هەواڵەکان
خاتوو شاناز ئیبراهیم ئەحمەد پەیامێکی بۆ ساڵیادی دامەزراندنی یەکێتی بڵاوکردەوە
شاناز ئیبراهیم ئەحمەد، لە 51 ساڵیادی دامەزراندنی یەکێتیی نیشتمانیی کوردستان پەیامێکی بڵاوکردەوە و تێیدا هاتووە؛ پیرۆزبایی یادی 51 ساڵەی دامەزراندنی یەکێتی لە هەموو ئەو ئازیزانە ئەکەم، کە لە شەوەزەنگا بە دامەزراندنی یەکێتی بوونە تروسکایی ئومێد بۆ گەلە بەشمەینەتەکەمان.
ئاماژەی بەوەشکرد، هیوادارم یەکێتیەکەی ئەمڕۆ خوێن و رەنجی پەنجا و یەک ساڵەی شەهیدان و کەسوکارە سەربەرزەکانیان و شۆڕشگێران و زیندانیانی سیاسی و شەهیدانی زیندوو و پێشمەرگە و رێکخستنە دێرینەکان و ژنانی ماندوو و کادیر و ئەندامانی بە ئەمەکی خۆی لەیاد نەکات.
دەقی پەیامەکەی شاناز ئیبراهیم ئەحمەد؛
پیرۆزبایی یادی ٥١ ساڵەی دامەزراندنی یەکێتی لە هەموو ئەو ئازیزانە ئەکەم کە لە شەوەزەنگا بە دامەزراندنی یەکێتی بوونە تروسکایی ئومێد بۆ گەلە بەشمەینەتەکەمان، ئەوانەی یەکێتیان گەیاندە لوتکە، ئەوانەی لە ئاشتیا کۆتری سپی و شنەی با بوون و ئەوانەی لە شەڕیشدا پڵنگ و رەشەبا، ئەوانەی کە بە فیداکاری و چاونەترسی و قوربانیدان و خوێن یەکێتیان کردە حزبی شەهیدان، ئەوانەی کە لەتە نان و خانووە قوڕەکانیان پێشکەش بە پێشمەرگەکانی یەکێتی کرد ئەوانەی لە ژێر ئەشکەنجەدا ورتەیان نەکرد، ئەوانەی ئەو مێژووە پڕ سەروەرییەیان بۆ یەکێتی تۆمار کرد…
هیوادارم یەکێتیەکەی ئەمڕۆ خوێن و رەنجی پەنجا و یەک ساڵەی شەهیدان و کەسوکارە سەربەرزەکانیان و شۆڕشگێران و زیندانیانی سیاسی و شەهیدانی زیندوو و پێشمەرگە و رێکخستنە دێرینەکان و ژنانی ماندوو و کادیر و ئەندامانی بە ئەمەکی خۆی لەیاد نەکات، هیوادارم کە بیرێکی جدی لە کارا کردنەوەی ئەو پەرلەمان و حکومەتە بکاتەوە کە بە خوێنی هەزاران شەهیدی یەکێتی هاتە ئاراوە، هیوادارم رەنجی پەنجاو یەک ساڵەمان بەبادا نەبات و لە ئاست خواست و داواکاری و چاوەڕوانی خۆم و خەڵکە چاوەڕوانەکەیدا بێت و رێز لە مێژووە پڕ سەروەرییەکەی حزبەکەی بگرێت ..
شاناز ئیبراهیم ئەحمەد
محەمەد حەلبووسی، سەرۆکی حزبی تەقەدوم، لە رێگەی بروسکەیەکی رەسمییەوە پیرۆزبایی ئاراستەی بافڵ جەلال تاڵەبانی، سەرۆکی یەکێتیی نیشتمانیی کوردستان و سەرکردایەتی و کادیر و جەماوەری حزبەکە کرد بەبۆنەی 51مین ساڵیادی دامەزراندنی یەکێتییەوە.
حەلبووسی لە پەیامەکەیدا خۆشحاڵی خۆی بە پێشکەشکردنی گەرمترین پیرۆزبایی دەربڕیوە و هیوای سەرکەوتنی بۆ خواستن لە بەردەوامبوونی کاروانی خەباتیاندا، بە شێوازێک کە خزمەت بە عیراق و بە تایبەتی گەلی کورد بکات.
بە بۆنەی 51 ساڵەی دامەزراندنی یەکێتیی نیشتمانیی کوردستانەوە، هاوسەرۆکایەتی کۆنسەی بەڕێوەبەریی کۆما جڤاکێن کوردستان (کەجەکە) پەیامێکی پیرۆزبایی بڵاوکردەوە و تێیدا هاتووە؛ یەکێتیی نیشتیمانیی کوردستان بە هەڵگرساندنی شۆڕشی نوێ و سەرلەنوێ دەستپێکردنەوەی تێکۆشان و خۆڕاگری دژی رژێمی فاشیستی بەعس جارێکی دی بوو بە تروسکەی هیوا بۆ کۆمەڵانی خەڵکی کوردستان.
کەجەکە ئەماژەی بەوەشکردوە، یەکێتی بە پێشەنگایەتی سەرۆک مام جەلال تاڵەبانی، لە هاوکاری و پشتیوانی بۆ خەبات و تێکۆشان لە بەشەکانی تری کوردستان و هەروەها هەوڵدان بۆ چارەسەرکردنی ئاشتییانەی پرسی کورد لەم بەشانەدا خاوەن رۆڵ و کاریگەریی بووە
دەقی پەیامەکەی کەجەکە
"بەڕێز/ بافڵ جەلال تاڵەبانی، سەرۆکی یەکێتیی نیشتیمانیی کوردستان
بەڕێزان/ ئەندامانی مەکتەبی سیاسی و ئەنجوومەنی باڵای سیاسی
بە بۆنەی ٥١ـەمین ساڵرۆژی دامەزراندنی یەکێتیی نیشتیمانی کوردستان پیرۆزبایی گەرمی خۆمان ئاراستەی ئێوەی بەڕێز، هەموو کادیر و ئەندامان و لایەنگرانی یەکێتی دەکەین و هیوای تەندروستی و سەرکەوتنتان بۆ دەخوازین.
بەڕێزان،
دامەزراندنی یەکێتیی نیشتیمانیی کوردستان خاوەن گرنگییەکی مێژووییە. لە کاتێکدا کە بێهیوایی باڵی بە سەر باشووری کوردستاندا کشاندبوو، یەکێتیی نیشتیمانیی کوردستان بە هەڵگرساندنی شۆڕشی نوێ و سەرلەنوێ دەستپێکردنەوەی تێکۆشان و خۆڕاگری دژی ڕژێمی فاشیستی بەعس جارێکی دی بوو بە تروسکەی هیوا بۆ کۆمەڵانی خەڵکی کوردستان. لەو سەردەمەوە تا ئێستا یەکێتیی نیشتیمانیی کوردستان ڕۆڵێکی گرنگی بینیوە لە مسۆگەرکردنی دەسکەوتە نەتەوەیی و دیموکراتییەکان لە باشووری کوردستاندا. هەروەها یەکێتیی نیشتیمانیی کوردستان، بە پێشەنگایەتی سەرۆک مام جەلال تاڵەبانی، لە هاوکاری و پشتیوانی بۆ خەبات و تێکۆشان لە بەشەکانی تری کوردستان و هەروەها هەوڵدان بۆ چارەسەرکردنی ئاشتییانەی پرسی کورد لەم بەشانەدا خاوەن ڕۆڵ و کاریگەریی بووە. پەیوەندی هاوڕێتی و دۆستایەتی لە نێوان سەرۆک مام جەلال، ڕێبەر ئاپۆ و مامۆستا ئیبراهیم ئەحمەد سەلمێنەری ئەم ڕاستییەیە. ئەم پەیوەندییە لە هەمانکاتدا، هەوێن و بزوێنەری یەکێتی نەتەویی و دیمۆکراتییە لە نێوان کوردی هەر چوار بەشی کوردستان. لەو بڕوایەداین کە وەک وەفادارییەک بۆ ئەم میراتە مێژووییە پێویست دەکات زیاتر گوڕ بە خەبات و تێکۆشان بدەین لە پێناو مسۆگەرکردنی یەکێتیی نەتەوەیی و دیموکراتی کورد بە بەشداری هەموو هێز و لایەنە سیاسییەکانی سەرتاسەری کوردستان.
جارێکی دی ئەم یادە مەزنە لە ئێوەی بەڕێز، خانەوادەی شەهیدە سەربەرزەکان و هەموو گەلی کوردستان پیرۆز دەکەین، سەری ڕێز و نەوازش بۆ شەهیدان دادەنەوێنین و هیواخوازین سەرکەوتوو و سەرفراز بن".
محەمەد باقر قالیباف، سەرۆکی پەرلەمانی ئێران لەسەر پەرەسەندنی جەنگی ئیسرائیل دژی لوبنان هاتە دەنگ و رایگەیاند: هەموو هەڵبژاردنێک باجی خۆی هەیە، و بە دڵنیاییەوە باجەکە دەدرێت.
قالیباف لە پۆستێکدا لە تۆڕی کۆمەڵایەتی "ئێکس" ئاماژەی بەوە کردووە: گەمارۆی دەریایی و پەرەسەندنی تاوانەکانی جەنگ کە لەلایەن ئیسرائیلەوە لە لوبنان ئەنجام دەدرێن، بەڵگەیەکی حاشاهەڵنەگرن لەسەر پابەندنەبوونی ویلایەتە یەکگرتووەکانی ئەمریکا بە ئاگربرست لە ناوچەکەدا.
قالیباف جەختیشی لەوە کردەوە کە: هەموو هەڵبژاردنێک باجی خۆی هەیە و بە دڵنیاییەوە حساباتەکە یەکلا دەکرێتەوە، هاوکات دووپاتی کردەوە کە: لە کۆتاییدا هەموو شتێک رون دەبێتەوە.
لە ساڵیادی دامەزراندنی یەكێتیی نیشتمانیی كوردستاندا سەرۆكی بزوتنەوەی بابلیون ، جەخت لەگرنگی رۆڵ و پێگەی سەرۆك مام جەلال و بەردەوامییدان بە رێبازە نیشتمانییەكەی دەكاتەوە و ستایشی رۆلی سەرۆك بافڵیش دەكات.
رەیان كلدانی سەرۆكی بزوتنەوەی بابلیون لەپەیامێكدا رایگەیاند: بە بۆنەیەوە51 مین ساڵیادی دامەزراندنی یەكێتیی نیشتمانیی كوردستاندا، بە پێزانینێكی زۆرەوە یادی سەركردەی كۆچكردوو، مام جەلال تاڵەبانی بەرز رادەگرین، كە هەمیشە بڕوای وابوو هێزی نیشتمان بە گفتوگۆ، هاوبەشی و رێزگرتن لە فرەیی و جیاوازییەكانەوە بنیاد دەنرێت، هاوكات لەم یادەدا، ستایشی هەوڵەكانی بافڵ تاڵەبانی دەكەین لە بەردەوامیدان بەو رێڕەوە نیشتمانییە و كاركردنی بەردەوامی لەپێناو بەهێزكردنی سەقامگیری و لێكتێگەیشتن لە نێوان سەرجەم پێكهاتە جیاوازەكانی عیراقدا.
لە كۆتاییدا، گەرمترین پیرۆزبایی ئاڕاستەی سەركردایەتی و جەماوەری یەكێتیی نیشتمانیی كوردستان دەكەن، بەو هیوایەی هەمیشە لە سەركەوتندا بن بۆ خزمەتكردنی زیاتری عیراق و گەلەكەی.
سەرۆکی رەوتی حیکمەی نیشتمانی، عەممار حەکیم، بەبۆنەی 51مین ساڵیادی دامەزراندنی یەکێتیی نیشتمانیی کوردستانەوە، پەیامێکی پیرۆزبایی ئاراستەی سەرکردایەتی ئەو حزبە و لە سەرووشیانەوە بافڵ جەلال تاڵەبانی کرد.
حەکیم لە پەیامەکەیدا رایگەیاند: پیرۆزبایی لە سەرکردایەتی یەکێتیی نیشتمانیی کوردستان و لە پێشەنگیاندا برا بەڕێز بافڵ تاڵەبانی دەکەم، بەبۆنەی 51مین ساڵیادی دامەزراندنی یەکێتییەوە.
سەرۆکی رەوتی حیکمە وتیشی: لەم بۆنەیەدا، بە ڕێز و شکۆوە مێژووی پڕ لە سەروەریی سەرکردە و دامەزرێنەری کۆچکردوو مام جەلال تاڵەبانی (ڕەحمەتی خوای لێبێت) بەبیردەهێنمەوە، کە رۆڵی هەبوو لە چەسپاندنی رێبازێکی نیشتمانیی لەسەر بنەمای فرەیی و دیموکراسی.
عەممار حەکیم لە کۆتایی پەیامەکەیدا جەختی لەوە کردەوە: ئەم یادە وێستگەیەکی گرنگە لە مێژووی ئەم رێکخراوە دێرینەدا کە بەردەوامە لە خزمەتکردنی نیشتمان و داکۆکیکردن لە پرەنسیپەکانی ئازادی و دادپەروەری، و کارکردن لەگەڵ هێزە نیشتمانییە جیاوازەکان بۆ بەهێزکردنی سەقامگیری و چەسپاندنی ئەزموونی دیموکراسی لە عیراقدا.
پاشان داوای سەرکەوتنی بەردەوامی بۆ یەکێتی و سەرجەم هێزە نیشتمانییەکان کرد لەپێناو خێری وڵات و هاووڵاتییاندا.
وەزیری دەرەوەی ئێران رایگەیاند،گۆڕینەوەی پەیام لە نێوان تاران و واشنتۆن بەردەوامە، ئەو شتانەی دەگوترێن پێشبینین و نابێت گرنگییان پێ بدرێت.
عەباس عراقچی، وەزیری دەرەوەی ئێران، لە رونكردنەوەیەكدا سەبارەت بە دواین پێشهاتەكانی هەوڵە دیپلۆماسییەكان بۆ كۆتاییهێنان بە جەنگ رایگەیاند، گفتوگۆ و گۆڕینەوەی نامەكان لەگەڵ ئەمریكا هێشتا بەردەوامە، و ناتوانرێت هیچ بڕیارێكیان لەسەر بدرێت تا ئەو كاتەی دەگەنە ئەنجامێكی رون و دیاریكراو.
جەختی لەوەشكردەوە، هەر شتێك لە ئێستادا دەگوترێت تەنها پێشبینییە، و نابێت گرنگی پێ بدرێت تا ئەو كاتەی بابەتەكان بە تەواوی رون دەبنەوە.
لە لای خۆیەوە سەرۆكی ئەمریكاش رایگەیاند، رێككەوتنی ئێران مەرجی رونی تێدایە كە رێگری لێدەكات ببێتە خاوەنی چەكی ئەتۆمی، هەروەها راشیگەیاندوە، رێككەوتنەكە وردەكاری درێژخایەن و بەهێز لەسەر لایەنە ئەتۆمییەكانی دیكەش لەخۆدەگرێت.
وەزارەتی پێشمەرگەی حکومەتی هەرێمی کوردستان رایگەیاند کە هاوکاریی دارایی هێزەکانی هاوپەیمانان بۆ مانگی نیسان (4)ی ساڵی 2026، خراوەتە سەر هەژماری وەزارەتەکە و وادەی دابەشکردنەکەشی دیاریکرا.
بەپێی راگەیەندراوێکی رەسمی وەزارەتی پێشمەرگە، لە ئێستادا بەڕێوەبەرایەتی گشتیی بوودجە و بەرنامەکان (ژمێریاریی سەربازی) سەرقاڵی ئەنجامدانی رێکارە دارایی و ژمێریارییە پێویستەکانە بە مەبەستی ئامادەکردنی تێچووی هاوکارییەکە بۆ دابەشکردن.
وەزارەتی پێشمەرگە ئاماژەی بەوەش کردووە، بۆ ئەم مەبەستە رۆژی پێنجشەممە، رێکەوتی 4ی حوزەیرانی 2026، بە رەسمی دەست بە دابەشکردنی هاوکارییە داراییەکە بەسەر هێزەکانی پێشمەرگەدا دەکرێت.
وەزارەتی ئەوقافی هەرێم رایگەیاند، بەرەبەیانی ئەمڕۆ لە مەدینە یەکەم حاجی کورد بە ناوی (ئەحمەد محەمەد سەعید نوری بریفکانی) دوای بەجێگەیاندنی فەریزەی حەج گیانی لەدەستدا
ئەمڕۆ دووشەممە، وەزارەتی ئەوقاف بڵاویکردەوە، بەرەبەیانی ئەمرۆ لە شاری مەدینە یەکەم حاجی هەرێمی کوردستان گیانی لەدەستداوە.
ئەوقافی هەرێم ئاماژەی بەوەشکردوە، حاجییەکە خەڵکی پارێزگای دهۆکە و لە دایکبووی ساڵی 1945.
لە راگەیەندراوەکەی ئەوقافدا هاتووە؛ لەسەر رەزامەندی کەسوکاری حاجییەکە لە شاری مەدینە بەخاک دەسپێردرێت و ناهێندرێتەوە بۆ هەرێم.
بنیامین نەتانیاهۆ، سەرۆک وەزیرانی ئیسرائیل رایگەیاند کە فەرمانی بە سوپا کردووە بۆ بەئامانجگرتنی چەند پێگەیەک لە باشووری بەیرووت.
نەتانیاهۆ ئەمڕۆ دووشەممە، لە بەیاننامەیەکی هاوبەشدا لەگەڵ یسرائیل کاتس، وەزیری بەرگری ئاماژەی بەوە کرد: لە دوای پێشێلکارییە بەردەوامەکانی ئاگربرست لەلایەن حزبوڵاوە، ئەو و وەزیری بەرگری رێنماییان داوەتە سوپای ئیسرائیل بۆ هێرشکردنە سەر ئامانجەکانی سەر بە حزبوڵا لە باشووری بەیروت.
لەلایەکی ترەوە، سەرچاوە ئاگادارەکانی ئیسرائیل ئاشکرایان کردووە کە فەرمانەکانی نەتانیاهۆ بە هەماهەنگی لەگەڵ ئەمریکا بووە، وەک ئەوەی کەناڵی 14ی ئیسرائیلی گواستوویەتییەوە.
شایانی باسە، لە سەرەتای مانگی نیسانی رابردووەوە، ئیسرائیل دوو جار هێرشی کردووەتە سەر باشوری بەیروت، ئەمەش بەهۆی ێگرییەکانی پێشووی ئەمریکا و بۆ ەخساندنی دەرفەت لەبەردەم گفتوگۆکانی ئاگربەست و هێورکردنەوەی دۆخەکە.
سەرۆکی هەرێمی کوردستان بەبۆنەی 51 ساڵەی دامەزراندنی یەکێتیی نیشتمانیی کوردستانەوە، پەیامێکی پیرۆزبایی بڵاوکردەوە و دەڵێت؛ یەکێتی كه مێژوويهكى درێژى خهباتى لهپێناو مافهكانى گهلى كوردستاندا ههيه و لهم رێگهيهدا به ههزاران شههيدى داوه، هەمیشە خاوەن پێگەیەکی گرنگ و کاریگەر بووە لە پرۆسەی سیاسیی هەرێمی کوردستان و عیراقدا.
ئاماژەی بەوەشکردوە، هیواخوازم ئەم بۆنەیە ببێتە دەرفەتێکی نوێ بۆ بەهێزکردنی یەکڕیزیی نیشتمانی و باڵادەستکردنی زمانی گفتوگۆ و لێکگەیشتن لەپێناو چارهسهركردنى كێشهكان، سەقامگیری، گەشەپێدان و داهاتوویەکی باشتر و شایستە بۆ گەلی کوردستان.
دەقی پەیەماکەی سەرۆکی هەرێم
بهڕێز بافڵ جهلال تاڵهبانى
سهرۆكى يهكێتيى نيشتمانيى كوردستان
سڵاو و ڕێز..
له ساڵیادی دامەزراندنی یەکێتیی نیشتمانیی کوردستاندا، به گهرمى پيرۆزبايى لە بەڕێزتان و سەرکردایەتی و ئەندامان و تەواوی جەماوەری یەکێتیی نیشتمانیی کوردستان دەکەم و هیوای سەرکەوتنتان بۆ دەخوازم. لەم یادەدا پێگەی مێژوویی و خهبات و تێکۆشانی خوالێخۆشبوو سەرۆک مام جەلال بەرز دەنرخێنین و به ڕێزهوه يادى دهكهينهوه.
یەکێتی كه مێژوويهكى درێژى خهباتى لهپێناو مافهكانى گهلى كوردستاندا ههيه و لهم ڕێگهيهدا به ههزاران شههيدى داوه، هەمیشە خاوەن پێگەیەکی گرنگ و کاریگەر بووە لە پرۆسەی سیاسیی هەرێمی کوردستان و عێراقدا. لەم یادەدا دووپاتی دەکەینەوە كه زیاتر لە ههموو كاتێك بەرپرسیاريهتیی هاوبەش، تەبایی و کاری پێکەوەیی لەنێوان سەرجەم هێز و لایەنە سیاسییەکاندا پێويسته، تا پێکەوە بتوانین پارێزگاری لە قەوارەی دەستووریی هەرێمی کوردستان و مافەکانی گەلى كوردستان بکەین.
هیواخوازم ئەم بۆنەیە ببێتە دەرفەتێکی نوێ بۆ بەهێزکردنی یەکڕیزیی نیشتمانی و باڵادەستکردنی زمانی گفتوگۆ و لێکگەیشتن لەپێناو چارهسهركردنى كێشهكان، سەقامگیری، گەشەپێدان و داهاتوویەکی باشتر و شایستە بۆ گەلی کوردستان.
نێچیرڤان بارزانی
سەرۆکی هەرێمی کوردستان
2026/6/1
دۆناڵد ترەمپ، سەرۆکی ئەمریکا رایگەیاند کە ئێران بە راستی دەیەوێت رێککەوتنێک واژۆ بکات، و ئاماژەی بەوەش کرد کە ئەم رێککەوتنە بۆ ویلایەتە یەکگرتووەکانی ئەمریکا و هاوپەیمانەکانی باش دەبێت.
ترەمپ لە پۆستێکدا لە تۆڕی کۆمەڵایەتی "ترووس سۆشیاڵ" ئاماژەی بەوە کردووە، کە ئەو دەپرسێت ئایا دیموکراتەکان و هەندێک لە کۆمارییەکان "کە وەک کەسانی نانیشتمانی دەردەکەون" درک بەوە دەکەن کە بەردەوامبوونی "چیڕەچیڕ و گازندە"ی نەرێنی لەلایەن چەتە سیاسییەکانەوە بە ئاستێکی بێپێشینە، کارەکانی ئەو قورس دەکات بۆ ئەوەی ئەرکەکانی جێبەجێ بکات و بە شێوازێکی دروست گفتوگۆ بکات.
ترەمپ رونکردنەوەی داوە کە ئەم رەخنە بەردەوامانە پەیوەندییان بە خێرایی جووڵەکانیەوە هەیە، جا چ خێرا بن یان خاو، و هەڵوێستەکانی سەبارەت بە جەنگ یان خۆدوورخستنەوە لێی و بابەتەکانی دیکە.
لە کۆتایی لێدوانەکانیدا وتی: تەنها دانیشن و ئارام بگرن، چونکە لە کۆتاییدا هەموو شتێک بە باشی کۆتایی دێت وەک هەمیشە کە رودەدات.
بە وتەی لێپرسراوانی ئەمریكا، فەرماندەیی ناوەندیی هێزەكانی وڵاتەكە هەماهەنگی كردووە بۆ تێپەڕبوونی 70 كەشتی بە گەروی هورمزدا.
رۆژنامەی نیویۆرك تایمز لە زاری لێپرسراوانی ئەمریكی بڵاویكردووەتەوە، فەرماندەیی ناوەندی ئەمریكا "سێنتكۆم" لە ماوەی سێ هەفتەی رابردوودا تێپەڕبوونی بۆ 70 كەشتی بە گەروی هورمزدا رێكخستووە و هێزەكانی ئەمریكاش بۆ تێپەڕینی كەشتییە بازرگانییەكان هاوكار بوون.
ئەوەش لەكاتێكدایە دانوستانەكانی ئەمریكا و ئێران لەڕێی نێوەندگیرانەوە بۆ گەیشتن بە رێككەوتنی كۆتاییهێنان بە جەنگ بەردەوامە، باس لەوەش دەكرێت سەرۆكی ئەمریكا پێشنیازێكی زۆر توندی ئاڕاستەی ئێران كردووە، كە ئەوەش ماوەی دانوستانەكان درێژ دەكاتەوە.
بەبۆنەی 51 ساڵەی دامەزراندنی یەکێتیی نیشتیمانیی کوردستانەوە قوباد تاڵەبانی پەیامێکی پیرۆزبایی بڵاوکردوەتەوە و دەڵێت؛ ئێستا هەمووان بوونی یەکێتی لە بەغداد وەک گەرەنتییەک بۆ پاراستنی مافەکانی کورد و چارەسەرکردنی کێشەکانی هەموو عیراق دەبینن.
ئاماژەی بەوەشکردوە، وەک پێشتر بەڵێنمان داوە و ئێستاش دووپاتی دەکەینەوە، خزمەتکاری خەڵکی کوردستان دەبین. بەرژەوەندی و خواستی چین و توێژەکانی خەڵکی کوردستان، بەرژەوەندی و خواست و هەڵوێستی یەکێتیی نیشتمانیی کوردستانە.
دەقی پەیامەکەی قوباد تاڵەبانی
ساڵی 1975 دوای ئەو تاڵاوی شکست و تەمی بێ هیواییەی باڵی سەر کوردستاندا کێشابوو، یەکێتیی نیشتمانیی کوردستان چەندە پێویست بوو بۆ گەڕاندنەوەی ورە و هیوا و بۆ رێکخستنەوەی خەڵک و جۆشدانەوەی خەباتی مافخوازانە و رزگاریخوازانەی خەڵکی کوردستان، ئێستاش دوای 51 ساڵ، بە هەمان ئەندازە یەکێتی پێویستە بۆ پاراستنی دەستکەوتەکان و چارەسەرکردنی کێشەکان و دابینکردنی مافە دەستوورییەکانی خەڵکی کوردستان.
بۆ؟
چوونکە یەکێتی لە بەغدا و لەسەر ئاستی نێودەوڵەتیشدا ئەو هێزەیە هەمووان بە رێزەوە حیساب بۆ هەڵوێست و سیاسەتەکانی دەکەن. هاوپەیمانی بەهێزی هەیە و بە سیاسەتی ژیرانە و حەکیمانە لە قورسترین قەیرانەکاندا و سەخت ترین ساتەوەختەکاندا دەرگا بەڕووی چارەسەردا دەکاتەوە.
ئێستا هەمووان بوونی یەکێتی لە بەغدا وەک گەرەنتییەک بۆ پاراستنی مافەکانی کورد و چارەسەرکردنی کێشەکانی هەموو عێراق دەبینن.
بۆ ناوخۆی کوردستانیش ئاشتی و ئازادی و دیموکراسی و دادپەروەری باوەڕی نەگۆڕی یەکێتییە. ئامانجی یەکێتی لە گەڕاندنەوەی هاوسەنگی هێز بۆ چەسپاندنی دیموکراسی و دادپەروەری و باشترکردنی خزمەتگوزاری و دۆخی ژیانی هاوڵاتییانە بەبێ هیچ جۆرە جیاوازی دانانێک.
هەر لە سۆنگەی باوەڕمان بە دادپەروەری و باشترکردنی ژیانی هاوڵاتییان سیاسەتی یەکێتی لەم قۆناغەدا گرنگیدانە بە گەشەپێدانی هاوسەنگ و بووژانەوەی ئابووریی قەزا و ناحییەکان.
وەک پێشتر بەڵێنمان داوە و ئێستاش دووپاتی دەکەینەوە، خزمەتکاری خەڵکی کوردستان دەبین. بەرژەوەندی و خواستی چین و توێژەکانی خەڵکی کوردستان، بەرژەوەندی و خواست و هەڵوێستی یەکێتیی نیشتمانیی کوردستانە.
لە یادی 51 ساڵەی دامەزراندنی یەکێتیی نیشتمانیی کوردستاندا بە ڕێز و شکۆوە یادی هەموو شەهیدانی یەکێتی دەکەینەوە و سڵاو دەنێرین بۆ سەرۆک مام جەلال و ئەندامانی دەستەی دامەزرێنەر و هەموو ئەو هەڤاڵ و ئازیزانەی بە خەبات و تێکۆشانی یەکێتییەوە ماندووبوون.
هەروەها پیرۆزباییەکی گەرم لە هەموو هەڤاڵان و جەماوەری دڵسۆزی و کەسوکاری سەربەرزی شەهیدانی یەکێتی دەکەین. دڵنیاین یەکێتی بە پشتیوانی و بە خەمخۆری جەماوەرەکەی هەر دەمێنێت و هەر گەشە دەکات و هەر وەک هێزی جێی هیوا و متمانەی خەڵکی کوردستان دەمێنێتەوە.
سەرلەبەیانی ئەمڕۆ دووشەممە، فەرماندەیی ناوەندیی سوپای ئەمریکا (سێنتکۆم) رایگەیاند، کە هێزەکانیان لە ماوەی دوو رۆژی رابردوودا زنجیرەیەک هێرشی ئامانجداریان وەک بەرگریکردن لە خۆیان دژی چەند پێگەیەکی سەربازیی ئێران ئەنجامداوە.
بە گوێرەی راگەیەندراوەکە، هێرشەکان شوێنەکانی رادار و ناوەندەکانی فەرماندەیی و کۆنترۆڵکردنیان لە شاری 'گرۆگ' و 'دورگەی قشم' کردووەتە ئامانج، ئەمەش وەک وەڵامێکی خێرا بۆ کردەوە شەڕانگێزەکانی ئەم دواییەی ئێران.
بەگوێرەی راگەیەندراوەکەی سێنتکۆم، ئەم هێرشانەی رۆژانی شەممە و یەکشەممە لە وەڵامی خستنەخوارەوەی فڕۆکەیەکی بێفڕۆکەوانی ئەمریکی لە جۆری MQ-1 بووە لەلایەن ئێرانەوە، کە لەو کاتەدا لەسەر ئاوە نێودەوڵەتییەکاندا کاری دەکرد.
لە بەرپەرچدانەوەیەکی خێرادا، فڕۆکە جەنگییەکانی ئەمریکا توانیویانە سیستمی بەرگریی ئاسمانی ئێران، وێستگەیەکی کۆنترۆڵکردنی زەمینی و دوو فڕۆکەی بێفڕۆکەوانی هێرشبەری تاکلایەنە تێکبشکێنن، کە مەترسییەکی ئاشکرایان بۆ سەر کەشتییە ئاوییەکانی ناوچەکە دروستکردبوو.
فەرماندەیی ناوەندیی ئەمریکا جەختی لەوە کردووەتەوە کە لەم ئۆپراسیۆنانەدا هیچ ئەندامێکی خزمەتگوزاری هێزەکانی ئەمریکا بریندار نەبووە.
سێنتکۆم،هۆشداریشیداوە، کە سەرەڕای بوونی ئاگربەستی ئێستا، لە کاردانەوەی ئێران، واشنتۆن بەردەوام دەبێت لە گرتنەبەری سەرجەم رێوشوێنە پێویستەکان بۆ پاراستنی هێزەکان و بەرژەوەندییەکانی خۆی لە ناوچەکەدا.
دەزگای ئاسایشی هەرێم دەستگیرکردنی دوو بازرگانی ماددەی هۆشبەر و دەست بەسەرداگرتنی 35 کیلۆ و 38 گرام ماددەی هۆشبەر لەجۆری کریستاڵی شل راگەیاند.
دەقی بڵاوکراوەکە:
لە رۆژی 25ـی 5ـی 2026، بەڕێوەبەرایەتی ئاسایشی گشتیی سلێمانی/بەڕێوەبەرایەتی نەهێشتنی ماددەهۆشبەرەکان، لە دوای بەدواداچوون و ئەنجامدانی لێکۆڵینەوەی ورد لە چالاکییەدا، توانیان دەستبەسەر بڕی 35 کیلۆ و 38 گرام مادەی هۆشبەر لە جۆری کریستاڵی شل بگرن و دوو بازرگانی مادەی هۆشبەر کە خاوەن رەگەزنامەی بیانین لە سنوری سلێمانی دەستگیربکەن.
لەئێستادا تۆمەتباران بەماددەی 20 لەیاسای ماددە هۆشبەرەکان و کارتێکارە ئەقڵییەکان راگیراون و لێکۆڵینەوە لەدۆسییەکەیان بەردەوامە.