هەواڵەکان
كاربەڕێكەری باڵیۆزخانەی عیراق لە لیبیا رایگەیاند، تائێستا هیچ لێدوانێكی رەسمی دەسەڵاتدارانی لیبیا نییە كە خنكانی 18 پەنابەرە كوردەكە لە دەریای ناوەڕاستدا پشتڕاستبكاتەوە.
ئەحمەد سەحاف، كاربەڕێكەری باڵیۆزخانەی عیراق لە لیبیا رایگەیاند: بە وردی بەدواداچوون بۆ چارەنووسی ئەو 18 پەنابەرە كوردە دەكەن كە بە رێگەی نایاسایی چوونە خاكی لیبیاوە و ئێستاش دەنگۆی خنكانیان لە دەریای ناوەڕاستدا بڵاوبووەتەوە.
ئەوەشی خستووەتەڕو: لەگەڵ لایەنە ئەمنی و تەندروستی و مانگی سوری لیبیا لە گفتوگۆدان بۆ یەكلاییكردنەوەی چارەنووسی ئەو 18 پەنابەرە كوردە.
ئەحمەد سەحاف ئاماژەی بەوەشدا: تائێستا هیچ لێدوانێكی رەسمییان لە دەسەڵاتدارانی لیبیاوە پێ نەگەیشتووە كە خنكانی ئەو پەنابەرانە پشتڕاستبكاتەوە.
ئەوەش لەدوای ئەوەدێت، لە چەند رۆژی رابردوودا لە تۆڕە كۆمەڵایەتییەكان دەنگۆی خنكانی 18 پەنابەری كورد لە دەریای ناوەڕاستدا بڵاوكرایەوە، كە گوایە لە لیبیاوە بە بەلەم بۆ ئیتاڵیا بەڕێكەوتوون و لەرێگادا بەلەمەكەیان ژێرئاوكەتووە و خنكاون.
عەلی ئەکبەر ویلایەتی، راوێژکاری رابەری باڵای ئێران لە تۆڕی کۆمەڵایەتیی ئێکس بڵاویکردەوە، دوژمنانی وڵاتەکەی بۆ قەرەبووکردنەوەی شکستییەکانیان هەوڵی دروستکردنی دووبەرەکی دەدەن، ئاماژەی بەوەش کرد کە نیشانەکانی ئەو هەوڵە لە نەجەف دەرکەوتوون، ئەوەش بەهۆی داخستنی فڕۆکەخانەی نێودەوڵەتیی ئەو شارە بە رووی زیارەتکارانی ئێراندا.
ویلایەتی پەیامێکی ئاڕاستەی عەلی زەیدی، سەرۆک وەزیرانی عیراق کردووە و رایگەیاندووە: شەرعیەت لە ئەمریکاوە نایەت، بەڵکو لە نەجەفەوە دەستدەکەوێت. ناوبراو ئاماژەی بەوەش کردووە کە چوارچێوەی هەماهەنگی متمانەی لە خەبات و خوێنی شەهیدانەوە وەرگرتووە، بەڵام بێدەنگیی ئێستای بەرانبەر داخستنی فڕۆکەخانەکانی عیراق بە رووی فڕۆکەکانی ئێراندا، دەریخستووە کە بڕیارەکانی بێناوەڕۆکن.
لە لایەکی ترەوە، ئەکرەم کەعبی، ئەمیندارێ گشتیی بزووتنەوەی نوجەبا رایگەیاند: لە ئەرگەری بەردەوامیی داخستنی فڕۆکەخانەکان بە رووی ئێراندا، داوا لە گەلی عیراق دەکەن ئامادەکاری بکەن بۆ ئەنجامدانی مانگرتنی گشتی لە فڕۆکەخانەکاندا.
کەعبی جەختیشی کردەوە کە رێگری لە فڕۆکەکانی ئێران بەشدارییە لە گەمارۆیەکی ناڕەوا و زیان بە ئابووریی هەردوو وڵات دەگەیەنێت، بۆیە دەبێت هەژموونی ئەمریکا لە ناوچەکەدا کۆتایی پێبێت.
سەرۆکی ئێران، مەسعود پزیشکیان رایگەیاند، کە رابەری باڵای ئێران، موجتەبا خامنەیی کە لە دوای هەڵگیرسانی جەنگی ئەمریکا و ئیسرائیل بۆ سەر ئێران لە مانگی شوباتەوە لە بەرچاو ون بووە تەندروستی باشە و بە تەواوی برینەکانی چاکبووەتەوە.
پزیشکیان لە میانی چاوپێکەوتنێکدا لەگەڵ تۆڕی"سی بی ئیس نیوز"ی ئەمریکی، لە وەڵامی پرسیارێکدا دەربارەی موجتەبا خامنەیی کە لە دوای هێرشە ئەمریکی-ئیسرائیلییەکەی سەرەتای ئەمساڵەوە (کە بووە هۆی کوژرانی عەلی خامنەیی) بە ئاشکرا دەرنەکەوتووە، رایگەیاند: لە ئێستادا رووبەڕووی هیچ کێشە یان ئاڵۆزییەکی تەندروستیی دیاریکراو نەبووەتەوە.
پزیشکیان وتیشی: وەک پزیشکێک ئەمەم لێ وەرگرن؛ لە رووی پزیشکییەوە تەندروستیی تەواوە و ئەو برینانەی لە دەم و چاو و قاچەکانیدا هەیبوون بە تەواوی چاکبوونەتەوە، هیچ کێشەیەکی نییە.
سەرۆکی ئێران ئاماژەی بەوەش کرد: لە ماوەی رابردوودا دوو جار لەگەڵ موجتەبا خامنەیی کۆبووەتەوە، کە یەکێک لە کۆبوونەوەکان زیاتر لە حەوت سەعاتی خایاندووە.
دەربارەی ئەوەی ئایا موجتەبا خامنەیی لە بڕیارە دیپلۆماسییەکاندا رێنمایی دەدات، پزیشکیان روونیکردەوە: تیمێک لە شەش ئەندام پێکهاتووە لە نوێنەرانی دامەزراوە جیاوازەکان، هێزە ئەمنییەکان، پەرلەمانتاران و دەستە حکومییەکان، کە کۆدەبنەوە بۆ راوێژ و بڕیاردان و بە هەماهەنگی دەگەنە بڕیاری کۆتایی.
کەشناسیی هەرێم پێشبینییەکانی کەشوهەوای 48 سەعاتی داهاتووی بڵاوکردەوە و ئاشکرایکرد، ئاسمانی بەشێک لە ناوچەکان بە ساماڵ و پەڵەهەور دەمێنێتەوە.
بەڕێوەبەرایەتیی گشتیی کەشناسی و بوومەلەرزەزانیی هەرێم رایگەیاند ئەمڕۆ، ئاسمان ساماڵ و پەڵە هەور دەبێت، هاوكات پلەکانی گەرما بە بەراورد بە تۆمارکراوەکانی دوێنێ، یەک بۆ دوو پلەی سیلیزی بەرزتر دەبنەوە.
سەبارەت بە کەشوهەوای سبەینێ یەکشەممە، کەشناسی ئاماژەی بەوەکردووە، ئاسمان بە هەمان شێوە ساماڵ و پەڵە هەور دەبێت، و پلەکانی گەرما جێگیر دەبن و نزیک دەبنەوە لە تۆمارکراوەکانی ئەمڕۆ.
بەرزترین پلەکانی گەرمای پێشبینیکراو بە پلەی سیلیزی
هەولێر: 37 پلەی سیلیزی
پیرمام: 34 پلەی سیلیزی
سلێمانی: 35 پلەی سیلیزی
هەڵەبجە: 37 پلەی سیلیزی
چەمچەماڵ: 36 پلەی سیلیزی
دهۆک: 36 پلەی سیلیزی
زاخۆ: 37 پلەی سیلیزی
ئاکرێ: 37 پلەی سیلیزی
گەرمیان: 41 پلەی سیلیزی
حاجی ئۆمەران: 28 پلەی سیلیزی
سۆران : 36 پلەی سیلیزی
عیراق و كوەیت لە ماوەی 30 رۆژدا نەخشەڕێگەیەك بۆ چارەسەركردنی كێشەكانی نێوانیان دەخەنەڕوو و قۆناغێكی نوێی پەیوەندییەكانیشیان دەستپێدەكەن.
نوسینگەی راگەیاندنی سەرۆك وەزیرانی عیراق بڵاویكردەوە، عەلی زەیدی و سەباح خالید حەمەد سەباح جێنشینی كوەیت لە نیویۆرك كۆبوونەوەتەوە لەسەر بنەمای پەرەپێدانی پەیوەندی نێوان هەردوو وڵات و رێككەوتنیش لەسەر چەند خاڵێك كراوە بۆ چارەسەركردنی كێشەكانی نێوانیان.
ئاماژەی بەوەشكردووە، هەردوولا رێككەوتوون تیمێكی هاوبەش پێكبهێنن بۆ پێداچوونەوە بە دۆسێ هەڵپەسێردراوەكان و دانانی نەخشەڕێگەیەك بۆ چارەسەركردنیان لە ماوەی 30 رۆژدا.
راشیگەیاندووە، تیمی عیراق و كوەیت بە بەردەوامی لە پەیوەندیدا دەبن و سەردانی هەردوو وڵات دەكەن بۆ بەدواداچوون لەسەر دۆسییەكان، سەرۆك وەزیرانی عیراق و جێنشینی كوەیتیش رێككەوتن لەسەر دەستپێكردن و چوونەناو قۆناغێكی نوێی هاوكاری و پەیوەندییەكان لە نێوان هەردوو وڵاتدا.
بەهۆی ئەو رێکارانەی لەلایەن وەزارەتی گەنجینەی ئەمریکاوە سەپێنراون سەبارەت بە گەشتەکانی کۆمپانیا ئاسمانییەکانی ئێران بۆ فڕۆکەخانەکانی ناوچەکە، حکومەتی عیراق گفتوگۆی راستەوخۆی لەگەڵ لایەنی ئەمریکی دەستپێکردووە بۆ بەدەرکردنی هەندێک لە فڕۆکەخانەکانی عیراق لەو رێکارانە.
بەپێی راگەیەندراوێکی نوسینگەی راگەیاندنی سەرۆکی ئەنجومەنی وەزیران، ئەم هەوڵەی بەغداد بە مەبەستی دەستپێکردنەوەی گەشتە ئاسمانییەکانە بە مەبەستی مرۆیی، لەوانە چارەسەری پزیشکی، خوێندن، سەردانی ئایینی و پاراستنی بەرژەوەندییەکانی هاووڵاتییانی مەدەنی.
لە راگەیەندراوەکەدا جەخت لەوەش کراوەتەوە: حکومەتی عیراق کار بۆ هێورکردنەوەی بارودۆخی ناوچەکە دەکات، و هۆشداریدات کە بەردەوامیی قەیرانەکان دۆخەکە ئاڵۆزتر دەکات.
هاوکات داوا لە هەموو لایەنەکان دەکات پەنا ببەنە بەر گفتوگۆ و دانوستان بۆ گەیشتن بە چارەسەرێک کە کۆتایی بە ئاڵۆزییەکان بهێنێت و بەرژەوەندیی گەلان و وڵاتانی ناوچەکە دەستەبەر بکات.
مەسعود پزیشکیان، سەرۆکی ئێران لە لێدوانێکدا بۆ کەناڵی "سی بی ئیس نیوز" رایگەیاند کە "کەشێکی بێمتمانەیی" لە نێوان ئێران و ئەمریکادا هەیە، هاوکات جەختیشی کردەوە کە وڵاتەکەی هیچ ئارەزوویەکی بۆ دەستکەوتنی چەکی ئەتۆمی نییە.
ئەم قسانەی پزیشکیان لە میانی چاوپێکەوتنێکدا هات کە رۆژی هەینی لەگەڵ بەرنامەی "رووبەڕووبوونەوەی نەتەوە" لەو کەناڵە ئەنجامی دا، تێیدا پرسیاری لێکرا کە ئایا ئامادەیە ئەم هەفتەیە لە نیویۆرک چاوی بە دۆناڵد ترەمپ سەرۆکی ئەمریکا بکەوێت؛ کە ئەوە پێشنیازێک بوو لەلایەن سەرۆکی ئەمریکاوە خرابووە ڕوو.
پزیشکیان وتی: ئێمە هەوڵی دروستکردنی هیچ چەکێکی ئەتۆمی نادەین و رێگە بە بازپشکنانی ئاژانسی نێودەوڵەتیی وزەی ئەتۆم دەدەین بچنە ناو وڵاتەکەوە، هەروەها ئەنجامدانی دیداری راستەوخۆ لەگەڵ ترەمپ لە سایەی ئەو کەشە بێمتمانەییەی لە نێوان ئێران و ویلایەتە یەکگرتووەکاندا هەیە، کارێکی دژوارە
ناوبراو وتیشی: گەشەپێدانی چەکی ئەتۆمی حەرامە، جەختیشی کردەوە کە تەنانەت ئەگەر هەندێک کەس لە ئێران ئارەزووی دروستکردنی چەکی ئەتۆمیش بکەن، ئەوا "لە رووی ئاینییەوە رێگەیان پێنادرێت بەرەو ئەو رێگەیە بڕۆن.
سەرۆکی ئەمەریکا پێشنیازێکی ئێران بۆ ئاگربەستی حەوت رۆژە رەتدەکاتەوە و جەخت لە بەردەوامیی گەمارۆ دەریاییەکان و فشارە ئابورییەکان بۆ سەر تاران دەکاتەوە.
رۆژنامەی وۆڵ ستریت جۆرناڵی ئەمەریکی لەسەر زاری چەند لێپرسراوێکی واشنتۆنەوە بڵاویکردەوە، دۆناڵد ترەمپ سەرۆکی ئەمەریکا پێشنیازێکی ئێرانی بۆ راگەیاندنی ئاگربەست بۆ ماوەی حەوت رۆژ رەتکردووەتەوە، هاوکات یاریدەدەرەکانیشی ئاگادارکردووەتەوە کە پێشبینی دەکات دوای هەڵبژاردنەکانی نیوەی خول بۆردومانەکان بۆ سەر ئێران دەستپێبکەنەوە.
بەپێی زانیارییەکانی رۆژنامەکە، ترەمپ لە کۆبوونەوە داخراوەکاندا گومانی لەوە هەیە ئێران بتوانێت مەرجەکانی واشنتۆن جێبەجێ بکات، لەگەڵ ئەوەشدا، ئەمریکا و ئێران لە رێگەی نێوەندگیرەکانەوە بەردەوامن لە دانوستان، کە دۆسیەی ئەتۆمیش دەگرێتەوە.
رۆژنامەکە ئاماژەی بەوەش کردووە، هەوڵەکانی ئەمەریکا بۆ دەستەبەرکردنی ئاسایشی پەڕینەوەی کەشتییە نەوتهەڵگرەکان لە گەروی هورمز، لەپێویستی بەپەلەی گەیشتن بە رێککەوتنی کەمکردووەتەوە. هاوکات ئەمەریکا راستەوخۆ و لە ڕێگەی نێوەندگیرەکانەوە ئێرانی ئاگادارکردووەتەوە کە ترەمپ هیچ نیازێکی نییە بۆ هەڵگرتنی گەمارۆی دەریایی.
لەلایەکی ترەوە، لێپرسراوانی ئەمەریکا پێیانوایە کە گوشارە ئابورییەکان سەرئەنجام تاران ناچار دەکەن رێککەوتنێک ئیمزا بکات، بەڵام هاوکات ئەوەش بەدوور نازانرێت بە بەردەوامی شەڕ و لەژێر کاریگەریی ئەنجامی هەڵبژاردنەکانی نیوەی خول، هەڵوێستەکانی ترەمپ گۆڕانکارییان بەسەردا بێت.
وەزیری دەرەوەی ئێران، عەباس عراقچی، رەخنەی توند لە سیاسەتەکانی ئەمریکا و ئیسرائیل دەگرێت و رایدەگەیەنێت، هێرشەکانیان بۆ سەر ئێران پێشێلکردنی روونی یاسا نێودەوڵەتییەکانە، هاوکات بەرگری لە هەڵوێستە دیپلۆماسییەکانی وڵاتەکەی دەکات.
لە لێدوانێکیدا وەزیری دەرەوەی ئێران رایگەیاند، بەهۆی هێرشەکانی ئەمریکاوە ژمارەیەکی زۆر لە هاووڵاتییانی مەدەنی کوژراون و جەختی لەوە کردەوە کە "ئەمریکا و ئیسرائیل ناتوانن ئەو تاوانانە بسڕنەوە کە بەرامبەر بە گەلی ئێران کردوویانە".
سەبارەت بە گرژییەکانی ناوچەکەش، عراقچی ئاماژەی بەوەکرد کە نەبوونی ئاسایش لە گەرووی هورمز و پەککەوتنی هاتوچۆی دەریایی، دەرئەنجامی راستەوخۆی هێرشەکانی ئەمریکا و ئیسرائیلە.
عەباس عراقچی تیشکی خستە سەر پرسی سزاکان و باسی لەوە کرد کە ئەوەی ئەمریکا بەرامبەر ئێران دەیکات دیپلۆماسییەت نییە، بەڵکو زۆرلێکردن و جەنگێکی ئابورییە. ناوبراو ئەمریکای تۆمەتبار کرد بەوەی کە گەمارۆ ئابورییەکان وەک ئامرازێک بۆ سزای بەکۆمەڵ و فشاری سیاسی بەکاردەهێنێت.
لە بەرامبەر ئەمەشدا، عراقچی بەرگری لە هەڵوێستی تاران کرد و وتی؛ "پابەندبوونی ئێمە بە دیپلۆماسییەوە لەو دانوستانانەدا رەنگیدایەوە کە بوونە هۆی رێککەوتنی ئەتۆمی، و لە دوو ساڵی رابردووشدا بەردەوام بووین لە هەوڵدان بۆ دیپلۆماسی."
ڤلادیمێر پوتن، سەرۆكی روسیا: سەرەڕای هێرشە چڕەكانی ئۆكراین پێشنیازی دانوستانی ئاشتی هێشتا لەسەر مێزە و هیچ هۆكارێكمان نییە بۆ روبەڕووبوونەوەی سەربازی لەگەڵ ئەوروپا
سەرۆكی روسیا ئاشكرایدەكات، پەیوەندییە دیبلۆماسیەكانیان لەگەڵ ئەمریكا داڕماون و بۆ ئاستی سفر نزیك دەبنەوە، دووپاتیشیكردەوە كە هیچ نیازێكیان نییە بۆ روبەڕووبوونەوە لەگەڵ ئەوروپا.
هەروەها لە كۆنفرانسێكی رۆژنامەوانیدا وتی، سەرەڕای توندبوونەوەی هێرشە درۆنییەكانی ئۆكراین بۆ سەر وڵاتەكەی، مۆسكۆ دەستپێكردنەوەی دانوستانی ئاشتی رەتناكاتەوە.
باڵیۆزی ئەمریكا لە چین ئاشكرایدەكات، دۆناڵد ترەمپ سەرۆكی ئەمریكا بە راشكاوی بە سەرۆكی چینی وتووە كە یارمەتیدانی ئێران لەمەودوا قبوڵكراو نییە.
دەیڤید پێردیو باڵیۆزی ئەمریكا لە چین رایگەیاندووە، لە گفتوگۆكانی نێوان دۆناڵد ترەمپ لەگەڵ شی جین پینگ هاوتا چینییەكەی لە لوتكەی واشنتۆندا، باسیان لە جەنگی ئێران كردووە.
دەشڵێت، ترەمپ بە راشكاوی بە شی وتووە كە یارمەتیدانی ئێران بە راستەوخۆ یان ناڕاستەوخۆ لەمەودوا قبوڵكراو نییە، یارمەتی هەواڵگری بێت یان ئابوری یان سەربازی.
راشیگەیاندووە، هەردوو سەرۆكە بڕیاریانداوە پەرە بەپەیوەندیەكانیان بدەن بۆ چارەسەركردنی كێشەكان و هەردوولاش هاوڕابوون لەوەی كە ئێران نابێت ببێت بە خاوەنی چەكی ئەتۆم و هەروەها گەروی هورمزیش بەزوویی بكرێتەوە.
كۆمەڵەی كێڵگە پەلەوەرییەكانی هەرێمی كوردستان، زەنگی ئاگاداركردنەوەی بەپەلە بۆ رزگاركردنی كەرتی پەلەوەر لە هەرێمی كوردستان لێدەدات و رایدەگەیەنێت، ئەم كەرتەكە بەرەو مایەپووچبوون و لەناوچوونی تەواوەتی دەچێت.
بەپێی راگەیەندراوێكی كۆمەڵەی كێڵگە پەلەوەرییەكان، ئەم كەرتە كە یەكێكە لە پایە سەرەكییەكانی ئاسایشی خۆراك و سەرچاوەی بژێوی زیاتر لە 400 هەزار خێزان و هەزاران هەلیكارە، پاشەكشەیەكی مەترسیدار بەخۆیەوە دەبینێت و بەرەو مایەپووچبوون دەچێت.
هۆكاری ئەوەش بۆ كەڵەكەبوونی كێشە نەپچڕاوەكان و بێدەنگی لایەنە پەیوەندیدارەكان لە هاوردەكردنی مریشكی بەستوو و زیادكردنی باج لەسەر كێڵگەكان و زۆربوونی بەرهەم دەگەڕێنێتەوە.
ئاماژەی بەوەش كردووە، ساڵانە هەرێمی كوردستان پێویستی بە 150 هەزار تۆن گۆشتی مریشك هەیە، لە كاتێكدا توانای بەرهەمهێنانی كێڵگە ناوخۆییەكان 400 هەزار تۆن زیاترە، سەرەڕای ئەوەش كێڵگەكان كەوتوونەتە ژێر بارگرانی و زیانی دارایی زۆر قورسەوە.
دوای گیرخواردنیان بۆ ماوەی سێ رۆژ، 25 هاووڵاتی كوردی رۆژئاوای كوردستان لە دەروازەی سنوری حاجی ئۆمەران رزگاركران.
ئەو هاووڵاتیانە كە خەڵكی كۆبانێ بوون، ویستبویان لەرێگە ئێرانەوە بێنە ناو خاكی هەرێمی كوردستانەوە، بەڵام بەهۆی سەختی ناوچەكە و مین رێژكردنی شاخەكەوە، سەرجەمیان گیریان خواردبوو.
لەو چوارچێوەیەشدا تیمی كوردسات لایەنە پەیوەندیدارەكانی ئاگاداركردەوە و دواتر لەلایەن ئیدارەی سەربەخۆی سۆرانەوە تیمێك بۆ رزگاركردنیان پێكهێنرا و توانرا ئاو و خۆراكیان پێ بگەیەندرێت و بگەڕێندرێنەوە دەوازەی حاجی ئۆمەران.
بڕیارە دوای تەواوكردنی رێكارەكان لەگەڵیاندا، سەرجەمیان لە دەروازەی سێماڵكاوە بگەڕێندرێنەوە بۆ رۆژئاوای كوردستان
یونیسێف نوێترین ئامارەکان لەبارەی بەدخۆراکیی لە یەمەن بڵاودەکاتەوە و دەڵێت: نزیکەی سێ ملیۆن و 500 هەزار ژن و منداڵ توشی بەدخۆراکیی توند بوون.
رێکخراوی نەتەوەیەکگرتووەکان بۆ منداڵان 'یونیسێف' راپۆرتێکی بڵاوکردووەتەوە و تێیدا ئاماری ورد لەبارەی بەدخۆراکیی لەناو ژنان و منداڵانی بڵاوکردەوە.
لە راپۆرتەکەی یونیسێفدا هاتووە، نزیکەی نیوەی منداڵانی خوار تەمەن پێنج ساڵ لە یەمەن, کە ژمارەیان دەگاتە دوو ملیۆن و 200 هەزار منداڵ و ملیۆنێک و 300 هەزار ژنیش، تووشی بەدخۆراکیی توند بوون.
ئاماژەی بەوەشداوە، بەدخۆراکی گەشەی جەستەیی و هۆشیاریی منداڵ پەکدەخات، بەتایبەتی لە دوو ساڵی یەکەمی تەمەنیدا کە زۆربەی کات زیانێکی قەرەبوونەکراوەیە و دەبێتە هۆی دروستبوونی بازنەیەکی داخراو لە نەخۆشی و کاریگەریی لەسەر نەوەکانی داهاتووتری ئەو وڵاتە دەبێت.
فەریق سەعد مەعن، سەرۆکی شانەی راگەیاندنی ئەمنی رایگەیاند، رادەستکردنەوەی سەربازگەی زێلیکان بە حکومەتی فیدراڵی هەنگاوێکی ستراتیژییە بۆ بەهێزکردنی سەروەریی وڵات و سەپاندنی دەسەڵاتی یاسا.
سەعد مەعن لە لێدوانێکدا بۆ ئاژانسی واع ئاماژەی بەوە کرد: رێککەوتنی عیراق و تورکیا بۆ رادەستکردنەوەی سەربازگەی (زێلیکان) بە شێوەیەکی پلەبەند، پرسی بوونی سەربازیی تورکیای لە کێشەوە گۆڕی بۆ چارەسەری ئاسایشی لە رێگەی دانوستانەوە.
ئەوەشی روونکردەوە: ئەم هەنگاوە دەبێتە هۆی رێکخستنەوەی دۆخی ئەمنی لە پارێزگای نەینەوا و شەنگال و کۆتاییهێنان بە بوونی چەکدارە بیانییەکان، هاوكات جەختیشی کردەوە: هێزە ئەمنییەکان توانای پاراستنی خاکی عیراقیان هەیە و هیچ پێویستییەک بە بوونی گرووپی چەکدار لە دەرەوەی چوارچێوەی دەوڵەت نییە.
داهاتی نانەوتی ئەم هەفتەیەی سلێمانی و هەڵەبجە و هەردوو ئیدارەی سەربەخۆی راپەڕین و گەرمیان نزیكەی 12 ملیار دینار بووە و بەراورد بە هەفتەی رابردوو دوو ملیار دینار كەمیكردووە.
ماڵپەڕی شەفافیەت بۆ خستنەڕووی داهاتی نانەوتی پارێزگاكانی سلێمانی و هەڵەبجە و هەردوو ئیدارەی سەربەخۆی راپەڕین و گەرمیان ئاشكرایكردووە، داهاتی ئەم هەفتەیە، بڕی 11 ملیار و 773ملیۆن و 224 هەزار ، 228 دینار بووە.
ئەوەشی خستووەتەڕوو، داهاتی ئەم هەفتەیە بەراورد بە هەفتەی رابردوو دوو ملیار دینار كەمیكردووە، لەكاتێكدا هەفتەی رابردوو بڕی داهات زیاتر لە 14ملیار دینار بووە.
بەپێی ماڵپەڕی شەفافیەت، 84%ی ئەم داهاتە بەشێوەی نەختینەو 16% بەشێوەی چەك بووە.