جیهان
پەرلەمانی فەرەنسا بە زۆرینەوەی دەنگ متمانەی لە حكومەتی ئەو وڵاتە وەرگرتەوە و ئەمشەو سەرۆك وەزیرانی نامەی دەستلەكاركێشانەوەی پێشكەش دەكات.
پەرلەمانی فەرەنسا لە دانیشتنێكی تایبەت و یەكلاكەرەوەدا وەرگرتنەوەی متمانەی لە فراسوا بایرۆ، سەرۆك وەزیرانی ئەو وڵاتە خستە دەنگدانەوە و دواتر بە زۆرینەی دەنگ متمكانەی لێوەرگیرایەوە.
بوریس فالود سەرۆكی كوتلەی ئیشتراكی كە خاوەنی 290 كورسییە لە كۆی 570 كورسی پەرلەمان، لە دوای دەنگدانەكە رایگەیاند، ئامادەن دەسەڵات بگرنەدەست ئەگەر ئیمانوێل ماكرۆن سەرۆكی وڵاتەكە داوایان لێبكات و دەتوانن بەزووترین كات حكومەتێكی نوێ پێكبهێنن.
بایرۆ ماوەی نۆ مانگە لە دەسەڵاتدایە و ئۆپۆزسیۆن بە لاواز و گوێڕایەڵی كۆشكی ئێلیزێ و هۆكاری قوڵبوونەوەی قەیرانەكان تۆمەتباری دەكرد.
لە ئێستادا ماكرۆن لەبەردەم دوو بژاردەدایە، بژاردەی یەكەم دۆزینەوەی كەسێكە بۆ پێكهێنانی حكومەت، بژاردەی دووەمیش ئەوەیە كە ماكرۆن پەنا بباتە بەر هەڵوەشاندنەوەی پەرلەمان و بانگەواز بۆ هەڵبژاردنی پێشوەختەی پەرلەمان بكات، ئەوەش بە بژاردەیەكی قورس بۆ ئێستای ئەو وڵاتە دادەنرێت.
روسیا ڤاكسینێكی نوێی شێرپەنجەی بەناوی ئینترۆمێكس بەرهەمهێناوە و بڕیاریشە ساڵی داهاتوو بەكاربهێنرێت.
لێپرسراوانی تەندروستی روسیا رایانگەیاندووە، ڤاكسینەكە وەك چارەسەر بەكاردەهێنرێت بۆ راهێنانی سیستمی بەرگری لەشە بۆ ناسینەوە و لەناوبردنی خانە شێرپەنجەییەكان، وەك جێگرەوەی چارەسەری كیمیایی دروستكراوە، تێچووەكەشی بۆ هەر كۆرسێك نزیكەی دووهەزار دۆلاری ئەمریكییە، لەبەر ئەوە حكومەت بڕیاری داوە لە نەخۆشخانەكانی روسیادا بە بێبەرانبەر بەردەستبێت.
دەزگای پزیشكی و بایۆلۆژی فیدراڵی روسیاش بڵاویكردەوە، ڤاكسینەكە پێشتر لەسەر 48 كەس تاقیكراوەتەوە و ئەنجامەكەی بەرێژەی 100% سەركەوتوو بووە و لە ساڵی ئایندەدا بە رەسمی مۆڵەتی بەكارهێنانی ڤاكسینەكە لە نەخۆشخانەكانی روسیادا دەدرێت، هەروەها ڤاكسینەكە یەكەمجار بەو كەسانە دەدرێت كە دووچاری شێرپەنجەی كۆڵۆن بوون.
ئاژانسی نێودەوڵەتی وزەی ئەتۆم رایگەیاند، هیوادارن لە چەند رۆژی داهاتوودا لە دانوستانەکانیان لەگەڵ ئێران، سەبارەت بە پرسی ئەتۆمی بگەنە رێککەوتن.
رافایل گرۆسی بەڕێوەبەری گشتی ئاژانسی نێودەوڵەتی وزەی ئەتۆم لە کۆبوونەوەی ئاسایی ئەندامانی دەستەی ئاژانسەکە لە ڤیەننا رایگەیاند، هیوادارن لە رۆژانی داهاتوودا لەگەڵ دەسەڵاتدارانی ئێران بگەنە رێککەوتن بۆ دەستپێکردنەوەی دانوستانەکان و ئاسانکاری بۆ کارە پێویستییەکانی ئاژانسەکەیان لەگەڵ تاران.
لە بەرانبەردا ئیسماعیل بە قائیی وتەبێژی وەزارەتی دەرەوەی ئێران ئاشکرایکرد، دانوستانەکانیان لەگەڵ ئاژانسی وزەی ئەتۆم بەشێوەیەکی ئەرێنی بەرەوپێش دەچێت.
ئاماژەی بەوەشکرد، تاران چاوەڕوانی راپۆرتێکی دادپەروەرانەی دەکر، کە راستییەکانی هێرشەکانی سەر دامەزراوە ئەتۆمییە ئاشتیخوازەکانی ئێران لەبەرچاو بگرێت.
بەقائیی ئەوەشی خستەڕوو، رداوی هێرشکردنە سەر دامەزراوە ئەتۆمییەکان ترسناک و بێ وێنەبوو، دەبوایە ئاژانسەکە هەڵوێستی خۆی لەسەر ئەو هێرشانە دیاری بکات.
دۆناڵد ترەمپ رایگەیاند، ئەمڕۆ و سبەینێ سەركردەكانی ئەوروپا بەمەبەستی گفتوگۆی كۆتاییهێنان بە جەنگی روسیا و ئۆكراین سەردانی ئەمریكا دەكەن.
دۆناڵد ترەمپ سەرۆكی ئەمریكا رایگەیاند، ئەمڕۆ دووشەممە و سبەینێ سێشەممە، سەركردەكانی ئەوروپا دێنە ئەمریكا بەمەبەستی گفتگۆی كۆتاییهێنان بە جەنگی نێوان روسیا و ئۆكراین، وتیشی، بەمزووانە قسە لەگەڵ ڤلادیمێر پوتنی سەرۆكی روسیا دەكات تایبەت بەو پرسە.
سەرۆكی ئەمریكا خەمباری خۆی لەبارەی ئەو هێرشە ئاسمانییە توندەی دوێنێ روسیا بۆسەر ئۆكراین ئەنجامی دا دەربڕی و رایگەیاند، دڵخۆش نیم بەو دۆخە و بەو شتانەی لەوێ روودەدەن.
ئەوەش لەكاتێكدایە، دوێنێ یەكشەممە، روسیا هێرشێكی ئاسمانی توندی بۆسەر ئۆكراین ئەنجامدا كە بە گەورەترین هێرشی روسیا دادەنرێت لەماوەی دەستپێكردنی جەنگەوە تاوەكو ئێستا و تیایدا 800 فڕۆكەی بێفڕۆكەوان و موشەكی بەكارهێنا.
لەلایەكی دیكەوە ڤۆلۆدیمێر زیلینسكی سەرۆكی ئۆكراین رایگەیاند، پوتن ئەوە بە سەركەوتن دەزانێت كە سەرجەم خاكی ئۆكراین داگیربكات، ئەگەر ئەوەی بەدیهێنا ئەوا سەركەوتن بۆ ئەوە، بەڵام تاوەكو ئەوە بەدی نەهێنێت، سەركەوتن بۆ ئۆكراینە.
سبەینێ هەڵبژاردنی پەرلەمانی نەرویج بەڕێوەدەچێت، ژمارەیەك كوردیش كاندیدن بۆ پەرلەمانی ئەو وڵاتە.
بڕیارە سبەینێ هەڵبژاردنی پەرلەمانی نەرویج، لە تەواوی ناوچەكانی ئەو وڵاتە بەڕێوەبچێت و هەشت كوردیش لە حزبی سور و سۆسیال چەپ و پارێزگاران كاندیدن.
پەرلەمانی نەرویج لە 169 كورسی پێكهاتووە، 18 حزبی سیاسیش لە 19 بازنەی هەڵبژاردن كێبڕكێ دەكەن بۆ بەدەستهێنانی زۆرترین كورسی پەرلەمان.
سەرۆك وەزیرانی ژاپۆن دەستلەكاركێشانەوەی لە پۆستەكەی راگەیاند لەسەر داخوازی حیزبەكەی.
میدیاكانی ژاپۆن ئاشکرایانکرد، كە شیگێروو ئیشیبا، سەرۆك وەزیرانی ژاپۆن رایگەیاندووە، كە دەستلەكارەكەی دەكێشێتەوە وەكو سەرۆك وەزیران، لە دوای ئەوەی حیزبەكەی داوایان لێكرد بەرپرسیاریەتی دۆڕاندنی هەڵبژاردنی پەرلەمانی ژاپۆن بگرێتە ئەستۆ، كە لە مانگی تەموزی ئەمساڵدا ئەنجامدرا و پارتی لیبڕاڵ دیموكراتی سەرۆك وەزیران شكستیان هێنا لە بەدەستهێنانی زۆرینەی دەنگەكان.
بۆ ماوەی مانگێكە شیگێروو ئیشیبا بەرهەڵستی ئەو فشارانە دەكاتە كە لەلایەن ئەندامانی حیزبەكەیەوە ئاڕاستەی دەكرێت بەڵام لە كۆتاییدا بڕیاریدا دەستبەرداری پۆستەكەی ببێت.
دەستلەكاركێشانەوەی سەرۆك وەزیرانی ژاپۆن، رۆژێك پێش كۆبونەوەی حیزبەكەی دێت كە تیایدا بڕیار لەسەر ئەوە دەدرێت كە هەڵبژاردنی پێشوەختە بكرێت بۆ دوبارە هەڵبژاردنەوەی سەرۆكی حیزب یاخود نا، كە لە ئێستادا شیگێروو ئیشیبا خۆی سەرۆكایەتی حیزبەكەی دەكات.
حكومەتی ئەڵمانیا بە نیازە دیپۆرتكردنەوەی پەنابەران زیاد بكات.
میدیاكان بڵاویانكردەوە، حكومەتی ئەڵمانیا بەردەوامە لە گرتنەبەری رێكاری نوێ بەتایبەت لە شاری دوسڵدۆرف، بەجۆرێك كە لە فڕۆكەخانەی ئەو شارە لە ساڵی 2024 دا زیاتر لە دوو هەزار و 800 كەسی دیپۆرتكردوەتەوە.
ئاماژەیان بەوەشكردووە، ئەمساڵیش ژمارەكە لە بەرزبوونەوەدایە بەجۆرێك كە تەنیا لە نیوەی یەكەمی ئەمساڵدا، تائێستا 12 هەزار كەس دیپۆرتكراونەتەوە.
راشیانگەیاند، ئەڵمانیا لەگەڵ وڵاتانی تر رێكارەكانیان زیاتر كردووە و لە مانگی تەمموزدا كۆبوونەوەیەك لەگەڵ نەمسا و دانیمارك و فەڕەنسا و چیك و پۆڵەندا كراوە و لە یەكەم هەنگاودا پەنابەرە ئەفغانییەكان دیپۆرت دەكاتەوە.
ئەوەش لەكاتێكدایە، وەزارەتی ناوخۆیی ئەڵمانیا رایگەیاند، لە دوای روخانی ئەسەدەوە هەزار و 867 سوری گەڕاونەتەوە وڵاتەكەیان و لە بەرامبەردا بڕێك هاوكارییان پێشكەش كراوە.
لە سەرەتای دەستپێکردنی جەنگەوە، روسیا گەورەترین هێرشی بۆسەر ئۆکراین ئەنجامدا و باڵەخانەی سەرۆکایەتی وەزیرانی ئەو وڵاتەی لە کیێڤ بە ئامانج گرت.
لێپرسراوانی ئۆکراین رایانگەیاند، ئەمڕؤ یەکشەممە روسیا گەورەترین هێرشی بۆ سەر ئۆکراین ئەنجامدا، کە چەندین درۆن و موشەکی لەو هێرشەدا بەکارهێناوە.
ئاماژەیان بەوەشکردووە، لە هێرشەکەدا باڵەخانەی حکومەتی وڵاتەکەیان بە ئامانج گیراوە و سێ گیانیان لەدەستداوە.
لەلای خۆشیەوە یولیا سڤێریدنکۆ سەرۆک وەزیرانی ئۆکراین رایگەیاند، باڵەخانەی حکومەتەکەی زیانێکی زۆری بەرکەوتووە و تا ئێستاش ئاگر لە باڵەخانەکە کەوتووەتە و کۆنتڕۆڵنەکراوە.
هاوکات، هێزی ئاسمانی ئۆکراین ئاشکرایکردووە، روسیا لەو هێرشە گەورەیەی کە لەماوەی یەک شەدا ئەنجامی داوە، 805 فڕۆکەی بێفڕۆکەوان و 13 موشەکی ئاراستەی وڵاتەکەی کردووە، راشیگەیاندووە، یەکەکانی بەرگری ئاسمانی ئۆکراین، 751 فڕۆکەبێفڕۆکەوان و چوار موشەکیان خستوەتەخوارەوە.
ئەمەش لە کاتێکدایە، هەردوو سەرۆکی روسیا و ئۆکراین بانگهێشتی یەکتری دەکەن بۆ پایتەختی وڵاتەکەیان بە مەبەستی ئەنجامدانی گفتوگۆ بەمەبەستی گەیشتن بە ئاشتی و کۆتایی هێنان بە جەنگ.
سەرۆكی سندوقی وەبەرهێنانی روسیا رایگەیاند، بەهۆی دانوستانەكانی ئەمریكا و روسیا ئاشتی لە ئۆكراین نزیكە.
كیریل دیمیتریڤ سەرۆكی سندوقی وەبەرهێنانی روسیا لە ئێكسێكدا نوسیویەتی، بەهۆی گفتوگۆی نێوان دۆناڵد ترەمپ، سەرۆكی ئەمریكا و ڤلادیمێر پوتن، سەرۆكی روسیا یەكلاییكردنەوەی ململانێكانی ئۆكراین بەرەوە كۆتایی دەروات و لە ئاشتی نزیكبووەتەوە.
دیمیتریڤ ئاماژەی بەوەشدا كە هەوڵەكان بۆ فشار خستنە سەر مۆسكۆ لەرێگەی سەپاندنی سزاوە شكستی هێناوە، بەڵكو دەتوانرێت لە رێگەی گفتوگۆ و ڕێزگرتن لە یەكترەوە چارەسەری ئەو ململانێیە بكرێت.
پێشتریش، دیمیتریڤ جەختی لەوە كردبووەوە كە سەرۆكی روسیا و هاوتا ئەمریكییەكەی ڕێگری لە سەرهەڵدانی جەنگی جیهانی سێیەم دەكەن.
ئەمە لە كاتێكدایە، كە پوتن و ترەمپ لە كۆبوونەوەكەیاندا كە لە 15ی ئاب لە ئەلاسكا بەرێوەچوو، باسیان لە ڕێگاكانی چارەسەركردنی كێشەی ئۆكراین كرد و هەروەها هەردوو سەركردە كۆبوونەوەكەیان بە ئەرێنی وەسف كرد.
هەزاران كەس لە واشنتۆن دژی سیاسەتەكانی سەرۆكی ئەمریكا خۆپیشاندانیان كرد و دروشمیان دژی دۆناڵد ترەمپ وتەوە.
بە بەشداریی هەزاران كەس لە واشنتۆن رێپێوان و خۆپیشاندانێكی فراون بەڕێوەچو و رێكخراوی ئاشتی ئەمریكاش رایگەیاند، كار دەكەن بۆ خۆپیشاندانی سەرتاسەریی دژی سیاسەتەكانی دۆناڵد ترەمپ ، سەرۆكی ئەمریكا .
لە خۆپیشاندانەكەی واشنتۆندا دژی گۆڕینی ناوی وەزارەتی بەرگریی بۆ وەزارەتی جەنگ دروشم وترایە و خۆپیشاندەران رایانگەیاند، ترەمپ ناتوانێت لە رێگەی سەربازییەوە ویلایەتەكەیان داگیر بكات.
تەلەفیزیۆنی سی ئێن ئێن ئاماژەی بەوەكردوە سەرەڕای ئەوەی خۆپیشاندەران ئامانجی سەرەكییان دژایەتی سیاسەتەكانی ترەمپ بووە، بەڵام دروشم بۆ پشتیوانی لە غەززە و كۆچبەران بە تایبەت كۆچبەرانی ئەمریكا وتراوەتەوە.
وەزیری دەرەوەی ئێران رایگەیاند، دەبێت رێز لە ماف و بەرژەوەندییەكانی ئێران بگیرێت و هەر كاتێك ئەمریكا رێزی لە بەرامبەرەكەی گرت ئامادەن بۆ دانوستان.
عەباس عراقچی وەزیری دەرەوەی ئێران لە میانی كۆنفرانسی نیشتمانیی تواناكانی وەبەرهێنان لە ناوچە ئازاد و بازرگانییەكانی ئێران رایگەیاند، ئەو ڕۆژەی واشنتن ئامادە بێت بۆ دانوستان لەسەر بنەمای رێزگرتنی بەرامبەر، ئەوانیش ئامادەن بۆ دانوستان.
دەشڵێت، وڵاتانی ترۆیكا هەڵەیەكی گەورەیان كرد لەبارەی چالاككردنی سزاكان، ئەمەش كارەكانی قورستر كردووە و دانوستانەكان بەردەوامن بەو هیوایەی بگەینە لێكگەیشتنێكی هاوبەش.
وتیشی، پەیوەندییەكانیان لەگەڵ ئاژانسی نێودەوڵەتی وزەی ئەتۆمی دوای هێرشەكەی سەر بنكە ئەتۆمییەكان تێكچووە و وەك جاران نەماوە.
بەهۆی زیادبوونی پێناسی گومرگی لەسەر کاڵای هاوردە، نزیکەی 90 وڵاتی جیهان گواستنەوەی پۆستەیان بۆ ئەمریکا سنوردار یاخود راگرتووە.
ماساهیکۆ میتۆکی بەڕێوەبەری گشتی یەکێتی پۆستەی جیهانی رایگەیاند، بەهۆی زیادبوونی پێناسی گومرگی لەلایەن ئەمریکاوە، 88 وڵاتی جیهانی گواستنەوەی پۆستەیان بۆ ئەمریکا بەشێوەیەکی تەواوەتی یاخود بەشێوەیەکی سنوردار راگرتووە.
ئاماژەی بەوەشکرد، لەئێستادا لە هەوڵدان بۆ دۆزینەوەی چارەسەرێکی تەکنیکی نوێ بۆ دەستپێکردنەوەی گواستنەوەی پۆستە بۆ ئەمریکا.
ئەوەش دوای ئەوەدێت ، کە دۆناڵد ترەمپ سەرۆکی ئەمریکا بڕیاریدا بە هەڵوەشاندنەوەی رێککەوتنی بازرگانی دی مینیمێست، کە لێخۆشبوونی پێناسی گومرگی بۆ سەرجەم ئەو پۆستانە دەردەکرد کە نرخەکانیان لە خوار 800 دۆلارەوەبوون .
گرنگترین ئەو وڵاتانەی کە گواستنەوەی پۆستەیان بۆ ئەمریکا سنوردار یاخود راگرتووە بریتین لە، بەلجیکا، دانیمارک، فەرەنسا، ئەڵمانیا، یۆنان، هیندستان، ئیتاڵیا، ژاپۆن، لیتوانیا، نەرویج، پۆڵەندا، پورتوگال، سەنگافورە، کۆریای باشوور، ئیسپانیا، سوید، سویسرا، تایوان، و تایلەند.
سەرۆكی ئەمریكا رایگەیاند، واشنتۆن دەچێتە دانوستانێكی ئاڵۆزەوە لەگەڵ بزوتنەوەی حەماس و داواشیكرد، بزوتنەوەكە سەرجەم بارمتەكان ئازاد بكات.
دۆناڵد ترەمپ سەرۆكی ئەمریكا رایگەیاند، واشنتۆن دەستدەكات بە دانوستانێكی ئاڵۆز لەگەڵ بزوتنەوەی حەماس و ئەگەر ئەوان بەردەوام بن لەسەر درێژەدان بە بارمتەگرتنی ئیسرائیلییەكان، رەوشەكە دژوار و ئاڵۆزتر دەبێت.
وتیشی، بە حەماسی وتووە سەرجەم بارمتەكان ئازاد بكات و ئەگەر ئەوان ئەو هەنگاوە بنێن، گفتوگۆ لەسەر كاری باشتر دەكات لەگەڵ حەماسدا، بەڵام ئێستا ئەو بزوتنەوەیە ئێستا داواكاری نوێی هەیە و چاوەڕێی دوایین داواكارییانن.
وتیشی، حەماس 50 بارمتەی لەلایە و پێی وایە تەنها 20 كەسیان لە ژیاندا ماون و خۆپیشاندانی ئیسرائیلییەكانیش بۆ فشار خستنەسەر حكومەتی ئیسرائیل رەوشێكی ئاڵۆز بۆ ناتانیاهۆ دێنێتە ئاراوە.
ڤۆلۆدیمیر زیلێنسکی، سەرۆکی ئۆکراین، پێشنیازێکی ڤلادیمیر پوتنی سەرۆکی روسیای، بۆ ئەنجامدانی دانوستان لە مۆسکۆ رەتکردەوە و لە بەرامبەردا رایگەیاند کە پوتن دەتوانێت بێت بۆ کیێڤ.
رۆژی هەینی، ڤلادیمێر زیلێنسکی، سەرۆکی ئۆکراین پێشنیازەکەی ڤلادیمێر پوتنی سەرۆکی روسیای بۆ سەردانیکردنی مۆسکۆ بە مەبەستی گفتوگۆکردن لەسەر چارەسەرێکی دیپلۆماسی رەتکردەوە.
زیلێنسکی لە چاوپێکەوتنێکدا لەگەڵ مارسا راداتز، پەیامنێری تۆڕی "ئەی بی سی نیوز"ی ئەمریکی، بۆ یەکەمجار باسی لەو پێشنیازە کرد.
زیلێنسکی لە وەڵامدا وتی: "ئەو (پوتن) دەتوانێت بێت بۆ کیێڤ. من ناتوانم سەردانی مۆسکۆ بکەم لە کاتێکدا وڵاتەکەم رۆژانە رووبەڕووی بۆردومانی مووشەکی دەبێتەوە. ناتوانم بچمە پایتەختی ئەو تیرۆریستە".
هەروەها وتی: "پوتن لەمە تێدەگات".
چاوپێکەوتنەکە لە شوێنی کارگەیەکی ئەمریکی لە رۆژئاوای ئۆکراین ئەنجامدرا، کە بەم دواییانە کرابووە ئامانجی هێرشێکی مووشەکی روسیا.
سەرۆکی ئۆکراین جەختی لەوە کردەوە کە پوتن بە راستی بەدوای کۆبونەوەدا ناگەڕێت لە کاتێکدا بەردەوامە لە شەڕەکەی لە ئۆکراین. ئەو وتی کە پێشنیازەکەی پوتن تەنها ئامانج لێی "دواخستنی کۆبوونەوەکە" بووە و دووپاتیکردەوە کە خۆی ئامادەیە بە هەموو شێوەیەک کۆببێتەوە.
زیلێنسکی رونیکردەوە کە پوتن "یاری لەگەڵ ویلایەتە یەکگرتووەکان دەکات" و وتی: "ئەگەر کەسێک نەیەوێت لە کاتی شەڕدا کۆببێتەوە، بێگومان دەتوانێت شتێک پێشنیار بکات کە نە لەلایەن من و نە لەلایەن کەسانی ترەوە قبوڵکراو نییە".
ئەمە لە کاتێکدایە کە پێشتر، سەرۆک پوتن لە میانی کۆڕبەندی ئابووریی رۆژهەڵات لە ڕۆژی هەینیدا، ئامادەیی خۆی بۆ کۆبوونەوە لەگەڵ زیلێنسکی لە بەرزترین ئاستدا راگەیاندبوو و وتبووی: "ئەگەر سەرکردایەتیی ئۆکراین جددییە لە خواستی بۆ دانوستان، با بێن بۆ مۆسکۆ، ئێمەش %100 گەرەنتیی ئاسایشیان بۆ دابین دەکەین".
پوتن جەختی لەوەش کردبووەوە کە روسیا ئامادەیە گەرەنتیی ئەمنی تەواو پێشکەش بە زیلێنسکی و شاندی یاوەری بکات ئەگەر بڕیاریاندا بێن بۆ پایتەختی روسیا.
پارێزەرێک لە ئەمریکا سکاڵای یاسایی لەسەر خاوەنی دامەزرێنەری کۆمپانیای مێتا تۆماردەکات، کە بەهۆی ناوەکەیەوە چەندین جار هەژمارەکانی داخراون.
مارک زوکەربێرگ پارێزەرێکی ئەمریکییە سکاڵای یاسایی لەسەر مارک زوکەربێرگی خاوەنی کۆمپانیای مێتا تۆمارکرد، دوایی ئەوەی چەند هەژمارێکی لە تۆڕی کۆمەڵایەتی فەیسبووک، بەهۆی ناوەکەیەوە داخراوە.
مارک زوکەربێگری پارێزەر رایگەیاندووە، لەماوەی هەشت ساڵی رابردوودا پێنج جار هەژمارەکانی داخراوە، کە کارە بازرگانییەکانی تێدا ئەنجامدەدا، بەهۆشیەوە چەندین هەزار دۆلار زیانی بەرکەوتووە.
زوکەربێرگی پارێزەر ئاماژەی بەوەشکردووە، رەنگە کەس ئەوە نەزانێت، بەڵام چەندین کەس هەمان ناوی خاوەنی کۆمپانیای مێتایان هەیە، بەنمونە پارێزەرێکی مایەپووچ کە ویلایەتی ئیندیانا دەژی، بەهۆی ناوەکەیەوە ئازارێکی زۆر دەچێژێت، چونکە ئەو پارێزەرە مایەپووچ بووە، زوکەربێرگی خاوەنی کۆمپانیاکەش یەکێکە لە دەوڵەمەندەکانی جیهان.
جێگەی ئاماژەیە پارێزەرەکە لەرێگەی هەژماری فەیسبووکەوە کاری ناساندن و پەیوەندیکردن لەگەڵ کڕیارەکان و بریکارەکان ئەنجامدەدات، بەڵام بەهۆی کۆمپانیای مێتاوە لەساڵانی رابردوودا چەندین جار رووبەڕووی زیانی ئابوری بوونەتەوە.
هاوکات، ئەو پارێزەرە زیاتر لە 11 هەزار دۆلاری لە رێکلام کردن لە پەیج و پلاتفۆڕمەکانی مێتا خەرجکردووە.
هەروەها پارێزەرەکە ئەوەشی خستوەتەڕوو، دەبێت شەوانە مۆبایلەکەی بکوژێنێتەوە، چونکە بەردەوام لە رێگەی مەسنجەرەوە هەڕەشەی کوشتن و هەراسانکردنی لێدەکرێت، وا دەزانرێت ئەو بە بەڕێوەبەری جێبەجێکاری کۆمپانیای مێتایە.