کوردستان
بە بۆردومانی فڕۆكەی بێفڕۆكەوانی توركیا، خێزانێكی ٨ كەسی لە سنووری "عەین عیسا"ـی سەر بە ئیدارەی خۆبەڕێوەبەری گیانیانلەدەستدا، بەوەش ژمارەی ئەو كەسانەی لە ماوەی ٢ رۆژدا گیانیانلەدەستدا بۆ ٢٠ كەس بەرزبووەوە.
میدیاكانی رۆژئاوای كوردستان بڵاویانكردەوە، بەیانی ئەمڕۆ لە گوندی سەفیای ناحیەی "عەین عیسا" بە بۆردومانی فڕۆكەیەكی بێفڕۆكەوانی سوپای توركیا خێزانێكی هەشت كەسی كراونەتە ئامانج و گیانیانلەدەستداوە.
ئەوەش لەكاتێكدایە رۆژی دووشەممەش سوپای توركیا لە رێگەی فڕۆكەی بێفڕۆكەوانەوە هێرشیكردە سەر گوندی "ئەلموستارەحا" لە رۆژئاوای "عەین عیسا" و لە ئەنجامدا ١٢ ئەندامی یەك خێزان گیانیانلەدەستدا كە زۆرینەیان ژن و منداڵن.
لێپرسراوی مەکتەبی پەیوەندییەکانی یەکێتیی نیشتمانیی کوردستان لە هەولێر لەگەڵ کونسوڵی گشتی تورکیا لە هەرێم کۆبووەوە و باسیان لە رووداوەکانی ئەم دواییانەی سوریا و رۆڵی کورد کرد لە ناوچەکەدا.
دەرباز کۆسرەت رەسوڵ لێپرسراوی مەکتەبی پەیوەندییەکانی یەکێتیی نیشتمانیی کوردستان لە هەولێر لەگەڵ ئێرمان تۆپچۆ، کونسوڵی گشتیی تورکیا لە هەرێمی کوردستان کۆبووەوە و گفتوگۆیان لەبارەی دۆخی سوریا و رۆژئاوای کوردستان، قۆناغی دوای کۆتایی هاتنی دەسەڵاتی بەشار ئەسەد و لێکەوتە ناوخۆیی و هەرێمییەکان کرد.
هەر لە کۆبوونەوەکەدا دەرباز کۆسرەت رەسوڵ هیوای خواست دەسەڵاتی نوێ لە سوریا و رۆژئاوای کوردستان پارێزەری مافەکانی مرۆڤ و رەنگدانەوەی پێکەوەژیانی نەتەوە و ئایینە جیاوازەکان بێت، سەقامگیری و ئاسایش بەرقەرار بێت و دۆزی کورد لە رۆژئاوای کوردستان پەراوێز نەخرێت، بەتایبەت کە لە شەڕی داعشدا رۆڵێکی بەرچاویان بینووە لە ڕووبەرووبوونەوەی تیرۆر لە ناوچەکەدا.
لەلایەکی دیکەوە، لێپرسراوی مەکتەبی پەیوەندییەکانی یەکێتیی نیشتمانیی کوردستان و کونسوڵی گشتی تورکیا لە هەولێر، باسیان لە پێکهێنانی کابینەی نوێی حکومەتی هەرێمی کوردستان و حکومەتێکی کارا کرد، کە تێیدا خزمەتگوزاری و دادپەروەری، پرسی موچە لە پێشینەی کارەکانی بێت.
هاوڵاتییەکی كوردی خەڵكی شاری مەریوان لە رۆژهەڵاتی كوردستان بە تۆمەتی هاوكاری حزبی دیموكراتی كوردستانی ئێران، سزای ٣٧ مانگ زیندانی بەسەردا سەپێنرا.
رێكخراوی مافی مرۆڤی هەنگاو بڵاویكردەوە، حەیدەر فەتاحی خەڵكی شاری مەریوان لەلایەن دەزگای دادوەری كۆماری ئیسلامی لە مەریوان بە تۆمەتی هاوكاری لەگەڵ حزبی دیموكراتی كوردستانی ئێران، سزای سێ ساڵ و یەك مانگ بەندكردنی بەسەردا سەپێندرا، سزاكەشی بە رەسمی پێڕاگەیەنراوە.
حەیدەر فەتاحی، ڕۆژی ٩ی حوزیرانی رابردوو لەلایەن هێزەكانی ئیتلاعات لە شوێنی كارەكەی لە شاری مەریوان، بەبێ بەڵگەی دادگا دەستبەسەركراوە و بۆ شوێنێكی نادیار گواستراوەتەوە، دواتر بە دانانی بارمتە بە شێوەیەكی كاتی تا كۆتاییهاتنی دادگاییەكەی ئازاد كرابوو.
عەلی حەمەساڵح ئەندامی پەرلەمانی كوردستان رایگەیاند، هەرێم لە مانگی شەشی رابردووەوە هیچ بڕە داهاتێكی ناوخۆی رەوانەی بەغداد نەكردووە.
عەلی حەمەساڵح لە كۆنفرانسێكی رۆژنامەوانیدا رایگەیاند، عیراق داوای یاسای هەیە بۆ داواكردنی داهاتی ناوخۆی هەرێم، بەڵام حكومەتی هەرێم لە مانگی شەشەوە هیچ بڕە داهاتێكی ناوخۆی رادەستی بەغداد نەكردووە. وتیشی، ئەگەر هەرێم پابەندبێت بە ناردنی داهاتی ناوخۆ، ئەوا عیراقیش موچەی مانگەكانی ١٠ و ١١ و ١٢ دەنێرێت.
ئاشكراشیكرد، حكومەتی هەرێم داهاتی ناوخۆی هەولێر و دهۆكی لە بانكی (ئار تی) داناوە كە بانێكی ئەهلییە و ئێستا ئەو بانكە پارەی نەختینەی لەبەردەستدا نییە بۆ ئەوەی پارەكە رەوانەی بەغداد بكرێت.
د. نەرمین مەعروف ئەندامی لیژنەی دارایی ئەنجومەنی نوێنەران رایگەیاند، بە هەوڵی هەموو نوێنەرانی كورد لە بەغداد، كورتهێنانی موچەی سێ مانگی كۆتایی ئەمساڵی هەرێم چارەسەركراوە.
د.نەرمین مەعروف بە كوردسات نیوزی راگەیاند، پركردنەوەی كورتهێنانی موچەی مانگەكانی ١٠ و ١١ و ١٢ بە هەوڵی هەموو نوێنەرانی كورد و فراكسیۆنە كوردستانییەكان بووە نەك تەنها كەس و لایەنێك.
وتیشی لە ماوەی رابردوودا كە لەگەڵ خالید شوانی و كاروان یاروەیس سەردانی سودانیان كرد بۆ چارەسەری پرسی موچە، بە نوسراوێك كە ئیمزای سەرۆكی فراكسیۆنە كوردستانی لەسەر بوو، داوای تەوتینی موچەیان كردووە و داواشیان كردووە كە بەشێوەی زیادكردنی پشك یان بەشێوەی گواستنەوەی پارە گرفتی موچەی ئەمساڵی فەرمانبەرانی هەرێم چارەسەربكرێت.
د. نەرمین مەعروف باسی لەوەشكرد، گرفتی سەرەكی موچەی ئەم سێ مانگە ئەوەبوو كە بەشێك بوو لە خەرجی راستەقینە، هەربۆیە بۆ ساڵی ئایندە و بۆ هەمواری یاسای بودجە لە ساڵی ٢٠٢٥ ، دەبێت موچەی فەرمانبەران لەو خەرجییە دەربهێندرێت و هەمواری یاسای بودجەش كە تایبەتە بە هەناردەی نەوتی هەرێم، سەنگی كورد لە بەغداد زیاتر دەكات، چونكە كە دەست بە هەناردەكردنی نەوتی هەرێم دەكرێتەوە، ئەوكاتە هەرێم باشتر دەتوانێت پشكی خۆی وەربگرێت.
سەرۆكی فراكسیۆنی یەكگرتوو لە پەرلەمانی كوردستان، داوادەكات بەزوویی دەستەی سەرۆكایەتی پەرلەمانی كوردستان هەڵبژێرێت، لایەنەكانیش لەسەر پێكهێنانی حكومەت رێكبكەون.
مستەفا عەبدوڵا سەرۆكی فراكسیۆنی یەكگرتوو لە پەرلەمانی كوردستان رایگەیاند، هەرچەند یەكگرتووی ئیسلامی لە پەرلەمان دەبێتە ئۆپۆزسیۆن، بەڵام دەبێت بەزوویی دەستەی سەرۆكایەتی پەرلەمان هەڵبژێرێت، هەروەها ئەو لایەنانەی بەشداری لە حكومەت دەكەن پەلەبكەن لە پێكهێنانی حكومەت، بۆ ئەوەی پەرلەمان بتوانێت بەدواداچون بكات و یاسای نوێ دەربكات و توانای لێپرسینەوەی هەبێت.
بافڵ جەلال تاڵەبانی سەرۆکی یەکێتیی نیشتمانیی کوردستان راگەیەندراوێکی سەبارەت بە دۆخی سوریا بڵاوکردووەتەوە و تێیدا هاتووە، " لەم دۆخە هەستیارەدا پشتیوانیی تەواومان بۆ خوشک و برایانمان لە رۆژئاوای کوردستان دووپاتدەکەینەوە، وەک پێشتریش وتوومانە تاوەکو کێشەی کورد چارەسەر نەکرێت، هیچ ئاشتییەک لە رۆژهەڵاتی ناوەڕاست بەدینایەت".
دەقی راگەیەندراوەکە
لە چەند رۆژی رابردوودا بە وردی چاودێریی رووداو و پێشهاتەکانی سووریا و رۆژئاوای کوردستانمان کرد و بە بایەخەوە لە گۆڕانکاری و کاریگەرییەکانی دەڕوانین.
ئێمە بە تەواوی رێز لە ئیرادەی خەڵکی سووریا دەگرین و ئەو بڕیارانەش کە لەبارەی داهاتووی وڵاتەکەوە دەدرێت، بەڵام لە چوارچێوەی پاراستنی مافی هەموو نەتەوە و پێکهاتەکان و لەبەرچاوگرتنی ئەو واقیعە سیاسییەی لەو وڵاتەدا هەیە. هیوادارین ئەم دەرفەتە بەهەند وەربگیرێت تاوەکو بە سیاسەتێکی نیشتمانیی هاوبەشەوە قۆناغێکی نوێی حوکمڕانی و دادپەروەر بێتەکایەوە و داهاتوویەکی سەقامگیر بۆ خەڵکەکەی مسۆگەر بکرێت.
لەم دۆخە هەستیارەدا پشتیوانیی تەواومان بۆ خوشک و برایانمان لە رۆژئاوای کوردستان دووپاتدەکەینەوە، هیوادارم هەموومان بە یەک دەنگ و بە گوتارێکی نیشتمانییەوە پشتیوانییان لێبکەین و رووبەڕووی ئەو مەترسییانە بوەستینەوە کە هەڕەشەن بۆسەر ژیان و سەقامگیرییان.
لەکۆتاییدا جەخت لە رەچاوکردن و پاراستنی مافی گەلی کورد دەکەینەوە، هیواخوازین هەموولایەک بڕیاری دروست و ژیرانە بدەن و پارێزگاری لە ئاشتی و پێکەوەژیانی ناوچەکە بکەن. چونکە وەک پێشتریش وتوومانە تاوەکو کێشەی کورد چارەسەر نەکرێت، هیچ ئاشتییەک لە رۆژهەڵاتی ناوەڕاست بەدینایەت.
بافڵ جەلال تاڵەبانی
سەرۆکی یەکێتیی نیشتمانیی کوردستان
وەزارەتی دارایی هەرێم دەڵێت، كێشەی گواستنەوەی پارەیان بۆ پڕكردنەوەی كورتهێنانی موچە چارەسەركردووە كە بڕەكەی ٤٣٠ ملیار دینارە و سبەینێ رێكارەكانی ناردنی دەستپێدەكات.
وەزارەتی دارایی هەرێم لە راگەیەنراوێكدا ئاماژەی بۆ ئەوەكردووە، دوای سەردانی تیمی تەكنیكی وەزارەتی دارایی بۆ بەغداد و بردنی لیستی موچەی مانگی ١٢ بۆ وەزارەتی دارایی فیدراڵ، سەركەوتوانە توانیان كێشەی گواستنەوەی پارە لە تەرخانكراوەكانی پشكی هەرێم بۆ زیادكردنی بڕی تەرخانكراو بۆ موچە چارەسەر بكەن.
راشیگەیاند، رۆژی دووشەممە لەلایەن بەڕێوەبەرایەتی گشتی بودجەی وەزارەتی دارایی عێراقەوە فرمانی گواستنەوەی پارەكە دەرچووە، تیمەكەشیان بە بەردەوامی لەسەر هێڵە بەمەبەستی بەدواداچوون بۆ جێبەجێكردنی بڕیارەكە و گەیشتنی پارەكە بە چارەسەركردن و پڕكردنەوەی ئەو كورتهێنانەی بۆ موچەی هەرێم لەلایەن وەزارەتی دارایی عێراقەوە دروستكراوە.
پێشتریش سەرچاوەیەك لە وەزارەتی دارایی هەرێم بە كوردسات نیوزی راگەیاند، لە بەغداد ٤٣٠ ملیار دینار لە بابی ژمارە نۆی تایبەت بە پارەی تەرخانكراوە بۆ چاودێری كۆمەڵایەتی بۆ بابی ژمارە یەک، گواستنەوەی پێكراوە لە پشكی بودجەی هەرێم بۆ ئەوەی ئەو كورتهێنانەی پێ پڕبكرێتەوە كە لە دابەشكردنی موچە دروستبووە، سبەینێش دەست بە ڕێكارەكانی گواستنەوەی ئەو پڕە پارەیە دەكرێت.
هاوڵاتییەک لە هەولێر دەڵێت کچەکەم کوژراوە و کەیسەکەی داخراوە، زاواکەم هەفتەیەک دەستگیرکراو دواتر ئازادیان کرد.
ئەمڕۆ سێشەممە ١٠ـی ١٢ـی ٢٠٢٤، لە هەولێر، باوکێک کۆنگرەیەکی رۆژنامەوانی ئەنجامداو رایگەیاند، "کچەکەم لە ماڵی هاوسەرەکەی ئەشکەنجەدراوە و خنکێندراوە"، داواشدەکات کەیسەکە بەلارێدا نەبرێت
لە بەغداد ٤٣٠ ملیار دینار لە پشكی بودجەی هەرێم گواستنەوەی پێكراوە بۆ ئەوەی كورتهێنانی موچەی پێ پڕبكرێتەوە و بڕیارە سبەینێ ڕێكارەكانی گواستنەوەی پارەكە دەستپێبكات.
سەرچاوەیەك لە وەزارەتی دارایی هەرێمی كوردستان بە كوردسات نیوزی راگەیاند، ئەمڕۆ لە بەغداد ٤٣٠ ملیار دینار، لە بابی ژمارە نۆی تایبەت بە پارەی تەرخانكراوە بۆ چاودێری كۆمەڵایەتی بۆ بابی ژمارە یەک، گواستنەوەی بۆ كراوە لە پشكی بودجەی هەرێمی كوردستان بۆ ئەوەی ئەو كورتهێنانەی پێ پڕبكرێتەوە كە لە دابەشكردنی موچە دروستبووە.
ئەوە سەرچاوەیە ئەوەشی بۆ كوردسات نیوز ڕاگەیاند، بەهۆی ئەوەی ئەمڕۆ لە بەغداد پشووە، سبەینێ چوارشەممە دەست بە ڕێكارەكانی گواستنەوەی ئەو پڕە پارەیە دەكرێت.
ئەوەش لەكاتێكدایە عیراق بڕیاریداوە ٧٦١ ملیار دینار بۆ مانگەكانی ١٠ و ١١ و ١٢ رەوانەی هەرێم بكات، بەڵام وەزارەتی درایی هەرێم دەڵێت، ئەو بڕە پارەیە بەشی موچە ناكات و ٢٣٥ ملیار دینار كورتهێنان دروستبووە، چونكە هەرێم بۆ هەر مانگێك پێویستی بە ٩٩٦ ملیار دینارە بۆ دابەشكردنی موچە.
بەهۆی هێرشەكانی دوێنێ سوپای توركیا بۆ سەر ناوچەكانی رۆژئاوای كوردستان ١٧ كەس گیانیانلەدەستداوە، ئاسایشی رۆژئاوای كوردستانیش داوا لە هێزە نێودەوڵەتییەكان دەكات هەڵوێستیان هەبێت لە بەرامبەر هێرشەكانی توركیا.
هێزەكانی ئاسایشی ناوخۆی باكور و رۆژهەڵاتی سوریا لە راگەیەنراوێكی ئاماژەی بەوەكردووە، لە هێرشەكانی توركیا بۆ سەر گوندەكانی سنوری كۆبانێ و زیرگان و موستەریحەی سەر بە عەین عیسا، ژنان و منداڵ شەهیدبوون و بە پشتیوانی توركیا كردەوەی تیرۆریستی ئەنجام دەدرێت.
هاوكات داوا لە هێزە نێودەوڵەتییەكان و رێكخراوە مرۆییەكان دەكات، بە خێرایی هەنگاوبنێن و كۆتایی بە هێرشەكانی توركیا دژی هاووڵاتیانی مەدەنی بهێنن و فشاربخەنە سەر توركیا بۆ ئەوەی واز لە پشتیوانیكردنی تیرۆر بهێنن.
رۆژی دووشەممە بەهۆی هێرشی ئاسمانی سوپای توركیا، ١٧ كەس لە عەین عیسا و كۆبانێ گیانیانلەدەستدا كە ١٢ هاووڵاتییان ئەندامی یەك خێزان بوون كە شەشیان منداڵ بوون.
وەزارەتی دارایی هەرێم وەڵامی رێباز حەملان دەداتەوە و دەڵێت، بە ناوی ئەوانەوە قسە مەكە و ئەوان تاكە لایەنی رەسمین بۆ مامەڵەكردن لەسەر كات و شێوازی دابەشكردنی موچە.
وەزارەتی دارایی لە راگەیەندراوێكدا ئاماژەی بەوەكردووە، سەبارەت بە ڕاگەیەنراوی رێباز حەملان بریكاری وەزارەتی دارایی عێراق هەرچەندە لەو ئەركەیدا نوێیە، بەبیریان دێننەوە كە ئەو بەشێكە لە وەزارەتی دارایی عێراق و پێویستبوو لە وەزارەتەكەی خۆی هەوڵی چارەسەری ئەو كێشانە بدات كە بۆ موچە دروستكراوە، ئەو بابەتانەی باسی كردوون لە بنەڕەتدا كێشەی دەستكردن و سیاسین، پێویستە ئەو سەرقاڵی چارەسەركردنی ئەو كێشانە بێت لە وەزارەتەكەی خۆی نەك لە وەكیلی ئەوانەوە قسە بكات.
دەشڵێت، هەموو ئەو بابەتانەی رێباز حەملان باسیكردوون ئاگایان لێی نییە، بەهیچ جۆرێك ڕێگەپێدراو نییە بەناوی ئەوانەوە قسەبكرێت كە ئەوان كەسیان نەكردووە بە وەكیل، ئەو نوێنەرایەتی عێراق دەكات نەك هەرێم، بۆیە هیوادارە دەسەڵاتی خۆی بزانێت، نەك بێت لەبری وەزارەتیان قسە بكات، لەمكاتەدا چاوەڕێیان دەكرد وەزارەتەكەی كۆی تەمویلی موچەی دوو مانگی بناردایە نەك بێت هەواڵی موچە بڵاوبكاتەوە كە ئەركی ئەو نییە.
وەزارەتی دارایی ئاماژەی بەوەشكردووە، هەر زانیاریەكی تایبەت بە موچە تایبەتمەندی وەزارەتیانە و هەر زانیاری و داتا و هەواڵێكی موچە لە پێگەی رەسمی بڵاونەبێتەوە جێی متمانە نییە و ڕەتكراوەیە، ئەوان بەرپرس و تاكە لایەنی رەسمین بۆ مامەڵەكردن لەسەر كات و شێوازی دابەشكردنی موچە.
رۆژی دووشەممە، رێباز حەملان رایگەیاند، دوای گفتوگۆیەكی زۆر لەنێوان بەغداد و هەولێر و پێداچوونەوە بە بودجەی تەرخانكراوی هەرێم، موچەی مانگی ١٠ خەرجكرا و كۆتایی ئەم هەفتەیەش موچەی مانگی ١١ خەرجدەكرێت و بەزووترین كاتیش دەست بە دابەشكردنی موچەی مانگەكانی ١٠ و ١١ و ١٢ دەكرێت.
مەکتەبی سکرتارییەتی سەرۆک مام جەلال ئەمڕۆ دووشەممە ٩ / ١٢ / ٢٠٢٤ لە رانیە سەردانی ئاکۆی عەباس ئاغا سەرۆکی عەشیرەتی ئاکۆ و کەسایەتی دیاری کوردستانیان کرد .
لەو سەردانەدا مەکتەبی سکرتارییەت لە تەندروستی بەڕێزیانیان پرسیەوەو سڵاوی سەرۆک بافڵ جەلال تاڵەبانی و قوباد تاڵەبانیان پێگەیاند و هیوای سەلامەتی هەمیشەییان بۆ خواست کە لە ماوەی رابردوودا بەهۆی تێکچوونی باری تەندروستیەوە سەردانی وڵاتی ئەڵمانیا کردبوو بەمەستی چارەسەر .
لەو بەسەرکردنەوەیەدا مەکتەبی سکرتارییەت پێزانینیان بۆ رۆڵی ئاکۆی عەباس ئاغا دەربڕی وەک دۆستێکی نزیکی سەرۆک مام جەلال کە هەمیشە لە رووداوە سیاسی و کۆمەڵایەتییەکاندا دەوری خێر و چاکەی گێڕاوە و خزمەتەکانیشی دیاربەرچاوەبووە کە یەکێتی هەمیشە بە ڕێزەوە لە پێگەکەی دەڕوانێت
بریكاری وەزارەتی دارایی عیراق رایگەیاند، كۆتایی ئەم هەفتەیە موچەی مانگی 11ـی موچەخۆرانی هەرێم خەرجدەكرێت و بەزووترین كاتیش دەستدەكرێت بە دابەشكردنی موچەكان.
رێباز حەملان بریكاری وەزارەتی دارایی عیراق لە روونكردنەوەیەكدا بڵاویكردەوە، دوای گفتوگۆیەكی زۆر لەنێوان بەغداد و هەولێر و پێداچوونەوە بە بودجەی تەرخانكراوی هەرێم، بە هەوڵی هەردوولا توانراوە، موچەی مانگی 10 لەلایەن عیراقەوە خەرخبكرێت كە بڕی 761 ملیار دینارە، كۆتایی ئەم هەفتەیەش موچەی مانگی 11 خەرجدەكرێت كە نزیكەی 759 ملیار دینارە.
ئەوەشی خستەڕوو، گواستنەوەیەك لە بودجەی تەرخانكراوی هەرێم دەكرێت بۆ پڕكردنەوەی بەشێكی كورتهێنانی موچەی فەرمانبارانی هەرێم، چونكە هەرێم مانگانە پێویستی بە 996 ملیار دینارە بۆ دابەشكردنی موچە.
رێباز حەملان دەشڵێت، ئەمڕۆ لیستی موچەی مانگی 12ـی فەرمانبەرانی هەرێم رادەستی وەزارەتی دارایی عیراق كراوە بۆ وردبینیكردن و بەزووترین كاتیش دەست بە دابەشكردنی مووچەكان دەكرێت.
وتەبێژی یەكێتی رایدەگەیەنێت، لێدوانی ژمارەیەك لە بەرپرسانی پارتی لەبارەی پۆستەكانی حكومەتی داهاتوو كێشە بۆ دانوستانەكان دروستدەكەن، پارتی دەبێت تێبگات یەكێتی نایانەوێت كێشەكانی كابینەی نۆ دووبارە بێتەوە.
سەعدی ئەحمەد پیرە وتەبێژی یەكێتیی نیشتمانیی كوردستان لە گەشتی هەواڵەكانی سەعات ١٢ـی كوردسات نیوزدا ئاماژەی بەوەكرد، گرنگە پێش دەستبەكاربوونی دۆناڵد ترەمپ لە ٢٠ـی مانگی داهاتوودا كابینەی نوێی حكومەتی هەرێم پێكبهێنرێت.
وتیشی، "غرورێك" هەیە لەلای ژمارەیەك لە بەرپرسانی پارتی و لێدوانەكانیان لە میدیاكان لەبارەی پۆستەكان، کە كێشە بۆ دانوستانەكان دروستدەكەن.
وتەبێژی یەکێتی ئاماژەی بەوەشکرد، پارتی دەبێت لەوە تێبگات كە یەكێتی لە كابینەی رابردوو كێشەی هەبووە و نایانەوێت كێشەكان دووبارە بنەوە.
وەزیری سامانە سروشتییەكانی هەرێم رایگەیاند، ئاماژەكان بۆ دەستپێكردنەوەی هەناردەی نەوت لە ساڵی نوێدا لە رێگەی كۆمپانیای سۆمۆوە زۆرن و لە ئێستادا لە قۆناغی هەمواركردنەوەی یاسای بودجەدایە.
وەزارەتی سامانە سروشتییەكان لە راگەیەنراوێكدا بڵاویكردەوە، كەمال محەمەد ساڵح وەزیری سامانە سروشتییەكان لەمیانەی كۆبوونەوەی لەگەڵ كونسوڵی گشتیی فەڕەنسا لە هەرێمی كوردستان ئاماژەی بەوەكردووە، دەستپێكردنەوەی هەناردەی نەوت بۆ ئابووریی عیراق و هەرێمی كوردستان گرنگییەكی زۆری هەیە و بەشێكی زۆری كورتهێنانی بودجە چارەسەر دەكات.
وەزیری سامانە سروشتییەكان هەروەها سوپاسی پاڵپشتی و هەوڵەكانی حكومەتی فەرەنسای كرد، بۆ خێرا دەستپێكردنەوەی هەناردەی نەوتی هەرێمی كوردستان.
مانگی رابردوو حكومەتی عیراق هەمواری یاسای بودجەی رەوانەی ئەنجومەنی نوێنەران کرد بەمەبەستی پەسەندكردنی، كە ماددەیەكی تایبەتە بە هەناردەكردنەوەی نەوتی هەرێمی كوردستان لە رێگەی كۆمپانیای سۆمۆوە.