كاندیدی نوێ بۆ ئەو وەزارەتانەی تائێستا دەنگیان لەسەر نەدراوە دیاری دەكرێن، چاوەڕوانیش دەكرێت ئەنجومەنی نوێنەران ئەو بابەتە یەكلابكاتەوە.

عادل مەحلاوی پەرلەمانتاری فراكسیۆنی تەقەدوم بە رۆژنامەی سەباحی راگەیاندووە، سەرۆكی فراكسیۆنەكان كۆبوونەوە دەكەن بۆ دیاریكردنی ناوی نوێ بۆ پڕكردنەوەی ئەو وەزارەتانەی تائێستا متمانەیان پێنەدراوە.

وتیشی، لە قۆناغی داهاتوودا جموجوڵی سیاسی چڕ دەكرێتەوە و سەرنج لەسەر ئەو ناوانە دەبێت كە توانا و لێهاتووییان هەیە و متمانەی ئەنجومەنی نوێنەران بەدەستدەهێنن. 

مەحمود فالح شمەری پەرلەمانتاری فراكسیۆنی خەدەماتیش رایگەیاند، تەواوكردنی كابینەی نوێی حكومەت پەیوەستە بە لێكتێگەیشتنە سیاسییەكان و شایستەی فراكسیۆنەكانەوە، وتیشی، پێدەچێت تەواوكردنی دەنگدان لەسەر ئەو وەزارەتانەی ماون، بكەوێت دوای پشووی ئەنجومەنی نوێنەرانی عیراقەوە.

وەزارەتی بەرگری ئەمریکا (پنتاگۆن) رایگەیاند کە سەردەمی پلەبەرزکردنەوە لەسەر بنەمای رەگەز و رەچەڵەک بە تەواوی کۆتایی پێهاتووە، ئەمەش وەک وەڵامێک بۆ ئەو راپۆرتانەی باس لە دوورخستنەوەی ئەفسەرانی ژن و ئەفسەرانی رەشپێست لە ریزەکانی هێزی دەریایی ئەمریکا دەکەن.

نووسینگەی راگەیاندنی پنتاگۆن لە رێگەی "ئێکس"ەوە رونکردنەوەی داوە کە پێوەرەکانی لێهاتوویی، شایستەیی و ئەدا، دەبنە تاکە دیاریکەری دامەزراندن و پلەبەرزکردنەوە لە ناو دامەزراوەی سەربازیدا، و هەر جۆرە رەچاوکردنێکی ناسنامەی رەگەزی یان نەتەوەیی لە بڕیارە پیشەیییەکاندا رەتکردەوە.

نووسینگەکە جەختی لەوە کردووەتەوە کە: شایستەترین کەسەکان ئەوانەن کە پۆستەکان بەدەستدەهێنن و شایستەی پلەبەرزکردنەوەن.

ئەم کێشەیە دوای بڵاوبوونەوەی ئەو راپۆرتانە تەقییەوە کە ئاماژە بەوە دەکەن وەزیری بەرگری، پیت هێگسێت، فەرمانی کردووە بە سڕکردنی پلەبەرزکردنەوەی ژمارەیەک لە ئەفسەرانی ژن و ئەفسەرانی رەشپێست لە هێزی دەریایی ئەمریکادا.

بەپێی هەمان زانیارییەکان، زیاتر لە 60%ی ئەو ئەفسەرە باڵایانەی کە دوور خراونەتەوە، سەر بە توێژی ژنان و ئەمریکییە رەشپێستەکانن، ئەمەش شەپۆلێکی بەرفراوانی رەخنەی لە ناوەندە سەربازی و سیاسییەکاندا لێکەوتووەتەوە.

ئاژانسی "مێهر"ی ئێرانی، ئەمرۆ سێشەممە، رایگەیاند کە تاران هێشتا خەریکی لێکۆڵینەوەیە لە دەقەکانی یاداشتی لێکتێگەیشتنی نێوان ئێران و ئەمریکا و وەڵامی کۆتایی خۆی بۆ واشنتۆن نەناردووە.

ئاژانسەکە لە زاری سەرچاوەیەکی نزیک لە شاندی دانوستانکاری ئێرانەوە گواستوویەتییەوە: دەقی یاداشتی لێکتێگەیشتنی ئێران و ئەمریکا هێشتا لە تاران لێکۆڵینەوەی تێدا دەکرێت و هیچ وەڵامێک بۆ واشنتۆن نەنێردراوە.

کۆماری ئیسلامی ئێران ئاماژەی بەوەش کردووە: مێژووی واشنتۆن لە پابەندنەبوون و نەبوونی متمانە، پاڵ بە ئێرانەوە دەنێت کە بە ئاستێکی باڵا لە توندوتیژی و وریاییەوە مامەڵە بکات، باسی لەوەش کردووە کە واشنتۆن نیگەرانە لە جەنگ و تارانیش نیگەرانە لە رێککەوتنەکە.

ئاژانسەکە لە کۆتاییدا نووسیویەتی: واشنتۆن خەرجییەکی زۆری لەم جەنگەدا کردووە، بەڵام هیچ سەرکەوتنێکی بەدەست نەهێناوە.

جۆن هیڵی وەزیری بەرگری بەریتانیا لەبەردەم پەرلەمانی وڵاتەكەی رایگەیاند، لەكاتی مەشق و راهێناندا لە بنكەیەكی سەربازیی لە سنوری هەولێر، روداوێك رویداوە و بەهۆیەوە سەربازێكی سوپای بەریتانیا گیانیلەدەستداوە، وتیشی، خێزانی ئەو سەربازە ئاگادار كراونەتەوە، بەڵام وردەكاری زیاتری نەخستەڕوو.

سوپای ئەمریكاش لە راگەیەندراوێكدا بڵاویكردەوە، سەربازێكی وڵاتەكەی لەكاتی مەشق و راهێناندا لە بنكەیەكی سەربازیی لە سنوری هەولێر گیانی لەدەستداوە.

راشیگەیاند، ئەو مەشق و راهێنانە لەگەڵ سوپای بەریتانیا بە هاوبەشی ئەنجامدراوە، كە ئەوانیش سەربازێكیان گیانی لەدەستداوە. 

پەیامنێری كوردسات نیوزیش رایگەیاند، گیانلەدەستدانی ئەو دوو سەربازەی بەریتانیا و ئەمریكا لە بنكەی سەربازیی هەریر بووە.

ئەردۆغان داوا دەكات لایەنەكان بەرپرسیارێتی سەرخستنی ئاشتی لە ئەستۆ بگرن، سەرۆكی پەرلەمانی توركیاش دەڵێت، كۆدەنگی لەسەر ئاشتی دروستبووە.

رەجەب تەیب ئەردۆغان سەرۆك كۆماری توركیا رایگەیاند، دەبێت هەموو لایەنە سیاسییەكان بەرپرسیارێتی سەركەوتنی پرۆسەی ئاشتی لە ئەستۆ بگرن، بەشێوەیەك پرۆسەكە لە بەرژەوەندیی هەموو خەڵكی توركیادا بێت.

نوعمان كورتوڵموش سەرۆكی پەرلەمانی توركیاش دەڵێت، زەمینەیەكی هاوبەش لە نێوان لایەنەكاندا هاتووەتە ئاراوە و پێویستە ئەو كۆدەنگییە فراوانەی لەسەر پرۆسەی ئاشتی دروستبووە لە دەست نەچێت و هەموان كار بۆ سەرخستنی بكەن.

دۆناڵد ترەمپ، سەرۆکی ئەمریکا جارێکی تر بیرۆکەی کردنی کەنەدای بە ویلایەتی 51ەمی ئەمریکا هێنایەوە ئاراوە، ئەمەش لە پاشبنەمای ئەو راپۆرتانەی کە ئاماژە بەوە دەکەن کەنەدا بەدەست پاشەکشەی تەکنەلۆژییەوە دەناڵێنێت.

سەرۆکی ئەمریکا لە سەکۆی "تروس سۆشیاڵ" نووسیویەتی: ویلایەتی پەنجا و یەکەم"، و هاوپێچ لەگەڵ بڵاوکراوەکەیدا وتارێکی ئاژانسی "بلومبێرگ"ی داناوە کە باس لە یەکەم دابەزینی راستەقینەی بەرهەمی ناوخۆیی گشتیی ئەو وڵاتە دەکات لە دوای پەتای کۆرۆنای ساڵی 2020ەوە.

پێشتریش سەرۆکی ئەمریکا چەندین جار رایگەیاندبوو کە پێویستە کەنەدا ببێتە ویلایەتی 51می ویلایەتە یەکگرتووەکانی ئەمریکا، چونکە "بە تەواوی پشت بە واشنتۆن دەبەستێت".

لەلای خۆیەوە، مارک کارنی، سەرۆک وەزیرانی کەنەدا لە لێدوانێکدا وەڵامی دایەوە و رایگەیاند کە وڵاتەکەی بە هیچ شێوەیەک نابێتە بەشێک لە ویلایەتە یەکگرتووەکانی ئەمریکا.

تەنانەت لە میانی گفتوگۆکانی نێوان هەردوو سەرکردەدا لە 6ی ئایاری 2025، ترەمپ داوای لە سەرکردایەتی کەنەدا کرد کە "هەرگیز نەڵێن هەرگیز"، سەرڕای جەختکردنەوەی کارنی لەسەر ئەوەی کە وڵاتەکەی "بۆ فرۆشتن نییە".

ئیسماعیل بەقائی وتەبێژی وەزارەتی دەرەوەی ئێران رایدەگەیەنێت، داواكارییە نوێیەكانی ئەمریكا ماوەی دانوستانەكان درێژ دەكاتەوە و تا ئێستا هیچ دانوستانێك لەسەر دۆسیەی ئەتۆمی نەكراوە. 

بەقائی لە كۆنفرانسی هەفتانەیدا رایگەیاند، داواكارییە نوێ و دژ بە یەكەكانی ئەمریكا رێڕەوی دانوستانەكان درێژ دەكەنەوە، چونكە كاتێك لایەنی بەرامبەر بەردەوام بێت لە گۆڕینی هەڵوێستەكانی و هێنانە پێشەوەی داواكاری نوێ، پرۆسەكە درێژە دەكێشێت.

وتیشی، تاران لەژێر سایەی بێ متمانەییدا دانوستان دەكات و ئاڵوگۆڕی پەیامەكانیش لە هەمان چوارچێوەدا بەڕێوەدەچن، تا ئێستاش هیچ دانوستانێك لەسەر دۆسیەی ئەتۆمی نەكراوە.

سەبارەت بە رەوشی لوبنانیش، بەقائی نیگەرانی دەربڕی لەوەی نەتەوە یەكگرتووەكان و ئەنجومەنی ئاسایش هیچ هەنگاوێكی كردارییان نەناوە، لەكاتێكدا رەوشەكە كاریگەری نەرێنی لەسەر ئاشتی و ئاسایشی نێودەوڵەتی هەیە.

 لە بەشێكی تری قسەكانیدا، بەقائی ئیسرائیلی وەك گەورەترین هەڕەشە بۆ سەر ئاشتی و ئاسایشی نێودەوڵەتی ناوبرد.

 

وەزارەتی بەرگریی عیراق، ئەمڕۆ دووشەممە، دەنگۆی کەوتنەخوارەوەی فڕۆکەیەکی سەر بە هێزی ئاسمانی سوپای رەتکردەوە و جەختی کردەوە کە ئەوەی رویداوە تەنها کێشەیەکی تەکنیکیی بچووک بووە لە کاتی گەشتێکی راهێناندا.

وەزارەتەکە لە بەیاننامەیەکدا رایگەیاند: هەندێک لە تۆڕە کۆمەڵایەتییەکان و دەزگاکانی راگەیاندن، هەواڵ و وێنەیەکیان بڵاوکردووەتەوە کە گوایە فڕۆکەیەکی سەر بە فەرماندەیی هێزی ئاسمانی سوپا کەوتووەتە خوارەوە، لەم رووەوە رونی دەکەینەوە کە ئەم هەواڵانە نادروستن و دوورن لە راستییەوە.

لە بەیاننامەکەدا هاتووە: ئەوەی رویداوە کێشەیەکی تەکنیکیی بچووک بووە لە کاتی ئەنجامدانی گەشتێکی راهێنانی تایبەت بە خوێندکارانی کۆلێژی فڕۆکەوانیی سوپا، هیچ برینداربوون یان زیانێکی قورسی لێنەکەوتووەتەوە، زیانەکان تەنها کەمێک سستی بووە لە سیستمی نیشتنەوەدا و بەپێی رێکارە تەکنیکییە پەسەندکراوەکان مامەڵەی لەگەڵدا کراوە.

بەیاننامەکە ئاماژەی بەوەش کردووە کە" ئەو وێنەیەی بڵاوکراوەتەوە پەیوەندی بەم روداوەوە نییە، بەڵکو وێنەیەکی کۆنی یەکێک لە فڕۆکەکانی فەرماندەیی هێزی ئاسمانی سوپایە کە لە ساڵانی رابردوودا و لە کاتی ئۆپەراسیۆنەکانی رزگارکردن دژی تاقمە تیرۆریستییەکان زیانی پێگەیشتبوو.

لە کۆتاییدا، وەزارەتی بەرگری داوای لە دەزگاکانی راگەیاندن و بەکارهێنەرانی تۆڕە کۆمەڵایەتییەکان کرد کە لە گواستنەوەی زانیارییەکاندا ورد بن، و پشت بە سەرچاوە رەسمییەکان ببەستن و خۆیان لە بڵاوکردنەوەی هەواڵی پشتڕاستنەکراوە بەدوور بگرن، بەهۆی ئەو چەواشەکارییەی کە لە رای گشتیدا دروستی دەکات.

 

رۆژنامەی "زە سەن"ی بەریتانی بڵاویکردەوە، کە نزیکەی 30 ئەفسەر لە یەکەی پاراستنی تایبەت و شاهانە، بە تۆمەتی پێشێلکاری و کەمتەرخەمی لە راپەڕاندنی ئەرکەکانیاندا لەژێر لێکۆڵینەوەدان.

بەپێی راپۆرتەکان، تۆمەتەکان خۆیان لە جێهێشتنی پێگە ئەمنییەکان لەلایەن هەندێک لە ئەفسەرەکانەوە دەبیننەوە، لە کاتێکدا گومان دەکرێت یەکێک لە کارمەندەکان ناوی خۆی وەک ئامادەبوو لە دەوامدا تۆمار کردبێت، بەڵام نەچووبێتە ئەو شوێنەی کە لە ناو قەڵاکەدا بۆی دیاریکراوە.

مارک رۆڵی، کۆمیساری پۆلیسی لەندەن، پشتڕاستی کردەوە کە ئیدارەی پێوەرە پیشەیییەکان لە پۆلیس، لێکۆڵینەوەیەکی بەپەلەی دەستپێکردووە دوای پێگەیشتنی "نیگەرانی جدی" سەبارەت بە ئەدای ژمارەیەک لەو ئەفسەرانەی کە ئەرکی پاراستنیان لە قەڵای ویندسۆر پێسپێردراوە.

رۆڵی ئاماژەی بەوەش کرد، لێکۆڵینەوەکە گومانی پەیوەندیدار بە "جێهێشتنی شوێنەکانی پاسەوانی بەبێ سەرپەرشتی، و خەوتن لە کاتی جێبەجێکردنی ئەرکدا" دەگرێتەوە.

یەکەی پاراستنی شاهانەی سەر بە پۆلیسی پایتەخت (سکۆتلاند) بەرپرسیارێتی پاراستنی ئاسایشی قەڵاکەی لەئەستۆیە، سەرەڕای ئەوەی قەڵاکە دەکەوێتە ناو سنووری جوگرافیی پۆلیسی دۆڵی تەیمزەوە.

راپۆرتەکان رونیان کردووەتەوە کە کۆشکی شاهانە (باکینگهام) ئاگاداری لێکۆڵینەوەکەیە، و ئەگەری هەیە تا کۆتایی هەفتەی داهاتوو بڕیاری راگرتنی هەندێک لەو ئەفسەرانە لە کارەکانیان بدرێت ئەگەر سەرپێچییەکانیان بەسەردا ساغ بێتەوە.

 

بافڵ جەلال تاڵەبانی سەرۆکی یەکێتیی نیشتمانیی کوردستان، لە 51 هەمین ساڵیادی دامەزراندنی یەکێتیی نیشتمانیی کوردستان دا پەیامێکی بڵاوکردووەتەوە و تێیداهاتووە:  یەکێتیی نیشتمانیی کوردستان بەڵێنە نەگۆڕەکەی دووپات دەکاتەوە، بۆ خەباتکردن لەپێناو تەواوی مافەکانی گەلی کورد لە هەموو شوێنێک، شانبەشانی خوشک و برا سەربەرزەکانمان لە عیراق.

دەقی پەیامەکە... 

لە ساڵیادی دامەزراندنی یەکێتیی نیشتمانیی کوردستاندا، لەم دۆخە سەختە ئابووری و ناسەقامگیرییە هەرێمییەی کە خەڵکەکەمانی تێدایە، ئەوە دووپات دەکەینەوە کە لەگەڵ کۆمەڵانی خەڵکی خۆماندا هاوپشت و هاوسەنگەرین.

دەمەوێت لە ناخی دڵمەوە سوپاسی کۆمەڵانی خەڵکی خۆمان بکەم بۆ ئارامگرتن و خۆڕاگرییان و دڵنیایان دەکەینەوە کە لەسەر هەوڵە بێوچانەکانمان بەردەوام دەبین بۆ خزمەتکردن و پاراستنیان. لە هەنگاوەکانی داهاتووماندا، یەکڕیزیی عیراق و گەشەسەندنی هەرێمی کوردستان وەک دوو کۆڵەکەی سەرەکی بۆ سەرکەوتنی وڵاتەکەمان دەمێننەوە. لەپێناو ئەمەشدا، لەگەڵ هاوپەیمان و دۆستەکانمان لە عیراق و سەرانسەری جیهان هەوڵەکانمان چڕتر دەکەینەوە.

هەروەها بە توندی سەرکۆنەی ئەو هێرشە نوێیانە دەکەین کە کراونەتە سەر هەرێمی کوردستان. کردەوەی لەم جۆرە هەڕەشە لە سەلامەتی و سەقامگیریی خەڵکەکەمان دەکات و هەوڵەکان بۆ بونیادنانی داهاتوویەکی ئارام و خۆشگوزەران بۆ هەموو عیراقییەکان تێکدەدەن.

لەم یادەدا، رێز لە میراتی بەردەوامی سەرۆک جەلال تاڵەبانی دەگرین، کە دیدگای بۆ پێکەوەژیان، دیالۆگ، دیموکراسی و هاوبەشیی نیشتمانی بەردەوام رێنیشاندەری رێگەکەمانە.

بۆ بەدەستهێنانی سەقامگیرییەکی بەردەوام، دەبێت بە جددی کار بکەین بۆ چاککردنەوە و بونیادنانی پەیوەندیی هاوسەنگ لەگەڵ وڵاتانی دراوسێدا، لە هەمان کاتدا دڵنیاببینەوە لەوەی کە عیراق بە سەربەخۆیی و سەروەریی خۆیەوە دەمێنێتەوە.

لە کۆتاییدا، یەکێتیی نیشتمانیی کوردستان بەڵێنە نەگۆڕەکەی دووپات دەکاتەوە، بۆ خەباتکردن لەپێناو تەواوی مافەکانی گەلی کورد لە هەموو شوێنێک، شانبەشانی خوشک و برا سەربەرزەکانمان لە عیراق.

هەر شاد و سەرکەوتووبن

بافڵ جەلال تاڵەبانی

سەرۆکی یەکێتیی نیشتمانیی کوردستان

ئاژانسی هەواڵی تەسنیم، ئەمرۆ دووشەممە، لە زاری چەند سەرچاوەیەکەوە رایگەیاند، تیمی دانوستانکاری ئێران دوای هێرشەکان بۆ سەر لوبنان، گۆڕینەوەی نامەکانی لەگەڵ ئەمریکا لە رێگەی نێوەندگیرەکانەوە راگرتووە.

سەرچاوەکان بەپێی ئاژانسە ئێرانییەکە ئاماژەیان بەوە کردووە: تیمی مفاوەزاتی ئێران بڕیاریداوە گفتوگۆکان و گۆڕینەوەی دەقەکان لە رێگەی نێوەندگیرەوە رابگرێت، ئەمەش بەهۆی بەردەوامیی ئۆپەراسیۆنە سەربازییەکانی ئیسرائیل لە لوبنان، و وەک جەختکردنەوەیەک لەسەر ئەوەی ئەم پەرەسەندنە پێشێلکردنی رێککەوتنی ئاگربرستە لەسەر سەرجەم بەرەکان.

بەپێی سەرچاوەکان، بەرپرسان و دانوستانکارانی ئێران جەختیان کردووەتەوە کە: مەرجی دەستپێکردنەوەی هەر جۆرە دیالۆگێک، گرێدراوە بە راگرتنی دەستبەجێی ئۆپەراسیۆنە دەستدرێژکارانە و دڕندانەکان لە غەززە و لوبنان، وێڕای کشانەوەی تەواوەتی ئیسرائیل لە ناوچە داگیرکراوەکانی لوبنان، و دووپاتیان کردووەتەوە کە هەر لێکتێگەیشتنێک بەندە بە جێبەجێکردنی بڕیاردەرانەی ئەم داواکارییانەوە.

سەرچاوەکان ئاشکراشیان کردووە کە: ئێران و بەرەی بەرگری، کۆمەڵێک هەنگاوی پەرەپێدانی گرژییەکانیان خستووەتە سەر کارنامەی خۆیان بە مەبەستی سزادانی زایۆنیستەکان و لایەنگرانیان، کە خۆی لە بەهێزیی نیاز بۆ داخرانی تەواوەتی گەروی هورمز و چالاککردنی بەرەکانی دیکە لە نێویاندا گەروی باب المەندەب دەبینێتەوە.

 

نێردەی حەجی عیراق، ئەمڕۆ دووشەممە، دەستپێکردنی پڕۆسەی گەڕانەوەی پێچەوانەی حاجیانی عیراقی لە رێگەی وشکانی و ئاسمانییەوە راگەیاند، وەک ئاماژەیەک بۆ دەستپێکردنی قۆناغی گەڕانەوەیان بۆ نیشتمان دوای تەواوکردنی مناسیکەکانی حەجی ئەمساڵ (1447کۆچی).

نێردەی حەج لە بەیاننامەیەکدا جەختی کردەوە: پڕۆسەی گەڕانەوەکە بەپێی خشتەیەکی کاتیی ورد و پلانێکی مەیدانی تۆکمە کە لەلایەن لێژنە تایبەتمەندەکانەوە ئامادەکراوە بەڕێوەدەچێت، بە هەماهەنگی وهاوکاری لەگەڵ هێڵی ئاسمانیی عیراقی، دەروازە سنوورییەکان، و لایەنە ئەمنییەکانی عیراق و سعودیە، بە شێوازێک کە گەڕانەوەی حاجیان بە ئاسانی و رێکوپێکی و بەبێ هیچ رێگرییەک لە رێگەی دەروازەی سنوریی عەرعەر و فڕۆکەخانەکانی عیراقەوە مسۆگەر بکات.

ئەوەشی رون کردەوە کە کادیرەکانیان لە مەککەی پیرۆز، مەدینەی منەوەرە، فڕۆکەخانەکان و دەروازە وشکانییەکان بەردەوامن لە کارەکانیان بە شێوەی شەو و رۆژ بۆ چاودێریکردنی رێکارەکانی بەڕێکردن و پێشکەشکردنی هەموو جۆرە پاڵپشتییەک بۆ حاجیان، وێڕای رێکخستنی جووڵەی گواستنەوە و ئاسانکاری گەشتەکەیان تا گەیشتنیان بە سەرجەم پارێزگاکان.

نێردەی حەج ئاماژەی بەوەش کرد کە سەرکەوتنی قۆناغی گەڕانەوەی حاجیان دەبێتە درێژکراوەی ئەو سەرکەوتنانەی لە وەرزی حەجی ئەمساڵدا بەدەستهاتوون، کە تێیدا خزمەتگوزاریی گشتگیر لە بوارەکانی نیشتەجێکردن، گواستنەوە، بژێوی، چاودێریی تەندروستی و رێنوێنی ئایینیدا پێشکەش بە حاجیانی عیراقی کرابوو، ئەمەش یارمەتیدەربوو لە ئەنجامدانی مناسیکەکان لە کەشێکی ئارامدا.

 

 

بە بۆنەی 51 ساڵەی دامەزراندنی یەکێتیی نیشتیمانیی کوردستانەوە، فەرماندەیی هێزەکانی70 ـی وەزارەتی پێشمەرگە راگەیەندراوێکی بڵاوکردەوە  و تێیدا هاتووە؛ لەم یادە پڕ شکۆیەدا بەڵێنی وەفاداری و مانەوە لەسەر رێبازی شەهیدان و پارێزگاری لە دەستکەوتەکانی خەڵک و خاکی پیرۆزی کوردستان دوپات دەکاتەوە.

ئاماژەیان بەوەشکردوە، یەکێتی لەسەرەتای دامەزراندنیەوە تا ئێستاش وەکو کاریگەرترین هێزی سیاسی بەردەوامە لە خەبات و خزمەت و بەدیهێنانی ئاشتی و پێکەوە ژیانی مافی نەتەوەکان و خزمەت کردن بە خاک و کۆمەڵانی خەڵکی کوردستان .

دەقی راگەیەندراوەکەی فەرماندەیی هێزەکانی70

ئەمڕۆ ١ی حوزەیرانی ٢٠٢٦، بە ئامادەبوونی بەڕێز فەرماندەی هێزەکانی٧٠ و ئەفسەرانی باڵای هێزەکانی٧٠ بۆ ڕێزگرتن لە یادی دامەزراندنی یەکێتی نیشتیمانی کوردستان سەردانی مەزاری سەرۆک ″مام جەلال″یان کرد بە مەبەستی بەرز ڕاگرتنی یادی٥١ ساڵەی دامەزراندنی یەکێتی نیشتیمانی کوردستان.

ئامادەبوان بە خولەکێک وەستان بۆ ڕێزگرتن لە ڕۆحی پاکی سەرۆک ″مام جەلال″ و سەرجەم شەهیدانی ڕێگای ڕزگاری کوردستان و دانانی تاجە گوڵینەی هێزەکانی٧٠ لە لایەن بەڕێز فەرماندەی هێزەکانی ٧٠وە لەسەر مەزاری سەرۆک مام جەلال .

لەپاش دامەزراندنی یەکێتی نیشتیمانی کوردستان وهەڵگیرساندنی شۆڕشی نوێی گەلەکەمان و لە دوای تێکۆشانێکی زۆر لە خەباتی شاخ و قوربانیدان و دوای ١٦ساڵی دامەزراندنی بێوچان لە ڕاپەڕینی بەهاری ساڵی ١٩٩١ بە هەوڵ و دانایی و تێکۆشان و ڕابەرایەتی سەرۆک ″مام جەلال″ و هێزی پێشمەرگەی کوردستان یەکێتی نیشتیمانی کوردستان گەیشتە قۆناغی ڕزگاری و سەرفرازی خاک و گەلی کوردستان هەر لەو کاتە بەدواوە زەمینەی بیناکردنی ئەزمونی دیموکراتی و حکومی فیدراڵی هەرێمی کوردستانی لە دەستوری عێراقی فیدراڵ چەسپاند و تاوەکو ڕۆژگاری ئەمڕۆش وەکو کاریگەرترین هێزی سیاسی بەردەوامە لە خەبات و خزمەت و بەدیهێنانی ئاشتی وپێکەوە ژیانی مافی نەتەوەکان و خزمەت کردن بە خاک و کۆمەڵانی خەڵکی کوردستان .

لەم یادە پڕ شکۆیەدا فەرماندەیی هێزەکانی ٧٠ بەڵێنی وەفاداری و مانەوە لەسەر ڕێبازی شەهیدان و پارێزگاری لە دەستکەوتەکانی خەڵک و خاکی پیرۆزی کوردستان دووپات کردەوە .

دوبارە ساڵیادی دامەزراندنی یەکێتی نیشتیمانی کوردستان بەرزو پیرۆزبێت .

فەرماندەیی هێزەکانی ٧٠

١ی حوزەیران ٢٠٢٦

 

عەباس عراقچی، وەزیری دەرەوەی ئێران، ئەمڕۆ دووشەممە جەختی لەوە کردەوە کە ئاگربە ستەکە سەرجەم بەرەکان بەبێ جیاوازی دەگرێتەوە، بە گۆڕەپانی لوبنانیشەوە، هاوكات هۆشداریی دا لە لێکەوتەکانی هەر جۆرە پێشێلکارییەکی ڕێککەوتنەکە.

عراقچی لە پۆستێکدا بە زمانی ئینگلیزی لە تۆڕی کۆمەڵایەتی "إکس" رایگەیاند: ئاگربەست واتە راگرتنی شەڕ لە سەرجەم بەرەکان بە لوبنانیشەوە، 

وتیشی: پێشێلکردنی ئاگربەست لە یەک بەرەدا، وەک پێشێلکردنی رێککەوتنەکە لەسەر سەرجەم بەرەکان ئەژمار دەکرێت.

وەزیری دەرەوەی ئێران ویلایەتە یەکگرتووەکانی ئەمریکا و ئیسرائیلی بە بەرپرسیار دانا لە بەرانبەر هەر پێشێلکارییەکی ئەگەریی بۆ سەر رێککەوتنەکە، و جەختی کردەوە کە لێکەوتەکانی ئەو بابەتە دەکەوێتە ئەستۆی هەردوو لا.

 

وەزارەتی پێشمەرگەی هەرێم، رایگەیاند وەزیری پێشمەرگە ئیمزای لەسەر پلەبەرزکردنەوەی ئەفسەرانی هێزەکانی 70، هێزەکانی پشتیوانی، فەرماندەیی بەرگریی و فریاکەوتن کرد، کە ژمارەیان 1385 ئەفسەرە، وەزیری پێشمەرگەش رایگەیاند؛ ئەم پلەبەرزکردنەوەیە، شایستەییەکی یاسایی و دەرەنجامی راستەوخۆی دڵسۆزی، ماندووبوون و شەونخونیانە.

وەزارەتی پێشمەرەگە، راگەیەندراوێکی بڵاوکردوەتەوە  و تێیدا هاتووە؛ ئەمڕۆ دووشەممە، شۆڕش ئیسماعیل، وەزیری کاروباری پێشمەرگەی حکومەتی هەرێمی کوردستان، ئیمزایی لەسەر خشتەکانی پلەبەرزکردنەوەی ئەفسەرانی (فەرماندەیی هێزەکانی 70ی پێشمەرگە، هێزەکانی پشتیوانی یەک، هێزەکانی پشتیوانی دوو، و فەرماندەیی هێزەکانی بەرگری و فریاکەوتن) کرد.

وەزارەتی پێشمەرگە ئاماژەی بەوەشکردوە، بە گوێرەی خشتەکان، ئەو ئەفسەرو پێشمەرگانەی پلەکانیان بەرز کراوەتەوە ژمارەیان هەزار و 385 کەسە.

 وەزیری پێشمەرەگە دوای ئیمزاکردنی پلەبەرزکردنەوەکەیان، پەیامێکی پیرۆزبایی ئاراستەی سەرجەم ئەو ئەفسەرانە کردوە و دەڵێت؛  ئەم پلەبەرزکردنەوەیە، شایستەییەکی یاسایی و دەرەنجامی راستەوخۆی دڵسۆزی، ماندووبوون و شەونخونی ئێوەی تێکۆشەرە لە راپەڕاندنی ئەرکەکانتان و پاراستنی خاکی پیرۆزی کوردستان.

هەروەها جەختیکردوەتەوە، ئێستا پرۆسەکە بە شێوەیەکی ئاسایی و یاسایی لە کات و وادەی خۆیدا جێبەجێ دەکرێت و ئەم قۆناغە نوێیەی پلەبەرزبوونەوەتان دەبێتە پاڵنەرێکی بەهێزتر بۆ بەردەوامبوون و پەرەپێدانی توانا سەربازییەکانی هێزی پێشمەرگەی کوردستان و سەرخستنی پرۆسەی چاکسازی و یەکخستنەوەی هێزەکانمان لەژێر چەتری وەزارەتی پێشمەرگەدا.