کوردستان
فەرماندەی هێزەکانی سوریای دیموکرات ''هەسەدە'' رایدەگەیەنێت: هێزەکانیان لە باکور رۆژهەڵاتی سوریا چەک دانانێن، بەڵام ئامادەن بە دانوستان بچنە ناو سوپای داهاتووی سوریاوە.
لە چاوپێکەوتنێکی تایبەتدا لەگەڵ ''ئەلعەرەبیە'' مەزلوم کۆبانێ فەرماندەی هێزەکانی سوریای دیموکرات ''هەسەدە'' رایگەیاندووە، کە هێزەکانی بڕیاری ڕادەستکردنی چەک یان هەڵوەشاندنەوەی خۆیان نەداوە، بەڵکو دەیانەوێت بچنە ناو سوپای داهاتووی سوریاوە. وتیشی: جگە لە دانوستان بۆ رێکخستنەوەی هێزەکان لە سوریا هیچ رێگەیەکی دیکە نیەو هەر شیوازێکی دیکە تاقیبکرێتەوە کاردانەوەی خراپی لێدەکەوێتەوە.
ئاماژەی بەوەشکردوە، شەڕی بەنداوی تشرین بەردەوامە، دەشڵێت: ویستمان لە ڕێگەی دیالۆگەوە کێشەکە لەگەڵ تورکیا چارەسەر بکەین بەڵام نەگەیشتنە ئەنجام، رەتیشیکردەوە هیچ هێرشێکیان لە دژی تورکیا ئەنجامدابێت.
هەر لە چاوپێککەوتنەکەدا ئەوەشی خستەڕوو، دەبێت دەستور مافەکانی کورد لە سوریا دەستەبەر بکات، ئێمەش پشتیوانی یەکگرتوویی خاکەکانی سووریا دەکەین، هەروەها داوا دەکات دان بە زمانی کوردیدا بنرێت و وشەی عەرەبی لە (کۆماری عەرەبیی سوریا) لاببرێت.
سەبارەت بە هێزە ئەمریکییەکان لە سوریا ڕوونی کردەوە، کە بوونیان گرنگە بۆ ئەوەی بۆچوونەکان لێک نزیک بکەنەوە. راشیگەیاند، پشتیوانی مانەوەی هێزەکانی ئەمریکا لە سوریا دەکەین.
سەرۆک بافڵ جەلال تاڵەبانی لە پەیامێکی پیرۆزباییدا بەبۆنەی هەڵبژاردنی دۆناڵد ترەمپ وەک 47 هەمین سەرۆکی ئەمریکا دەڵێت: چاوەڕێم لەگەڵ ئیدارەی نوێی ئەمریکا کاربکەم بۆ بەرەوپێشبردنی ئاشتی و سەقامگیری لە ناوچەکەدا.
دەقی پەیامەکە:
لە قووڵایی دڵمەوە پیرۆزبایی خۆم ئاراستەی سەرۆک دۆناڵد ترەمپ دەکەم بەبۆنەی دەستبەکاربوونی وەک سەرۆکی ویلایەتە یەکگرتووەکانی ئەمریکا. سەرکردایەتییەکەی لاپەڕەیەکی نوێ لە پەیوەندییە بەردەوامەکانی نێوان گەلی کورد و گەلی ئەمریکادا هەڵدەداتەوە.
بەوپەڕی خۆشحاڵییەوە چاوەڕێم لەگەڵ ئیدارەی نوێی ئەمریکا کاربکەم بۆ بەهێزکردنی پەیوەندییە مێژووییەکانمان و بەرەوپێشبردنی ئاشتی و سەقامگیری لە ناوچەکەدا. گەلی کورد و گەلی ئەمریکا پێکەوە دەتوانن جیهانێکی سەلامەتتر و ئاوەدانتر بۆ هەمووان بنیادبنێن.
بافڵ جەلال تاڵەبانی
سەرۆکی یەکێتیی نیشتمانیی کوردستان
لە کۆبوونەوەی وەفدی باڵای حکومەتی هەرێم لەگەڵ حکوەمتی فیدڕاڵ تەئکید لەسەر چارەسەکردنی کێشەکانی نێوان هەردوولا کراوەتەوە، وەزارەتی دارایی هەرێمیش ئاشکرایکردووە، لەگەڵ دارایی عیراق رێککەوتن کراوە بگەنە چارەسەرێکی ریشەیی لەبارەی موچەوە.
بەپێی راگەیەندراوێکی وەزارەتی دارایی هەرێم، رۆژی دووشەممە بەسەرپەرشتیی فوئاد حسێن جێگری سەرۆك وەزیرانی عێراق و سەرۆكی ئەنجومەنی ئابوری كۆبوونەوەیەكی هاوبەش لە نێوان وەفدی هەرێمی كوردستان بە سەرۆكایەتیی ئاوات شێخ جەناب وەزیری دارایی و لەگەڵ وەفدی حكومەتی عێراق كە پێكهاتبوون لە تەیف سامی وەزیری دارایی عێراق و وەزیری ئاوەدانكردنەوە و نیشتەجێكردنی عێراق بەڕێوەچوو
ئەوەشخراوەتەڕوو، كۆبوونەوەكە لە كەشێكی ئیجابی و بەرپرسیارانەدا گفتوگۆ لەسەر ماف و شایستە داراییەكانی هەرێمی كوردستان بۆ ساڵی 2025 كراو و هەردوولا هاوڕابوون كە هەموو هەوڵەكان بخرێنەگەڕ بۆ لابردنی ئاستەنگەكانی بەردەم ناردنی موچەی فەرمانبەرانی هەرێم لەم ساڵدا، هاوكات داواكارییەكانی حكومەتی هەرێم بۆ ناردنی ئەو شایستانەی كە ساڵی رابردوو نەنێردراوە بەداتا و بەڵگەی رەسمی خرایەڕوو گفتوگۆی لەبارەوە كرا.
هەر بەپێی راگەیەندراوەکە، هەردوولا ڕێككەوتن كۆبوونەوەكان بەردەوامبێت و رۆژی یەكشەممەی داهاتوو كۆبوونەوەی هاوبەش ئەنجامبدرێت كە تیایدا بڕیاری پێویست لەسەر ماف و شایستە داراییەكانی هەرێمی كوردستان بدرێت و ڕاسپاردەی پێویستیش ئاڕاستەی ئەنجومەنی وەزیرانی عێراق بكرێت.
لە كۆبوونەوەكەدا بڕیاردرا تیمێكی هاوبەش لە هەردوو وەزارەتی دارایی عێراق و وەزارەتی دارایی هەرێم پێكبهێنرێت و لەسبەی سێشەممەوە تیمەكە لە وەزارەتی دارایی هەرێمی كوردستان دەستبەكاربن و ئامادەكاری پێویست بكەن بۆ كۆبوونەوەی سەرەتای هەفتەی داهاتوو لەسەر ئەرك و پابەندییەكانی هەردوولا بۆ ساڵی 2025 .
لە سلێمانی نرخی هەر سێ جۆرەكەی بەنزین 25 دینار دابەزی و وتەبێژی بەنزینخانەكانی سلێمانیش هۆكارەكەی بۆ كەمبوونەوەی خواست لەسەر بەنزین دەگەڕێنێتەوە.
بەهمەن قادر، وتەبێژی بەنزینخانەكانی سلێمانی بە كوردسات نیوزی راگەیاند، لە سەعات 4ی ئەمڕۆوە نرخی هەر سێ جۆرەكەی بەنزین لە سلێمانی 25 دینار دابەزیووە.
ئەوەشی خستەڕوو، نرخی یەك لیتر بەنزینی نۆرماڵ بووە بە 900 دینار و بەنزینی موحەسەن بووە 1100 دینار و نرخی یەك لیتر بەنزینی سۆپەریش بووە بە 1250 دینار.
سەبارەت بە هۆكاری دابەزینی نرخی بەنزینیش، وتەبێژی بەنزینخانەكانی سلێمانی وتی، بەهۆی هەبوونی بڕە بەنزینێكی زۆر لە سنووری پارێزگاكە و كەمبوونەوەی خواست لەسەری، نرخی بەنزین دابەزیووە.
ئەوەش لەكاتێكدایە رۆژانە لە ژمارەیەك بەنزینخانە لە شارەكانی هەرێم، بەنزینی حكومی بە نرخی پاڵپشتیكراو و بە 750 دینار دابەش دەكرێت.
وەفدی باڵای هەرێمی كوردستان بەبێ دەستكەوت لە بەغداد گەڕانەوە و وەزیری دارایی عیراقیش رەتیكردووەتەوە پارە بۆ مووچەی مانگی 12ـی ساڵی رابردووی مووچەخۆرانی هەرێم بنێرێت.
پەیامنێری كوردسات نیوز رایگەیاند، وەفدە باڵاكەی هەرێم كە شەوی رابردوو گەیشتنە بەغداد، ئەمڕۆ لەگەڵ تەیف سامی وەزیری دارایی عیراق كۆبوونەوە و تاوتوێی مووچەی مانگەكانی 12 و 1ـی مووچەخۆرانی هەرێمیان كردووە.
وتیشی، وەزیری دارایی عیراق بە وەفدەكەی هەرێمی راگەیاندووە بەهۆی كۆتاییهاتنی ساڵی دارایی 2024، بەهیچ جۆرێك ناتوانێت پارە بۆ مووچەی مانگی 12ـی ساڵی رابردووی مووچەخۆرانی هەرێم بنێرێت.
پەیامنێری كوردسات نیوز راشیگەیاند، هەر ئەمڕۆ وەفدەكەی هەرێم لە بەغداد گەڕاونەتەوە و بڕیاریشە سبەینێ تایبەت بە سەردانەكەی بۆ بەغداد لە وەزارەتی دارایی هەرێم كۆبوونەوەیەك ئەنجامبدات. ئاماژەی بەوەشدا، بەهۆی كەموكورتی و ئامادەنەبوونی لیستی مووچەی مانگی 1ەوە، تائێستا هەرێم لیستی مووچەی مانگی 1ـی رادەستی وەزارەتی دارایی عیراق نەكردووە.
ئاگرێک لە گەڕەکی تاڤگەی شاری سلێمانی کەوتەوە و لەلایەن تیمەکانی بەرگری شارستانی سلێمانیەوە کۆنتڕۆڵکرا.
پەیامنێری کوردسات نیوز لە شوێنی ئاگرکەوتنەوەکە رایگەیاند، بەهۆی ئاگرەکەوە ئۆتۆمبێلێک و دوکانێک بە تەواوی سووتان، ئاماژەی بەوەشکرد، خۆشبەختانە بەهۆی روداوەکەوە هیچ کەسێک گیانی لەدەستنەداوە و تەنها زیانی ماددی هەبووە.
پەیامنێری کوردسات نیوز راشیگەیاند: دوای ماوەیەکی کەم تیمەکانی بەرگری و فریاکەوتن گەیشتوونەتە شوێنی رووداوەکە و ئاگرەکەیان کۆنتڕۆڵکرد و نەیان هێشتووە تەشەنە بکات.
بە وتەی یەکێک لە شایەتحاڵەکان زیانی ماددی ئاگرەکە بە نزیکەی 30 هەزار دۆلار دەخەمڵێنرێت.
شاناز ئیبراهیم ئەحمەد پرسەنامەیەک ئاڕاستەی خانەوادەی محەمەد ئەمین قادر ناسراو بە (حەمەی ڕەسام) دەکات.
دەقی پرسەنامەکە
بەڕێزان خانەوادەی محەمەد ئەمین قادر
بەبیستنی هەواڵى ماڵئاوایی یەکجارەکی وێنەگری دێرینی شاری سلێمانی (محەمەد ئەمین قادر) ناسراو بە(حەمەی ڕەسام)، زۆر غەمباربووم.
بۆ ئەم خەمە پرسە و سەرەخۆشی لەخانەوادەکەتان ئەکەم و هاوبەشی خەم و پەژارەتانم، خواى گەورە سەبرو ئارامی بەهەموو لایەک ببەخشێت و ئەمە دوایین ناخۆشیمان بێت.
شاناز ئیبراهیم ئەحمەد
وتەبێژی یەکێتیی نیشتمانیی کوردستان رایگەیاند، پێویستە هەموو لایەنەکان سەقفی داواکارییەکانیان لەگەڵ دۆخەکەدا بگونجێنن، بەپێچەوانەوە خۆیان توشی کێشە دەکەن. دەشڵێت، وڵاتان تاهەتایە هاوکاریمان ناکەن، ئەوان نوێنەری وڵاتی خۆیانن، نوێنەری کورد؛ کورد خۆیەتی.
سەعدی ئەحمەد پیرە وتەبێژی یەکێتیی نیشتمانیی کوردستان رایگەیاند، "بە لەبەرچاوگرتنی بارودۆخی ناوچەکە لەبەرچاگرتنی ئەو پشتگیرییەی هەمانە لەلایەن کۆمەڵگەی نێودەوڵەتی و و هەستیاری ئەو دۆخە، پێویستە هەموو لایەکمان سەقفی داواکرییەکانمان بگونجێنین لەگەڵ دۆخەکە بەرەو رێککەوتن".
وتیشی، "ئەوە تەنها رێگەیە بۆ ئەوەی سود وەرگرین لەو دۆخە نێودەوڵەتیسازە کە بۆ کورد هاتووەتە پێشەوە، پێویستە كورد یەكڕیز بێت، وڵاتان تاهەتایە هاوکاریمان ناکەن، ئەوان نوێنەری وڵاتی خۆیانن و لە کورد کوردتر نین، نوێنەری کورد؛ کورد خۆیەتی".
ئەوەشی خستە روو، "بەپێچەوانەی ئەوانەوە بەدەستی خۆمان، خۆمان توشی کێشە دەکەین".
سەعدی پیرە ئاماژەی بەوەشکرد، هەڵبژاردنیان کردووە و خەڵک چاوەڕێیە، کێشەکانیان ئەوەند گەورە نین کە چارەسەر نەکرێن.
هاتوچۆی هەرێم چەند رێنماییەکی بڵاوکردەوە بۆ ئەو کەسانەی دەیانەوێت مۆڵەتی شۆفێری نێودەوڵەتی دەربهێنن و رایگەیاندووە، مامەڵەکە لە سەرجەم بەڕێوەبەرایەتییەکانی هاتوچۆ لە پارێزگا و ئیدارە سەربەخۆکان ئەنجام دەدرێت.
هاتوچۆی هەرێم ئەوەشی خستووەتە روو، مامەڵەی دەرهێنانی مۆڵەتی شۆفێری نێودەوڵەتی بەماوەی نیو کاتژمێر ئەنجام دەدرێت و مۆڵەتەکە دەدرێتەوە بە شۆفێران.
دەقی رێنماییەکان:
-مۆڵەتی شۆفێری رەسەن کارا بێت و بەسەر نەچووبێت.
ـ پاسپۆرتی رەسەن کارا بێت و بەسەر نەچووبێت.
ـ دوو وێنەی رەنگا و رەنگ.
ـ بڕی تێچوو و ماوەی کارابوونی مۆڵەتی شۆفێری نێودەوڵەتی بە سێ شێوە دەدرێت بە شۆفێران بە ماوە و بڕی رسوماتی جیاواز بەم شێوەی خوارەوە:
١ـ بۆ ماوەی یەک ساڵ بڕی ٦٠ هەزار دینار وەردەگیرێت.
٢ـ بۆ ماوەی دوو ساڵ بڕی ١١٠ هەزار دینار وەردەگیرێت.
٣ـ بۆ ماوەی سێ ساڵ بڕی ١٦٠ هەزار دینار وەردەگیرێت.
بافڵ جەلال تاڵەبانی سەرۆکی یەکێتیی نیشتمانیی کوردستان، بەهۆی کۆچی دوایی مەلا موحسن سەرگەلی، پەیامێکی هاوخەمی بڵاوکردەوە و دەڵێت، "کۆچکردوو یەکێک بوو لە تێکۆشەرە سەرەتاکانی یەکێتی و شۆڕشی ئەیلول کە لە هەموو قۆناغەکانی سەختی خەباتی کوردایەتی رۆڵ و پێگەی دیار و بەرچاوبووە و."
دەقی پەیامەکە...
کۆچی دوایی هەڤاڵ مەلا موحسن سەرگەلی، تێکۆشەرو پێشمەرگەی دانەبڕاوی شۆڕشی نوێ و رۆژانی سەختی کوردایەتی و کەسایەتی دیاری دەڤەری ئامێدی، لە دڵەوە نیگەران و غەمباریکردین.
هەڤاڵ مەلا موحسن یەکێک بوو لە تێکۆشەرە سەرەتاکانی یەکێتی و شۆڕشی ئەیلول کە لەهەموو قۆناغەکانی سەختی خەباتی کوردایەتی رۆڵ و پێگەی دیارو بەرچاوبووەو هەمیشە هاوخەباتی سەرۆک مام جەلال بوو، لەکۆڕی تێکۆشانیش دانەبڕا کە ئەمڕۆ ئێمە بە رێزەوە یادو یادەوەرییەکانی بەرزڕادەگرین.
بۆئەم ماتەمەش پرسەو سەرەخۆشی ئاڕاستەی کەسوکارو بنەماڵەی سەربەرزی و هاوخەبات و هەڤاڵانی دەکەم و هاوبەشی خەمیانم.
لەخوای گەورە داواکارین گیانی هەڤاڵی کۆچکردوومان بەبەهەشتی بەرین شادبکات، ئارامی و دڵنەوایی بەهەموولایەک ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
کەشناسیی هەرێم پێشبینییەکانی کەشوهەوای ئەمڕۆ و سبەی راگەیاند و ئاماژەی بەوەکردووە، ئەمڕۆ پلەکانی گەرما ٦ بۆ ٧ پلەی سیلیزی دادەبەزن و بەفربارین زۆرینەی ناوچەکانی هەرێم دەگرێتەوە و لە شاری سلێمانی بەفر و باران دەبارێت.
کەشناسیی هەرێم رایگەیاندووە، ئەمڕۆ دووشەممە، ئاسمان هەوری تەواو دەبێت لە زۆربەی کاتەکاندا و لە زۆربەی ناوچەکان نمەباران دەبێت، هەروەها بەفربارین لە زۆربەی ناوچە شاخاوییەکان و ناوچە سنوورییەکانی باکوور و رۆژهەڵات رێژەکەی زیاتر دەبێت.
دەشڵێت، لە شاری سلێمانی پێشبینی تێکەڵەى بەفر و باران دەکرێت بۆ ماوەیەکی کورتخایەن، لە کاتەکانی ئێوارە کاریگەری ئەم شەپۆلە کەم دەبێتەوە بۆ ناوچە شاخاوییەکان پاشان لە کاتەکانی درەنگدا کاریگەرییەکەی کۆتاىی دێت و ئاسمان بەرەو ساماڵ دەگۆڕێت.
دەشڵێت، سبەی سێشەممە، ئاسمان ساماڵ و سارد دەبێت، لەگەڵ دروستبوونی شەختە زیاتر لە ناوچە بەرزەکان و ئەگەری دروستبوونی تەم هەیە لە کاتەکانی بەیانی زوودا.
بەپێی پێشبینییەکانی کەشناسی، ئەمڕۆ پلەکانی گەرما ٦ بۆ ٧ پلە نزمدەبنەوە و لە ناوچە شاخاوییەکانیش ٨ بۆ ١٠ پلەی سیلیزی دادەبەزن، هەروەها لە کاتەکانی درەنگدا لە زۆربەی ناوچە شاخاوییەکان بۆ خوار سفری سیلیزی دادەبەزێت و سبەینێ پلەکانی گەرما ئاسایی دەبنەوە و بەرز دەبنەوە.
بەرزترین پلەکانی گەرمای پێشبینیکراو بە پلەی سیلیزی :
هەولێر : 12 پلەى سیلیزى
سلێمانی : 9 پلەى سیلیزى
دهۆک : 10 پلەى سیلیزى
کەرکوک : 14 پلەى سیلیزى
زاخۆ : 11 پلەى سیلیزى
هەڵەبجە : 10 پلەى سیلیزى
حاجی ئۆمەران: -3 پلەى سیلیزى
سۆران: 7 پلەى سیلیزى
گەرمیان : 12 پلەى سیلیزى
لە روداووێکی هاتوچۆدا لەسەر رێگای کۆیە- هەولێر کەسێک گیانی لەدەستدا، کە لەماوەی ٢٤ کاتژمێردا ئەوە پێنجەم کەسە لە هەرێم بەهۆی روداوی هاتوچۆوە گیانی لەدەستدابێت.
بەرەبەیانی ئەمڕۆ دووشەممە، روداوێکی هاتوچۆ لەسەر رێگای کۆیە- هەولێر رویدا، کە روداوەکە پێکدادان بوو لە نێوان تانکەرێک و ئۆتۆمبێلێکی تایبەتدا، بەهۆیەوە کەسێک گیانی لەدەستدا.
ئەو روداوە هاتوچۆیەی کۆیە، پێنجەم روداوی هاتوچۆی سەختە لەماوەی ٢٤ کاتژمێردا لە هەرێم رویدابێت، لەو پێنج روداوەشدا پێنج کەس گیانیان لەدەستداوە.
لەلایەکی دیکەوە، درەنگانی شەوی رابردوو لە نزیک کاتژمێر ١١ی شەودا، لەسەر شەقامی سەرەکی ئیبراهیم خەلیل روداوێکی هاتوچۆ رویدا و بەهۆیەوە شۆفێری یەکێک لە ئۆتۆمبێلەکان بریندار بوو.
شەوی رابردووش لە سلێمانی و لەسەر شەقامی بازنەیی مەلیک مەحمود و بە دیاریکراوی لە یەکتربڕی ئارام، ئۆتۆمبێلێک بە ھۆی تیژڕەویەوە خۆی کێشا بە ستونێکی کارەبادا و لە ئەنجامدا شۆفێرەکە گیانی لەدەستدا.
هەر دوێنێ، روداوێکدا لە گەرمیان کوڕ و باوکێک لەسەر رێگای کەلار - کفری بە روداوی هاتوچۆ ئۆتۆمبێلەکەیان گڕی گڕت و گیانیان لەدەستدا.
هاوکات لە روداوێکی دیکەدا لەسەر رێگای سەرەکی قەزای بەردەڕەش – ناحیەی دارەتوو، بەهۆی پێکدادانی دوو ئۆتۆمبێل هاوڵاتیەک گیانی لەدەستدا.
بافڵ جەلال تاڵەبانی سەرۆکی یەکێتیی نیشتمانیی کوردستان، پەیامێکی هاوخەمی ئاڕاستەی شێخ ئەدهەم عوسمان شێخ ئەحمەد بارزانی دەکات بەهۆی کۆچی دوایی دایکییەوە و دەڵێت، "لەخوای گەورە داواکارین گیانی دایکی ئازیزتان بە بەهەشتی بەرین شادبکات، ئارامی و دڵنەوایی بە هەموولایەکتان ببەخشێت".
دەقی پەیامەکە...
بەڕێز کاک شێخ ئەدهەم عوسمان شێخ ئەحمەد بارزانی
بەداخ و خەمێکی زۆرەوە هەواڵی کۆچی دوایی خاتوو ( خەیریە عەبدولرەزاق ) دایکی جەنابتانمان پێگەیشت.
بۆ ئەم خەمە گەورەیە پرسەو سەرەخۆشی ئاڕاستەی ئێوەو کەسوکارو بنەماڵە سەربەرزو تێکۆشەرەکەتان دەکەم کە نموونەیەکی باڵان لە خەبات و قوربانیدانی بزووتنەوەی رزگاریخوازی گەلەکەمان.
لەخوای گەورە داواکارین گیانی دایکی ئازیزتان بە بەهەشتی بەرین شادبکات، ئارامی و دڵنەوایی بە هەموولایەکتان ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
ئەدهەم بارزانی لەدوای کۆچی دوایی دایکی راگەیەنراوێکی بڵاوکردووەتەوە و دەڵێت، "سێ ساڵە سەرۆکی پارتی دیموکراتی کوردستان منی دەربەدەر کردووە و نەمتوانی بەر لە کۆچی دوایی دایکم جارێکی دیکە بیبینمەوە".
ئەدهەم بارزانی رایگەیاندووە، "ھەر وەک ئاگادارن شەش کاتژمێر پێش ئێستا دایکم چووە بەر رەحمەتی خوای گەورە، کە ئەمە بوو بە سێ ساڵ سەرۆکی پارتی دیموکراتی کوردستانی عیراق منی ئاوارە و دەربەدەر کرد لەسەر سێ بەیاننامەی سیاسی کە رەئی جیاواز قبوڵ نەکرا، پێم نەکرا لەم ماوەیەدا ئەم دایکە ئازیزە بۆ یەکجاریش بێت ببینم و چەند رۆژێک پێش ئێستا کە قسەم لەگەڵ کرد وتی دڵنیام کە جارێکیتر ناتبینمەوە".
ئەدهەم بارزانی لە درێژەی راگەیەنراوەکەیدا باس لەوەدەکات، لە رێگای بافڵ تاڵەبانییەوە هەوڵدراوە جارێکی دیکە دایکی ببینێتەوە بەڵام بە مەرجی ئەوەی پاسەوانی لەگەڵدا نەبێت.
دەقی قسەکانی ئەدهەم بارزانی:
کوردستانیانی بەرێز
ھەر وەک ئاگادارن ٦ کاتژمێر پێش ئێستا دایکم چو بەر رحمەتی خوای گەورە ،کە ئەمە بوو بە سێ ساڵ سەرۆکی پارتی دێموکراتی کوردستانی عێراق منی ئاوارە و دەر بەرکرد لە سەر سێ بەیانییە سیاسی کە رەئی جیاواز قەبول نەکرا ، پێم نە کرا لەم ماوەیە دا ئەم دایکە ئازیزە بۆ یەکجاریش بێت ببینم و چەند رۆژێک پێش ئێستا کە قسەم لە گەل کرد گوتی دڵنیام کە جارێکیتر ناتبینمەوە .
بەرێزان :
خوا خێری بەرێز کاک بافڵ مام جەلال تاڵەبانی بنۆسێت لە رێگای ئەوەوە پەیوەندی کرا بە ھوشیار زێباری خالی مەسعود بارزانی و سیدادی برای کە رێگا بدەن ئێمە ئەم شەو تەرتیبات ئەکەین ئەدھەم بارزانی بێتە ماڵی خوی لە مەسیفی و بۆ دواین جار لە ناو کفن دا رۆمەتی دایکی ببینێت و ھەر بەیانی یان پاش یەک رۆژ پرسە دەگەرێتەوە ئێرە، دایکێک کە ھاوسەر و دوو لە کورەکانی بە دەستی بەعسیەکان شەھید بوون، کە ئەمرۆ ئەوان لە پایتەختی کۆردستان بە ئازادی دەگەرێن .
لە ولامی دەستپێشخەریەکەی بەرێزیان دا دەلێن مانع نیە بێتن بەلام نابێت پاسەوانەکانی کە کاک بافڵ بۆ من دایناون لە گەلی دا بن و بە ھەڕەشەکانی سەروکی پارتی تەواوی پاسەوانەکانی پێش ئێستای من دەرکران و لەگەل ئەوەش نابێت کەس لە گەلی بێت و پێویستە بە تەنیا بێت ، لە حالەتێک دا کە ھیچ باوەرییەک نەماوە و حوکمی گرتنی منیان دەرکردووە بە مادەی ٢١ یاسای تێک دانی ئاسایشی ھەرێمی کوردستان،
ئەو کوردستانەی کە بەشێکی زۆری ئێستا بە ھاوکاری ئەوان لە پارێزگای دھوک و ھەولێر لە دەستی داگیر کران دایە، ئایە بەم شێوەیە ولامی ھەموو چاکەکان و رزگارکردنیان لە شکەستی سەدا سەد ئەگەر بە ھانیان نە چوبام ئەدەنەوە.
بە بیری سەرۆکی پارتی دێنمەوە کە چم کرد بۆ دایکی ئەو .
دەستیان داوە بە تەلەفون کردن بۆ خەلک و ھەتا کورەکانیشم کە ئێمە گوتمانە مانع نیە بگەرێتەوە بەم مەرجە کە بە تەنیا بێت ئایە خوتان ئەمەرجەتان قەبول دەکرد؟
ئەدھەم بارزانی
وەفدێكی وەزارەتی دارایی هەرێمی كوردستان لە بەغدادە بۆ چارەسەركردنی ئاستەنگەكانی بەردەم موچە و هەمواری یاسای بودجە.
وەزارەتی دارایی هەرێم لە راگەیەنراوێكدا ئاماژەی بۆ ئەوەكردووە، وەفدێكی حكومەتی هەرێم بەسەرۆكایەتی ئاوات جەناب وەزیری دارایی لە بەغدادە بە مەبەستی گفتوگۆكردن لەسەر هەمواری خشتەكانی یاسای بودجەی گشتی عیراق بۆ ساڵی 2025، و چارەسەركردنی ئاستەنگەكانی بەردەم موچەی فەرمانبەران و موچەخۆرانی هەرێمی كوردستان.
پەیامنێری كوردسات نیوزیش رایگەیاند، وەفدەكەی هەرێم لەگەڵ لێپرسراوانی عیراق كۆدەبێتەوە و تەوەرێكی گفتوگۆكانیش، بە بانكیكردنی موچەی فەرمانبەرانی هەرێم دەبێت، چونكە لە دوایین سەردانی وەفدی وەزارەتی دارایی عیراق بۆ هەولێر، هەردوولا رێككەوتوون لەسەر ئەوەی تاكۆتایی ئەمساڵ تەواوی مووچەی فەرمانبەرانی هەرێم بە بانكی بكرێت.
ئەمشەو لە شەقامی بازنەیی مەلیک مەحمود بە دیاریکراوی لە یەکتربڕی ئارام ئۆتۆمبێلێک بە ھۆی تیژڕەویەوە خۆی کێشا بەستونێکی کارەبادا و لە ئەنجامدا شۆفێرەکە گیانی لەدەستدا.
بەڕێوەبەرایەتی ھاتووچۆی سلێمانی بڵاویکردەوە، ئەمشەو لە شەقامی بازنەیی مەلیک مەحمود بەھۆی رووداوێکی ھاتووچۆوە کەسێک گیانی لەدەستدا.
ئاماژەی بەوەشکردووە، رووداوەکە بەھۆی تیژڕەوییەوە بووە و ئۆتۆمبێلەکە کۆنتڕۆڵی لەدەستدا و خۆی کێشاوە بە ستوونێکی کارەبادا.
جێگەی ئاماژەیە ئەمڕۆ لە هەرێمی کوردستان، بەھۆی روداوی ھاتوچۆوە چوار کەس گیانیان لەدەستداوە، لە روداوێکدا لە گەرمیان کوڕ و باوکێک لەسەر رێگای کەلار - کفری بە روداوی هاتوچۆ ئۆتۆمبێلەکەیان گڕی گڕت و گیانیان لەدەستدا، هاوکات لە روداوێکی دیکەدا لەسەر رێگای سەرەکی قەزای بەردەڕەش – ناحیەی دارەتوو، بەهۆی پێکدادانی دوو ئۆتۆمبێل هاوڵاتیەک گیانی لەدەستدا، هەروەها ئەمشەو کەسێک لە شەقامی بازنەیی مەلیک مەحمود .گیانی لەدەستدا