کوردستان
دەقی پەیامەکەی بافڵ جەلال تاڵەبانی:
ئەمڕۆ نۆ ساڵ بەسەر جینۆسایدی خوشک و برا ئێزدییەکانمان تێدەپەڕێت و هێشتا ئەم برینە گەورەیە خوێنی لێدەچۆڕێت. تاوەکو ئێستا نەک هیچ هەنگاوێکی کردەیی بۆ قەرەبووکردنەوەی خوشک و برایانی ئێزدی نەنراوە، بەڵکو دەکرێنە قوربانیی ململانێ سیاسییەکان و شەنگالی خۆشەویستیش کە زێدی ئەوانە، وەک وێرانەی دوای جەنگ ماوەتەوە.
ناکرێت دڵسۆزی و وەفاداری بەرامبەر کوردانی ئێزدی تەنیا لە دروشمدا بمێنێتەوە و دەبێت هەمووان هەنگاوبنێین، هەنگاوێک کە بە رۆحێکی نەتەوەیی و مرۆڤدۆستانەوە بنرێت و بەشێکبین لە گەڕانەوەی هیوا بۆ خوشک و براکانمان نەک قووڵکردنەوەی برینەکانیان. بەرپرسیارێتیی هەموومانە ئەم تاوانە گەورەیە لەبیر نەکەین و کار بۆ بەجینۆسایدناساندنی بکەین، بێگومان هەڵوێستی ئەو وڵاتانەش لەیادناکەین کە بە فەرمی تاوانەکەیان وەک جینۆساید ناساندووە.
داوا لە حکومەتی عیراق دەکەین ئەرک و بەرپرسیارێتیی یاسایی و مرۆیی خۆی بەرامبەر ئێزدییەکان بەجێبهێنێت و چیتر لە قەرەبووکردنەوەی ئێزدییەکان و ئاوەدانکردنەوەی شەنگال کەمتەرخەم نەبێت،
درود و سڵاو بۆ گیانی شەهیدان و قوربانییانی ئەم تاوانە لەبیرنەکراوە و سەرفرازیی بۆ خوشک و برا ئێزدییە خۆڕاگرەکانمان.
بافڵ جەلال تاڵەبانی
سەرۆکی یەکێتیی نیشتمانیی کوردستان
لە پەیامەکەی سەرۆکی دامەزراوەی سەرۆک جەلال تاڵەبانی ئاماژە بەوەشکراوە، لەمەودوا زیاتر دەستی ئاوەدانکردنەوە بگەێنن بە ناوچە زیان لێکەوتووەکان، چونکە بەھۆی کێشمەکێشی سیاسی تائێستا خەڵکێکی زۆر لەناو کەمپ و چادرگەکاندا ژیانێکی تاڵ بەسەردەبەن.
دەقی پەیامەکە...
وا نۆ ساڵ بەسەر کارەساتی جینۆسایدکردنی کوردانی ئێزدی تێدەپەرێت ، ئەم کارە تیرۆریستییە جیھان و مرۆڤایەتی بەگشتی ھەژاند؛ کە لەسەدەی بیست و یەک بە بەرچاوی پارێزەرانی مافی مرۆڤەوە جەھالەت لەژێرپەردەی ئاییندا کۆمەڵگەی ئێزیدی بەئامانج بگرن و بە خراپترین شێوە جینۆسایدبکرێن و کچ و منداڵیش بکرێنە دەستکەوتی جەنگ و لە بازارەکاندا وەک کاڵا کڕین و فرۆشتنیان پێوەبکرێت.
تیرۆریستانی داعش بوونەتە قێزەونترین گرووپ کە بەکردەکانیان بێ ئەوەی مرۆڤایەتییان لا گرنگ بێت دیوە جوانەکەی پێکەوەژیانیان لەم کۆمەڵگەیە تێکداو برینێکی قوڵیان لەجەستەی یەکتر قبوڵکردن و پێکەوەژیان دروستکردوو بوونە پەڵەیەکی رەشی نێومێژوو.
سەرباری ھەوڵە بەردەوامەکان لە ئاستی کوردستان و ھەوڵەکانی حکومەتی ئیتیحادی و بەھاوکاری ھەمەلایەنەی مرۆڤدۆستان لە ناوخۆ و جیھان کاری جدی کراوە بۆ ساڕێژبوونی برینی قوڵی کۆمەڵگەی ئێزدی و ھەوڵدراوە کە قوربانیان لەدەست تیرۆریستان رزگاربکرێن و بچنەوە نێو ژیانی ئاسایی خۆیان.
زۆر گرنگە کە لە لەلایەن ھەردوو حکومەتی ھەرێمی کوردستان و حکومەتی عێراقی فیدراڵ کاری راستەقینە بکرێت بۆئەوەی ئەم تاوانە قێزەونە لە سەرتاسەری جیھان و کۆمەڵگەی نێودەوڵەتیدا بە جینۆساید بناسێنرێت وە بۆ لەمەودوا زیاتر دەستی ئاوەدانکردنەوە بگەێنن بە ناوچە زیان لێکەوتووەکان، چونکە بەھۆی کێشمەکێشی سیاسی تائێستا خەڵکێکی زۆر لەناو کەمپ وچادرگەکاندا ژیانێکی تاڵ بەسەردەبەن.
لەم بۆنە پڕ ژان و ئازارەدا درود بۆ رۆحی بەرزی شەھیدانی دەستی غەدری تاوانی شەنگال دەنێرین و یادوو بیرەوەریان لە دڵماندا زیندووە و خۆڕاگری ئەوانیش وەک سیمبولی شانازی نەتەوەییمان سەیر دەکرێت کە ھیچ گرووپ و تاقمێک ھێزی لەناوبردنی کوردانی رەسەنی ئێزیدی نییە.
باڵیۆز د. محەمەد سابیر
سەرۆکی دامەزراوەی سەرۆک جەلال تاڵەبانی
٣/٨/٢٠٢٣
بەڕێوەبەرایەتی کۆنتڕۆلی جۆری دەرمان لە ھەرێمی کوردستان رایگەیاند، لەسەر بڵاوبوونەوەی ھەواڵێک لە چەند پەیج و ماڵپەڕێک لە ناوخۆ و دەرەوە سەبارەت بە دەرمانی کۆڵد ئاوت، دوای بەدواداچوونی وردی زانستی و پیشەییانەی روونی دەکەنەوە، کە بە دەرمانەکە بە شێوەیەکی رەسمی ھاوردەی ھەرێمی کوردستان کراوە و ھەڵسەنگاندنی تاقیگەیی بۆ ئەنجامدراوە و کارگەی بەرھەمھێن تۆمارکراوە.
دەشڵێت، بۆ دڵنیابوونەوە لە سەلامەتی دەرمانەکە و پاراستنی تەندروستی ھاوڵاتیان بڕیاریاندا بە راگرتنی مامەڵەکردن و بەکارھێنانی دەرمانەکە و راکێشانەوەی ھەموو ئەو ژمارە باجانەی کە لە بازاڕەکانی ھەرێمی کوردستاندا بوونیان ھەیە.
ئاماژەی بەوەشکردووە، ھەروەھا بڕیادراوە بە ھەڵپەساردنی کارگەی بەرھەمھێنەر و راگرتنی ھاوردەکردنی بەرھەمەکانی کارگەکە تا دەرچوونی ئەنجامی کۆتایی لێکۆڵینەوە.
پێشتریش وەزارەتی تەندروستی عێراق وەڵامی ئاژانسی بلومێرگی ئەمریکی داوەتەوە لەبارەی ژەھراویبوونی دەرمانی "کۆڵد ئاوت"، کە بۆ نەخۆشی سەرمابوونی منداڵ بەکاردەھێندرێت، ئاماژەی بەوەکردبوو، بابەتێکی نوێ نییە و پێشتر وەزارەتی تەندروستی بەدواداچوونی بۆ کردووە.
دەقی پەیامەکە...
جینۆسایدکردنی خوشک و برا ئێزیدییەکانمان درێژرکراوەی ھەمان ئەو کولتورە وەحشیگەرانەیە کە پڕۆسەی کۆمەڵکوژی دژ بە نەتەوەکەمان ئەنجامدا
دەقی پەیامەکە..
نۆ ساڵ لەمەوبەر، رێکخراوی تیرۆریستی داعش پەلاماری شەنگالیداو زۆر بێ بەزەییانە دەستیان لە ھیچ شتێک نەپاراست، بەو ھۆیەشەوە بە ھەزاران کەس لە ژن و منداڵ، گەنج و پیر جینۆساید کران، و بە ھەزارانی دیکەش ئاوارەبوون، و ژمارەیەکی زۆریش لە کچ و ژنانی ئێزیدی لەلایەن ئەو رێکخراوە تیرۆریستییەوە ڕفێنران.
جینۆسایدکردنی خوشک و برا ئێزیدییەکانمان درێژرکراوەی ھەمان ئەو کولتورە وەحشیگەرانەیە کە لە رابردوودا پڕۆسەی کۆمەڵکوژی دژ بە نەتەوەکەمان ئەنجامدا، ئەو رووداوە ئەوەمان پێدەڵێت کە لە سەردەمی عەولەمەشدا ھێشتا عەقڵییەتێک ماوە کە باوەڕی بە کوشتن، سڕینەوەی بەرامبەرکەی، بیری فاشیزم و کۆنەپەرستی ھەیە.
رووداوی جینۆسایدکردنی خوشک و برا ئێزیدییەکانمان راستییەکی حاشاھەڵنەگری بیر خستینەوە؛ ئەویش ئەوەیە ھێشتا نەتەوەکەمان لە بەردەم ھەڕەشە و مەترسیدایە، و دەبێت خۆمان بۆ ئەگەر و پێشھاتی ھاوشێوەی شەنگال ساز و ئامادە بکەین! ئەم یادە مەرگەساتە بە دەرفەتێک دەزانم؛ کە تیایدا جەخت لە یەکڕیزی و ھاوھەڵوێستی سەرجەم حزب و لایەنە کوردستانییەکان بکەمەوە، و بە یەک گوتار و ھەڵوێستی ھاوبەش رووبەڕووی ئاڵنگارییەکان ببینەوە.
ھەروەھا لەسەر ھەردوو لایەنی حکومەتی فیدڕاڵ و حکومەتی ھەرێمی کوردستانیش پێویستە کە ھەوڵەکانیان خێرا بکەن بە ئاراستەی ئاساییکردنەوەی دۆخی شەنگال و گێڕانەوەی سەرجەم ئاوارەکان بۆ زێدی خۆیان و دەستەبەرکردنی ژیانێک کە شایستە بێت بە گەورەیی ئەو مەرگەساتەی کە بەسەر خوشک و برا ئێزیدییەکانمان ھات.
سڵاو لە روحی پاکی جینۆسایدکراوانی خوشک و برا ئێزیدییەکانمان، سەربەرزی و مانەوە بۆ شەنگالییەکان
ئاسۆ مامەند
کارگێڕی مەکتەبی سیاسی یەکێتیی نیشتمانیی کوردستان
پێش نیوەڕۆی ئەمڕۆ پێنچ شەممە ٣/٨/٢٠٢٣ سەعدی ئەحمەد پیرە ئەندامی مەکتەبی سیاسی یەکێتی نیشتیمانی کوردستان، بە یاوەری لیوا فەتاح کەریم، فاتیح مەلا قەرە سەرۆکی لقی ھەولێری پێشمەرگە دێریینەکان، کاروان گەزنەیی، شەمۆل ئاشتی ئەندامانی خولی پێشووی پەرلەمانی کوردستان، دیدار ئەبوبەکر خۆشناو، رێباز شەھید شێرۆ سەردانی مەڵبەندی ٢٤ی ڕێکخستنی ڕاپەڕینی یەکێتی نیشتمانی کوردستانی کردو لەلایەن ئەحمەد زرار لێپرسراوی مەڵبەندی ڕاپەڕین و کادیرانی مەڵبەندەوە پێشوازی لێکرا.
لەمیانی سەردانەکەیدا سەعدی ئەحمەد پیرە ھیوای سەرکەوتنی بۆ لێپرسراوی مەڵبەند خواستو، باسی لەگرنگی ڕۆڵ و پێگەی دەڤەری ڕاپەرین لەکوردستان بەگشتی و بۆ یەکێتی نیشتمانی کوردستان بە تایبەتی کرد و رایگەیاند، یەکێتی نیشتمانی کوردستان وەک ھێزێکی کاریگەری سەر گۆڕەپانی سیاسی ھەرێمی کوردستان وعێراق وناوچەکەیە، بەتایبەت دوای ھەموو ئەو سەرکەوتنانەی کە بۆ ڕزگاری وئازادی و لەقۆناغەجیاجیاکانی حوکمڕانی وپەرلەمانی ودیموکراسی بەدیھاتن و زاڵبوون بەسەر ھەموو ئەو بەربەستانەی کەھاتوونەتە پێش و بۆ بەرگریکردن لەسنورەکانی نیشتمان وقوربانیدان بۆ پارێزگاری لەدەستکەوتەکانی گەلەکەمان.
لای خۆیەوە ئەحمەد زرار لێپرسراوی مەڵبەندی ٢٤ی راپەرینی یەکێتی نیشتمانی کوردستان، سوپاسی سەعدی ئەحمەد پیرە یکرد و جەختی لەوەکردەوە، کە کاردەکەن بۆ سەرخستنی بەرنامەکانی یەکێتی نیشتمانی کوردستان.
شایانی باسە ھەریەک لە فەرماندە فەریق عەبدوڵا بۆر و لیوا سەردار وەھاب، بەشێک لە فەرماندە سەربازییەکانی سنورەکە و جێگرانی مەڵبەندی پێشمەرگە ئامادەی کۆبوونەوەکە بوون.
کاروان یاروەیس ئەندامی ئەنجومەنی نوێنەرانی عێراق لە فراکسیۆنی یەکێتی رایگەیاند، لەسەر داوای ئەوان و لە رێگەی نوێنەریان لە لیژنەی تەندروستی پەرلەمان د.گەیلان قادر، وەزیری تەندروستی عێراق رەزامەندی پیشاندا لەسەر ناردنی بەشێک لە دەرمانی نەخۆشانی درێژخایەن لە نەخۆشخانەکانی گەرمیان، کە بەپێ لیستێک ئیدارەی نەخۆشخانەی گشتی کەلار ناردبووی.
ئاماژەی بەوەشکرد، ژمارەیەکی زۆر لە ھاوڵاتیانی گەرمیان بەدەست نەخۆشییە درێژخایەنەکانەوە دەناڵێنن و بەھۆی نەبوونی دەرمان ناچارن لە بازاڕدا دەرمان بکڕن.
بەڕێوەبەرایەتی گشتی بازرگانی ھەرێم رایگەیاند، بەشێکی دیکەی شایستە داراییەکانی گەنمی جوتیاران بۆ ساڵی ٢٠٢٣ خراوەتە سەر ھەژماری وەزارەتی بازرگانی ھەرێم و دوای تەواوکردنی رێکارە کارگێڕی و داراییەکان بەسەر جوتیاراندا دابەشدەکرێت.
بەپێی راگەیەنراوەکە، بڕی ٥ ملیار دینار بۆ پارێزگای سلێمانی و ٣ ملیار دینار بۆ ھەولێر و ٢ ملیار دیناریش بۆ جوتیارانی پارێزگای دھۆک تەرخانکراوە.
دەقی پیرۆزباییەکە...
جەژنی چلەی ھاوین لە ھەموو خوشک و برا ئێزدییەکان پیرۆز دەکەم و ھیوادارم ئەم جەژنە لە دڵخۆشی و کامەرانیدا بەسەربەرن.
ئەم بۆنەیە بە دەرفەت دەزانم پشتیوانی تەواوی یەکێتیی نیشتمانیی کوردستان دووپاتبکەمەوە بۆ پاراستن و بەدیھێنانی ماف و خواستەکانتان، ھەروەھا یەکخستنی ھەوڵەکان لەپێناو ئاوەدانکردنەوەی شەنگال و گەڕانەوەی خەڵکە خۆشەویستەکەی بۆ زێدی خۆیان.
شاد و سەرفرازبن
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
دەقی پەیامەکەی سەرۆک کۆماری عێراق:
گەلەکەمان بە ئازار و توڕەیەوە یادی چل ساڵەی ئەو جینۆسایدە دەکاتەوە کە ھەزاران لە ڕۆڵەکانی کوردستان لە بارزانییەکانی لە نێوان شەھید و بێ سەرو شوێنکراوانی کردە قوربانی لە ھەرێمی کوردستان.
ئەو تاوانە قێزەونەی کە ڕژێمی دیکتاتۆری ئەنجامیدا، دەربڕینی ئەو دڕندەییەیە کە تایبەتمەندی ڕەفتاری ستەمکارانەی نیشاندا، کەدرێغی نەدەکرد لە ئەنجامدانی قێزەونترین تاوان.
تاوانی بەئامانجگرتنی ھاونیشتمانیانی بارزانییەکان زنجیرەیەک تاوانی جینۆسایدی بەدوای خۆیدا ھێنا لە چوارچێوەی ئەوەی کە بە ئۆپەراسیۆنەکانی ئەنفال ناسرابوو، دواتر تاوانی ھەڵەبجە بە بەکارھێنانی چەکی کیمیاوی دژی ھاونیشتمانیانی مەدەنی، و ھەموو ئەو تاوانانەش بە ئامانجی کۆمەڵکوژی بوو ، بەرامبەر بە ھەزاران پیاو ، گەنج و پیر، ژن و منداڵ بەبێ گوێدانە ھیچ بەھایەکی مرۆیی.
زۆریش زەحمەت نیە پەیوەندی نێوان ئەو تاوانانەی ڕژێمی دیکتاتۆرییەت پێشتر ئەنجامیدا و تاوانەکانی تیرۆر و جینۆساید کە بە ھەزاران ھاوڵاتی بونە قوربانی پێکەوە گرێبدرێت، وەک ئەوەی لەسەر دەستی داعش لەکاتی داگیرکردنی ژمارەیەک پارێزگا و شار و گوندی عێراقدا ڕوویدا.ئەمانەیش شێوازی جۆراوجۆری ڕەگەزپەرستی و تایەفەگەری نەتەوەی وئایینیە .
چەسپاندنی دیموکراسی و پتەوکردنی دەسەڵاتی یاسا و باوەڕی ڕاستەقینە بە قبوڵکردنی فرەچەشنی و جیاوازییەکانی بنەمای سەرەکین بۆ دەستەبەرکردنی ئاسایش و ئارامی ھاونیشتمانیان لە وڵاتێکدا کە ھەست بە مافەکانی خۆیان بکەن و بەرگری لەسیستمە دیموکراسییە دادپەروەرەکەی بکەن و ئاستیشی بەرزبکەنەوە بۆ ڕیزی دیموکراسییە چەسپێنراوەکان لە جیھانی ھاوچەرخماندا.
یادی شەھیدە سەربەرزەکان و قوربانیانی جینۆساید دەکەینەوە و لەگەڵ قوربانیدان و ئازارەکانی بنەماڵەکانیانین وەک وانەیەکیش زیاتر ئیرادەمان بەھێز دەکات بۆ ڕێزگرتن لە قوربانیەکان و شکۆمەندکردنی قارەمانێتی و کارکردن بۆ پاراستنی مافی خێزانە زەحمەتکێشەکان .
سەربەرزی بۆ شەھیدان.
و پرسە و سەرەخۆشی قووڵم بۆ خانەوادەی قوربانیانی گەلەکەمان، لە کاتێکدا کە کاروان بەردەوامە بەرەو بونیادنانی عێراقێکی فیدراڵی و دیموکراسی و دادپەروەر و شکۆمەند.
دکتۆر لەتیف جەمال ڕەشید
سەرۆک کۆمار
ئەنجومەنی وەزیران لە کۆبوونەوەدا، داوای لە ھێز و پارت ولایەنە کوردستانییەکان کرد کە ھاوھەڵوێست و یەکدەنگ بن لە سەر داکۆکیکردن لە مافە دەستوورییەکانی خەڵکی کوردستان و دابینکردنی شایستە داراییەکانی ھەرێمی کوردستان کە لە ناو بودجەدا جێگیرکراوە، ھەروەھا ھەردوو وەزارەتی کارەبا و سامانە سروشتییەکانی راسپارد، کە رێوشوێنی پێویست بگرنەبەر بۆ دابینکردنی کارەبا و سووتەمەنی بۆ ھاوڵاتییان.
لە بڕگەیەکی دیکەی کۆبوونەوەکەدا، سەرۆک وەزیرانی سوپاسی قوباد تاڵەبانی جێگری سەرۆک وەزیرانی ھەرێمی کرد، کە لە کابینەی پێشووی حکومەتی ھەرێمەوە کاری لەسەر بە دیجیتاڵکردنی کاروباری فەرمانگە حکومییەکان کردووە.
لە کۆتایی کۆبوونەوەکەدا، ئەنجومەنی وەزیران پشتیوانی خۆی بۆ ھەوڵەکانی سەرۆکایەتی ھەرێمی کوردستان دووپاتکردەوە بۆ دەستنیشانکردنی وادەیەکی نوێ بۆ ھەڵبژاردنی خولی شەشەمی پەرلەمانی کوردستان، داواشی لە حزب و لایەنە سیاسییەکان کرا پشتیوانی لەو ھەنگاوە بکەن.
ھونەر جەمال، وتەبێژی وەزارەتی دارایی و ئابووریی ھەرێم بە کوردسات نیوزی راگەیاند، ئەمڕۆ بەغداد ٥٩٨ ملیار دیناری وەک بەشێک لە پشکی ھەرێمی کوردستان رەوانەکرد و سبەینێ لقی ھەولێری بانکی ناوەندی عێراق رێکارەکانی ناردنی پارەکە بۆ وەزارەتی دارایی تەواو دەکات.
وتیشی، لە دەوروبەری کاتەکانی نیوەڕۆی سبەینێ وەزارەتی دارایی لیستی مووچە رادەگەینێت و مووچەی چەند وەزارەت پێڕاگەشتن دابەشی دەکەن و رۆژانی داھاتوو مووچەی وەزارەتەکانی تر و دەستەکان و خانەنشینان دابەش دەکرێت.
پێشتریش پێشەوا ھەورامانی، وتەبێژی حکومەتی ھەرێم رایگەیاند، بۆ دابینکردنی مووچە پێویستیان بە ٩١٢ ملیار دینارە کە لە عێراقەوە بێت، بەڵام پارەی پێویست نەنێردراوە و تەنھا ٥٩٨ ملیار دینار ھاتووە.
ھاوژین عوسمان سەرۆکی لقی سلێمانی سەندیکای کارمەندانی تەندروستی بە کوردسات نیوزی راگەیاند، تاکو رۆژی پێنجشەممەی کۆتایی ئەم ھەفتەیە چاوەڕوانی ھاتنی مووچە دەکەن بە پێچەوانەوە لە سەرەتای ھەفتەی داھاتووەوە بایکۆتی دەوامەکانیان دەکەن.
وتیشی، داوایان لە سەرجەم بەڕێوەبەری نەخۆشخانە و بنکە تەندروستییەکان کردووە، بۆ ئەم چەند رۆژە، لەرووی دەوامکردنەوە فشار لە کارمەندەکانیان نەکەن و دەوام کەمبکنەوە.
لە بەرامبەردا، محەمەد عەلی جێگری بەڕێوەبەری گشتیی تەندروستیی سلێمانی بە کوردسات نیوزی راگەیاند، ئەوان لەگەڵ بایکۆتکردنی دەوام نین، بەڵام مووچەش بە مافێکی سەرەکی کارمەندەکان دەزانن و مافی خۆیانە ئەگەر مووچە نەبێت دەوام نەکەن.
تائێستا لە ھەرێمی کوردستان مووچەی مانگەکانی حوزەیران و تەمموز دابەشنەکراوە و حکومەتی ھەرێمی کوردستان بۆ دابەشکردنی مووچە چاوی لە ھاتنی بەشە بودجەکەیە لە بەغدادەوە.
دەقی پەیامەکەی قوباد تاڵەبانی:
بەڕێزان خێزان و خانەوادەی کۆچکردوو فەرماندە تۆفیق کانی وەتمانی
بەداخ و پەژارەیەکی زۆرەوە ھەواڵی کۆچی دوایی فەرماندە (تۆفیق کانی وەتمانی)م بیست.
کۆچکردوو (تۆفیق کانی وەتمانی) تێکۆشەرێکی دێرین و بەئەمەکی کوردستان و فەرماندە و پێشمەرگەیەکی قارەمان بوو، کۆچکردنی جێگای داخە.
بەم بۆنە غەمناکەوە پرسەو سەرەخۆشی ئاڕاستەی کەسوکار و بنەماڵە تێکۆشەرەکەتان دەکەم و ھاوبەشی خەم و پەژارەتانم.
خوای گەورە لێی خۆش بێت و جێگای بەھەشت بێت، سەبوری و دڵنەواییش بەھەموو لایەک ببەخشێت.
انا للە و انا الیە راجعون
قوباد تاڵەبانی
سەرپەرشتیاری مەکتەبی سکرتارییەتی سەرۆک مام جەلال
پارێزگای حەسەکە دەکەوێتە باکووری رۆژھەڵاتی سوریا و شەش ناحیەی ھەیە، ھەروەھا سەنتەری شارەکە، ٢٥ گەڕەکی ھەیە و زیاتر لە ٩٠٠ ھەزار دانیشتووی ھەیە.
پارێزگاکەکە سێ کامپی ئاوارەکانی تێدایە، کە نزیکەی ٥٠ ھەزار کەسیان تێدایە، بەڵام چەند ھەفتەیەکە تورکیا ئاوی وێستگەی عەلووکی لەسەر دانیشتووانی ئەو پارێزگایەی رۆژئاوای کوردستان گرتووەتەوە و بەوھۆیەوە پێنج ناحیە و ٢٥ گەڕەک و ٤٢٢ گوند و سێ کامپی ئاوارەکان بێئاون.
تورکیا دوای داگیرکردنی شارۆچکەی سەرێ کانێ لە ساڵی ٢٠١٩، دەستی بەسەر وێستگەی ئاوی عەلووکدا گرت، لەوکاتەوە ئاو وەک چەکێک دژی دانیشتووانی پارێزگای حەسەکە بەکاردەھێنێت، کۆمەڵگەی نێودەوڵەتییش لە ئاستی ئەو پێشێلکارییە بێ دەنگن.
پەیامنێری کوردسات نیوز لە بەغداد راگەیاند، بڕیارە لە کۆبوونەوەکەی ئەمڕۆی ئەنجومەنی وەزیرانی عێراقدا بڕیار لەبارەی ناردنی شایستە داراییەکانی ھەرێم بدرێت و ٩٠٧ ملیار دینار بۆ مووچەی فەرمانبەران رەوانەی ھەرێم بکات.
وتیشی، بەپێی رێککەوتنی حکومەتی ھەرێم و عێراق، دەبێت بەغداد مانگە ٩٠٧ ملیار دینار بۆ مووچەی فەرمانبەرانی ھەرێم رەوانە بکات.
ھاوکات بڕیارە ئەمڕۆ شاندێکی تەکنیکی حکومەتی ھەرێم سەردانی بەغداد بکات و لەبارەی شایستە داراییەکان و دۆسیەی نەوت، دانوستان لەگەڵ بەرپرسانی حکومەتی عێراق بکات.
ئەوەش لەکاتێکدایە کە ئێستا لە مانگی ھەشتداین و ھێشتا چارەنووسی مووچەی مانگی حوزیرانی فەرمانبەرانی ھەرێم بە نادیاری ماوەتەوە و نازانرێت کەی دابەشدەکرێت.
دەقی پەیامەکەی بافڵ جەلال تاڵەبانی، سەرۆکی یەکێتیی نیشتمانیی کوردستان:
بەڕێزان بنەماڵەی سەربەرزی ھەڤاڵ تۆفیق کانی وەتمانی
بەداخێکی زۆرەوە ھەواڵی کۆچی دوایی تێکۆشەر و پێشمەرگەی دێرین (تۆفیق کانی وەتمانی)ـمان پێگەیشت.
بۆ ئەم خەمە گەورەیە، پرسە و ھاوخەمیی قووڵی خۆمان ئاڕاستەی ئێوە و بنەماڵە تێکۆشەرەکەتان دەکەم کە نموونەی باڵای وەفاداری و تێکۆشانن لەپێناو کوردستان.
لەدەستدانی ھەڤاڵ تۆفیق کانی وەتمانی کە پێشمەرگەیەکی ئازا و شۆڕشگێڕێکی بەئەمەکی کوردستان بوو، جێگەی دڵتەنگی و نیگەرانیی قووڵی ئێمەیە.
لەخوای گەورە داواکارم ھەڤاڵی کۆچکردوومان بە بەھەشتی بەرین شاد بکات و سەبووری بەھەموولایەک ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان