کوردستان
بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازیی لە ڤیكتۆریا تایلۆر، جێگری یاریدهدهری وهزیری دهرهوهی ئهمریکا بۆ کاروباری رۆژههڵاتی نزیک و وەفدێکی یاوهری كرد.
لە دیدارەكەدا كە دەرباز كۆسرەت رەسوڵ، لێپرسراوی مەكتەبی پەیوەندییەكان ئامادەبوو، دۆخی هەرێمی كوردستان و عیراق و پاراستنی سەقامگیریی ناوچەكە جەختیلێكرایەوە.
لەدرێژەی دیدارەكەدا بافڵ جەلال تاڵەبانی سیاسەتی یەكێتی و هەوڵەكانی بۆ روبەڕوبوونەوەی ئاڵنگارییەكان و چارەسەركردنی كێشەكان روونكردەوە و ئاماژەی بەوەكرد، پابەندین بە پاراستن و بەرگریكردن لە ماف و بژێویی ژیانی خەڵكەكەمان، لەو چوارچێوەیەشدا لە هەوڵەكانمان بۆ پێكهێنانی حكومەتێكی خزمەتگوزار و دادپەروەر بەردەوامین و دەمانەوێت یەكسانی و هاوبەشیی راستەقینە بنەماكەی بێت. دەمانەوێت هەموومان بەرپرسیارانە و دوور لە هەموو ناكۆكییەك خزمەتی خەڵكەكەمان بكەین و هەرێمەكەمان بەرەو ئاوەدانی و سەقامگیریی زیاتر ئاڕاستە بكەین.
لەبارەی كێشەكانی نێوان هەولێر و بەغدا، پرسی مووچە و ناردنی شایستە داراییەكانی هەرێمی كوردستان سەرۆك بافڵ رایگەیاند، داوای پابەندبوون بە بڕیارەكانی دادگای فیدراڵی دەكەین و دەمانەوێت ئەم كێشەیە چارەسەرێكی هەمیشەیی بۆ بدۆزرێتەوە، ناكرێت بەردەوامیی بەم دۆخە بدرێت و ژیانی خەڵك تێكەڵی ململانێكان بكرێت، ئەم پەیامەشمان بەهەموولایەك گەیاندووە.
دۆخی سووریا و رۆژئاوای كوردستان تەوەرێكیتری دیدارەكە بوو و لەوبارەیەوە سەرۆك بافڵ رایگەیاند، هەوڵی ئێمە بۆ پاراستنی مافی هەموو نەتەوە و پێكهاتەكانی سووریا بووە و جەختمان لە لێكتێگەیشتن و گفتوگۆ كردووەتەوە بەتایبەت لەگەڵ كورد كە قوربانییەكی زۆریان بۆ پاراستنی ئاشتی و سەقامگیری داوە.
سەرۆك بافڵ وتیشی، یەكگرتوویی و یەكگوتاریی كورد لە سووریا بەشێكی گرنگی هەوڵەكانمان بووە و هەوڵمانداوە هەمووان بە ستراتیژێكی هاوبەشەوە هەنگاوبنێن، بەخۆشحاڵییەوە سەركەوتووبووین و لەداهاتوودا ئەنجامەكەی رووندەبێتەوە.
لە بەشێكیتری دیدارەكەدا پرسی وزە گفتوگۆی وردی لەبارەوەكرا و لەو رووەشەوە سەرۆك بافڵ هەڵوێستی یەكێتی روونكردەوە و ئاماژەی بەوەكرد، ئەو سیاسەتەی لە رابردوودا سەبارەت بەم پرسە پەیڕەوكراوە سەركەوتوو نەبووە، بۆیە دەمانەوێت لەداهاتوودا بە ستراتیژێكی نوێوە ئەم كەرتە بەڕێوەببەین و ببێتە مایەی پێشكەوتن و ئاوەدانیی وڵاتەكەمان، لەو چوارچێوەیەشدا هیوادارین لەگەڵ بەغدا بگەینە رێككەوتنێكی هاوبەش و هەمووان پێكەوە خزمەتی خەڵكەكەمان بكەین.
ساڵی رابردوودا بە بەهای زیاتر لە 100 ملیار دینار زیان بەر كێڵگە پەلەوەرییەكان گەیشتووە، سەرۆكی كۆمەڵەی كێڵگە پەلەوەرییەكانیش دەڵێت: نەخۆشی و رێگریكردن لە ناردنی بەرهەمەكان بۆ عیراق هۆكاری زیانەكانن
نازم عەبدوڵا، سەرۆكی كۆمەڵەی كێڵگە پەلەوەرییەكان بە كوردسات نیوزی رایگەیاند، لە 2024دا بەهۆی نەخۆشی و رێگریكردن لە نەڕۆشتنی بەرهەمی كێڵگە پەلەوەرییەكان بۆ پارێزگاكانی عیراق، خاوەن كێڵگە پەلەوەرییەكان بە بەهای زیاتر لە 100 ملیار دینار زیانیان بەركەوتووە.
وتیشی، حكومەتی هەرێم سوتەمەنی و كارەبا و ڤاكسین و عەلەف بۆ كێڵگەكە دابین ناكات، بەهۆیەوە نرخی پێداویستییەكان لە بازاڕدا زیادی كردووە و زیانێكی ترە بۆ خاوەنی كێڵگەكان .
راشیگەیاند، لە سەرەتای ئەمساڵەوە نەخۆشی لە كێڵگەكان بڵاوبوەتەوە، بە جۆرێك 50%ی بەرهەمی مریشك لەناوچووە.
نازم عەبدوڵا لە رێگەی كوردسات نیوزەوە داوا لە حكومەتی هەرێم دەكات گرنگی بەو كەرتە بدات و پشتگویی نەخات.
بافڵ جەلال تاڵەبانی سەرۆكی یەكێتیی نیشتمانیی كوردستان و مەسرور بارزانی سەرۆكی حكومەتی هەرێمی كوردستان كۆبوونەوە.
هۆشیار زێباری ئەندامی مەكتەبی سیاسی پارتی دیموكراتی كوردستان لە تۆڕی كۆمەڵایەتی ( ئێکس) بڵاویكردەوە " لە كۆبوونەوەكەدا كە رۆژی چوار شەممە كراوە پرسی پێكهێنانی كابینەی نوێی حكومەتی هەرێمی كوردستان و پرۆسەی دانوستانی نێوان یەكێتی و پارتی باسكراوە".
لەدوای راگەیاندنی ئەنجامی هەڵبژاردنی پەرلەمانی كوردستانەوە، وەفدی دانوستانكار و تەكنیكی یەكێتی و پارتی پێنج جار لەبارەی پێكهێنانی كابینەی نوێی حكومەتی هەرێمی كوردستانەوە كۆبوونەتەوە، لیژنە تەكنیكییەكان رەشنوسی رێككەوتنی پێكهێنانی هەردولا بۆ پێكهێنانی حكومەت ئامادە دەكەن.
پێشتریش سەعدی ئەحمەد پیرە، وتەبێژی یەكێتیی نیشتمانیی كوردستان بە كوردسات نیوزی راگەیاندبوو، لەسەر بنەمای هاوبەشی راستەقینە لە حكومەتدا، گفتوگۆكانیان لەگەڵ پارتی بۆ پێكهێنانی حكومەت دەستپێكردووە.
یەکەم کاروانی نەوتی سپی لەلایەن بەغداوە گەیشتە پارێزگای هەولێر، وەزارەتی سامانە سروشتیەکانیش ئاشکرایکرد، بڕیارە لە چەند رۆژی داهاتوودا هەر یەک لە پارێزگهکانی سلێمانی، دهۆک و هەڵەبجە بە چەند وەجبەیەک نەوتی سپیيان بۆ بێت.
ئەمڕۆ پێنجشهممه وەزارەتی سامانە سروشتیەکانی حکومەتی هەرێمی کوردستان بڵاویکردەوە، دابينكردنى كاروانى یەکەمی نەوتی سپيی پاڵپشتيكراو، لەلایەن وەزارەتی نەوتی فیدراڵهوه بۆ پارێزگهی هەولێر دەستی پێ کرد و بڕیاریشە ههر ئهمڕۆ یان سبهى ههينى، بەڕێوەبەرایەتییەکانی نەوت و کانزاکانی هەر یەک لە پارێزگهکانی سلێمانی، دهۆک و هەڵەبجە بە چەند وەجبەیەک نەوتی سپیيان بۆ بێت.
ئاماژەی بەوەشکردووە، وەزارەتی نەوتی عیراق تەنیا رەزامەندی لەسەر 19٪ ی پشکی پارێزگهکانی هەرێم لەو نەوتە داوە، کە بە نرخی پاڵپشتیکراو بەسەر خێزانەکانی ناوچەکانی ناوەڕاست و خوارووی عێراق دابەشی دەکات.
بڕیارە لە هەفتەی داهاتوو بە هەماهەنگی لەگەڵ پارێزگه و ئیدارە سەربەخۆکان، وەکوو هەنگاوی یەکەم نهوتەکە بەسەر هاووڵاتيیانى ناوچە شاخاوییەکان دابەش بکرێت.
بە مەبەستی زیاتر رێکخستنی ئەرک و کارەکانی راگەیاندن و کۆنترۆڵکردنی ئەو بەربڵاوییە لە بڵاوکردنەوەی وێنە و ڤیدیۆ و نمایشکردن بە جل و بەرگی سەربازی بە شێوەیەکی نادروست،وەزارەتی پێشمەرگە هەموو جۆرە پۆست و نمایشکردنی بەجلی سەربازیەوە قەدەغەکرد.
وەزارەتی پێشمەرگەی حکومەتی هەرێم ئەمڕۆ لەراگەیندراوێکدا بڵاویکردەوە، هەموو جۆرە پۆست و بڵاوکردنەوەی هەرجۆرە نمایش و خۆ دەرخستنێک بە شێوەیەک چالاکی کەسی ئەفسەر و فەرماندە و پێشمەرگە بە جلی سەربازی، لە بنکە و بارەگا سەربازییەکان کە زیان بە شکۆ و کەسایەتی فەرماندە و ئەفسەرانی هێزی پێشمەرگە دەگەیەنێت لە تۆڕە كۆمەڵایەتییەكاندا قەدەغەیە.
وەزارەتی پێشمەرگەی حکومەتی هەرێم ئاماژەی بەوەشکردووە، پێویستە هەردوو بەڕێوەبەرایەتی گشتی راگەیاندن و هەواڵگری پێشمەرگە بە هەماهەنگی لەگەڵ دەزگا ئەمنیەکان بەدواداچوون بۆ پەیجە فەیک و نادیارەکان بکەن کە سوکایەتی بە ناو ناوبانگی پێشمەرگە و فەرماندە سەربازییەکان دەکەن، ئەگەر کەسانی سەربازی بن بە پێی یاسای سزدانی سەربازی مامەڵەیان لەگەڵ دەکرێت و ئەگەر کەسانی مەدەنی بن لە رێگەی فەرمانگەی یاسایی وەزارەتی پێشمەرگە سکاڵایان لەسەر تۆمار دەکرێت.
وەفدی دانوستانكاری هەرێمی كوردستان، لەبارەی گرفتەکانی نێوان هەولێر و بەغداد لەگەڵ نوێنەری وڵاتان کۆبوونەوە.
لە كۆبوونەوەكەدا گفتوگۆ لەبارەی كێشەكانی نێوان هەولێر و بەغداد و باسی شایستە داراییەكان و هەناردەكردنەوەی نەوتی هەرێم کراوە.
ئەوەش لە كاتێكدایە، بڕیارە هەفتەی داهاتوو وەفدی دانوستانكاری هەرێم سەردانی بەغداد بكەن و لەگەڵ بەرپرسانی عیراق گفتوگۆ لەبارەی كێشەكانی هەرێم بكەن، بە تایبەت كێشە داراییەكان.
لەئێستادا بەغداد و هەرێم لێدوانی پێچەوانە و دژ بەیەک دەدەن لەبارەی بودجەی هەرێمی کوردستان و حکومەتی هەرێم رەتی دەکاتەوە ئەو ژمارانەی بەغداد باسی دەکات لەبارەی ناردنی بەشەبودجەی هەرێم و موچەی موچەخۆرانەوە راست بێت، بە جۆرێک هەفتەی رابردوو راگەیەنراوێکی بە زمانی عەرەبی بڵاوکردەوە و بە ژمارە بڕی ئەو پارانەی خستە روو کە لە ساڵی ٢٠٢٤دا عیراق بۆ هەرێمی ناردووە.
کارەبای سلێمانی دانیشتووانی چەند کۆمەڵگەیەکی نیشتەجێبوون 'سیتییەکان' ئاگادار دەکاتەوە و رایگەیاندووە، ئەگەر بە رەسمی هاوبەشی کارەبا نەکەنەوە، کارەبای نیشتیمانییان دەبڕدرێت.
کارەبای سلێمانی رایگەیاندووە، ئاگاداری دانیشتووانی كۆمەڵگەكانی نیشتجێبوون دەكەنەوە، هەر ماڵێك كارەبایان هەیە و تاوەکو ئیستا بە رەسمی هاوبەشی كارەبایان نەكردووەتەوە، یان پسوڵەی كارەبایان بۆ نەچووەتەوە، لە ماوەی مانگێكدا لە بەرواری ئەم ئاگادارییەوە سەردانی بەڕێوەبەرایەتییەكانی دابەشكردنی كارەبا بكەن.
کارەبای سلێمانی ناوی ئەو کۆمەڵگە نیشتەجێبوونانەی لە لیستێکدا بڵاوکردووەتەوە و ئەوەشی خستووەتە روو، پێویستە ئەو کەسانەی بە رەسمی هاوبەشی کارەبایان نەکردووەتەوە، سەردانیان بکەن بۆئەوەی ناویان تۆمار بکرێت و هاوبەشی كارەبایان بۆ بکرێتەوە و پسوڵەیان بۆ چاپ بکرێت، بەپێچەوانەوە كارەباكانیان دەبڕدرێت.
ئەوەش لە کاتێکدایە، بەشێک لە کۆمەڵگەکانی نیشتەجێبوون هاوشێوەی گەڕەکەکان، هەردوو کارەبای نیشتیمانی و مۆلیدەیان هەیە و بە نۆرە کارەبایان پێدەدرێت.
کەشناسیی پێشبینییەکانی کەشوهەوای ئەمڕۆ و سبەی بڵاوکردەوە و ئاماژەی بەوەکردووە، خێرایی با زیاد دەکات و باران لە چەند ناوچەیەک دەبارێت.
کەشناسیی عیرا رایگەیاند، ئەمڕۆ پێنجشەممە، بارستە هەوایەکی سارد لە دەریای سوورەوە روو لە ئاسمانی عیراق دەکات و بەهۆیەوە ئاسمان هەور دەبێت بە گشتی، لە سبەینێشەوە کەشەکە تاڕادەیەک جێگیر دەبێتەوە و ئاسمان دەگۆڕیت بۆ ساماڵ و نیمچەهەور.
دەشڵێت، بەهۆی ئەو بارستە هەوا ساردەوە لە چەند ناوچەیەکی هەرێم باران دەبارێت و لە سبەینێشەوە خێرایی با زیاد دەکات و دەگاتە ٢٠ بۆ ٣٠ کیلۆمەتر لە سەعاتێکدا.
کەشناسیی عیراق ئەوەشی خستووەتە روو، لە رۆژی یەکشەممەی داهاتووەوە ئاسمان لە هەرێم دەگۆڕێت بۆ هەور و خێرایی با ئاسایی دەبێتەوە.
لەلایەکی دیکەوە کەشناسیی هەرێم رایگەیاندووە، ئەمڕۆ پلەکانی گەرما کەمێک نزم دەبنەوە و بەرزترین پلەکانی گەرمای پێشبینیکراو بە پلەی سیلیزی بەم جۆرە دەبن :
هەولێر: ١٦ پلەى سیلیزى
سلێمانی: ١٥ پلەى سیلیزى
دهۆک: ١٦ پلەى سیلیزى
کەرکوک: ١٨ پلەى سیلیزى
هەڵەبجە: ١٦ پلەى سیلیزى
گەرمیان: ٢٠ پلەى سیلیزى
زاخۆ: ١٦ پلەى سیلیزى
بەیانی ئەمڕۆ تۆپخانەكانی توركیا چەند ناوچەیەكی سنوری برادۆستیان تۆپباران كرد.
پەیامنێری كوردسات نیوز رایگەیاند ، بەیانی ئەمڕۆ تۆپخانەكانی توركیا هەریەك لە ناوچەكانی "تارستا و گەلی رەش و سنین" یان لە سنوری برادۆست تۆپباران كرد و تا ئێستاش هیچ زانیارییەك لەبارەی زیانەكانی ئەو تۆپبارانەوە نییە .
لە ساڵی 2017 وە سوپای توركیا بە درێژایی 61 كیلۆمەتر لە سنوری برادۆستەوە هاتۆتە ناو خاكی هەرێمی كوردستان و بەشێوەیەكی گشتیش 17 بنكەی سەربازیی لەو ناوچەیە هەیە ، لە ساڵی 1991یشەوە ، 125 هاووڵاتی بەهۆی هێرش و بۆردومانەكانی توركیاوە لە سنوری برادۆست شەهید و برینداركراون و 118 گوندیش چۆڵكراون .
باشترین ئەندامی ئەنجومەنی نوێنەرانی عیراق لە بازنەی سلێمانی هەڵبژێردرا، کە د.بڕیار رەشیدە لە فراکسیۆنی یەکێتیی نیشتیمانیی کوردستان.
دامەزراوەی ''بەغداد الیوم'' لە رێورەسمی راگەیاندنی ئەنجامی هەڵسەنگاندنی دامەزراوەکە بۆ هەڵبژاردنی باشترین پەرلەمانتارەکانی عیراق، د.بڕیار ڕەشیدی وەک باشترین ئەندامی ئەنجومەنی نوێنەرانی عیراق لە سلێمانی دیاریکرد.
د.بڕیار ڕەشید، ئەندامی ئەنجومەنی نوێنەران لە فراکسیۆنی یەکێتیی نیشتیمانیی کوردستان، لەماوەکانی رابردوودا زۆرترین چالاکی و بەدواداچونی هەبووە لەسەرجەم سێکتەرە جیاوازەکان، هاوکات ئەمڕۆش وەک باشترین پەرلەمانتاری عیراق / سلێمانی هەڵبژێردرا.
کێشەی خوێندکارانی ماستەر و دکتۆرا چارەسەرکرا، کە بەشێوەی گرێبەست دامەزراون و ئێستا لە خوێندن بەردەوامن، وەزارەتی خوێندنی باڵاش دەڵێت: هەردوو مافی خوێندن و دامەزراندنیان پارێزراو دەبێت.
وەزارەتی خوێندنی باڵای هەرێم لە راگەیەندراوێکدا کە ئیمزای وەزیری خوێندنی باڵای لەسەرە، بڵاویکردوەتەوە، کێشەی ئەو خوێندکارانە چارەسەرکراوە کە بەشێوەی گرێبەست دامەزراون و لە ئێستادا خوێندکاری ماستەر و دکتۆران.
لە راگەیەندراوەکەدا ئاماژە بەوەکراوە، لەسەر راسپاردەی د. ئارام محمد وەزیری خوێندنی باڵا و توێژینەوەی زانستی، سەرۆكایەتی ئەنجومەنی وەزیران رەزامەندی دا لەسەر دامەزراوانی گرێبەست وەك وانەبێژ دامەزراون و لە ئێستادا خوێندکاری ماستەر یاخود دكتۆرا، مافیان پارێزراو دەبێت و لە خوێندن بەردەوام دەبن تاكو تەواوكردنی قۆناغی خوێندنەكەیان.
هەر لە فەرمانە وزارییەكەی وەزیری خوێندنی باڵا و توێژینەوەی ئاماژەبەوەکراوە: دوای تەواوكردنی خوێندنەكەیان ڕێكارەكانی بە گرێبەست كردن و دەستبەكاربونیان بۆ ئەنجام دەدرێت بەو مەرجەی بەكردارەكی وانەبێژ بوبن و مەرجەكانی دامەزراندیان بە گرێبەست تێدابێت، واتە لە یەك كاتدا هەردوو مافی (خوێندن) و (دامەزراندنیان) پارێزراو دەبێت.
بە هەوڵی شاناز ئیبراهیم ئەحمەد خانمی یەکەمی عیراق دۆزینەوە و هەڵدانەوەی گۆڕە بەکۆمەڵەکان لە پارێزگای سەماوە بەردەوامە و بەپێی زانیارییەکانی کوردسات نیوز، "شەش گۆڕی بەکۆمەڵی نوێ دۆزراونەتەوە و ژمارەی ئەو روفاتانەش کە هەڵگیراونەتەوە بەرزبووەتەوە بۆ 147 روفات".
محەمەد عەبدولرەحمان پەیامنێری کوردسات نیوز رایگەیاند، "ژمارەی روفاتە هەڵگیراوەکان بەرزبووەتەوە بۆ 147 روفات، هەروەها 145 بەڵگەش دۆزراونەتەوە".
بەپێی زانیارییەکانی کوردسات نیوز،سەرجەم روفاتەکان ژن و منداڵن، منداڵی لە دایکبووی تێدایە کە تەمەنی لە نێوان هەفتەیەک بۆ 10 رۆژ دەبێت، منداڵی تێدایە هێشتا لەدایک نەبووە".
هەروەها لە بیابانەکانی تەلشێخەی پارێزگای سەماوە، شەش گۆڕی بە کۆمەڵی دیکە دۆزراونەتەوە و لەم ساڵدا کاری هەڵدانەوەیان بۆ دەکرێت.
بە هەوڵی شاناز ئیبراهیم ئەحمەد خانمی یەکەمی عیراق دۆزینەوە و هەڵدانەوە گۆڕە بەکۆمەڵەکان بەردەوامە و چەند رۆژێک پێش ئێستا یەکێک لە گۆڕە بەکۆمەڵەکان هەڵدرایەوە و تائێستا 147 روفاتی تێدا هەڵگیراوەتەوە.
تەرمی ژنێک لە پێنجوێن بە پارچە پارچە کراوی دۆزرایەوە و لە ئێستادا پۆلیس دەستی بە لێکۆڵینەوە کردووە.
هێمن ئیبراهیم قائیمقامی پێنجوێن بە كوردسات نیوزی راگەیاند، رووداوەكە لە ٣١ی ١٢ی ٢٠٢٤دا روویداوە و تەرمی ئەو ژنە لە ماڵەكەی خۆیدا دۆزراوەتەوە.
وتیشی، ژنەكە لە لایەن هاوسەرەكەیەوە كوژراوە و دوای كوشتنیشی هەڵاتووە و چووەتە ئێران و دوای ئەوەی ماوەیەكە ئەو ژنە دیار نەماوە و پرسیار لە دەوروبەری و منداڵەكانی ئەو ژنە كراوە توانراوە سەرەداوێك بدۆزرێتەوە و تەرمەكەی بدۆزرێتەوە.
ئەوەشی خستە روو، ئێستا تەرمی ژنەكە لە نەخۆشخانەی گشتیی پێنجوێنە و بڕیارە رەوانەی پزیشكی دادی سلێمانی بكرێت، لێكۆڵینەوەش لە رووداوەکە دەستیپێكردووە.
ئەمڕۆ یەکەم رۆژی چلەی زستانە، چلەی زستان لە ٢٥ رۆژ دوای یەکەم رۆژی زستان دەستپێدەکات و بە مانگی کوردی دەکاتە بەفرانبار و بەدوای ئەویشدا رێبەندان دێت، کە هاوتای ناوی مانگەکان ئەو ماوەیە سەرمایەکی سەخت و کەشێکی بەفراوی هەیە و رێگاوبانەکان دەیانبەستێت. لە چلەی زستاندا سەرما سەختتر دەبێت و شەپۆلی بەفربارین زیاتر دەبێت. لەگەڵ دەستپێکردنی چلەی زستاندا پێشبینییەکانی کەشناسی چین؟
کەشناسیی هەرێم رایگەیاندووە، ئەمڕۆ و سبەی کەش تاڕادەیەک جێگیر دەبێت، ئەمڕۆ ئاسمان ساماڵ و سبەی ساماڵ و پەڵەهەور دەبێت.
بەپێی پێشبینییەکانی کەشناسیی عیراقیش، ئەمڕۆ پلەکانی گەرما کەمێک بەرزدەبنەوە، بەڵام لە سبەینێوە روو لە دابەزین دەکەن، بەتایبەت لەکاتەکانی ئێوارەوە تاوەکو بەرەبەیان.
کەشناسیی عیراق ئەوەی خستووەتە روو، لە چەند ناوچەیەکی عیراق و هەرێمی کوردستان نزمترین پلەکانی گەرما بۆ پلەی بەستن دادەبەزن.
بەپێی پێشبینییەکانی کەشناسیی هەرێمیش، سبەی لە حاجی ئۆمەران نزمترین پلەکانی گەرما بۆ ٦ پلەی ژێر سفری سیلیزی دادەبەزن.
بەرزترین پلەکانی گەرمای پێشبینیکراو بە پلەی سیلیزی بەم جۆرە دەبن :
هەولێر: ١٧ پلەى سیلیزى
سلێمانی: ١٤ پلەى سیلیزى
دهۆک: ١٤ پلەى سیلیزى
کەرکوک: ١٨ پلەى سیلیزى
هەڵەبجە: ١٤ پلەى سیلیزى
گەرمیان: ١٩ پلەى سیلیزى
سۆران: ١٢ پلەى سیلیزى
زاخۆ: ١٦ پلەى سیلیزى
حاجی ئۆمەران: ٢ پلەى سیلیزى
سوپای توركیا بناری چیای گارەی لە قەزای ئامێدی سەر بە پارێزگای دهۆك تۆپباران كرد، لە گوندی گوهەرزێش شەڕ لە نێوان سوپای توركیا و پەكەكە روویدا.
پەیامنێری كوردسات نیوز رایگەیاند، لە بەردەوامیی بۆردومانەكانی توركیا بۆ سەر سنوری ئامێدی، شەوی رابردوو تۆپخانەكانی توركیا لە زنجیرە چیای مەتیناوە چیای گارەیان تۆپباران كرد. هەروەها لە گوندی گوهەرزێی سەر بە ناحیەی دێرەلوك شەڕ لە نێوان سەربازانی توركیا و گەریلاكانی پارتی كرێكارانی كوردستان - پەكەكە روویدا، ئەوەش لە دوای ئەوەی نزیك گوندەكە بنكەیەكی سەربازی توركیا دانرا.
پەیامنێری كوردسات نیوز راشیگەیاند، لە مانگی شەشی رابردوەوە تا ئێستا توركیا زیاتر لە 10 بنكەی لە سنوری ئامێدی دروستكردووە و سەربازانی تێدا جێگیركردووە .
ئاژانسی تاوانی نیشتمانی بەریتانیا بە هەماهەنگی دەزگای ئاسایشی هەرێم لە سلێمانی، سێ قاچاخچیان دەستگیر كرد، كە ئەندامی تۆڕێكی نیشتمانی قاچاخچین.
ئاژانسی تاوانی نیشتمانی بەریتانیا بڵاویكردەوە، بۆ یەكەمجار بە هەماهەنگی دەزگای ئاسایشی هەرێمی كوردستان لە سلێمانی، لە ئۆپراسیۆنێكی زەمینیدا كە لە رۆژانی 8 بۆ 12ـی ئەم مانگە بەڕێوەچوو، توانیویانە گروپێكی قاچاخچێتی لە هەرێمی كوردستان دەستگیربكەن، كە لە سێ ئەندام پێكهاتوون و خەڵكیان لە هەرێمی كوردستانەوە بە رێگەی نایاسایی بۆ بەریتانیا و وڵاتانی ئەوروپا گواستووەتەوە.
ئەوەشی خستەڕوو، گومان دەكرێت ئەو گروپەی دەستگیركراوە، بەشێك بێت لە تۆڕی نیشتمانی قاچاخچێتی " ئامانج حەسەن زادە"، بەو پێیەی یەكێك لە دەستگیركراوەكان تێوەگلاوە لە گواستنەوەی دەیان یەختی كۆچەران. یەكێكی دیكەشیان وەك ژمێریار بۆ سەرۆكی تۆڕە قاچاخچییەكە كاری كردووە. سێیەم دەستگیركراویشیان وەك نێوەندگیر لە نێوان خەڵك و تۆڕە قاچاخچییەكە كاری كردووە.
ئاژانسی تاوانی نیشتمانی بەریتانیا راشیگەیاند، لە ئێستادا تەواوی ئەندامی گروپەكە بە تۆمەتی بازرگانیكردن بە مرۆڤەوە راگیراون و لایەنە پەیوەندیدارەكانی حكومەتی هەرێم رێكاری یاسایی بەرانبەریان دەگرێتەبەر.