هەواڵەکان
باراک ئۆباما رایگەیاند، ئەم جەنگەی ئێران پێویست نەبوو، جگە لە گیانلەدەستدانی سەربازانی ئەمریکا، وڵاتەکەشی توشی کەمی موشەک کردوە و گەروی هورمزیشی خستوەتە ژێر دەسەڵاتی ئێرانەوە.
باراک ئۆباما، سەرۆکی پێشوتری ئەمریکا، لەمیانی ئامادەبونی لە کۆبونەوەیەکی هەڵبژاردندا لە شارۆچکەی کلیڤلاندی ویلایەتی ئۆهایۆ، رەخنەی توندی لە ئیدارەی دۆناڵد ترەمپ گرت و جەختیکردەوە جەنگی ئێران پێویست نەبوو.
سەبارەت بە بەڕێوەبردنی جەنگ لەگەڵ ئێران، ئۆباما تیشکی خستە سەر زیانە سەربازی و ئابورییەکانی ئەم ناکۆکییە و ئاماژەی بەوە کرد کە بە تێپەڕبونی حەوت مانگ بەسەر دەستپێکردنی جەنگەکەدا، نە تەنها سەربازانی ئەمریکی بوونەتە قوربانی و سەدان کەسیشیان بریندار بوون، بەڵکو کۆگاکانی موشەکی ئەمریکاش توشی کەمی بوونەتەوە.
هەروەها جەختی لەوە کردەوە، کە سەرەڕای بانگەشەکانی سەرەتای دەسەڵاتدارانی ئیدارەی ترەمپ سەبارەت بە سەرکەوتنی خێرا، ئێستا ئێران تاوانا و دەسەڵاتی تەواوی بەسەر گەروی هورموزدا سەپاندوە، کە رێڕەوی سەرەکیی گواستنەوەی نەوتی جیهانە.
ئۆباما کاریگەرییە ئابورییەکانی ئەم جەنگەی لەسەر ژیانی رۆژانەی هاووڵاتییان رون کردەوە و بەرزبوونەوەی بەرچاو لە نرخەکانی سوتەمەنی و کاڵا سەرەکییەکانی پەیوەست کرد بە سەرهەڵدانی ئەم ئاڵۆزییە سەربازییانەوە.
سەرۆکی پێشوتری ئەمریکا، بەراوردی لە نێوان سیاسەتی دەرەوەی ئیدارەکەی خۆی و ئیدارەی ئێستادا کرد و رەخنەی لە کشانەوەی تررمپ لە رێککەوتننامە ئەتۆمییەکەی ساڵی 2015 گرت؛ دەڵێت؛ لە ئیدارەکەی ئەودا بە بێ تەقاندنی هیچ موشەکێک و تەنها لە رێگەی دیپلۆماسییەوە توانیبووی رێگری لە دەستگەیشتنی ئێران بە چەکی ئەتۆمی بکات.
لە ساڵیادی خۆپیشاندانەكانی تشرینیەكان لە بەغداد، هێزە ئەمنییەكان رێكاریە ئەمنییەكانیان لە مەیدانی تەحریر چڕكردووەتەوە.
ئەمرۆ حەوت ساڵ بەسەر خۆپێشاندانەكانی تشرینی یەكەم لە عیراق تێدەپەرێت، كە یەكێك بوون لە گەورەترین و كارگەرترین راپەڕین و جووڵانەوە جەماوەریییەكان لە مێژووی هاوچەرخی عیراقدا.
خۆپێشاندانەكان لە 1ی تشرینی یەكەمی 2019 بە شێوەیەكی رەسمی دەستیانپێكرد و پاشان لە 25ی تشرینی یەكەمی هەمان ساڵدا گەیشتنە لووتكە، مەیدانی تەحریر لە ناوەڕاستی بەغداد شوێنی سەرەكی و هێمای دیاری خۆپێشاندانەكان بوو.
داواكارییەكانی گەنجان و خۆپێشاندەران سەرەتا ئابووری و خزمەتگوزاری بوون، بەڵام زۆر بەخێرایی بوونە داواكاری ریشەیی سیاسی، داواكاری بۆ رووخاندنی سیستەمی پشكپشكێنەی تایفی كە لە دوای ساڵی 2003وە جێبەجێ دەكرا، خۆپیشاندانە 600 كوژرا و 25 هەزار بریندار لێكەوتەوە.
ئەم ڕاپەڕینە ئەنجامی سیاسی گەورەی بەدوای خۆیدا هێنا، دەستلەكاركێشانەوەی سەرۆك وەزیرانی ئەو كاتە عادل عەبدولمەهدی لێكەوتەوە، دواتر یاسای هەڵبژاردنەكان هەمواركرانەوە، ئەمە جگە لە ئەنجامدانی هەڵبژاردنی پێشوەختەی ئەنجومەنی نوێنەران لە تشرینی یەكەمی 2021دا.
ئێستاش تشرین وەك وەرچەرخانێكی مێژوویی لە هوشیاری سیاسی گەنجانی عیراق دەبینرێت و ساڵانە لە مانگی تشرینی یەكەمدا یاد دەكرێتەوە، چاوەرواندەكرێن ئەمرۆ خۆپیشاندێك بەو بۆنەیەوە بەرێوەبچێت و هێزە ئەمنیەكانیش رێكارەكانیان لە بارەیەوە توندكردووەتەوە.
هاوپەیمانی ئیدارەی دەوڵەت لە بەغداد كۆبوونەوەی ئاسایی خۆی سازكرد و چەند پرسیارێكی گرنگی تاوتوێ كرد.
هاوپەیمانی ئیدارەی دەوڵەت كۆبوونەوەی ئاسایی خۆی بە ئامادەبوونی سەرۆك كۆمار، سەرۆكی وەزیران، سەرۆكی ئەنجومەنی وەزیران و سەرۆكی ئەنجومەنی باڵای دادوەری و نوێنەر و سەرۆكی لایەنە سیاسیەكان سازكرد، لە كۆبوونەوەكەشدا پەرەسەندنە ئەمنی و سەربازییەكانی عیراق و ناوچەكە تاوتوێكران و جەخت لە پاراستنی ئاسایش و سەروەریی وڵات كرایەوە.
هەروەها كۆبوونەوەكە پشتیوانی لە مافی خۆپیشاندانی ئاشتییانە كرد بە مەرجی پابەندبوون بە دەستوور و نەبڕینی رێگەوبانەكان.
سەبارەت بە لایەنی ئابووریش، جەخت لە خێراكردنی پەسەندكردنی پرۆژەیاسای بودجە، دابەشكردنی دادپەروەرانەی سامانەكان و ئەولەویەتدان بە خزمەتگوزارییەكان كرایەوە.
لە كۆتاییدا، كۆبوونەوەكە ستایشی لە هەنگاوەكانی فرەچەشنكردنی سەرچاوەكانی داهات و هەناردەی نەوت كرد بۆ بەهێزكردنی سەقامگیریی ئابووری وڵات.
لۆران نونێز، وەزیری ناوخۆی فەرەنسا رایگەیاند، پۆلیسی وڵاتەکەی تەنها ئەمڕۆ نزیکەی هەزار خۆپیشاندەری لە سەرتاسەری فەرەنسا دەستگیرکردوە.
ئەمڕۆ شەممە، وەزیری ناوخۆی فەرەنسا ئاشکاری کرد تەنها ئەمڕۆ لە سەرتاسەری وڵاتدا نزیکەی هەزار خۆپیشاندەریان دەستگیر کردوە و ئاماژەی بەوەشکرد ئەو ئامارە زیاتر بەرزدەبێتەوە.
بە وتەی لۆران نونێز ناڕەزایەتییەکانی تێچووی ژیان لە شارە جیاجیاکاندا بە باشی رێکخرابوو، بەڵام دواتر پۆلیس روبەڕووی ئاستێکی زۆر بەرزی توندوتیژی بووەوە لەلایەن "گروپە چەپەکانە".
ئەمە لە کاتێکدایە، خۆپیشاندان و ناڕيزایەتیی فەرەنسا بەردەوامە و تەها ئەمڕۆ زیاتر لە 110 هەزار کەس لە پاریسی پایتەخت راژاونەتە سەر شەقامەکان.
بنیامین ناتانیاهۆ، سەرۆک وەزیرانی ئیسرائیل رایگەیاند، ئێران بەرنامە ئەتۆمییەکەی شاردوەتەوە و بەنیازە لە ماوەیەکی کورتدا ئیسرائیل لەناوببات، داواش دەکات بۆئەوەی ئەوە رونەدات دەنگ بە پارتەکەی بدرێت.
سەرۆک وەزیرانی ئیسرائیل لە گرتەیەکی ڤیدیۆیدا لە تۆڕی کۆمەڵایەتی ئێکس بڵاویکردەوەتە؛ باس لەوەدەکات "پارتی لیکود" بۆ روبەڕوبونەوەی هەڕەشەی ئەتۆمی کۆماری ئیسلامی و مسۆگەرکردنی مانەوەی ئیسرائیل و پێشگرتن لە لەناوچوونی، زۆر گرنگە.
ناتانیاهۆ ئاماژەی بەوەداوە، کە کۆماری ئیسلامی و حزبوڵا و دوژمنەکانی تری ئیسرائیل، شکستی ئەویان دەوێت و داوای لە لایەنگرانی کرد بە بەشداریکردن لە هەڵبژاردنەکاندا سەرکەوتنی پارتەکەی مسۆگەر بکەن.
لە کۆتایی ڤیدیۆکەدا سەرۆک وەزیرانی ئیسرائیل دەڵێت؛ دەنگ بە لیکود بدەن بۆ ئەوەی دوژمنانی ئیسرائیل لە تاران و تورکیا و لوبنان و غەززە ئاهەنگ نەگێڕن.
بە بێ بڵاوکردنەوەی هیچ وێنەیەک، میدیای رەسمی ئێران بڵاویکردوەتەوە، موجتەبا خامنەیی و غوڵام حوسێن موحسینی ئەژەیی، سەرۆکی دادوەریی ئێران کۆبونەوە.
ئاژانسی تەسنیم بڵاویکردوەتەوە، لە کۆبونەوەکەدا جەختکراوەتەوە لەسەر زیادکردنی سەرمایەی کۆمەڵایەتی، بەرەنگاربونەوەی گەندەڵی، لێپرسینەوە لە کەمتەرخەمیی لێپرسراوان.
تەسنیم ئاماژەی بەوەشکردوە، موجتەبا خامنەیی داوایکردوە بەدواداچوون بۆ زیانەکانی ئەمریکا و ئیسرائیل بکرێت.
ئەم کۆبونەوەیە لە کاتێکدایە لە ماوەکانی رابردوشدا مەسعود پزیشکیانی سەرۆک کۆمار رایگەیاند، لەگەڵ موجتەبا خامنەیی کۆبوەتەوە.
جێی باسە، نزیکەی هەشت مانگ بەسەر ناوهێنانی موجتەبا خامنەیی وەکو رێبەر تێپەڕدەبێت و تا ئێستا هیچ ڤیدیۆ یان وێنە و دەنگێکی نوێی بڵاونەکراوەتەوە.
رۆژنامەیەکی ئەمریکی بڵاویكردەوە، ئەمریكا باڵیۆزخانە و بنكە سەربازییەكانی لە رۆژهەڵاتی ناوەڕاست چۆڵكردووە، ئەمەش دوای ئەوەی زانیاریان پێگەیشتوە، رەنگە ئێران هێرشبکاتە سەریان.
رۆژنامەی وۆڵ ستریت جۆرناڵ لە زاری چەند لێپرسراوێكی ئەمریكاوە بڵاویكردەوە، ئەمریكا باڵیۆزخانە و بنكە سەربازییەكانی لە رۆژهەڵاتی ناوەڕاست چۆڵ كردووە، ئەمەش یەکێکە لە ئەگەرەکانی دەستپێکردنەوەی جەنگه لە گەڵ ئێران.
رۆژنامەکە ئاماژەی بەوەشکردوە، جەی كڵایتۆن بەڕێوەبەری هەواڵگریی نیشتمانی رۆژی هەینی یاداشتێكی بۆ ماركۆ روبیۆ وەزیری دەرەوە ناردووە و تێیدا هۆشداریی داوە لە چڕكردنەوەی هەوڵەكانی ئێران بۆ بەئامانجگرتنی كارمەندانی ئەمریكی.
وۆڵ ستریت جۆرناڵ ئاشکرای کردوە، ترەمپ ئاگادارکراوەتەوە لە چەند بژاردەیەك، كە لێدان لە دامەزراوە ئەتۆمییەكانی ئێران و ئەو دورگانە لەخۆدەگرێت كە لەژێر كۆنتڕۆڵی تاراندان. بۆ ئەومەبەستەش كەشتییە جەنگییەكانی ئەمریكا لە رۆژهەڵاتی ناوەڕاست ئامادەن بۆ دەستپێکردنەوەی ئۆپراسیۆنەکان دژی ئێران.
حوسییەکانی یەمەن لە رێگەی حەوت ئۆپەراسیۆنی سەربازییەوە هێرشیانکردە سەر چەندین ئامانجی هەستیار لە قوڵایی خاکی سعودیە، لەوانە فڕۆکەخانەکانی ریاز، دەمام، نەجران و دامەزراوە نەوتییەکانی ئارامکۆ.
ئەمڕۆ شەممە، وتەبێژی حوسییەکانی یەمەن رایگەیاند، بە موشەک و درۆن حەوت ئۆپراسیۆنیان لەقوڵایی خاکی سعودیە ئەنجامداوە و فرۆکەخانە و دامەزراوە نەوتییەکانی ئەو وڵاتەیان کردوەتە ئامانج.
لە بەرانبەردا، هاوپەیمانیی عەرەبی بە سەرۆکایەتیی سعودیە رایگەیاند، سێ موشەکی بالیستیی حوسییەکانیان بەرەو ریاز، طائیف و یەنبەع تێکشکاندووە.
بەپێی ڕاگەیەندراوەکەی حوسییەکان، ئەم هێرشانە وەک وەڵامێک بووە بۆ زیاتر لە 100 هێرشی ئاسمانیی سعودیە لە 24 سەعاتی رابردوودا بۆ سەر سەنعا و پارێزگاکانی تری یەمەن، کە بونەتە هۆی کوژران و برینداربونی دەیان کەس.
سەرۆك وەزیرانی عیراق بڕیاریدا هەموو گرێبەستەكان بكرێن بە هەمیشەیی و 120 هەزار گرێبەستی دیكەش لەسەر بودجەی ساڵی داهاتوو دابمەزرێن.
نوسینگەی راگەیاندنی سەرۆك وەزیرانی عیراق بڵاویكردەوە، عەلی زەیدی سەرۆكایەتی كۆبونەوەیەكی كردووە بۆ تاوتوێكردنی وردەكارییەكانی بودجەی 2027 بە ئامادەبوونی وەزیری دارایی.
ئاماژەی بەوەش كردووە، زەیدی رێنمایی داوە بۆ بە هەمیشەییكردنی سەرجەم كارمەندانی گرێبەست و گرێبەستی رۆژانە لەگەڵ رەخساندنی دامەزراندنی 120 هەزار فەرمانبەری تر بەشێوەی گرێبەست لە بودجەی ساڵی 2027 بەشێوەیەكی دادپەروەردانە بەپێی رێژەی دانیشتوان.
راشیگەیاندووە، پێویستە پلاتفۆرمێكی تایبەت بۆ دامەزراندن بكرێتەوە بە مەبەستی دڵنیابوون لە دادپەروەری لە نێوان پێشكەشكاراندا.
ئەوە لەكاتێكدایە، تا ئێستا دیارنییە بڕیارەكە گرێبەستەكانی هەرێمی كوردستان دەگرێتەوە یان تایبەت دەبێت بە پارێزگاكانی عیراق، لەوبارەیەوە سەرچاوەیەك بە كوردسات نیوزی راگەیاند، پێدەچێت وەفدی هەرێم لە گفتوگۆكانیاندا لەگەڵ بەغداد تاوتوێی ئەو پرسە بكەن.
لە پارێزگای کەرکوک سبەی یەکشەممە بەبۆنەی یادی شەهیدبوونی "حەزرەتی فاتیمە زەهرا" (سڵاوی خوای لەسەر بێت)، لە دیوانی پارێزگا و سەرجەم فەرمانگەکانی سەر بە دیوانی پارێزگا بە رەسمی کرا بە پشوو.
رێبوار تەها، جێگری یەکەمی پارێزگای کەرکوک رایگەیاند، بەبۆنەی یادی شەهیدبوونی "حەزرەتی فاتیمە زەهرا" (سڵاوی خوای لەسەر بێت)، بڕیار درا سبەی یەکشەممە بکرێتە پشووی رەسمی لە دیوانی پارێزگا و تەواوی فەرمانگەکانی سەر بە دیوانی پارێزگا، جگە لە فەرمانگە خزمەتگوزارییەکان.
ئاماژەی بەوەش کرد، بڕیاری پشووەکە سەرجەم خوێندنگە و باخچەکانی منداڵانیش دەگرێتەوە، بەڵام سەبارەت بە زانکۆ و کۆلێژ و پەیمانگەکان، دەسەڵات دراوەتە ئیدارەکانیان تا بەپێی هەڵسەنگاندنی خۆیان بڕیار لەسەر راگەیاندنی پشوو بدەن.
کارەبای سلێمانی رایەگیاند کوژانەوەی کارەبای ماڵی لەتیف هەڵمەتی شاعیر، پەیوەندی بەپسولەی کارەباوە هەبوە و لە ئێستادا کارەباکەی بۆ هەڵکراوەتەوە.
کارەبای سلێمانی لە راگەیەندراوێکدا رایگەیاندوە دوای ئاگاداربونیان لە بابەتەکە، راستەوخۆ پەیوەندیان بە لەتیف هەڵمەتی شاعیرەوە کردوە و دوای وەرگرتنی زانیارییەکان کارەباکەی بۆهەڵکراوەتەوە.
ئاماژەی بەوەشکردوە، سیستمەکە ناوی هاوبەشەکان ناناسێت و دەیکوژێنێتەوە، لە ئێستادا کارەباکەی بۆهەڵکراوەتەوە و داوای لێبوردنی لێکراوە.
کارەبای سلێمانی جەختیکردوەتەوە، کوژاندنەوەی کارەباکە پەیوەندی بە سیستمەوە هەبوە، ئەگەرن، مامۆستا لەتیف هەڵمەتی شاعیر سەرمایەیەکی گەورەی کوردستانە و جێگەی شانازییانە هەمیشە خزمەتی بکەن.
ئەمەش لە کاتێکدایە، لەتیف هەڵمەتی شاعیر لە پەیجی تایبەتی خۆی رایگەیاندبوو، پارەی کارەبا و پرۆژەی روناکیشیداوە، بەڵام کارەبای ماڵەکەیان کوژاندوەتەوە.
ئاژانسی هەواڵی فارس بڵاویکردوەتەوە، ئێوارەی ئەمڕۆ دەنگی تەقینەوەیەکی گەورە بیستراوە و کەشتییەکی نەوتهەڵگربوە لە کاتی تێپەرین بە گەروی هورمزدا کراوەتە ئامانج.
ئاژانسەکە لەگەڵ بڵاوکردنەوەی زانیارییەکان، وێنەیەکی مانگی دەستکردی کەشتییەکی بڵاوکردوەتەوە، کە پشتی کەشتییەک نیشاندەدات و ئاماژەی بەوەکردوە، لەکاتی تێپەڕینی بە گەروەکەدا کراوەتە ئامانج.
سەرەڕای بڵاوکردنەوەی ئەو زانیاریانە، بەڵام تا ئێستا دەستەی ئۆپەراسیۆنەکانی بازرگانیی دەریایی بەریتانیا (UKMTO) زانیارییەکەی پشتڕاستنەکردوەتەوە.
ئەمەش لە کاتێکدایە لە چەند رۆژی رابردوودا، سوپای پاسداران بە ئامانجگرتنی کەشتییەکانی لە گەروی هورمزدا زیاد کردوە و ئەمەش بوەتە هۆی بەرزبونەوەی نرخی نەوت لە بازاڕدا.
دوای روداوێکی تاوانی کوشتن لە تەنیشت پارکی ئاکرێ، بەڕێوەبەرایەتیی پۆلیسی ئاکرێ رونکردنەوەیەکی بڵاوکردەوە و تێیدا جەخت لەسەر پاراستنی ئارامی ئەمنی شارەکە دەکاتەوە.
پۆلیسی ئاکرێ راگەیەنراوێکی بڵاوکردەوە و تێدا داوا لە سەرجەم دەزگاکانی راگەیاندن و تۆڕە کۆمەڵایەتییەکان دەکات، بە شێوەیەکی بەرپرسانە مامەڵە لەگەڵ روداوەکەدا بکەن، تەنیا پشت بە سەرچاوە رەسمییەکانی پۆلیس ببەستن بۆ وەرگرتنی زانیاری.
هەر لە راگەیەنراوەکەدا هاووڵاتیان و دەزگاکانی راگەیاندن دڵنیا دەکاتەوە، کە هێزەکانیان لە ئامادەباشیی تەواودان و هەردوو دەزگای پۆلیس و ئاسایش بە هەماهەنگی لە بەدواداچوونی بەردەوامدان بۆ دەستگیرکردنی تۆمەتباری سەرەکی کە بە بڕیاری دادوەر و بەپێی ماددەی (406) لە یاسای سزادان فەرمانی دەستگیرکردنی بۆ دەرچووە و بە زووترین کاتیش دەستگیر دەکرێت.
لە کۆتاییشدا، پۆلیسی ئاکرێ داوا لە هاووڵاتییان دەکات لەپێناو پاراستنی ئاسایشی شارەکە، هاوکار و هەماهەنگ بن و لە کاتی بوونی هەر زانیارییەکدا، پەیوەندی بە ژووری کۆنترۆڵی پۆلیسی ئاکرێوە بکەن بە ژمارەی بێبەرانبەری 104.
لێپرسراوانی هەواڵگریی نیشتمانیی ئەمریکی هۆشدارییان داوە لەوەی؛ ئێران هەوڵەکانی بۆ بەئامانجگرتنی کارمەندانی ئەمریکی لە رۆژهەڵاتی ناوەڕاست و وڵاتانی تر زیاتر کردووە.
بەپێی راپۆرتێکی کەناڵی "سی بی ئێس"ـی ئەمریکی، گرژییەکانی نێوان تاران و واشنتن روو لە هەڵکشانە و تاران هۆشداری داوە کە ژێردەریایی و کەشتییە جەنگییەکانی ئەمریکا رێگەیان پێنادرێت بچنە ناو ئاوەکانی کەنداو، ئەوەش لەکاتێکدایە کە باڵیۆزی ئەمریکا لە تورکیا هۆشداری داوە، پێدەچێت لە کۆتایی ئەم هەفتەیەدا هێرشبکرێتە سەر ئێران.
هاوکات جەی کلەیتن، بەڕێوەبەری هەواڵگریی نیشتمانیی ئەمریکا رایگەیاندووە، "ئێران هەوڵەکانی بۆ بەئامانجگرتنی کارمەندانی ئەمریکی لە دەرەوەی وڵات بە شێوەیەکی بەرچاو زیاد کردووە و پلانەکانی کوشتنی هاووڵاتیانی ئەمریکی لە رۆژهەڵاتی ناوەڕاست و وڵاتانی تر گەیشتوونەتە قۆناغێکی مەترسیدار".
لە لایەکی ترەوە، مایکل واڵتز، باڵیۆزی ئەمریکا لە نەتەوە یەکگرتووەکان رایگەیاندووە، جەنگی ئێران رەنگە ساڵێکی تر درێژە بکێشێت، بەڵام هیوادارە ئێران پێش ئەو کاتە بێتە سەر مێزی دانوستان.
جێی ئاماژەیە، ئەم ئاڵۆزییانە بەشێکن لە زنجیرەیەک پەرەسەندنی بەردەوام لە نێوان هەردوو وڵاتدا، کە تێیدا ئەمریکا هێزی دەریایی و سەربازییەکانی خۆی لە ناوچەی کەنداو و رۆژهەڵاتی ناوەڕاست زیاتر بڵاوەپێکردووە، ئێرانەش دژایەتیی بوونی سەربازیی ئەمریکا لە ناوچەکەدا دەکات.
حوسێن موحێبی، وتەبێژی سپای پاسدارانی ئێران رایگەیاند، کۆمەڵگەی ئێران دەبێت بە وریایی و بەرپرسیارێتیەوە مامەڵە بکات لەم جەنگی روبەڕوی وڵاتەکەیان بوەتەوە، جەختیش دەکاتەوە ئێران دەبێت زلهێزی جیهان.
ئەمڕۆ شەممە، لە کۆنفرانسێکدا بۆ هێزەچەکدارەکان، حوسێن موحیبی، وتەبێژی سوپای پاسدارانی ئێران رایگەیاند، بۆ دیاریکردنی چارەنوسی ئێران پێویستیان بە یەکگرتویی و پشتبەستن بە توانا ناوخۆییەکانیان هەیە.
ناوبراو بانگەشەی ئەوەیکرد، لە جەنگی ئێراندا سەرکەوتن بۆ ئەوانە و "بە ئیزنی خودا دەبنە زلهێزی جیهان دوای جەنگەکە".
ناوبراو بەسەربازەکانی راگەیاند، ئەم جەنگە جگە لە دەسەڵاتی سەربازی، پەیوەستە بە کولتور، ناسنامە و شارستانیەتی ئێرانەوە ودەبێت بەە ئاگاییەوە خۆیان بۆ ئەو روبەڕوبونەوەیە ئامادە بکەن.
موحیبی ئاماژەی بەوەکردوە، لەم جەنگەدا دوژمن دەیەوێت شوناسی ئیسلامی و ناسنامەی ئێران لاوازبکەن و کلتورەکەیان لەناو ببەن.
ئەندامێکی مەكتەبی سیاسی یەكێتی دەڵێت، هیچ بەرەوپێشچوونێك لە گفتوگۆكانی نێوان یەكێتی و پارتی بە ئاراستەی باشتكردنی پەیوەندییەكانیان و پێكهێنانی حكومەت نییە.
سەعدی ئەحمەد پیرە، ئەندامی مەكتەبی سیاسی یەكێتیی نیشتمانیی کوردستان لە كۆنفڕانسێكی رۆژنامەوانیدا رایگەیاند، پێویستە یەكێتی و پارتی بە گفتوگۆ كێشە و ناكۆكییەكانیان لەبارەی پێكهێنانی حكومەتی نوێی هەرێم چارەسەربكەن.
سەعدی ئەحمەد پیرە لەبارەی دەنگۆكانی هەمواركردنەوەی دەستوری عیراق وتیشی، هەمواركردنەوەی دەستوری عیراق هیچ مەترسییەكی بۆ سەر هەرێمی كوردستان نابێت و دەتوانن بە سێ پارێزگا رێگری لە هەر هەموارێك بكەن كە دژی بەرژەوەندییەكانی هەرێمی كوردستان بێت.