"سیراج بارزانی"سەرۆکی ئەنجوومەنی گشتی ڕاژەی حکومەتی ھەرێمی کوردستان ڕایگەیاند، کابینەی نۆیەم گرنگییەکی زۆری بە بەرزکردنەوەی ئاستی داھات و کەمکردنەوەی خەرجییەکان داوە بۆ ئەوەی بگاتە ئاستێک کە بتوانێت دووبارە دەرگای دامەزراندن بکاتەوە.

راشیگەیاند، حکومەتی ھەرێم پێداچوونەوە بە میلاک و ڕاژەی فەرمانبەران دەکات و ژمارەی فەرمانبەرانیش بەپێی پێداویستی ڕاستەقینەی فەرمانگەکانی حکومەت دیاریدەکرێت بۆ ئەوەی باشترین خزمەت بە کەمترین تێچوو پێشکەش بکەن. 

سەرۆکی ئەنجوومەنی گشتیی ڕاژە دڵنیایی دایە فەرمانبەران کە  گواستنەوەیان بەپێی ڕٍاوێژ لەگەڵ خۆیان دەبێت.

دەقی پرسەنامەکە...

ھەڤاڵ کاک سەعدی ئەحمەد پیرە، ئەندامی مەکتەبی سیاسیی یەکێتیی نیشتمانیی کوردستان.

بۆ کۆچی دوایی خاتوو (مامز عەبدوڵا) دایکی بەڕێزتان، پرسە و ھاوخەمی قووڵی خۆمان ئاڕاستەی ئێوە، کەسوکار و بنەماڵە سەربەرز و تێکۆشەرەکەتان دەکەم.

لەخوای گەورە داواکارم رۆحی کۆچکردوو بەبەھەشتی بەرین شاد بکات و سەبووری بەھەموولایەک ببەخشێت.

دڵسۆزتان 
بافڵ جەلال تاڵەبانی 
سەرۆکی یەکێتیی نیشتمانیی کوردستان
٢٨ی تەممووزی ٢٠٢٢ - بەغدا

دەقی پرسەنامەکە...

بەڕێز کاک سەعدی ئەحمەد پیرە
بەرێزان خێزان و خانەوادەی کۆچکردوو 

‏‎‏‎بەبیستنی ھەواڵی کۆچی دوایی خاتوو (مامز عەبدوڵا)ی دایکی ئازیزتان،  نیگەران و دڵگران بووم. 

کۆچکردوو خانمێکی وورەبەرز و نیشتمانپەروەر، پشت و پەنای  پێشمەرگە بوو، لەژیانیدا زەحمەتێکی زۆری بینی بەلەئامێزگرتنی ڕۆڵە گیانفیدا و پێشمەرگە و نیشتمانپەروەرەکانییەوە، کۆچکردنیشی جێگای داخێکی گەورەیە. 

‏‎‏‎بەم بۆنە غەمناکەوە پرسە و سەرەخۆشی ئاراستەی خۆتان و خانەوادە سەربەرزەکەتان دەکەم و ھیواخوازم ئەمە دوا ناخۆشیتان بێت.

‏‎‏‎خوای گەورە لە دایکی بەڕێزتان خۆش بێت و جێگای بەھەشت بێت، سەبوری و دڵنەواییش بەھەموو لایەک ببەخشێت. 

‏‎‏‎انا للە و انا الیە راجعون 

‏‎‏‎قوباد تاڵەبانی
‏‎‏‎سەرپەرشتیاری مەکتەبی سکرتاریەتی سەرۆک مام جەلال

دەقی بەیاننامەکە...

بەیاننامەی مەڵبەندی کەرکوک، لە(١٤)ـمین ساڵیادی شەھیدانی (٢٨)ـی تەمووز :-

کەسوکار و خانەوادەی سەربەرزی شەھیدان ...
ھاوڵاتیانی خۆراگری کەرکوک ... 

لە رۆژێکی وەکو ئەمڕۆدا و (١٤) ساڵ بەر لەئێستا، کاتێک کۆمەڵانی خەڵکی کەرکوک، لە ڕێگای خۆپیشاندانێکی شارستانی و مەدەنیانەوە، ھەڵوێستی خۆیان دژی پڕۆژە یاسای ژمارە (٢٤) لە یاسای ھەڵبژاردنی ئەنجومەنی پارێزگاکانی ژمارە (٣٦)ـی ساڵی (٢٠٠٨) دەردەبڕی کە دەویسترا لەلایەن شۆڤێنیەکانی پەرلەمانی عێراقەوە دۆخی سیاسی و دیموگرافیای کەرکوک بگەڕێندرێتەوە بۆ سەردەمی حزبی بەعسی رووخاو.

بەڵام بەداخەوە تاریکپەرستانی دژ بە میلەتەکەمان لە کردەوەیەکی ترسنۆکانەی تیرۆرستیدا، دەستیان چووە خوێنی ئاڵی (٢٤) ھاوڵاتی بێتاوانی کەرکوک کە (٩) کەسیان لە توێژی مامۆستایان بوون، کە دواتر وەک ھەمیشە کۆچکردوو سەرۆک مام جەلال، لە دژی ئەو پرۆژە یاساییە ڤیتۆی بەکارھێنا رێگربوو لە پیلانی شۆڤێنیەکان.

لەم یادە پر خەم و ئازارەدا، جارێکی دیکە سەری رێز و نەوازش بۆ شەھیدانی (٢٨)ـی تەمووز دادەنوێنین، کە بە دروشمی (ئێمە لێرە ناڕۆین) دژی ئەوپیلانە وەستانەوە و 
بەڵێنی وەفایان بۆ دووپاتدەکینەوە کە درێژەپێدەری رێبازەکەیان بین و رێگەنەدەین بەعسی و شۆڤێنیەکان مەرامی گڵاوی خۆیان بۆ بچێتەسەر.

ھەروەک لەم یادەدا، دۆخی کەرکوک و ھەرێم و عێراق و ناوچەکەش، وامان لێدەخوازێت یەک دەنگ و یەکگرتووبین بۆ بەدەستھێنانی مافی ڕەوای میلەتەکەمان و دژی سەرجەم پیلانەکان بوەستینەوە.
 
سڵاو لە رۆحی پاکی شەھیدانی (٢٨)ـی تەمووزی ساڵی (٢٠٠٨) و سەرجەم شەھیدانی رێگای ئازادی میلەتەکەمان.

‏‎ڕەوەند مەلا مەحمود
‏‎لێپرسراوی مەڵبەندی (٢)ی رێکخستنی کەرکوکی (ی.ن.ک)

دەقی بەیاننامەکە...
لە بیرەوەری (١٤)مین ساڵەی خۆپیشاندانە خوێناوییەکەی کەرکوک ئاسۆ مامەند پەیامێک بڵاو دەکاتەوە

کۆمەڵانی خەڵکی کوردستان..!
کەرکوکییە دڵسۆز و خۆڕاگرەکان..!

لە (٢٨)ی تەمووزی ساڵی (٢٠٠٨) دەیان ھەزار ھاووڵاتی کەرکوک خۆپیشاندانێکی ھێمنانە و مەدەنیانەیان لە شارەکەیان رێکخست بۆ پاراستنی مافە دەستورییەکانیان، بەڵام بە داخەوە ئاکامەکەی کۆمەڵکوژکردنی ھاوڵاتییان و خوێناویکردنی شارەکەی لێکەوتەوە.

لە (٢٢)ی تەمموزی ساڵی (٢٠٠٨) سەرۆکی ئەوکاتی پەرلەمانی عیراق، پڕۆژە یاسای ھەڵبژاردنی پارێزگاکانی خستە بەردەم ئەندامانی پەرلەمانی عیراق بۆ ئەوەی دەنگی لەسەر بدەن، لە ناو پڕۆژە یاساکەدا مادەی (٢٤) بوونی ھەبوو کە سەرلەبەری دژی مادەی (١٤٠)ی دەستووری ھەمیشەیی عیراق بوو!

لە دانیشتنەکەدا بێجگە لە نوێنەرانی کورد، نزیکەی تەواوی ئەوانەی کە لە ھۆڵی پەرلەماندا ئامادەییان ھەبوو دەنگیان بە یاساکەدا، ئەو کاتە ژمارەی ئەندامانی پەرلەمان ( ٢٧٥) کەس بوو، بە پێی پێڕەو دەبوو بۆ ھەر یاسایەک سێ لە سەر پێنجی ئەندامانی پەرلەمان ئامادەییان ھەبێت، ھەر چەندە ئەو ژماریە ئامادە نەبوو ھەروا نوێنەرانی کوردیش ھۆڵی پەرلەمانیان جێھێشت.. بەڵام (١٤٢) پەرلەمانتار لە ھۆڵەکەدا مانەوە، لەو ژمارەیەش ( ١٢٧) ئەندامیان دەنگیان بە یاساکەدا.!

بە دەنگدان بەو پڕۆژە یاسایەش، ھیچ بەھایەک بۆ مادەی (١٤٠)ی دەستووری ھەمیشەیی نەمایەوە، چونکە مادەی (٢٤) بە ھەمان نەفەس و  سیاسەتی سەردەمی حزبی بەعسی ھەڵوەشاوە نووسرابووەوە!

ناوەڕۆکی یاسای (٢٤) ھەڕەشەیەکی گەورە بوو بۆ سەر کورد و دۆزەکەی، ھەروا مەترسییەکی جددییش بوو بۆ سەر دانیشتوانی کوردی کەرکوک.

لە ناو پرۆژە یاساکەدا چەند بڕیارێک ھەبوون کە زۆر مەترسیدار بوون، لەوانە؛ دانیشتوانی قەزاو ناحییەکانی بێبەش دەکرد لە ئەنجامدانی ھەڵبژاردن لەو پارێزگایە، ھەروا جەختی لەوە دەکردەوە کە دەسەڵاتەکانی پارێزگای کەرکوک بە گوێرەی ٪٣٢ لە نێوان ھەر سێ پێکھاتەی (عەرەب، کورد و تروکمان) دابەش بکرێت، و لە ٪٤یش بۆ مەسیحییەکان. ئەم برگەیەش دژی دیموکراسی و ئیستحقاقەکانی ھەڵبژاردن بوو کە کورد بەردەوام زۆرینەی مسۆگەر بووە لەو پارێزگایەدا، چونکە ڕێژەی دانیشتوانی کورد لە کەرکوک ھیچ کات لە ٪٥٠ کەمتر نەبووە، ئەمە وێڕای ئەوەی کە زیاتر لە (٣٥) ساڵ رووبەڕووی پڕۆسەی تەعریب و تەرحیل و تەھجیر بووبوونەوە! ھەروەھا لە خاڵی پێنجەمی ئەو پرۆژە یاسایەدا چەند بڕگەیەکی مەترسیداری تێدا بوو سەبارەت بەو ماڵە ئاوارە کوردانەی کە لە دوای ساڵی (٢٠٠٣)وە گەڕابوونەوە کەرکوک و لەسەر ماڵ و حاڵی خۆیان گیرسابوونەوە، بەڵام ئەو پڕۆژە یاسایە ماڵ و خانووەکانی ئەو کوردانەی بە تەجاوز و نافەرمی ئەژمار کردبوو..! لەوەش مەترسیدار تر، رادەستکردنی مەلەفی ئەمنی پارێزگاکە بوو بە ھێزە سەربازییەکان، و بێبەش کردنی ھێزە ئەمنییە خۆجێیەکان لە بەڕێوەبردنی مەلەفی ئەمنی پارێزگاکەیاندا.

لە بەر ئەو ھۆکارانە کەرکوکییەکان و سەرکردایەتی سیاسی کوردستان، ئەو پرۆژە یاسایەیان بە مەترسی زانی بۆ سەر داھاتووی کەرکوک و پرسی کورد لەو پارێزگایە، لەو سۆنگەیەوە کارادانەوەی فراوانی لەسەر ئاستی جەماوەری و حزبی لێکەوتەوە.

دوای ئەوەی پیلانگێڕان لە ناو پەرلەمانی عێراق بە شێوازێکی نایاسایی ئەو پرۆژە یاسایەیان تێپەڕاند، لە (٢٨)ی تەمموزی ساڵی (٢٠٠٨) ھاوڵاتییانی دلێر و خۆڕاگری کەرکوک، ھاتنە دەرەوە و بڕیاری خۆپیشاندانیان دا٫ بە دەم ھوتاف کێشان و رەتکردنەوەی مادەی (٢٤) چوونە بەردەم بینای پارێزگای کەرکوک کە ژمارەیان زیاتر لە (١٥٠) ھەزار ھاووڵاتیی بوو.

بەڵام بە داخەوە زۆری نەخایاند دەستی رەشی تیرۆر و پیلانگێڕان! گەیشتە خوێنی ئاڵی خۆپێشاندەران و بە ھۆیەوە دەیان ھاووڵاتیی بێتاوانی کورد شەھید و بریندار بوون، کە بەشێکی شەھیدەکان لە توێژی مامۆستایان بوو.

لە سەروئانی کاردانەوەکان لە دژی یاسای ژمارە (٢٤)ی ھەڵبژاردن، رەوانشاد سەرۆک مام جەلال سەرۆک کۆماری ئەو کاتی عێراق، وەک پارێزەری ھەمیشەیی پرسی کورد و کەرکوکییەکان لە بەغدا، ئەو یاسایەی (ڤیتۆ) کردو رێگەی نەدا جێبەجێ بکرێ، و خەونی گڵاوی پیلانگێڕان بەدیی بھێنرێ.

لەم یادەدا.. سڵاو لە سەرۆک مام جەلال و شەھیدانی ٢٨ی تەمموز و سەرجەم شەھیدانی رێگەی کوردستان!

ھەر شەکاوە بێت ئاڵای کوردستان!

ئاسۆ مامەند
سەرپەرشتیاری کەرکوک-سەڵاحەدینی یەکێتیی نیشتمانیی کوردستان

بەڕێوەبەرایەتی پۆلیسی پارێزگای سلێمانی رایگەیاند، دوای ئەوەی زانیاری گەیشتە دەست بەڕێوەبەری پۆلیسی پارێزگای سلێمانی کە دوو ھاوڵاتی ئێرانی لەلایەن پێنج تۆمەتبارەوە ڕفێنراون و لەبەرامبەر ئازادکردنیان داوای چوار ملیار تمەنیان لێ دەکرێت، دەستبەجێ بەشی پۆلیسی سەیدسادقی ڕاسپارد و زانیاری تەواوی پێدان لەسەر شوێنی تۆمەتباران کە ئەو دوو ھاوڵاتیەیان ڕفاندووە.

دەشڵێت، دوای بەدواداچوون و لێکۆڵینەوەکان توانرا شوێنی تۆمەتباران لە قەزای سەیدسادق بدۆزرێتەوە و ڕفێندراوەکان ئازادبکرێن و سەرجەم تۆمەتباران دەستگیربکرێن کەژمارەیان پێنج تۆمەتبارە. 

ئاماژەی بەوەشکردووە، لەئێستادا تۆمەتباران ( ف، ح ، ع) لەدایکبووی ١٩٩٣، ( ن، ح ، ع) لەدایکبووی ٢٠٠٢، (ە ، م، ح ) لەدایکبووی ١٩٩٥، ( ا ، ح ، م ) لەدایکبووی ٢٠٠٢ ،( ز ، ع ،ع ) لەدایکبووی ١٩٩٩ بەبڕیاری دادوەرو بەپێی ماددەی ٤٢١ لەیاسای سزادانی عیراقی ڕاگیراون و لێکۆڵینەوە لەگەڵیان بەردەوامە.

دەقی پرسەنامەکە...

برای بەرێزم کاک سەعدی ئەحمەد پیرە

بەداخ و  پەژارەیەکی زۆرەوە، ھەواڵی ماڵئاوایی یەکجارەکیی خاتوو(مامز عەبدوڵا)ی دایکی بەڕێزتانم پێگەیشت، بۆ ئەو غەمەتان پرسە و ماتەمینیی خۆمتان پێڕادەگەیەنم و لەناخەوە ھاوبەشی غەم و پەژارەتانم. 

خوای گەورە ئارامیی و دڵنەوایی بە ئێوە و خانەوادە تێکۆشەرەکەتان ببەخشێت، ئەوە دوایین غەم و دڵتەنگیتان بێت، کۆچکردوش بە بەھەشتی بەرین شاد بکات.

ٳنــا للە وٳنــا ٳلــیــە راجــعــون

شاناز ئیبراھیم ئەحمەد

وەزارەتی پەروەردەی ھەرێمی کوردستان، ئەنجامی کۆتایی تاقیکردنەوە گشتییەکانی پۆلی ١٢ی ئامادەیی بڵاوکردەوە و بەپێی ئەنجامەکان، سێ خوێندکار لە بەشی زانستی بە کۆنمرەی ٧٠٠ پلەی یەکەمیان بەدەستھێناوە.

ئالان حەمەسەعید وەزیری پەروەردە رایگەیاند، پڕۆسەی تاقیکردنەوە گشتییەکانی پۆلی ١٢ سەرکەوتووبووە و رێژەی گزیکردن بەراورد بە ساڵانی رابردوو ١٠٠% کەمیکردووە، وتیشی، سێ خوێندکار لە بەشی زانستی بە کۆنمرەی ٧٠٠ پلەی یەکەمیان بەدەستھێناوە و یەک خوێندکاریش لە بەشی وێژەی پلەی یەکەمی بەدەستھێناوە.

خوێندکارانی پۆلی ١٢ دەتوانن لە رێگەی ئەم لینکەوە ئەنجامەکەیان وەربگرنەوە.

فلیپ گۆنزالیس مۆرالیس بڕیاردەری نەتەوەیەکگرتوەکان بۆ مافی کۆچبەران، دوای سەردانی بۆ پۆڵەندا و بێلاڕوس رایگەیاند، ھێزەکانی پاسەوانی پۆڵەندا ئاوپرژێنیان لەبەرامبەر ئەو کۆچبەرانە بەکارھێناوە کە روویان لە سنوری وڵاتەکەیان کردوە، ئەوەش کارێکی نەگونجاو بووە لەو کاتەدا، وتیشی، لانیکەم ٢٠ کۆچبەر لە دارستانەکانی نێوان پۆڵەندا و بێلاڕوس گیانیان لەدەستداوە و دەسەڵاتدارانی بێلاڕوس ھیچ رێوشوێنێکیان نەگرتووەتەبەر بۆ رێگری لە چوونی ٢٥٠٠ کۆچبەر بۆ سنوری پۆڵەندا.

ساڵی رابردوو ھەزاران کۆچبەر کە بەشێکی زۆریان خەڵکی عێراق و ھەرێمی کوردستان بوون بە ئامانجی گەیشتن بە ئەوروپا روویان لە سنورەکانی نێوان بێلاڕوس و پۆڵەندا کرد و قەیرانێکی مرۆیی لەسەر سنوری ھەردوو وڵات سەریھەڵدا، دواتریش بەشێک لە کۆچبەرەکان گەڕێندرانەوە ھەرێمی کوردستان.

سەرۆکایەتی داواکاری گشتیی ھەرێمی کوردستان بەھەماھەنگی لەگەڵ وەزارەتی گواستنەوە و گەیاندنی ھەرێم داوای قەدەغەکردنی ھەموو ئەو پێگە و ماڵپەڕە ئەلیکترۆنییانە دەکات کە بەکارھێنانیان گرفتی کۆمەڵایەتی لێدەکەوێتەوە و شیرازەی خێزان دەشێوێنن، بۆ ئەو مەبەستەش سەرۆکی داواکاری گشتی و وەزیری گواستنەوە و گەیاندن، جەختیان لە پتەوکردنی ھەماھەنگی و کاری پێکەوەیی کردەوە بە تایبەت لەو پرسانەی دەچینە چوارچێوەی ئادابی گشتییەوە.

ھاوکات سەرۆکی داواکاری گشتی داوای لە وەزارەتی گواستنەوە و گەیاندن کردووە، تۆڕەکانی گەیاندن و پەیوەندیکردن پابەندبکات بە قەدەغەکردنی ھەموو ئەو پێگە و ماڵپەڕە ئەلیکترۆنی و سایتانەی بابەت و ڤیدیۆ و وێنەی نەشیاو بڵاودەکەنەوە و ھانی قومارکردن و ئەو یارییە ئەلیکترۆنییانە دەدەن کە دەکەونە چوارچێوەی قومارکردنەوە و بوونەتە ھۆکاری تێکدانی شیرازەی خێزان و چەندین گرفتی کۆمەڵایەتی لێکەوتووەتەوە.

ھەروەھا پێشنیازیشکراوە ھەموو کۆمپانیاکانی بواری گەیاندن و پەیوەندیکردن، پاکێجی خێزانی فەراھەم بکەن، بۆ ئەوەی رێگری لە منداڵان و نەوجەوانانی خوار تەمەنی باڵغ بوون بکەن، پێگە و ماڵپەڕە نەشیاوەکان سەیربکەن.

دەقی روونکردنەوەکە:

سەرجەم ھەڤاڵانمان ئاگاداردەکەینەوە کە راپرسییەکی ساختە بەناوی یەکێتیی نیشتمانیی کوردستان لە پلاتفۆرمەکانی سۆشیالمیدیا بڵاوکراوەتەوە کە بەھیچ شێوەیەک پەیوەندی بە یەکێتییەوە نییە.
یەکێتیی بۆ ھەر چالاکی و راپرسییەک کە مەبەست و یەکێتییانە بێت، ئۆرگانی تایبەتمەندی ھەیە ئەو ئەرکە لە ئەستۆ بگرێت. بە ئاشکرا لە کەناڵە فەرمییەکانەوە بانگەشەی بۆ دەکات و ھەڤاڵ، ئەندام و لایەنگرانی خۆی ئاگادار دەکاتەوە.

بۆیە لێرەوە رایدەگەیەنین لەو راپرسییە ساختەیە بەرپرسیار نین و ئامانج لێی تەنیا بەلاڕێدابردن و چەواشەکردنی ھاوڵاتییان، لێدانە لە سەرکەوتن، نوێبوونەوە و گەشەی یەکێتی.

ھەروەھا داوا لە دەزگاکانی راگەیاندن دەکەین لە حاڵەتێکی لەم شێوەیەدا، بۆ وەرگرتنی زانیاری پەیوەندی بە دەزگا فەرمییەکانی یەکێتیی نیشتمانیی کوردستانەوە بکەن تاوەکو ھەواڵی ھەڵە و چەواشەکارانە بڵاونەکەنەوە.

لەگەڵ رێزدا 
مەکتەبی رێکخستنی یەکێتیی نیشتمانیی کوردستان 
٢٧ی تەممووزی ٢٠٢٢

"فەھمی بورھان"سەرۆکی دەستەی گشتی ناوچە کوردستانییەکانی دەرەوەی ئیدارەی ھەرێم بە کوردسات نیوزی راگەیاند، لە عێراق ئامادەکاری بۆ ئەنجامدانی سەرژمێری گشتی کراوە، بەڵام پێویستە لە ناوچە کوردستانییەکان ھەڵسەنگاندنی وورد و بابەتی بۆ بکرێت و رەوشی ناوچەکە لەبەرچاوبگیرێت.

 وتیشی، دەبێت پێش ئەوەی بڕیار لە بابەتێکی گرنگی وەک سەرژمێری بدرێت، بە وردی مامەڵەی لەگەڵ بکرێت، چونکە ئەوە راستەوخۆ پەیوەندی بە ژیانی ھاووڵاتیانی ناوچە کوردستانییەکانەوە ھەیە.

جەختی لەوەشکردەوە، ھەر جۆرە پڕۆسەیەکی گشتگیر لەو ناوچانە ئەگەر بە تەواوی ئاسایی نەکرێتەوە، جێگەی قبوڵ نییە و مافەکانی کورد بەدی ناھێنێت، چونکە ژمارەیەکی زۆر ئاوارە ھەیە و ماددەی ١٤٠ جێبەجێنەکراوە، ئەوەش رەوشێکی گوماناوی لەسەر پڕۆسەی سەرژمێری دروستدەکات، لەبەرئەوە دەبێت ئەو بابەتە پەلەی تێدانەکرێت و دەسەڵاتی ھاوبەشی ھەردوولا بڕیار لەسەر سەرژمێری ئەو ناوچانە بدەن.

لە راگەیەندراوێکدا قائیمقامیەتی سلێمانی دەڵێت، بەمەبەستی چارەسەرکردنی دیاردەی (سواڵ) دەرۆزەکردن، لایەنە پەیوەندیدارەکان کۆبونەوەو گفتوگۆیان لەبارەی ھۆکار و چارەسەرییەکان کرد.

لە راگەیەندراوی کۆبوونەوەکەدا ھاتووە، " قائیمقامی سلێمانی ئاماژەی بەوەکرد کە سەرەڕای ھەوڵە ھەمەلایەنە بەردەوامەکان حاڵەتەکانی سواڵکردن لە سلێمانی زیادیکردووە، تەواوی سواڵکەرەکانیش بەتایبەت منداڵەکان خەڵکانی دەرەوەی پارێزگای سلێمانین و لە ناوچەکانی ترو وڵاتانی دراوسێمانەوە ھاتوون، بۆیە مەبەستمانە بەتەواوەتی حاڵەتەکان کەمبکەینەوەو ھەر کەسێکیش ھاوکاری ئەو کەسانە بێت رێکاری یاسایی لەگەڵ دەگیرێتەبەر."

ھەر ئوتێلێک رێگە بەمانەوەی ئەو کەسانە بدات دادەخرێت و کاتی دوبارەبونەوەی مۆڵەتەکەی وەردەگیرێتەوە. داواش لە موختاری گەڕەکەکان دەکرێت ھاوکاری لایەنە پەیوەندیدارەکان بن.

بڕیاریش درا لە رێگەی مزگەوتەکانەوە مامۆستایانی ئاینی ھاوڵاتیان وشیار بکەنەوە بۆئەوەی ھاوکاری ئەو دەروەزەکەرانە نەکەن. داواش کرا کەناڵەکانی راگەیاندن ھەڵمەتی روبەروبونەوەی دیاردەی دەروەزەکردنی منداڵان و ژنان ئەنجام بدەن.

لە چوارچێوەی ھەوڵەکان بۆ گەڕاندنەوەی روفاتی ئەنفالکراوەکان بۆ ھەرێمی کوردستان، بڕیارە رۆژی شەممەی داھاتوو ٣٠ی تەمموز رووفاتی ١٠٠ ئەنفالکراوی بارزانییەکان لەرێی فڕۆکەخانەی ھەولێرەوە بگەرێنرێنەوە بۆھەرێمی کوردستان و دواتر و لە رۆژی یەکشەممە لە رێوڕەسمێکی تایبەتدا دەگوازرێنەوە بۆ گوندی بارزان و لەوێ بەخاکدەسپێردرێن.

بەپێی زانیارییەکان لە ماوەکانی رابردوودا روفاتەکان لە بیابانەکانی عەرعەر لەباشوری عێراق دۆزراونەتەوە، دواتر بەمەبەستی ئەنجامدانی پشکنینی"دی ئێن ئەی"رەوانەی بەغداد کرابوون بۆ ناسینەوەیان.

سامان بەرزنجی لە کۆنگرەیەکی رۆژنامەوانیدا رایگەیاند، ھەوڵدەدەن سەرجەم کێشەکانی دەرمان لە نەخۆشخانەی ھیوا و نەخۆشخانەکانی تری سلێمانی چارەسەر بکەن .

وتیشی لە کۆی تووشبووانی شێرپەنجە کە لە سەنتەرەکانی چارەسەری تووشبووانی شێرپەنجە لە ھەرێم چارەسەردەکرێن،  رێژەی لەسەدا ٤٠ ی گەورەکان و لەسەدا ٦٠ ی منداڵان لە دەرەوەی ھەرێمی کوردستانەوە ھاتوون بۆ وەرگرتنی چارەسەر .