وەزارەتی کارەبای حکومەتی هەرێمی کوردستان رایگەیاند، تیمەکانی چاککردنەوەی بەڕێوەبەرایەتی گشتی کارەبای سلێمانی، بە هەماهەنگی لەگەڵ تیمەکانی پڕۆژەی روناکی، دەست بە چاکسازی لە تۆڕی کارەبای وێستگەی کارەبای ئەزمەڕ دەکەن.

بەپێی راگەیەندراوەکە، ئەم پڕۆسەیە لە رۆژی یەکشەممە، 12ی تشرینی یەکەمی داهاتوو دەستپێدەکات و بۆ ماوەی پێنج رۆژ بەردەوام دەبێت. کاتەکانی کارکردن لە نێوان کاتژمێر 8ی بەیانی تاوەکو 5ی ئێوارە دەبێت.

ئەو گەڕەکانەی دەکەونە ژێر کاریگەری ئەم چاکسازییە:

کاریگەری ئەم چاکسازییە راستەوخۆ دەبێت لەسەر دابەشکردنی کارەبا لەم گەڕەکانەی سلێمانی: (کازیوە، ئیبراهیم ئەحمەد، ئازادی، شەهیدان، گۆیژەی نوێ، دارۆغە، هەواری شار، کەڵەکن و سارداو).

بافڵ جەلال تاڵەبانی، سەرۆکی یەکێتیی نیشتمانیی کوردستان لەگەڵ فایەق زێدان، سەرۆکی ئەنجومەنی باڵای دادوەریی عیراق لە بەغداد کۆبووەوە.

لە کۆبوونەوەکەدا کە نزار ئامێدی، ئەندامی مەکتەبی سیاسیی یەکێتی و د. خالید شوانی، وەزیری دادی عیراق ئامادەیبوون، پرسەکانی پەیوەست بە کاروباری داد و سەربەخۆیی دادگاکان و سەروەربوونی یاسا، هەروەها رێکارە یاساییەکانی پەیوەست بە هەڵبژاردنی ئەنجوومەنی نوێنەرانی عیراق گفتوگۆیان لەبارەوەکرا.

بەهۆی پێکدادانی دوو ئۆتۆمبێل لەسەر رێگای کەلار- خانەقین کەسێک گیانی لەدەستدا و کەسێکیتریش بەسەختی برینداربوو.

بەڕێوەبەرایەتی هاتووچۆی گەرمیان بڵاویکردەوە، کەمێک پێش ئێستا روداوێکی هاتووچۆ لە نێوان ئۆتۆمبێلێکی تایبەت و بارهەڵگرێک لەسەر رێگای کەلار خانەقین نزیک گوندی شێرەوەن روویدا، بەهۆیەوە شۆفێری ئۆتۆمبێلە تایبەتەکە گیانی لەدەستداو سەرنشینەکەی بەسەختی برینداربوو.

ئاماژەی بەوەشکردووە، بریندارەکە لە نەخۆشخانەی فریاکەوتنی شەهید هەژارە و لەدایک بووی ساڵی 2000ـە، ئەوکەسەی گیانی لەدەستداوە تەرمەکەی لە پزیشکی دادی کەلارە و لەدایک بووی ساڵی 2002ـە.

هاتوچۆی گەرمیان ئاشکراشیکرد، تیمی هاتوچۆ بەمەبەستی زانینی هۆکار و چۆنیەتی روداوەکە لێکۆڵینەوەیان دەستپێکردووە.

پارێزگاری کەرکوک و سەرۆکی لیستی ٢٢٢ی یەکێتیی نیشتیمانیی کوردستان داوا دەکات، لە چوارچێوەی کێبڕکێیەکی هێمنانە و دوور لە بێزارکردن و پەستکردنی هاووڵاتیان، هەڵمەتەکانی بانگەشەی هەڵبژاردن بەڕێوەبچێت.

رێبوار تەها پارێزگاری کەرکوک و سەرۆکی لیستی ٢٢٢ی یەکێتیی نیشتیمانیی کوردستان لە راگەیەنراوێکدا بڵاویکردەوە، لەم قۆناغە هەستیارەی بانگەشەی هەڵبژاردندا، کە پرۆسەیەکی دیموکراسییانەیە بۆ نوێکردنەوەی متمانە و هەڵبژاردنی نوێنەرانی راستەقینەی خەڵک، بۆ ئەنجوومەنی نوێنەرانی عێراق، پاراستنی ئاشتی و سەقامگیریی شارەکەمان، ئەرکێکی نیشتمانی و ئەخلاقیی سەرشانی هەموو لایەک و دەنگدەرێکی ئازیزی پارێزگاکەمانە.

پارێزگاری کەرکوک، داوا لە هەموو گەنجان و لاوان و تەواوی جەماوەری دڵسۆزی کەرکوک دەکات، کە بە گیانێکی شارستانیانە و لە چوارچێوەی کێبڕکێیەکی هێمنانە و دوور لە بێزارکردن و پەستکردنی هاووڵاتیان، هەڵمەتەکانی بانگەشە بەڕێوەببەین و رێز لە تەواوی رەنگ و دەنگ و پێکهاتە جیاوازەکان بگرن.

رێبوار تەها راشیگەیاندووە، داوا لە تەواوی جەماوەری دڵسۆزی یەکێتی و لایەنگرانمان دەکەم، بە شێوازێکی مەدەنیانە و دوور لە هەر جۆرە گرژییەک، نموونەی باڵای هەڵمەتێکی مەدەنیانەبن و کار بۆ سەرخستنی لیستەکەمان بکەن و کار بۆ سەرخستنی لیستی ٢٢٢ی یەکێتیی نیشتمانیی کوردستان بکەن، کە لیستی خزمەت و پاراستنی مافی هەموو کەرکوکییەکانە، و پێویستە هەڵبژاردن ببێتە مایەی بەهێزکردنی پایەکانی دیموکراسی، نەک تێکدانی شیرازەی کۆمەڵایەتیمان.

راشیگەیاند، با هەموومان پێکەوە بیسەلمێنین کە ئارامیی کەرکوک و پێکەوەژیانی نێوان پێکهاتەکانی، لە سەرووی هەموو بەرژەوەندییەکی سیاسییەوەیە.

قوباد تاڵەبانی رایگەیاند؛ تا یەکێتی نیشتمانی بەهێزتر بێت پێگەی ژنان بەهێزترە، دەشڵێت؛ نە بانگەشەیە و نە دروشم، یەکێتیی نیشتمانیی کوردستان گەورەترین و بەهێزترین حزبی داکۆکیکارە لە مافەکانی ژنان لە هەموو عیراقدا.

ئەمرۆ شەممە، قوباد تاڵەبانی لە مایانی کۆبونەوە لەگەڵ سێکتەری ژنانی هەولێر ئاماژەی بەوەدا یەکێتی بەهێزترین حزبی داکۆکیکارە لە پرسی ژنان.

باسی لەوەشکردوە؛ لە کاتی نووسینی رەشنووسی دەستوور و لە کاتی پەسەندکردنی یاساکان لە پەرلەماندا یەکێتی رۆڵی سەرەکی و بنەڕەتی هەبووە لە چەسپاندنی مافەکانی ژنان.

ئەوەشی بەبیرهێنانەوە، کە یەکێتی لە هەمووان زیاتر پێداگری کرد لە جێگیرکردنی رێژەی لە ٪٢٥ی کورسی کۆتایی ژنان لە دەستووری عیراقدا.

قوباد تاڵەبانی داواشی لێکردن  تەواوی هەوڵی خۆیان بدەن، تا لەپێناو بەهێزترکردنی پێگەی ژنان و پاراستنی مافەکانیان، لەناو ژناندا زۆرترین دەنگ بۆ یەکێتی کۆبکەنەوە.

کارکردن لەسەر ئەنجامەکانی زانکۆڵاین بەردەوامە، وتەبێژی وەزارەتی خوێندنی باڵا و توێژینەوەی زانستیش دەڵێت: تا ئێستا کاتی راگەیاندنی ئەنجامەکان دیارینەکراون.

عەباس ئەکرەم وتەبێژی وەزارەتی خوێندنی باڵا و توێژینەوەی زانستی لەلێدوانێکدا بە کوردسات نیوزی رایگەیاند: تا ئێستا کارکرن لەسەر ئەنجامەکانی دەرچوانی دوانزەی ئامادەیی بۆ وەرگرتنیان لە زانکۆ و پەیمانگەکانی هەرێمی کوردستان، بەردەوامە و تائێستا کاتی راگەیاندنی ئەنجامەکان دیارینەکراون.

وتیشی، لەکاتی تەواوبونی پرۆسەکە هەمولایەک لەسەر کاتی راگەیاندنی ئەنجامی زانکۆلاین ئاگاداردەکەنەوە، بۆیە هەر هەواڵێک بەناوی سەرچاوەیەک لە وەزارەتى خوێندنى باڵا کە بڵاودەکرێتەوە لەبارەی راگەیاندنی ئەنجامی زانکۆلاین دوورە لە راستییەوە،

وتەبێژی وەزارەتی خوێندنی باڵا، داوا لە دەرچوان دەکات بۆ وەرگرتنی هەواڵی راست لەبارەى کاتی راگەیاندنی ئەنجامەکان چاویان لەسەر ماڵپەڕ و پەیجی رەسمی وەزارەتی خوێندنی باڵاو توێژینەوەی زانستی بێت.

بافڵ جەلال تاڵەبانی، سەرۆکی یەکێتیی نیشتمانیی کوردستان لەگەڵ محەمەد شیاع سودانی، سەرۆک وەزیرانی عیراق لە بەغداد کۆبووەوە.
 
لە کۆبوونەوەکەدا کە نزار ئامێدی، ئەندامی مەکتەبی سیاسیی یەکێتی و د. خالید شوانی، وەزیری دادی عیراق ئامادەیبوون، دوایین پێشهات و روداوەکانی عیراق و ناوچەکە تاوتوێکران.
 
جێبەجێکردنی رێککەوتنی نەوتیی هەرێمی کوردستان و عیراق و لابردنی سەرجەم ئاستەنگەکان لە بەردەم ئەو رێککەوتنەدا خرانە بەر باس. سەرۆک بافڵ جەلال تاڵەبانی داوای لە سەرۆک وەزیرانی عیراق کرد رێکارەکانی ناردنی موچە خێراتر بکرێن، تا کاتی دابەشکردنی موچە لە هەرێمی کوردستان لەگەڵ عیراق یەکبخرێت.
 
هەر لەو کۆبوونەوەیەدا، سەرۆکوەزیرانی عیراق و سەرۆکی یەکێتیی نیشتمانیی کوردستان باسیان لە هەڵبژاردنی ئەنجومەنی نوێنەرانی عیراق کرد و جەختیان لە بەڕێوەچوونی هەڵبژاردنێکی پاک و بێگەرد کردەوە.
 
لە بەشێکی دیکەی کۆبوونەوەکەدا بافڵ جەلال تاڵەبانی سوپاسی محەمەد شیاع سوودانی کرد بۆ گۆڕینی ناوی فڕۆکەخانەی نێودەوڵەتیی سلێمانی بۆ فڕۆکەخانەی نێودەوڵەتیی جەلال تاڵەبانی.
 
خزمەتکردنی کەسوکاری شەهیدان لە هەرێمی کوردستان و عیراق تەوەرێکی دیکەی کۆبوونەوەکە بوو، بافڵ جەلال تاڵەبانی رایگەیاند، سەرۆکوەزیرانی عیراق خۆی کوڕی شەهیدە، بۆیە گرنگی تایبەتی بە کەسوکاری شەهیدان داوە و ئەوەش شایەنی پێزانینە.

بەوێنە؛ کۆبوونەوەی بافڵ جەلال تاڵەبانی سەرۆکی یەکێتیی نیشتمانیی کوردستان و محەمەد شیاع سودانی سەرۆک وەزیرانی عیراق

ئەمڕۆ شەممە، پۆلیسی سلێمانی بڵاویکردوەتەوە لەسەر سكاڵای هاووڵاتییەك و بەتۆمەتی دزی کردن، لەلایەن مەفرەزەكانی بنکەی پۆلیسی بازیان  دوو تۆمەتبار دەستگیركران.

ئاماژەیان بەوەکردوە؛ دوای ئەوەی هاووڵاتییەك لەبنکەی پۆلیسی بازیان سكاڵای تۆماركرد کە 45 مسقاڵ ئاڵتون و بڕی دوو ملیۆن و 400 هەزار دیناری لەماڵەکەیدا لێ دزراوە، دوای وەرگرتنی بڕیاری  دادوەر، هێزەکانیان لێكۆڵینەوەیان دەستپێکردوە.

دەشڵێن؛ توانیویانە  دوای بەدواداچونەکانیان تۆمەتبارەکان دەستگیر بکەن و دەستیشیان گرتوە بەسەر ئاڵتونە دزراوەکەدا.

تۆمەتبارەکان پیشەیان دەرۆزەکردن بوە و دانیان بەتاوانەکەیاندا ناوەو لەئێستادا بەبڕیاری  دادوەرو بەپێی ماددەی 444 لەیاسای سزادا راگیراون و لێکۆڵینەوە لەدۆسیەکە بەردەوامە.

بافڵ جەلال تاڵەبانی سەرۆکی یەکێتیی نیشتمانیی کوردستان، بەبۆنەی بەدەستهێنانی پلەی یەكەم لەسەر ئاستی زانكۆكانی عیراق، پەیامێکی پیرۆزبایی ئاڕاستەی زانکۆی سلێمانی دەکات و دەڵێت: ئەم دەستکەوتە گرنگە زانستییە کە بۆ جاری دووەمە زانکۆی دایک بەدەستی دەهێنێت، شانازییەکی دیکەیە بۆ سلێمانی.

دەقی پەیامەکە...

لە دڵەوە پیرۆزبایی لە بەڕێزان سەرۆک، مامۆستایان، فەرمانبەران و خوێندکارانی خۆشەویستی زانکۆی سلێمانی دەکەم بەبۆنەی بەدەستهێنانی پلەی یەكەم لەسەر ئاستی زانكۆكانی عیراق.

ئەم دەستکەوتە گرنگە زانستییە کە بۆ جاری دووەمە زانکۆی دایک بەدەستی دەهێنێت مایەی خۆشحاڵیی هەموو لایەکمانە و شانازییەکی دیکەیە بۆ سلێمانی.

بەڵێنتان پێدەدەم وەک هەمیشە لەگەڵتانبم بۆ پێشخستنی زانکۆی سلێمانی، چونکە ئێوە بە ئاستە بەرزەکەتان سەری ئێمەتان بەرزکردووەتەوە.

بافڵ جەلال تاڵەبانی

سەرۆکی یەکێتیی نیشتمانیی کوردستان

مەکتەبی سیاسی یەکێتی نیشتمانیی کوردستان لە پەیامێكدا  پیرۆزبایی لە زانکۆی سلێمانی دەکات، بە بۆنەی بەدەستهێنانی پلەی یەکەم لەسەر ئاستی عیراق و جەختیش لە پشتیوانی تەواوی یەکێتی دەکەنەوە بۆ بەرەوپێشچونی زیاتری زانکۆکە

دەقی پیرۆزباییەکە...

بەرێزان  / سەرۆكی  زانكۆی سلێمانی

مامۆستایان و خوێندكاران و كارمەندانی  زانكۆی سلێمانی

بە بۆنەی  بەدەستهێنانی  پلەی  یەكەم لەسەر ئاستی زانكۆكانی عێراق   كە بۆ جاری دووەمە  بە پێی  ئەو ریز بەندییەی دامەزراوەی  تایمزی  بەریتانیی  ئەنجامی داوە نیشانەی   بەرزیی  ئاستی  زانكۆی  سلێمانی  دەردەخات  كە وێرای  گشت  ئەو قەیرانە جۆراوجۆرانە   ئەم  پلەیە بەدەست بهێنێت

زانكۆی سلێمانی هەر لەسەرەتای دامەزراندنیەوە  لە ساڵی 1968 وە  كە بە كۆششی سەرۆك مام جەلال بنیادنرا  وەك ناوەندێكی زانستی و فەرهەنگی  هەمیشە پێشەنگ بوە و لەم كاروانەدا  جگە لە بوارە زانستیەكەی  چەندین كادری سیاسیشی  پێگەیاندوە  كە لە جوڵانەوەی  كوردایەتیدا  رۆڵی بەرچاویان هەبوە

ئیمرۆش لە كاتێكدا  زانكۆی سلێمانی  ئەم پلەیەی بەدەستهێناوە ، پشتیوانی  تەواوی یەكێتیی  نیشتمانیی كوردستان دووپات دەكەینەوە   بۆ بەرەو پێشبردن و سەركەوتنی زیاتری  ئاستی  زانكۆكەمان .

 مەکتەبی سیاسی یەکێتیی نیشتمانیی کوردستان

سەرچاوەیەک لە سەنتەری رێکخستنی پەیوەندییەکانی JCC بە کەناڵی کوردسات نیوزی راگەیاند، لە گەڕەکی زانکۆی شاری سلێمانی، لە کاتی کارکردن لە ئیزۆگامی ماڵێکدا، تانکییەکی نەوت تەقیوەتەوە.

بەهۆی ئەم روداوەوە، کەسێک گیانی لەدەستداوە و کەسێکی دیکەش بریندار بووە.

سەرچاوەکە ئاماژەی بەوەدا، لە ئێستادا هێزە ئەمنییەکان گەیشتوونەتە شوێنی روداوەکە و دەستیان بە لێکۆڵینەوە کردووە بۆ زانینی هۆکاری سەرەکی تەقینەوەکە و وردەکارییەکانی ڕووداوەکە.

بەڕێوەبەرایەتی پۆلیسی پارێزگای سلێمانی رایگەیاند، سێ تۆمەتبار لەسەر رووداوەکەی شەوی رابردووی نەخۆشخانەی شار لەلایەن مەفرەزەکانی بەشی پۆلیسی فریاکەوتن و بنکەی پۆلیسی نەخۆشخانەوە دەستگیرکراون.

بەپێی راگەیەندراوی پۆلیس، شەوی رابردوو پاش کاتژمێر 12ی نیوەشەو، سێ کەس بە مەبەستی سەردانیکردن دەچنە نەخۆشخانەی شار. بەهۆی ئەوەی لەو کاتەدا سەردانیکردن بەپێی یاسا و رێنماییەکان رێگەپێدراو نییە، کارمەندێکی پاسەوانی بنکەی پۆلیسی نەخۆشخانە هەوڵی رێگریکردنیان لێدەدات.

پۆلیس ئاماژەی بەوەداوە کە یەکێک لە دەستگیرکراوان، بە درۆ خۆی وەک پزیشکی نەخۆشخانە ناساندووە و یەکێکیشیان لەژێر کاریگەری مەی نۆشیدا بووە. پاشان، گرژی و ئاڵۆزی دروست دەکەن و هێرش دەکەنە سەر کارمەندە پۆلیسەکە. یەکێک لە تۆمەتبارەکان چەکی کارمەندەکەی رفاندووە و تەقەی کردووە و پاشان هەڵاتووە.

دەستبەجێ، لەلایەن بنکەی پۆلیسی نەخۆشخانەوە دوو لە تۆمەتبارەکان دەستگیرکران و لە ماوەیەکی زۆر کەمیشدا، تۆمەتباری سێیەم لەلایەن مەفرەزەکانی بەشی پۆلیسی فریاکەوتنی بەڕێوەبەرایەتی پۆلیسی سلێمانییەوە لە گەڕەکی کوردستان دەستگیرکرا.

لە ئێستادا هەر سێ تۆمەتبارەکە بە ناوەکانی:

• (س، س) لەدایکبووی 1969

• (ب، س، س) لەدایکبووی 2006

• (ب، س، س) لەدایکبووی 2004

بە بڕیاری دادوەر و بەپێی ماددەی (31/405) لە یاسای سزاکانی عیراقی راگیراون و لێکۆڵینەوە لەگەڵیان بەردەوامە.

بەهەوڵی یەكێتی و جێگری سەرۆكی حكومەتی هەرێم  توركیا قەدەغەی گەشتەئاسمانیەكانی بۆ فرۆكەخانەی نێودەولەتی سلێمانی هەڵگرت.

دوای هەوڵە چڕەكانی یەكێتیی نیشتمانیی كوردستان و جێگری  سەرۆكی حكومەتی هەرێم  لەگەڵ لێپرسراوانی توركیا، ئەمڕۆ  سەرۆك كۆماری توركیا بەسەرۆكی هەرێمی كوردستانی راگەیاندوە گەشتە ئاسمانییەكانی ولاتەكەی بۆ فرۆكەخانەی نێودەوڵەتی سلێمانی دەستپێدەكاتەوە و گەمارۆی سەر فرۆكەخانەكە هەڵدوەشێنێتەوە.

هەڵگرتنی قەدەغەی گەشتە ئاسمانیەكانی توركیا بۆ فرۆكەخانەی سلێمانی دوای ئەوە دێت كە سلێمانی رۆڵێكی باڵای هەبوو لەپرۆسەی ئاشتی و لێك نزیك كردنەوەی توركیاو پەكەكە، بافڵ جەلال تاڵەبانی سەرۆكی یەكێتی نیشتمانی كوردستانیش لەو پرۆسەیەدا رۆلێكی گرنگ و كاریگەری هەبووە و توانیویەتی ئەو پەیوەندییە بباتە قۆناغێكی نوێوە.

لەو بارەیەوە یەحیا ئوستون  پەیوەندییەكان لە هێڵی ئاسمانی توركش ئێرلاین رایگەیاند، بەم نزیكانە گەشتە ئاسمانییەكانیان بۆ فڕۆكەخانەی نێودەوڵەتیی سلێمانی دەستپێدەكەنەوە. 

ئەوەش لەكاتێكدایە، لە 3ی نیسانی 2023ەوە بەهۆی هەڵوێستەكانی نەتەوەییەكانی یەكێتیی نیشتمانیی كوردستان توركیا بڕیاریدا گەمارۆ بخاتەسەر فرۆكەخانەی نێودەوڵەتی سلێمانی.