لە کۆنفرانسێکی ڕۆژنامەوانیدا عەبدولستار مەجید سەرۆکی لیژنەی کشتوکاڵ سەبارەت بە پەسەندکردنی پڕۆژە یاسای سەرپەرشتیکردنی پڕۆژە کشتوکاڵییەکان ڕایگەیاند، پڕۆژە یاساکە ڕێگەخۆشکەر دەبێت بۆ دابینکردنی ھەلیکار بۆ دەرچوانی کشتوکاڵ، بە تایبەت کە زۆرێک لە پڕۆژە کشتوکاڵییەکانیان سەرپەرشتیاریان نیە.

"بەشدار حەسەن" ئەندامی تیمی پارێزەرانی دەستگیرکراوانی بادینان بە کوردسات نیوزی ڕاگەیاند، ڕۆژی ٨ی تشرینی دووەمی ئەمساڵ دادگای دووی ھەولێر بە پێی ماددەی یەک لە یاسای ژمارە ٢١ی ساڵی ٢٠٠٣ی پەرلەمانی کوردستان، مەسعود شەنگالی بە زیندانیکردنی بۆ ماوەی سێ ساڵ و شەش مانگ و شێروان تەھاش دوو ساڵ و شەش مانگ سزادا.

بەشدار حەسەن وتیشی، بەھۆی ئەو گۆڕانکارییانەی لە دادوەر و سەرۆکی دادگای پێداچوونەوە کراوە و بەھۆی نەبوونی بەڵگەی پێویست بۆ سزادانیان ئەگەری ھەیە مەسعود شەنگالی و شێروان تەھا ئازاد بکرێن.

داواشی لە دادگای پێداچوونەوەی ھەرێمی کوردستان کرد بە وردی پێداچوونەوە بە بڕیارەکەی دادگای تاوانی دووی ھەولێر بکات و سزادراوان ئازاد بکات.

 قوباد تاڵەبانی جێگری سەرۆکی ئەنجومەنی وەزیران لەگەڵ "عەلی رەزا گوینەی" باڵیۆزی تورکیا لە عێراق کۆبووەوە،  لەو کۆبوونەوەیەدا کە "ھاکان راچای" کونسوڵی گشتی تورکیا لە ھەرێم ئامادەی بوو، ھەردوولا بە گرنگیان زانی ئاڕاستەی گفتوگۆکانی نێوان لایەنەکانی عێراق بۆ پێکھێنانی حکومەت لەرێی دیالۆگی بنیاتنەرەوە ئەنجام بدرێت ئەوەش لەپێناو ھێنانەکایەی حکومەتێکی خزمەتگوزار بۆ خزمەتکردنی ھاوڵاتیانی عێراق بەبێ جیاوازی.

ھەر لە کۆبوونەوەکەدا قوباد تاڵەبانی لەگەڵ باڵیۆزی تورکیا کۆک بوون لەسەر ئەوەی پێویستە پلانی ئەمنی تۆکمەتر دابڕێژرێت تا بوار نەھێڵێتەوە بۆ دزەکردنی تێرۆریستانی داعش، لەپێناو پاراستنی ئارامی ناوچەکەدا، لە کۆتایشدا، جەختکرایەوە لەسەر پێویستی پەرەپێدانی ئەو پەیوەندییانە لەرووی سیاسی و ئابورییەوە.

لەو بارەیەوە قوباد تاڵەبانی داوایکرد کۆمپانیاکانی تورکیا رۆڵی خۆیان ببینن لەپرۆسەی ئاوەدانکردنەوە و بەھێزکردنی ژێرخانی ئابوری کوردستاندا لەرێی زیاترکردنی وەبەرھێنانەوە، بۆ ئەم مەبەستەش قوباد تاڵەبانی رایگەیاند،  ھاوکاری و کارئاسانی پێویست پێشکەش دەکەن بۆ کۆمپانیا تورکییەکان.

 لە کۆبوونەوەکەدا سەرباری تاوتوێکردنی واقیعی سیاسی ئێستای  بەتایبەت دوای بەرێوەچوونی پرۆسەی ھەڵبژاردن و راگەیاندنی ئەنجامەکانی ئەو پرۆسە گرنگە لەسەر ئایندەی وڵات، ھاوکات خستنەگەڕی گفتوگۆی جدی لەنێوانی لایەنە سیاسیەکاندا بەگرنگ  زانرا لەپێناو بەرژەوەندی عێراق و گەلەکەی و بنیاتنانی ھاوسەنگی سیاسی و سەقامگیری سستمی سیاسی، لە کۆبوونەوەکەدا قوباد تاڵەبانی و باڵیۆزی ئێرانجەختیاکردەوە لەوەی دەبێت حکومەتی نوێی عێراق حکومەتێکی خزمەتگوزار بێت و توانای بەرێوەبردنی وڵاتی ھەبێت لەدۆخە سەختە سیاسی و ئابوری و ئەمنییەکان.

پەرلەمانی کوردستان خوێندنەوەی دووەمی بۆ پێشنیارە یاسای پاراستنی ئەرشیف لە ھەرێمی کوردستان کرد کە ئامانج لێی پارێزگاری کردن و رێکخستنەوەی تەواوی ئەرشیف و بەڵگەنامە مێژووییە تایبەت و گشتییەکانی ھەرێمی کوردستانە و ناوەندێکی تایبەت بە ھەماھەنگی لەگەڵ حکومەت و وەزارەتی رۆشنبیری و لاونیش چاودێری خاوەنداریەتی ئەرشیفەکان دەکات .

 

باڵانبۆ محەمەد ئەندامی لیژنەی کاروباری پێشمەرگە لە پەرلەمانی کوردستان بە کوردسات نیوزی رایگەیاند، ھەوڵەکان بۆ یەکخستنی ھێزەکانی پێشمەرگە بەردەوامە بەڵام یەکخستنی ھێزەکان کاتی زیاتری پێویستەو ئەوەش بەھۆی  ئەو ئەزموونەی ھەرێمی کوردستان لە رابردوو ھەی بووە لە رووی حزبییەوە و ھێزەکانیش لە ژێر فەرمانی حزبەکان بوون.

باسی لەوەشکرد، لە ئێستادا وەزارەتی پێشمەرگە ١٩ لیوای ھاوبەشی ھەیە، بەڵام رێکخستنەوەکە بەم جۆرەی ئێستا ھەیە سەرکەوتوو نەبووە و ناکرێت کاتێک لیوایەک یەکدەخرێت و دەکرێتە لیوای ھاوبەش لەکاتی دیاریکردنی فەرماندەی لیواکە و جێگرەکەی ھەردوو کیان خۆیان بە فەرماندە ھێزەکە بناسێنن کە لە ئێستادا بەدی دەکرێت، بۆ ئەوەش باشترە لە کاتی پێکھێنانی ئەو لیوایانە ھاوشێوەی لیواکانی پشتیوانی دوو کە لە یەکێتی نیشتمانی کوردستان و پشتیوانی یەک کە سەرجەمیان لە پارتی پێکھاتوون ھێزەکان ھاوشێوە بکرێن و تاوەکو فەرماندە و جێگرەکەی و پۆستەکانی دیکەش بە جێگیری دیاری بکرێن و ھەنگاوەکانی یەکخستنەوەش خێراتر بکرێت.

لەبارەی بۆچوونی وڵاتانی ھاوپەیمان لە سەر یەکخستنی ھێزەکانی پێشمەرگە، ئەندامەکەی لیژنەی کاروباری پێشمەرگە لە پەرلەمانی کوردستان وتی، "وڵاتانی ھاوپەیمان لە ئێستاو لە رابردووش بەردەوام جەختیان لە رێکخستنەوە و یەکگرتنی ھێزەکانی پێشمەرگە کردوە تاوەکو ھەرێمی کوردستان ببێتە خاوەن ھێزێکی نیشتمانی رێکخراو".

موقەدەم ڕەئوف مەلیک خانەقا لێپرسراوی نشینگەی فڕۆکەخانەی نێودەوڵەتی سلێمانی بە کوردسات نیوزی راگەیاند، بەیانی ئەمڕۆ حەوت کەس کە پێکھاتوون لە دوو خێزان و کەسێکی تر ھەوڵیاندا لەرێگەی ڤیزای شنگنی ساختە لە فڕۆکەخانەی سلێمانییەوە گەشت بۆ بەیروت بکەن و دواتر خۆیان بگەیەننە ئەڵمانیا، بەڵام ئاشکرابوون و دەستگیرکران. 

وتیشی، ژنێک و منداڵێکیان ئێرانین و ئەوانی تر ھاوڵاتی ھەرێمی کوردستانن. 

موقەدەم ڕەئوف ئاماژەی بۆ ئەوەشکرد، دوای دەستگیرکردنیان سەرجەمیان روبەڕوی دادگا کرانەوە و رێکاری یاساییان بەرامبەر دەگیرێتەبەر.

بەێوەبەرایەتی گشتی کەشناسی بومەلەرزانی ھەرێمی کوردستان لە راگەیەندراوێکدا ئاماژەی بەوەکردووە، لە ئێوارەی ئەمڕۆوە باران بارین لەھەرێمی کوردستان دەستپێدەکات و لە شەودا لە تەواوی ناوچەکان باران دەبارێت.

راشیگەیاندوە، لە بەرەبەیانی رۆژی سێشەممە بارستە ھەوایەکی سارد روو لە ھەرێمی کوردستان دەکات و پلەکانی گەرما نزم دەبنەوە و بەفر لەسەر ناوچە شاخاوییە بەرزەکان دەبارێت. 

لە راگەیەندراوێکدا وەزارەتی دارایی و ئابووری حکومەتی ھەرێمی کوردستان رایگەیاند، پاش دواکەوتنی بۆ ماوەی چەند رۆژێک ئەمڕۆ دووشەممە رێکەوتی ٢٠ی ١٢ی ٢٠٢١، سەعات ١٢:٣٠ خولەک، بڕی ٢٠٠ ملیار دینار بەپێی رێکەوتنی ھەرێم و بەغداد گەیشتە ھەرێمی کوردستان.

 

بەرێوەبەرایەتی پۆلیسی پارێزگای سلێمانی راگەیەندراوێکی بڵاوکردەوە و رایگەیاند، دوای ئەوەی دوو تۆمەتبار ھەڵیانکوتابووە سەر دوکانێک لەگەڕەکی بەختیاری شاری سلێمانی ‌و تەقەیان لەخاوەنی دوکانەکە کردبوو، بەڕێوەبەری پۆلیسی پارێزگای سلێمانی بنکەی پۆلیسی بەختیاری ڕاسپارد کە دەستبەجێ لێکۆڵینەوەو بەدواداچون بۆ دۆزینەوەو دەستگیرکردنی تۆمەتبارەکان ئەنجامبدەن.

ئاماژەی بەوەشکردووە، پاش وەرگرتنی بڕیاری دادوەر، مەفرەزەکانی بنکەی پۆلیسی بەختیاری توانیان لەماوەیەکی کەمدا ھەردوو تۆمەتبار (د، ر، م) لەدایکبووی ١٩٦٥ و (ڕ، د، ر) لەدایکبووی ١٩٩٩ دەستگیربکەن، لەکاتی دەستگیرکردنی تۆمەتبارەکاندا دەستیشگیرا بەسەر ئوتۆمبێل ‌و دوو چەک لەجۆری دەمانچە کە تۆمەتباران لەکاتی تاوانەکەیاندا بەکاریانھێنابوو.

پۆلیسی سلێمانی راشیگەیاندوە، لەئێستادا ھەردوو تۆمەتبارەکە بە بڕیاری دادوەر و بەپێی ماددەکانی ٤٠٥ و ٣١ لە یاسای سزادانی عێراقی ڕاگیراون و لێکۆڵینەوەکان لەگەڵیاندا بەردەوامە.