ئەمریكا هۆشداری توند دەداتە هاووڵاتییانی لە گەشتكردن بۆ عیراق و دەڵێت، حكومەتی عیراق ناتوانێت گرەنتی پاراستنی ژیانی هاووڵاتییانی ئەمریكی بكات لە ئەگەری هەڵگیرسانەوەی جەنگ لە ناوچەكە.

وەزارەتی دەرەوەی ئەمریكا لە ماڵپەڕەكەیدا هۆشداری توندی داوەتە هاوڵاتییانی لە گەشتكردن بۆ عیراق و رایگەیاندووە، بەهۆی گرژی و ئاڵۆزییەكانی ناوچەكەوە مەترسی هێرشی ئێران و گروپە چەكدارەكانی هاوپەیمانی و حوسییەكان بۆ سەر هاووڵاتییانی ئەمریكی لە عیراق هەیە.

ئەوەشی خستووەتەڕوو، حكومەتی عیراق ناتوانێت گرەنتی پاراستنی ژیانی هاووڵاتییانی ئەمریكی بكات لە ئەگەری هەڵگیرسانەوەی جەنگ لە ناوچەكە.

وەزارەتی دەرەوەی ئەمریكا ئاماژەی بەوەشداوە، مەترسییەكانی رفاندن و ئەشكەنجەدانی هاوڵاتییانی ئەمریكی لە عیراق لە بەرزترین ئاستدایە و پێویستە هاوڵاتییانی ئەمریكی لە بەرزترین ئاستی هۆشیاریدا بن.

ئەوەش لەكاتێكدایە، نێردەی ئەمریكا بۆ عیراق رایگەیاندووە، رەنگە كۆتایی ئەم هەفتەیە جارێكی تر هێرشەكانی ئەمریكا بۆ سەر ئێران دەستپێبكاتەوە.

ژمارەی کوژراوانی هێرشەکەی سەر کڵێساکەی سەر بە پارێزگای کەرەک لە باشوری ئوردن بۆ هەشت کەس بەرزبووەوە.

وەزیری تەندروستی ئوردن بە ئاژانسی فرانس پرێسی راگەیاند، ژمارەی کوژراوانی هێرشەکەی سەر کڵێساکەی کەرەک بۆ هەشت کەس بەرزبووەوە دوای ئەوەی یەکێک لە بریندارەکان رەوشی تەندروستی ناجێگیر بوو، گیانی لەدەستدا.

ئاماژەی بەوەشکرد، هێشتا 26 بریندار لە نەخۆشخانەکاندا چارەسەر وەردەگرن و تەنها یەکێکیان رەوشی تەندروستی ناجێگیرە.

جێگەی ئاماژەیە، رۆژی هەینی لە ئەنجامی دەستڕێژی گوللـەی  چەند چەکدارێک لە ناوەوە و دەرەوەی کەنیسەی رۆم ئۆرسۆدۆکس لە پارێزگای کەرەک حەوت کەس کوژران و ژمارەیەکیش برینداربوون.

بكوژی دوو براكەی ئاكرێ شەوی رابردوو لە سەنتەری ئاكرێ بە چەك رووبەڕووی هێزە ئەمنییەكانی قەزاكە بووە و دواتر بۆ شوێنێكی نادیار هەڵهات، گەڕان و بەدواداچوونی هێزە ئەمنییەكانیش بۆ دۆزینەوە و دەستگیركردنی ئەو بكوژە دەستیپێكردووە.

دڵبرین غازی پەیامنێری كوردسات نیوز لە ئاكرێ رایگەیاند، شەوی رابردوو هێزە ئەمنییەكانی ئاكرێ لە چالاكییەكەدا هەوڵیانداوە ئەو كەسە دەستگیربكەن كە بە تۆمەتی كوشتنی دوو براكەی ئاكرێ و برینداركردنی برایەكی تریان تۆمەتبارە، بەڵام ئەو تۆمەتبارە بە چەك رووبەڕوی هێزە ئەمنییەكان بووەتەوە و دواتر بۆ شوێنێكی نادیار هەڵهاتووە.

ئەوەشی خستەڕوو، دوابەدوای هەڵهاتنی ئەو تۆمەتبارە گەڕان و بەدواداچوونی هێزە ئەمنییەكان بۆ دۆزینەوە و دەستگیركردنی تۆمەتبارەكە دەستپێكردووە، بەڵام تاكو ئێستا دەستگیرنەكراوە.

ئەوەش لەدوای ئەوەدێت، لە چەند رۆژی رابردوودا بەهۆی كێشەی كۆمەڵایەتییەوە ئەو تۆمەتبارە دەسترێژی گوللەی لە سێ برا كرد و بەهۆیەوە دووانیان گیانیان لەدەستداوە و برایەكی تریشیان برینداربوو.

نوێترین زانیارییەکان و ساتی رووبەڕووبوونەوەکە لەم لینکەوە ببینە...

کەشناسیی هەرێم، پێشبینییەکانی کەشوهەوای بۆ 48 سەعاتی داهاتوو بڵاوکردەوە و ئاشکرایدەکات، سبەینێ ئەگەری نمەباران هەیە.

بەڕێوەبەرایەتیی گشتیی کەشناسی و بوومەلەرزەزانیی هەرێمی، ئاشکرایکرد، ئەمڕۆ ئاسمان بە گشتی ساماڵ دەبێت لەگەڵ دروستبوونی هەندێک پەڵە هەور، بە تایبەتی لە ناوچە شاخاوییەکاندا، پلەکانی گەرماش بەراورد بە تۆمارکراوەکانی دوێنێ کەمێک نزمتر دەبنەوە.

ئاماژەی بەوەشکردووە، سبەینێ ئاسمان ساماڵ و پەڵە هەور دەبێت و لە هەندێک کات و شوێندا دەگۆڕێت بۆ نیمچە هەور؛ لە کاتەکانی ئێوارەدا ئەگەری بارینی نمە بارانێکی کەم لە ناوچە شاخاوییە سنورییەکانی باکوری هەرێم هەیە و بەشێک لە سنووری پارێزگای دهۆکیش دەگرێتەوە.

بەرزترین پلەکانی گەرمای پێشبینیکراو بە پلەی سیلیزی

هەولێر: 28 پلەی سیلیزی

پیرمام: 26 پلەی سیلیزی

سلێمانی: 27 پلەی سیلیزی

هەڵەبجە: 29 پلەی سیلیزی

چەمچەماڵ: 28 پلەی سیلیزی

دهۆک: 28 پلەی سیلیزی

زاخۆ: 28 پلەی سیلیزی

ئاکرێ: 27 پلەی سیلیزی

گەرمیان: 33 پلەی سیلیزی

حاجی ئۆمەران: 19 پلەی سیلیزی

سەرۆکی ئەرکانی گشتیی هێزە چەکدارەکانی ئێران دەڵێت، جارێکی تر رێگە نادەن کەشتییە جەنگییەکانی ئەمریکا بێنە ناو کەنداوەوە.

عەلی عەبدوڵڵاهی، سەرۆکی ئەرکانی گشتیی هێزە چەکدارەکانی ئێران رایگەیاند،  جارێکی تر ناهێڵن کەشتییە جەنگییەکانی ئەمریکا بچنە ناو کەنداوەوە.

وتیشی، "سەرۆکی ئەمریکا لە خەونیشدا نایبینێت کە سەربازەکان و سوپاکەیان جارێکی تر بێنە ناو کەنداوەوە، بەو ئاواتەشەوە دەچنە ژێر گڵەوە".

دوێنێش فەرماندەی هێزی دەریایی سوپای پاسداران رایگەیاندبوو، ئەمریکییەکان 600 بۆ 700 کیلۆمتر لە گەروی هورمز دوورکەوتوونەتەوە.

ئەمە لە کاتێکدایە کە دۆناڵد ترەمپ ئێران تۆمەتبار دەکات بەوەی کە بە هەواڵی درۆ و هەڵبەستراو سەبارەت بە تەقینەوەی مین و هێرش کردنە سەر کەشتییەکان لە گەروی هورمز، هەموو هەوڵێکی خۆی دەخاتەگەڕ تا پێش هەڵبژاردنەکانی کۆنگرێس ئەمریکا نرخی نەوت بەرز بکاتەوە.

نێردەی ئەمریكا بۆ كاروباری سوریا و عیراق هۆشداری لە داهاتووی ئیسرائیل دەدات و رایدەگەیەنێت ئەو وڵاتە سەرەڕای باڵادەستیی تەكنەلۆژی و سەربازی، لە رووی ستراتیژییەوە بەرەو داڕمان هەنگاو دەنێت.

تۆم باراك، نێردەی ئەمریكا بۆ كاروباری سوریا و عیراق لێدوانێكدا ئاشكرای كرد ئیسرائیل دووچاری داڕمانی ناوخۆیی بووەتەوە و راشیگەیاند ئیسرائیلییەكان لە ئێستادا لە پێناو پاراستنی مانەوەی خۆیاندا دەجەنگن، بەڵام تاكە رێگەچارە لەبەردەمیاندا دروستكردنی هاوپەیمانێتییە لەگەڵ وڵاتانی عەرەبی و دەوڵەتانی ناوچەكە.

رۆژنامەی یەدیعۆت ئەحرۆنۆتی ئیسرائیلیش ئاشكرای كرد لێپرسراوانی ئیدارەی ئەمریكا تاوتوێی بانگهێشتكردنەوەی ئەو نێردەیە دەكەن بۆ لێپرسینەوە، هاوكات لێپرسراوێكی ئیسرائیلیش رەخنەی توندی لە شێوازی مامەڵەكردنی تۆم باراكدا گرت لە رۆژهەڵاتی ناوەڕاست.

سەرۆکی ئۆکراین، ئامادەیی وڵاتەکەی بۆ راگرتنی جەنگ لەگەڵ روسیا لە زووترین کاتدا راگەیاند.

ڤۆلۆدیمێر زیلینسکی، سەرۆکی ئۆکراین رایگەیاند، ئوکراین ئامادەیە لە نزیکترین کاتدا کۆتایی بە جەنگەکە بهێنێت، سەرۆکی ئوکراین رونیشیکردەوە، لە ئێستادا هێزە روسییەکان کۆنتڕۆڵی نزیکەی 19٪ی خاکی ئوکراینایان کردووە.

ئەم لێدوانانەی زیلینسکی لە کاتێکدایە کە گرژییە سەربازییەکانی نێوان هەردوو وڵات بەردەوامن، هاوکات لەگەڵ هەوڵە دیپلۆماسییەکان بۆ دۆزینەوەی چارەسەرێک کە کۆتایی بە جەنگەکە بهێنێت، ئەو رێژەیەی کە سەرۆکی ئوکراین خستوویەتەڕوو، تیشک دەخاتە سەر قەبارەی ئەو ناوچانەی کە هێشتا لەژێر کۆنتڕۆڵی روسیادان.

لە لێدوانەکاندا وردەکاریی زیاتر لەبارەی ئەو ناوچانە نەخراوەتەڕوو، کە ئەم رێژەیە دەگرێتەوە، هەروەها زیلینسکی مەرجەکانی کیێڤی بۆ راگرتنی جەنگ یان ئەو هەنگاوە کردارییانەی کە دەبنە هۆی گەیشتن بە رێککەوتن لەگەڵ مۆسکۆ، ئاشکرا نەکردووە.

بافڵ جەلال تاڵەبانی ئیدانەی هێرشە تیرۆریستییەکەی ئوردن دەکات و دەڵێت: بەئامانجگرتنی شوێنە ئاینییەکان تاوانێکی قێزەونە دژی بەها مرۆییەکانە.

بافڵ جەلال تاڵەبانی، سەرۆکی یەکێتیی نیشتمانیی کوردستان، راگەیەندراوێکی سەبارەت بە هێرشەکەی سەر کەنیسەیەک لە ئوردن بڵاوکردەوە و بە توندی ئیدانەی روداوەکەی کرد.

لە راگەیەندراوەکەدا هاتووە:

«بە توندی سەرکۆنەی ئەو هێرشە تیرۆریستییە دەکەین کە کڵێسای 'مار جیۆرجیۆسی' لە ناوچەی حەموود لە پارێزگای کەرەک لە ئوردن کردە ئامانج و لە ئەنجامدا ژمارەیەک هاووڵاتیی مەدەنی بوونە قوربانی.

سەرۆکی یەکێتی جەختی لەوەش کردووەتەوە کە بەئامانجگرتنی شوێنە ئایینییەکان تاوانێکی قێزەونە دژ بە سەرجەم بەها مرۆیی و ئایینییەکان و هەوڵدانە بۆ لێدانی گیانی پێکەوەژیانی ئاشتییانە.

لە کۆتایی پەیامەکەیدا، بافڵ جەلال تاڵەبانی هاوسۆزیی خۆی دووپاتکردەوە و رایگەیاند:

وێڕای دووپاتکردنەوەی هاوسۆزیی تەواومان لەگەڵ سەرکردایەتی و گەلی ئوردن، پرسە و سەرەخۆشیی قووڵی خۆمان ئاڕاستەی کەسوکاری قوربانییان دەکەین و هیوای چاکبوونەوەی خێرا بۆ برینداران دەخوازین.

عەلی زەیدی رایگەیاند، لە پێنج مانگی رابردودا توانیویانە گەندەڵی لاوازبکەن و جەختیشدەکاتەوە دەبێت چەک تەنها لە ژێر کۆنتڕۆڵی حکومەتدا بێت.

لە میانی چاوپێکەوتنێکی لەگەڵ ئاژانسی عیراقییە عەلی زەیدی، سەرۆک وەزیرانی عیراق رایگەیاند، هیچ چەکێک لە دەرەوەی دەوڵەتدا نابێت و ئەمە بڕیاری کۆتاییە.

ئاماژەی بەوەشکرد، سێ گروپ چەکیان داناوە و گفتوگۆلەگەڵ چوارگروپی تر بەردەوامە و دەبێت تا 30ـی حوزەیرانی ساڵی 2027 ئەو پرسە بەتەواوەتی یەکلایکرابێتەوە.

 لەبارەی داخستنی سنورەکانیان لەگەڵ ئێران، زەیدی دەڵێت؛ داخستنی سنورەکانی عیراق و ئێران لەبەرژەوەندی هیچ لایەکیاندا نییە و ئەوە  بە مانای گەمارۆدانی ئابوریی عیراق دێت.

سەرۆک وەزیرانی عیراق رایگەیاند، هیچ سەربازێکی ئەمریکی  تەنانەت وەک راوێژکاریش لە عیراقدا نەماوە و دووپاتی کردەوە، کە عیراق بە هیچ شێوازێک بەشداری لە هیچ جەنگێکدا ناکات و دەبێتە خاڵی کۆبوونەوەی لایەنەکان، نەک  بەرەیەک لە جەنگەکە.

لەبارەی کابینەی حکومەتەکەشیەوە، عەلی زیدی باسی لەوەکردوە،  گەندەڵی بوەتە سیستماتیک و چەسپاوە لە کولتوری هەندێکدا،  روبەڕوبونەوەشی بنەمایە بۆ بنیاتنانی دەوڵەت.

زەیدی دوپاتیدەکاتەوە،  ئەگەر نەیانتوانیبێت گەندەڵی بنبڕکەن، ئەوا لایکەم توانیویانە لاوازی بکەن و سەرەڕای ئەوەی فشاری زۆری لەسەرە، بەڵام بەردەوام دەبن لە شەڕی گەندەڵی.

لەبارەی دەستکاریکردنی نرخی دینار بەرانبەر بە دۆلار، زەیدی دەڵێت؛ کاردەکەن بۆ ئەوەی نرخی 100 دۆلار لە بازاڕدا  بکەنەوە بە 155 هەزار دینار و کەمتریش.

بەردەوامی ململانێ و گرژییە سەربازییەکان گەیشتونەتە ئاستێکی نوێ و تۆم باراکیش دەڵێت؛ رەنگە لەم هەفتەیەدا ئەمریکا هێرشبکاتە سەر ئێران.

تۆم باراک لە لێدوانێکیدا بۆ کەناڵی سی ئێن ئێن، ئاماژەی بەوە کردووە، سوپای ئەمریکا لە تەواوی ئامادەباشیدایە و چاوەڕوانی فەرمانە بۆ هێرشکردنە سەر ئێران.

ناوبراو بە دوری نازانێت، کە  رەنگە لەم هەفتەیەدا ئەوە روبدات.

باراک دەڵێت؛ ئەمریکا رێگە بە تاران نادات مەرجەکانی بەسەر ناوچەکەدا بسەپێنێت یان هەوڵی داخستنی گەووە ئاوییە ستراتیژییەکان بدات.

ناوبراو رونی کردووەتەوە، کە جوڵە سەربازییەکانی ئێران لە ناوچەی گەروی هورمز سنوورەکانیان تێپەڕاندووە و هێڵە سوورەکانی واشنتنیان بەزاندووە.

دۆناڵد ترەمپ، سەرۆکی ئەمریکا رایگەیاند، ئێران شکستیهێناوە و دەتوانن بە تەواوەتی کۆنتڕۆڵی بکەن .

ئەمڕۆ هەینی، سەرۆکی ئەمریکا بە رۆژنامەنوسانی راگەیاند، ئیڕان ئابوریەکەی بە تەواوەتی شکستیهێناوە و هیچ پارەیەکیان نەماوە.

دۆناڵد ترەمپ رایگەیاند، ئەوان کۆنتڕۆڵی گەروی هورمز دەکەن و ئەو بڕە نەوتەی ئێستا لە گەروەکەوە تێدەپەڕێت زیاترە لە پیش جەنگ.

ناوبراو جەختیکردەوە تاران لە ژێر گەمارۆی توندی دەریایدایە و rێژەی هەڵاوسانیشی گەیشتوەتە سەروی 300%، کە بەرزترینە لە سەر ئاستی جیهان.

وەفدێکی هەرێمی کورسدتان بەمەبەستی بەدواداچون بۆ شایستەداراییەکان و پرسی بودجە لە ساڵی 2027 سەردانی بەغداد دەکات.

سەرچاوەیەک لەوەزارەتی دارایی هەرێم، بە کوردسات نیوزی راگەیاند،  ئێوارەی ئەمڕۆ وەفدێکی حکومەتی هەرێم سەردانی بەغداد دەکات و لەگەڵ وەزیری دارایی عیراق کۆدەبێتەوە.

ئەو سەرچاوەیە ئاماژەی بەوەشکرد، وەفدەکە لە سەرۆکی دیوانی ئەنجومەنی وەزیران، سکرتێری ئەنجومەنی وەزیران، سەرۆکی فەرمانگەی هەماهەنگی و بەدواداچون، بریکاری وەزارەتی سامانە سروشتییەکان، بەڕێوەبەرانی گشتیی بودجە و ژمێرکاری لە وەزارەتی دارایی و ئابوریی هەرێمی کوردستان پێکدێن.

بە گوێرەی زانیارییەکان، وەفدەکە بەهەماهەنگی لەگەڵ نوێنەرە کوردستانییەکان لە دەسەڵاتە فیدڕاڵییەکان،  لەگەڵ وەزیری دارایی عیراق کۆدەبنەوە و پرسەکانی گەیشتن بە تێگەیشتنێکی هاوبەش و دادپەروەرانە لەسەر پابەندییە دارایی و نەوتییەکانی هەرێمی کوردستان گفتوگۆ دەکەن.

هەروەها ماف و شایستە دارایییەکانی هەرێم لە بودجەی گشتیی فیدراڵی بۆ ساڵی 2027 بەشێکی تری گفتوگۆکانی نێوان وەفدەکەی هەرێم و وەزیری دارایی عیراق دەبن.

ژان نویل بارو، وەزیری دەرەوەی فەرەنسا رایگەیاند، پەرەسەندنی گرژییەکانی نێوان ئێران و ئەمریکا، نەک هیچ براوەیەکی نابێت، بەڵکو  زیانی بۆ هەموو وڵاتانیش دەبێت.

ئەمڕۆ هەینی، ژان نویل بارو لە ئەستەنبوڵ بە میدیاکانی راگەیاند، بەهۆی جەنگی ئەمریکا  و ئێران نرخی سوتەمەنی بەردەوام لە بەرزبونەوەدایە و بەردەوامی جەنگەکەش زیان بە هەموان دەگەیەنێت.

وەزیری دەرەوەی فەرەنسا، کە بە مەبەستی کۆبونەوە لەگەڵ هاوتاکانی لە بەریتانیا، ئەڵمانیا، تورکیا، میسر، پاکستان و سعودیە لە ئەستەنبوڵە، جەختیکردوە ئەوە جەنگەی ئێستای نێوان واشنتۆن و تاران براوەی نابێت.

ئەمەش لە کاتێکدایە، کۆبوونەوەی وەزیرانی دەرەوەی بەریتانیا، فەرەنسا، ئەڵمانیا، ئیتاڵیا، تورکیا، سعودیە، پاکستان و میسر لە ئەستەنبوڵ بەڕێوەدەچێت بۆ تاوتوێکردنی قەیرانی گەروی هورمز و پێشهاتەکانی رۆژهەڵاتی ناوەڕاست.

نەخۆشخانەی شار لە سلێمانی، دەستکەوتێکی تری پزیشکیی نێودەوڵەتی بەدەستهێنا و وەک یەکێک لە باشترین نەخۆشخانەکانی جیهان دەستنیشان کرا.

ئەمڕۆ هەینی، لە کۆنفرانسی ساڵانەی رێکخراوی جیهانیی جەڵتەی مێشک لە کۆریای باشور، نەخۆشخانەی شار وەک یەکێک لە باشترین و کاراترین سەنتەرەکانی چارەسەرکردنی جەڵتەی مێشک لەسەر ئاستی جیهان دەستنیشان کرا و خەڵاتی تایبەتی پێبەخشرا.

ئومێد هیدایەت، بەرێوەبەری کارگێری نەخۆشخانەی شار بەکوردسات نیوزی راگەیاند، وەک نەخۆشخانەی شار توانیویانە وەک باشترین سەنتەری جەڵتەی مێشک لەسەر ئاستی جیهان  دەستنیشان بکرێت.

ئومێد هیدایەت رایگەیاند، ئێستا سەنتەری نەخۆشخانەی جەڵتەی مێشک لە نەخۆشخانەی شار لە ئاستی جیهاندا دانی پێدادەنرێت و لە تەواوی جیهانەوە دەتوانن سودمەنبن لە زانستە پزیشکییەکانی.

ناوبراو ئاماژەی بەوەشکرد، لە سەر ئاستی جیهان 90 وڵات توانیویانە ئەو دەستکەوتە بەدەستبهێنن و لە سەر ئاستی رۆژهەڵاتی ناوەراستیش تەنها نەخۆشخانەی شار و  وڵاتی میسر ئەو دەستکەوتەیان بەدەستهێناوە.

لە هێرشی چەکداری بۆ سەر کڵێسایەک لە ئوردن؛ حەوت کوژراو و زیاتر لە 40 برینداری لێکەوتەوە. 

بەپێی میدیاکانی ئوردن، لە ئەنجامی هێرشێکی چەکداری بۆ سەر کڵێسایەک لە گوندی «حەمود»ی سەر بە پارێزگای کەرەک، حەوت کەس کوژران و زیاتر لە 30 کەسی تریش بریندار بوون، ئەمە لەکاتێکدا هێشتا ئامارێکی رەسمی بڵاونەکراوەتەوە. 

سەرچاوە میدیاییەکان ئاماژەیانبەوەکردووە، کە شێوازی هێرشەکە نیشانەی توندڕەویی پێوە دیارە، و دەزگا ئەمنییەکانیش دەستیانکردوە بە لێکۆڵینەوە و بەدواداچوون بۆ ئاشکراکردنی وردەکارییەکانی روداوەکە و دەستگیرکردنی ئەنجامدەرانی، و بڕیارە لە نزیکترین کاتدا راگەیەنراوی رەسمی لەم بارەیەوە بڵاوبکرێتەوە.

لە روداوێکی گوماناوای تەقەکردندا، لە باشوری پاریس کەسێک گیانی لەدەستدا و چوارکەسی تر بریندارن، میدیا وڵاتەکە دەڵێت؛ تۆمەتبارەکە دەستگیرکراوە.

میدیاکانی فەرەنسا بڵاویانکردوە بەیانی ئەمڕۆ هەینی، لە روداوێکی تەقەکردندا، کەشیک گیانی لەدەستداوە وچوار کەسی تریش بریندارن، ئاماژە بەوەشکروە ، دوای روداوەکە تۆمەتبارەکە لەلایەن پۆلیسەوە دەستیگرکراوە.

بە گوێرەی زانیارییە سەرەتاییەکان، تەقەکردنەکە لە ناو ئۆتۆمبێلەوە بووە برینی دوان لە بریندارەکان سەختە و دوای روداوەکەش هێزە ئەمنییەکانی فەرەنسا توانیان گومانلێکراوەکە لە شارۆچکەی نزیکی (کوانێر) دەستگیر بکەن.

ئەم روداوی تەقەکردنە لە کاتێکدایە، فەرەنسا بە کاتێکی ئاڵوز و پڕ لە خۆپیشانداندا تێدەپەڕێت و لە چەند شارێکی ئەو وڵاتە قەدەغەی هاتوچۆ راگەیەندراوە و دەیان پۆلیس و خۆپیشاندەر بریندارن.