'سێنتکۆم' هەواڵێکی لێپرسراوێکی باڵای سەربازیی ئێران رەتدەکاتەوە، کە ئاماژەی بەوەکردبوو؛ هێزەکانی ئەمریکا سەدان کیلۆمەتر لە گەروی هورمز دوورکەوتوونەتەوە و ناوچەکەیان چۆڵکردووە.

فەرماندەیی ناوەندیی ئەمریکا 'سێنتکۆم' لە راگەیەنراوێکدا جەختی لەوەکردەوە، هێزەکانی ئەمریکا لە رۆژهەڵاتی ناوەڕاست و لەناو گەروی هورمز و ئاوە هاوسنوورەکانیدا بە تەواوی لە ئامادەباشیدان، ئەو هەواڵانەی ئێران لەو بارەیەوە دوورن لە راستییەوە.

ئاماژەی بەوەشكردووە، هێزەکانی ئەمریکا بە هاوکاریی هاوبەشە هەرێمایەتییەکان کۆنتڕۆڵی تەواوی ئەم رێڕەو و ئاوە نێودەوڵەتییە دەکەن، رێگەش نادەن هیچ لایەنێک سەروەریی ناوچەکە تێکبدات.

ئەو راگەیەنراوەی فەرماندەیی ناوەندیی ئەمریکا 'سێنتکۆم' دوای ئەوە هات، کە فەرماندەی هێزی دەریایی سوپای پاسدارانی ئێران لە لێدوانێکدا ئاماژەی بەوەکردبوو، ئەمریکا هێزەکانی لە گەروی هورمز کشاندووەتەوە، ئەوەش لە کاتێکدایە کە کۆنتڕۆڵکردنی ئەو گەروە ستراتیژییە خاڵێکی سەرەکیی ململانێی نێوان تاران و واشنتۆنە.

ئاژانسی هەواڵی تەسنیمی ئێرانی بڵاویكردەوە، موحسین رەزایی سكرتێری ئەنجومەنی ئاسایشی نیشتیمانی ئێران لەگەڵ موجتەبا خامنەیی رابەری باڵای وڵاتەكەی كۆبووەتەوە و تیایدا خامنەیی بڕیاریداوە، بەپێی دەستور دەسەڵاتەكانی سەرۆك كۆمار و لایەنە پەیوەندیدارەكان زیاد دەكەن بە مەبەستی ئاسانكاریی بۆ چارەسەركردنی كێشەكانی ئێران.

خامنەیی ئاماژە بەوەشكردووە، پێویستە ئاسایشی نەتەوەیی و نیشتیمانی ئێران بپارێزرێت لە رێگەی بەڕێوەبردنی گەروی هورمز و پەیوەندییەكانی وڵاتەكەی لەگەڵ وڵاتانی دراوسێ.

موجتەبا خامنەیی باسی لە بەدواداچوونیش بۆ دابینكردنی ماف و بەرژەوەندییەكانی گەلی ئێران كردووە لە رێگەی بەدیهێنانی ئەو مەرجانەی خستوویانەتەڕوو بە مەبەستی كۆتاییهێنان بە جەنگ و رەوشی نە جەنگ و نە ئاشتی.

قائیمقامییەتی سلێمانی نرخی راگرتنی ئۆتۆمبێلی لە گەراجەکاندا دیاریکرد و دەشڵێت، "بەکارهێنانی شەقام و شۆستەکان بۆ راگرتنی ئۆتۆمبێل بە هەموو شێوەیەک قەدەغەیە".

قائیمقامیەتی سلێمانی رایگەیاندووە، نرخەکانی راگرتنی ئوتۆمبێل لە گەراجەکاندا بۆ ماوەی پێنج سەعات بەم شێوەیە دیاریکراون؛ گەراجی زەوی گڵ 1000 دینار، گەراجی کۆنکرێت و سەرداپۆشراو 1250 دینار، گەراجی داخراو1500 دینار.

بابان ئەحمەد، سەرۆکی لیژنە هاوبەشەکانی قائیمقامیەتی سلێمانی ئاماژەی بەوەشداوە: دوای تێپەڕبوونی پێنج سەعاتەکە ، نرخەکان دەبنە دووهێندە، هەروەها بەکارهێنانی شەقام و شۆستەکان بۆ راگرتنی ئۆتۆمبێل بە هەموو شێوەیەک قەدەغەیە و دانانی کامێرای چاودێریش لە تەواوی گەراجەکاندا کراوەتە مەرجێکی سەرەکی.

سەبارەت بە سزای سەرپێچیکاران، بابان ئەحمەد دەڵێت: هەر خاوەن گەراجێک رێنماییەکان پێشێل بکات و نرخی زیاد لە شۆفێران وەربگرێت، رووبەڕووی سزای دارایی توند دەبێتەوە کە لە 50 هەزار دینارەوە دەستپێدەکات تا پێنج ملیۆن دینار، تەنانەت لەئەگەری بەردەوامی سەرپێچی مۆڵەتی کارکردنی لێ دەسەندرێتەوە.

سەرۆکی لیژنە هاوبەشەکان دەشڵێت، "ئەم بڕیارە رێنماییەکی نوێ نییە، بەڵکو پێشتر لە ساڵی 2021دا بڕیاری لێدراوە و تەواوی گەراجەکان پێی پابەند کراون، بەڵام بەردەوام چاودێری و بەدواداچوونی بۆ دەکرێت بۆ رێگری لە هەر سەرپێچییەک، هەروەها قائیمقامیەتی سلێمانی داوا لە هاووڵاتییان دەکات لە کاتی بەدیکردنی هەر سەرپێچییەک لە نرخەکان یان رێنماییەکاندا، لە رێگەی ژمارە هێڵی گەرمی (07708677777) پەیوەندی بکەن و سکاڵاکانیان تۆمار بکەن.

سەرچاوەیەک لە دارایی هەرێم رایدەگەیەنێت؛ پێداچوونەوە بە لیستی موچەی موچەخۆرانی هەرێم لە بەغداد دەستیپێنەکردووە، بەڵام پێشبینی ناکرێت وەک مانگەکانی رابردوو دوا بکەوێت.

سەرچاوەیەک لە وەزارەتی دارایی هەرێم بەکوردسات نیوزی راگەیاند، تائێستا وردبینی لە لیستی موچەی موچەخۆرانی هەرێمی کوردستان لەبەغداد نەکراوە.

ئەوەشی خستەڕوو، ئەمڕۆ پەیوەندییان بە وەزارەتی دارایی عیراقەوە کردوە و پێیان راگەیاندوون، هێشتا پێداچونەوە بە لیستی موچەی موچەخۆرانی هەرێمی کوردستان دەستیپێنەکردووە.

ئەو سەرچاوەیە ئاشکراشیکرد، کاری پێداچوونەوە لەلایەن بەشی موازەنە لە وەزارەتی دارایی عیراق بەڕێوەدەچێت.

راشیگەیاند، پێشبینی ناکەن پێداچونەوەی لیستی موچەی فەرمانبەرانی هەرێم وەکو مانگەکانی رابردوو بکەوێتە دوای تەمویلکردنی هەموو وەزارەت و دەستە و دامەزراوەکانی عیراقەوە.

جێگەی ئاماژەیە، وەزاەتی دارایی هەرێمی کوردستان لەکۆتایی هەفتەی رابردووە لیستی موچەی فەرمانبەرانی هەرێمی کوردستانی رادەستی وەزارەتی دارایی عیراق کردووە.

کەشناسیی هەرێم پێشبینییەکانی کەشوهەوای 48 سەعاتی داهاتووی بڵاوکردەوە و ئاشکرایکرد، کاریگەری نزمەپەستۆیەک روو لە ناوچەکە دەکات و بارانبارین دەستپێدەکاتەوە.

بەڕێوەبەرایەتی گشتی کەشناسی و بوومەلەرزەزانی هەرێم  رایگەیاند، ئەمڕۆ ئاسمانی ناوچەکە بە گشتی نیمچە هەور دەبێت، پلەکانی گەرمای ئەمڕۆ بەراورد بە پلەکانی دوێنێ بەرزبوونەوە بەخۆیەوە دەبینێت.

ئاماژەی بەوەشکرد، سبەینێ ئاسمان لە نێوان پەڵە هەور و نیمچە هەوردا دەبێت. لەسەرەتادا کاریگەری نزمەپەستۆیەک لەسەر ناوچە سنورییەکان بە نمەبارانی پچڕپچڕ دەستپێدەکات، پاشان لە کاتەکانی نیوەڕۆ و دوای نیوەڕۆدا نمەبارانەکە ناوچە جیاجیاکانی سنوری ئیدارەی زاخۆ، پارێزگای دهۆک، ناوچە شاخاوییە بەرزەکانی پارێزگای هەولێر و بەشێک لە ئیدارەی سۆران دەگرێتەوە.

کەشناسی هەرێم ئەوەشی خستەڕوو، لە بەرانبەردا، ئاسمانی پارێزگاکانی سلێمانی، هەڵەبجە و کەرکوک بە بەردەوامی نیمچە هەور دەبێت.

بەرزترین پلەکانی گەرمای پێشبینیکراو بە پلەی سیلیزی:

هەولێر: 27 پلەی سیلیزی

پیرمام: 24 پلەی سیلیزی

سلێمانی: 26 پلەی سیلیزی

هەڵەبجە:27 پلەی سیلیزی

چەمچەماڵ: 28 پلەی سیلیزی

دهۆک: 24 پلەی سیلیزی

زاخۆ: 25 پلەی سیلیزی

ئاکرێ:26 پلەی سیلیزی

گەرمیان:32 پلەی سیلیزی

حاجی ئۆمەران:18 پلەی سیلیزی

فەرماندەیەكی باڵای هێزی دەریایی ئێران بە ئامانجگرتنی كەشتیی فڕۆكەهەڵگری ئەمریكی ئەبراهام لینكۆڵن بە مووشەكی ئێرانی رادەگەیەنێت، و جەخت دەكاتەوە زیانپێگەیاندنی بووەتە هۆی پاشەكشەكردنی لە ئاوەكانی ناوچەكە.

فەرهاد فەتاحی، جێگری فەرماندەی ئۆپەراسیۆنەكانی هێزی دەریایی ئێران ئاشكرای كرد لە رۆژانی سەرەتای جەنگدا، مووشەكێكی هێزەكانیان كەشتیی فڕۆكەهەڵگری ئەمریكی ئەبراهام لینكۆڵنی پێكاوە و ناچاری كردووە بكشێتەوە. و مووشەكەكە زیانی گەورەی پێگەیاندووە و ئەركە سەربازییەكەی لە ناوچەكەدا پەكخستووە.

باسی لەوەشكرد هێزەكانیان لە رێگەی فڕۆكەی بێفڕۆكەوان و مووشەكی پێشكەوتووەوە چاودێریی جموجۆڵەكان دەكەن؛ راشیگەیاند تاران بە هەموو شێوەیەك رێگری دەكات لەوەی كەشتییە جەنگییەكانی ئەمریكا لە سنوورە ئاوییەكانی ئێران و گەرووی هورمز نزیك ببنەوە.

 

عەلی زەیدی، سەرۆك وەزیرانی عیراق بە مەبەستی پاراستنی بەرژەوەندیی گشتی، كۆتاییهێنانی بە گرێبەستی كاری 69 راوێژكاری لە نوسینگەكەی خۆیدا راگەیاند.

بەپێی بەڵگەنامەیەكی رەسمیی نوسینگەی سەرۆكایەتیی ئەنجوومەنی وەزیران کە بڵاوکراوەتەوە، لەسەر راسپاردەی راستەوخۆی سەرۆك وەزیران بڕیاردرا بە هەڵوەشاندنەوەی گرێبەستی 69 راوێژكار لە ناو نوسینگەی سەرۆكایەتیی حكومەتدا.

لە بڕیارەكەدا روونكراوەتەوە ئەم هەنگاوە لە پێناو بەرژەوەندیی گشتی و رێكخستنەوەی كارگێڕیی فەرمانگەكانی سەرۆكایەتی دراوە، بە مەبەستی كەمكردنەوەی خەرجییەكان و رێكخستنەوەی میلاكی راوێژكاری لە سەرجەم بوارەكاندا.

دۆناڵد ترەمپ سەرۆکی ئەمریکا دەڵێت، ئاگربەستی هاوینی رابڕدوو لەگەڵ ئێران بەفیڕۆدانی کات بووە و جەختیشی کردەوە کە رووبەڕووبوونەوەی ئێستای نێوانیان بەم زووانە کۆتایی دێت.

ئەم لێدوانانەی ترەمپ لە میانی کۆبوونەوەیەکی هەڵبژاردندا هات بۆ لایەنگرانی پارتی کۆماری لە شاری کۆرینس لە ویلایەتی میسیسیپی، پێش بەڕێوەچوونی هەڵبژاردنەکانی نیوەی خولی کۆنگرێس کە بڕیارە لە 3ـی تشرینی دووەم بەڕێوەبچێت.

ترەمپ لەبارەی هەڵگیرسانی جەنگ لەگەڵ ئێران ئاماژەی بەوەکرد، ئەمریکا هیچ هەڵبژاردنێکی تری لەبەرانبەردا نەبوو، دەبوو ئەم کارە زۆر پێشتر ئەنجامبدرایە و ئەوەشی ئێستا رودەدات زۆر بە خێرایی کۆتایی دێت."

سەرۆکی ئەمریکا ئەوەشی خستەڕوو، "رازی بووین لەسەر ئاگربەستێکی کورتخایەن کە زۆرم بە دڵ نەبوو، پێم وابوو بەفیڕۆدانی کاتە، رێگەمان دا بە چەند کەشتییەک لە گەروی هورمزەوە تێپەڕبن، دەمانویست باش بین، بەڵام ئەوەتا تا ئەو شوێنەی من ئاگادار بم، هەر بەفیڕۆدانی کات بوو."

ئەم لێدوانانەی ترەمپ لە کاتێکدایە کە هەوڵە دیپلۆماسییەکان بۆ رێگریکردن لە سەر هەڵدانەوەی رووبەڕووبوونەوەی سەربازی فراوان بەردەوامن؛ دوێنێ دووشەممە تاران میوانداری دانوستاندنی لەگەڵ لێپرسراوانی باڵای سعودیە، پاکستان و تورکیا کرد بە مەبەستی هێورکردنەوەی گرژییەکان و پێکهێنانی کەناڵی دانوستاندن.

لەلایەکی ترەوە، عەباس عراقچی، وەزیری دەرەوەی ئێران پێشتر جەختی لە بەردەوامی پەیوەندییە ناڕاستەوخۆکان لەگەڵ واشنتۆن لە رێگەی نێوەندگیرەکانەوە کردبووەوە و روونی کردبووەوە، ئەمریکا هەوڵدەدات مەرجی نوێ بۆ پێشنیازەکەی ئێران سەبارەت بە ئاگربەست و رێگەدان بە کردنەوەی کردنەوەی هورمز زیاد بکات.

بەئامادەبوونی خاتوو شاناز ئیبراهیم ئەحمەد و جەماوەرێکی زۆری دڵسۆزی هونەر و رەسەنایەتی لەپایتەختی رۆشنبیری، ئێوارەیەکی وەفاداری بۆ رێزلێنان لە ژیان و بەرهەمەکانی هونەرمەند قادر کابان لەهۆڵی تەلاری هونەر بەڕێوەچوو.

لەو بۆنەیەدا تیپی مۆسیقای سلێمانی بەسپۆنسەری ئانزۆ فاوندەیشن و دەزگای میدیایی کوردسات کۆنسێرتێکی هونەری رێکخست و ناوەندی هونەری زەنێش ژیان و کاری هونەری و هەڵوێستە نیشتمانییەکانی قادر کابانی بەشێوەی دیکۆدرامی بەناونیشانی 'شەوقی چاوەڕوانی' پێشکەش کرد، کە هونەرمەندی شەهیدی بەپەرۆشی بەرەوپێشبردنی هونەر و موزیک و خەبات و کوردپەروەری و نهێنی پارێزی رێکخستنەکان وەسفکرد.

هەر لەو میانەیەدا خانمی دڵسۆزی هونەر و فەرهەنگی کوردی ، خاتوو شاناز ئیبراهیم ئەحمەد قەڵغانی رێزلێنانی بەخشییە هاوسەری هونەرمەند و هەردوو هونەرمەندی کۆچکردوو کەریم کابان و ولیەم یوحەننا، هەروەک شەش قەڵغانی تریش بەخشرایە هونەرمەندان و هاوڕێ و یاوەرانی قادر کابان.

ئێوارەهونەرییەکە لەنێو چەپڵەرێزان و رەزامەندی ئەو جەماوەرە بەرچاوەی ئامادەبوودا بەپێشکەشکردنی پێنج بەرهەمی گۆرانی و میوزیک کۆتایی هات.

ئاژانسی رۆیتەرز ئاشکرای دەکات، حزبوڵای لوبنانی بە هاوکاریی دارایی ئێران دووبارە دەستی بە پڕچەککردنەوەی سەربازیی خۆی کردووەتەوە و ئامادەکاری بۆ جەنگێکی نوێ لەگەڵ ئیسرائیل دەکات.

ئاژانسی هەواڵی رۆیتەرز لەسەر زاری لێپرسراوانی ئەمنیی لوبنانیی ئاگادار لە چالاکییەکانی حزبوڵاوە بڵاویکردەوە، ئەو گروپە ماوەی سێ مانگە بە بەکارهێنانی هاوکاری دارایی کە لەلایەن ئێرانەوە پێی گەیشتووە، سەرقاڵی خۆئامادەکردنە بۆ ئەگەری دەستپێکردنەوەی شەڕ و پێکدادانەکان لەگەڵ ئیسرائیل.

حزبوڵای لوبنانی، لە دوو جەنگی لەدوای یەکدا لەگەڵ ئیسرائیل لە ساڵی 2024ەوە تووشی زەبر و زیانی سەخت بووەتەوە، کە بووەتە هۆی کوژرانی هەزاران چەکدار و ژمارەیەک لە فەرماندە دیارەکانی، جگە لە وێرانبوونی بەشێکی گەورە لە کۆگاکانی چەک و تەقەمەنییەکانی.

لە ئێستادا هێزەکانی ئیسرائیل لە گوندەکانی باشوری لوبنان کە بە پێگە سەرەکییەکانی حزبوڵا دادەنرێن جێگیربوون، هاوکات فشارە سیاسییەکانیش لە بەیروت بۆ داماڵینی چەکی ئەو گرووپە ڕوویان لە زیادبوون کردووە.

بەپێی زانیارییەکانی دوو سەرچاوەی ئەمنیی لوبنانی کە رۆیتەرز دەستیکەوتووە، باڵی سەربازیی حزبوڵا سودی لەو هێمنییە وەرگرتووە کە لە مانگی حوزەیرانی ڕابردووەوە لە کردەوە جەنگییەکاندا هاتبووە ئاراوە، بۆ ئەوەی دووبارە خۆی پڕچەک بکاتەوە؛ بەجۆرێک گرنگیی زۆریان داوە بە کڕینی مادەی تەقەمەنی و دروستکردنی فڕۆکەی بێفڕۆکەوان 'دڕۆن' تا و ئاراستەی پێگە و ئامانجەکانی ئیسرائیلیان بکەن.

دۆناڵد ترەمپ داوایەكی بنیامین ناتانیاهۆ بۆ هێرشكردنەسەر ئێران بەر لە هەڵبژاردنی كنێست رەتدەكاتەوەو هاوكارییەكانی ئەمریكاش لە بواری بەرگریی ئاسمانی بۆ ئیسرائیل كەم دەكاتەوە.

كەناڵی " سی ئێن ئێن"ی ئەمریكی لە چەند سەرچاوەیەكی كۆشكی سپییەوە ئاشكرایكردووە، ترەمپ داوایەكی سەرۆك وەزیرانی ئیسرائیلی رەتكردووەتەوە بۆ هێرشكردنەسەر ئێران بەر لە هەڵبژاردنی كنێست كە بڕیارە سبەینێ بەڕێوەبچێت.

سەرچاوە ئاماژەی بەوەش كردووە، یەكێك لە هۆكارەكانی دواخستنی هێرش كردنە سەر ئێران، هۆشدارییەكی سوپای ئیسرائیل بووە كە تێیدا باسی لە دواخستنی هەڵبژاردنەكە كردبوویەوە لە ئەگەری دەستپێكردنەوەی جەنگی ئێران.

ئاماژەی بەوەشداوە، ئەمریكا بەشێوەیەكی كاتی هاوكارییە سەربازییەكانی بۆ ئیسرائیل لە بواری بەرگری ئاسمانیدا كەم دەكاتەوە و ئیسرائیلیش رەزامەندی لەسەر ئەو هەنگاوەی ئەمریكا نیشانداوە.

هەروەها بەپێی سەرچاوەكان، ترەمپ بە نیازە دوای هەڵبژاردنی نیوەی خولی سەرۆكایەتی ئەمریكا كە مانگی داهاتوو دەستپێدەكات، جارێكی تر هێرشەكان بۆ سەر ئێران دەستپێبكاتەوە.

مەسعود پزیشیکیان، سەرۆک کۆماری ئێران لەگەڵ هەر یەکە لە وەزیری بەرگریی سعودیە، سەرۆکی دەزگای هەواڵگریی تورکیا 'میت' و سوپاسالاری پاکستان کۆبووەوە، کە لە کۆبوونەوەکەدا 'ئاسایشی ناوخۆیی' لە رۆژئاوای ئاسیا گفتوگۆی لەبارەوە کرا.

مەسعود پزیشکیان، سەرۆک کۆماری ئێران لە کۆبوونەوەیدا لەگەڵ نوێنەرانی وڵاتانی هاوپەیمانیی مەککە رایگەیاند، تاران پشتیوانی لە هەر لێکتێگەیشتنێک دەکات کە ببێتە هۆی بەهێزکردنی ئاسایش و سەقامگیری لە ناوچەکەدا، هاوکات ئامادەیی وڵاتەکەشی دەربڕی بۆ هەنگاونان بە ئاڕاستەی هاوکاریی هەرێمی و چارەسەرکردنی ناکۆکییەکان.

لە کۆبوونەوەکەدا کە بە ئامادەبوونی خالید بن سەلمان وەزیری بەرگریی سعودیە، عاسم مونیر سوپاسالاری پاکستان و سەرۆکی دەزگای هەواڵگریی تورکیا بەڕێوەچوو؛ سەرۆک کۆماری ئێران داوای "یەکێتیی هەرێمی" کرد و هیوای خواست ئامادەبوونی نوێنەرانی ئەم وڵاتە ئیسلامییە گرنگ و کاریگەرانە ببێتە هۆی بەهێزکردنی تەبا و یەکڕیزی لە ناوچەکەدا.

لە کۆتاییدا پزیشکیان داوای لە وڵاتانی ئیسلامی کرد کە "لە یەک ریزدا بوەستن و هەڵوێستێکی هاوبەش و هەماهەنگ بگرنەبەر."

پڕۆژەی رووناکی ئاگادارییەکی ئاراستەی هاوبەشانی کارەبا دەکات و رایدەگەیەنێت، لە رۆژی دەرچوونی پسووڵەوە 50 رۆژ مۆڵەت دەدرێت بۆ دانەوەی ئابوونەی کارەبا، بە پێچەوانەوە کارەبای سەرپێچیکاران دەپچڕێندرێت.

پڕۆژەی رووناکی لە راگەیەنراوێکدا هاوبەشانی کارەبا ئاگادار دەکاتەوە کە ماوەی پارەدانی پسووڵەی کارەبا 50 رۆژە. ئەم ماوەیەی پارەدان لە رۆژی دەرچوونی پسووڵەکەوە لەسەر سەکۆی "ئی-پسوولە" (e-Psula) دەست پێ دەکات، نەک لە کاتی گەیشتنی پسووڵەی کاغەزی.

ئاماژەی بەوەشکرد، ئەو هاوبەشانەی لە ماوەی دیاریکراودا '50 رۆژ' پارەی پسووڵەکەیان نادەن، رێکاری یاساییان لەسەر جێبەجێ دەکرێت و کارەباکەیان دەپچڕێندرێت.

پڕۆژەی رووناکی ئەوەشی خستەڕوو، لە حاڵەتی پچڕانی کارەبادا بەهۆی پارەنەدانەوە، گەڕاندنەوەی کارەبا تەنها دوای دانی تەواوی بڕی پسووڵەکە دەست پێ دەکات و بە گشتی تا 24 سەعات دەخایەنێت؛ بەڵام ئەگەر پارەکە لەڕێگەی کارمەندی کۆکەرەوەوە درابێت، پرۆسەکە کاتێکی زیاتری دەوێت.

راشیگەیاند، لە ئێستادا نوێترین پسووڵەی کارەبا بۆ زۆربەی هاوبەشان لە سەکۆی "ئی-پسوولە" بەردەستە و داوا لە هاوبەشان دەکرێت مانگانە بەدواداوچوون بۆ پسووڵەکانیان بکەن.

لەکۆتایی راگەیەنراوەکەدا، بۆ ئاگاداربوون لە دەرچوونی پسوولە و زانیارییە نوێیەکان بە بەردەوامی، پڕۆژەی رووناکی داوا لە هاوبەشان دەکات یەکەکانیان لە رێگەی ماڵپەڕی رەسمیی رووناکییەوە تۆمار بکەن.

لیژنەی ئاوارەکانی گرێ سپی ئاشکرایکرد، زیاتر لە 100 خێزانی کورد لەژێر هەڕەشەدان و لەناو باڵەخانەی بەڕێوەبەرایەتیی ناوچەکە گەمارۆ دراون، هاوکات ئیدانەی ئەو بەئامانجگرتن و دەستدرێژییانە دەکات کە دەکرێنە سەر ئەو هاووڵاتییانەی دەگەڕێنەوە سەر ماڵ و زێدی خۆیان.

لیژنەی ئاوارەکانی گرێ سپی لە راگەیەنراوێکدا بڵاویکردەوە، بە توندی ئیدانەی ئەو پەلامار و دەستدرێژییانە دەکات کە کراونەتە سەر هاووڵاتییە کوردە گەڕاوەکان بۆ ناوچە و ماڵ و حاڵی خۆیان.

ئاماژەی بەوەشکردووە، زیاتر لە 100 خێزانی کورد، کە ژمارەیەک ژن و منداڵیان تێدایە، لەناو باڵەخانەی بەڕێوەبەرایەتیی ناوچەی گرێ سپی گەمارۆ دراون و لە مەترسیدان.

لە راگەیەنراوەکەدا ئەوەشخراوەتەڕوو، داوا لە لایەنە پەیوەندیدارەکان دەکەن دەستبەجێ دەستوەردان بکەن بۆ پاراستنی ئەو خێزانانە و دڵنیابوونەوە لە سەلامەتییان.

ئاشکراشیکرد، داوا لە دەسەڵاتداران دەکەن رێوشوێن و رێکاری پێویست بگرنەبەر بۆ رێگریکردن لە دووبارەبوونەوەی پێشێلکارییەکان و دابینکردنی زەمینەی گەڕانەوەی ئارام و شکۆمەندانە بۆ سەرجەم ئاوارەکان.

لیژنەکە جەخت لەسەر پێویستیی ئەنجامدانی لێکۆڵینەوەیەکی جدی و شەفاف لەسەر سەرجەم دەستدرێژییەکان و سزادانی ئەنجامدەرانیان دەکەنەوە، هەروەها لیژنەکە داوا لەو هاووڵاتییانە دەکات کە خواستی گەڕانەوەیان بۆ گرێ سپی هەیە، پێشوەختە سەردانی لیژنەی ئاوارەکان بکەن و هەماهەنگی بکەن بۆ رێکخستن و بەدواداچوونی پرۆسەی گەڕانەوەکەیان.

قوباد تاڵەبانی، بەشداری لە فێستیڤاڵی نێودەوڵەتیی ژیریی دەستکرد کردووە کە لە دوبەی بەڕێوەچووە، دەشڵێت، "گفتوگۆمان کرد لەگەڵ چەندین دامەزراوە و کۆمپانیای گرنگ بۆ ئەوەی بێنە کوردستان".

قوباد تاڵەبانی رایگەیاندووە: بەشداریمان کرد لە فێستیڤاڵی نێودەوڵەتیی ژیریی دەستکرد لە دوبەی کە کەسانی پسپۆڕ و کۆمپانیا و لایەنی پەیوەندیدار لە زیاتر لە 100 وڵاتی جیهانەوە ئامادەبوون. گفتوگۆی زۆر گرنگ کرا لەبارەی داهاتووی ژیریی دەستکرد لە رۆژهەڵاتی ناوەڕاستدا و چۆنییەتی بەکارهێنانی ژیریی دەستکرد بۆ بەهێزکردنی دامەزراوەکان و باشترکردنی خزمەتگوزارییەکان.

قوباد تاڵەبانی ئاماژەی بەوەشداوە: گفتوگۆمان کرد لەگەڵ چەندین دامەزراوە و کۆمپانیای گرنگ بۆ ئەوەی بێنە کوردستان و هاوکاربن لە پەرەپێدانی تواناکانی گەنجان و ئەزمون و شارەزاییەکەیان هاوبەش بکەن لەگەڵ پسپۆڕان و ناوەند و دامەزراوە پەیوەندیدارەکانی کوردستان.

دادگای باڵای فیدراڵیی عیراق ئەمڕۆ بۆ یەكلاكردنەوەی سێ سكاڵای هەستیار لەسەر چارەنووسی پەرلەمان و دەسەڵاتەكانی حكومەتی هەرێمی كوردستان کۆبووەوە و سکاڵاکەی عەلی حەمەساڵحیشی رەتکردەوە.

دادگای باڵای فیدراڵیی عیراق ئەمڕۆ کۆبووەوە بۆ تاوتوێكردنی سێ سكاڵای دەستووریی كە كاریگەریی راستەوخۆیان لەسەر پێگەی یاسایی دامەزراوەكانی هەرێمی كوردستان هەیە و ئەگەر سکاڵاکان قبوڵبکرابووبان، ئەگەری هەڵوەشانەوەی خولی شەشەمی پەرلەمانی هەرێم دەهاتە ئاراوە.

لەوبارەیەشەوە، پەیامنێری کوردسات نیوز رایگەیاند، سكاڵای یەكەم کە لە لایەن عەلی حەمەساڵحەوە، ئەندامی پەرلەمانی كوردستان تۆمار كراوە و لە سكاڵاکەیدا داوا دەكات خولی شەشەمی پەرلەمانی كوردستان بەهۆی كۆتاییهاتنی وادەكەیەوە بكرێتە 'كاربەڕێكەر'، بەڵام دادگای فیدراڵ سکاڵاکەی رەتکردەوە.

وتیشی، شێوازی تۆمارکردنی سکاڵاکە بەجۆرێکە کە دەبووایە لەسەر بەتەمەنترین ئەندامی پەرلەمان سکاڵاکە تۆماربکرێت، چونکە بەتەمەنترین ئەندامی پەرلەمانی هەرێم تا پێکهێنانی دەستەی ئەنجوومەنی سەرۆکایەتیی پەرلەمان، راستەوخۆ دەبێتە سەرۆکی پەرلەمان، لە دادگاشدا پێویستە سکاڵا لەسەر کەسێک تۆماربکرێت تاوەکو قبوڵبکرێت، بۆیە سکاڵاکە بە مەبەستی هەڵوەشاندنەوەی خولی شەشەمی پەرلەمانی كوردستان و بە 'کاربەڕێکەر' لەقەڵەمدانی کابینەی حکومەت بووە، بەڵام داواکەی رەتکرایەوە.

لەلایەکی دیکەشەوە رێبوار ئەورەحمان ئەندامی ئەنجومەنی نوێنەرای عیراق لە فراکسیۆنی نەوەی نوێ بە کوردسات نیوزی راگەیاند، دوو سكاڵای دیكەش لە لایەن پەرلەمانتارانی جووڵانەوەی نەوەی نوێ، رێبوار ئەورەحمان و ئەكبەر غەریب، لە دژی سەرۆكی حكومەتی هەرێم تۆمار كراون، بە هۆکاری ئەوەی ماوەی كاركردنی بەسەرچووە و دەبێت دەسەڵاتەكانی لێبسێنرێتەوە، بەڵام دادگا ئەو داوایەشی دواخست بۆ 14ـی 12ـی 2026.

سكاڵاكاران دووپاتی دەكەنەوە تەمەنی یاسایی حكومەت و پەرلەمان بەسەرچووە و دەبێت سەرجەم بڕیارەكانیان رابگیرێن و تەنها وەك كاربەڕێككەر مامەڵە بكەن.