هەواڵەکان
کەشناسیی هەرێم پێشبینی دەکات ئەمڕۆ لە چەند ناوچەیەک نمەباران ببارێت و سبەینێش شەپۆلێکی بارانبارین ناوچە شاخاوییەکان دەگرێتەوە.
بەڕێوەبەرایەتی گشتی کەشناسی و بوومەلەرزەزانی هەرێم رایگەیاند، ئەمڕۆئاسمان بە گشتی لە نێوان پەڵە هەور و نیمچە هەور دەبێت، لە کاتەکانی بەیانیدا ئەگەری بارینی نمەباران لە هەندێک ناوچەی سنوریی رۆژهەڵاتی هەرێم سەر بە پارێزگای سلێمانی، هەڵەبجە و بەشێک لە ئیدارەی گەرمیان هەیە.
ئاماژەی بەوەشکرد، سبەینێ ئاسمان بە گشتی پەڵەهەور و نیمچە هەور دەبێت، لە کاتەکانی شەودا لە ناوچە شاخاوییە سنورییەکانی باکور و باکوری رۆژئاوای هەرێم دەگۆڕێت بۆ هەوری تەواو، و ئەگەری هەیە لە دوای نیوەشەو بارانبارین لەو ناوچانەدا دەست پێبکات.
کەشناسی هەرێم ئەوەشی خستەڕوو، پلەکانی گەرما نزیک دەبێتەوە لە تۆمارکراوەکانی ئەمڕۆ.
بەرزترین پلەکانی گەرمای پێشبینیکراو بە پلەی سیلیزی
هەولێر: 30 پلەی سیلیزی
پیرمام: 27 پلەی سیلیزی
سلێمانی: 29 پلەی سیلیزی
هەڵەبجە: 30 پلەی سیلیزی
چەمچەماڵ: 31 پلەی سیلیزی
دهۆک: 30 پلەی سیلیزی
زاخۆ: 30 پلەی سیلیزی
ئاکرێ: 30 پلەی سیلیزی
گەرمیان: 35 پلەی سیلیزی
حاجی ئۆمەران: 22 پلەی سیلیزی
سۆران : 27 پلەی سیلیزی
بەهۆی پێنەدانی خەڵاتی نۆبڵی ئاشتی، دۆناڵد ترەمپ هێرشێکی توند دەکاتەسەر لیژنەی نۆبڵ و دەڵێت؛ خەڵاتەکە متمانەی خۆی لەدەستداوە و خۆیشی بە شایستەی هەشت خەڵاتی نۆبڵ دەزانێت.
دۆناڵد ترەمپ، سەرۆکی ئەمریکا، هێرشێکی توندی کردە سەر لیژنەی نۆبڵ بەهۆی پێشکەشنەکردنی خەڵاتی ئاشتی بەو، و بەپێی ئاژانسی ڕۆیتەرز، ناوبراو پێیوایە ئەو بڕیارە "پەڵەیەکی رەشی نەسرایەوە" لە مێژووی نەرویژدا جێهێشتووە کە میوانداری لیژنەکە دەکات.
ترەمپ لە پۆستێکی تۆڕی کۆمەڵایەتی 'سۆشیال تروس' نووسیویەتی، شایستەی خەڵاتەکەیە لەبەرانبەر ئەو رۆڵەی کە دەڵێت؛ لە چارەسەرکردنی هەشت جەنگدا گێڕاویەتی، و جەختی لەوە کردەوە کە "شایستەی هەشت خەڵاتی ئاشتیی نۆبڵە، نەک تەنها یەک دانە."
رەخنەی لە ناڤی پیلای، دادوەری ئەفریقای باشور گرت کە براوەی خەڵاتەکەی ئەمساڵە و وتی هیچ نەزانینێکی لەسەر نییە، هەروەها بە کەسایەتییەکی لیبراڵ کە لە نەتەوە یەکگرتووەکان کار دەکات وەسفی کردووە، تۆمەتباریشی کرد بە قین لە هەڵگر دژی ئیسرائیل، بێ ئەوەی لە پۆستەکەیدا هیچ بەڵگەیەک بۆ پشتڕاستکردنەوەی ئەو تۆمەتە بخاتە ڕوو.
ترەمپ ئاماژەی بەو جەنگانە کرد کە دەڵێت کۆتایی پێهێناون، ئەوانیش بریتیین لە. ململانێی نێوان کەمبۆدیا و تایلەند، کۆسۆڤۆ و سەربیا، کۆماری دیموکراتی کۆنگۆ و رواندا، پاکستان و هیدستان، ئیسرائیل و ئێران، میسر و ئەسیوپیا، ئەرمینیا و ئازەربایجان، هەروەها شەڕی نێوان ئیسرائیل و بزووتنەوەی حەماسیش.
وتیشی، ژمارەیەک سەرۆک و سەرۆک وەزیرانی ئەو وڵاتانە نامەیان بۆ لیژنەی نۆبڵی نەرویژی ناردووە بۆ پشتگیریکردن لە کاندیدکردنی، و پێیایە تەنها رۆڵی ئەو لە کێشەی نێوان پاکستان و هندستاندا بەس بووە بۆ بەدەستهێنانی خەڵاتەکە.
سەرۆکی ئەمریکا ئەوەشی خستەڕوو، کە لە چارەسەرکردنی دۆسیەی ئێران و جەنگی روسیا و ئۆکراین نزیک بووەتەوە، جەختیشی کردەوە کە روداوەکان بە خێراییەکی زۆر بەرەو پێشەوە دەچن.
ترەمپ پشتی بە ماریا کورینا ماچادۆ، سەرۆکی ئۆپۆزسیۆنی ڤەنزوێلا بەست، و وتی کە خەڵاتی ساڵی رابردووی خۆی پێشکەش کردووە و ماچادۆ رایگەیاندبووە ترەمپ لە هەموو کەسێک زیاتر شایستەی نۆبڵی ئاشتییە کە تا ئێستا بەدەستی هێناوە.
دۆناڵد ترەمپ، سەرۆکی ئەمریکا رایگەیاند، ئێران دەبێت بەزوویی بڕیاربدات. یان هەموو داواکارییەکانمان جێبەجێ دەکات، یان بوونی نامێنێت. وڵاتەکە لە هەڵئاوساندایە و تەنانەت پارەی نییە مووچەی سوپاش بدات.
دۆناڵد ترەمپ، سەرۆکی ئەمریکا، دۆخی ئێرانی بە قەیراناوی وەسف کرد و رایگەیاند، تاران تووشی هەڵاوسانی %300 بووە و پارەی نییە مووچەی هێزە ئەمنییەکانی بدات. هەروەها جەختیکردەوە کە کۆنتڕۆڵی تەواوی گەرووی هورمزیان لە دەستدایە و پرسی ئێران زۆر بە خێرایی یەکلادەبێتەوە.
سەرۆکی ئەمریکا لە درێژەی قسەکانیدا سەبارەت بە بەرنامەی ئەتۆمیی تاران هۆشداریی دا و رایگەیاند، ئێران هەرگیز خاوەنی چەکی ئەتۆمی نابێت، و هەوڵدان بۆ بەدەستهێنانی هۆکارێک دەبێت بۆ ئەوەی ئەمریکا هێرش بکاتە سەریان. ترەمپ ئاماژەی بەوەش کرد کە ئێران بژاردەیەکی توندی لەبەردەمە، یان ئەوەتا هەموو شتێک بە ئەمریکا دەبەخشێت کە دەیەوێت، یان بە تەواوی بوونی نامێنێت.
لە بەشێکی تری لێدوانەکانیدا، ترەمپ باس لە پرسی وزە و ئابووری کرد و رایگەیاند، لە سایەی هێزی سوپای ئەمریکاوە، ئێستا کۆنتڕۆڵی تەواوی گەرووی هورمز کراوە و قەبارەی هەناردەی نەوت لەو رێگەیەوە لە ئاستی پێش جەنگیش زیاترە. داوای لە پاڵاوگەکان و فرۆشیارانی تاکەکەسی کرد کە دەستبەجێ نرخەکان دابەزێنن، چونکە بڕێکی زۆر سوتەمەنی دابین کراوە و لەم دواییانەشدا روسیا رازی بووە ملیۆنان بەرمیل گازوایل بۆ ئەمریکا بنێرێت.
لە کۆتایی لێدوانەکانیدا، ترەمپ رەخنەی لە نەدانی خەڵاتی نۆبڵی ئاشتی بە ئەمریکا گرت و ئەوەی خستەڕوو، نەدانی ئەو خەڵاتە بەڵگەیەکی تر نیشان دەدات کە وڵاتانی وەکو نەرویژ و لایەنەکانی دیکە بەردەوام بەدوای سوودوەرگرتنەوەن لە پێگەی ئەمریکا.
بوومەلەرزەیەکی بەهێز بە گوڕی هەشت پلەی رێختەر پەنەمای هەژاند، ناوەندەکانی دەستنیشانکردنی زەمینلەرزەش هۆشداری دەدەن لە دروستبوونی شەپۆلی تسۆنامی لە کەناراوەکانی ئەمریکا و کەنەدا.
ئەمڕۆ، بوومەلەرزەیەکی بەهێز بە گوڕی هەشت پلە بە پێوەری رێختەر بەشێکی بەرفراوانی وڵاتی بنەمای هەژاند، بەهۆیەوە بەڕێوەبەرایەتییەکانی بەرگریی شارستانی و ناوەندەکانی دەستنیشانکردنی زەمینلەرزە هۆشدارییان لە ئەگەری دروستبوونی شەپۆلی وێرانکەری تسۆنامی دا.
بەپێی زانیارییەکانی دەستەی رووپێوی جیۆلۆجیی ئەمریکا، ناوەندی بوومەلەرزەکە لە کەناراوەکانی باشوری پەنەما بووە، ئاژانسی فرانس پرێس بڵاویکردەوە، گوڕی بوومەلەرزەکە هێندە بەهێز بووە لەلایەن دانیشتووانی پەنەمای پایتەختەوە هەستی پێکراوە و ترس و دڵەراوکێی زۆری لەناو هاووڵاتییاندا دروستکردووە.
هاوکات، ناوەندی نیشتمانیی ئەمریکی بۆ هۆشداریی تسونامی راگەیەنراوێکی بڵاوکردەوە و تێیدا ئاماژەی بەوەکرد، مەترسیی بەرزبوونەوەی شەپۆلەکان و رودانی تسۆنامیی وێرانکەر هەیە کە رەنگە کاربکاتە سەر ویلایەتەکانی (کالیفۆرنیا، ئۆریگۆن، واشنتن، ئەلاسکا) لە ئەمریکا، بێجگە لە هەرێمی کۆلۆمبیای بەریتانی لە وڵاتی کەنەدا.
سێنتکۆم ئاستی جێبەجێکردنی گەمارۆ دەریاییەکەی بۆ سەر ئێران توندتر دەکاتەوە و رایدەگەیەنێت، هێزە دەریاییەکانیان لە گەروی هورمزدا رێڕەوی 133 کەشتیی بازرگانییان گۆڕیوە.
فەرماندەیی ناوەندیی هێزەکانی ئەمریکا سێنتکۆم رایگەیاند، لە چوارچێوەی جێبەجێکردنی گەمارۆ دەریاییە توندەکەیان بۆ سەر ئێران، تا رۆژی 9ی تشرینی یەکەم هێزەکانیان رێڕەوی 133 کەشتیی بازرگانییان گۆڕیوە.
سێنتکۆم لە هەژماری رەسمی خۆی خۆی وێنەی هێلیکۆپتەرێکی سەربازیی بڵاوکردووەتەوە و رایگەیاندووە: "فڕۆکەیەکی هێزی دەریایی ئەمریکا لە جۆری 'MH-60S Sea Hawk' لەسەر سەکۆی کەشتیی جەنگیی ئاسمانیی 'USS John Paul Jones' فڕیوە، کە بەشێکە لە هەوڵەکانی توندکردنی گەمارۆ تۆکمەکەی ئەمریکا بۆ سەر ئێران."
بەپێی راگەیەنراوەکەی فەرماندەیی ناوەندیی ئەمریکا، رێڕەوگۆڕینی ئەم کەشتییە بازرگانییانە بە ئامانجی دڵنیابوونەوەیە لە جێبەجێکردنی تەواوەتیی سزاکان و پابەندبوونی کەشتییەکان بە بڕیاری گەمارۆدانی دەریایی ئێران
.
سەرۆکی حکومەتی هەرێم هێرشەکانی سەر فڕۆکەخانەکانی ریاز و ئەبها بەتوندی سەرکۆنە دەکات، هاوکات جەخت دەکاتەوە بەئامانجگرتنی خەڵکی سیڤیل قبووڵنەکراوە.
مەسرور بارزانی، سەرۆکی حکومەتی هەرێمی کوردستان لە پەیامێکدا رایگەیاند، هێرشکردنە سەر فڕۆکەخانەی نێودەوڵەتیی شا خالید لە ریاز و فڕۆکەخانەی نێودەوڵەتیی ئەبها قبووڵکراو نییە و جەختی کردەوە کە بە ئامانجگرتنی خەڵکی سیڤیل و ژێرخانی مەدەنی رەتکراوەیە.
لە پەیامەکەیدا سەرۆکی حکومەتی هەرێمی کوردستان ئاماژەی بەوەکرد، "پرسە و سەرەخۆشی لە کەسوکاری قوربانیان دەکەم و هاوسۆزیی خۆمان لەگەڵ گەل و سەرکردایەتیی شانشینی عەرەبستانی سعودی دەردەبڕین."
ترەمپ جەخت لە کۆتاییهێنان بە جەنگ لەگەڵ ئێران دەکاتەوە و رادەگەیەنێت، واشنتۆن بە تەواوی رێگری لە تاران کردووە بێتە خاوەنی چەکی ئەتۆمی.
دۆناڵد ترەمپ، سەرۆکی ئەمریکا رایگەیاند، واشنتۆن رێگریی تەواوی لە تاران کردووە بێتە خاوەنی چەکی ئەتۆمی، دەشڵێت"بەم زووانە بە رێگەیەک لە رێگەکان کۆتایی بە دۆسیەی ئەتۆمیی ئێران دەهێنین."
لەبارەی توانای سەربازیی ئێرانەوە، ترەمپ جەختی کردەوە، تاران چیتر هێزێکی ئەوتۆی نەمێنێتەوە و وتی: "ئێران چیتر سوپا، هێزی دەریایی، هێزی ئاسمانی و سیستمی بەرگریی دژە فڕۆکەی بەدەستەوە نەماوە."
لە بەشێکی تری قسەکانیدا، سەرۆکی ئەمریکا تیشکی خستەسەر رەوشی گەروی هورمز و رایگەیاند، گەمارۆیەکی توندی دەریاییشیان بەسەر گەروەکەدا سەپاندووە و رێگە بە هیچ هاتوچۆیەک بەرەو ئێران یان لە ئێرانەوە نادەن.
سەبارەت بە هەناردەکردنی نەوتیش ئاشکرایکرد، "دوێنێ زۆرترین بڕی نەوت لە سەرەتای دەستپێکردنی جەنگەکەوە لە گەروی هورمزەوە تێپەڕیوە کە گەیشتووەتە 28 ملیۆن بەرمیل."
لە کۆتاییدا ترەمپ دڵنیایی دا کە جەنگ لەگەڵ ئێران زۆر بە زوویی کۆتایی پێدێت و ئەمریکا هەموو توانایەکی هەیە بۆ ئەوەی بە هەر رێگەیەک بێت کۆتایی بەم رووبەڕووبوونەوەیە بهێنێت.
لە حەسەكەی رۆژئاوای كوردستان ئاڵۆزییەكان بەردەوامە و هێزەكانی ئاسایشی ناوخۆش خراونەتە حاڵەتی ئامادەباشیدا.
دوایی ئەوەی كە رۆژی رابردوو و لە کاتی هەڵكردنی ئاڵای سوریا لە پارێزگای حەسەكە رێوڕەسمێک بەڕێوەچوو، عەرەبەكانی شاری حەسەكە دەستیانكرد بە خۆپیشاندان لە دژی كوردەكان و هەڕەشەیان لە كوردەكان كرد و ئەوە بووە هۆی ئاڵۆزی لەناو ئەو شارە و هێزەكانی ئاسایشی ناوخۆ هەوڵی كۆنترۆڵكردنی رەوشەكەیان دا.
ئەمڕۆش لە دوایی نوێزی هەینی لە سێ گەڕەكی عەرەبنشینی غوەیران ، نشوە و عەزیزیەی سەر بە شاری حەسەكە جارێكی تر عەرەبەكانی ئەو گەڕەكە هەوڵی ئاژاوەگێڕیان دا و لە دژی هاووڵاتییانی كورد خۆپیشاندانیان ئەنجام دا و لە ئەنجامدا هێزەكانی ئاسایشی ناوخۆ لە ناو شار بڵاوەیان پێكرا و خرانە حاڵەتی ئامادەباشیدا.
لەلای خۆشیەوە، نورەدین ئەحمەد، پارێزگاری حەسەکە رایگەیاند، "داوا لە هەمووتان دەکەم، بەتایبەتی گەنجان، کە ژیرانە بیربکەنەوە و خۆڕاگر بن، هێزەکانی ئاسایش رۆڵە و برای ئێوەن و ئەرکیان پاراستنی ئێوە و دامەزراوە نیشتمانییەکانە، وەرن با دەست لە ناو دەست بنێین بۆ لەناوبردنی هەلی هەر لایەنێک کە هەوڵ دەدات هەست و نەستتان بقۆزێتەوە بۆ کێشکردنی وڵات بەرەو پشێوی و توندوتیژی."
هاوکات لەگەڵ بەردەوامبوونی گرژییەکان، پەیامنێری کوردسات نیوز رایگەیاند، بەهۆی ئاڵۆزییەکانەوە سێ هاووڵاتی مەدەنی کورد بریندرابوون.
پارێزگاری حەسەکە داوای هێوربوونەوە و پاراستنی ئارامی لە هاووڵاتییان دەکات و رایدەگەیەنێت؛ داوا لە گەنجان دەکەم دان بە خۆیاندا بگرن و رووبەڕووی هێزە ئەمنییەکان نەبنەوە.
نورەدین ئەحمەد، پارێزگاری حەسەکە لە هەژماری تایبەتی خۆی لە تۆڕی کۆمەڵایەتیی ئێکس پەیامێکی ئاراستەی هاووڵاتییانی پارێزگاکە کرد و رایگەیاند، ئەمڕۆ بە دڵسۆزییەوە بۆ ئاسایش و سەلامەتیی هەر تاکێکی ئێوە و ئاسایشی وڵاتەکەمان روتان تێدەکەم، دەربڕینی داواکردنی مافەکان مافێکی رەوایە و یاسا گەرەنتی کردووە، ئێمەش بە هەموو رێز و پێزانینێکەوە گوێ لە دەنگتان دەگرین."
ئاماژەی بەوەشکرد، بۆ ئەوەی دەنگتان بە بەرزی و بەهێزی بپڕێتەوە، پێویستە هەموومان پارێزگاری لە ئاشتییانەبوونی ئەم جووڵانەوانە بکەین. تێکدانی موڵکوماڵ یان چوونە ناو ڕووبەڕووبوونەوە لە بەرژەوەندیی دۆزەکەتاندا نییە، بەڵکو سەرنجەکان لەسەر داواکارییە رەواکانتان دوور دەخاتەوە و زیان بە ئاسایشی کۆمەڵگە دەگەیەنێت."
پارێزگاری حەسەکە راشیگەیاند، "داوا لە هەمووتان دەکەم، بەتایبەتی گەنجان، کە ژیرانە بیربکەنەوە و خۆڕاگر بن، هێزەکانی ئاسایش رۆڵە و برای ئێوەن و ئەرکیان پاراستنی ئێوە و دامەزراوە نیشتمانییەکانە، وەرن با دەست لە ناو دەست بنێین بۆ لەناوبردنی هەلی هەر لایەنێک کە هەوڵ دەدات هەست و نەستتان بقۆزێتەوە بۆ کێشکردنی وڵات بەرەو پشێوی و توندوتیژی."
سکۆت بیسێنت، وەزیری گەنجینەی ئەمریکا رایگەیاند، وڵاتەکەی بەنیازە دەست بەسەر نزیکەی یەک ملیار دۆلار لە ئۆسۆڵ و سەرمایەی دراوە دیجیتاڵییەکانی (کریپتۆ) سەر بە ئێراندا بگرێت.
ئەم هەنگاوە لە چوارچێوەی هەڵمەتێکدایە بۆ گۆشەگیرکردنی تاران لە رووی ئابوورییەوە و سنوردارکردنی دەستگەیشتنی بەرپرسانی ئێرانی بە سەرچاوە داراییەکان.
وەزیری گەنجینەی ئەمریکا روونیشی کردەوە: ئامانج لەم هەڵمەتە تەسککردنەوەی کەناڵە داراییەکانی دەستی ئێرانە بۆ رێگریکردن لە گواستنەوە و بەکارهێنانی سەرمایەکانی، کە بەشێکە لە رێکارە توندەکانی ئەمریکا بۆ سەپاندنی سزای ئابووری زیاتر بەسەر تاراندا.
سەرۆک کۆماری ئێران سەرکەوتنی هەر گفتوگۆیەکی وڵاتەکەی لەگەڵ ئەمریکا دەبەستێتەوە بە نەهێشتنی هەڕەشەکان.
مەسعود پزیشکیان، سەرۆک کۆماری ئێران رایگەیاند، سەرکەوتنی گفتوگۆکان لەگەڵ ئەمریکا بۆ کۆتاییهێنان بە جەنگ، بەستراوەتەوە بەوەی بەبێ بوونی "پەستان و هەڕەشە" ئەنجام بدرێن.
لە وتارێکیدا لە میانی لووتکەی وڵاتانی سەربەخۆ لە تورکمانستان، پزیشکیان ئاماژەی بەوەکرد، "دیالۆگ هیچ واتایەکی نابێ و دەرفەتی سەرکەوتنی نابێت، مەگەر لەسەر بنەمای رێزی پابەندبوونی دوولایەنە بێت."
مەسعود پزیشکیان جەختیشیکردەوە، دانوستانکردن بێواتایە "ئەگەر دوور نەبێت لە پەستان و هەڕەشەکان."
ئەم لێدوانانەی سەرۆک کۆماری ئێران لە کاتێکدایە، رۆژی پێنجشەممە دۆناڵد ترەمپ، سەرۆکی ئەمریکا ئاماژەی بە ئەنجامدانی "گفتوگۆی بەرهەمدار" لەگەڵ تاران کرد و ئەگەری ئەنجامدانی هێرشی نوێی بۆ سەر ئەو وڵاتە لانی کەم پێش هەڵبژاردنەکانی نیوەی خولەکەی بەدوور زانی.
سعودیە كوژرانی سێ كەس لە دوو هێرشدا بۆسەر فڕۆكەخانەی نێودەوڵەتیی شا خالید لە ریاز رادەگەیەنێت و ئاگربەستیش لەگەڵ حوسییەكان رەتدەكاتەوە.
دەستەی فڕۆكەوانیی شارستانیی سعودیە لە راگەیەنراوێكدا ئاشكرایكرد، فڕۆكەخانەی نێودەوڵەتیی شا خالید لە شاری ریاز روبەڕوی دوو پەلامار بووەتەوە، یەكەمیان بەشەكانی فڕۆكەخانەكەی پێكاوە و دووەمیش فڕۆكەیەكی هێڵی ئاسمانیی سعودیەی كردووەتە ئامانج.
راشیگەیاندووە، بەهۆی هێرشەكانەوە سێ كەس كوژراون و چەند كەسێكی تری بیانیش برینداربوون.
سەرچاوەیەكی دیپلۆماسیش بە ئاژانسی فرانس پرێسی راگەیاندووە، سعودیە بە هیچ شێوەیەك رازی نابێت بە ئاگربەست لەگەڵ حوسییەكان تا ئەو كاتەی حكومەتی شەرعیی یەمەن سەرجەم ئەو ناوچانە كۆنتڕۆڵ دەكاتەوە كە لە چەند هەفتەی رابردوودا لەدەستی داون، جەختیشیكردەوە، ریاز رادەستی گوشار و هەڕەشەی سەربازیی حوسییەكان نابێت لە ناوچەكەدا.
ماڵپەڕی شەفافییەت داهاتی ئەم هەفتەیەی سلێمانی بڵاوکردەووە، کە زیاتر لە حەوت ملیار دینارە.
ماڵپەڕی شەفافییەت بۆ چاودێری و رێكخستنی داهاتە نانەوتییەكانی سلێمانی و هەڵەبجە و هەردوو ئیدارەی راپەڕین و گەرمیان بڵاویکردەووە، لە رۆژی 3ـی10ـی2026 تا 9ـی10ـی2026 داهاتی نانەوتی حەوت ملیار و 950 ملیۆن و 743 هەزار دیناربووە.
ئاماژەی بەوەشکردووە، بە بەراورد بە هەفتەی رابردوو زیاتر لە شەش ملیار دینار داهات کەمی کردووە.
ماڵپەڕی شەفافییەت ئەوەشی خستووەتەڕوو، داهاتەکە ٪84 بە شێوەی نەختینەیە و ٪16ـی بە شێوەی چەکە.
جێگەی ئاماژەیە، پڕۆژەی شەفافییەت لە داهات و خەرجی، لەسەر راسپاردەی قوباد تاڵەبانی جێگری سەرۆک وەزیرانی هەرێم دامەزرا، ئێستا رۆژانە لە رێگەی ئەو ماڵپەڕەوە دەتوانیت سەرجەم داهاتە نانەوتییەکانی هەردوو پارێزگای سلێمانی و هەڵەبجە و ئیدارە سەربەخۆکانی راپەڕین و گەرمیان بزانیت.
کەشناسیی هەرێم پێشبینییەکانی کەشوهەوای 48 سەعاتی داهاتووی بڵاوکردەوە و ئاماژەی بەوەکرد، ئەگەری هەورەبروسکە و تاوەبارانی کورتخایەن لە ناوچە جیاجیاکان بە پچڕپچڕی هەیە.
ئەمڕۆ هەینی، بەڕێوەبەرایەتیی گشتیی کەشناسی و بوومەلەرزەزانیی هەرێم رایگەیاند، لە زۆربەی کاتەکان نیمچەهەور دەبێت و لە هەندێک ناوچە دەگۆڕێت بۆ هەوری تەواو، ئەگەری بروسکە و تاوەبارانی کورتخایەن لە ناوچە جیاجیاکان بە پچڕپچڕی هەیە.
ئاماژەی بەوەشکرد، لەکاتەکانی شەودا کاریگەری ئەم شەپۆلە لەسەر ناوچەکە لاواز دەبێت و کەشوهەوا ئاسایی دەبێتەوە، پلەکانی گەرماش نزیکدەبێتەوە لە تۆمارەکانی دوێنێ .
کەشناسیی هەرێم ئەوەشی خستەڕوو، سبەىنێ کەشوهەوا بە گشتی لە نێوان پەڵەهەور و نیمچەهەور دەبێت.
بەرزترین پلەکانی گەرمای پێشبینیکراوی سبەینێ بە پلەی سیلیزی:
هەولێر:31 پلەی سیلیزی
پیرمام: 28 پلەی سیلیزی
سلێمانی: 30 پلەی سیلیزی
هەڵەبجە:31 پلەی سیلیزی
چەمچەماڵ: 32 پلەی سیلیزی
دهۆک: 29 پلەی سیلیزی
زاخۆ: 30 پلەی سیلیزی
ئاکرێ: 30 پلەی سیلیزی
گەرمیان: 37 پلەی سیلیزی
حاجی ئۆمەران: 22 پلەی سیلیزی
سۆران : 30 پلەی سیلیزی
سەرۆكی روسیا جارێكی تر ئامادەیی وڵاتەكەی دەردەبڕێت بۆ نێوەندگیری و هاوكاری لەپێناو كۆتاییهێنان بە جەنگ و ململانێكانی رۆژهەڵاتی ناوەڕاست.
ڤلادیمێر پوتن، سەرۆكی روسیا لە پەراوێزی لوتكەیەكی هەرێمیی لە توركمانستان، لەگەڵ مەسعود پزیشكیان، سەرۆك كۆماری ئێران كۆبووەوە و ئامادەیی وڵاتەکەی بۆ هاوكاریی دەربڕی لەپێناو چارەسەركردنی شەڕ و ئاڵۆزییەكانی رۆژهەڵاتی ناوەڕاست.
وتیشی، ئێران هەوڵی راستەقینە دەدات بۆ كۆتاییهێنان بەو ململانێیەی كە لە 28ـی شوباتی رابردووەوە بە هێرشەكانی ئەمریكا و ئیسرائیل بۆسەر تاران دەستیپێكرد.
هاوکات سەرۆك كۆماری ئێرانیش رایگەیاند، وڵاتەكەی بەشدارە لە دیالۆگ، بەڵام ئەمریكا هەموو جارێك كە دانوستان دەكەن، دەست بە هێرشدەكاتەوە.
ئەو كۆبوونەوەیەی پوتن و پزیشكیان لە كاتێكدایە، کە دۆناڵد ترەمپ، سەرۆكی ئەمریكا ئەگەری هێرشی نوێی بۆسەر ئێران پێش هەڵبژاردنەكانی نیوەی خولی ئەمریكا لە مانگی تشرینی دووەمی ئەمساڵ بەدوور زانیوە و رایگەیاندووە، واشنتۆن دانوستانی بەرهەمدار لەگەڵ تاران ئەنجام دەدات.
وەزیری دارایی عیراق رایدەگەیەنێت، پابەندن بە دابینكردن و دابەشكردنی موچەی فەرمانبەران و موچەخۆران هەموو 30 رۆژ جارێك.
فالح ساری وەزیری دارایی عیراق لە وتارێكیدا لە ئەنجومەنی نوێنەران رایگەیاند: رێژەی داهاتە نانەوتییەكان لە بودجەی 2027دا دەگاتە 19% لە كاتێكدا لە بودجەی ساڵی رابدوودا 11% بووە.
وتیشی: حكومەتی عیراق كۆمەڵێك رێكاری گرتووەتەبەر، لەوانە تەرخانكردنی تریلیۆنێك دینار لەلایەن بانكی ناوەندییەوە بۆ پاڵپشتیكردنی كەرتی نیشتەجێبوون، جگە لە پێدانی شایستە داراییەكان بۆ پرۆژە تەواونەبووەكان بە تایبەتیش پرۆژەكانی ئاوەڕۆ.
وەزیری دارایی عیراق ئاماژەی بەوەشكرد: پابەندن بە دابینكردن و دابەشكردنی موچەی فەرمانبەران و موچەخۆران هەموو 30 رۆژ جارێك كە مانگانە بڕەكەی دەگاتە 7.7 تریلیۆن دینار.