هەواڵەکان
بڕیارە ئەمڕۆ، ئەنجومەنی نوێنەرانی عیراق کۆبێتەوە و تێیدا پۆستی سەرۆک کۆمار یەکلای بکرێتەوە و بەگوێرەی کارنامەیەک، کە پێشتر لەلایەن فەرمانگەی راگەیاندنی ئەنجومەنی نوێنەرانی کە بڵاوکراوەتەوە، سەعات 11ـی پێش نیوەڕۆ کۆبوونەوەکە دەستپێدەکات.
وەک لە کارنامەکەدا هاتووە، دانیشتنەکەی ئەمڕۆ لە دوو تەوەری سەرەکی پێکدێت و تەوەری یەکەم تایبەت کراوە بە سوێندخواردنی ژمارەیەک لە ئەندامانی نوێنەران، کە تا ئێستا سوێندی یاساییان نەخواردوە.
لە تەوەری دووەمیشدا، کە مەبەستی سەرەکی پێکهێنانی حکومەتە و دانیشتنەکە لە چوارچێوەی پابەندبوونە بە ماوە دەستورییەکان بۆ یەکلایکردنەوەی پۆستە سیادییەکان بە تایبەت پۆستی سەرۆک کۆمار.
گەرچی سێشەممەی رابردوو دانرابوو بۆ هەڵبژاردنی سەرۆک کۆمار، بەڵام دواخراو و ئەگەر ئەمڕۆ رێژەی یاسایی تەواو بکرێت هەڵبژاردن بۆ ئەو پۆستە ئەنجام دەدرێت، کە لە ئێستادا 18 کەس خۆیان بۆ بەدەستهێنانی ئەو پۆستە کاندید کردەوە.
ئاژانسی رۆیتەرز، بڵاویکردوەتەوە، مارک ساڤایا نێردەی تایبەتی ئەمریکا بۆ کاروباری عیراق، چیتر لە پۆستەکەیدا نەماوە و دور خراوەتە، باس لەوە دەکرێت لەبری ئەو تۆم باراک نێردەی تایبەتی ئەمریکا بۆ سوریا دانراوە.
بەپێی زانیارییەکانی رۆیتەرز، هۆکاری دورخستنەوەی ساڤایا پەیوەندی بە کاندیدکردنەوەی نوری مالکیەوەیە بۆ پۆستی سەرۆک وەزیران و باس لەوە دەکرێت، ناوبراو نەیتوانیوە بەربەست لەبەردەم هەوڵە سیاسییەکانی نوری مالکی و لایەنە نزیکەکانی تر لە عیراق دروست بکات.
بریاری دورخستنەوەی ساڤایا لە کاتێکدایە، ماوەیەکی کەم پێش ئێستا، بە بڕیاری دۆناڵد ترەمپ، وەک نوێنەرێکی سەرەکی بۆ جێبەجێکردنی سیاسەتەکانی واشنتۆن لە بەغداد کار بکات.
رۆژی 30_1_2026، ساڤایا بە میدیاکانی راگەیاندبوو، بڕیاری دورخستنەوەی دورە لە راستەیەوە و ئەو بەم زوانە لە عیراق دەست دەکات بەکارەکانی.
چوارچێوەی هەماهەنگی، دوای کۆبونەوەکەیان راگەیەندراوێکیان بڵاوکردوە و دوپاتی دەکەنەوە نوری مالکی کاندیدیانە بۆ پۆستی سەرۆک وەزیران، ئاماژەیان بەوەشکردوە هەڵبژاردنی سەرۆک وەزیران پرسێکی دەستوری تەواو عیراقییە و دوور لە دەستتێوەردانە دەرەکییەکان بەڕێوەدەچێت.
لە راگەیەندراوەکەدا هاتووە؛ هەڵبژاردنی سەرۆک وەزیران پرسێکی دەستوری تەواو عیراقییە، بەپێی میکانیزمەکانی پڕۆسەی سیاسی بەڕەچاوکردنی بەرژەوەندی نیشتمانی و دوور لە دەستێوەردانە دەرەکییەکان بەڕێوەدەچێت و پشتگیری خۆیان بۆ کاندید بوونی نوری مالکی دووپاتدەکەنەوە بۆ پۆستی سەرۆک وەزیران.
چوارچێوەی هەماهەنگی جەختی لەسەر پابەندبوونی خۆی دەکاتەوە بە بنیاتنانی پەیوەندی هاوسەنگ لەگەڵ کۆمەڵگەی نێودەوڵەتی، بەتایبەتی لەگەڵ زلهێزە نێودەوڵەتییە کاریگەرەکان، لەسەر بنەمای رێزگرتنی یەکتر و دەستوەرنەدان لە کاروباری ناوخۆیی.
لە بەشێکی دیکەی راگەیەنداروەکەدا هاتووە، عیراق دەوڵەتێکی دامەزراوەیە و توانای بەڕێوەبردنی ئەرکە سیاسییەکانی بەپێی دەستوور و ئیرادەی نوێنەرانی خەڵک هەیە.
لە کۆتایشدا، چوارچێوەی هەماهەنگی داوا لە هەموو لایەنەکان دەکات زۆرترین هەوڵ بدەن بۆ گەیشتن بە چارەسەری پەسەندکراو کە رەزامەندی هەمووانی لەسەر بێت.
مەكتەبی سیاسی یەكێتیی نیشتمانیی كوردستان لەیادی 22 ساڵەی كارەساتی تەقینەوەكانی یەكی شوباتدا پەیامێکی بڵاوکردەوە تێیدا هاتووە؛ لەو روداوە کارەساتبارەدا، کە ژمارەیەک سەركردە و كادر وهاووڵاتیی شەهید و بریندار بوون، تیرۆرستان سەلماندیان نەك هەر دوژمنی مرۆڤایەتی و دیموكراسی و ئازادین، بەڵكو دژی گشت بەهایەكی كۆمەڵایەتی و ئاینییشن.
دەقی پەیامەكە..
لەیادی بیست و دووەمین ساڵڕۆژی كارەساتی تەقینەوەكانی یەكی شوبات لە مەڵبەندی سێی ڕێكخستنی یەكێتیی نیشتمانیی كوردستان و لقی دووی پارتی دیموكراتی كوردستاندا كە تێدا پۆلێك سەركردە و كادرو لایەنگری هەردوو حزب و ژمارەیەك هاووڵاتی شەهید و بریندار بوون، تیرۆریستان بەم كردەوانەیان دەریانخست ئەوان نەك هەر دوژمنی مرۆڤایەتی و دیموكراسی و ئازادین، بەڵكو دژی گشت بەهایەكی كۆمەڵایەتی و ئاینییشن، چونكە ئەو رۆژەی تیرۆرستان تاوانەكانیان تێیدا ئەنجامدا یەكەم رۆژی جەژنی قوربان بوو، بەڵام لەچەند ساتێكدا گشت خۆشی و شادییەكیان خەڵتانی خوێن كرد و شاری هەولێریان تازێ بار كرد.
لەم رۆژانەدا كە ئەم یادە پڕ سوێیە دەكەینەوە جارێكی تر گەلەمان ڕووبەڕوی مەترسی تیرۆر و هەڕەشەی سڕینەوە بۆتەوە كە ڕۆژئاوای كوردستان بۆتە ناوەندی ئەم بەرەنگارییە رەوایە و گەلەكەمان لە سەرتاسەری كورستان و تاراوگە پشتیوانی خۆڕاگری رەوای براكانی دەكات و جۆرێك لەیەك ڕیزیی میللی و نیشتمانییان دروست كردووە ، واپێویست دەكات هێزە سیاسیەكانی كوردستان بەدەنگ پەرۆشی و داخوازی یەكڕیزی گەلەكەمانەوە بێن بۆ بەرپەرچدانەوەی مەترسییەكان و پتەوكردنی گیانی دەربەستی و یەكێتیی نەتەوەیی.
درود بۆ ڕۆحی شەهیدانی یەكی شوبات و گشت شەهیدانی كوردستان
مەكتەبی سیاسی
یەكێتیی نیشتمانیی كوردستان
بەڕێوەبەرایەتی نەوت و کانزاکانی سلێمانی بڵاویکردوەتەوە، سبەینێ لە مەڵبەندەکانی یەک و دوو، دەست بە دابەشکردنی ئەو نەوتە دەکرێت، کە لەلایەن حکومەتی عیراقەوە دابین کراوە.
ئاماژەیان بەوەشکردوە، هەر خێزانێک بڕی 100 لیت وەردەگرێت، بە نرخی 31 هەزار دینار.
بەڕێوەبەرایەتی نەوت و کانزاکانی سلێمانی، جەختیشیکردوەتەوە، وەرگرتنی نەوتەکە لەلایەن هاووڵاتییانەوە بە کارتی زیرەک دەبێت.
د. لەتیف رەشید، سەرۆک کۆماری عیراق، لەسەر رێککەوتنی هێزەکانی سوریای دیموکرات و حکومەتی کاتی سوریا راگەیەندراوێکی بڵاوکردوەتەوە و پێشوازی لە رێککەوتنەکە دەکات ، ئاماژەی بەوەکردوە، بە گرنگیەوە لێی دەڕوانین بۆ چارەسەرکردنی ئاشتییانەی کێشەکان و کۆتاییهێنان بە ئاڵۆزییەکان و سەقامگیری ناوچەکە .
سەرۆک کۆمار جەختیکردوەتەوە، جێبەجێکردنی ئەم هەنگاوە بە کردەیی دەبێتە سەرەتایەک بۆ مسۆگەرکردنی مافی هەموو نەتەوە و پێکهاتەکان لە دەستووری هەمیشەییدا.
لە بەشێکی دیکەی راگەیەندراوەکەدا، د. لەتیف رەشید، سەرۆک کۆماری عیراق، ئومێد دەکات ئەم رێککەوتنە ببێتە بناغەیەک بۆ چەسپاندنی ئاشتی و سەقامگیریی و گەشەسەندن و کۆتاییهێنان بە شەڕ و ماڵوێرانی لە سەرجەم ناوچەکانی سوریا.
بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغداد لەگەڵ رەیان کلدانی، ئەمینداری گشتیی بزوتنەوەی بابلیون کۆبووەوە.
لە دیدارێکدا کە قوباد تاڵەبانی و دەرباز کۆسرەت رەسوڵ، ئەندامانی مەکتەبی سیاسی ئامادەیبوون، گفتوگۆ لەبارەی هەنگاوەکانی پێکهێنانی حکومەتی نوێی عیراق کرا.
هەردوولا جەختیان لە پابەندبوون بە وادەی دەستوری بۆ پێکهێنانی حکومەتی نوێی عیراق و هەڵبژاردنی سەرۆک کۆمار کردەوە.
ئەنجومەنی پشتیوانی یەکێتی رایگەیاند، لەساڵیادی كارەساتە پر خوێناویەکەی یەکی شوبات سەری رێزو نەوازش بۆ تەواوی شەھیدەکان و خانەوادەکانیان دادەنوێنین ولەیادی ئەوە رۆژە ماتەمینەدا دەبێت ھەموو لایەک تێ بگەین کە دوژمنان ھیچ جیاکاریەک لەنێوانمان ناکەن.
دەق پەیامەکە
پەیامی ئەنجوومەنی پشتیوانی یەکێتیی نیشتمانی کوردستان لەساڵیادی کارەساتی یەکی شوبات
لەساڵیادی كارەساتە پڕ خوێناویەکەی یەکی شوبات سەری رێزو نەوازش بۆ تەواوی شەھیدەکان و خانەوادەکانیان دادەنوێنین.
کارەساتی یەکی شوبات بەھەموانی گوت و ئاگاداری کردینەوە کورد لای ئەوان ھەر کوردە و ھیچ جیاوازیەکی نیە لە رەنگ و بیرکردنەوەیان.
22 ساڵ پێش ئەمڕۆ تاریک پەرستان لەھەولێر لەدوو تەقینەوەی جیا، بەڵام ھەردووکیان دەرھەق بە کورد ئەنجامدرا، کە بووە ھۆی شەھیدبوونی چەندین سەرکردە و کادیری رێبازی کوردایەتی و بریندار بوونی چەندانی تر .
لەیادی ئەوە رۆژە ماتەمینەدا دەبێت ھەموو لایەک تێ بگەین، کە دوژمنان ھیچ جیاکاریەک لەنێوانمان ناکەن.
دەبا ئێمەش بە ھەموو لایەکمان خۆمان رێکبخینەوە و یەکگرتوبین بۆ ئەوەی دوژمن و نەیارەکانمان نەتوانن جارێکی تر دەستمان بۆ درێژبکەن.
سڵاو درود بۆ گۆڕی شەھیدان بەگشتی و شەھیدانی یەکی شوبات بەتایبەتی
ئەنجوومەنی پشتیوانی یەکێتی نیشتمانی کوردستان
بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغداد لەگەڵ د. ئەیاد عەلاوی، سەرۆکی هاوپەیمانیی نیشتمانی و سەرۆک وەزیرانی پێشووتری عیراق کۆبووەوە.
لە کۆبوونەوەکەدا قوباد تاڵەبانی و دەرباز کۆسرەت رەسوڵ، ئەندامانی مەکتەبی سیاسی ئامادەیبوون،رەوشی سیاسیی عیراق و ناوچەکە خرایەبەر باس.
هەوڵەکان بۆ پێکهێنانی حکومەتی نوێی عیراق گفتوگۆی لەبارەوە کرا و پێویستی بەردەوام بوونی هەوڵەکان بۆ سەرخستنی لێکتێگەیشتنەکان بۆ گەیشتن بە حکومەتێکی بەهێز و خزمەتگوزار جەختی لەسەر کرایەوە.
سەرۆک بافڵ ستایشی ئەزموونی دەوڵەمەند و تێکۆشانی د. ئەیاد عەلاوی دژی بە دیکتاتۆریەت و رۆڵی لە بنیادنانەوەی عیراقی نوێ کرد، وەک یەکێک لە تێکۆشەرە دێرینەکان و هاوڕێی سەرۆک مام جەلال.
ئەمڕۆ شەممە،محەمەد شیاع سودانی سەرۆكی ئەنجومەنی وەزیرانی عیراق پێشوازی لە نیكۆلا فۆنتانا باڵیۆزی ئیتاڵیا لە عیراق كرد و پابەندبونی وڵاتەکەی بۆ پاڵپشتیكردنی سەقامگیری و رێگریكردن لە پەرەسەندنی ململانێكان و دانانی دیالۆگ لە چارەسەركردنی قەیرانەكاندا دوپاتكردەوە.
نوسینگەی سەرۆک وەزیرانی عیراق بڵاویکردوەتەوە، لە كۆبوونەوەكەدا، جگە لە باسکردن لە پێشهاتەکانی ناوچەکە، پێداچوونەوە بە پەیوەندییە دووقۆڵییەكانی نێوان هەردوو وڵات و رێگاكانی پتەوكردن و فراوانكردنی هاوكارییەكان بۆ بەرژەوەندی هەردوو گەلی عیراق و ئیتاڵیا كراوە.
لای خۆیەوە سەرۆك وەزیران جەختی لە پابەندبونی عیراق بە پاڵپشتیكردنی سەقامگیری و رێگریكردن لە پەرەسەندنی ململانێكان و گرنگیدان بە گفتوگۆ لەبری شەڕکرد لە چارەسەركردنی قەیرانەكاندا كردووەتەوە.
یەکێتی ئەوروپا لەسر رەوسی سوریا رایگەیاند، تا ئێستا دۆخی سوریا ئەوەندە باش نییە، کە وڵاتانی یەکێتی ئەوروپا دەست بکەن بە گەڕانەوەی پەنابەرانی سوریا بۆ وڵاتەکەیان.
ئەمڕۆ شەممە، ماگنوس برونەر ، کۆمیساری کاروباری ناوخۆیی یەکێتیی ئەوروپا بۆ کۆچبەران، بە میدیاکانی ئەڵمانیای راگەیاندوە، هێشتا رەوشی سوریا نەگەیشتوەتە ئاستێکی وا سەقامیگر، کە وڵاتانی ئەوروپا بتوانن دیپۆرتکردنەوەی هاووڵاتییە سورییەکان بە شێویەکی بەرفراوان ئەنجام بدەن.
ماگنوس برونەر جەختیکردوەتەوە، هێشتا سوریا بەپێی پێوەرەکانی یەکێتی ئەوروپا بە وڵاتێکی سەلامەت دانانرێت و یەکێتی ئەوروپا پاڵپشتی سوریا دەکات بۆ باشترکردنی دۆخەکە و کارکردن بۆ گۆڕانکاری لەو وڵاتەدا.
ناوبراو ئەوەشی خستوەتەڕوو لە ئێستادا، بەدەر لە تاوانباران هەوڵدەدەن کاربکەن لەسەر هاندانی گەڕانەوەی خۆبەخشانەی کۆچبەرانی سوریا بۆ وڵاتەکەیان.
میدیا رەسمییەکانی ئێران بڵاویانکردەوە، تەقینەوەیەکی گەورە لە باڵەخانەیەکی نیشتەجێبوون لە شاری بەندەر عەباس لە باشوری ئەو وڵاتە رویدا و زیانی زۆری لێکەوتەوە.
بەپێی زانیارییەکانی پەیامنێری کوردسات نیوز لە ئێران، تەقینەوەکە لە باڵەخانەیەکی 8 نهۆمیدا لە شەقامی "موعەلیم" روویداوە، بەهۆیەوە 2 نهۆمی باڵەخانەکە بە تەواوی رووخاون و زیانی زۆریش بە چەندین ئۆتۆمبێل و دوکانی دەوروبەری باڵەخانەکە گەیشتووە. تا ئێستا هۆکاری سەرەکی تەقینەوەکە بە نادیاری ماوەتەوە و لێکۆڵینەوەکان بەردەوامن.
هاوکات لە رووداوێکی دیکەدا، لە شاری ئەهواز لە باشوری رۆژئاوای ئێران، بەهۆی لێچوونی غاز لە باڵەخانەیەکی نیشتەجێبوون لە گەڕەکی "کیانشەهر"، تەقینەوەیەک روویدا. بەپێی سەرچاوە پزیشکییەکان، لەو رووداوەدا 4 هاووڵاتی گیانیان لەدەستداوە و کەسێکی دیکەش بریندار بووە.
بەرپرسی رێکخراوی ئاگرکوژێنەوەی ئەهواز رایگەیاند، تیمەکانی فریاکەوتن و ئاگرکوژێنەوە دەستبەجێ گەیشتوونەتە شوێنی رووداوەکە و پرۆسەی لادانی داروپەردووی باڵەخانەکە بەردەوامە تا دڵنیابنەوە لەوەی هیچ کەسێکی دیکە لەژێر داروپەردوەکەدا نەماوە.
ئەنجومەنی نوێنەرانی ئەمریکا لە پەسەندکردنی یاسای بودجە لە وادەی دیاریکراودا شکستی هێنا، ئەمەش بووە هۆی راگەیاندنی داخستنی حکومەتی فیدڕاڵ.
سەرەڕای ئەوەی ئەنجومەنی پیران لە دوا ساتدا رەزامەندی لەسەر چارەسەرێکی ناوەند دەربڕی، بەڵام پێشبینی ناکرێت ئەنجومەنی نوێنەران پێش رۆژی دووشەممە دەنگ لەسەر پڕۆژەیاساکانی بودجە بدات، کە دەبێت دواتر لەلایەن دۆناڵد ترەمپ، سەرۆکی ئەمریکاوە ئیمزا بکرێن.
ئەم شکستە دوای رووداوەکەی تەقەکردن لە شاری مینیاپۆلیس دێت کە بووە هۆی کوژرانی دوو هاووڵاتیی ئەمریکی لە کاتی جێبەجێکردنی رێوشوێنی توندی دەرکردنی کۆچبەران لەلایەن ئیدارەی ترەمپەوە.
دیموکراتەکان داوای راگرتنی پڕۆژەیاساکانی بودجەیان کرد چونکە پارەی تێدابوو بۆ ئاژانسی جێبەجێکردنی یاساکانی کۆچبەری (ICE) کە هەڵمەتەکانی دەرکردنی کۆچبەران ئەنجام دەدات.
ئەو چارەسەرە کاتییەی سینات پەسەندی کردووە، رێگە بە بودجەیەکی ئینتیقالی بۆ ماوەی دوو هەفتە دەدات تاوەکو دەرفەت بە دیموکرات و کۆمارییەکان بدرێت بۆ گفتوگۆ.
پەیامنێری کوردسات نیوز لە بەغداوە ئاشکرای کرد، بڕیارە ئەمشەو چوارچێوەی هەماهەنگیی شیعەکان کۆبوونەوەیەکی گرنگ ئەنجام بدەن و تێیدا پرسی کاندیدی سەرۆک وەزیران یەکلابکرێتەوە.
بەپێی زانیارییەکان، بڕیارە سەعات 7:00ـی ئەمشەو سەرکردەکانی چوارچێوەی هەماهەنگی کۆببنەوە و تاوتوێی پرسی کشانەوە یان نەکشانەوەی نوری منالیکی بکەن بۆ پۆستی سەرۆک وەزیرانی داهاتووی عیراق.
پەیامنێری کوردسات نیوز ئاماژەی بەوەشکرد، کۆبوونەوەکە دوای دیداری دوێنێی نوری مالیکی و هەڵسوڕێنەری باڵیۆزخانەی ئەمریکا دێت و چاوەڕوان دەکرێت دوای تەواوبوونی کۆبوونەوەکە، چوارچێوەی هەماهەنگی راگەیەندراوێکی رەسمی لەوبارەیەوە بڵاوبکاتەوە.
31ی كانوونی دووەم ساڵیادی شەهیدكردنی شاسوار جەلال ناسراو بە كاك ئارامە، ئارامی سەركردە لەساڵی 1947 لە گەڕەكی حاجی حان لە سلێمانی لەدایكبووە، خوێندنی سەرەتایی لە شارۆچكەی ماوەت و چوارتا و قۆناغی ئامادەییشی لە سلێمانی تەواوكردووە، لەسەرەتای لاوێتییەوە تێكەڵ بە كاری سیاسی بووە و توانیویەتی لە ریزی پێشەوەی خەباتی لاوان و خوێندكاراندا بێت، كەسایەتییەكی سیاسیی دیاری كورد بوو لە ناو یەكێتیی نیشتمانیی كوردستان و ماوەیەكیش سكرتێری كۆمەڵەی رەنجدەرانی كوردستان بووە.
ساڵی 1964 لە كۆلیژی ئەندازیاریی زانكۆی بەغداد وەرگیراوە، بەڵام بەهۆی كێشەی نەخۆشی چاو، رەتكراوەتەوە و دواتر لە ساڵی 1971 كۆلیژی بازرگانی تەواوكردووە.
كاك ئارام لە ساڵی 1969 لە كۆنگرەی سەرتاسەری قوتابیانی عیراقدا رۆڵی كاریگەری هەبووە و لەگەڵ هاوڕێكانیدا بە نوێنەرایەتی خوێندكارانی كوردستان كشانەوە و هۆڵی كۆنگرەیان بەجێهێشت.
لەساڵی 1970 چووەتە ریزی ئەڵقە رۆشنبیرییەكانی كۆمەڵەی ماركسی-لینینی كوردستانەوە، هەمان ساڵ یەكێك بووە لە ئەندامانی دەستەی دامەزرێنەری كۆمەڵەی رەنجدەرانی كوردستان، لەساڵی 1974 وەك نوێنەری سكرتاریەتی یەكێتی قوتابیانی كوردستان بەشداری كۆنگرەی لاوانی جیهانی لە مۆسكۆ كردووە.
شەهید ئارام، لەساڵانی حەفتاكانی سەدەی رابردوو چەندین بابەتی گرنگ و بەكەڵكی لە رۆژنامەی هاوكاری بڵاوكردوەتەوە، بەهۆی شارەزاییەكەیەوە خزمەتی زۆری بە بزاڤی وشە و ئەدەبیاتی كوردی كردووە.
لەكاتی هەرەسی شۆڕشی ئەیلول پێیوابووە دەبێت لەئاستی رووداوەكان پەلەپەل و هەڵەشەیی نەكرێت، سوریش بووە لەسەرئەوەی پەیوەندی نێوان خەڵك و خۆیان نەپسێت.
لە ساڵی 1975یش كە یەكێتیی نیشتمانیی كوردستان دامەزرا، شەهید ئارام توانی بیسەلمێنێت یەكێكە لەسەركردە دیار و كاریگەرەكانی ناو ئەو حزبە نوێیە، لەساڵی 1976 دوای دەستگیركردنی خاڵە شیهاب و هاوڕێكانی، كاك ئارام وەك سكرتێری كۆمەڵە ئەركی راپەڕاندنی كارەكانی كۆمەڵەی لە ئەستۆگرتووە.
لە مانگی 10ی ساڵی 1976 رویكردووەتە شاخ و یەكەم دەستەی پارتیزانە چەكدارەكانی شۆڕشی نوێی دروستكردووە، لەو قۆناغەشدا بەئارامی گەشەی بە شۆڕش داوە و لێزانانە توانی بەردی بناغەی كاروانی نوێ لەبەرەنگاربوونەوە دابنێت، لە ساڵی 1977 بووە ئەندامی مەكتەبی سیاسی یەكێتیی نیشتمانیی كوردستان.
دواتر كاك ئارام لە رۆژی 31/1/1978 لە گوندی تەنگیسەر لە قەرەداغ شەهیدكرا.
وەزارەتی جەنگی ئەمریكا 30 فڕۆكە و هەلیكۆپتەر رادەستی ئیسرائیل دەكات و زیاتر لە 700 موشەكیش بە سعودیە دەفرۆشێت.
وەزارەتی دەرەوەی ئەمریكا بڵاویكردەوە دۆناڵد ترەمپ سەرۆكی وڵاتەكەی رەزامەندی دەربڕیوە بۆ فرۆشتنی چەك و كەرەستەی سەربازیی بە بەهای نۆ ملیار دۆلار بە سعودیە.
ئاماژەی بەوەشكردووە، 30 هەلیكۆپتەری شەڕكەر لە جۆری ئاپاچی و دەیان جۆری چەك و كەرەستەی سەربازیی كە بەهاكەیان دەگاتە چوار ملیار و 500 ملیۆن دۆلار رادەستی ئیسرائیل دەكرێن.
وەزارەتی جەنگی ئەمریكاش دەڵێت، دوای ئەوەی وەزارەتی دەرەوە رەزامەندی دەربڕیوە بۆ جێبەجێكردنی گرێبەستێكی فرۆشتنی چەك بە سعودیە، سیستمی بەرگریی پاتریۆت و زیاتر لە 700 موشەك رادەستی سعودیە دەكات.