هەواڵەکان
کاروان ستونی، وتەبێژی رەسمیی حەج و عومرەی کوردستان رایگەیاند کە شەوی رابردوو (14/15ی ئەیلوولی 2026) عومرەکارێکی کورد بەناوی (محەمەد حەسەن)، کە تەمەنی سەروو 65 ساڵە و خەڵکی کەلارە، لە سعودیە کۆچی دوایی کرد.
وتەبێژی حەج و عومرە ئاماژەی بەوەش دا: ئەم عومرەکارە دوای بەجێگەیاندنی سوونەتی عومرە، لە رێگەی نێوان مەدینە بۆ عەرعەر کۆچی دوایی کردووە.
جەختیشی کردەوە کە بەڕێوەبەرایەتیی گشتیی حەج و عومرە لە رێگەی نووسینگەی کەلارەوە بەردەوام لەسەر هێڵ بووە بۆ پێشکەشکردنی ئاسانکارییەکان، لەسەر داواکاریی کەسوکارەکەشی کە لە گەشتەکەدا لەگەڵیدابوون، تەرمەکەی لە سعودیە رەوانەی کەلار دەکرێتەوە.
بەمەش ئەم رووداوە دەبێتە دووەم حاڵەتی کۆچی دوایی عومرەکارانی کورد لە وەرزەکانی عومرەی ئەمساڵی 2026دا.
وەزارەتی پەروەردەی عیراق بڕیاری دا دەستپێکردنی ساڵی نوێی خوێندنی (2026-2027) دواپاش بخات بۆ رۆژی یەکشەممە، 11ی تشرینی یەکەمی 2026، لە شوێنی ژوانی پێشوو کە 20ی ئەیلوول بوو.
بەپێی گشتاندنێکی فەرمیی بەڕێوەبەرایەتیی گشتیی پەروەردەی گشتی و ئەهلی و بێگانە کە رەزامەندیی وەزیری لەسەرە، هۆکاری دواخستنەکە دەگەڕێتەوە بۆ تەواوکردنی رێکارەکانی تاقیکردنەوەکانی خولی دووەمی پۆلە کۆتایی نەهاتووەکان (ناپۆل)، لەگەڵ ئامادەکاریی تەواو بۆ ساڵی نوێی خوێندن و بەرزبوونەوەی پلەکانی گەرما لەم ماوەیەدا.
بافڵ جەلال تاڵەبانی لەسەر بانگهێشتی رەسمی وەزارەتی دەرەوەی ئێران، گەیشتە تاران و لەگەڵ لێپرسراوانی باڵای ئەو وڵاتە كۆدەبێتەوە.
لەسەر بانگهێشتی رەسمی عەباس عراقچی وەزیری دەرەوەی ئێران، بافڵ جەلال تاڵەبانی سەرۆكی یەكێتیی نیشتمانیی كوردستان گەیشتە تاران و بڕیارە چەندین كۆبوونەوە لەگەڵ لێپرسراوانی باڵای ئەو وڵاتە ئەنجام بدات.
پێشتریش ئیسماعیل بەقایی وتەبێژی وەزارەتی دەرەوەی ئێران رایگەیاند: سەردانەكەی سەرۆكی یەكێتی بۆ تاران لە چوارچێوەی راوێژكارییە بەردەوامەكانی نێوان ئێران و عیراق و هەرێمی كوردستاندایە بۆ فراوانكردنی پەیوەندییەكانی نێوانیان و پتەوكردنی ئاشتی و سەقامگیریی لە ناوچەكەدا.
وتیشی: بافڵ جەلال تاڵەبانی لە تاران زنجیرەیەك دیدار و كۆبوونەوە لەگەڵ لێپرسراوانی باڵای ئێران ئەنجام دەدات بۆ تاوتوێكردنی ئەو پرسانەی جێی بایەخی هاوبەشن، دیارترینیان ئابووری و ئاسایشی سنوورەكان.
حوسیەكان یەمەن رایانگەیاند، 54 هێرشی نوێیان بۆ سەر سعودیە ئەنجامداوە و ژێرخان و بنكەی سەربازی ئەو وڵاتەیان كردوەتە ئامانج.
یەحیا سەریع وتەبێژی حوسییەكانی یەمەن لە راگەیەنراوێكدا ئاماژەی بەوەكردووە، لە ماوەی 24 سەعاتی رابردوودا 54 هێرشیان لە ناو خاكی سعودیە ئەنجامداوە و بنكەی سەربازی خەمیس لە باشوری وڵاتەكە و سیستمی رادار و بەرگری و تەقەمەنی ئەو وڵاتەیان كردوەتە ئامانج لە بەرانبەر هێرشی سعودیە بۆ سەر ئەو گروپە لە یەمەن.
دەسەڵاتدارانی سعودیە رایانگەیاند، حوسییەكان ژێرخانی مەدەنی وڵاتەكەیان كردوەتە ئامانج و سێ كەس كوژراون و چەند كەسێكیش برینداربوون.
ئاماژەیان بەوەشكردووە، بە توندی وەڵامی ئەو هێرشانەی حوسییەكان دەدەنەوە و بێ دەنگ نابن.
وەزارەتی نەوتی عیراق ئاماژە بەوە دەکات کە پابەندە بە دابینکردنی تەواوی پێداویستیی ناوخۆ لە بەرهەمە نەوتییەکان و پڕکردنەوەی هەر کەلێنێک لە رێگەی هاوردەکردنی بڕی زیاتر لە دەرەوە.
سەلیم رکابی، وتەبێژی وەزارەتی نەوتی عیراق لە لێدوانێکدا بۆ رۆژنامەی رەسمی رایگەیاند: کۆبونەوەی زیاتر کراوە بۆ دابینکردنی بارەگۆڕی نوێ لە هەردوو بەرهەمی بەنزین و گازاویل، پێشبینیش دەکرێت تا کۆتایی ئەم هەفتەیە ئەو بارانە بگەن، بە مەبەستی زیادکردنی بڕی بەردەست لە بازاڕەکاندا و وەڵامدانەوەی داواکارییە روو لە زیادبووەکان.
وتەبێژی وەزارەت روونیشی کردەوە، ئەم رێکارانە لە چوارچێوەی پلانی وەزارەتدان بۆ دەستەبەرکردنی بەردەوامیی دابینکردنی سووتەمەنی بەپێی ئاستی راستەقینەی داواکاری و بەکاربردن.
جەختیشی کردەوە: وەزارەت بەردەوامە لە بەدواداچوون بۆ ئاستی بەرهەمهێنانی ناوخۆ و پڕکردنەوەی هەر کەمییەک لە رێگەی هاوردەکردن لە کاتی پێویستدا، بە شێوازێک کە تەواوی وەڵامی پێداویستییەکانی هاوڵاتییان بداتەوە.
سبەی سەعات 10ی بەیانی ئەنجومەنی وەزیران کۆبوونەوەی ئاسایی خۆی ساز دەکات و تێیدا سێ تەوەری سەرەکی تاوتوێ دەکرێن.
بەپێی بەرنامەی کاری کۆبوونەوەکە، تەوەری یەکەم تایبەت دەبێت بە ئامادەکارییەکان بۆ دەستپێکردنی ساڵی نوێی خوێندنی 2026-2027، کە لەلایەن وەزیرانی پەروەردە و خوێندنی باڵا و توێژینەوەی زانستییەوە دەخرێتە روو.
لە تەوەری دووەمدا، وەزیری پلاندانان هەڵسەنگاندن بۆ بڕیارەکانی حکوومەتی عیراق سەبارەت بە ئەنجامەکانی سەرژمێریی گشتیی ساڵی 2024 دەکات. لەم بڕگەیەدا کاریگەریی ئەنجامەکانی سەرژمێری لەسەر دیاریکردنی رێژەی پشک و شایستە دارایی و دەستوورییەکانی هەرێمی کوردستان، شانبەشانی هەڵوێست و هەنگاوەکانی داهاتووی حکوومەتی هەرێم تاوتوێ دەکرێن.
تەوەری سێیەم و کۆتایی تایبەتە بە پرسی دارایی، تێیدا وەفدی باڵای دانوستانکار ئەنجامی دوا گفتوگۆکانیان لەگەڵ بەغداد بۆ گەڵاڵەکردنی رەشنووسی پرۆژەیاسای بودجەی گشتیی عیراق بۆ ساڵی 2027 و هەوڵەکان بۆ جێگیرکردنی شایستە دارایییەکان و رۆڵی نوێنەرانی هەرێمی کوردستان لەو پرسەدا دەخەنە روو.
وەزارەتی خوێندنی باڵا ئەمڕۆ سێشەممە رایگەیاند کە دوو زانکۆی عیراقی چوونهتە ناو ریزبەندیی شەنگهای بۆ پسپۆڕییە ئەکادیمییەکان.
حەیدەر عەبد زەهد، بریکاری وەزارەتەکە لە راگەیەندراوێکدا باسی لەوە کرد کە چوونی دوو زانکۆی عیراقی بۆ ناو ریزبەندیی جیهانیی شەنگهای دەستکەوتێکی ئەکادیمیی گرنگە و دەربڕی هەوڵە بەردەوامەکانە بۆ بەرزکردنەوەی ئاستی زانکۆکانی عیراق و بەهێزکردنی ئامادەییان لە گۆڕەپانی ئەکادیمیی نێودەوڵەتیدا.
بریکاری وەزارەت ئاماژەی بەوەش دا کە ئەم دەستکەوتە بەرهەمی روانگەی زانکۆ عیراقییەکانە بەرەو کوالێتی و جیاوازی و کێبڕکێی جیهانی، هاوکات وەرگێڕانی کرداریی هەوڵی سەرکردایەتیی زانکۆکان و مامۆستایان و توێژەرانە لە دروستکردنی دامەزراوەی ئەکادیمیی شیاو بۆ ئامادەیی و کێبڕکێ لەسەر ئاستی نێودەوڵەتی.
سەبارەت بە پسپۆڕییەکان، روونیکردەوە لە بواری توێژینەوەدا، زانکۆی عەینی عیراقی لە پسپۆڕیی (ئەندازیاری / سەرچاوەکانی ئاو) و زانکۆی وارسی ئەنبیا لە پسپۆڕیی (زانست و ئەندازیاریی وزە) چوونهتە ناو ریزبەندەکەوە.
ئەم ریزبەندییە پشت بە نۆ پێوەری زانستی و ئەکادیمی دەبەستێت کە زانیارییەکانی لە ماڵپەڕی(ماڵپەڕی وێب ئۆف ساینس / کلاریڤەیت وەردەگرێت؛ کە یەکێکە لە دیارترین و باوەڕپێکراوترین سەرچاوەکانی زانیاریی زانستی لە ڕووی وردییەوە.
جەختیشی لەسەر گرنگیی بەردەوامیی هەوڵە توێژینەوەیی و ئەکادیمییەکان کردەوە بۆ بەهێزکردنی زیاتری پێگەی زانکۆ عیراقییەکان لە ریزبەندییە جیهانییەکاندا.
بەسەرپەرشتیی سەرۆک وەزیرانی عیراق و سەرۆکی فەڕەنسا، دوێنێ دووشەممە، لەکۆشکی ئێلیزێ لە پاریس ئیمزاکردنی شەش یاداشتی لێکتێگەیشتن ئیمزاکران لە نێوان عیراق و فەڕەنسا لە بواری جیاجیا و کەرتی ئابووریی هاوبەشدا.
نووسینگەی راگەیاندنی سەرۆک وەزیران لە راگەیەندراوێکدا یاداشتەکانی لێکتێگەیشتنی نێوان عیراق و فەڕەنسای بەم شێوەیەی خوارەوە خستەڕوو:
١. ئاڵوگۆڕی نیەتپاکی لە نێوان وەزارەتی بەرگریی عیراق و کۆمپانیای هێرمتان بۆ ژیریی دەستکرد: سەبارەت بە هاوکاریی ستراتیجی لە بواری بەرگریی ئاسمانیدا.
٢. راگەیاندنی نیەتپاکی لە نێوان وەزارەتی بەرگریی عیراق و وەزارەتی سوپاکانی فەڕەنسا: سەبارەت بە دابینکردنی کەلوپەلی سەربازیی فەڕەنسی لە چوارچێوەی ئاوەدانکردنەوە و گەشەپێدانی تواناکانی بەرگری لە عیراق.
٣. راگەیاندنی نیەتپاکی بۆ هاوبەشی لە بواری بەهێزکردنی دەرفەتەکانی گەنجان و توێژینەوە و داهێنان: لە نێوان وەزارەتی دەرەوەی عیراق و وەزارەتی ئەوروپا و کاروباری دەرەوەی فەڕەنسا.
٤. راگەیاندنی نیەتپاکی لە نێوان وەزارەتی دەرەوەی عیراق و هاوتا فەڕەنسییەکەی: سەبارەت بە بەهێزکردنی هاوبەشی لەگەڵ ئاژانسی گەشەپێدانی فەڕەنسی (AFD).
٥. پرۆتۆکۆلی هاوکاریی تایبەت بە گرێبەستی دابینکردن و فرۆشتنی غاز: لە نێوان وەزارەتی کارەبا و کۆمپانیای تۆتاڵ ئینێرجیز.
٦. راگەیاندنی نیەتپاکی و هاوکاری لە بواری فڕۆکەوانیی مەدەنی: لە نێوان وەزارەتەکانی گواستنەوەی عیراق و فەڕەنسا.
مۆحسین رەزایی، سکرتێری ئەنجومەنی باڵای ئاسایشی نیشتمانیی ئێران رایگەیاند، تاوەکو مەرجەکانی ئێران جێبەجێ نەکرێن، هیچ دانوستانێک لەگەڵ واشنتۆن ناکرێت.
رەزایی لە تۆڕی کۆمەڵایەتیی "ئێکس" وەڵامی سەرۆکی ئەمریکای دایەوە و هۆشداری دا لە سەرگەرمبوون بە دژایەتیی ئاماژەکانی ترەمپ کە لە نێوان رەتکردنەوەی دانوستان و ئامادەیی بۆ دیالۆگدا دەهات و دەچوو.
رەزایی جەختی لەسەر گۆڕانی هاوکێشەکانی پەیوەست بە نەوت و گەروەکان کردەوە و ئاماژەی بەوە دا کە سەرگەردانی بۆ کۆنتڕۆڵکردنی لێکەوتەکان رێگری لە روداوەکانی داهاتوو ناکات، هەروەها دووپاتی کردەوە کە بێ جێبەجێکردنی مەرجەکانی ئێران هیچ دانوستانێک لە ئارادا نییە.
ئەم وەڵامەی ئێران دوای ئەوە هات کە دوێنێ دۆناڵد ترەمپ، سەرۆکی ئەمریکا رایگەیاندبوو ئێران دەستبەجێ و بەپەلە دەیەوێت رێککەوتن لەگەڵ واشنتۆن ئیمزا بکات، ئاماژەی بەوەش کردبوو کە خۆی بڕیار دەدات ئایا ئەمریکا بەشداری لەو دانوستانانەدا دەکات یاخود نا.
دادگای باڵای ئەمریکا رەتیکردەوە رێگە بە دۆناڵد ترەمپ بدات بۆ سنووردارکردنی دەنگدان بە پۆستە پێش هەڵبژاردنەکانی ناوەڕاستی خول لە تشرینی دووەمدا، ئەمەش بە شکستێکی نوێ بۆ ئیدارەکەی دادەنرێت.
لە کۆی نۆ دادوەر، تەنها دوو دادوەری پارێزگار دژی بڕیارەکە بوون. دادوەر برێت کاڤانۆ رایگەیاند کە هۆکاری سەرەکیی رەتکردنەوەکە کەمیی کاتی ماوەیە پێش هەڵبژاردنەکان.
ترەمپ لە ئاداردا فەرمانێکی دەرکردبوو بۆ توندکردنەوەی مەرجەکانی دەنگدان بە پۆستە بە بیانووی رێگری لە تەزویر، بەڵام ویلایەتە دیموکراتەکان داوای یاساییان تۆمارکرد و جەختیان کردەوە کە بەڕێوەبردنی هەڵبژاردن دەسەڵاتی ویلایەتەکانە نەک دەسەڵاتی فیدراڵی.
فەرمانەکە داوای دەکرد کارتی دەنگدان تەنها بۆ ناواکانی ناو لیستی شایستەکان بنێردرێت، لەکاتێکدا بەرپرسان هۆشدارییان دەدا لە پشێوی کارگێڕی، و کارمەندێکی دەستەی پۆستەش گوتی سیستەمە پەلەپڕووکانەکە دەبێتە هۆی بێبەشبوونی ملیۆنان دەنگدەر.
زیان و تێچوی جەنگی ئەمریکا ئاشکرا دەکرێت، زۆربەی بنکەکانی ئەمریکا زیانیان پێگەیشتوە و جەنگەکەش زیاتر لە 33 ملیار دۆلار لەسەر ئەمریکا کەوتوە.
کەناڵی فۆکس نیوز بە پشتبەستن بە راپۆرتێکی نوێی پشکنەری گشتیی پێنتاگۆن بڵاویکردەوە، تێچووی جەنگی ئێران زیاتر لە 33 ملیار دۆلار لەسەر ئەمریکا کەوتوە.
لە راپۆرتەکەی فۆکس نیوزدا هاتووە؛ تێچوی جەنگی ئێران 33.4 ملیار دۆلارە و 22.3 ملیاری تەنها بۆ بەکارهێننای چەک و 3.7 ملیاریش زیانی تێکشکاندنی ئامێڕ و فڕۆکەکانی ئەمریکایە.
ئەمە جگە لە زیانی 184 ملیۆن دۆلاری کە بەر دامەزراوە دیپلۆماسییەکانی ئەمریکا لە عراق، کوێت، عەرەبستانی سعودی و ئیمارات کەوتووە.
راپۆرتەکە ئاماژە بەوە دەکات هێرشەکانی ئێران زیانی گەورەی بە بنکەکانی ئەمریکا لە هەشت وڵاتی ناوچەکە گەیاندووە و دەیان فڕۆکەی تێکشکاندووە یان زیانپێگەیاندوون.
بە گوێرەی زانیارییەکان؛زیانەکانی ئەمریکا بەم شێوەیەیە؛
-چوار فڕۆکەی F-15E
-حەوت فڕۆکەی سووتەمەنیبەخشی KC-135
-یەک فڕۆکەی F-35A
-یەک فڕۆکەی A-10
-30روبەری بێفڕۆکەوانی MQ-9
پێنتاگۆنیش هۆشیاری داوە کە بەکارهێنانی زۆری موشەک بووەتە هۆی کورتهێنانی ستراتیژی لە کۆگاکان و دەرکەوتنی کەموکوڕی لە زنجیرەی بەرهەمهێنانی چەکی وڵاتەکەدا.
قائیمقامیەی دەربەندیخان رایگەیاند، بڕیاری رێکخستنی کاتی کردنەوە و داخستنی دوکانەکانیدا و لە سبەینێوە جێبەجێ دەکرێت و لە لە 08:00 بەیانی تا بانگی مەغریب کراوە دەەبن.
قائیمقامیەتی دەربەندیخان لە راگەیەندراویکدا ئاماژەی بەوەکردوە، لەسەر رەزامەندی زۆرینەی دوکاندارەکان بڕیاری رێکخستن وکاتی کارکردنی دوکانەکان دیاری کرا.
ئاماژەی بەوەشکردوە، کاتی کردنەوەی دوکانەکان، لە 08:00 بەیانی تا بانگی مەغریب دەبێت و ئەم بڕیارەش لەسەر رەزامەندی 150 خاوەن دوکان دراوە.
وەک لە راگەیەندراوەکەدا هاتووە؛ ئەودوکانانەی بڕیاریان داوە بەشەو دوکانەکانیان دابخەن بریتین لە؛ کەمالیات ، کوتاڵفرۆش ، شوشەوات ، پۆشاکی جل و بەرگی ئافرەتان و منداڵان ، جانتاو پێڵاوی ژنان و مناڵان ، عەتار و بەهارات و چەرەسات ، دوکانی پەردە ، قرتاسیەکان ، ئەو بابەتانەی پەیوەندی بەباتی ژنانەوە .
قایمقامیەتی دەربەندیخان جەخت لەسەر جێبەجێکردنی بڕیارەکە دەکاتەوە و رادەگەیەنێت هەر کەسێک پابەند نەبێت بە بڕیارەکە، رێکاری یاسایی بەرانبەری دەگیرێتەبەر.
لەسەر بانگهێشتی رەسمی وەزارەتی دەرەوەی ئێران، بڕیارە، سبەینێ بافڵ جەلال تاڵەبانی بە سەردانێكی رەسمی و بە یاوەری وەفدێكی باڵای یەكێتیی نیشتمانیی كوردستان، سەردانی ئێران بكات.
ئیسماعیل بهقایی، وتەبێژی وەزارەتی دەرەوەی ئێران، رایگەیاند سبەینێ سێشەممە بافڵ جەلال تاڵەبانی، سهرۆکی یەکێتیی نیشتمانیی کوردستان سەردانی تاران دەکات و لەگەڵ لێپرسراوانی باڵای ئێران کۆدەبێتەوە.
بەقایی ئاماژەی بەوەکردوە، سەردانەکەی سەرۆکی یەکێتی بۆ تاران کە لەسەر بانگهێشتی عەباس عراقچی، وەزیری دەرەوەیە و لە چوارچێوەی راوێژکارییە بەردەوامەکانی نێوان ئێران و حکومەتی عیراق و هەرێمی کوردستاندایە.
ئاماژەی بەوەشکردوە، سەردانەکە بەمەبەستی فراوانکردنی پەیوەندییە دووقۆڵییەکان و پتەوکردنی ئاشتی و سەقامگیری لە ناوچەکەدا و بڕیاریشە لەگەڵ سەرۆک کۆمار و سەرکی پەرلەمان و وەزیری دەرەوەدا کۆدەبێتەوە.
بەقایی جەختیشیکردوەتەوە سەرۆکی یەکێتی، لەگەڵ لێپرسراوانی باڵای ئێران سەبارەت بەو پرسانەی کە جێی بایەخی هاوبەشن، لەوانەش پرسەکانی پەیوەست بە هاوکاری ئابووری و ئاسایشی سنورەکان تاوتوێ و ئاڵوگۆڕی بیروڕا دەکەن.
وەزارەتی خوێندنی باڵای هەرێم بە رەسمی گواستنەوەی خوێندکاران لە نێوان کۆلێژەکانی پزیشکی گشتیی قەدەغە دەکات.
لە نوسراوێکی رەسمیدا، کە ئاڕاستەی گشت زانکۆ حکومییەکانی هەرێمی کردووە و کۆپیەکی دەست کوردسات نیوز کەوتوە، وەزارەتی خوێندنی باڵای هەرێم رایگەیاندوە، لەسەر داواکاری زانکۆکان ئەو بڕیارەی داوە.
لە راگەیەنداوەکەدا هاتووە؛ بۆ ساڵی خوێندنی 2026-2027 هیچ گواستنەوەیەک لە نێوان کۆلێژە پزیشکییە گشتییەکان لە زانکۆکان ئەنجام نادرێت.
ئەم بڕیارەی وەزارەت لە کاتێکدایە کە ژمارەیەک لە خوێندکاران، دوای ئەوەی لە شارەکانی دەرەوەی شوێنی نیشتەجێبوونی خۆیان لە بەشی پزیشکی گشتی وەرگیرابوون، دوای ساڵێک لە خوێندن داوایان کردبوو بگوازرێنەوە بۆ بەشی پزیشکی گشتیی لە شارەکەی خۆیان ئەمەش دەبوە کێشە بۆ زانکۆکان.
قوباد تاڵەبانی، جێگری سەرۆک وەزیرانی هەرێم لەگەڵ باڵیۆز ستیڤ ڤەیگن هەڵسوڕێنەری کاروباری باڵیۆزخانەی ئەمەریکا لە هەولێر کۆبونەوە.
قوباد تاڵەبانی لە پەیامێکیدا رایگەیاند، خۆشحاڵە بەوەی باڵیۆز ستیڤ ڤەیگن جارێکیتر و بە ئەرکێکی نوێ گەڕاوەتەوە بۆ عیراق و هەرێمی کوردستان.
ئاماژەی بەوەشکردوە، ئەمڕۆ پێکەوە گفتوگۆیەکی بەرهەمداریان کردوە لەبارەی رەوشی هەرێمی کوردستان و عیراق.
قوباد تاڵەبانی باسی لەوەشکردوە؛ لە کۆبونەوەکەدا هاوڕابوون لەسەر پێویستیی چارەسەرکردنی خێرای ناکۆکییەکان و پێکهێنانی کابینەی نوێی حکومەتی هەرێم و پاراستنی هەرێم لە هەر چەشنە هەڕەشە و مەترسییەک، کە بەهۆی ئاڵۆزییەکانی ناوچەکەوە رووبەڕویان ببێتەوە.
لە بەشێكی تری كۆبوونەوەكەدا، جەختیان كردەوە لە پشتگیریكردنی هەنگاوەكانی سەرۆك وەزیرانی عیراق لە چەسپاندنی سەروەریی یاسا و دوورخستنەوەی وڵاتەكە لە بارگرژییەكانی ناوچەكە.
دۆناڵد ترەمپ رایگەیاند، روسیا و ئۆکراین گەشتونەتە رێککەوتن کە ژێرخانی وزەی یەکتری نەکەنە ئامانج، جەختیشیکردەوە جەنگی ئێران هۆکاری بەرزبونەوەی نەوت نییە.
ئەمڕۆ دوشەممە، دۆناڵد سەرۆکی ئەمریکا لە تۆڕی کۆمەڵایەتی تروس رایگەیاند کە روسیا و ئۆکراین، رێککەوتون کە ژێرخانی وزەی یەکتر نەکەنە ئامانج.
سەرۆکی ئەمریکا جەختیکردەوە، بەرزبوونەوەی نرخی نەوت لە جیهاندا زیاتر بەهۆی جەنگی نێوان روسیا و ئۆکراینە نەک جەنگ لەگەڵ ئێران.
ئەم قسەکانی دۆناڵد ترەمپ لە کاتێکدایە، لە ئێستادا نرخی نەوتی برێنت لە سەرو 100 دۆلارەو ەمامەڵەی پێوەدەکرێت.
لە سەرەتای جەنگی ئەمریکا و ئیسرائیل بەرانبەر ئێران، نرخی سوتەمەنی لە ئەمریکا بە رێژەی لەسەدا 65 بەرزبووەتەوە.