هەواڵەکان
جارێكی تر، عەجاج تاونباری دۆسیەی ئەنفال، لەسەر دۆسیەی ئەشكەنجەدانی كوردانی فەیلی دەبرێتەوە بەردەم دادگا.
عەجاج ئەحمەد حەردان، بەڕێوەبەری پێشووی زیندانی نوگرەسەلمان كە لە ئێستادا سزای لەسێدارەدانی بەسەردا سەپێنراوە، روبەڕووی دۆسیەیەكی نوێی دادگاییكردن دەبێتەوە لەسەر ئەشكەنجەدان و تاوانكاری دژی كوردانی فەیلی.
بەپێی زانیارییەكان، دادگای لێكۆڵینەوە لە بەغداد دەستی بە وەرگرتنی وتەی سكاڵاكاران كردووە، ئەوەش دوای ئەوەی چەند هاووڵاتیەكی كوردی فەیلی، لە رێگەی بەڵگەی یاساییەوە، سكاڵایان دژ بە عەجاج و چەند ئەفسەرێكی تری رژێمی پێشوو تۆمار كردوە.
عەجاج ئەحمەد حەردان، ناسراو بە عەجاجی نوگرەسەلمان، لە 31ی تەممووزی 2025 دەستگیركرا و دواتر لە 14ی ئایاری 2026 لەلایەن دادگای تێهەڵچوونەوەی رەسافەی بەغداد، بەهۆی تێوەگلانی لە تاوانەكانی ئەنفال سزای لەسێدارەدانی بەسەردا سەپێندرا.
عەجاج لەسەر دۆسیەی ئەشكەنجەدانی كوردانی فەیلی دەبرێتەوە بەردەم دادگا
لە بڕیارێکی بێپێشینەدا لە دوای سەرهەڵدانی پەتای کۆرۆناوە، دەسەڵاتدارانی سعودییە پرۆسەی خوێندنی رووبەڕوویان لە ریازی پایتەخت راگرت و شێوازی خوێندنیان بۆ سیستەمی ئەلکترۆنی گۆڕی.
لە رێگەی ئاگادارییەکی رەسمییەوە، وەزارەتی پەروەردەی سعودییە کەسوکاری قوتابیانی ئاگادارکردووەتەوە کە چوون بۆ ناو پۆلەکان راگیراوە و وانەکان لە رێگەی پلاتفۆرمی ئەلکترۆنیی "مدرستي"یەوە بەڕێوەدەچن.
ئەم رێکارە لە کاتێکدایە کە ناوچەکە رووبەڕووی ئاڵۆزیی ئەمنی بۆتەوە و هێرشە ئاسمانییەکانی حوسییەکانی یەمەن بۆ سەر ریاز و چەند شارێکی تری سعودییە بەردەوامن، ئەوەش وەک گوشارێکی سەربازی لە چوارچێوەی ئاڵۆزییە هەرێمییەکاندا.
دەستەی باڵای حەج و عومرەی عیراق ئەنجامدانی پرۆسەی تیروپشکی ئەلکترۆنی بۆ دیاریکردنی حاجییان راگەیاند.
بەپێی راگەیەندراوێکی رەسمیی دەستەکە: پرۆسەی تیروپشکە ئەلکترۆنییەکە بۆ هەڵبژاردنی ئەو هاووڵاتییانەیە کە فەریزەی حەج بۆ ساڵانی (2027ی تەکمیلی، 2028، 2029 و 2030) ئەنجام دەدەن.
روونیشکراوەتەوە:پرۆسەکە بە سەرپەرشتی دادوەرانی ئەنجومەنی باڵای دادوەری و بە ئامادەبوونی ژمارەیەک لە ئەندامانی پەرلەمان، ئەنجومەنی پارێزگاکان و نوێنەرانی لایەنە پەیوەندیدارەکان بەڕێوەدەچێت.
دەستەی حەج و عومرە جەختی کردووەتەوە: ئەم رێکارە ئەلکترۆنییە بۆ دەستەبەرکردنی شەفافیەت، دادپەروەری و رەخساندنی دەرفەتی یەکسانە، هاوکات رێگری لە هەر دەستوەردانێک لە ئەنجامەکاندا دەکات.
سیستەمی تیروپشکەکە لەلایەن چەندین لایەنی رەسمیی شارەزاوە پشتڕاستکراوەتەوە؛ ئەنجامەکانیش تەنیا لە رێگەی ماڵپەڕی رەسمی و لاپەڕە باوەڕپێکراوەکانی دەستەکەوە لە تۆڕە کۆمەڵایەتییەکان بڵاودەکرێنەوە.
لە روداوێکی ئەمنیدا لە سنووری ناحیەی رەشادی سەر بە پارێزگای کەرکووک، گولە هاوەنێک لە دەشتاییەکانی گوندی "مەلەحە" کەوتە خوارەوە.
بەپێی زانیارییە ئەمنییە سەرەتاییەکان، ئامانجی شوێنی کەوتنەخوارەوەی گولە هاوەنەکە ناوچەیەکی لەوەڕگای مەڕوماڵات بووە لە دەرەوەی گوندەکە؛ لە ئەنجامی تەقینەوەکەشدا ئافرەتێکی تەمەن 38 ساڵ دەستبەجێ گیانی لەدەستداوە.
دەزگا ئەمنییەکان رێکاری لێکۆڵینەوەی بەپەلەیان لە شوێنی روداوەکە دەستپێکردووە بۆ دیاریکردنی ئاڕاستەی هاویشتن و سەرچاوەی دەستڕێژەکە، تاوەکو ئێستاش روون نەبووەتەوە کە ئایا کردەوەکە لەلایەن گروپە چەکدارەکانی داعشەوە ئەنجامدراوە یان بەهۆی هەڵەی مەشق و جووڵەی سەربازیی هێزە فیدراڵییەکانەوە رویداوە.
وەزارەتی ناوخۆی حکومەتی هەرێمی کوردستان رایگەیاند، سیستەمی تۆمارکردنی سەرپێچیی هاتوچۆ لەنێوان هەرێم و پارێزگاکانی تری عیراق بە شێوەیەکی دوولایەنە کاراکراوە و لەمەودوا ئەو ئۆتۆمبێلانەی هەڵگری تابلۆی هەرێمن لە کاتی ئەنجامدانی سەرپێچی لە باشور و ناوەڕاستی عیراق سزا دەدرێن، بە هەمان شێوەش بۆ ئۆتۆمبێلی پارێزگاکانی تری جێبەجێ دەکرێت.
هێمن میرانی، بەڕێوەبەری گشتیی دیوانی وەزارەتی ناوخۆ لە کۆنگرەیرکی رۆژنامەوانیدا، ئاماژەی بەوە کرد: ئەمڕۆ پڕۆسەی تۆماری ئەلکترۆنی لە هۆبەی ئۆتۆمبێلی بار لە بەڕێوەبەرایەتیی هاتوچۆی هەولێر دەستی پێکردووە کە مامەڵەکانی گواستنەوەی خاوەندارییەتی و نوێکردنەوەی ساڵیانە و مۆڵەت دەگرێتەوە.
روونیشیکردەوە: رسوماتەکان وەک خۆیان دەمێننەوە و کار ئاسانیی خێرا بۆ هاووڵاتییان دەکرێت و ئەزموونەکە بۆ بەڕێوەبەرایەتییەکانی دیکەش دەگوازرێتەوە.
ناوبراو جەختیشی کردەوە لە بوونی هەماهەنگییەکی بەرز لەگەڵ بەڕێوەبەرایەتییە فیدراڵییەکانی هاتوچۆ لە بەغداد و پارێزگاکان؛ ئاماژەی بەوەش کرد: لە ئێستادا ئامادەکاری دەکرێت بۆ ئەوەی پێدانی غەرامەکان بێتە سەر سیستەمی ئەلکترۆنی.
هۆشداریشی دا: رێگە بە جووڵەی هیچ ئۆتۆمبێلێک لە شەقامەکانی هەرێمدا نادرێت ئەگەر مەرجەکانی سەلامەتی و ئاسایشی تێدا نەبێت.
لە چوارچێوەی چالاکییە هونەری و کولتوورییەکانی شاری سلێمانیدا، دامەزراوەی "چەتری کولتووریی سلێمانی" ئیڤێنتێکی تایبەتی هونەری بۆ راگەیاندنی رەسمیی دامەزراوەکە و دەستپێکی چالاکییەکانی بەڕێوەدەبات.
بڕیارە مەراسیمەکە رۆژی یەکشەممە، 27ی ئەیلوولی 2026، سەعات 5:30ی ئێوارە لە هۆڵی تەلاری هونەر لە شاری سلێمانی ئەنجام بدرێت.
سەرپەرشتیارانی ئیڤێنتەکە رایانگیاندووە کە ئامادەبوونی رۆشنبیران، هونەرمەندان و ئاشقانی کولتوور و هونەر دەبێتە پشتیوانییەکی گەورە بۆ سەرکەوتنی پڕۆژەکەیان.
حکومەتی عیراق لە کۆبوونەوەیەکدا بە سەرۆکایەتیی عەلی زەیدی سەرۆکی ئەنجومەنی وەزیران، بڕیاریدا بە راگەیاندنی پشووی رەسمی لە سەرجەم دامودەزگاکانی دەوڵەتدا، لە رۆژی چوارشەممەی داهاتوو 30ی ئەیلوول تا رۆژی شەممە 3ی تشرینی یەکەم.
ئەم پشووە وەک رێزلێنان و ئاهەنگگێڕانێکە بە بۆنەی "رۆژانی سەروەری" کۆماری عیراق.
چاوەڕوان دەکرێت لە 30ی ئەیلوولدا، عیراق بە رەسمی کشانەوەی تەواوەتی هێزەکانی هاوپەیمانی نێودەوڵەتی بۆ بەرەنگاربوونەوەی داعش رابگەیەنێت، ئەو هاوپەیمانییەی کە دوای نیوەی ساڵی 2014 و لە دوای کۆنتڕۆڵکردنی چوار شاری عیراق لەلایەن ئەو رێکخراوەوە پێکهێنرا.
.
عەباس عراقچی، وەزیری دەرەوەی ئێران، رەخنەی توندی لە لێدوانەكانی سەرۆكی ئەمریكا گرت و بە دژبەیەك وەسفی كرد، ئەوەش دوای ئەوەی پێشنیازەكەی ئێرانی بۆ سەرلەنوێ كۆنتڕۆڵكردنەوە و ئاساییكردنەوەی هاتوچۆ لە گەروی هورمز راگەیاند.
عراقچی راشیگەیاند: تاران چاوەڕێی وەڵامی كۆتایی نێوەندگرەكان دەكات بۆ بڕیاردانی گونجاو، جەختیشی كردەوە، هەر پێشڕەوییەك لە داهاتوودا بەستراوەتەوە بە جێبەجێكردنی مەرجە راگەیەندراوەكانی ئێرانەوە.
وەزیری دەرەوەی ئێران ئاماژەی بەوەشكرد: ئەو مەرجانە بە وردیی روون كراونەتەوە و لە رێگەی نێوەندگرەكانەوە گەیەندراونەتە لایەنی ئەمریكی.
وەزیری گەنجینەی ئەمریكا جەختلەوەدەكاتەوە وەفدیان رەوانەی وڵاتانی جیاوازی جیهان كردووە بۆ دانوستان لەگەڵ حكومەتەكان و داواكردنی گرتنەبەری رێكاری توندی ئابوری بەرانبەر ئێران.
سكۆت بێسێت، وەزیری گەنجینەی ئەمریكا بەیانی ئەمرۆ جەختی كردەوە، واشنتۆن بەردەوامە لە زیاتركردنی فشارەكان بۆ سەر ئێران لە رێگەی بەئامانجگرتنی سێكتەرەكانی دارایی و فڕۆكەوانی.
راشیگەیاند، بە فەرمانی ئیدارەی ئەمریكا، وەفدیان رەوانەی وڵاتانی جیاوازی جیهان كردووە بۆ دانوستان لەگەڵ حكومەتەكان و داواكردنی گرتنەبەری رێكاری توند بەرانبەر ئێران، وتیشی، ئەم هەوڵانە ئەنجامی ئەرێنییان هەبووە.
روونیشی كردەوە، لە چوارچێوەی هەڵمەتی فشاری ئابوری ئێران وەزارەتی گەنجینە ڕێكاری دارایی توندی دژی بانكەكان و كۆمپانیاكانی خزمەتگوزاریی فڕۆكەوانی سەپاندووە.
ئاماژەی بەوەشكرد، بەشێك لە وڵاتان گەشتەكانی كۆمپانیای ماهان ئەیڕیان راگەیاندووە، لەوانە توركیا و ئیمارات
وەزیری گەنجینەی ئەمریكا دەشڵێت، سەركردایەتیی ئێران دانیناوه بە كاریگەرییە ئابوورییە سەختەكانی جەنگدا، بەتایبەت لەگەڵ دابەزینی بەهای ریاڵی ئێرانی بۆ ئاستێكی پێوانەیی نزم، وتیشی بەردەوام دەبین لە كاركردن، چونكە هێشتا كاری زیاتر ماوە بیكەن.
وتەبێژی حكومەتی عیراق رایگەیاند، لە چەند رۆژی داهاتوودا كاروانێكی نوێی دۆلاری كاش لە ئەمریكاوە دەگاتە بەغداد.
حەیدەر عەبودی وتەبێژی حكومەتی عیراق راگەیاند، دوای سەردانەكەی عەلی زەیدی بۆ ئەمریكا، لێكتێگەیشتن کراوە بۆ بەردەوامبوونی ناردنی دۆلاری كاش بۆ بەغداد.
ئاماژەی بەوەش كردووە، بڕیارە لە چەند رۆژی داهاتوودا كاروانێكی نوێی دۆلار بگاتە عیراق ئەمەش بەشدار دەبێت لە پڕكردنەوەی پێداویستییەكانی بازاڕ بە دراوی بیانی.
وتەبێژی حكومەتی عیراق روونیشیكردووەتەوە، ئەم لێكتێگەیشتنە لەگەڵ واشنتۆن دەرەنجامی ئەو بەرەوپێشچوونانەیە كە عیراق لە بەهێزكردنی سیستەمی چاودێریی بەسەر دابەشكردنی دۆلار و رێگریكردن لە خراپ بەكارهێنانی بەدەستیهێناوە.
قوباد تاڵەبانی پیرۆزبایی لە سەرۆک، دەستەی کارگێڕی، راهێنەران و یاریزانانی تیپی بالەی کچانی ئافرۆدێت کرد و پشتیوانی خۆی بۆ دووپات کردنەوە.
قوباد تاڵەبانی جێگری سەرۆک وەزیرانی هەرێم رایگەیاند، جێی خۆشحاڵییە ساڵ لە دوای ساڵ وەرزشی ژنان لە کوردستان زیاتر گەشە دەکات، بە تایبەتیش لە بالەدا یانە وەرزشییەکانی ژنان و کچانی کوردستان پێشکەوتنی بەرچاویان بەخۆوە بینیوە و ئێستا یانەکانی کوردستان لەسەر ئاستی عیراقدا پێشەنگن.
ئاماژەی بەوەشکرد، "پێشوازیم کرد لە سەرۆک، دەستەی کارگێڕی، راهێنەران و یاریزانانی تیپی بالەی کچانی ئافرۆدێت کە بوونەتە پاڵەوانی ئەمساڵی خولی بالەی عیراق و پیرۆزبایی ئەم سەرکەوتنە گەورەیەم لێکردن و پشتیوانیی تەواوی خۆم بۆ دووپات کردنەوە".
قوباد تاڵەبانی وتیشی: داوام لێکردن ئامادەکاری بکەن بۆ ئەوەی نەک تەنها لە پاڵەوانێتییەکانی کوردستان و عیراق نازناوی زیاتر بەدەست بهێنن، بەڵکو ببنە ناوێکی دیار لە پاڵەوانێتییە نێودەوڵەتییەکانیشدا.
خاتوو شاناز ئیبراهیم ئەحمەد، پەیامێکی بڵاوکردووەتەوە و تێیداهاتووە، "لەم ساتەدا دڵنەوایی کەسوکاری شەهیدان و قوربانیانی زوڵم و ستەمی رژێمی لەناوچوو ئەکەم و پێیان ڕائەگەیەنم کەچیتر رووفاتی پیرۆزی ئازیزانیان گۆڕ غەریبی نێو بیابانە دوورە دەستەکانی سەماوە و تەل شێخییە نابن و دێنەوە ئامێزی نیشتمان".
دەقی پەیامەکە
پڕ بەدڵ خۆشحاڵ بووم کە قۆناغی دووەمی گێڕاندنەوەی رووفاتی ئەنفالکراوانی ڕۆڵەکانی گەلەکەمان لەبیابانەکانی تەل شێخیەوە بەرەو خاکی نیشتمان دەستی پێکرد.
لەم ساتەدا دڵنەوایی کەسوکاری شەهیدان و قوربانیانی زوڵم و ستەمی رژێمی لەناوچوو ئەکەم و پێیان ڕائەگەیەنم کەچیتر رووفاتی پیرۆزی ئازیزانیان گۆڕ غەریبی نێو بیابانە دوورە دەستەکانی سەماوە و تەل شێخییە نابن و دێنەوە ئامێزی نیشتمان.
وەک چۆن پێشتر دەستمان دایە ئەم ئەرکە نیشتمانیی و مرۆییە و بەڵێنمان دا بەکەسوکاریان کە فریادڕەسی سارێژکردنی برین و خەمەکانیان بین لەو ساتەدا کەدۆسیەکە چەندین ساڵ بوو بەبەهانەی جیاواز پشتگوێخرابوو، ئاوەهاش ئەرکی خۆمان بەجێگەیاند لە دەستپێکردنەوەی هەڵمەتی هەڵدانەوەی گۆڕە بەکۆمەڵەکانی ئەنفال و هێنانەوەی قۆناغی یەکەمی ڕووفاتەکانی نێو گۆڕە بەکۆمەڵەکان بەڕێز و پێزانین و بەرێورەسمی شایستەو ئەنجامدانی پشکنین و وەرگرتنی سامپڵی خوێن و جوڵاندنی دۆسیەی تاوانبارانی ئەنفال لە دادگا و بەسزاگەیاندنی تاوانبار عەجاجی نوگرەسەلمان.
ئەم کاروانە بەردەوام دەبێ تا ساڕێژبوونی برینی قوڵی جینۆسایدی گەلی کورد و قوربانیانی شاڵاوە بێ رەحمانەکانی ئەنفال.
رۆحتان شاد و نیشتمان ئامێزی گەرمی بۆتان کراوەیە.
شاناز ئیبراهیم ئەحمەد
بەڕێوەبەری نووسینگەی فەرماندەی گشتیی هێزە چەکدارەکانی عیراق بۆ کەناڵی عەرەبییە رایگەیاند، دوای 30ی ئەیلوول هیچ هێزێکی شەڕکەر و بنکەی سەربازیی بیانی لە عیراق نامێنن.
بەڕێوەبەری نووسینگەی فەرماندەی گشتیی هێزە چەکدارەکانی عیراق لە لێدوانێکدا بۆ کەناڵی عەرەبییە ئاماژەی بەوەکرد: هێزە ئەمریکییەکان لە 30ی ئەیلوولدا بە یەکجاری دەکشێنەوە و لە دوای ئەو بەروارەوە هیچ هێزێکی شەڕکەر یان بنکەی سەربازیی بیانی لە خاکی عیراقدا بوونیان نا بێت.
ئەو بەرپرسە سەربازییە روونیشی کردەوە: بنکەی ڤیکتۆریا لە ئێستادا بە تەواوی لە ئامادەیی و بوونی سەربازانی ئەمریکی چۆڵ کراوە و بڕیارە بکرێتە ناوەندێک بۆ پێشوازیکردن لە نێردە دیپلۆماسییەکان.
لە بەشێکی تری لێدوانەکەیدا ئاشکرای کرد کە سوپای تورکیاش لە ماوەی 60 رۆژدا بنکەی سەربازیی زلێکان چۆڵ دەکات.
وەزارەتی خوێندنی باڵا و توێژینەوەی زانستی رایگەیاند، سەعات 12ی ئەمشەو، ماوەی پێشکەشکردن بۆ زانکۆلاین بۆ دەرچووانی دوانزەی ئامادەیی (زانستی، وێژەیی، پیشەیی و خوێندنگە نێودەوڵەتییەکان) لە رێگەی وێبسایتی (regayzanko.com) کۆتایی دێت و راشیگەیاند کە چیتر ماوەکە درێژ ناکرێتەوە.
وەزارەتی خوێندنی باڵا ئاماژەی بەوەش کردووە: ئەو خوێندکارانەی تا ئێستا زانکۆلاینیان پڕنەکردووەتەوە، دەتوانن لەم چەند سەعاتەی ماوەدا فۆرمەکەیان تەواو بکەن
وجەختیشی کردەوە: لە رێگەی سیستەمەکەوە فۆرمەکان بنێرن، چونکە بڕیارەکە هەموو بەش و خوێندنگە نێودەوڵەتی و پیشەیییەکانیش دەگرێتەوە.
روانگەی ئیكۆ عیراق دەڵێت، عیراق بۆ پڕكردنەوەی خواستی ناوخۆ لەسەر كارەبا بەڕێژەی 41٪ پشت بە كڕینی كارەبا لە وڵاتانی دراوسێ و دامەزراوە بیانییەكان دەبەستێت.
روانگەی " ئیكۆ عیراق" بۆ كاروباری ئابووری بە پشتبەستن بە داتا و ئاماری ساڵانی وەزارەتی كارەبای عیراق بڵاویكردووەتەوە، كۆی گشتی ئاستی بەرهەمهێنانی كارەبا لە ساڵی 2025ـدا زیاتر لە 170 ملیۆن مێگاوات كارەبا بووە، لەو بڕەش بە رێژەی تەنها 59٪ـی بەرهەمی ناوخۆ بووە لە كارەبا.
ئەوەشی خستووەتەڕو، عیراق بۆ پڕكردنەوەی خواستی ناوخۆ لەسەر كارەبا بەڕێژەی 41٪ـی پشت بە كڕینی كارەبا لە وڵاتانی دراوسێ و دامەزراوە بیانییەكان دەبەستێت.
روانگەی ئیكۆ عیراق دەشڵێت، بەهۆی وشكەساڵی و قەیرانی ئاوەوە، ئاستی بەرهەمهێنانی وێستگە كارۆ ئاوییەكانی عیراق بەرێژەی نزیكەی 51٪ كەمیكردووە، بەجۆرێك ساڵی 2024 ئاستی بەرهەمهێنانی ئەو وێستگانە 3.48 ملیۆن مێگاوات بووە لە ساڵی دواتریشدا كەمبووەتەوە بۆ نزیكەی 1.71 ملیۆن مێگاوات.
سیستەمی گەورەی سەرچاوە مرۆییەکانی وەزارەتی بەرگریی ئەمریکا (پنتاگۆن) تووشی هێرشێکی ئەلیکترۆنی بووەوە و بەهۆیەوە ژمارەی دەستەبەری کۆمەڵایەتی و زانیاریی کەسیی سەربازانی ئێستا و پێشوو دزەی پێکراوە، روداوەکە نیگەرانیی بەرفراوانی لە بواری دژەسیخوڕیدا لای شارەزایانی ئاسایشی نەتەوەیی دروستکردووە، بەتایبەت لەم کاتەدا کە واشنتۆن لە رووبەڕووبوونەوەی سەربازیی راستەوخۆدایە لەگەڵ ئێران.
بەپێی نامەیەک کە ناوەندی زانیاریی هێزەکانی وەزارەتی بەرگری (DMDC) بۆ کەسانی زیانلێکەوتووی هاکەکەی ناردووە: "بەکارهێنەرانی رێگەپێنەدراو" لە تشرینی یەکەمی ساڵی رابردووەوە توانیویانە دەستیان بگات بە سێرڤەرێکی لاوازی ناوەندەکە، بەڵام پنتاگۆن تەنها دوای نۆ مانگ و لە تەممووزی رابردوودا بە کێشەکەی زانیوە و چارەسەری کردووە، وەک تۆڕی "سی ئین ئین" بڵاویکردووەتەوە.
بەپیی تۆڕی "سی ئین ئین": ئەگەرچی ژمارەی دروستی تۆمارە درزپێکراوەکان نەزانراوە، بەڵام رۆژنامەی "میلیتاری تایمز" ئاماژەی بەوە کردووە کە رەنگە نزیکەی چوار ملیۆن ئەندامی وەزارەتی بەرگریی ئەمریکا بەر کەوتبن.
هەر بەپیی زانیارییە دزەپێکراوەکان: پنتاگۆن رایگەیاندووە تا ئێستا ئاماژەیەک نییە بۆ بەکارهێنانی خراپی زانیارییەکان، بەڵام یەکێک لەو زانیارییانەی هاککەرەکان دەستیان پێگەیشتووە "پسپۆڕیی وەزیفی"ی سەربازەکان بووە.
تۆڕی "سی ئین ئین" ئەوەشی روون کردەوە: بەستنەوەی "پسپۆڕیی وەزیفی" بە ئامار و ژمارەی دەستەبەری کۆمەڵایەتی، مەترسییەکی دووئەوەندە دروست دەکات، چونکە وێنەیەکی روونتر دەداتە رکابەرەکانی ئەمریکا دەربارەی ناسنامەی ئەو کەسانەی ئەرکی تایبەت بۆ سوپای ئەمریکا لە ناوچە جیاوازەکانی جیهاندا جێبەجێ دەکەن.