هەواڵەکان
کەشناسیی هەرێم رایدەگەیەنێت، ئەمڕۆ ئاسمان پەڵە هەور دەبێت، پلەکانی گەرماش نزیک دەبنەوە لە تۆمارکراوەکانی دوێنێ.
بەڕێوەبەرایەتیی گشتیی کەشناسیی و بوومەلەرزەزانیی هەرێم پێشبینییەکانی کەشوهەوای بۆ 48 سەعاتی داهاتوو بڵاوکردەوە و رایگەیاند، سبەی سێشەممە 27ـی 10ـی 2026، ئاسمان لەنێوان هەور و نیمچە هەور دەبێت و پلەکانی گەرما کەمێک بەرز دەبنەوە بەراورد بە تۆمارکراوەکانی ئەمڕۆ.
بەرزترین پلەکانی گەرمای پێشبینیکراو بە پلەی سیلیزی:
هەولێر: 28 پلەی سیلیزی
پیرمام: 25 پلەی سیلیزی
سلێمانی: 26 پلەی سیلیزی
هەڵەبجە: 29 پلەی سیلیزی
چەمچەماڵ: 29 پلەی سیلیزی
دهۆک: 27 پلەی سیلیزی
زاخۆ: 28 پلەی سیلیزی
ئاکرێ: 28 پلەی سیلیزی
گەرمیان: 34 پلەی سیلیزی
حاجی ئۆمەران: 18 پلەی سیلیزی
سەرۆکی ئەمریکا تاوتوێی لێدانی سەربازیی دەکات، وەزیری دەرەوەی ئێرانیش جەخت لە نەگۆڕیی هەڵوێستەکانی ئێران دەکاتەوە.
بەپێی راپۆرتێکی ئاژانسی هەواڵی 'سی بی ئێس'ـی ئەمریکی، دۆناڵد ترەمپ، سەرۆکی ئەمریکا رایگەیاندووە، لە نێوان دوو بژاردەدایە، ئایا رێککەوتن لەگەڵ تاران بکات، یان پەنا بباتە بەر کردەی سەربازیی بۆ ئەوەی وەک خۆی دەڵێت "کۆتایی بە کارەکەیان بهێنێت".
لە بەرانبەردا و بەپێی هەمان سەرچاوە، عەباس عیراقچی، وەزیری دەرەوەی ئێران رایگەیاندووە، ئەگەری دەستپێکردنەوەی جەنگ لەگەڵ ئیسرائیل و ئەمریکا، هیچ گۆڕانکارییەک لە هەڵوێستەکانی تاراندا دروست ناکات، ئەوەش دوای ئەوەی ترەمپ ئاماژەی بەوە کردبوو، واشنتۆن رەنگە هێرشێکی دیکە بکاتە سەر ئێران.
هاوکات، تاران هۆشدارییەکی توندی دایە واشنتۆن و جەختی کردەوە، لە ژێر هیچ بارودۆخێکدا رێگە بە کەشتییە جەنگییەکانی ئەمریکا نادرێت بچنە ناو کەنداو.
بەرەبەیانیی ئەمڕۆ دووشەممە، 26ـی 10ـی 2026 نووسینگەی راگەیاندنی سەرۆک وەزیرانی عیراق، لەبارەی لێدوانەکانی سەرۆکی ئەنجومەنی پارێزگای میسان راگەیەنراوێکی بڵاوکردەوە و تێیدا هاتووە: ئەم هەنگاوە وەک دووپاتکردنەوەیەکە لەسەر پێویستیی پابەندبوون بە یاسا.
لە راگەیەنراوەکەدا ئەوەش هاتووە: عەلی زەیدی، سەرۆک وەزیرانی عیراق بڕیاریداوە لێکۆڵینەوە لەگەڵ مستەفا دعێر عەبدولحەسەن، سەرۆکی ئەنجومەنی پارێزگای میسان بکرێت، لەسەر ئەو لێدوانانەی رۆژی یەکشەممە دابوونی.
هەر بەپێی راگەیەندراوەکە، سەرۆکی ئەنجومەنی پارێزگای میسان لە لێدوانەکانیدا هەڕەشەی ئەوەی کردووە کە ئەگەر دەروازەی سنووریی 'ئەلشەیب' نەکرێتەوە رەوشی یاخیبوون رادەگەیەنن و سەرباری ئەوەش، چەند دەستەواژەیەکی نەشیاویشی بەکارهێناوە.
نووسینگەی سەرۆک وەزیران ئاماژەی بەوەش کردووە، ئەم هەنگاوە وەک دووپاتکردنەوەیەکە لەسەر پێویستیی پابەندبوون بە یاسا و گرتنەبەری رێکارە دەستوریی و کارگێڕییەکان بۆ چارەسەرکردنی کێشە خزمەتگوزارییەکان و دیاریکردنی بەرپرسیارێتیی یاساییش لەسەر لێدوانەکان، بۆ لایەنە پەیوەندیدار و دادوەرییەکان جێهێڵراوە.
دەستەی گشتیی کەشناسیی عیراق ئاشکرایکرد، بەپێی دواین پێشبینییەکانی کەشوهەوا، لە ئێوارەی رۆژی سێشەممەوە، عیراق و هەرێمی کوردستان دەکەوێتە ژێر کاریگەریی شەپۆلێکی بارانبارینی پاییزە کە بۆ چەند رۆژێک بەردەوام دەبێت.
کەشناسیی عیراق ئاماژەی بەوەشکرد،، شەپۆلەکە لە سەرەتا نە نمەباران و پچڕ پچر دەبێت و لە رۆژانی دواتردا شەپۆلی بارانبارینەکە کاریگەری زیاتر دەبێت.
کەشناسیی عیراق راشیگەیاند، رێژەی باران بارینەکە لە ناوچەکانی ناوەڕاست و هەرێمی کوردستان زیاتر دەبێت، هاوکات ئەگەری هەورەبروسکە و بارانی بەلێزمە و رەشەبا و خۆڵبارین هەیە.
دەستەی کەشناسی ئاماژەی بەوەش کردووە کە شەپۆلەکە لە سەعاتەکانی رۆژی شەممەدا لاواز دەبێت و کۆتایی پێدێت، بەڵام پێشبینی دەکرێت لە ناوەڕاستی هەفتەی داهاتوودا شەپۆلێکی تری بارانبارین روو لە ناوچەکە بکاتەوە.
فەرماندەی سێنتکۆم سەردانی گەروی هورمزی کرد و رایگەیاند، هێزەکانی ئەمریکا رێڕەوە نێودەوڵەتییەکانیان لە مینە دەریاییەکانی سوپای پاسداران پاککردووەتەوە.
براد کوپەر، فەرماندەی فەرماندەیی ناوەندیی هێزەکانی ئەمریکا 'سێنتکۆم'، لە رێگەی فڕۆکەیەکی سەربازییەوە سەردانی گەروی هورمزی کرد بۆ چاودێریکردنی ڕەوشی ئەمنی و دەریایی ناوچەکە.
بەپێی راگەیەنراوێکی سێنتکۆم، لە شەش مانگی رابردوودا زیاتر لە سێ هەزار کەشتیی بازرگانی بە پاڵپشتیی هێزەکانی ئەمریکا بە سەلامەتی لە لە گەروی هورمز تێپەڕیون.
براد کوپەر فەرماندەی سێنتکۆم رایگەیاند، بەردەوامن لە دەستەبەرکردنی ئازادیی کەشتیوانی لە گەروی هورمزدا.
راگەیەنراوەکەی سێنتکۆم ئاماژەی بەوەشکردووە، جووڵەی دەریایی دوای ئەوە ئاسایی بووەتەوە کە هێزەکانی ئەمریکا توانویانە رێڕەوە نێودەوڵەتییەکان لەو مینە دەریاییانە پاک بکەنەوە کە لەلایەن سوپای پاسدارانی ئێرانەوە دانرابوون.
ئەوەشخراوەتەڕوو، زیاتر لە 95٪ـی کەشتییە بازرگانییەکان لە چەند مانگی رابردوودا بەبێ ئاستەنگ تێپەڕیون، ئەمەش نیشانەی باڵادەستیی ئەمریکا و هاوبەشەکانیەتی لە کۆنترۆڵکردنی ئاسایشی ئەو رێڕەوە ئاوییە نێودەوڵەتییەدا.
براکۆ شێرکۆ فاتیح دەڵێت؛ داوامان کردووە تاوانەکانی ئەنفال و کیمیاباران تاوانەکانی تری دژ بە گەلی کورد لە کتێبی تاوانەکانی رژێمی بەعسی روخاودا بچەسپێندرێن.
براکۆ شێرکۆ فاتیح، ئەندامی ئەنجومەنی نوێنەرانی عیراق رایگەیاند، لە دانیشتنی ئەمڕۆی پەرلەمان داواکاریەکیان ئاڕاستەی سەرۆکایەتی ئەنجومەنی نوێنەرانی عیراق کرد، سەبارەت بەو کتێبەی کە وەزارەتی پەروەردەی عیراق دەریکردوە بۆ پۆلی چواری ئامادەیی دەربارەی تاوانەکانی رژێمی حزبی بەعسی رووخاو.
ئاماژەی بەوەشکرد، لەکطێبەکەدا هیچ ئاماژەیەک بەو تاوانانە نەکراوە کە حزبی بەعس بەرانبەر بە گەلی کورد کردویەتی بۆیە داوایان کردووە کە پێداچوونەوە بەو کتێبەدا بکرێت و تاوانەکانی ئەنفال و کیمیابارانی هەڵەبجە و تاوانەکانی تری دەرحەق بە گەلی کورد لە مێژوودا بچەسپێندرێت و رۆڵەکانی داهاتوو مێژوو وەکو خۆی بخوێننەوە.
ئەو ئەندامەی ئەنجومەنی نوێنەرای عیراق ئەوەشی خستەڕوو، سوپاسی سەرجەم سەرۆک فراکسیۆن و پەرلەمانتارە کوردەکان و بەشێک لە پەرلەمانتارە عەرەبەکان دەکات کە هاتن بەدەم داواکاریەکەیانەوە و پشتیوانیان کردن.
خاتوو شاناز ئیبراهیم ئەحمەد لەئۆفیسی تایبەتی خۆی لەشاری سلێمانی پێشوازیکرد لەسیاسەتمەداری کورد خاتوو ئیلهام ئەحمەد بۆ نزیککردنەوەی دیدگا سیاسییەکان و داکۆکیکردن لە مافە ڕەواکانی گەلی کورد.
لەدیدارەکەدا تاوتوێی رەوشی سیاسی و کارگێڕی ئێستای سوریا و رۆژئاوای کوردستان کرا سەرباری پێگەی کورد لەهاوکێشە ئیقلیمییەکان و هەوڵەکان بۆ چەسپاندنی مافە بنەڕەتیەکانی لەپێناو هێنانەدی سەقامگیری ناوچەکە هەروەک میکانیزمەکانی بەرەوپێشچوونی ئەزمونەکانی بەرێوەبردن و بەشداری کارای ژنان لەسیاسەت و دامەزراوەکانی دەوڵەتدا.
لەدیداری هەردوو ژنە سیاسەتمەداری کورد خاتوو شاناز ئیبراهیم ئەحمەد و خاتوو ئیلهام ئەحمەددا جەخت لەوەکرایەوە کەدەبێت دان بە زمان و کلتوری کوردیدا بنرێت و کار بۆ چەسپاندن و جێبەجێکردنی ئەو بڕیارانە بدرێت کەلەسەر ئەرزی واقیع هێشتا ماویەتی و پێویستی بە میکانیزمی روون هەیە.
لە روداوێکی تەقەکردندا لە کەلار سێ کەس برینداربوون، پۆلیسی گەرمیانیش دەڵێت؛ لێکۆڵینەوەیان لە روداوەکە دەستپێکردووە و لە هەوڵی گرتنی تەقەکەرەکاندان.
رەفیق قادر، بەڕێوبەری فریاکەوتنی شەهید هەژار لە کەلار بە کوردسات نیوزی راگەیاند، سێ کەسیان هێناوە بەشی فریاکەوتن بە گوللـە برینداربوون.
هاوکات بەپێی زانیاریەکانی کوردسات نیوز، روداوەکە لەرێگای نێوان قەزاکانی کەلار و رزگاریی بووە و ئۆتۆمبێلێک دەسترێژی گولەی لەو کەسانە کردووە.
شاخەوان محەمەد، پەیامنێری کوردسات نیوز رایگەیاند، لەئێستاشدا پۆلیسی گەرمیان لێکۆڵینەوەی لە روداوەکە دەستپێکردووە و هەوڵی گرتنی تەقەکەرەکان دەدات.
دیلان غەفور، ئەندامی ئەنجومەنی نوێنەرانی عیراق بە کوردسات نیوزی راگەیاند، بڕیاری بە هەمیشەیکردنی گرێبەستەکانی عیراق و دامەزراندن بە شێوەی گرێبەست هەرێمی کوردستانیش دەگرێتەوە.
لە میانی بەشداریکردنی لە بەرنامەی پرسی رۆژی کوردسات نیوز، دیلان غەفور، رایگەیاند بڕیاری بە هەمیشيیکردنی گرێبەستەکانی عیراق هەرێمی کوردستانیش دەگرێتەوە و تا ئێستاش بەغداد و هەرێم لەسەر سێ پرس نەگەشتونەتە رێککەوتن.
دیلان غەفور دەڵێت؛ بابەتی بە هەمیشەیکردنی گرێبەستەکان و دامەزراندنی نوێ بە گرێبەست بە گوێرەی پشکی هەرێمی کوردستان دەبێت لە بودجەدا.
ناوبراور ئاماژەی بەوەشکرد، دامەزراندنەکە بەشە پزیشکییەکان، یەکەمەکانی زانکۆ و پەیمانگەکان و بڕوانامە باڵاکان دەگرێتەوە.
لەبارەی گەیشتن بە رێکەوتنی کۆتایی لەگەڵ بەغداد، ئەو ئەندامەی ئەنجومەنی نوێنەران دەڵێت؛ تا ئێستا سێ بابەت یەکلای نەکراوەتەوە، یەکەمیان رێژەی پشکی هەرێمی کوردستان لە بودجەی عیراقدا، کە بە پێی کۆتا سەرژمێری 14.4% و دواتر کراوە بە 12.7% .
بابەتی دووەم پرسی نەوتی هەرێمە، عیراق داوای 445 هەزار بەرمیل دەکات لە رۆژێکدا و هەرێمی کوردستانیش پێیوایە ئەو بڕە زۆرە.
بابەتی سێیەمیش، کە تا ئێستا لەسەری رێکنەکەوتون، داهاتی ناوخۆیە و هەردولا بۆچونیان جیاوازە، بۆ گەیشتن بە رێککەوتن گفتوگۆکان بەردەوامیان هەیە.
قائیمقامیەتی سلێمانی ئاماری سەردانیکردن و بەدواداچونی لیژنەکانی لە مانگی نۆدا بۆ شوێنە وەرزشییەکان بڵاوکردەوە ؛ 18 پسولەی سەرپێچی کراوە و پێنج شوێنێش داخراون.
ئەمڕۆ یەکشەممە، لیژنەی چاودێری تەندروستی و شوێنە وەرزشییەکانی سەر بە لیژنە هاوبەشەکانی قائیمقامییەتی سلێمانی ئاماری کار و چالاکییەکانی خۆی بۆ مانگی ئەیلولی 2026 بڵاوکردەوە.
قائیمقامیەتی سلێمانی ئاماژەی بەوەکردوە، 125 سەردانی مەیدانی و بەدواداچوونیان بۆ شوێنە وەرزشییەکان کردوە و
18 پسوڵەی سەرپێچیکردن بۆ ئەو شوێنانە تۆمار کراون کە پابەندی مەرج و رێنماییەکان نەبوون.
قائیمقامیەتی سلێمانی دەشڵێت؛ بەهۆی پابەندنەبونەوە بە مەرجەکان، پێنج شوێنی داخراون.
قائیمقامییەتی سلێمانی داوا لە شوێنە وەرزشییەکان دەکات بە تەواوی پابەندی مەرجە تەندروستی و یاساییەکان بن و بەدور بن لە هەر سەرپێچییەک کە کاریگەری نەرێنی لەسەر تەندروستی وەرزشوانان و هاووڵاتییان دروست بکات.
وەزارەتی بەرگریی سعودیە رایگەیاند، توانیویانە لە 12 سەعاتی رابردودا 10 موشەکی بالیستی و کروز کە لەلایەن حوسییەکانەوە ئاڕاستەکرابوو تێکبشکێنن.
ئەمڕۆ یەکشەممە، وەزارەتی بەرگریی سعودی لە راگەیەندراوێكدا تێکشکاندنی 10 موشەکی بالیستی و کروزی راگەیاند.
بەرگریی سعودییە ئماژەی بەوەکردوە، موشەکەکان بەرەو ناوچەکانی باشوری وڵات و و شاری ریاز ئاڕاستە کرابوون.
ئەم روداوانە لە کاتێکدان کە هەوڵەکان بۆ کردنەوەی فڕۆکەخانەی نێودەوڵەتیی ڕیاز بەردەوامن و حوسییەکان بەرپرسیارێتی هێرشەکانیان لەئەستۆ گرتووە.
لە بەرانبەردا راگەیاندنەکانی سەر بە حوسییەکان بە بێ باس کردن لە زیانەکان، رایانگەیاندوە، فڕۆکە جەنگییەکانی سعودیە هێرشی ئاسمانییان کردووەتە سەر سەنعای پایتەختی یەمەن و چەند ناوچەیەکی تر.
وەزارەتی خوێندنی باڵای و توێژینەوەی زانستی هەرێم رایگەیاند، لە کۆی 1308 خوێندکاری کەرکوک وناوچەکانی دەرەوەی ئیدارەی هەرێم 878 خوێندکار ناویان هاتوەتەوە.
وەزارەتی خوێندنی باڵای هەرێم دەڵێت؛ 427 دەرچوو بەهۆی هەڵەی پڕکردنەوەی فۆڕمەوە ناویان نەگەڕاوەتەوە.
ئاماژەی بەوەشکردوە، ئەو دەرچوانە لە رۆژی 25 تا 29ـی 10 لە رێگەى سیستمى زانکۆلاین دەتوانن بەشێکى تر هەڵبژێرن، کە لەگەڵ کۆنمرەکانیان بگونجێت و ناویان دەگەڕێتەوە.
وەزارەتی خویندنی باڵا راشیگەیاندوە، لە ئەمڕۆوە لە رگەى سیستمى زانکۆلاین پرۆسەى شوێن گۆرین لە نێوان بەش و کۆلێژەکان ئەنجام دەدرێت و وەرگیراوان دەتوانن شوێنێک هەڵبژێرن، کە کۆنمرەکانیان لێى وەرگیراوە
وەفدێکی باڵای عیراق سەردانی هەرێم دەکات و بەمەبەستی هەماهەنگیی زیاتر و گەیشتن بە لێکتێگەیشتن لەسەر دۆسییەکانی نەوت و بودجە لەگەڵ سەرۆکی حکومەت و وەفدی باڵای هەرێم کۆدەبنەوە.
فەرمانەگی میدیا و زانیاری هەرێم رایگەیاند، شاندێکی باڵای حکومەتی فیدڕاڵ بە سەرۆکایەتیی موحسین مەندەلاوی، جێگری سەرۆک وەزیران بۆ کاروباری وزە و بە ئەندامیەتیی باسم محەمەد، وەزیری نەوت و عەلی سەعد، وەزیری کارەبا، سەردانی هەرێمی کوردستان دەکەن.
ئاماژە بەوەکردوە وەفدەکە، کە سەرۆکی دەستەی راوێژکاران، بریکارانی وەزارەتی دارایی و نەوت و چەندین لێپرسراوای تر لە خۆدەگرێت لە زاخۆ لەگەڵ سەرۆکی حکومەت کۆدەبنەوە.
فەرمانەگی میدیا و زانیاری دەڵێت؛ بڕیارە دواتر وەفدە فیدڕاڵییەکە لەگەڵ وەفدی دانوستانکاری هەرێم کۆببێتەوە، کە پێکهاتوون لە محەمەد کەمال، وەزیری سامانە سروشتییەکان بەوەکالەت، دکتۆر ئومێد سەباح، سەرۆکی دیوانی ئەنجومەنی وەزیران چەند لێپرسراوێکی تری وەزارەتی دارایی، بە ئامانجی دروستکردنی هەماهەنگیی زیاتر و گەیشتن بە لێکتێگەیشتن لەسەر دۆسیە هاوبەشەکانی نێوان هەردوو حکومەت.
پۆلیسی ئاکرێ رایگەیاند، تۆمەتباری کوژرانی دوو براکەی ئاکرێ خۆی رادەستی پۆلیس کرد و سێ تۆمەتباری تریش لە روداوەکەدا بەشدارن.
دڵبرین غازی، پەیامنێری کوردسات نیوز، لە سەرچاوەیەک لە پۆلیسی ئاکرێوە رایگەیاند، دوای چوار رۆژ تۆمەتباری بکوژی دوو براکەی ئاکرێ خۆی رادەستی پۆلیس کرد
ئەمڕۆ یەکشەممە، سەرچاوەیەک لە پۆلیس ئاکرێ بە کوردسات نیوزی راگەیاند، تۆمەتبارەکە خۆی رادەست کردوە و دواتریش تۆمەتبارەکە ڤیدیۆیەکی خۆی بڵاوکردوەتەوە و دەڵێت؛ ناچاربوە ئەو کارەبکات و تێیدا داوای لێبوەردنیش دەکات.
دوای روداوەکە و لە هەمان شەودا، هێزەکانی پۆلیس توانییان سێ تۆمەتبار دەستگیر بکەن، کە لە روداوەکەدا بەشدار بوون ، کە دوو کوڕ و برایەکی تۆمەتباری سەرەکیی روداوەکەن.
رۆژی پێنجشەممەی رابردوو 22ـی10ـی2026 لە بەردەم پارکی ئاکرێ کەسێک تەقەی لە سێ برا کرد، دوانیانی کوشت و یەکیان بریندار بوو، دوای چەند جارێک لە هەوڵەکانی هێزە ئەمنییەکان بۆ دەستگیرکردنی سەرکەوتوو نەبوون وئەمڕۆ خۆی رادەستی پۆلیس کرد.
دەستەی دەستپاكی عیراق فەرمانی گرتنی بۆ لێپرسراوێكی پێشوو لە پارێزگای سەڵاحەدین دەركرد بە تۆمەتی دەستبەسەرداگرتنی بڕی سێ ملیار دیناری سوتەمەنی مۆلیدە.
دەستەی دەستپاكی ئاشكرای كردووە لێپرسراوێكی پێشووی بەشی ژمێریاری پارێزگای سەلاحەدین دەستی بەسەر نزیكەی 3 ملیار دیناری تەرخانكراو بۆ سووتەمەنیی موەلیدەی فەرمانگەكاندا گرتووە بە بیانوی ئەوەی لە لایەن پارێزگارەوە دەسەڵاتی پێدراوە، دادوەری لێكۆڵینەوەش بەپێی ماددەی 316ی یاسای سزادان فەرمانی دەستگیركردنی بۆ دەركردووە.
لە دۆسیەیەكی جیاوازیشدا لە هەمان پارێزگا، دەستەكە بەهەدەردانی سامانی گشتی لە بەڕێوەبەرایەتیی تەندروستی ئاشكرا كرد، بەهۆی دابینكردنی كۆمەڵێك ئامێری پزیشكی بۆ نەخۆشخانەی خورماتوو بێ ئەوەی پێویستیان پێیان بێت.
ئامێرەكانیش بە دەستلێنەدراوی بەجێهێڵدراون و مەترسیی تێكچونیان لەسەرە، لە ئێستادا رێكارە دادوەرییەكان بۆ لێپێچینەوە لە كەمتەرخەمان دەستیپێكردووە.
عەباس عراقچی رایگەیاند، هۆکاری ناسەقامگیری ناوچەکە بونی پێگە سەربازییەکانی ئەمریکان وئەو وڵاتانەی پێگەی سەربازی ئەمریکایان لێیە، نەک پارێزراو نەبوون، بونەتە بەشێک لە جەنگەکەش.
عەباس عراقچی، وەزیری دەرەوەی ئێران، لە میانی رێوڕەسمی کردنەوەی ناوەندی بەڵگەنامە و مۆزەخانەی شەهید خەرازی، رایگەیاند کە ستراتیژی بنەڕەتیی کۆماری ئیسلامیی ئێران بەرانبەر ناوچەکە لەسەر بنەمای ئاسایشی ناوخۆیی و رەتکردنەوەی دەستێوەردانی دەرەکی بە نەگۆڕی ماوەتەوە.
وەزیری دەرەوەی ئێران رایەگیاند، لەم رۆژانەدا زۆر باسی دەستپێکردنەوەی جەنگ دەکرێت؛ جەنگ ببێت یان نا سیاسەتەکانیان ناگۆڕن.
عراقچی دەڵێت؛ ئەم گرژیانەی رابوردوو بە بەتایبەت "جەنگی 40 رۆژەی رەمەزان"، خاڵێکی وەرچەرخانە لە مێژوی ناوچەکە و پێکهاتە ئاسایشییەکانی پێشوی گۆڕیوە.
وەزیری دەرەوەی ئێران ئاماژەی بەوەش کرد، ئەزمونی مەیدانی جەنگ سەلماندی پشت بەستن بە هێزە دەرەکییەکان بونی پێگە سەربازییەکانی ئەمریکا لە وڵآتانی ناوچەکە، نەک هەر ئاسایشی بۆ ئەو وڵاتانە دابین نەکردووە، بەڵکو بەهۆی بەشدارییان لە کاردانەوەکان دژی ئێران و وەرگرتنی وەڵامی توند لەلایە تارانەوە، خۆیان بونەتە قوربانی.