کوردستان
زیاتر لە ١٠٠ خێزانی ئاوارە لە كەمپی دیبەگەی هەولێرەوە گەڕانەوە ناوچەكانی خۆیان لە سنوری پارێزگای نەینەوا.
ئیڤان فائیق وەزیری كۆچ و كۆچبەرانی عیراق رایگەیاندوە، لە چوارچێوەی هەوڵەكان بۆ گەڕانەوەی ئاوارەكان و داخستنی كەمپەكان، بە هەماهەنگی نێوان لێپرسراوانی ئیدارەی نەینەوا و هەولێر، ١١١ خێزانی ئاوارە لە كەمپی دیبەگەی هەولێر، بە رەزامەندی خۆیان گەڕاونەتەوە بۆ زێدی خۆیان لە سنوری پارێزگای نەینەوا.
وەزارەتی كۆچ و كۆچبەران بڕیاریداوە بڕی چوار ملیۆن دینار بدرێت بە هەر خێزانێكی ئاوارە كە دەگەڕێتەوە بۆ زێدی خۆی.
بڕیارە کەمێکی دیکە تەرمی ئەو دایك و منداڵەی كە لە یۆنان خنكانبوون، لەسەر ئەركی قوباد تاڵەبانی جێگری سەرۆك وەزیرانی هەرێم و لەڕێگای فڕۆکەخانەی نێودەوڵەتی سلێمانییەوە بگەڕێندرێنەوە هەرێمی كوردستان.
١٦ رۆژ پێش ئێستا، نایلە مستەفا و نور كاوێزی كچی، لە باكووری دورگەی سامۆسی یۆنان گیانیانلەدەستدابوو، بڕیاریشە کەمێکی دیکە تەرمەکانیان بگەڕێندرێنەوە هەرێمی کوردستان و لە شارۆچكەی سەروچاوەی سەر بە ئیدارەی راپەڕین بەخاكدەسپێردرێن.
رۆژی ٢٨ـی مانگی رابردوو، نایلە مستەفا و نور كاوێز، دایك و منداڵێكی تەمەن ١٠ مانگ، بەمەبەستی گەیشتن بە وڵاتانی ئەوروپا بە خێزانی كۆچیان كردبوو، بەڵام بەهۆی نقومبوونی بەلەمەكەیان لە دەریای ئیجە لە باكووری دورگەی سامۆسی یۆنان گیانیانلەدەستدا.
ئەمڕۆ ٢٦ ساڵ بەسەر کۆچیدوایی"هەمزە عەبدوڵا" تێدەپەڕێت کە یەکێک بووە لە دەستەی دامەزرێنەری پارتی دیموکراتی کوردستان.
هەمزە عەبدوڵا؛ ساڵی ١٩١٥ لەگوندی "ڕاژان"ی ناوچەی مەرگەوەڕی ڕۆژهەڵاتی كوردستان لەدایكبووە؛ سیاسەتمەدار و نوسەرێکی چەپ بووە و شارەزاییەکی زۆری لە بوار یاسادا هەبووە، سەرەتا ڕێکخراوێکی بەناوی" پارتی دیموکراتی کورد - عیراق" دامەزراندووە؛ ئەو کەسایەتییە سیاسییە لەناو بزاڤی ڕزگاریخوازی کورد لە عیراقدا ڕۆڵێکی بەرچاوی بینیوە. هەڵسوڕێنەری ڕاستەقینەی بیرۆکەی دامەزراندنی پارتی دیموکراتی کوردستان بووە؛ شانبەشانی ئیبراهیم ئەحمەد و سەرکردەکانی ئەوکاتەی حزبی" شۆڕش و ڕزگاریی".
یەکەمین سکرتێری پارتی دیموکراتی کوردستان بووە. لە ١٣-١٢-١٩٩٨ لە شاری سلێمانی کۆچیدواییکردووە، لە ڕێوڕەسمێکدا لە گۆڕستانی گوندی "سیتەک" بەخاکسپێردراوە.
لەسەر رێگای چەمچەماڵ -سلێمانی بارهەڵگرێك كۆنتڕۆڵی لەدەستدا وخۆی كێشا بە دوو ئۆتۆمبێلی دیكەدا و بەهۆیەوە سێ كەس برینداربوون.
پەیامنێری كوردسات نیوز رایگەیاند، ئێوارەی ئەمڕۆ بارهەڵگرێك لەسەر ڕێگەی سەرەكی چەمچەماڵ- سلێمانی بەخێراییەكی زۆرەوە كۆنتڕۆڵی لەدەستداوە و خۆی كێشاوە بە دوو ئۆتۆمبێلدا و یەكێك لە ئوتۆمبێلەكان كەوتۆتە ناو پردی ئاوە تەقیوەكە كەئێستا كاری نۆژەنكردنەوەی تێدا دەكرێت، بەو هۆیەوە سێ كەس بریندار بوون كە هەرسێكیان عەرەبن.
وتیشی ڕووداوەكە بۆتە هۆی دروستبوونی قەرەباڵغی لەسەر ڕێگەكە و زیانێكی زۆری مادی لێكەوتووەتەوە.
لە كاتی هاتنەدەرەوەی لە مزگەوت و دوای نوێژی هەینی، هاووڵاتییەك لە هەولێر لەبەردەم مزگەوتی حاجی شەمزینی كوژرا.
پەیامنێری كوردسات نیوز رایگەیاند، هاووڵاتییەكی تەمەن ٦٠ ساڵ خەڵكی گوندی دوشیوان، لە كاتی هاتنەدەرەوەی لە مزگەوت، لەلایەن كەسێكەوە تەقەی لێكراوە دەستبەجێ گیانی لە دەستداوە، لەئێستاشدا تەرمەكە رەوانەی پزیشكی دادی هەولێر كراوە.
وتیشی، پێشتر ئەو هاووڵاتییە ٣ كوڕی بەهۆی كێشەی كۆمەڵایەتی لەسەر زەوی و زار كوژراوە.
تا ئێستا پۆلیس و هێزە ئەمنییەكانی هەولێر هیچ رونكردنەوەیەكیان لەبارەی رووداوەكە نەداوە.
شەپۆلێكی بەفربارین پارێزگای وانی لە باكوری كوردستان گرتوەتەوە
بەپێی میدیاكانی توركیا، شەپۆلێكی چڕی بەفربارین پارێزگای وانی لە باكوری كوردستان گرتوەتەوە، ئەوەش كاریگەری نەرێنیی كردووەتە سەر ژیانی هاووڵاتیان، بارینی بەفریش بەردەوامە.
بەهۆی ئەو شەپۆلەوە ئاستەنگی هاتوچۆ دروستبووە و دەوامی خوێندنگەكان راگیراوە، هەروەها رێگەی هاتوچۆی هاووڵاتیان ئەستەم بووە.
داهاتی نانەوتی ئەم هەفتەیەی سنوری پارێزگاكانی سلێمانی و هەڵەبجە زیاتر لە ٩ ملیار دینارە و بەراورد بە هەفتەی رابردوو ٤٧٤ ملیۆن دینار كەمیكردووە.
ماڵپەری شەفافیەت بۆ بڵاوكردنەوەی داهاتی نانەوتی پارێزگاكانی سلێمانی و هەڵەبجە و ئیدارە سەربەخۆكانی ڕاپەڕین و گەرمیان بڵاویكردەوە، داهاتی نانەوتی لە ٧/١٢تا ١٣ی ئەم مانگە، زیاتر لە ٩ ملیار و ٩٨٩ ملیۆن و ٣٢ هەزار دینار بووە كە ٩٩%ی نەختینە و ١%ی بەشێوەی چەك بووە، بەراورد بە هەفتەی رابردووش، بەڕێژەی زیاتر لە ٤% واتە بڕی ٤٧٤ ملیۆن دینار كەمیكردووە.
بەپێی ماڵپەرەكە، داهاتی نانەوتی سنوری پارێزگاكانی سلێمانی و هەڵەبجە لەسەرەتای ئەمساڵەوە تائێستا، زیاتر لە ٨٦٣ ملیار و ٥٩٥ ملیۆن و ٦٦٦ هەزار دینارە، بەراورد بە ساڵی رابردوو ٣١٠ ملیار دینار و بەرێژەی ٢٦% كەمیكردووە.
کامەران عوسمان گەنجێکی کوردی شاری سلێمانییە و بە نوێنەرانیەتی رێکخراوەکەی بووە براوەی یەکەمی خەڵاتیHuman Rights Tulip Awardـی نیودەوڵەتی بۆ مافەکانی مرۆڤ، کە یەکەمجارە کەسێک ئەو خەڵاتە لە هەرێم و عیراق بەدەستبهێنێت.
کامەران عوسمان بە کوردسات نیوزی راگەیاند، "خەڵاتەکە تایبەتە بە مافەکانی مرۆڤ، لە ساڵی ٢٠٠٨ـەوە حکومەتی هۆڵەندا ئەو خەڵاتە دەبەخشێتە باشترین بەرگریکارانی مافی مرۆڤ لە جیهاندا، خەڵاتەکە بە دوو قۆناغ دابەشدەکرێت، سەرەتا هەر باڵیۆزخانەیەک خەڵات بە بەرگریکارێکی مافی مرۆڤ دەبەخشێت، ئێمە لەسەر ئاستی عیراق هەڵبژێردراین و دواتریش کاندید بووین بۆ باشترین بەرگریکاری مافی مرۆڤ لە جیهاندا".
کامەران عوسمان وتیشی، "دواتر لەسەر ئاستی جیهان پێنج کەس ماینەوە و من بوومە براوەی خەڵاتەکە، کە دەخرێتە خزمەتی کاری رێکخراوەکەم کە CPTـیە، یەکەمجارە کوردێک و تەنانەت عیراقییەک ئەو خەڵاتە بەدەستبهێنێت".
رۆژی ١٢ـی ١٢ـی ٢٠٢٤، بە ئامادەبوونی وەزیری دەرەوەی هۆڵندا، ژمارەیەک لە باڵوێزخانە و نوێنەرایەتی ووڵاتان لە هۆڵندا، لە کۆشکی ئاشتی لاهای خەڵاتی براوەی یەکەمی Human Rights Tulip Awardی نێودەوڵەتی بۆ مافەکانی مرۆڤ لە ساڵی ٢٠٢٤دا، پێشکەشی کامەران عوسمان کرا لە رێکخراوی CPT وەک چالاکترین بەرگریکارانی مافی مرۆڤ لە جیهاندا
ئاسایشی سلێمانی لە كەمتر لە ٤٨ سەعاتدا تۆمەتبارانی رووداوی كوشتنی ئەو هاوڵاتییەی دەستگیركرد كە تەرمەكەی لەئۆتۆمبێلەكەیدا دۆزرایەوە، ئاسایش دەڵێت هاوڵاتییەكە بە ٤ فیشەك كوژراوە و لێكۆڵینەوە لە دۆسیەكە بەردەوامە
بەڕێوەبەرایەتی ئاسایشی پارێزگای سلێمانی لە راگەیەنراوێكدا ئاماژەی بۆ ئەوەكردووە، رۆژی چوارشەممەی رابردوو تەرمی هاووڵاتییەك لەناو ئوتۆمبێلەكەی خۆیدا، لەسەر رێگای (عەربەت - سلێمانی) دۆزرایەوە، بەڕێوەبەرایەتی ئاسایشی سلێمانیش لەسەر رووداوەكە دەستبەجێ لێكۆڵینەوە و بەدواداچوونەكانیان دەستیپێكرد و شوێنی دوو تۆمەتبار دەستنیشان كرا، لەسەر فەرمانی دادوەری لێكۆڵینەوەی ئاسایش، توانرا لەماوەی كەمتر لە ٤٨ سەعاتدا دەستگیربكرێن كە تەمەنیان ٢٢ ساڵ ٣١ ساڵن.
راشیگەیاندوە، دوای دەستگیركردن و ئەنجامدانی لێكۆڵینەوەكان تۆمەتباران دانیان بە تاوانەكەیانداناوە و دەركەوت تۆمەتباری سەرەكی بەچەكی جۆری دەمانچە بە چوار فیشەك لە نزیك گوندی (گڵەزەردە) ئەو هاووڵاتییەی كوشتووە و دواتر تەرمەكەی كردووەتە ناو سندوقی ئۆتۆمبێلەكە و لەسەر رێگای (سلێمانی - عەربەت) ئۆتۆمبێلەكەیان بەجێهێشتووە و هەڵهاتوون، لە ئێستاشدا تۆمەتباران بەماددەی 406 لەیاسای سزادان دەستگیركراون و لێكۆڵینەوە لە دۆسیەكانیان بەردەوامە.
لە سلێمانی هەڵمەتێكی فراوان بۆ دەستبەسەرداگرتنی ئۆتۆمبێلە بێسەرەتاكان دەستیپێكرد.
هێزە ئەمنییەكانی سلێمانی بە هاوبەشی هەڵمەتێكی فراوانیان بۆ دەستبەسەرداگرتنی ئۆتۆمبێلە بێسەرەتاكان و لێپێچینەوەی یاسایی لە شۆفێرانی سەرپێچیكار دەستپێكردوە و هەڵمەتەكەش بە دانانی بازگەی كاتی لە سەر شەقامەكانی سلێمانی بەردەوام بێت.
لە هەڵمەتەكەدا رێكاری یاساییش بەرانبەر ئەو شۆفێرانەش دەگیرێتەبەر كە جامی رەش و پەردەیان بە بێ مۆڵەتی یاسایی بەكار هێناوە.
لە سەرەتای ئەم مانگەوە لیژنەی ئەمنی پارێزگای سلێمانی لە راگەیەنراوێكدا بڵاویكردەوە دەست بەسەر ئۆتۆمبێلە بێسەرتاكاندا دەگرن و نابێت هاتوچۆ بەو ئۆتۆمبێلانە بكرێت.
هاوسەرۆكی دەم پارتی دەڵێت، پێویستە توركیا لەوە تێبگات كە كورد بۆ ناوچەكە دڵنیاییە نەك هەڕەشە.
میدیاكانی باكوری كوردستان بڵاویانكردوەتەوە لە چوارچێوەی گفتوگۆ و دانوستانی پارتە ئۆپۆزسیۆنەكاندا هاوسەرۆكانی پارتی یەكسانی و دیموكراسی گەلان هەدەپە لەگەڵ محەمەد ئاریكان، سەرۆكی پارتی سەعادەت كۆبونەتەوە و لە كۆبونەوەكەشدا جەخت لە چارەسەری ئاشتیانەی پرسی كورد لە توركیا كراوەتەوە.
دوای كۆبونەوەكەش، تولای حاتمئۆغلاری، هاوسەرۆكی دەمپارتی لە كۆنفرانسێكی رۆژنامەوانیدا رایگەیاند، ئەو دۆخەی ئێستا لە سوریا رودەدات دەرخەری ئەو راستیەیە كە توركیا زیاتر لە هەموو كاتێكی تر پێویستی بە پڕۆسەی چارەسەری دیموكراتیانە هەیە، بەڵام لایەنی دەسەڵات بە سەپاندنی قەیوم زیانی بە پڕۆسەی ئاشتیانە دەگەیەنێت.
دەشڵێت، پێویستە هەموان لەوە تێبگەن كە كورد بۆ ناوچەكە گەرەنتی و دڵنیاییەوە و نەوەك هەڕەشە.
بەرنامەی هاوڕێی تەمەن لە ئاسیاسێڵەوە نازناوی باشترین بەرنامەی خەڵاتەکانی لە ڕۆژهەڵاتی ناوەڕاستدا بەدەستهێنا و لەم بارەیەوە، بەڕێوەبەری جێبەجێکاری یەکەی بازرگانی ئاسیاسێڵ دەڵێت، بەدەستهێنانی ئەو خەڵاتە بەڵگەی پابەندبوونی ئاسیاسێڵە بە داهێنان و تەرکیزکردنی بەردەوام لەسەر باشترکردنی ئەزموونی بەشداربووان.
ئاسیاسێڵ رایگەیاندووە، پرۆگرامی هاوڕێی تەمەن خەڵاتیTelecom Review Excellence (خەڵاتی نایابیی تێلێکۆم ڕیڤیو)ی بەدەستهێناوە لە بەشی "باشترین پڕۆگرامی وەفاداری و خەڵاتەکان لە ڕۆژهەڵاتی ناوەڕاستدا".
ئەوەش هاتووە، لە ناوەڕاستی کانوونی یەکەمی ئەمساڵ، لە ئاهەنگێکدا لە دوبەی، بە ئامادەبوونی دەستەبژێرێک لە سەرکردە و پێشڕەوانی بواری پەیوەندییەکان لەسەر ئاستی ڕۆژهەڵاتی ناوەڕاست و باکوری ئەفریقا خەڵاتەکە بەخشرا. هاوکات، ئەم رێزلێنانە بەشێک بوو لە بۆنەی ساڵانەی چالاکییەکانی لوتکەی باڵای تێلێکۆم ریڤیو کە بە یەکێک لە دیارترین چالاکییەکانی کەرتی پەیوەندییەکان دادەنرێت و تیایدا خەڵات دەبەخشرێتە ئەو داهێنان و دەستکەوتانەی دەبنە پێوەر بۆ ناوازەیی لەسەر ئاستی رۆژهەڵاتی ناوەڕاست و باکووری ئەفریقا.
ئاسیاسێڵ راشیگەیاندووە، "ئەم خەڵاتە پایەدارە دەرخەری دیدگای پێشەنگی ئاسیاسێڵە لە بەهێزکردنی ئەزموونی دیجیتاڵیی و بەدیهێنانی گۆڕانکارییەکی گشتگیر لە کەرتی پڕۆگرامی وەفاداری و خەڵاتەکان. پڕۆگرامی هاوڕێی تەمەن توانیویەتی ببێتە نموونەیەک چاوی لێبکرێت لە رێگەی تێکەڵکردنی تەکنیکە دیجیتاڵییە نوێیەکان لە پێشکەشکردنی بەرنامەی خەڵاتی داهێنەرانە کە سەرنجی لەسەر رەزامەندی بەشداربووان بێت، لەگەڵ بنیاتنانی پەیوەندی درێژخایەن لە رێی پشتبەستن بە چەندین ئامڕازی دیجیتاڵی پێشکەوتوو و دابینکردنی ئەزموونی کەسیی ناوازە کە بەهایەکی ڕاستەقینەیان هەبێت".
ئاماژەی بەوەشکردووە،
بەرنامەی خەڵاتەکانی ئاسیاسێڵ لە عێراق ئامانجیان بەهێزکردنی پەیوەندییە لەگەڵ بەشداربووان لەڕێگەی پێشکەشکردنی تایبەتمەندی "مزایا" و خەڵاتی تایبەت کە هانیان دەدات بەردەوام کارلێک بکەن و وەفادارییان بەرز دەنرخێنێت. ئەم بەرنامەیە پشت بە ستراتیژە داهێنەرەکان دەبەستێت کە هاندانی دیجیتاڵی و خزمەتگوزاریی بەها زیادکراوەکان پێکەوە دەبەستێتەوە.
چرا حسێن بەڕێوەبەری جێبەجێکاری یەکەی بازرگانی ئاسیاسێڵ رایگەیاند، "بەدەستهێنانی ئەم خەڵاتە پایەدارە لەلایەن بەرنامەی هاوڕێی تەمەنەوە بەڵگەی پابەندبوونی ئاسیاسێڵە بە داهێنان و تەرکیزکردنی بەردەوام لەسەر باشترکردنی ئەزمونی بەشداربووان. سوپاسگوزاری هاوبەش و بەشداربووانمانین کە بەشێکی دانەبڕاو بوون لەم سەرکەوتنە و ئامانجمانە لە داهاتوودا دەستکەوتی زیاتر بەدەستبهێنین."
لەلایەکی دیکەوە، رەبیع فەرەحات بەڕێوەبەری جێبەجێکاری کۆمپانیای Related سەبارەت بە خەڵاتەکە وتی: "ئێمە زۆر شانازی دەکەین بە هاوبەشیکردنمان لەگەڵ ئاسیاسێڵ و پێشکەشکردنی چارەسەرێکی نایاب لە بواری وەفاداری و خەڵاتەکان. پرۆگرامی هاوڕێی تەمەن سەلماندوویەتی کە خاڵی وەرچەرخانە لە بازاڕدا لەڕێگەی ئەزموونە دیجیتاڵییە تەواو نوێکراوەکەیەوە".
ئاسیاسێڵ "کۆماندەکاتەوە"، دابینکاری سەرەکی خزمەتگوزاریى پەیوەندییەکانی مۆبایل و خزمەتگوزارییە دیجیتاڵییەکانە لە عێراق و ژمارهى بهشدرابووانی ١٨.٦ مليۆنە. ئاسياسێڵ وەکو یەکەم کۆمپانیاى خزمەتگوزاریى مۆبایل ناسێنراوە لە عێراق، یەکەم کۆمپانیاشە کە تۆڕەکەی هەموو بەشەکانی عێراق دەگرێتەوە.
پەیامنێری کوردسات نیوز رایگەیاند، لە رووداوێکی هاتوچۆدا لەسەر رێگای تەکیە- ئاغجەلەر، کەسێک گیانی لەدەستدا و هەشت کەسی دیکەش بریندار بوون.
ئاماژەی بەوەشکرد، رووداوەکە لە نزیک گوندی کانی سپیلکە روویداوە و لەنێوان چوار ئۆتۆمبێلدا بووە.
ئەوەشی خستە روو، ئەو کەسەی گیانی لەدەستداوە پیاوێکە تەمەنی لەنێوان ٥٥ بۆ ٦٠ ساڵ دایە و خەڵکی گوندی داڵاوا بووە.
پەیامنێری کوردسات نیوز ئەوەشی خستە روو، لە ئێستادا بریندارەکان گواستراونەتەوە بۆ نەخۆشخانەی شەهید پێشڕەو لە چەمچەماڵ و لە ژێر چاودێری پزیشکدان.
ئەوەش لە کاتێکدایە، دوێنێ چوارشەممە، هاتوچۆی گەرمیان رایگەیاند، لە رووداوێکی هاتوچۆدا لەسەر رێگای باوەنوور بەرەو کەلار، چوار منداڵ گیانیان لەدەستدا و ژنێکیش بریندار بوو.
پۆلیسی سلێمانی رایگەیاند، ماوەی پێنج رۆژە تەرمی هاوڵاتییەک لە پزیشکی دادوەرییە و داواش دەکات، هەر کەسێک زانیاریی لەسەری هەیە پەیوەندییان پێوە بکات.
پۆلیسی سلێمانی رایگەیاند، هاوڵاتییەک بەناوی (ئیسماعیل عەبدوڵا دەروێش)، کە تەمەنی ٧٣ ساڵە، لە ٧ی ١٢ی ٢٠٢٤ـەوە لە نەخۆشخانەی شار بە نەخۆشی گیانی لەدەستداوە، لەئێستادا تەرمەکەی لە پزیشکی دادوەری شاری سلێمانییە.
ئەوەش هاتووە، "داوا لە کەسوکاری یان هەر کەسێک دەکەین کە زانیاری لەبارەیەوە هەیە سەردانی پزیشکی دادوەری بکات یان پەیوەندی بکەن بە بنکەی پۆلیسی کوردساتەوە بەم ژمارەیە، ٠٥٣٣٣٦٠٦٥٧".
قوباد تاڵەبانی لە ساڵیادی شەهیدبوونی فەرماندە ئاکام دا پەیامێکی بڵاوکردووەتەوە و دەڵێت: " ئەمڕۆ یادی شەهیدبوونی کەڵەپیاو و جوامێرێکی بەوەفا و نیشتمان پەروەر دەکەینەوە"
دەقی پەیامەکە
ئەمڕۆ یادی شەهیدبوونی کەڵەپیاو و جوامێرێکی بەوەفا و نیشتمان پەروەر دەکەینەوە.
پێشمەرگەیەک پڕ بەمانای وشە فێری کەم ژیان و کەڵ ژیانی کردین.
نەمریی بۆ روحی فەرماندە ئاکام عومەر و سەرجەم شەهیدانی کوردستان.
بافڵ جەلال تاڵەبانی سەرۆکی یەکێتیی نیشتمانیی کوردستان لە ساڵیادی شەهیدبوونی فەرماندە ئاکام دا، پەیامێکی بڵاوکردووەتەوە و رایگەیاندووە، "ئەوەی شەهید ئاكام بە خاكی كوردستانی بەخشی كەم نەبوو، ئەو بوو بە تەمەنێكی كەم و ئازایەتییەكی بێوێنەوە لە سەنگەرەكانی پێشمەرگە دژی یەكێك لە دڕندەترین هێزەكانی مێژوو وەستایەوە و پارێزگاری لە خاكی كوردستان و خەڵكەكەی دەكرد".
دەقی پەیامەکە
ئەمڕۆ بە دڵتەنگییەكی قووڵ و وەفاداریی هەمیشەییمانەوە یادی شەهیدبوونی برام فەرماندە ئاكام عومەر دەكەینەوە، یادی سیمبوولێكی ئازایەتی و جوامێرێكی رێگەی ئازادی و دادپەروەری دەكەینەوە.
ئەوەی شەهید ئاكام بە خاكی كوردستانی بەخشی كەم نەبوو، ئەو بوو بە تەمەنێكی كەم و ئازایەتییەكی بێوێنەوە لە سەنگەرەكانی پێشمەرگە دژی یەكێك لە دڕندەترین هێزەكانی مێژوو وەستایەوە و پارێزگاری لە خاكی كوردستان و خەڵكەكەی دەكرد، ئەو كوردستانی لە دڵیدا هەڵگرتبوو و هەموو ئەوەی دەیویست سەرفرازی و سەقامگیریی بوو بۆ خاكەكەی، دواجار هەر لەو پێناوەشدا چووە ریزی شەهیدان و كاروانی نەمرانەوە.
دوای شەهیدبوونی فەرماندە ئاکام عومەر بەڵێنماندا هێزەکانی کۆماندۆی کوردستان کە بەرهەمی هەوڵ و تێکۆشانی ئەو بوو، بەهێزتر و گەورەتر بکەین. بەڵێنەکەمان بەجێگەیاند و ئێستا ئەو هێزە لەهەمووكاتێك بەهێزتر و پتەوترە. لەهەمووكات زیاتر ئامادەی بەگژداچوونەوەی دوژمنانی كوردستان و یاساشكێنانە، هەموو پێشمەرگەكانی بە رۆحێكی یەكێتییانە و ئازایەتییەك كە لە شەهید ئاكامەوە فێریبوون، زیاتر ئامادەی بەخشینی خوێنی خۆیانن لەپێناو خاكی كوردستاندا.
دروود بۆ رۆحی شەهید ئاكام و سەرجەم شەهیدانی كوردستان.. سەربەرزی بۆ كەسوكارە خۆڕاگرەكانیان
بافڵ جەلال تاڵەبانی
سەرۆکی یەکێتیی نیشتمانیی کوردستان