کوردستان
فەرماندەی گشتی هەسەدە ئاشكرایكردوە، سەقامگیری سوریا بەندە بەبونی هێزی ئەمریكا و ئەگەر بكشێتەوە دەبێتە هۆی گەڕانەوەی داعش و چەندین گروپی چەكداری توندڕەو.
مەزڵوم كۆبانێ فەرماندەی گشتی هێزەكانی سوریای دیموكرات "هەسەدە" لە چاوپێكەوتنێكی رۆژنامەوانیدا ئاماژە بۆ ئەوەكردووە، لە دوای روداوەكانی سوریا، داعش لە بیابانەكان بەهێزتربوون، لە زۆر شوێنیش دەستیان گرتووە بەسەر چەكی رژێمی سوریادا.
وتیشی، هۆكاری سەرەكی سەقامگیری لە ناوچەكانی سوریا بوونی سوپای ئەمریكایە، ئەگەر ئەو دوو هەزار سەربازە ئەمریكییە بكشێنەوە، دەبێتە هۆی گەڕانەوەی داعش و چەندین گرووپی چەكداری توندڕەو.
مەزڵوم كۆبانێ ئاماژەی بەوەشكرد، چەكدارانی داعش پیلان دادەنێن بۆ هێرشكردنە سەر ئەو زیندانانەی داعشیان تێدا دەستبەسەركراوە و دەیانەوێت سود لە سەرقاڵی هێزە كوردییەكان وەربگرن لە بەرگریكردن لە ناوچەكانیان دژی هێرشەكانی توركیا و گرووپە چەكدارەكان، داواشی لە دۆناڵد ترەمپ سەرۆكی ئەمریكا كرد، پشتیوانی لە كورد بكات و هێزەكانی لە رۆژائای كوردستان نەكشێنێتەوە.
قوباد تاڵەبانی، جێگری سەرۆکوەزیران پێشوازیکرد لە ئاندرۆ بیزلی، کونسوڵی گشتیی بەریتانیا لە هەرێمی کوردستان و لە کۆبوونەوەی نێوانیاندا گفتوگۆکانی پێکهێنانی حکومەت و پەیوەندییەکانی نێوان هەرێم و بەغدا و چەند پرسێکی دیکەی جێی بایەخی هەردوولا تاوتوێ کران.
لە تەوەری سەرەکیی کۆبوونەوەکەدا کە رۆژی پێنج شەمە(9/1/2025) لە هەولێر بەڕێوەچوو، باس لە گفتوگۆکانی نێوان لایەنە سیاسییەکان کرا بۆ پێکهێنانی کابینەی نوێی حکومەتی هەرێم.
قوباد تاڵەبانی روونی کردەوە گفتوگۆکان بەردەوامە بە ئاراستەی گەیشتین بە رێککەوتنێک کە رەزامەندیی هەموو لایەنەکانی بەشداری لەسەر بێت.
جەختیشی کردەوە کە حکومەتی داهاتوو دەبێت حکومەتێکی خزمەتگوزاربێت و کێشە سەرەکییەکانی خەڵکی کوردستان چارەسەر بکات.
سەبارەت بە پەیوەندییەکانی نێوان هەرێم و بەغداش، جێگری سەرۆکوەزیران ئاماژەی بەوەدا هەموو هەوڵێکیان بۆ ئەوەیە کێشەی موچە و بودجە و کێشەکانی دیکەی نێوان هەرێم و بەغدا لەسەر بنەمای دەستور چارەسەر بکرێت. لەمبارەیەوە کونسوڵی گشتیی بەریتانیا بە گرنگی زانی کێشەکان بە ڕێگەی گفتوگۆوە چارەسەر بکرێت و پشتیوانی وڵاتەکەشی بۆ چارەسەرکردنی کێشەکان دووپات کردەوە.
لە تەوەرێکی دیکە گفتوگۆکرا لەبارەی گرنگیی پەرەپێدانی تواناکانی گەنجان. لەمبارەیەشەوە قوباد تاڵەبانی ئاماژەیدا بە پڕۆژەکانی فاوندەیشن هەب و فاوندەیشن لاب بۆ تواناسازی گەنجانی داهێنەر و خاوەن بزنسی بچوک و روونی کردەوە؛ ئامانجیان لەم پڕۆژانە دەرخستنی تواناکانی گەنجان و ئاستی بەشدارییان لە گەشەپێدانی ئابوری کوردستاندا بەهێزتر بکەن.
لەم چوارچێوەیەدا کونسوڵی گشتیی بەریتانیا پڕۆژەکەی بە گرنگ وەسف کرد و ئامادەیی خۆی و کونسوڵخانەی بەریتانیای بۆ هاوکاریکردنی پڕۆژەکە دەربڕی.
بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان چاویکەوت بە نوێنەری خاوەنی ئۆتۆمبێلە بێسەرەتاکان.
لەسەرەتای کۆبوونەوەکەدا نوێنەری خاوەنی ئۆتۆمبێلە بێسەرەتاکان لە راپۆرتێکدا کێشە و داواکارییەکانیان خستەڕوو و راشیانگەیاند، پابەندی رێنمایی و رێکارە یاسایی و ئەمنییەکان دەبن و هاوکاری تەواوی دەزگای ئاسایش و سەرجەم دامەزراوەکان دەبن بۆ پاراستنی ئارامیی سلێمانی.
لەبەرامبەردا سەرۆک بافڵ جەلال تاڵەبانی پشتیوانیی خۆی بۆ سەرجەم چین و توێژەکانی کۆمەڵگە دووپاتکردەوە و ئاماژەی بەوەکرد، خۆمان بە پارێزەری سەرجەم خەڵکی کوردستان دەزانین بەهەموو چین و توێژەکانییەوە، ئەرکی ئێمە پاراستنی ماف و بژێویی ژیانی خەڵکە و رێگەنادەین غەدر و ناحەقی بەرامبەر هیچ کەسێک بکرێت.
سەرۆک بافڵ وتیشی، لەگەڵ سەرجەم لایەنە پەیوەندیدارەکان و دەزگا ئەمنییەکان هەماهەنگ دەبین تاوەکو لەچوارچێوەی یاسا و رێکارەکاندا کێشەی ئۆتۆمبێلە بێسەرەتاکان چارەسەر بکرێت، بێگومان پابەند بە رێنماییەکانی هاتوچۆ و ئاسایش ئەم کارە دەکرێت و دەبێت یاسا وەک یەک بەسەر هەموواندا جێبەجێبکرێت.
لەکۆتایی کۆبوونەوەکەشدا سەرۆک بافڵ رایگەیاند، نابێت لە کوردستاندا مافی هیچ توێژێکی کۆمەڵگە پێشێلبکرێت و نادادییان بەرامبەر بکرێت، پشتیوانیی هەمووان دەبین و هەرێمێکمان دەوێت تێیدا هەمووان هەست بە ئارامی و پارێزراوی بکەن و رێز لە مافەکانیان بگیرێت.
قوباد تاڵەبانی، ئەمڕۆ پێنجشەممە لەگەڵ ژمارەیەک لە گەنجان و نوێنەرانی چەندین رێکخراوی کۆمەڵگەی مەدەنی لە سنوری پارێزگای هەولێر کۆبووەوە.
لە بڵاوکراوەیەکیشدا قوباد تاڵەبانی دەڵێت، " ئەمڕۆ لە کۆبوونەوەم لەگەڵ ژمارەیەک لە گەنجان و نوێنەرانی چەندین رێکخراوی کۆمەڵگەی مەدەنی لە سنوری پارێزگای هەولێر گفتوگۆمان کرد لەبارەی چۆنییەتی بەهێزترکردنی رۆڵی رێکخراوەکان لە کۆمەڵگادا و پشتگیری تەواوی خۆم بۆ دووپات کردنەوە".
ئاماژەی بەوەشداوە، "بەهێزترکردنی رێکخراوەکانی کۆمەڵگەی مەدەنی و چالاکترکردنی رۆڵی گەنجان لەناو ئەو رێکخراوانەدا دەرگا بەڕووی گەشەسەندنی وڵاتەکەمان لە بوارە جیاوازەکاندا دەکاتەوە، جەختیشم کردەوە کە بەبێ کۆمەڵگەیەکی مەدەنی بەهێز و بەشداری زیاتری گەنجان لە پرسە جۆراوجۆرەکاندا گەشەسەندنێکی بەردەوام و راستەقینەی سیاسی و ئابوری و کۆمەڵایەتی بەدینایەت".
بەپێی زانیارییەکانی کوردسات نیوز کێشەی ئۆتۆمبێلە بێ سەرەتاکان چارەسەرکراوە.
دوای ئەوەی بڕیار درا کە ئۆتۆمبێلە بێ سەرەتاکان ناتوانن بێنە سەر شەقامەکان و گەر ئەو کارە بکەن دەست بەسەر ئۆتۆمبێلەکاندا دەگیرێت، کێشەکە چارەسەرکراو لە کۆنگرەیەکی رۆژنامەوانیشدا نوێنەری خاوەن ئۆتۆمبێلە بێ سەرەتاکان رایگەیاند، "هیوادارین لە هەولێر و دهۆک و سۆرانیش کێشەکە چارەسەر بکرێت".
کەشناسیی عیراق رایگەیاند، لە سەرەتای هەفتەی داهاتووە شەپۆلێکی بارانبارین ناوچە جیاوازەکانی عیراق و هەرێم دەگرێتەوە و پلەکانی گەرماش بەشێوەیەکی بەرچاو نزم دەبنەوە.
کەشناسیی عیراق پێشبینییەکانی کەشوهەوای بەمجۆرە خستووەتە روو:
سبەینێ هەینی: بارستە هەوایەکی سارد عیراق و هەرێم دەگرێتەوە و سبەینێ ئاسمان ساماڵ دەبێت دواتر دەگۆڕێت بۆ هەور.
رۆژی شەممە: ئاسمان پەڵەهەور و هەوری تەواو دەبێت و بارانێکی مامناوەند و لە هەندێک شوێندا بارانی بەخوڕ دەبارێت، لە ناوچەکانی ناوەڕاست و خوارووی عیراق پلەکانی گەرما کەمێک بەرزدەبنەوە، بەڵام لە هەرێمی کوردستان گۆڕانکارییان بەسەردا نایەت.
یەکشەممە: ئاسمان پەڵەهەور و هەوری تەواو دەبێت و خێرایی با بەشێوەیەکی بەرچاو زیاد دەکات و دەگاتە ٣٠ بۆ ٤٠ کیلۆمەتر لە سەعاتێکدا، بەپێی ناوچە جیاوازەکان باران بە رێژەیەکی مامناوەند و کەم دەبارێت، پلەکانی گەرماش نزم دەبنەوە.
دووشەممە: کەش ئاسایی دەبێتەوە، بەڵام پلەکانی گەرما زیاتر دادەبەزن.
رۆژی ٦ و ٧ی ئەم مانگە وەفدێکی هاوبەش لە کەسوکاری ئەنفالکراوان و مامۆستایانی زانکۆ و هونەرمەندان و رۆژنامەنووس و رێکخراوەکانی بواری جینۆ ساید لە سنووری شارەکانی (کۆیە و چەمچەماڵ و ئیدارەی گەرمیان) بەمیوانداری خانمی یەکەمی عیراق سەردانی گۆڕە بەکۆمەڵەکەی تەلشێخەی پارێزگای سەماوەیان کرد و سوپاسی شاناز ئیبراهیم ئەحمەد خانمی یەکەمی عیراق دەکەن بۆ لەئەستۆگرتنی ئەرکی هەڵدانەوەی گۆڕە بەکۆمەڵەکان.
لە راگەیانراوێکدا لەدوای سەردانەکە ئاماژەیان بەوەکردووە، "ئەمجارە جیاوازتر لە جارەکانی پێشوو وێڕای خوێندنەوەی چەن ئایەتێک لە قورئانی پیرۆز، سرودی ئەی رەقیب بە کۆرس خوێنرا، هەروەها نمایشکێک و بەزمانی عەرەبیش پارچە هۆنراوەیەک پێشکەش کران، لە کۆتایدا وتاری وەفدەکە بە هەردوو زمانی کوردی و عەرەبی خوێنرانەوە، کە ئامانجمان لەم سەردانە جەخت کردنەوە بوو لە جێبەجێکردنی تەواوی بڕیارەکانی دادگای باڵای تاوانەکانی عێراق لەسەر کەیسی ئەنفال".
ئاماژەیان بەوەشکردووە، "جێی رێز و پێزانینە خانمی یەکەمی عیراق خاتوو (شاناز ئیبراهیم ئەحمەد) ئەرکی هەڵدانەوەی گۆڕە بەکۆمەڵەکان و وەرگرتنی سامپڵی ئێسک لە شەهیدەکان و وەرگرتنی نمونەی خوێن لە کەسوکاری شەهیدانی ئەنفالکراو وەک ئەرکێکی ئەخلاقی و مرۆڤ دۆستانە لەئەستۆ گرتووە، تیمە نیشتیمانیەکانی عێراق پتر لە ساڵێکە کاری لەسەر دەکەن. ئەمەش لەچوارچێوەی جێبەجێکردنی بڕیارەکانی دادگای باڵای تاوانەکانە لەسەر کەیسی ئەنفال".
ئەوەشیان خستە روو، "ئەمڕۆش رایدەگەیەنین سێ گۆڕی تر هەر لە سنووری تەل شێخەی پارێزگای سەماوە دۆزراوەتەوە، بەڵێن دراوە بەشێوەیەکی زانستیانە بەدوای یەکدا هەڵبگیرێنەوە کە ئەمەش ئاسودەی و ئارامی بەکەسوکاری ئەنفالکراوان دەبەخشێت، جێی ئاماژەیە کارکردن لە هەڵگرتنەوەی شەهیدەکانمان بەهۆی ئەو شێوازە دڕندانەیەی کۆمەڵکوژکردنیان لەلایەن جەلادەکانی بەعسەوە کارێکی تاقت پڕوکێنە دیمەنەکان دیمەنی زۆر ناخ هەژێنن بۆ تیمەکە، بەجۆرێک هەمویان لەرووی دەروونیەوە ماندوون، بەڵام دڵنیایان کردینەوە ئەوان بەردەوام دەبن لەسەر ئەرکی خۆیان".
لە راگەیەنراوەکەدا باسیان لەوەشلکردووە، "بەناوی رێکخراوەکانی ئەنفال و نووسەرانەوە داوا لە کەناڵی ئاڤا میدیا دەکەین کە داوای لێبوردن لە کەسوکاری ئەنفال کراوان بکات، چیتر تاوانی ئەنفال بچوک نەکاتەوە و داتای ناڕاست لەسەر گەورەیی ئەو تاوانەی بەسەر گەلەکەماندا هاتووە بڵاونەکاتەوە".
٢٢ی مانگی ١٢ی رابردوو، شاناز ئیبراهیم ئەحمەد خانمی یەکەمی عیراق دۆزینەوەی گۆڕێکی بەکۆمەڵی لە بیانابی تەل ئەلشێخیەی پارێزگای سەماوە راگەیاند.
وەفدی تەكنیكی یەكێتی و پارتی لە هەولێر لە كۆبوونەوەدان، پرۆسەی سیاسی لە قۆناغی داهاتووی هەرێم و پێكهێنانی كابینەی حكومەت و چەند پرسێكی گرنگ تاوتوێ دەكەن.
پەیامنێری كوردسات نیوز رایگەیاند، بۆ رۆژی سێیەم لەسەر یەك، وەفدی تەكنیكی یەكێتی و پارتی لە بارەگای مەكتەبی سیاسی یەكێتی لە هەولێر درێژە بە كۆبوونەوەكەیان دەدەن و لە دوو رۆژی رابردوودا هەر رۆژێك نزیكەی 12 سەعات لە كۆبوونەوەدا بوون.
پێكهێنانی كابینەی حكومەت
پەیامنێری كوردسات نیوز راشیگەیاند، وەفدی تەكنیكی هەردوولا، گفتوگۆ لەبارەی پۆستەكانی سێ سەرۆكایەتییەكەی هەرێم دەكەن، هەروەها پرۆژەیەك ئامادە دەكەن لەبارەی پرۆسەی سیاسی لە قۆناغی داهاتووی هەرێم و پێكهێنانی كابینەی 10ی حكومەت و پێداچوونەوەش بە دەسەڵاتی وەزیر و لێپرسراوانی تری حكومەت دەكەن، هەروەها رێگەك بۆ چارەسەركردنی كێشەكانی نێوان هەولێر و بەغداد دادەنێن.
یەكخستنەوەی هێزەكانی پێشمەرگە
وتیشی، وەفدە تەكنیكییەكە تاوتوێی یەكخستنەوەی هێزەكانی پێشمەگە و پرسی دەروازە سنورییەكان و داهات و خەرجی دەكەن.
هاوسەرۆكی پەیوەندییەكانی دەرەوەی ئیدارەی خۆبەڕێوەبەریی باكوور و رۆژهەڵاتی سوریا رایگەیاند، دانوستانیان لەگەڵ ئەمریكا و فەڕەنسا هەیە بۆ ئەوەی لەلایەن هێزەكانی ئەو دوو وڵاتەوە سنوورەكانی باكور و رۆژهەڵاتی سوریا بپارێزرێت .
ئیلهام ئەحمەد هاوسەرۆكی پەیوەندییەكانی دەرەوەی ئیدارەی خۆبەڕێوەبەریی باكوور و رۆژهەڵاتی سوریا لە چاوپێكەوتنێكدا لەگەڵ كەناڵی "تی ڤی 5 مۆند "ی فەڕەنسی رایگەیاندووە، هێزەكانی ئەمریكا و فەرەنسا دەتوانن سنوورەكانی باكوری سوریا بپارێزن، هەربۆیە لە ئێستادا دانوستان لەوبارەیەوە هەیە.
راشیگەیاندووە، ئیدارەی خۆبەڕێوەبەریی داوای لە فەڕەنسا كردووە نێوەندگیر بێت لە نێوان ئیدارەكە و دەسەڵاتدارانی توركیادا، تاوەکو رەوشەكە لە ناوچەكانی باكور و رۆژهەڵاتی سوریا ئارام ببێتەوە.
ئەوەش لەکاتێکدایە، تورکیا لە هێرشکردنە سەر ناوچەکانی رۆژهەڵات و باکووری سوریا بەردەوامە و دوێنێش لەکاتێکدا بە سەدان هاوڵاتی مەدەنی بۆ راگەیاندنی پشتگیری خۆیان لە پاراستنی بەنداوەکە چووبوونە بەنداوی تشرین، تورکیا بە فڕۆکەی بێفڕۆکەوان هێرشی کردە سەر هاوڵاتیانی مەدەنی.
تائێستا نزیكەی 250 ملیۆن لیتر نەوتی سپی بەسەر زیاتر لە یەك ملیۆن خێزانی هەرێمی كوردستاندا دابەشكراوە.
وەزارەتی سامانە سروشتییەكانی هەرێم لە راگەیەندراوێكدا بڵاویكردەوە، لە ناوەڕاستی مانگی 9ـی ساڵی رابردووەوە تا 7ـی ئەم مانگە، نزیكەی 250 ملیۆن لیتر نەوتی سپی، بەسەر نزیكەی ملیۆنێك و 248 هەزار خێزانی هەرێمی كوردستاندا دابەشكراوە، كە دەكاتە 88%ـی كۆی نەوتی دابەشكراو و بڕی 200 لیتر نەوتی سپی بە نرخی 104 هەزار دینار بەسەر هەر خێزانێكدا دابەشكراوە و بەشێكی زۆر لە دانیشتووانی ناوچە شاخاوییەكان و قەزا و ناحییەكان لێی سوودمەندبوون.
پێشتریش، چرۆ حەمەشەریف ئەندامی ئەنجومەنی نوێنەرانی عیراق لە فراكسیۆنی یەكێتی رایگەیاندبوو، لە ئەنجامی هەوڵ و بەدواداچوونەكانیان بۆ دابینكردن نەوتی سپی بە نرخی پاڵپشتیكراو بۆ هەرێم، وەزارەتی نەوتی عیراق رەزامەندی نیشانداوە لەسەر ناردنی 50 ملیۆن لیتر نەوتی سپی بۆ هەرێمی كوردستان، هەر خێزانێكیش لەو نەوتە بڕی 200 لیتری پێدەدرێت، بە نرخی 50 هەزار دینار.
ئەنجومەنی وەزیرانی هەرێم دەڵێت، لە سەرەتای ساڵی 2025ـەوە خشتەی موچەی موچەخۆران بە شێوەیەكی ئەلیكترۆنی ئامادە دەكرێت.
ئەنجومەنی وەزیرانی هەرێم كۆبووەوە و بەپێی راگەیەنراوێكیش، گفتوگۆكراوە لەبارەی بەرەوپێشچونەكانی پڕۆژەی بە ئەلیكترۆنیكردنی ناوەندیی خشتەی موچەی موچەخۆرانی هەرێم ناسراو بە (پرۆژەسیستمی پەیڕۆڵ) كە قۆناغێكی پرۆژەی بایۆمەتریە و لە سەرەتای ساڵی 2025ـەوە خشتەی موچە بە ئەلیكترۆنی ئامادە دەكرێت و بە بێ كەموكوڕی ئاڕاستەی وەزارەتی دارایی عیراق دەكرێت.
بەپێی راگەیەنراوەكە، حكومەتی هەرێم ئەرك و پابەندییەكانی جێبەجێكردووە و لە هەوڵەكانیشی لەگەڵ حكومەتی عیراق بەردەوامە بۆ دابینكردنی موچە و شایستە داراییەكانی هەرێم، چاوەڕوانیشن بەغداد تەواوكاریی شایستەی دارایی موچەخۆران بۆ ساڵی 2024 بنێرێت.
ئاماژەی بۆ ئەوەشكردوە، وەزارەتی دارایی هەرێم سەرجەم تێبینیەكانی تەرازوی پێداچوونەوە و لیستەكانی موچەی چارەسەركردوە و لیستی موچەی هەر سێ مانگەكەشی بە تەواوی و بەبێ كەموكوڕیی بۆ وەزارەتی دارایی عیراق ناردووە.
توركیا بانگی مەسرور بارزانی و شاسوار عەبدولواحیدی بۆ ئەنقەرە كرد، لەكاتێكدایە گفتوگۆكانی پێكهێنانی كابینەی نوێی حكومەت لە هەرێم دەستیپێكردووە و هاوکات توركیا گەمارۆی بادینانی داوە و گەشتەكانی فڕۆكەخانەی سلێمانی راگرتووە.
سەردانێك لە یەك كاتدا و بۆ یەك شوێن، پرسیاری لای زۆرێك لە هاووڵاتیانی هەرێمی كوردستان دروستكردووە، دەپرسن بۆچی لەكاتێكدا توركیا گەمارۆی سەر فڕۆكەخانەی نێودەوڵەتی سلێمانی درێژ كردەوە و هەوڵی داگیركردنی كۆبانێ و رۆژئاوای كوردستان دەدات، رۆژانەش بۆردومانی هەرێمی كوردستان دەكات، كەچی مەسرور بارزانی و شاسوار عەبدولواحید سەردانەكەیان بۆ لای دەسەڵاتدارانی سیاسی و هەواڵگری توركیا لەم كاتەدا وەك دەستكەوت بۆ حزبەكانیان و حكومەت لێكدەدەنەوە، لەكاتێكدا كە هەڕەشەی توركیا بۆسەر كورد لە هەر چوار پارچەی كوردستان تا دێت زیاتر دەبێت و بەرپرسانی ئەو وڵاتە بەردەوام جەخت لەسەر هەڕەشەكانیان دژ بە كورد دەكەنەوە.
بڵاوكردنەوەی وێنەی سەردانی سەرۆكی حكومەتی هەرێم و سەرۆكی جوڵانەوەی نەوەی نوێ بۆ ئەنقەرە هاوكاتە لەگەڵ دەستپێكردنی دانوستانەكانی پێكهێنانی كابینەی نوێی حكومەت لە هەرێمی كوردستان، بۆیە شارەزایان ئەم سەردان و كۆبوونەوانە لەم كاتەدا بە سەپاندنی هەژموونی توركیا لەسەر هەرێم و كابینەی داهاتووی حكومەت لێكدەدەنەوە.
چاودێران پێیانوایە توركیا نایەوێت كابینەیەكی بەهێز و پەرلەمانێكی كارا لە كوردستان هەبێت، ئەمەش ئامانجی سەرۆكی حكومەتی ئێستایە بە تایبەت دوای ئەوەی كە حزبەكەی نەیتوانی زۆرینە كورسییەكانی پەرلەمان لە هەڵبژاردنی رابردوو بەدەستبهێنێتەوە.
ئەمە لەكاتێكدایە كە ناشەفافی لە داهات و دۆسیەی نەوت و ئابووری، لە دیارترین ئاڵنگارییەكان بۆ قۆناغی داهاتوو سەیردەكرێن، بەتایبەت كە ئێستا یەكێتیی نیشتمانیی كوردستان پێیوایە ئەو بابەتانە پرسی نیشتمانین و دەبێت لە خزمەتی خەڵكدا بن.
سەردانەكەی مەسرور بارزانی وەك سەرۆكی حكومەتی هەرێمی كوردستان بە تەنها بۆ ئەنقەرە لەكاتێكدایە، ئەم كابینەیە كە ئێستا كاربەڕێكەرە، كابینەیەكی نیشتمانی بنكە فراوانە و بەتەنها لە پارتی پێكنەهاتووە، بەڵكو زۆربەی حزبەكانی تێدایە لەنێویشیاندا یەكێتی كە پشكی جێگری سەرۆكی حكومەتی هەیە، بەڵام لە سەردانەكە و ناوەڕۆكەكەی ئاگادار نییە.
شاسوار عەبدولواحید كە وەك ئۆپۆزسیۆن و نوێنەرایەتی بەشێك لە دەنگی ناڕازیی پێناسەی خۆی دەكات، لەكاتی گفتوگۆكانی پێكهێنانی حكومەتدا سەردانی ئەنقەرە دەكات، بەڵام لە ئاستی سەرۆكی نوسینگەی وەزیری دەرەوەدا پێشوازی لێكراوە.
سەردانی مەسرور بارزانی و شاسوار عەبدولواحید بۆ توركیا لە كاتێكدایە، دەسەڵاتدارانی توركیا لەماوەی چەند رۆژی رابردوودا لایەنە سوننەكانی عێراقیشی بە تاك و كۆ بانگهێشتی ئەنقەرە كردووە و لەبارەی رەوشی عیراق گفتوگۆیان كردووە.
توركیا لەم كاتەدا كە بانگهێشتی ئەو حزبانەی هەرێم دەكات بۆ پرسی پێكهێنانی كابینەی نوێ، بەردەوامە لە بۆردومانكردنی هەرێمی كوردستان و قەدەغەكردنی گەشتە ئاسمانییەكان بۆ سلێمانی، لەگەڵ گەمارۆدانی دەڤەری بادینان و هەوڵدان بۆ داگیركردنی كۆبانێ و مەنبج و ناوچەكانی دیكەی رۆژئاوای كوردستان.
ئەمڕۆ مەکتەبی سکرتارییەتی سەرۆک مام جەلال لە شاری سلێمانی، سەردانی تێکۆشەر و دەرهێنەری گەورە و دیاری کورد، خاوەنی گەورە شاکار و زنجیرە درامای گەردەلوول مامۆستا جەلیل زەنگەنە-یان کرد.
لەو سەردانەدا مەکتەبی سکرتارییەت لە نزیکەوە پەیام و چەپکە گوڵی ریز و وەفای سەرۆک بافڵ جەلال تاڵەبانی و قوباد تاڵەبانی-یان پێشکەشکرد و هیوای سەرکەوتنی هەمیشەییان لە کارە هونەرییەکانیدا بۆ خواست.
مەکتەبی سکرتارییەت لە بەرانبەر کۆشش و داهێنان و خزمەتەکانی لە بواری نواندن و پێشخستنی هونەری درامای کوردی ستایشی رۆڵی مامۆستا جەلیل زەنگەنەیان کرد، کە جگە لەوەی کارەکانی لە خزمەتی گەشەپێدانی هونەری کوردیدا بووە، بگرە توانی لە پاراستنی ئەرشیف و دیکۆمێنتکردنی راستییە مێژوویەکانی بەشێکی شۆڕی نوێی گەلی کورد رۆڵی بەرچاوی هەبێت، بە تایبەت شاکاری گەردەلوول بۆ هەموولایەک مایەی سەربەرزی و ستایشە.
ئاماژەی بەوەشکرد، لەو رووەوە یەکێتیی نیشتمانیی کوردستان بە چاوی رێزەوە لە بەخششەکانی مامۆستا جەلیل زەنگەنە دەڕوانێت و وەک سەرمایەیەکی بە نرخ سەیری دەکات و چاوەڕوانی کاری باشتر و گەورەتری لێدەکەن .
لە بەرانبەردا مامۆستا جەلیل زەنگەنە وێرای خۆشحاڵبوونی بە سەردان و بەسەرکردنەوەکەی مەکتەبی سکرتارییەت ئاماژەی بەوەکرد، "پاراستنی مێژووی شۆڕشی نوێ لە شێواندن و گەیاندنی راستییەکانی ئەم خەباتە سەختەی گەلەکەمان لەو سەردەم و قۆناغە هەستیارەدا ئەرکی هەموو خاوەن قەڵەم و داهێنەر و دڵسۆزێکە، تا نەهێڵین ئەو رۆژگارە پرشنگدارە لەبیرببرێتەوە و راستییەکانیش وەک خۆی بگەیەنینە خەڵک، هەر ئەوەش وایکرد ئەو هەوڵە هونەرییە بنێم"
هیواشی خواست، تەمەن و ژیان رێگای بدات خەونەکەی بۆ تەواوکردنی گەردەلوول بەدیبهێنێت .
مەکتەبی رێکخستنی یەکێتیی نیشتمانیی کوردستان سەردانی دەزگای میدیایی کوردساتی کرد و خەڵاتی یۆبیلی زیوینی پێشکەشی دەزگاکە کرد.
ئەمڕۆ چوارشەممە ٨ـی ١ـی ٢٠٢٥، سەرکەوت زەکی لێپرسراوی مەکتەبی رێکخستنی یەکێتیی نیشتمانیی کوردستان و وەفدێکی هاوڕێی سەردانی دەزگای میدیایی کوردساتیان کرد و لەلایەن دێرین لەتیف رەشید بەڕێوەبەری گشتی دەزگای میدیایی کوردساتەوە پێشوازییان لێکرا.
لە سەردانەکەدا مەکتەبی رێکخستن خەڵاتی یۆبیلی زیوینیان پێشکەشی دەزگای میدیایی کوردسات کرد بەبۆنەی ٢٥ هەمین ساڵیادی دامەزراندنیەوە، هەروەها لێپرسراوی مەکتەبی رێکخستنی یەکێتی رایگەیاند، "كوردسات مێژوویەكی هەیە كە هەموو بینەری كورد شانازی پێوە دەكات".
رۆژی ١-١-٢٠٠٠، دەزگای میدیایی کوردسات دەستی بەکارکردن کرد، لە ئێستاشدا ٢٥ ساڵ بەسەر کارکردنی دەزگاکەدا تێپەڕیوە.
بافڵ جەلال تاڵەبانی سەرۆکی یەکێتیی نیشتمانیی کوردستان بۆ کۆچی دوایی"مەلیحە خانی میرزا عەبدولڕەحمان"هاوسەری خوالێخۆشبوو شێخ رەئوفی شێخ مەحمودی حەفید پرسەنامەیەکی ئاراستەی خانەوادەی دەکات و دەڵێت بنەماڵەکەتان رۆڵێكی دیارتان لە مێژووی گەلی كورد و جووڵانەوە سیاسییەكاندا هەبووە
دەقی پرسەنامەکەی:
بەڕێزان بنەماڵەی شێخ رەئوفی شێخ مەحمودی حەفید
کۆچی دوایی خاتوو (مەلیحە خانی میرزا عەبدولڕەحمان) هاوسەری خوالێخۆشبوو شێخ رەئوفی شێخ مەحمودی حەفید لەدڵەوە نیگەرانیكردین.
بۆ خەمە گەورەیە پرسە و هاوخەمیی قووڵی خۆمان ئاڕاستەی بنەماڵە سەربەرزەكەتان دەكەین كە رۆڵێكی دیارتان لە مێژووی گەلی كورد و جووڵانەوە سیاسییەكاندا هەبووە و كار و خزمەتەكانتان بۆ پەرەپێدانی برایەتی و چاكەكاری لە كۆمەڵگەكەماندا بەرزدەنرخێنین.
لە خوای گەورە داواكارم كۆچكردوو بە بەهەشتی بەرین شادبكات و سەبووری بەهەموولایەك ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
شارەزایەکی کەشناسیی رایگەیاندووە، لە ناوەڕاستی ئەم مانگە بەدواوە شەپۆلێکی بەهێزی بەفربارین و سەرما روو لە ناوچەکانی رۆژهەڵاتی ناوەڕاست دەکات و هەرێمیش دەگرێتەوە.
هەڤاڵ سدیق شارەزای کەشناسی ئاماژەی بەوەکردووە، پێشبینی دەکرێت لەنێوان ١٨ بۆ ٢٢ی ئەم مانگەدا، بارستە هەوایەکی ساردی جەمسەری زۆر بەهێز لە سیبیریاوە روو لە وڵاتانی، سوریا، ئەردەن، لوبنان، فەڵەستین، میسڕ، باکووری خۆرڵاتی لیبیا، تەواوی ناوچەکانی باکووری سعودیە، تورکیا، عێراق، باکووری کوردستان، رۆژهەڵاتی کوردستان و هەرێمی کوردستان بکات.
ئاماژەی بەوەشکردووە، پێشبینی دەکرێت، پلەکانی گەرما دابەزینی بەرچاو بەخۆیانەوە ببینن، بەجۆرێک لە زۆرینەی ناوچەکانی هەرێم بۆ خوار سفری سیلیزی داببەزن.
دەشڵێت، بەپێی پێشبینییە سەرەتاییەکان، شەپۆلێکی زۆربەهێز و چڕی بەفربارین بەشێکی زۆری ناوچە جیاجیاکانی هەرێمی کوردستان دەگرێتەوە، کە ئەگەر شەپۆلەکە گۆڕانکاری بەسەردا نەیەت و وەک ئێستا جێگیر بێت و بە بەهێزی بمینێتەوە، پێشبینی دەکرێت ٧٠-٨٠٪ی ناوچە جیاوازەکانی هەرێمی کوردستان سپیپۆش ببێت و ئەگەری هەیە بارستە هەوا ساردەکە زیاتر دابەزێتە ناوچەکانی دیکەی هەرێم، بەشێوەیەک لە سەنتەری شارە گەورەکانی هەرێمی کوردستاندا بەفر ببارێت.