی باڵای سەربەخۆی هەڵبژاردنەکانی عیراق، بڕیاریدا بە دوورخستنەوەی "راکان سەعید عەلی_راکان جبوری" بەهۆی پێشێلکردنی یاسای هەڵبژاردنەکانەوە لە لیستی ناوی پاڵێوراوان.
بەپێی نووسراوێکی رەسمی، کە ئەمڕۆ یەکشەممە، بە ئیمزای ئەنجومەنی کۆمیسیاران دەرچووە، بڕیارەکە لەسەر بنەماو راسپاردەی "لیژنەی وردبینیی شایستەیی پاڵێوراوان" بووە.
هۆکاری دوورخستنەوەی "راکان سەعید عەلی" بۆ پێشێلکردنی ماددەی (حەوت/سێیەم)ی یاسای هەموارکراوی هەڵبژاردنی ئەنجومەنی نوێنەران و ئەنجومەنی پارێزگاکان، ژمارە (12)ی ساڵی 2018، دەگەڕێتەوە.
هەر لە بڕیارەکەدا، کۆمیسیۆن ئیدارەی هەڵبژاردنی راسپاردووە بۆ گرتنەبەری رێکاری پێویست و بڵاوکردنەوەی بڕیارەکە لە ماڵپەڕی رەسمی خۆی. ئاماژەی بەوەشداوە بڕیارەکە بە کۆی دەنگی ئەندامانی ئەنجومەنی کۆمیسیاران پەسەندکراوە.