وەزارەتی بەرگریی کۆریای باشوور ڕایگەیاند، کۆریای باکوور موشەکێکی نەناسراوی لە کەناراوەکانی ڕۆژهەڵاتی وڵاتەکەی  تاقیکردوەتەوە، ئەمەش لە کاتێکدایە، هەفەتەیک بەسەر داواکەی سیئۆلدا تێنەپەڕیوە بۆ گەیشتن بە دانوستان.

ئەمڕۆ پێنجشەممە، وەزارەتی بەرگرری کۆریایی باشور رایگەیاند، کۆریای باکور بەردەوامە لەسەر پێشێلکارییەکان و بە موشەکێکی نەناسراو، کە رەنگە بالیستی بێت کەناراوەکانی رۆژهەڵاتی کردوەتە ئامانج.

دوابەدوای کۆریای باشور، وەزارەتی بەرگریی ژاپۆنیش تاقیکردنەوەی موشيکەکەی لەلایەن کۆریای باکورەوە پشتراستکردەوە.

ئەم تاقیکردنەوەی موشەکی بالیستییە لە کاتێکدایە، گرژی و ئاڵۆزییەکانی نێوان هەردوو کۆریاکە،  دوای تەقینەوەی مینی چێندراو لە ناوچەیەکی سنوری کە بووە هۆی برینداربوونی سێ سەربازی کۆریای باشور زیاتر بووە.

لێکۆڵینەوەیەکی هاوبەشی سیئۆل و نەتەوە یەکگرتووەکان لە سەرەتای ئەم مانگەدا گەیشتە ئەو ئەنجامەی کە کۆریای باکور  لەو ناوچانەی لە نێوان هەردوولادایە و چەکیتێدانییە، مینی چاندوە، ئەمەش بووە هۆی توڕەیی لەلایەن پیۆنگ یانگەوە، کە ئەو تۆمەتەیان رەتکردەوە و تا ئێستاش ئاڵۆزییەکانیان نێوانیان وەک خۆیماوەتەوە.

لە ئاستێکی نوێی ئاڵۆزییەکانی نێوان واشنتن و تاران، سەرۆکی ئەمریکا رایگەیاند، بەم زووانە ئێران دەچێتە سەر "لیستی سەرکەوتنەکانی ئەمریکا"، جەختیشی کردەوە، وڵاتەکەی تواناکانی هێزی ئاسمانی و دەریایی ئێرانی تێکشکاندووە.

لە وتارێکدا دۆناڵد ترامپ، سەرۆکی ئەمریکا رایگەیاند، بەهۆی کەمیی کارەباوە، ئێران لە ئێستادا رووبەڕووی ئاستەنگی گەورە بووەتەوە لە دروستکردنی فڕۆکەی بێفڕۆکەوان (دڕۆن)، هەروەها دووپاتیشی کردەوە، واشنتن بە هیچ جۆرێک رێگە نادات تاران ببێتە خاوەنی چەکی ئەتۆمی.

لە لایەکی ترەوە و بەپێی ڕاپۆرتە رۆژنامەوانییەکان، جەی دی ڤانس، جێگری سەرۆکی ئەمریکا نامەیەکی ئاڕاستەی موحسین رەزایی، راوێژکاری موجتەبا خامنەیی کردووە تا تاوتوێی دەستپێکردنەوەی دانوستانەکان بکەن، بە مەبەستی رێگریکردن لە ئەنجامدانی هێرشی سەربازیی نوێی ئەمریکا بۆ سەر ئەو وڵاتە.

هاوکات سەرچاوە ئاگادارەکان ئاماژە بەوە دەکەن، لێپرسراوانی ئەمریکا هۆشدارییان داوەتە وڵاتانی رۆژهەڵاتی ناوەڕاست کە خۆیان بۆ ئەگەری وەشاندنی زەبر و هێرشی سەربازیی نوێ بۆ سەر ئێران ئامادە بکەن.

ئاژانسی تاسی روسی بڵاویکردوەتەوە، ئۆکراین بە  زیاتر لە  600 درۆن هێرشیکردوەتە سەر مۆسکۆ و زۆربەی لەلایەن بەرگریی ئاسمانییەوە تێکشکێندراون.

روسیا  و ئۆکراین بەردەوامن لە هێرشکردنە سەریەکتر،  ئەمڕۆ پێنجشەممە، سەرۆکی شارەوانی مۆسکۆ بە میدیای وڵاتەکەی راگەیاندوە،  بەرگرییە ئاسمانییەکانی روسیا توانیویانە بەرپەرچی هێرشێکی فراوانی ئۆکراین بەنەوە و  613  درۆنیان  خستووەتە خوارەوە و تێکیانشکاندون، کە ئامانجیا مۆسکۆ بووە.

ئاماژەی بەوەشکردوە ئەمە گەورەترین هێرشی ئاسمانییە لە سەرەتای ئەمساڵەوە دەکرێتە سەر مۆسکۆ لەلایەن ئۆکراینەوە.

لە بەرانبەردا، پارێزگاری ناوچەی زاپۆریژژیا لە ئۆکراین رایگەیاندوە،  هێزەکانی روسیا لە 24  سەعاتی رابردودا، 849 هێرشیان کردوەتەوە سەر 44 ناوچەی نیشتەجێبون.

بە سەرپەرشتی قوباد تاڵەبانی و بەمەبەستی ئەنجامدانی ئامادەکاری بۆ بنیاتنانی پڕۆژەی "نەخۆشخانەی هیوای گەورە"، کە بڕیارە بێتە گەورەترین سەنتەری چارەسەرکردنی شێرپەنجە لەسەر ئاستی رۆژهەڵاتی ناوەڕاست وەفدێکی فەرەنسی گەیشتنە شاری سلێمانی. 

نوسینگەی قوباد تاڵەبانی جێگری سەرۆکی ئەنجومەنی وەزیرانی هەرێم رایگەیاند، وەفدێکی فەرەنسی سەردانی سلێمانیان کردوە و پێکەوە لەگەڵ پارێزگای سلێمانی، نوسینگەی جێگری سەرۆکی ئەنجومەنی وەزیران، رێکخراوی گەشەپێدانی مەدەنیەت (CDO) و نەخۆشخانەی هیوا تاوتوێی داڕشتنی پلانێکی تۆکمەیان کردوە بۆ دروستکردنی گەورەترین نەخۆشخانەی شێرپەنجە لە سلێمانی.

ئاماژە بەوەشکراوە، وەفدەکە لە نزیکەوە سەردانی ئەو زەوییەیان کرد لە پارکی هەواری شار کە بۆ پڕۆژەکە تەرخان کراوە، کە بڕیارە  بەپێی بەرزترین ستانداردە جیهانییەکان بونیاد بنرێت.

هاوكات جەخت لە پێشکەشکردنی هەموو ئاسانکارییەکی پێویست کرایەوە بۆ خێراکردنی رێکارە کارگێڕییەکان تا بە زووترین کات بەردی بناغەی پڕۆژەکە دابنرێت، بۆ ئەو مەبەستەش بۆردێکی پشتیوانی لە نێوان لایەنە پەیوەندیدارەکان پێکهێنرا.

لای خۆشیانەوە وەفدە فەرەنسییەکە ستایشی خزمەتگوزارییەکانی نەخۆشخانەی هیوایان کرد و بەڵێنیاندا تەواوی هەوڵەکانیان بۆ دەستپێکردنی خێرای پڕۆژەکە بخەنە گەڕ.

لە میانی سەردانەکەیدا بۆ سوریا، عەلی زەیدی سەرۆک وەزیرانی عیراق، سەردانی مەزارگەی سەیدە زەینەبی کرد و  10 ملیۆن دۆلاری بەخشیی .

ئەمڕۆ چوارشەممە، نوسینگەی سەرۆک وەزیرانی عیراق رایگەیاند،  لە میانی سەردانیکردنی بۆ مەزارگەی سەیدە زەینەب، عەلی زەیدی  لەسەر ئەرکی تایبەتی خۆی 10 ملیۆن دۆلاری بەخشیەوە.

نوسینگەکەی ئاماژەی بەوەکردوە، عەلی زەیدی رێوڕەسمی سەردانیکردن و نوێژکردنی لەناو حەرەمی پیرۆزدا بەجێهێنا و لە نزیکەوە ئاگاداری بەش و شوێنەوارەکانی مەزارگەکە بوو.

هەروەها لەسەر ئەرکی تایبەتی خۆی بڕی 10 ملیۆن دۆلاری بەخشی، کە 5 ملیۆن دۆلاریان بۆ دابینکردنی پێداویستییەکانی مەزارگەی خاتو خاتوو زێنەب و 5 ملیۆن دۆلارەکەی تریش بۆ مزگەوتی گەورەی ئومەوی تەرخان کرا.

نەعیم قاسم، سکرتێری گشتیی حزبوڵای لوبنان رایگەیاند، گرنگی بە رێککەوتنی نێوان تاران و واشنتۆن دەدەن، جەختیشدەکاتەوە کۆتاییهاتنی هێرشەکانی ئیسرائیل بۆسەر لوبنان لە مەرجە سەرەکییەکانی ئێرانە.

ئەمڕۆ چوارشەممە لە راگەیەندراوێکدا، نەعیم قاسم، سکرتێری گشتیی حزبوڵای لوبنان رایگەیاند، کۆتایی هێرشەکانی ئیسرائیل بۆ سەر لوبنان و کشانەوەی هێزەکانیان لە خاکی لوبنان لە مەرجە سەرەکییەکانی ئێرانە بۆ کۆتایی هاتن بە جەنگ.

ئاماژەی بەوەشکردوە، ئێستا ئەوە رون بووەتەوە، ئەمریکا ناتوانێت زاڵ بێت بەسەر ئێراندا، بەتایبەتی لە کاتێکدا، کە لە رەوشی سەرلێشێواویدا ماوەتەوە سەبارەت بە بڕیاردانی سیاسی خۆی و نازانێت چی دەوێت.

سکرتێری گشتیی حزبوڵای لوبنان باسیلەوەشکردوە، ئەوان بەرژەوەندی لە رێککەوتنێکی نێوان ئێران و ئەمریکادا دەبینن، چونکە نوێنەرایەتی تاکە سەرچاوەی هێزی بەردەست دەکات، لە ناوچەکەدا.

لەبارەی هەڵبژاردنی ئێستای ئیسرائیلیشەوە، نەعیم قاسم وتویەتی؛ بۆ ئەوان گرنگ نییە کێ هەڵبژاردنەکان دەباتەوە  و کێ دەبێت بە سەرۆک وەزیرانی ئیسرائیل.

وەزارەتی تەندروستیی هەرێم رایگەیاند، کڕین و فرۆشتنی دەرمان بە شێوەی ئۆنڵاین قەدەغەیە و هەرکەسێک ئەو کارەبکات،  رێککاری توندی بەرانبەر دەگیرێتەبەر و سزادەدرێت.

ئەمڕۆ چوارشەممە، لە راگەیەندراوێکدا، وەزارەتی تەندروستیی هەرێم هاووڵاتیان ئاگاداردەکاتەوە، لە سۆنگەی هەستکردن بە بەرپرسیارێتیی تەندروستی و پاراستنی ئاسایشی نیشتمانییەوە، کڕین و فرۆشتنی دەرمان بە هەموو شێوەیەک بە شێوەی ئۆنڵاین قەدەغەیە.

وەزارەتی تەندروستیی هەرێم داواشدەکات، هاووڵاتیان خۆیان بە دوربگرن لەو جۆرە دەرمانانەی بە ئۆنلاین دەفرۆشرێن، چونکە ئەم کارە بە تەواوی نایاساییە و رێککاری توندی یاسایی دژیان دەگیرێتەبەر.

لە بەشێکی تری راگەیەندراوەکەدا، داوادەکریت هاووڵاتیان بە هیچ شێوەیەک پشت بەو ریکلام و پلاتفۆرمە  بێمتمانانە نەبەستن و دەرمان بە ئۆنڵاین نەکڕن، جگە لە دەرمانخانە هیچ شوێنێکی تر بۆی نیە دەرمان بە چارەخواز بدات.

تەندروستی هەرێم ئاماژەی بەوەشکردوە، ئەو بەرهەمانەی لە تۆڕە کۆمەڵایەتییەکان و بە ئۆنڵاین بۆ دابەزاندن یان زیادکردنی کێش دەفرۆشرێن، سەرچاوە و پێکهاتەیان نەزانراوە و زیانی کوشندەیان بۆ سەر جەستە هەیە.

سەرەڕای دەنگۆی دەستپێکردنەوەی هێرشەکان، کۆمپانیای روس ئەتۆم رایگەیاند، لە مانگی داهاتودا 200 کەسی تر لە  کرێکارانی بیناسازی و ئەندازیاری شارستانی لە وێستگەی ئەتۆمی  بوشەهر  زیاد دەکات.

کۆمپانیا روسییەکە ئاماژەی بەوەکردوە، زیاد کردنی 200 کارمەند لە وێستگەی بوشەهر، بە مەبەستی گونجاندنی هێزی کارە لەگەڵ خشتەی پڕۆژەکەدا تا سەرەتای ساڵی 2027.

ئەلێکسی لیخاچۆڤ، بەڕێوەبەری جێبەجێکاری کۆمپانیاکە، ئاماژەی بەوە کرد کە سەرەڕای ئامادەکارییەکان بۆ هەر ئەگەری کاریگەرییەکی رەوشی سەربازی، بەڵام بۆ ئێستا لەسەر بنەمای سیناریۆیەکی گەشبینانە کارەکان بەردەوام دەبن.

 جێی باسە بوشێهر تاکە وێستگەی ئەتۆمییە لە ئێران کە روسیا سوتەمەنی بۆ دابین دەکات و  توانای بەرهەمهێنانی هەزار مێگاوات کارەبای هەیە، تاکە وێستگەی ئەتۆمیی چالاکی ئێرانە رۆڵی سەرەکی لە بونیادنان و کارپێکردنیدا هەیە.

ئەم بڕیارەی کۆمپانیاکە لە کاتێکدایە، بەهۆی هێرشەکانی ئەمریکا و ئیسرائیل بۆ سەر ئێران لە  1ـی نیسانی 2026، رایگەیاند، زیاتر لە 200 کارمەندی خۆی لە وێستگەی ئەتۆمیی بوشەهری ئێران دەکشێنێتەوە.

بەهۆی پێکدادانی دوو شەمەندەفەری نەفەرهەڵگری خێرا لە ئیسپانیا، لایکەم 64 کەس گیانیان لەدەستدا، ئەمەش دووەم روداوی کوشندەیە لە ماوەی کەمتر لە ساڵێکدا لەسەر هێڵی شەمەندەفەری مەدرید- ئەندەلوس. 

ئەمڕۆ چوارشەممە، ئاژانسی رۆیتەرز بڵاویکردەوە، لە ئیسپانیا بەهۆی پێکدادانی دوو شەمەندەفەری خێرا کە زیاتر لە 500 سەرنشینیان تێدابووە، لایکەم 64 کەس گیانیان لە دەستدا

پێدرۆ سانچێز سەرۆک وەزیرانی ئیسپانیا دوای ئەو روداوە کوشندەیە سەرجەم پلانەکانی کاری رۆژانەی خۆی هەڵوەشاندەوە و لە پەیامێکدا هاوسۆزی خۆی لەگەڵ قوربانییەکان دەربڕی.

بە گوێرەی زانیارییەکانی ئاژانسی رۆیتەرز، تیمەکانی بەرگریی شآرستانیی سەرقاڵی گەڕاننو  دەرهێنانەوەی قوربانییەکانن و بەهۆی روداوەکەشەوە، هێڵی شەمەندەفەری مەدرید ئەندەلوس راگیراوە.

ئەنجومەنی وەزیرانی هەرێم رایگەیاند،  بەشە بودجەی 2027ـی عیراق  نابێت بە شێوەی ئێستای بخەرێتە دەنگدانەوە و پێویستە لەسەر بنەمای رێژەی (%14.14)ـی دانیشتوانی عیراق دیاری بکرێت.

ئەمڕۆ چوارشەممە لە کۆبوەنەوەی  ئەنجومەنی وەزیراند، بە ئامادەبونی سەرۆکی ئەنجومەنی وەزیرانی هەرێمی کوردستان گفتوگۆی لەبارەی رەشنوسی پڕۆژەیاسای بودجەی گشتی فیدراڵ بۆ ساڵی 2027 و ئەنجامی دانوستانەکان کە وێڕای دۆسیەکانی نەوت و وزە لەگەڵ بەغدا بەڕێوەچون ئەنجامدا.

ئەنجومەنی وەزیران جەختدەکاتەوە، کە هەرێم قەوارەیەکی دەستوورییە و پێویستە بەشە بودجەکەی لەسەر بنەمای رێژەی 14.14٪ی دانیشتووان دیاری بکرێت.

هەروەها داوای لە حکومەتی فیدراڵی کرد رێگە نەدات رەشنوسەکە بەشێوەی ئێستای بخرێتە دەنگدانەوە بەرلە پێداچوونەوەی ورد؛ هاوكات پشتیوانی خۆی بۆ وەفدی دانوستانکار دەربڕی بۆ بەردەوامبوونی گفتوگۆکان بە ئامانجی دەستەبەرکردنی مافە دەستوری و شایستە داراییەکانی خەڵکی کوردستان.

وردبینی لیستی موچەی مانگی 10ـی موچەخۆرانی هەرێم کۆتاییهاتووە و دوای ئیمزای وەزیری دارایی عیراق، موچە بۆ هەرێم دەنێردرێت.

بێستون سەلام، پەیامنێری کوردسات نیوز رایگەیاند: سەرچاوەیەکی تایبەت پێیراگەیاندم کە، وردبینی لیستی موچەی مانگی 10ـی موچەخۆرانی هەرێم کۆتاییهاتووە نوسراوەکە ئاڕاستەی نوسینگەی فالح ساری وەزیری دارایی عیراق کراوە بۆ ئەوەی ئیمزای تەمویلکردنەکە بکات.

بەپێی زانیارییەکان، هەرکات وەزیری دارایی عیراق ئیمزای کرد، موچەی مانگی 10 بۆ هەرێم دەنێردرێت.

جیاكردنەوەی دەنگەكان لە هەڵبژاردنەكانی ئیسرائیلدا گەیشتە زیاتر 66% و تا ئێستا هاوپەیمانێتییەكەی بنیامین ناتانیاهۆ سەرۆك وەزیرانی ئەو وڵاتە لە پێشەوەیە.

كۆمیسیۆنی باڵای هەڵبژاردنەكانی ئیسرائیل رایگەیاند، تا ئێستا رێژەی 72.2%ـی دەنگەكان لە هەڵبژاردنی گشتیی ئیسرائیلدا جیاكراونەتەوە و بەپێی ئەنجامە بەراییەكان، تا ئێستا حزبی لیكود كە بنیامین ناتانیاهۆ سەرۆكایەتی دەكات، بە جیاوازی شەش كورسی لە پێش بەرەی ئۆپۆزسیۆنەوە بە سەرۆكایەتیی گادی ئایزنكۆت كە 48 كورسیان بەدەستیهێناوە، لایەنە عەرەبیەكانیش 18 كورسیان بەدەتستهێناوە.

كۆمیسیۆنی هەڵبژاردنەكانی ئیسرائیل ئاماژەی بەوەكرد، رێژەی بەشداری لە دەنگدان گەیشتووەتە 77.7% كە ئەوە بەرزترین رێژەیە لە 20 ساڵی رابردوودا.

وتیشی رۆژی چواری مانگی 11، ئەنجامی كۆتایی هەڵبژادنی پەرلەمانی ئیسرائیل رادەگەیەنرێت.

هاوكات، لێپرسراوانی ئیسرائیل ئاماژەیان بەوەكردوە ئەگەر ئەنجامەكان بەو شێوەیە بەردەوامبێت ئەوە ناتانیاهۆ تەنها دوو مانگی پێویستە بۆ پێكهێنانی حكومەتی نوێ.كۆمسیۆنی هەڵبژاردنی ئیسرائیل: حزبەكەی ناتانیاهۆ 54 كورسی بەدەستهێناوە.

 

12 یەمین فێستیڤاڵی هەنار لە هەڵەبجە دەستیپێكرد و بۆماوەی چوار رۆژ پێشوازی لە میوانانی فێستیڤاڵەكە دەكرێت، پێشبینیش دەكرێت زیاتر لە 500 هەزار كەس سەردانی فێستیڤاڵەكە بكەن.

فێستیڤاڵەكە تا رۆژی شەممە 31ی ئەم مانگە بەردەوام دەبێت، كە تیایدا 520 جوتیار و خاوەنكار خواردەمەنی و كەلوپەل و كاڵاكانیان نمایش دەكەن.

هاوكات، لە فێستیڤاڵی هەناردا چەندین چالاكی بازرگانی و هونەری و كلتوریی ئەنجامدەدرێن و چەندین كاری دەستی و دیزاینی نوێی جلی كوردی نمایش دەكرێت.

نوخشە ناسح پارێزگاری هەڵەبجە رایگەیاند، ساڵانە لە وەرزە جیاوازەكاندا هەڵەبجە دەیان بەرهەمی جیاوازی پێدەگات و ئەوەش هەلی كاری زۆری بۆ گەنجی سنورەكە رەخساندووە، هەر بۆیە ئەركی حكومەتی هەرێم و لایەنە پەیوەندیدارەكانە بازاڕی ساغكردنەوەی ئەو بەرهەمانە فەراهەم بكات.

بەڕێوەبەرایەتی گشتیی گەشتوگوزاری هەڵەبجە پێشبینی دەكات، بۆ ئەمساڵ زیاتر لە 500 هەزار گەشتیار سەردانی فێستیڤاڵەكە بكەن و زیاتر لە هەزار و 600 شوێنی مانەوە بۆ گەشتیاران ئامادە كراوە.

 

پۆلیسی گەرمیان دوو کەسی بە تۆمەتی خراپ بەکارهێنانی ئامێرەکانی پەیوەندی و هەڕەشەکردن دەستگیردەکات و رایدەگەیەنێت، یەکێک لە تۆمەتبارەکان خۆی وەک ژن ناساندووە و پیاوانی هەڵخەڵەتاندووە و هەڕەشەی لێکردوون، لە بەرانبەر سڕینەوەی ڤیدیۆ و وێنەکانیان داوای پارەی لێکردوون.

عەقیدی پۆلیس سۆران محەمەد غەریب، وتەبێژی پۆلیسی گەرمیان، لە راگەیەندراوێکدا ئاماژەی بەوە دا، کەسێک بەپێی 'مادەی دوو' لە خراپ بەکارهێنانی ئامێرەکانی پەیوەندی و تۆڕە کۆمەڵایەتییەکان، لەلایەن بەشی نەهێشتنی تاوانی گەرمیانەوە دەستگیرکراوە.

ئاماژەی بەوەشكردووە، بەشی پۆلیسی نەهێشتنی تاوانی گەرمیان (نووسینگەی نەهێشتنی تاوانە ئەلیکترۆنییەکان)، تۆمەتبارێکی تری دەستگیرکردووە کە دانیشتووی شارۆچکەی هەریرە و بەپێی مادەی (430) لە یاسای سزادانی عیراقی فەرمانی دەستگیرکردنی هەبووە.

راشیگەیاند، ئەو تۆمەتبارە لە رێگەی هەژمارێکی ساختەی فەیسبووکەوە بە ناوی "Bexall Jamal"، خۆی وەک ژن ناساندووە و هەستاوە بە هەڵخەڵەتاندنی پیاوان، پاشان هەڕەشەی لێکردوون و لە بەرانبەر سڕینەوەی گرتە ڤیدیۆ و وێنەکانیاندا داوای پارەی لێکردوون و بەو شێوەیە پارەی لە چەندین کەس سەندووە، لە ئێستاشدا تۆمەتبار دانی بە تاوانەکەیدا ناوە و لێکۆڵینەوە لەگەڵیدا بەردەوامە.

لەکۆتاییدا، پۆلیسی گەرمیان داوا لە هاووڵاتیانی سنورەکە دەکات، ئەگەر هەر کەسێک لەلایەن ئەم هەژمارەی فەیسبووکەوە هەڵخەڵەتێنراوە، سەردانی بەشی پۆلیسی نەهێشتنی تاوانی گەرمیان بکات بە مەبەستی تۆمارکردنی سکاڵای یاسایی لەسەر تۆمەتبارەکە.

رەزامەندی ئەنجومەنی نوێنەران وەرگیراوە بۆ دابەشکردنی 200 لیتر نەوت بە نرخی پاڵپشتیکرا بۆ هەر ماڵێکی ناوچە شاخاوییەکان.

ئەندامانی فراکسیۆنی یەکێتیی نیشتمانیی کوردستان لە ئەنجومەنی نوێنەران رایانگەیاند: رەزامەندی سەرۆکی ئەنجومەنی نوێنەران وەرگیراوە بۆئەوەی 200 لیتر نەوت بۆ هەر ماڵێکی ناوچە شاخاوییەکان بە نرخی پاڵپشتیکراو دابەشبکرێت.

ئاماژەیان بەوەشداوە: 110 ملیۆن لیتر نەوت بۆ پارێزگاکانی سلێمانی و هەڵەبجە دابینکراوە، هەروەها 140 ملیۆن لیتر نەوت بۆ پارێزگاکانی دهۆک و هەولێر.

سەرۆکی روسیا رایدەگەیەنێت، وڵاتەکەی هەڵسەنگاندن دەکات بۆ کارکردنی هاوبەش لەگەڵ کۆمپانیا ئەمریکییەکان لە پرۆژەکانی وزە لە ناوچەی جەمسەری باکوور، کە تێیدا روسیا بەرهەمهێنان لە وزەدا دەکات.

لە وتارێکیدا لە هەشتەمین لوتکەی کۆڕبەندی وڵاتانی هەناردەکاری غاز کە لە مۆسکۆ بەڕێوەچوو، ڤلادیمێر پوتن، سەرۆکی روسیا ئاماژەی بەوە کرد، وڵاتەکەی ئامادەیە بۆ هاوکاریی تەکنەلۆژی لە بواری غازی سروشتیدا و هەروەها ئامادەیە ئەو تەکنەلۆژیایانەی پەرەی پێداون، لەگەڵ وڵاتانی دیکەدا هاوبەشی پێبکات.

لە بەشێکی دیکەی وتارەکەیدا، سەرۆکی روسیا وتی، "تا ماوەیەکی پێش ئێستا هاوبەشەکانمان لە ئەوروپاوە لە کێڵگەکانماندا لەگەڵمان کاریان دەکرد، لە کاتێکدا هاوبەشە چینییەکانیشمان بەردەوامن لە کارکردن، لە ئێستاشدا هەڵسەنگاندن بۆ کارکردنی هاوبەش لەگەڵ ئەمریکا دەکەین."

هاوکات ئاماژەی بە پێگەی وڵاتەکەی لە بازاڕی جیهانیدا کرد و رایگەیاند، روسیا لە یەدەگی غازی سروشتیدا لە پلەی یەکەمی جیهاندایە و لە بەرهەمهێنانیشدا لە پلەی دووەمدایە، هەروەها بەردەوامە لە بەهێزکردنی سەربەخۆیی تەکنەلۆژی لە کەرتی وزەدا.