وەزارەتی دارایی و ئابوری ھەرێم لە ڕوونکردنەوەیەکدا ئاماژەی بۆ ئەوە کردووە، ڕۆژی یەک شەممە ٢ی کانوونی دووەمی ٢٠٢٢، دابەشکردنی مووچەی مانگی ١٢ی ٢٠٢١ دەستپێدەکات، ھەر بە پێی ڕوونکردنەوەکە ڕۆژی یەک شەممە مووچەی وەزارەتی تەندروستی دابەش دەکرێت، بۆ ڕۆژانی دواتریش بە پێی خشتەیەک، دابەشکردنی مووچە بەردەوام دەبێت.

ئەوەش لە کاتێکدایە چەند ڕۆژێک پێش پشووەکانی سەری ساڵ، حکومەتی عێراق ٢٠٠ ملیار دینارەکەی بۆ ھەرێمی کوردستان نارد و پێشتریش حکومەتی ھەرێم ئاماژەی بەوە کردووە، ھەموو ٢٥ی مانگێک مووچە دابەش دەکرێت.

بافڵ جەلال تاڵەبانی لە پەیامێکدا بۆ یادی ٢٢ ساڵەی دامەزراندنی دەزگای میدیایی کوردسات ڕایگەیاندووە، دەزگای میدیایی کوردسات دامەزراوەیەکی سەنگین کە ھەمیشە پابەند بە بنەماکانی پیشەیی کاری ڕاگەیاندن و پەیامی میدیایی خۆی ئاڕاستە کردووە و لە چوارچێوەیەکی بەرپرسیاردا لە ئاست ڕووداو و پێشھاتەکاندا بووە.

ڕاشیگەیاندووە، ئەمڕۆ کە پێدەنێتە ساڵێکی نوێی تەمەنی، وێڕای پیرۆزبایی گەرممان لە سەرپەرشتیار و ڕۆژنامەنووسان و کارمەندانی دەزگای میدیایی کوردسات، ھیوادارم کاروانەکەتان بەردەوام بێت و وەک ھەمیشە لە خزمەت گەیاندنی ڕاستی ڕووداوەکانی کوردستان بن و لە پاڵ گەیاندنی ڕوانینە جیاجیاکان ببنە سەکۆی بە یەک گەیشتنی خەڵک و حکومەت، ئەرکی خۆتان وەک دەسەڵاتی چوارەم بە جێبگەیەنن و چاودێری راستەقینە بن لە پێناو کوردستانێکی ئاوەدانتر.

شەوی ڕابردووش لە نزیک گوندی دیلا لە سنوری برادۆست سوپای تورکیا، دوو ھاوڵاتی دەستگیر کردووە و بە پێی زانیارییەکانی کورسات نیوزیش ئەو ھاوڵاتییانە گواستراونەتەوە بۆ یەکێک لە بنکە سەربازییەکانی سوپای تورکیا لە سنورەکە.

"سامان لەتیف" لێپرسراوی ڕاگەیاندنی بەڕێوەبەرایەتی گشتی تەندروستی سلێمانی بە کوردسات نیوزی ڕاگەیاند، لە ئاھەنگەکانی شەوی سەری ساڵ لە سلێمانی ٢٧ حاڵەتی کتوپڕ و ٦ حاڵەتی ڕووداوی ھاتووچۆ ڕوویانداوە، لەگەڵ ٣ حاڵەتی برینداربوون بە چەقۆ و ٣ حاڵەتی کەوتن و ٤ حاڵەتی بەربوونەوە ھەبووە، ٢٢ حاڵەتی جیاجیاش بەھۆی تەقەمەنی و یارییە ئاگرینەکان ڕوویانداوە، حاڵەتێکی ئاگرکەوتنەوەش لە کارگەیەکی دارتاشی بەھۆی شۆرتی کارەباوە ڕوویداوە و ھیچ زیانی گیانی نەبووە.

بەڕێوەبەرایەتی ھاتووچۆی ھەولێریش ڕایگەیاند، لە ئاھەنگەکانی سەری ساڵ ٣ ڕووداوی ھاتووچۆ تۆمارکراون و بە ھۆیانەوە ٥ کەس برینداربوون و زیانی مادیش بە ٦ ئۆتۆمبێل گەیشتووە.

سەعات ١٠ شەوی ڕابردوو و لەسەر شەقامی سەد مەتری نزیک فامیلی مۆڵ لە ھەولێر، کۆمەڵێک گەنج بە شەقامەکەدا بڵاوبوونەتەوە و بە بەرد و ئاسن و شەق لە ئۆتۆمبێلی خەڵکیانداوە.

ھاوڵاتیانی ھەولێریش داوایان لە ئاسایش و دەزگا ئەمنییەکانی شارەکە کرد، لێکۆڵینەوە لەو ڕووداوە بکەن و تێکدەران ئارامی ھەولێر ڕووبەڕووی دادگا بکرێنەوە و سزا بدرێن.

وتیشی، ٣٣ جاریش وەزیرەکانی حکومەتی ھەرێم لە دانیشتنەکانی پەرلەمان و لیژنە تایبەتمەندەکان ئامادەبوون. 

ھێزەکانی سوریای دیموکرات (ھەسەدە) لە راگەیەندراوێکدا ئاماژەی بەوە کردوە، لە ئەنجامی ھێرش و تۆپبارانی سوپای تورکیا و گروپە چەکدارەکانی ھاوپەیمانی بۆ سەر ناوچەی زرگان و تەل تەمر، دوو ژن و منداڵێک گیانیان لە دەستداوە و سێ ھاوڵاتیش برینداربوون.

ھەسەدە راشیگەیاندووە، ھێزەکانیان ھێرشێکی چەکدارانی تورکیایان بۆ سەر گوندی ساکیرو سەر بە عەین عیسا دوای شەڕێکی سەخت تێکشکاندوە.

لە لایەکی تریشەوە سەرچاوەیەک لە ھاوپەیمانی نێودەوڵەتی دژی داعش رایگەیاندوە، کە ھێزەکانی ھەسەدە ھێرشێکی مۆشەکییان بۆ سەر بارەگای ھاوپەیمانان لە کێڵگەی نەوتی عومر لە ریفی دێرەزور پوچەڵکردوەتەوە. 

سەڵاحەدین دەمیرتاش ھاوسەرۆکی پێشووتری پارتی دیموکراتی گەلان "ھەدەپە"، لە زیندانەوە بە بۆنەی ساڵی نوێ بە شێوەزاری کرمانجی و زازاکی و زمانی تورکی پەیامێکی بڵاوکردەوە و رایگەیاند، ھیوای ساڵێکی بێستەم و بێتاڵانی و بێ ئاکپارتی دەخوازێت.

ئاماژەی بۆ ئەوەشکردوە، بەبێ ستەم و قۆرخکاریی شمەک و کاڵاکان، بێ ئاکپارتی، ساڵی نوێ ساڵێکی باش دەبێت.

پەیامنێری کوردسات نیوز رایگەیاند، دوو برای دانیشتووی گوندی دایلان لە سنوری برادۆست لە گوندی خەروان شوانکارییان کردووە، ئەمڕۆ  لەلایەن سوپای تورکیاوە لەو گوندە دەرکراون و و پێیان وتراوە نابێت لە سنوورەکەش بمێنن. 

ئەوەش لە کاتێکدایە کە لە رۆژی ھەینی سوپای تورکیا دوو ھاوڵاتی تریان لە گوندی دایلان دەستگیر کرد و تاکو ئێستا چارەنوسیان نادیارە. ھاوکات ڕۆژانە فڕۆکە جەنگەییەکانی تورکیا ناوچەکانی سنوری برادۆست  بۆردمان دەکەن و تەقەی ھەڕەمەکی بەناو گوند و ئاواییەکان دەکەن.

بەرەبەیانی ئەمڕۆ بە بەشداری ھێزەکانی پێشمەرگەی کوردستان و ئاسایشی گەرمیان، لە میحوەری دووی قەرەتەپە-حەمرین و لە سنووری ناوچەی داوێ و قوڕیچایی و پەڵکنانە و غەڕە، ئۆپراسیۆن لە دژی تیرۆریستانی داعش و بە ئامانجی کێوماڵکردنی سنوورەکە دەستپێکرد و بەھۆی سەختی جوگرافیای ناوچەکە، ئۆپراسیۆنی پێشمەرگە بە وردی بەڕێوەدەچێت و تاکوو پاککردنەوەی تەواوەتی ناوچەکە بەردەوام دەبێت.

سەرجەم شوفێران وھاوڵاتیانی بەڕێزی شاری ھەولێری ئاگادار دەکەینەوە، کەوا بەھۆی ئەگەری دروستبوونی قەرەباڵغی و کۆبوونەوەی خەڵک لە ھەندێک شەقام و شوێنە گشتیەکان بە بۆنەی سەری ساڵی تازە، لە کاتژمێر ٧ی ئێوارەی ئەمڕۆوە تاکو درەنگانی شەو چەند شەقامێک بە تەواوی دادەخرێن بە ڕووی شوفێراندا وەھاتووچۆکردن تیایاندا تەنھا بە پیادە دەبێت، بەو شێوەیە خوارەوە:
١/ چواریانی ئیسکان لەسەر شەقامی ٦٠ مەتریەوە تاکو باخچەی بروسک.
٢/ چواریانی گەل بەرەو ناو بازاڕ.
٣/ چواریانی میدیا بەرەو ناو بازاڕ.
٤/ چواریانی پارێزگا بەرەو ناو بازاڕ
٥/ کۆتایی شەقامی حەمرا.
٦/ شەقامی ١٠٠ مەتری ئەو بەشەی بە پێش فاملی مۆلدا دەڕوات بۆ ڕێگەی شەقڵاوە (تەنھا یەک ساید دەگیرێت کە سایدی چوونە بۆ ڕێگەی شەقڵاوە و سایدی ھاتن بۆ لای ڕێگەی کۆیە کراوە دەبێت).

تێبینی/ ھیچ ئاھەنگێکی فەرمی ناکرێت بە بۆنەی سەری ساڵی تازە، بەڵام ئەم ئامادەکاریانە بۆ ئەگەری کۆبوونەوەی خەڵکە بەو بۆنەیەوە.

ساڵی تازەتان پیرۆز و بە ھیوای سەلامەتی بۆ ھەموو لایەک

ب. ھاتووچۆی ھەولێر
٢٠٢١/١٢/٣١

ھەڤاڵ ستران عەبدوڵڵا، ئەندامی مەکتەبی سیاسی و لێپرسراوی مەکتەبی ڕاگەیاندنی یەکێتیی نیشتمانیی کوردستان.

بە داخ و خەمێکی قووڵەوە ھەواڵی کۆچی دوایی خاتوو (مسرییە نەجم محەمەد) دایکی بەڕێزتانم پێگەیشت.
بەم بۆنە خەمناکەوە پرسە و سەرەخۆشی و ھاوخەمی خۆمانتان پێڕادەگەیەنین.
لە خوای گەورە داواکارین گیانی کۆچکردوو بە بەھەشت شاد بکات، ئارامیی و سوکناییشتان پێببەخشێت و لە ھەموو خەمێک بە دوور بن.

دڵسۆزتان
بافڵ جەلال تاڵەبانی
٣١ی ١٢ی ٢٠٢١

ڕێکخراوی چەتری پارێزەرانی ئاشتی نێودەوڵەتی، بە ھاوبەشی لەگەڵ پەیمانگای کەنەدی بۆ مافەکانی مرۆڤ و تەندورستی دەروونی، خەڵاتی ئەو ڕۆژنامەنووسە بوێرانە دەکەن لە بارەی دۆسییەی دەستگیرکراوانی بادینان و دۆسیەکانی تری ئازادی بوێرانە کاریانکردووە و پەیامنێرانی دەزگای میدیایی کوردساتیش خەڵاتەکە وەردەگرن، ڕێکخراوی چەتری پارێزەرانی ئاشتی نێودەوڵەتی بارەگاکەیان لە عێراق و ھەرێمی کوردستان و ئوردن و سوریا و میسڕ ھەیە.

کوردستانیانی خۆشەویست؛

بە بۆنەی ھاتنی ساڵی نوێوە گەرمترین پیرۆزباییتان لێ دەکەم و ئاواتەخوازم گەلەکەمان بەخێر و خۆشییەوە ھەنگاو بنێتە نێو ٢٠٢٢ و لەو ساڵەدا خۆشگوزەرانی و ئاشتی و ئارامی باڵ بەسەر ھەرێمی کوردستان و عێراق و ناوچەکەدا بکێشێت.

ھیوادارم ساڵی نوێ ببێتە ساڵی یەکڕیزی ناو ماڵی کورد و یەکگوتاری ھێز و لایەنە سیاسییە کوردستانییەکان لەپێناو پاراستنی بەرژەوەندییەکانی گەلی کوردستاندا.

ھەر لەم بۆنەیەدا دووپاتی دەکەینەوە کە لە ھەوڵەکانمان بەردەوام دەبین بۆ چاکسازی و گەشەپێدانی ئابووری و کۆمەڵایەتی و دەستەبەرکردنی ھەلی کاری زیاتر بۆ گەنجان و دابینکردنی ژیانێکی شایستە بۆ ھاوڵاتیان و پێشکەشکردنی خزمەتگوزاری زیاتر بە کۆمەڵانی خەڵکی کوردستان. 

ساڵی نوێتان پیرۆز بێت 

قوباد تاڵەبانی
جێگری سەرۆکی ئەنجومەنی وەزیران

عەلی ڕەئووف، بەڕێوەبەری گشتیی گەشوگوزاری سلێمانی، لە کۆنفڕانسێکی ڕۆژنامەوانیدا ئاماری ھاتنی گەشتیارانی بۆ ساڵی ٢٠٢١ خستەڕوو و ڕایگەیاند، ئەمساڵ زیاتر لە یەک ملیۆن و ٥٠٠ ھەزار گەشتیار ھاتوونەتە پارێزگای سلێمانی و بەراورد بە ساڵی ڕابردوو داھاتی ئەمساڵی کەرتی گەشتیاری لە سلێمانی زیادیکردووە و لەسەر ئاستی ھەرێمی کوردستان، سلێمانی لە پلەی یەکەمدایە بۆ داھاتی گەشتیاری، ڕاشیگەیاند، بۆ پشووەکانی سەری ساڵ نزیکەی ٢٥ ھەزار گەشتیار ھاتوونەتە سلێمانی.

نەریمان فازڵ، وتەبێژی بەڕێوەبەرایەتیی گشتیی گەشوگوزاری ھەولێر، بە کوردسات نیوزی ڕاگەیاند، لە ٢٠٢١دا یەک ملیۆن و ٩٧٥ ھەزار گەشتیار سەردانی ھەولێریان کردووە، کە دەکاتە ٤٨%ی کۆی ھەموو ئەو گەشتیارانەی ئەمساڵ ھاتوونەتە ھەرێمی کوردستان، ئامارەکەش لە ھەردوو ساڵی ٢٠٢٠ و ٢٠١٩ زیاترە.

ڕاشیگەیاند، ئامادەکاریان بۆ ھاتنی گەشتیاری زیاتر کردووە، بە تایبەت بە بۆنەی سەری ساڵی نوێ و لە ھەموو شوێنە گەشتیارییەکان تیمی تایبەتیان ھەیە بۆ چاودێریکردنی ھاتنی گەشتیاران و چارەسەرکردنی ھەر کێشەیەک کە ڕووبەڕوویان ببێتەوە.