ئەمریكا فشار لە روسیا و ئەوروپا دەكات دەسپێشخەری بكەن بۆ كۆتاییهێنان بە شەڕی ئۆكراین.

 جەی دی ڤانس جێگری سەرۆكی ئەمریكا لە میانی بەشداریكردن لە كۆنفرانسی ئاسایشی میونشن رایگەیاند، زەمینەیەكی لەبار هەیە بۆ یەكلاكردنەوەی گرژییەكانی نێوان روسیا و ئۆكراین.

وتیشی، دەزانن كە سەركردەكانی ئەوروپا لەبارەی شەڕی ئۆكراینەوە نیگەرانن و هەوڵ دەدەن خەرجییە سەربازییەكانیان بۆ پاراستنی ئاساییشی ئەوروپا زیاتر بكەن.

جەی دی ڤانس ئاماژەی بەوەشكرد، هۆشدارییان بە مۆسكۆ داوە هەنگاو بەرەو ئاشتی لەگەڵ كیێڤ بنێت، ئەگەرنا ئەمریكا دەتوانێت رێكاری سەربازی بەرانبەر روسیا بگرێتەبەر و سزای ئابووری بەسەر مۆسكۆدا بسەپینێت.

دەم پارتی چوار خاڵ بۆ چارەسەریی پرسی كورد دەخاتەڕو و داوا دەكات توركیا لە ناوخۆدا بە دیموكراسی و لە رۆژهەڵاتی ناوەڕاستیشدا بە گفتوگۆ لە جیاتی شەڕ، دەست لە سیاسەتی لەناوبردنی كورد هەڵبگرێت. 

پارتی یەكسانی و دیموكراسیی گەلان دەم پارتی لە راگەیەنراوێكدا بۆ پڕۆسەی چارەسەریی لە توركیا چوار خاڵی خستوەتەڕو و لە یەكەم خاڵدا جەختی لەسەر ئەوە كردوەتەوە كە بۆ چارەسەری ئاشتیانی پرسی كورد پێویستە عەبدوڵا ئۆجەلان، رێبەری زیندانیكراوی پارتی كرێكارانی كوردستان پەكەكە  ئازاد بركرێت.

لە دووم خاڵی راگەیەنراوی دەم پارتیدا هاتوە پێویستە پەیمانێكی نوێی كۆمەڵایەتی و سیاسیی لە توركیا وەك دڵنیایی بۆ پاراستنی دیموكراسی و مافەكانی كورد مسۆگەر بكرێت و لە خاڵێ سێهەمیشدا داواكراوە كورد و عەرەب و ئەرمەنی و سەرجەم پێكهاتەكانی باكوری كوردستان و توركیا مافەكانیان وەك هاوڵاتییەكی ئەو وڵاتە بەشێوەیەكی دادپەروەرانە پارێزراو بێت و هیچ جیاوازییەك لە ناو پێكهاتەكاندا نەمێنێت.

دەم پارتی لە چوارەم خاڵی راگەیەنراوەكەیدا بۆ پڕۆسەی چارەسەریی جەختی لەوە كردوەتەوە كە پێویستە توركیا لە جیاتی جەنگ،، سیاسەتی گفتوگۆ و ئاشتیی لە رۆژهەڵاتی ناوەڕاست بگرێتەبەر و  نابێت بەردەوامبێت لە سیاسەتی رەتكردنەوە  و لەناوبردنی كورد لە ناوچەكەدا.

بانكی ناوەندی سوریا گەیشتنی بڕی 300 ملیار لیرەی سوری لە روسیاوە پشتڕاست دەكاتەوە.

بانكی ناوەندی سوریا بڵاویكردەوە، رۆژی هەینی لە رێگەی فڕۆكەخانەی نێودەوڵەتی دیمەشقەوە بڕی 300 ملیار لیرەی سورییان لە چاپی نوێ لە روسیاوە وەرگرتووە.

دەشڵێت، ئەو بڕەی بەدەستیان گەیشتووە بەشێكە لەو رێكکەوتنەی پێشووتر لەنێوان رژێمی سوریا و روسیادا ئیمزا كراوە.

بانكەكە ئاماژەی بەوەشكردووە، بڕیار وابوو پارەكە پێش كۆتایی ساڵی رابردوو بگاتە دەستیان و بەپێی رێككەوتنەكە گوژمەی زیاتر لەو بڕەی ئێستا وەریانگرتووە ماوە بۆیان بنێردرێت كە بڕیارە لە داهاتوودا مۆسكۆ ئەوەش رەوانە بكات.

ئەمە لەكاتێكدایە كە پێشتر و بەپێی رێکكەوتنی نێوان بەشار ئەسەد و روسیا، لیرەی سوری لەو وڵاتە چاپدەكرێت و رەوانەكردنی ئەو پارانەش لەو چوارچێوەیەدایە.

حەماس رایگەیاند، چاوەڕێن رۆژی شەممە ئیسرائیل زیاتر لە 360 زیندانیكراوی فەلەستین لەبەرانبەر سێ بارمتە ئازاد بكات.

فەرمانگەی راگەیاندنی زیندانییەكانی فەلەستین بڵاویكردەوە، بەپێی رێكکەوتنی ئاگربەستی غەززە، چاوەڕێن ئیسرائیل رۆژی شەممە 36 زیندانیكراوی فەلەستینی كە بە زیندانی هەتاهەتایی سزادراون ئازاد دەكات، لەگەڵ 333 زیندانی كەرتی غەززە كە لەدوای 7 ی ئۆكتۆبەرەوە دەستبەسەر كراون ئازاد دەكرێن.

ئەمەش دوای ئەوە هات كە حەماس ناوی ئەو بارمتە ئیسرائیلیانەی ئاشكراكرد كە رۆژی شەممە لە چوارچێوەی رێككەوتنی ئاگربەستەكەدا ئازادیان دەكات.

ئەبو عوبێدە وتەبێژ بەناوی بزوتنەوەی حەماس رایگەیاند، رۆژی شەممە هەریەكە لە  ساگی دەكڵ چێن و یایر هۆرن هاووڵاتی ئیسرائیلی و ئەلێكساندەر توربانۆڤی روسی-ئیسڕائیلی ئازاد دەكەن.

پێشتر بەرپرسێكی ئیسرائیل رایانگەیاندبوو، ئەگەر حەماس رۆژی شەممە ئەو سێ بارمتە ئازاد بكات وەك ئەوەی لە رێككەوتنەكەدا بەڵێنی داوە، ئەوا تەلئەبیبیش ناگەڕێتەوە بۆ شەڕ و بەردەوامیش دەبێت لەسەر جێبەجێكردنی رێككەوتنەكە.

ئەمریكا ئامادەیی دەردەبڕێت بۆ وەرگرتنی هەر پێشنیازێكی عەرەبی سەبارەت بە داهاتووی غەززە و ئاوەدانكردنەوەی.

ماركۆ رۆبیۆ وەزیری دەرەوەی ئەمریكا رایگەیاند، بەو پێیەی زۆرێك لە وڵاتانی جیهان لە نێویاندا وڵاتانی عەرەبی پێشنیازەكەی دۆناڵد ترەمپ سەرۆكی ئەمریكایان سەبارەت بە ئاوەداكردنەوەی كەرتی غەززە رەتكردەوە، لە ئێستادا واشنتنن ئامادەیە بۆ وەرگرتنی پێشنیازی نوێ و باشتر سەبارەت بە داهاتووی ئەو كەرتە.

وتیشی، هیوادارن ئەوان بیرۆكەی باشیان هەبێت و جێگای سەرنجی تڕەمپ بێت.

رۆبیۆ راشیگەیاند، هەموو ئەو وڵاتانە باس لەوە دەكەن كە چەندە گرنگی بە فەڵەستینییەكان دەدەن، بەڵام هیچ كامیان ئامادەنین وەریانبگرن، هیچیشیان بۆ غەززە نەكردووە.

پیشتر، دۆناڵد تڕەمپ سەرۆكی ئەمریكا رایگەیاندبوو دانیشتوانی غەززە دەگوازیتەوە بۆ وڵاتانی دراوسێ بە تایبەتیش بۆ ئوردن و میسر، وتیشی، ئەگەر پابەند نەبن ئەوە هاوكاریەكانی وڵاتەكەی بۆ ئەو دوو وڵاتە رادەگرێت.

دۆناڵد تڕەمپ رایگەیاند، ھەفتەی داھاتوو، بەرپرسانی ئەمریکا و روسیا و ئۆکراین لە سعودیە، کۆدەبنەوە.

دۆناڵد تڕەمپ سەرۆکی ئەمریکا لە میانی دیداری لەگەڵ ناریندرا مۆدی سەرۆکوەزیرانی ھیندستان لە کۆشکی سپی بۆ رۆژنامەنووسان ئاشکرای کرد، ھەفتەی داھاتوو، بەرپرسانی ئەمریکا، روسیا و ئۆکراین لە سعودیە کۆدەبنەوە، بێ ئەوەی وردەکاری لەبارەی ناوەڕۆکی کۆبوونەوەکە بخاتە روو.

جەختی لەوەش کردەوە، پێویستە لە زووترین کاتدا، کۆتایی بە جەنگی نێوان روسیا و ئۆکراین بھێنرێت.

رۆژی چوارشەممەی رابردوو، تڕەمپ رایگەیاندبوو، بە جیا پەیوەندی تەلەفۆنی لەگەڵ سەرۆکی روسیا و سەرۆکی ئۆکراین ئەنجام داوە و تیایدا باسیان لە کۆتاییھێنان بە جەنگ کردووە.

وتیشی، "ئەوان ئاشتیی دەخوازن، منیش ئاشتیی دەخوازم، دەمەوێت کوشتنی مرۆڤەکان رابگرم".

لە شوباتی ساڵی 2022ـەوە جەنگی نێوان روسیا و ئۆکراین دەستی پێکردووە، سەرەڕای ئەوەی چەندین جار کۆمەڵگەی نێودەوڵەتی داوای کۆتاییهێنان بە جەنگی کردووە و چەندین سزا بەسەر روسیادا سەپێنراوە بۆ راگرتنی هێرشەکانی بۆسەر ئۆکراین، بەڵام هێستا جەنگ بەردەوامە و لەدوای بوونەوە بە سەرۆکی ئەمریکاش، دۆناڵد تڕەمپ هەوڵەکانی بۆ راگرتنی جەنگ چڕ کردووەتەوە.

لە ڤیدیۆیەکدا دەردەکەوێت، وەرزشەوانێک بە ئاستەم لە هێرشی نەهەنگێک رزگاری دەبێت.

روداوەکە لە چیللی رویداوە و وەک لە ڤیدیۆکەدا دەردەکەوێت، هێندەی نەماوە نەهەنگەکە قوتی بدات، بەڵام بەهۆی شەپۆلی ئاوەکەوە بەلەمەکەی دەجوڵێت و ناکەوێتە ناو دەمی نەهەنگەکەوە.

ئەدریان سیمانکاس ئەو وەرزشوانەیە کە روداوەکەی بەسەردا هاتووە و باس لەوەدەکات، "وا هەستم کرد دەمرم، پێم وابوو نەهەنگەکە قوتم دەدات".

کلیک لێرە بکە بۆ بینینی ڤیدیۆکە

بەهۆی گۆڕینی ناوی کەنداوی مەکسیک بۆ کەنداوی ئەمریکا، سەرۆکی مەکسیک هەڕەشە لە کۆمپانیای گوگڵ دەکات و دەڵێت، ئەگەر پێداگربن لەسەر ئەو ناوە، سکاڵایان لەسەر تۆمار دەکەین.

کلاودیا شینباوم سەرۆکی مەکسیک رایگەیاندووە، ئەگەر کۆمپانیای گوگڵ سووربیت لەسەر ئەوەی ناوی کەنداوی مەکسیک بە کەنداوی ئەمریکا ناو ببات، ئەوا سکاڵای یاسایی لەسەر کۆمپانیاکە تۆمار دەکەن.

ئەوەشی خستە روو، مەکسیک هێشتا دەسەڵاتی بەسەر بەشێکی گەورەی ئەو بەنداوەدا هەیە و دەشڵێت، "ئێمە سەروەریمان بەسەر کەناراوەکانی خۆماندا هەیە".

شینباوم راشیگەیاندووە، حکومەتی وڵاتەکەی نامەیەکیان بۆ کۆمپانیای گوگڵ ناردووە و ئاگاداریان کردوونەتەوە کە ناتوانن تەواوی کەنداوی مەکسیک بە کەنداوی ئەمریکا ناو ببەن.

باسی لەوەشکردووە، کەنداوی مەکسیک لە ساڵی 1607ـەوە لەلایەن نەتەوە یەکگرتووەکانەوە دانی پێدا نراوە.

دوای ئەوەی 24ی مانگی رابردوو، وەزارەتی ناوخۆی ئەمریكا بە رەسمی ناوی كەنداوی مەكسیكی بۆ كەنداوی ئەمریكا گۆڕی، رۆژی 9ی ئەم مانگە دۆناڵد تڕەمپی سەرۆکی ئەمریکا لەناو فڕۆکەکەیەوە کە بەسەر کەنداوەکەدا دەفڕی، ئیمزای لەسەر جێبەجێکردنی بڕیارەکە کرد، هەر لە هەمان رۆژدا، 9ی شوباتی بە رۆژی کەنداوی ئەمریکا ناساند.

دوێنێش، لەسەر هەریەک لە گوگڵ ماپ و گوگڵ ئێرز ناوەکەی گۆڕدرا.

سایتی ئەكسیۆس رایگەیاند، 145 ئەندامی كۆنگرێس نامەیەكیان ئاڕاستەی سەرۆكی ئەمریكا كردووە بۆ ئەوەی لە پلانی راگواستنی فەلەستنیەكان لە غەززە پاشگەزبێتەوە و پێیان وایە دۆستایەتی ئەمریكا و عەرەبەكان تێكدەدات.

سایتی ئەكسۆسی ئەمریكی رایگەیاند، 145 ئەندامی كۆنگرێس لە حزبی دیموكراتەكان نامەیەكیان ئاڕاستەی دۆناڵد ترەمپ سەرۆكی ئەمریكا كردووە لە بارەی راگواستنی فەلەستینیەكان لە غەززە و كۆنتڕۆڵكردنی لەلایەن ئەمریكاوە.

كۆنگرێسمانەكان لە نامەكەدا وتویانە، پلانەكەی ترەمپ نەك تەنیا لە رووی ئەخلاقییەوە رێگەپێدراو نییە، بەڵكو ناوبانگی ئەمریكا لە جیهاندا تێكدەدات و ئاستی تیرۆر و توندوتیژی بەرزدەكاتەوە.

ئاماژەشیان بەوەكردووە، پلانەكەی ترەمپ هەلی دۆستایەتی و ئاشتەوایی لەگەڵ وڵاتە عەرەبیە هاوبەشەكانیان تێكدەدات بۆ بنیاتنانەوە غەززە و ئاشتی لەگەڵ ئیسرائیل بەدینایەت.

پۆلیسی ئەڵمانیا رایگەیاند، لە شاری میونشنی ئەڵمانیا، ئۆتۆمبێلێک خۆی کردووە بەناو خۆپیشاندانی کۆمەڵێک کرێکاردا و بەهۆیەوە 28 کەس برینداربوون.

پۆلیسی ئەڵمانیا ئەوەی خستووەتە روو، بەهۆی هێرشەکەوە 28 کەس بریندار بوون، کە برینی دووانیان سەختە.

ئاماژەی بەوەشکردووە، شۆفێرەکە پەنابەرێکی ئەفغانی تەمەن 24 ساڵ بووە و پێشتریش بەهۆی تاوانی دزی و ماددەی هۆشبەرەوە دەستگیرکراوە، بۆیە گومان لەسەر ئەم هێرشەش هەیە.

رۆژنامەی وۆڵ ستیرت جۆرناڵ رایگەیاندووە، هەواڵگری ئەمریکا لە راپۆرتێکدا باسی لە ویستی ئیسرائیل کردووە، بۆ هێرشکردنە سەر دامەزراوە ئەتۆمییەکانی ئێران.

بەپێی هەواڵێکی رۆژنامەی وۆڵ ستریت جۆرناڵ  (WSJ)، دەزگای هەواڵگریی ئەمریکا راپۆرتی داوە لەبارەی خواستی ئیسرائیل و زانیاری ئەوەی تێدایە کە ئیسرائیل خۆی بۆ هێرشکردنە سەر ئێران ئامادە کردووە.

لە راپۆرتەکەدا ئاماژە بەوەشدراوە، ژێرخانی سەربازیی ئێران لاواز بووە و رەنگە چالاکییە سەربازییەکانی لە رۆژهەڵاتی ناوەڕاستدا زیاد بکات.

لە دووەم راپۆرتیشدا هەواڵگریی ئەمریکاوە ئەوەی خستووەتە روو، لە یەکەم رۆژەکانی سەرۆکایەتی دۆناڵد تڕەمپەوە، ئیسرائیل لە ئامادەکارییدایە و ئەگەری پشتیوانی ترەمپ بۆ هێرشەکە بەراورد بە بایدن بەرزترە.

ئەوەش هاتووە، لە هێرشەکەدا ئیسرائیل پێویستی بە پشتیوانی سەربازی و تەقەمەنی ئەمریکا دەبێت.

حکومەتی تاڵیبان دوای گرتنەدەستی دەسەڵات لە ئەفغانستان هەموو ئارایشگەکانی داخست، ئێستا بە نهێنی ژنان ئەو کارە دەکەن، بەڵام مەترسی هەیە.

ئەم هەواڵە لە بی بی سی وەرگیراوە

حکومەتی تاڵیبان دوای گرتنەدەستی حکوم لە ئەفغانستان، ئارایشگەکانی ژنانی لە وڵات داخست، ئەمەش بووە هۆکاری ئەویە کە ژمارەیەکی زۆر لە ژنان بۆ پەیداکردنی بژێوی ژیانیان بە نهێنی کارەکانیان بکەن.

ژمارەیەک لەو ژنانەی کە بە نهێنی کار دەکەن دەتوانن هەفتانە کار بۆ 20 کەس ئەنجام بدەن، هەروەها نزیکەی 300 دۆلار داهاتیان دەبێت.

کارکردن لە ئارایشگە نهێنییەکانی ئەفغانستاندا ترسناکە، هەندێک لە ژنان روبەڕوی مەترسی بونەتەوە.

ژنان لە ئەفغانستان تا پۆلی شەشی سەرەتایی مافی خوێندنیان هەیە، هەروەها رێکاری زۆر دەگیرێتە بەر بۆ هەر کارێک کە ژنان لە ئەفغانستان بیانەوێت ئەنجامی بدەن.

حکومەتی تاڵیبان دوای ساڵی 2021 حکومی ئەفغانستان دەکات و چەندین یاسای لە بواری ژناندا دەرکردووە، یەکێک لە یاساکان ئەوەیە کە ژنان تا پۆلی شەشی سەرەتایی دەتوانن بخوێنن، هەروەها یاسایەکی دیکەی ئەوەیە کە ئارایشگەکانی ژنان دەبێت دابخرێن و هەر کەسێکیش ئەو کارە بکات سزا دەدرێت.

دۆناڵد تڕەمپ رایگەیاند، لەگەڵ پوتین رێککەوتوون لەسەر دەستپێکی گفتوگۆ لەبارەی کۆتاییهێنان بە جەنگی ئۆکراین و پەیوەندی بۆ زیلیسنکیشەوە دەکات بۆ دەستپێکی ئەو هەنگاوە.

سەرۆکی ئەمریکا دۆناڵد ترەمپ رایگەیاند، لە پەیوەندییەکی تەلەفۆنی لەگەڵ ڤلادیمێر پوتین سەرۆکی روسیا رێککەوتوون لەسەر دەستپێکی گفتوگۆ لەبارەی کۆتاییهێنان بە جەنگی ئۆکراین. وتیشی، پەیوەندییەکی دوورودرێژ و ئەرێنییان ئەنجام داوە و زۆر بابەتیان هەڵسەنگاندووە.

تڕەمپ لە هەژماری تایبەتی خۆی لە تۆڕی کۆمەڵایەتیtruth  نووسیوێتی، "پێکەوە کارکردنی ئەمریکا و روسیا لە بەرژەوەندی هەردوو وڵاتدایە".

سەرۆکی ئەمریکا راشیگەیاندووە، "پێشەکی هەردووکمان لەسەر ئەوە کۆک بووین کە کۆتایی بێت بە جەنگی ئۆکراین کە دەبێتە هۆی کوژرانی ملیۆنان کەس. لەسەر ئەوەش رێککەوتین لەسەر بەردەوامی گفتوگۆکان و کۆبوونەوە لەگەڵ یەکتر. جگە لەوەش هەردوو لا رێککەوتین لەسەر ئەوەی کە (بۆ ڕاگرتنی جەنگ) دەستبەجێ دانوستانەکان دەست پێ بکاتەوە. بۆ ئاگاداری ئەو گفتوگۆیەش پەیوەندی بە ڤۆلۆدیمێر زیلینسکی سەرۆکی ئۆکراین دەکەم و زانیاری پێ دەدەم بۆ دەستپێکی ئەو هەنگاوە".

تڕەمپ ئەوەشی خستووەتە روو، لە دانوستانەکاندا هەریەک لە مارکۆ رۆبیۆ وەزیری دەرەوە، جۆن راکلیف سەرۆکی دەزگای هەواڵگریی ناوەندی ئەمریکا (CIA)، مایک واڵز راوێژکاری ئاسایشی نیشتمانی و ستیڤ ڤیتکۆڤ نوێنەری ئەمریکا بۆ کاروباری رۆژهەڵاتی ناوەڕاست بەشدار دەبن.

 دوای ئەوەی دۆناڵد تڕەمپ ئیمزای لەسەر جێبەجێکردنی بڕیاری گۆڕینی ناوی کەنداوی مەکسیک کرد، لە ئێستادا لەسەر هەریەک لە گوگڵ ماپ و گوگڵ ئێرز ناوەکەی گۆڕاوە.

دوای ئەوەی 24ی مانگی رابردوو، وەزارەتی ناوخۆی ئەمریكا بە رەسمی ناوی كەنداوی مەكسیكی بۆ كەنداوی ئەمریكا گۆڕی، رۆژی 9ی ئەم مانگە دۆناڵد تڕەمپی سەرۆکی ئەمریکا لەناو فڕۆکەکەیەوە کە بەسەر کەنداوەکەدا دەفڕی، ئیمزای لەسەر جێبەجێکردنی بڕیارەکە کرد.

تڕەمپ لە هەمان رۆژدا، 9ی شوباتی بە رۆژی کەنداوی ئەمریکا ناساند.

سەرۆکی ئەمریکا رۆژی 10ی مانگ، لەناو فڕۆکەدا بوو و لە رێگادا بوو بۆ بەشداریکردنی لە سوپەر بۆوڵی ئەمساڵ، رایگەیاند، گۆڕینی ناوی کەنداوی مەکسیک بۆ کەنداوی ئەمریکا شانازییەکی گەورە بۆ مێژووی ئەمریکا دەگەڕێنێتەوە.

وەزارەتی بەرگری سوریا یەکەم ئاهەنگی دەرچوونی سەربازیی بۆ زیاتر لە ٣٠٠ سەربازی سوپا لە شاری حەلەب رێکخست.

٣٠٠ کەس کە خوازیاری وەرگرتن بوون لە سوپای سوریادا، دوای مانگێک کۆتایی بە مەشق و راهێنانیان هات.

رێوڕەسمی کۆتاییهاتنی خولی سەربازیی بۆ یەکەمجار دوای ٦١ ساڵ لە دەسەڵاتدارێتی بەعسی سوریا لە گۆڕەپانی سەعدوڵلا ئەلجبووری لە حەلەب بەڕێوەچوو.

لە رێوڕەسمەکەدا جێگری پارێزگاری حەلەب و فەرماندە سەربازییەکانی ناوچەکە بەشدار بوون.

ماڵپەری بی بی سی بەریتانی بڵاوی کردەوە نزیکەی 200بۆمبی نەتەقیوی سەردەمی جەنگی جیهانی دووەم لە گۆڕەپانێکی یاریکردنی منداڵاندان دۆزرایەوە.

بەپێی هەواڵەکەی بی بی سی دەیان بۆمبی نەتەقیو کە مێژووەکەی  بۆ جەنگی جیهانی دووەم دەگەڕێتەوە لە ژێر گۆڕەپانێکی یاری منداڵان لە باکووری ئینگلتەرا دۆزراوەتەوە. 

لەو پارکەدا کە دەکەوێتە شاری وولەر لە ویلایەتی نۆرسەمبەرلاند بە دیاریکراوی 176 بۆمب دۆزرایەوە و گوماندەکرێت هی تریش بدۆزرێنەوە.

لە هەواڵەکەدا ئاماژە بەوەدراوە، پێدەچێت ناوچەکە وەک شوێنی راهێنانی پاسەوانی ناوخۆ بەکارهاتبێت و تەقەمەنییەکە لە کۆتایی جەنگی جیهانی دووەم لە ساڵی 1945دا شاردرابێتەوە.

ئەنجومەنی شارەکە، ئاماژەی بەوەداوە، " بیرکردنەوە لەوەی منداڵەکانمان لەو باخچەیەدا یارییان کردووە، ترسناکە"

لە ئێستادا ئەو پارکە بەشێکی زۆری پاککراوەتەوە و ئەگەر هەیە هیتریشی تێدابێت.