بەپێی میدیاکانی تورکیا، ھەریەکە لە کەسکین بایندر ھاوسەرۆکی گشتی دەبەپە، خەیرەدین ئاڵتون و سەڤال گولمەز بەڕێوەبەرانی دەبەپەی ئامەد، زەکی ئیرمەز ھاوسەرۆکی دەبەپەی شڕنەخ لەلایەن پۆلیسەوە، لە چوارچێوەی دۆسیەی لێپرسینەوەی ئامەد دەستگیرکراون.

ھەروەھا شەنگول پۆڵات و ھارون ئوکتای ھاوسەرۆکانی دەبەپەی وان، ھەدیە ئەنمەک ھاوسەرۆکی دەبەپەی روحا، ئەتھەم ئونال و زولەیخا ئاسلان ھاوسەرۆکانی دەبەپەی دیلۆک، شەرەفەدین ئاسلان ھاوسەرۆکی دەبەپەی مێردین، بە گشتی ١٤ کەس دەستگیرکران.

لە ئاگری و ئێلحیش پۆلیس ھەڵیکوتایە سەر باڵەخانەی پارتەکە بۆ دەستگیرکردنی ھاوسەرۆکانی دەبەپەی ھەردوو شارەکە.

لە پەیوەندییەکەدا "چاوش ئۆغلۆ" جەختی کردەوە لە بەردەوامیدان بە ئۆپراسیۆنەکانیان لە سوریا، لە پێناو پاراستنی ئەمنییەتی وڵاتەکەیان. 

چاوش ئۆغلۆ و ئەنتۆنی بلینکن رەوشی ئۆکرانیان تاوتوێ کرد و جەختیان کردەوە لە گرنگی جێبەجێکردنی رێککەوتنی رەوانەکردنی دانەوێڵە و فراوانکردنی ھاوپەیمانی باکوری ئەتڵەسی "ناتۆ". 

وەزیرانی دەرەوەی تورکیا و ئەمریکا کڕینی فڕۆکەی ئێف ١٦شیان تاوتوێکرد، کە تورکیا بەپێی رێککەوتنێک لە ئەمریکای دەکرێت. 

پەیامنێری کوردسات نیوز لە برادۆست رایگەیاند، لە بەیانیی ئەمڕۆوە سوپای تورکیا بە دۆشکە تەقەی ھەڕەمەکی لە گوندەکانی ناوچەی خەلیفان و سیران لە سنووری برادۆست کردووە و بە وتەی چەند کەسێک لە دانیشتووانی ئەو گوندانە، تەقەی ھەڕەمەکیی تورکیا چەند سەعاتێک بەردەوامبووە.

تەقەی ھەڕەمەکی تورکیا لە گوندەکانی سنووری برادۆست لە کاتێکدایە، رۆژی چوارشەممە فڕۆکە جەنگییەکانی تورکیا بە چڕی کوێستانەکانی بەربزین و گەرووی سنگایان لە سنوری قەزای سیدەکان بۆردومان کرد

بۆ١٢مین ھەفتە لەسەریەک دانیشتوانی شاری زاھیدانی سەر بە پارێزگای سیستان بلوجستان دوای نوێژی ھەینی خۆپیشاندانیان کردوو چەندین دروشمیان لە دژی دەسەڵات وتەوە.

عەبدولحەمید ئیسماعیل زاھی ئیمامی ھەینی زاھیدان رایگەیاند، دەسەڵاتی ئێستا بە پشتیوانی گەل ھاتووەو تا ئەو کاتەی گەل پشتیوانی بکات بەردەوام دەبێت .

وتیشی، دەسەڵات بەبەکارھێنانی چەک و توندوتیژی ناپارێزرێت و پێویستە ھێزەکانی سوپا بگەڕێنەوە شوێنەکانیان خۆیان بەدووربگرن لە سەرکوتکردنی خۆپیشاندەران.

خۆپیشاندان و ناڕەزاییەکانی ئێران و رۆژھەڵاتی کوردستان زیاتر لە سێ مانگە بەردەوامەو تا ئێستا ٥٠٦ کەس گیانیان لەدەستداوە.

نووسینگەی رۆژنامەوانیی سەرۆک بافڵ جەلال تاڵەبانی سەرۆکی یەکێتیی نیشتمانیی کوردستان روونکردنەوەیەکی بۆ رای گشتی بڵاوکردەوەو ئاماژەی بەوەکرد، دوای بڕیارەکەی سەرۆکی یەکێتی بۆ داخستنی ھەموو ئەو شوێنانەی گەڕەکی سەرچنار کە دوورن لە ئاین، ئاکار و رەوشتی بەرزی کۆمەڵگەی کوردییەوە، سەرۆک بافڵ بڕیاریشیداوە سەرجەم پێداویستییە خزمەتگوزارییەکان کە پێویست و گونجاون بۆ سەیرانگەی سەرچنار و رەخساندنی ژینگەیەکی لەبار بۆ خێزانەکان دابینبکات.

 رونیشیکردۆتەوە، خزمەتگوزارییەکان رووناککردنەوەی شەقامەکان، ناشتنی نەمام و سەوزکردنی زیاتر و جوانترکردنی باخچەکان، پاککردنەوەی سەیرانگەکان، دابینکردنی ژینگەیەکی ئارام بۆ خەڵک لە رووی ئاسایش و ئارامییەوە ھەروەھا دروستکردنی شوێنی یاریی منداڵان لە خۆدەگرێت.

نووسینگەی رۆژنامەوانیی سەرۆک بافڵ جەلال تاڵەبانی راشیگەیاندوە، ئەم ھەنگاوەی سەرۆک بافڵ جەلال تاڵەبانی دەستپێکی راگەیاندنی پرۆژەیەکی گەورەترە بەناوی (ئاشتکردنەوەی سلێمانی) و لە سەیرانگەی سەرچنارەوە وەک سیمایەکی مێژوویی و گرنگی شارەکە دەستپێدەکات و لەپێناو ئاوەدانکردنەوە و پێشکەشکردنی خزمەتگوزاری زیاتر بۆ سلێمانی بەردەوام دەبێت.

حکومەتی ھەرێم لەراگەیەنراوێکدا رایگەیاند،  بە توندی ھێرشی سەر ڕەوەندی کورد لە پاریس سەرکۆنە و شەرمەزار دەکات و پرسە و سەرەخۆشی لە بنەماڵە و کەس وکاری قوربانییانی ھێرشەکە دەکات و ھیوای چاکبوونەوەی خێراش بۆ بریندارەکان دەخوازێت . 

حکومەتی ھەرێم داواش لە ڕەوەندی کورد لە ئەوڕوپا دەکات ئارام بن و دان بەخۆیاندا بگرن . 

دەشڵێت، باوەڕی تەواویان بە دامودزگاکانی حکومەتی فەرەنسا و سیستەمی دادوەریی ئەو وڵاتە ھەیە کە ڕێکاری پێویست دەگرنەبەر بۆ پاراستنی کوردستانییانی نیشتەجێی فەرەنسا و بەسزاگەیاندنی ھێرشبەر و تاوانباران . 

وەزارەتی گەنجینەی ئەمریکا لە تویتێکدا رایگەیاند، سزاکان دوو بەرپرسی بەسیج و دوو بەرپرسی پاسداران و محەمەد جەعفەر مونتەزەری داواکاری گشتی گرتووەتەوە بەھۆی داواکردنی سزادانی توندی دەستگیرکراوانی خۆپیشاندانەکان.

سزاکان ھەروەھا کۆمپانیایەکی ئێرانی گرتووەتەوە بەھۆی دروستکردنی کەرەستەی تایبەت بە سەرکوتکردنی خۆپیشاندەران بۆ ھێزە ئەمنییەکانی ئێران.

لەدوای سەرھەڵدانی خۆپیشاندانەکانەوە، ئەمریکا چەندین سزای نوێی بەسەر ئێراندا سەپاندووە، بەھۆی سەرکوتکردنی خۆپیشاندەرانەوە.

ئێوارەی رۆژی چوارشەممە بە بۆنەی ھاتنی جەژنەکانی سەری ساڵ، وەزارەتی پێشمەرگە لە شاری ھەولێر ئێوارە خوانێکی بۆ راوێژکارانی سەربازیی ھاوپەیمانی نێودەوڵەتی لە ھەرێم ڕێکخست و کۆڵۆنێڵ دۆنسی یۆست، فەرماندەی ھێزەکانی ھاوپەیمانان لە ھەرێم، ھاوکاری و پاڵپشتی ھاوپەیمانانی بۆ وەزارەتی پێشمەرگە دووپاتکردەوە و رایگەیاند، پەیوەندییەکانیان لەگەڵ وەزارەتی پێشمەرگە بەردەوام دەبێت و ھاوکاردەبن بۆ بەرەوپێش بردنی پڕۆسەی چاکسازی و یەکخستن و رێکخستنەوەی ھێزەکانی پێشمەرگە.

ھاوکات، لیوا روکن بەختیار محەمەد ئەمینداری گشتی وەزارەتی پێشمەرگەش رایگەیاند، ھێزەکانی ھاوپەیمانان بەشێکی گرنگن لە پڕۆسەی چاکسازی و رێکخستنی ھێزەکانی پێشمەرگە.

ئەوەش لە کاتێکدایە کە رۆژی سێشەممە ئەمینداری گشتی وەزارەتی پێشمەرگە بە کوردسات نیوزی راگەیاند، ھاوپەیمانی نێودەوڵەتی ھەڕەشەی راگرتنی ھاوکارییەکانی دەکات بۆ وەزارەتی پێشمەرگە و پێیانوتوون ئەگەر یەکێتی و پارتی یەکگرتوو و یەکڕیزنەبن ھاوکارییەکان رادەگرن.

"جۆرجیا میلۆنی" تەمەنی ٤٥ ساڵە و لە مانگی تشرینی یەکەمی رابردوو وەک یەکەم سەرۆک وەزیرانی ژن لە ئیتاڵیا ھەڵبژێردرا. 

ئیتاڵیا لە ساڵی ٢٠١٤ەوە ئەندامە لە ھاوپەیمانی نێودەوڵەتی دژی داعش و چەندین ھاوکاری و پاڵپشتی پێشکەشی عێراق و ھەرێم کردووە. 

بەپێی راپۆرتی ھاوپەیمانی نێودەوڵەتیش، ئیتاڵیا ٩٠٠ سەرباز و راوێژکاری لە عێراق و ھەرێم ھەیە کە مەشق و راھێنان بە ھێزی پێشمەرگە و سوپای عێراق دەکەن. 

ھاوکات ئیتاڵیا ئەندامی دامەزرێنەری یەکێتی ئەوروپایە و سێیەم گەورەترین ئابورییە لە ناوچەی یۆرۆ.

بەڕێوەبەرایەتی گشتی تەندروستی پارێزگای سلێمانی رایگەیاند، لە ڕۆژانی پشووەکاندا جگە لە نەخۆشخانە فریاکەوتنەکان، سەرجەم نەخۆشخانە و سەنتەرەکانی پێدانی چارەسەری کیمیایی و سەنتەری چارەسەر بە تیشکی شێرپەنجەیی و سەنتەرەکانی شوشتنی گورچیلە کراوە دەبن و بەردەوام دەبن لە پێشکەشکردنی خزمەتگوزاری تەندروستی بە شێوەی ئێشکگر.

تەندروستی سلێمانی داواش لە ھاووڵاتیان دەکات لەکاتی بوونی ھەر حاڵەتێکی کتوپڕدا، دەتوانن پەیوەندی بە سەنتەری فریاکەوتنی خێرای تەندروستی ژمارە  ١٢٢ بکەن.

لە رۆژی ٢٥ی کانوونی یەکەمی ٢٠٢٢ تا ١ی کانوونی دووەمی ٢٠٢٣ لە سەرجەم دامودەزگاکانی حکومەت پشووی رەسمییە.

ڕەشمار ئێزدیار ڕەشۆ، منداڵێکی تەمەنی پێنج ساڵانی خەڵکی شاری عەفرینی رۆژئاوای کوردستانە و نەخۆشی کارەبای زیادەی مێشک و رەبۆی ھەیە و پێویستی بە ھەناسەدانی دەستکردە، لە ماوەی رابردوودا بەھۆی بۆردومانی تورکیا ئاوارەی گوندی مازەرێ-ی ھەرێمی شەھبا بوو و ئابڵوقەی حکومەتی سوریاش نەتوانرا دەرمان بۆ نەخۆشییەکەی و ئامێری ھەناسەدانی دەستکردی بۆ دابین بکرێت. 

خێزانی رەشمار ئێزدیار، بە ناچاری لە ڕێگەی پاتری مۆلیدەوە ئامێری ئۆکسجینەکەیان کار پێدەکرد، چونکە بەبێ ئۆکسجینی دەستکرد ناتوانێت بژی و لە رەوشێکی خراپی تەندروستیدا بوو.

دوای سەردانەکەی بۆ رۆژئاوای کوردستان، بافڵ جەلال تاڵەبانی سەرۆکی یەکێتیی نیشتمانیی کوردستان ئەرکی چارەسەرکردن و یارمەتیدانی ئەو منداڵ و خانەوادەکەی گرتووەتە ئەستۆ.

وەزارەتی بازرگانی و پیشەسازیی ھەرێمی کوردستان بڵاویکردەوە، بەڕێوەبەرایەتیی بازرگانیی کەلوپەلی خۆراکیی سلێمانی، ئامادەکاری بۆ دابەشکردنی بەشە خۆراکی ئەم مانگە دەکات، ھەربۆیەش داوا لە بریکارەکانی ناو شاری سلێمانی دەکەن، بۆ داگرتنی بەشە خۆراک پارە بخەوێنن، بە پێچەوانەوە خۆراکیان بۆ داناگیرێت.

راشیگەیاند، ھەر بریکارێک لە ماوەی یەک ھەفتەدا لە رێکەوتی ٢١ی ئەم مانگەوە پارەی نەخەواندبێت، بۆ ھەر رۆژێک ٢٥ ھەزار دینار سزا دەدرێت، ھەروەھا پێویستە بریکارەکە خۆی خواردنەکە لە گەنجینەکانی خۆراک لە ھوانە بار بکات.

 

بەرێوەبەرایەتی گشتی کەشناسی و بوومەلەرزەزانی ھەرێمی کوردستان رایگەیاند، ئەمڕۆ چوارشەممە ئاسمان لە نێوان  نیمچە ھەور بۆ ھەوری تەواو دەبێت.

ئاشکراشیکرد، سبەی پێنج شەممە ئاسمان پەڵە ھەور بۆ نیمچە ھەور دەگۆرێت و لە ھەندێ کاتدا ھەوری تەواو دەبێت، لەگەڵ ئەگەری نمە باران لە ھەندێ ناوچەکانی گەرمیان و پارێزگای ھەڵەبجە لە کاتەکانی ئێوارەدا و پلەکانی گەرماش نزم دەبنەوە.

پشتیوان بەھادین بەرێوەبەری لێکۆڵینەوەی ئاسایشی سلێمانی لە کۆنفرانسێکی رۆژنامەوانیدا ئاماری ئەمساڵی کار و چالاکییەکانی ئاسایشی سلێمانی بڵاوکردەوە و رایگەیاند، لەماوەی ئەمساڵدا سێ ھەزار و ١٥٣ کەس بە تۆمەتی جیاواز دەستگیرکراون، کە بەشی تیرۆر لە بەرێوەبەرایەتی ئاسایشی سلێمانی  ٢٢٧ کەسیان بە تۆمەتی تیرۆر دەستگیرکردووە و٢٠٠ کەسیان خەڵکی شاری سلێمانی بوون و دراونەتە دادگا.

وتیشی،  ٤٠٨  بازرگان و بەکارھێنەری ماددەی ھۆشبەر دەستگیرکراون، کە ٨٠ کەسیان بازرگان بوون و ٣٢٨ کەسیشیان بەکارھێنەری ماددەی ھۆشبەر بوون و لە ژمارەیەش ٥١ کەسیان بیانی بوون.

راشیگەیاند، لەماوەی ئەمساڵ پێنج کیلۆگرام ترلیاک ٢٦ کیلۆگرام حەشیش و ٣٧٣ کیلۆگرام شیشە و شەش کیلۆگرام ھیرۆین و ٦٢٥ ھەزار و ٥٠٠ حەبی ترامادۆڵ دەستیان بەسەرداگیراوە. 

ئاشکراشیکرد، ھەزار و ٣٧٨ بیانی بە تۆمەتی سنور بەزاندن و مانەوەیان لە ناوشاری سلێمانی بە بێ ئاگادارکردنەوەی لایەنە پەیوەندارەکان دەستگیرکراون و روبەروی بەرێوەبەرایەتی نشینگەی سلێمانی کراونەتەوە بۆ ئەنجامدانی کاری یاسایی بەرامبەریان.

ئاماژەی بەوەشکرد، توانراوە لە ماوەی ئەمساڵدا شەش ھەزار ٩٠٤ دەرزی و ھەزار ٤٨٢ پاکەت دەرمانی پزیشکی و ٢٠ تۆن دەرمانی حەشەرات و ٦٧ سەتڵ دەرمانی لەشجوانی قاچاغ دەستیان بەسەردابگیرێت.

بەرێوەبەری لێکۆڵینەوەی ئاسایشی سلێمانی راشیگەیاند، لەماوەی رابردوودا توانراوە دەستبگیرێت بەسەر ھەزار و ٢٩ ئۆتۆمبێل و ماتۆڕسکیل، کە رێگەپێدانیان نەبووە یان بێسەرەتا بوون و ھەروەھا دەستبەسەر ٧٥٢ پارچە چەکی جۆراوجۆر و ٢٤ ھەزار و ٩٧٤ فیشەک گیراوە.

پشتیوان بەھادین رایگەیاند، ھەرچەندە لە خوێندنگەکان ھیچ بەکارھێنەر و بازرگانێکی ماددەی ھۆشبەریان دەستگیرنەکردووە، بەڵام خوێندکار ھەبووە لەسەر بەکارھێنانی ماددەی ھۆشبەر دەستگیرکراوە.

ئاری ئەحمەد بەڕێوەبەری ئاو و ئاوەڕۆی ھەرێمی کوردستان بە کوردسات نیوزی راگەیاند، لە ھەشت مانگی رابردوودا نزیکەی ٤٠ ھەزار ھاوبەشی نوێ بۆ تۆڕی ئاو زیادیکردووە و لەئێستاشدا لە کۆی یەک ملیۆن و ٦٥ ھەزار ھاوبەشی ئاو، ٨٠٪ یان پێوەری ئاویان بەستووە.

وتیشی، ئەمڕۆ وادەی بەستنی پێوەری ئاو کۆتاییھاتووە، بەڵام داوایانکردووە وادەکە تاکو ٢ بۆ ٤ مانگی تر درێژ بکرێتەوە.

لە کۆبوونەوەکەدا پرسی کورد و گۆڕانکارییە سیاسییەکان گفتوگۆیان لەبارەوەکرا و بە گرنگییەوە باس لە تەبایی و یەکڕیزیی کورد لە ھەر چوار پارچەی کوردستان و پرۆژە نیشتمانییەکەی یەکێتیی نیشتمانیی کوردستان کرا کە خۆی لە یەکخستنەوەی نێو ماڵی کورد و بەدیھێنانی ئامانجە نەتەوەیی و کوردستانییەکاندا دەبینێتەوە.

کۆبوونەکەوە جەختی لەدرێژەدان بە گفتوگۆی نیشتمانی و بونیادنەرانە کردەوە بۆ چارەسەرکردنی ئاشتییانەی کێشەی کورد لە رۆژئاوا، ھەروەھا بژاردەی سەربازی و شەڕ بۆ یەکلاییکردنەوەی کێشەکان رەتکرایەوە و داواکرا پشتیوانی لە دۆزی کورد بکرێت و دەرچەی سیاسی بۆ زاڵبوون بەسەر ئاڵنگارییەکاندا بدۆزرێتەوە.

لە بەرامبەردا ھاوسەرۆکانی پەیەدە ستایشی ھەڵوێستی نیشتمانی و مێژوویی یەکێتیی نیشتمانیی کوردستانیان کرد بۆ یەکخستنی ریزەکانی گەلی کورد و رایانگەیاند، سەردانی سەرۆکی یەکێتی بۆ رۆژئاوا رەھەندێکی مێژوویی و نەتەوەیی لەخۆیدا ھەڵگرتووە، بانگەوازێکی ئاشکرایە لەپێناو یەکڕیزیی گەلی کورد و ھەوڵدان بۆ بەدیھێنانی مافەکانمان. ئەمەش ھەمان سیاسەت و رێبازی سەرۆک مام جەلالمان دەھێنێتەوە یاد و بەھەمووشێوەیەک پشتیوانی لێدەکەین.

ھەر لە کۆبوونەوەکەدا سەرۆک بافڵ جەلال تاڵەبانی سیاسەت و ھەڵوێستی یەکێتی روونکردەوە و رایگەیاند، یەکێتیی نیشتمانیی کوردستان پشتیوانی ھەموو خەباتێکی مەدەنی و ئاشتیانە دەکات لەپێناو پاراستن و بەدیھێنانی مافەکانی گەلی کورددا. لەسەر ھەمان رێچکەی سەرۆک مام جەلال درێژە بە سیاسەتی کوردستانیانەی خۆمان دەدەین و ئامانجمان یەکڕیزی و تەبایی نێو ماڵی کوردە. بۆ ئەمەش دەبێت ھەموومان ھاوکار و ھەماھەنگ بین و کار بۆ پرسی کورد بکەین چونکە تاوەکو کێشەی کورد چارەسەر نەکرێت، ئاشتی و سەقامگیری لە رۆژھەڵات نایەتەدی.