هەواڵەکانسەرۆكی ئەمریكا رەتیدەكاتەوە بەنیاز بێت سزاكانی سەر ئێران كەم بكاتەوە، لێپرسراوێكی ئەمریكاش دەڵێت تا دۆسێی ئەتۆمی چارەسەر نەكرێت، رێككەوتن ئەستەمە.
ئاژانسی رۆیتەرز لە زاری دۆناڵد ترەمپ سەرۆكی ئەمریكاوە بڵاویكردووەتەوە، سەرجەم ئەو زانیاری و دەنگۆیانەی ئەكسیۆس بڵاویكردوونەتەوە و باس لەوە دەكەن بە نیاز بێت سزاكانی سەر ئێران كەم بكاتەوە و پارە بلۆككراوەكانی ئازاد بكات، دورن لە راستییەوە و رەتیاندەكاتەوە.
لێپرسراوێكی باڵای ئەمریكاش بە تۆڕی ئەی بی سی نیوزی راگەیاندووە، تائێستا دانوستانەكانی نێوان وڵاتەكەی و ئێران بە باشی بەڕێوەدەچێت، بەڵام بەهیچ شێوەیەك ناگەنە رێككەوتن تا ئەو كاتەی دۆسێی ئەتۆمی ئێران چارەسەر نەكرێت و بۆئەو مەبەستەش تاران نەرمی نواندووە.
ئەو لێپرسراوەی ئەمریكا ئاماژەی بەوەشكردووە، هۆكارێكی سەرەكی نەگەیشتنە رێككەوتن لە نێوان تاران و واشنتۆندا، بێمتمانەییانە بەرانبەر یەكتر و هیچ لایەك متمانەی بە لایەنەكەی تر نییە بۆ پابەندبوون بە رێككەوتنەكانەوە.
وەزارەتی پەروەردەی حکومەتی هەرێمی کوردستان، بە مەبەستی رێکخستنەوەی پرۆسەی خوێندن و چاودێریکردنی باشتری ئامادەبوونی خوێندکاران لە پەیمانگە ناحکومییەکاندا، فەرمانێکی وەزاری دەرکرد.
دەقی بڕیارەکە ئەم چەند خاڵە لەخۆ دەگرێت:
١. سەرجەم پەیمانگە ناحکومییەکان پابەند دەکرێن بە جێبەجێکردنی سیستمێک بە پەنجەمۆر (پەنجەمۆری ئەلیکترۆنی) بۆ تۆمارکردنی ئامادەبوون و نەبوونی خوێندکاران لە رۆژانی دەوامدا، ھەروەھا پابەند دەکرێن بە ھەبوونی تۆماری دروست سەبارەت بەو بابەته.
٢. ھەر خوێندکارێک لە ساڵێکی خوێندندا زیاتر لە 25 رۆژ ئامادەبوونی تەواوی نەبێت، بە دابڕاو لە خوێندن هەژمار دەکرێت و مافی بەردەوامبوونی لەو ساڵەی خوێندن نامێنێت. پەیمانگەکان بەپرسیارن لە جێبەجێکردنی ئەم بڕگەیە.
٣. ھەر پەیمانگەیەکی ناحکومی سەرپێچی بەرامبەر بە ناوەڕۆکی بڕگەکانی (1) و (2)ی ئەم فەرمانە بکات، رێکاری یاسایی بەرامبەر دەگیرێتەبەر کە لە (وەرگرتنەوەی مۆڵەتی کارکردن)ـەوە دەستپێدەکات، جگە لەوەی سزای دارایی بەپێی ماددەی (25)ی یاسای ژمارە (14)ی ساڵی (2012)ی خوێندنگە و پەیمانگە ناحکومییەکان بەسەردا دەسەپێندرێت.
٤. سەرپەرشتیاری پەروەردەیی پەیوەندیدار راسپێردراوە بە بەدواداچوونی مەیدانی بۆ جێبەجێکردنی ناوەڕۆکی ئەم فەرمانە. لە ئەگەری هەر کەمتەرخەمییەکدا، پرۆسەی لێپێچینەوە لە سەرپەرشتیاریش دەستپێدەکات.
دەستەی راگەیاندن و پەیوەندییەكانی عیراق روونیدەكاتەوە بڕیارەكەی دادگای رەسافە بە واتای نوێكردنەوەی مۆڵەتی كۆڕەك تێلیكۆم نایەت و داخستنی بنكەكانی كۆمپانیاكەش بەردەوام دەبێت.
دەستەی راگەیاندن و پەیوەندییەكانی عیراق لە راگەیەنراوێكدا روونكردنەوە دەدات لەسەر بڕیاری دادگای بەرایی رەسافە لە بەغداد سەبارەت بە كۆمپانیای كۆڕەك تێلیكۆم و ئەو دەنگۆیانە رەتدەكاتەوە كە دەڵێن بەپێی بڕیارێكی دادگاكە رێكارەكانی بەرانبەر كۆمپانیاكە هەڵوەشێنراونەتەوە.
دەستەكە جەخت لەوەش دەكاتەوە بڕیارەكەی دادگا تەنها پەیوەستە بە كارپێكردنەوەی گرێبەستی خشتەبەندیكردنی قەرزەكانی كۆڕەك بۆ دەوڵەت، نەك رێگەدان بە دەستپێكردنەوەی كارەكانی.
بەپێی روونكردنەوەكە، مۆڵەتی خزمەتگوزاریی كۆڕەك لە 30ی ئەیلوولی 2022ەوە بەسەرچووە، بۆیە پڕۆسەی داخستنی بنكەكانی و قەدەغەی كاركردنی بەردەوام دەبێت.
دەستەی راگەیاندن و پەیوەندییەكانی عیراق ئاماژەی بەوەش كردووە، بڕیارەكەی دادگای بەرایی رەسافە، كۆڕەك لە دانەوەی قەرزەكانی نابەخشێت، ئەگەریش كۆمپانیاكە بەبێ رەزامەندیی دەستەكە هەر یەكێك لە بنكە داخراوەكانی بكاتەوە، بەرپرسیارێتیی یاسایی دەخاتە سەر خۆی.
دەستەكە دووپاتیشی دەكاتەوە، بەردەوام دەبن لە گرتنەبەری رێكاری یاسایی و تانەدان لە دۆسێكە بۆ پاراستنی مافەكانی دەوڵەت.
لە کۆبونەوەی چوار سەرۆکایەتییەکەی عیراق لە کۆشکی بەغداد، چەند بڕیار و هەڵوێستێکی گرنگ سەبارەت بە رەوشی ناوخۆ و ناوچەکە راگەیەندرا و جەختیان کردەوە دەبێت، بڕیاری جەنگ و ئاشتی تەنها لە دەستی دەوڵەتدا بێت.
ئەمڕۆ دوشەممە، لە کۆشکی سەلام، نزار ئامێدی، سەرۆک کۆماری عیراق پێشوازی لە هەریەکە لە عەلی زەیدیی سەرۆک وەزیران، هەیبەت حەلبوسی، سەرۆکی ئەنجومەنی نوێنەران و فایەق زێدان، سەرۆکی ئەنجومەنی دادوەریی کرد و راگەیەندراوێکیان بڵاوکردەوە.
لە کۆبونەوەکەدا،چوار سەرۆکایەتییەکە جەختیان کردەوە دەبێت بڕیاری جەنگ و ئاشتی تەنها لە دەستی دەوڵەتدایە بێت چەک لە چوارچێوەی دامەزراوەکاندا بێت.
پشتگیری لە داوای حکومەتی عیراق کرا بۆ بەدەستیهێنانی بەخشین و بەدەرکردنی فڕۆکەخانەی نەجەف لە رێکار و سزاکانی وەزارەتی گەنجینەی ئەمریکا.
لە راگەیەندراوەکەدا، جەخت لەسەر خێراکردنی تەواوکردنی کابینەی وەزاری و پەسەندکردنی ئەو یاسایانە کرایەوە کە پەیوەندی راستەوخۆیان بە ژیانی هاوڵاتییانەوە هەیە، لەگەڵ بەهێزکردنی روبەڕوبرونەوەی گەندەڵی.
چوار سەرۆکایەتییەکە تاوتوێی لێکەوتە ئابورییەکانی گرژییەکانی ناوچەکەشیان کردوە و جەخت لە هەڵوێستی نەگۆڕی عیراق کرایەوە بۆ بەکارهێنانی دیپلۆماسی و دیالۆگ بۆ چارەسەرکردنی کێشەکان.
هەڤاڵ ئەبوبەکر، پارێزگاری سلێمانی، پیرۆزبایی لە عیراقی فیدراڵ کرد بەبۆنەی بەدەستهێنانی مافی میوانداریکردنی پاڵەوانێتیی جامی کەنداوی 2028 و ئامادەی سلێمانییشی راگەیاند بۆ پیشوازیکردن لە یارییەکان.
لە میانی کۆبونەوەی لەگەڵ یونس مەحمود، سەرۆکی فیدراسیۆنی تۆپی پێی عیراق، پارێزگاری سلێمانی پیرۆزبایی لە فیدراسیۆنەکە کرد بۆ میوانداریکردنی جامی کەنداوی 2028.
د. هەڤاڵ ئەبوبەکر راشیگەیاند، پارێزگای سلێمانی تەواوی ئامادەیی سلێمانی بۆ پێشوازیکردن و بەڕێوەبردنی بەشێک لە یارییەکانی ئەو پاڵەوانێتییە دەربڕی.
هاوکات سوپاسی هەوڵە بەردەوامەکانی یەکێتیی تۆپی پێی عیراق کرد بۆ سەرخستنی ئەم خولە و هێنانی بۆ عیراق.
ئەد میڵیباند، وەزیری دەرەوەی بەریتانیا رایگەیاند، کردارەکانی ئیسرائیل لە غەززە و کەرتی رۆژئاوا، شەرمەزارییە بۆ ویژدانی جیهان و جەختی کردەوە، هەڕەشەکان پاساو بۆ ئەو دەستدرێژییانە ناهێننەوە.
وەزیری دەرەوەی بەریتانیا، لە کۆنفرانسی ساڵانەی پارتی کرێکاران لە لیڤەرپول رەخنەی توندی لە حکومەتەکەی ناتانیاهۆ گرت.
ئەد میڵیباند بە رەسمی ئیدانەی پاکتاوی رەگەزی لەلایەن نیشتەجێبووە ئیسرائیلییەکان لە کەرتی رۆژئاوا و بەڵگەکان لەسەر تاوانی جەنگ لە غەززە و داگیرکارییە ناڕەواکەی ئیسرائیلی کرد.
ناوبراو ئاماژەی بەوەکرد، ئەوان کێشەیان لەگەڵ گەلی ئیسرائیل نییە، بەڵکو لەگەڵ رەفتار و کردەوەکانی حکومەتەکەی نەتانیاهۆدا هەیە.
سەبارەت بە چارەسەری دوو دەوڵەتی، میلیباند هۆشداری دا، لە هەوڵدان بۆ تێکدانی ئەگەری دامەزراندنی دەوڵەتی فەلەستین لە پاڵ ئیسرائیل و دووپاتی کردەوە، پارتی کرێکاران دژایەتی هەر هەنگاوێک دەکات کە هەڕەشە لەم چارەسەرە بکات.
ئەم هەڵوێستەی بەریتانیا لەکاتێکدایە کە فشارە ئەوروپییەکان بۆ سەر ئیسرائیل زیادیان کردووە، بەتایبەت دوای ئەوەی 12 وڵات لە نێویاندا بەریتانیا، فەرەنسا و ئیسپانیا رایانگیاندبوو، بازرگانی لەگەڵ ئەو شوێنەوارانەی ئیسرائیل، کە لەسەر خاکی داگیرکراوی فەلەستین دروستکراو قەدەغەیە.
ئیدارەی گەرمیان رایگەیاند، ئامادەکاری تەواو کراوە بۆ دابەشکردنی قۆناغی دوەمی زەویی بەسەر فەرمانبەراندا، بە جۆرێک لە کەمترین ماوەدا زەوی دەدرێت بەو فەرمانبەرانەی فەرمانی وەرگرتنی زەویان هەیە و لە قۆناغی دوەمدا پێیاننەدراوە.
ئەمڕۆ دووشەممە، ئیدارەی گەرمیان لە راگەیەندراوێکدا رایگەیاند، کۆبونەوەیەکی تایبەتیان بە پرسی دابەشکردنی قۆناغی دوەمی زەویی بەسەر فەرمانبەراندا ئەنجامداوە.
بە گوێرەی راگەیەندراوەکە، لە کۆبونەوەکەدا بە وردی تیشک خراوەتە سەر کێشە و ئاستەنگەکانی بەردەم پرۆسەی دابەشکردنی زەوی فەرمانبەران لە کەلار و چارەسەری گونجاو و پێویستیان بۆ خراوەتەڕوو.
هەروەها بڕیاردرا بە فراوانکردن و زیادکردنی روبەری ئەو زەوییانەی بۆ فەرمانبەران تەرخانکراون، ئەمەش لەڕێگەی تەواوکردنی رێکارەکانی دابینکردنی زەوی پێویست لەلایەن بەڕێوەبەرایەتی کشتوکاڵی گەرمیانەوە بۆ سەر سنوری شارەوانی کەلار.
بەپێی بڕیارەکە، لە کەمترین ماوەدا زەوی بەسەر ئەو فەرمانبەرانەدا دابەشدەکرێت کە فەرمانی وەرگرتنی زەوییان هەیە و لە قۆناغی یەکەمدا زەوییان پێنەدراوە.
هاوكات بەپێی ئەنجامی کۆبونەوەکە، فەرمانبەرانی سنوری قەزای کەلار لەگەڵ گردەگۆزینە و گوند و ناحیەکانی، هەروەها ئەو فەرمانبەرانەی دانیشتوی ناحییەکانی مەیدان و قۆرەتون، لەگەڵ قۆناغی دوەمی فەرمانبەرانی کەلار لە سنوری شارەوانی کەلار زەوییان پێدەدرێت.
موڕاز زانا، ئەو مێرمنداڵەی لە روبەڕوبونەوەی نێوان دژەتیرۆری عیراق و تیرۆرستانی داعش لە پردێ کوژا، بە شەهید تۆماردەکرێت.
رێبوار تەها، جێگری یەکەمی پارێزگاری کەرکوک بە کوردسات نیوزی راگەیاند: موڕاد زانا، ئەو مێرمنداڵەی رۆژی 27ـی 9ـی 2026 لە ڕوبەڕوبونەوەی نێوان دژەتیرۆری عیراق و تیرۆرستانی داعش لە پردێ کوژرا، بە شەهید تۆمار دەکرێت.
رێبوار تەها، بە ئاسۆ ئەحمەدی پەیامنێری کوردسات نیوزی وت: سوپاست دەکەم کە لە خەمی ئەوەدابوویت موڕاد زانا بە شەهید تۆمار بکرێت.
موڕاد زانا، مێرمنداڵێکی پردێ بوو، لە روبەڕوبوونەوەی نێوان دژەتیرۆری عیراق و تیرۆرستانی داعش کوژرا.
وەزارەتی خوێندنی باڵا و توێژینەوەی زانستی هەرێم بە گشتاندنێکی رەسمی، بڕیارێکی دەرکرد لەبەرژەوەندی خوێندکاران و ئاڕاستەی سەرجەم زانکۆ و پەیمانگە تایبەتەکانی هەرێمی کوردستان کرد.
خوێندنی باڵا، جەخت لەسەر پابەندبونی تەواوی دامەزراوەکانی خوێندنی تایبەت دەکات، بە مەرج و پێوەرەکانی وەرگرتن بۆ ساڵی خوێندنی(2026_2027) .
بەپێی گشتاندنەکە، وەزارەت بە توندی ئاگاداری زانکۆ و پەیمانگە تایبەتەکان دەکاتەوە، بە هیچ جۆرێک مافی ئەوەیان نییە پێش راگەیاندنی ناوی وەرگیراوان لەلایەن وەزارەتی خوێندنی باڵاوە، هیچ بڕە پاره‌یه‌ك وەک قیستی کرێی خوێندن لە خوێندکاران وەربگرن.
ئەم بڕیارەی وەزارەت پاڵپشت بە رێنمایی و پێوەرەکانی وەرگرتن دەرچوە، بە ئامانجی پاراستنی مافی خوێندکاران و رێگریکردن لە هەر بارگرانییەکی دارایی پێش وەخت، تا ئەو کاتەی پڕۆسەی وەرگرتن بە رێکاری رەسمی و لەلایەن وەزارەتەوە پەسەند دەکرێت.
دوای راگرتنی گەشتی هێڵەکانی ئێران بۆ عێراق، باڵیۆزی عیراق لە ئێران رایگەیاند، لە 24 سەعاتی داهاتودا گەشتەکانی نێونا هەردوو وڵاتە لە رێگەی فڕۆکەخانەی نەجەفەوە دەستپێدەکاتەوە
یاسر عەبدولزەهرا حەجاج، باڵیۆزی عیراق لە ئێران رایگەیاند کە فڕۆکەخانەی نێودەوڵەتیی نەجەف لە 24 سەعاتی داهاتوودا دەرگاکانی بەڕوی فڕۆکە ئێرانییەکاندا دەکاتەوە.
ئاماژەی بەوەشکردوە، ئەمە وەک هەنگاوێکە بۆ دەستپێکردنەوەی گەشتە ئاسمانییەکانی نێوان هەردوو وڵات دوای ئەوەی لە رابروودا راگرتنیان ڕاگەیاندرابوو.
ئەم پێشهاتە لە کاتێکدایە کە پێشتر و لە 25ی ئەیلوولدا، ئیدارەی فڕۆکەخانەی نەجەف بەپێی رێنماییە رەسمییەکانی لایەنە پەیوەندیدارەکان، هەموو گەشتە هاتووەکان و رۆشتووەکانی لەگەڵ ئێراندا تا ئاگادارکردنەوەیەکی تر راگرتبوو.
لە ئێستادا، بە گوێرەی زانیارییەکانی باڵیۆزی عیراق لە ئێران، بڕیارە نوێیەکە ئاساییکردنەوەی خێرای پەیوەندییە ئاسمانییەکانی نێوانیان هەردوو وڵاتی بەدوادا دێت.
وەزیری بەرگریی بەریتانیا رایگەیاند، ئێران مەترسییەکی جدییە بۆسەر وڵاتەکەی و چەندین هەوڵی تاران و گروپە تایبەتەکانی سەر بە ئێرانیان پوچەڵ کردوەتەوە، جەختیشیکردەوە لێکۆڵینەوە لە روداوەکەی بنکەی ئاسمانی 'فێرفۆرد' بەردەوامە.
لە لێدوانێکی رۆژنامەوانیدا، وێس ستریتینگی وەزیری بەرگری بەریتانیا رایگەیاند، کۆماری ئیسلامی ئێران و گروپە تایبەتەکانی مەبەستیانە زیان بە بەریتانیا بگەیەنن و تا ئێستا چەندین هەوڵی ئەوانیان بۆ دروستکردنی مەترسی لەسەر بەرژەوەندییەکانی لەندەن و هاوپەیمانەکانی پوچەڵکراونەتەوە.
لەبارەی ئۆپراسیۆنی دەستبەسەرکردنی پێنج کەس لە نزیک بنکەی ئاسمانیی 'ئاڕ ئەی ئێف فێرفۆرد' ناوبراو ئاماژەی بەوەکرد، تا کۆتاییهاتنی لێکۆڵینەوەکان پەلەکردن لە دەستنیشانکردنی هۆکاری روداوەکە شتێکی پێشوەختەیە، بەڵام جەختی کردەوە کە هەڕەشە گشتییەکانی ئێران بۆ سەر وڵاتەکەیان بە هەند وەردەگرن.
بەپێی وتەی سەرچاوەیەکی ئاگاداریش، لە ئێستادا ئەگەری هەبونی دەستتێوەردانی ئێران بەهێزترین گریمانەی ناو لێکۆڵینەوەکانە، ئەگەرچی ئەگەری ئۆپراسیۆنی تێکدەرانەی روسیا یان پیلانێکی توبدرەوانەش لە ژێر پێداچونەوەدان؛ ئەمەش لە کاتێکدایە کە تاران پێشتر بە تەواوی رەتی کردۆتەوە دەستی لە هیچ هێرش یان پیلانگێڕییەکدا لە ناو خاکی بەریتانیادا هەبێت.
وەزارەتی پێشمەرگەی حکومەتی هەرێم، پەیامێکی سەبارەت بە کشانەوەی هێزەکانی ئەمریکا و هاوپەیمانان بڵاوکردووەتەوە و تێیداهاتووە، "جێهێشتنی هەرێمی کوردستان لە لایەن ئەمریكاوە لە رەوشێکی وا ئاڵۆزی ناوچەییدا، بەبێ دابینکردنی هیچ سیستمێکی بەرگری مایەی نیگەرانییە".
دەقی پەیامەکە
رۆژی 30ـی ئەیلول هێزەکانی ئەمریکا لەسەر خاکی عیراق و هەرێم دەکشێنەوە، ئەم کشانەوەیەش دەرئەنجامی لێکتێگەیشتنی هاوبەشی حکومەتی عیراقی فیدراڵ و ئەمریکا و هاوپەیمانانە.
کشانەوەی هێزەکانی ئەمریکا و هاوپەیمانان لە عیراق لە کاتێکی هەستیاردایە؛ بەتایبەت کە رەوشی ئاسایشی عیراق و رۆژهەڵاتی ناوەڕاست ناسەقامگیرە و پێویستی بە هۆشیاری و بڕیاردانی سیاسیی دروست هەیە، چونکە بەردەوامبوونی ناسەقامگیریی رەوشی ناوچەکە هەڕەشەیە بۆ سەر تەواوی ناوچەکە.
لەكاتی شەڕی نێوان ئەمریکا و ئێران لە مانگەکانی رابردوو، هەرێمی کوردستان زیاتر لە هەزار جار رووبەڕووی هێرشی درۆنی، مووشەکی بالیستیک بووەتەوە، کە بەشێکیان لەسەر ناوچە مەدەنییەکان کەوتنە خوارەوە، لە ئەنجامی ئەم هێرشانە چەندین شەهید و بریندار و زیانی ماددی لێکەوتۆتەوە.
جێهێشتنی هەرێمی کوردستان لە لایەن ئەمریكاوە لە رەوشێکی وا ئاڵۆزی ناوچەییدا، بەبێ دابینکردنی هیچ سیستمێکی بەرگری مایەی نیگەرانییە، لە هەمان کاتدا ئێمە لە وەزارەتی پێشمەرگە دڵنیاین کە ئاسمانی هەرێمی کوردستان وەک بەشێک لە ئاسمانی حکومەتی فیدڕاڵ، ئەرکی لە پێشینەی حکومەتی فیدڕاڵە کە بەرپرسیارییەتی پاراستنی ئاسمانی هەرێمی کوردستان لە کاتی پێویستیدا لە ئەستۆ بگرێت.
هێزی پێشمەرگە وەک چۆن لە رابردوو پارێزەری خاک و خەڵکی کوردستان بووە، لە داهاتووشدا بۆ هەر ئەگەر و پێشهاتێکی نوێ ئامادەیە و دەتوانێ لەگەڵ هەر رەوشێکی نەخوازراودا خۆی بگونجێنێت و رووبەڕووی مەترسییەکان ببێتەوە.
وەزارەتی پێشمەرگە سوپاسی زۆری ئەمریکا و هاوپەیمانەکانی دەکات و رێز لە هاوکاری و پشتیوانیان دەگرێت کە لە رابردوودا بەرانبەر هەرێمی کوردستان و هێزی پێشمەرگە پێشکەشیان کردووە.
وەزارەتی پێشمەرگە وەک بەشێک لەسیستمی بەرگری عیراق لەگەڵ سوپای عیراق دا پەیوەندیەکی دەستوریی و ئەمنی پتەوی هەیە و لەکارکردنی هاوبەشدا بەردەوام و هەماهەنگ دەبێت.
لە کۆتاییدا خەڵکی کوردستان دڵنیا دەکەینەوە کە کوردستان لە دەستێکی ئەمین و ئاشتی خوازدایە.
وەزارەتی پێشمەرگە
27ـی ئەیلولی 2026
حکومەتی هەرێمی کوردستان دوو رۆژ پشووی بەبۆنەی رۆژی سەروەریی عیراق راگەیاند.
فەرمانگەی میدیای و زانیاریی حکومەتی هەرێمی کوردستان رایگەیاند، رۆژانی چوارشەممە 30ـی 09 و پێنجشەممە 01ـی 10ـی 2026، لە سەرجەم دامودەزگاکان پشووی رەسمییە.
سولی سکرین دەستپێدەکاتەوە و هاووڵاتیان دەتوانن لە پارکی ئازادیی شاری سلێمانی بە ژێرنووسی کوردی تەماشای شاکارەکانی سینەما بکەن.
رۆژی 1ـی 10 تا 10ـی 10ـی 2026 سولی سکرین لە پارکی ئازادیی شاری سلێمانی بەردەوام دەبێت و فیلمەکان بە ژێرنووسی کوردی سەعات 07:00ـی ئێوارە نمایش دەکرێن.
سولی سکرین (SULI SCREEN)، دەستپێشخەرییەکی کۆمیسیۆنی فیلمی کوردستانە بە هەماهەنگی لەگەڵ دەزگای میدیایی کوردسات بۆ نمایشکردنی فیلم بە درێژایی ساڵ، کە ئامانجی گەیاندنی ئەزموونی سینەمایی بێبەرانبەرە بە هەرێمی کوردستان.
فەرماندەی هێزی ئاسمانی عیراق ئاشکرایدەکات، تەواوی ئەركەكانیان سەربەخۆیانە و دوور لە هاوپەیمانیی نێودەوڵەتی ئەنجامدەدەن.
خالید تەمیمی فەرماندەی هێزی ئاسمانیی عیراق رایگەیاند، لە سەرەتای ساڵی 2026ـەوە هیچ هێزێكی هاوپەیمانان ئەركێكی لە ناو خاكی عیراقدا جێبەجێنەكردووە.
ئاماژەی بەوەشكرد، فڕۆكەی پێشکەوتووی وەك ئێف-16، تی-50، ئێڵ-159 فڕۆكەی سێسنا و فڕۆكەی بێفڕۆكەوانی سەر بە هێزە عیراقییەكان شوێنی فڕۆكەكانی هاوپەیمانانیان گرتووەتەوە.
روونیكردەوە، بوونی كۆمپانیا بیانییەكان لە بنكەكان تەنها بۆ پێشكەشكردنی خزمەتگوزاریی تەكنیكییە بەرانبەر بە پارە و وەک هێزی سەربازی نامێننەوە.
ئاماژەی بەوەشكرد، پەرەپێدانی تواناكان بەردەوامە و چاككردنەوەی فڕۆكەكانی ئێف-16 بە رێژەی 100% لەلایەن كادر و ئەندازیارانی عیراقییەوە ئەنجامدەدرێت و لە هەوڵیشدان بۆ كڕینی 14 فڕۆكەی پێشكەوتووی رافایلی فەرەنسی.