قوباد تاڵەبانی دەڵێت؛ زیرەکیی دەستکرد تەنها هاوڕێیەك نییە، بەڵكو كەرەستەیەكی زۆر بەهێزە، كێشەكانت بۆ رووندەكاتەوە و چارەسەرت بۆ پێشنیاز دەكات، بەمەش رێگەی دوورت بۆ نزیك دەكاتەوە.

قوباد تاڵەبانی جێگری سەرۆك وەزیرانی هەرێمی كوردستان، ئەمڕۆ لە ئیڤێنتی فاوندەیشن هەب تایبەتە بە پێشبڕکێی زیرەکیی دەستکرد کە بە پاڵپشتی میدیایی دەزگای میدیایی كوردسات بەڕێوەدەچێت وتارێکی پێشکەشکرد و رایگەیاند، هێشتا مرۆڤ زاڵە بەسەر AI دا و من لە   AIی ناترسم و پێم وانییە AIی كۆتایی دنیا بێت، خۆم AIی بەكاردەهێنم و سودم لێ‌ وەرگرتووە، وای كردووە كاره كانی خێراتربێت، بەڵام دەبێت AIی بەرپرسیارانە بەكاربهێنرێت.

ئاماژەی بەوەشكرد، زیرەكیی دەستكرد بەبێ‌ مرۆڤ بێسوودە، لەم ئیڤێنتەدا كۆمەڵێك گەنج بە بەرپرسیارییەوە مامەڵەیان لەگەڵ ئەی ئای كردووە، هەربۆیە حكومەتی هەرێم پێویستی بە گەنج و داهێنانەكانیانە و ئێمەش لە هەركوێ‌ بین پشتیوانیان دەبین.

بەپێی ئاژانسێكی ئەمریكی ئێران سەركەوتوو بووە لە پاراستنی دامەزراوەكانی بەرهەمهێنانی موشەك و درۆن و دەتوانێت كۆگاكانیشی بە خێرایی زیاد بكات.

ئاژانسی بلومبێرگی ئەمریكی لە راپۆرتێكدا بڵاویكردووەتەوە: سەرەڕای هێرشە بەردەوامەكانی ئیسرائیل و ئەمریكا، دەسەڵاتدارانی ئێران بەتایبەت سوپا و هێزە ئەمنییەكانی ئەو وڵاتە سەركەوتوو بوون لە پاراستنی دامەزراوەكانی بەرهەمهێنانی موشەك و درۆن. 

ئاماژەی بەوەشكردووە، ئێران دەرفەتی ئەوەی هەیە كۆگا سەربازییەكانی بە خێرایی پڕبكاتەوە و خۆشی پڕچەك بكاتەوە و روسیاش موشەك بۆ ئێران دابین دەكات.

ئەو هەڵەسەنگاندنەش پێچەوانەی لێدوانە بەردەوامەكانی ترەمپ و لێپرسراوانی ئیدارەكەیەتی كە چەندین جار رایانگەیاندووە، لە هێرشە ئاسمانییەكاندا توانای ئێرانیان لەناوبردووە بۆ هەڕەشەكردن لە بنكەكانی ئەمریكا لە ناوچەكە و هاوپەیمانەكانی واشنتۆن و سوپای ئێرانیش بەتەواوی لەناوچووە.

دەستەی راگەیاندن و پەیوەندییەکانی عیراق ئاگادارییەکی رەسمی ئاراستەی سەرجەم دەزگا و مینبەرە راگەیاندنەکان کرد، تێیدا جەخت لە گرنگیی رۆڵی نیشتمانیی راگەیاندن دەکاتەوە لەم قۆناغە هەستیارە ئابوورییەدا که عیراق و ناوچەکەی پێیدا تێپەڕ دەبێت.

دەستەکە لە ئاگادارییەکەیدا ئاماژەی بەوە داوە: پێویستە دەزگاکانی راگەیاندن زۆرترین وردبینی پەیڕەو بکەن لە هەموو ئەو هەواڵ و بابەتانەی سەبارەت بە نرخی ئاڵۆگۆڕ، بازاڕەکان و موچە بڵاو دەکرێنەوە، هەروەها دڵنیابوونەوە لە سەرچاوە رەسمی و تایبەتمەندەکان پێش بڵاوکردنەوەی هەر زانیارییەک.

هەروەها داوای کردووە: بڕیارە ئابوورییەکان بەهۆکار و دەرئەنجامەکانییەوە بە شێوازێکی هاوسەنگ بخرێنە روو، و جیاکارییەکی روون لە نێوان زانیاری و رای شارەزایان و شرۆڤەکاراندا بکرێت.

لە تەوەرێکی تردا، دەستەکە هۆشداری داوە لە خۆدوورخستنەوە لە سەردێڕی وروژێنەر و گەورەکردن یان بچووککردنەوەی روداوەکان کە دەبنە هۆی لاوازکردن و تێکشکاندنی متمانەی رای گشتی، جەختیشی کردووەتەوە: بڵاوکردنەوەی هەواڵی نادروست کاریگەری نەرێنی لەسەر جووڵەی بازاڕ دەبێت و هاووڵاتی باجی یەکەمی دەدات.

لە کۆتاییشدا، دەستەی راگەیاندن و پەیوەندییەکان دووپاتی کردەوە: ئەم رێکارانە بە هیچ شێوازێک دەستکاری مافی رەخناوەی بابەتی و گفتوگۆکردنی سیاسەتە ئابوورییەکان ناکەن، بەڵکو داوا لە راگەیاندنکاران دەکات ببنە هاوبەش و پشتیوانێک بۆ هاووڵاتی و نیشتمان لەپێناو تێپەڕاندنی ئەم قۆناغە سەختەدا.

بانكی ناوەندیی عیراق دەڵێت، ئەو بازرگانانەی پێش 7ـی ئەم مانگە حەواڵەیان كردووە نابێت پارەی زیادە بخرێتەسەر حەواڵەكانیان و بە نرخی پێشوو بۆیان هەژمار دەكرێت.

لە راگەیەندراوێكدا بانكی ناوەندیی عیراق بڵاویكردەوە، بەدواداچوون دەكەن بۆ پرۆسە بانكییەكانی پێش و دوای گۆڕانكارییەكانی نرخی دراو بە مەبەستی دڵنیابوونەوە لە پاراستنی مافی بازرگانان و نابێت هیچ جیاوازییەكی نرخی دراو بخرێتە ئەستۆی بازرگانان بۆئەو حەواڵانەی بە نرخی پێشوو كراون.

راشیگەیاندووە، لە حاڵەتی دواكەوتنی جێبەجێكردنی حەواڵەكان یان داواكردنی بڕە پارەی زیادە، بازرگانان دەتوانن لە رێگەی پلاتفۆڕمی سكاڵای بانكەكەوە سكاڵا تۆمار بكەن.

بانكی ناوەدیی عیراق ئاشكرایكردووە، لەگەڵ بانكەكان و كۆمپانیاكانی پارەدانی ئەلیكترۆنی كاردەكەن بۆ دەركردنی كارتی تایبەت بە بازرگانیی دەرەكی بۆ بازرگانە بچووكەكان، بەمەبەستی ئاسانكاریكردن لە پارەداركردنی هاوردەكانیاندا.

سەندیکای زێڕنگەرانی هەولێر نوێترین نرخەکانی زێڕی بۆ ئەمڕۆ بڵاوکردەوە، کە تێیدا نرخی مسقاڵێک زێڕی عەیار 21 گەیشتووەتە 970 هەزار دینار.

بەپێی نرخەکانی سەندیکای زێڕنگەران لە هەولێر، ئەمڕۆ، نرخی یەک ئۆنسەی زێڕ لە بازاڕەکانی جیهاندا بە چوار هەزار و 121 دۆلار دیاری کراوە.

نرخی فرۆشتنی جۆرەکانی زێڕ لە بازاڕدا بەم شێوەیەیە:

مسقاڵێک زێڕی عەیار 22: 1,015,000 دینار

مسقاڵێک زێڕی عەیار 21: 970,000 دینار

مسقاڵێک زێڕی عەیار 18: 831,000 دینار

مسقاڵێک زێڕی عەیار 14: 646,000 دینار

مسقاڵێک زێڕی عەیار 12: 554,000 دینار

مسقاڵێک زێڕی عەیار 9: 415,000 دینار

سەندیکای زێڕنگەران ئاماژەی بەوەشکردووە، هەر گۆڕانکارییەک له نرخەكان پەيوەستە بە بەهاى بەرزبوونەوە و نزمبوونەوەى دۆلار لە بازاڕەكانى هەرێمی کوردستان و كردنەوەى بۆرسەكانى جيهان گۆڕانکاریەکان بەردەوام  دەبێت.

کەشناسیی هەرێم پێشبینی دەکات ئەمڕۆ لە چەند ناوچەیەک نمەباران ببارێت و سبەینێش شەپۆلێکی بارانبارین ناوچە شاخاوییەکان دەگرێتەوە.

بەڕێوەبەرایەتی گشتی کەشناسی و بوومەلەرزەزانی هەرێم رایگەیاند، ئەمڕۆئاسمان بە گشتی لە نێوان پەڵە هەور و نیمچە هەور دەبێت، لە کاتەکانی بەیانیدا ئەگەری بارینی نمەباران لە هەندێک ناوچەی سنوریی رۆژهەڵاتی هەرێم سەر بە پارێزگای سلێمانی، هەڵەبجە و بەشێک لە ئیدارەی گەرمیان هەیە.

ئاماژەی بەوەشکرد، سبەینێ ئاسمان بە گشتی پەڵەهەور و نیمچە هەور دەبێت، لە کاتەکانی شەودا لە ناوچە شاخاوییە سنورییەکانی باکور و باکوری رۆژئاوای هەرێم دەگۆڕێت بۆ هەوری تەواو، و ئەگەری هەیە لە دوای نیوەشەو بارانبارین لەو ناوچانەدا دەست پێبکات.

کەشناسی هەرێم ئەوەشی خستەڕوو، پلەکانی گەرما نزیک دەبێتەوە لە تۆمارکراوەکانی ئەمڕۆ.

بەرزترین پلەکانی گەرمای پێشبینیکراو بە پلەی سیلیزی

هەولێر: 30 پلەی سیلیزی

پیرمام: 27 پلەی سیلیزی

سلێمانی: 29 پلەی سیلیزی

هەڵەبجە: 30 پلەی سیلیزی

چەمچەماڵ: 31 پلەی سیلیزی

دهۆک: 30 پلەی سیلیزی

زاخۆ: 30 پلەی سیلیزی

ئاکرێ: 30 پلەی سیلیزی

گەرمیان: 35 پلەی سیلیزی

حاجی ئۆمەران: 22 پلەی سیلیزی

سۆران : 27 پلەی سیلیزی

بەهۆی پێنەدانی خەڵاتی نۆبڵی ئاشتی، دۆناڵد ترەمپ هێرشێکی توند دەکاتەسەر لیژنەی نۆبڵ و دەڵێت؛ خەڵاتەکە متمانەی خۆی لەدەستداوە و خۆیشی بە شایستەی هەشت خەڵاتی نۆبڵ دەزانێت.

دۆناڵد ترەمپ، سەرۆکی ئەمریکا، هێرشێکی توندی کردە سەر لیژنەی نۆبڵ بەهۆی پێشکەشنەکردنی خەڵاتی ئاشتی بەو، و بەپێی ئاژانسی ڕۆیتەرز، ناوبراو پێیوایە ئەو بڕیارە "پەڵەیەکی رەشی نەسرایەوە" لە مێژووی نەرویژدا جێهێشتووە کە میوانداری لیژنەکە دەکات.

ترەمپ لە پۆستێکی تۆڕی کۆمەڵایەتی 'سۆشیال تروس' نووسیویەتی، شایستەی خەڵاتەکەیە لەبەرانبەر ئەو رۆڵەی کە دەڵێت؛ لە چارەسەرکردنی هەشت جەنگدا گێڕاویەتی، و جەختی لەوە کردەوە کە "شایستەی هەشت خەڵاتی ئاشتیی نۆبڵە، نەک تەنها یەک دانە."

رەخنەی لە ناڤی پیلای، دادوەری ئەفریقای باشور گرت کە براوەی خەڵاتەکەی ئەمساڵە و وتی هیچ نەزانینێکی لەسەر نییە، هەروەها بە کەسایەتییەکی لیبراڵ کە لە نەتەوە یەکگرتووەکان کار دەکات وەسفی کردووە، تۆمەتباریشی کرد بە قین لە هەڵگر دژی ئیسرائیل، بێ ئەوەی لە پۆستەکەیدا هیچ بەڵگەیەک بۆ پشتڕاستکردنەوەی ئەو تۆمەتە بخاتە ڕوو.

ترەمپ ئاماژەی بەو جەنگانە کرد کە دەڵێت کۆتایی پێهێناون، ئەوانیش بریتیین لە. ململانێی نێوان کەمبۆدیا و تایلەند، کۆسۆڤۆ و سەربیا، کۆماری دیموکراتی کۆنگۆ و رواندا، پاکستان و هیدستان، ئیسرائیل و ئێران، میسر و ئەسیوپیا، ئەرمینیا و ئازەربایجان، هەروەها شەڕی نێوان ئیسرائیل و بزووتنەوەی حەماسیش.

وتیشی، ژمارەیەک سەرۆک و سەرۆک وەزیرانی ئەو وڵاتانە نامەیان بۆ لیژنەی نۆبڵی نەرویژی ناردووە بۆ پشتگیریکردن لە کاندیدکردنی، و پێیایە تەنها رۆڵی ئەو لە کێشەی نێوان پاکستان و هندستاندا بەس بووە بۆ بەدەستهێنانی خەڵاتەکە.

سەرۆکی ئەمریکا ئەوەشی خستەڕوو، کە لە چارەسەرکردنی دۆسیەی ئێران و جەنگی روسیا و ئۆکراین نزیک بووەتەوە، جەختیشی کردەوە کە روداوەکان بە خێراییەکی زۆر بەرەو پێشەوە دەچن.

ترەمپ پشتی بە ماریا کورینا ماچادۆ، سەرۆکی ئۆپۆزسیۆنی ڤەنزوێلا بەست، و وتی کە خەڵاتی ساڵی رابردووی خۆی پێشکەش کردووە و ماچادۆ رایگەیاندبووە ترەمپ لە هەموو کەسێک زیاتر شایستەی نۆبڵی ئاشتییە کە تا ئێستا بەدەستی هێناوە.

دۆناڵد ترەمپ، سەرۆکی ئەمریکا رایگەیاند، ئێران دەبێت بەزوویی بڕیاربدات. یان هەموو داواکارییەکانمان جێبەجێ دەکات، یان بوونی نامێنێت. وڵاتەکە لە هەڵئاوساندایە و تەنانەت پارەی نییە مووچەی سوپاش بدات.

دۆناڵد ترەمپ، سەرۆکی ئەمریکا، دۆخی ئێرانی بە قەیراناوی وەسف کرد و رایگەیاند، تاران تووشی هەڵاوسانی %300 بووە و پارەی نییە مووچەی هێزە ئەمنییەکانی بدات. هەروەها جەختیکردەوە کە کۆنتڕۆڵی تەواوی گەرووی هورمزیان لە دەستدایە و پرسی ئێران زۆر بە خێرایی یەکلادەبێتەوە.

سەرۆکی ئەمریکا لە درێژەی قسەکانیدا سەبارەت بە بەرنامەی ئەتۆمیی تاران هۆشداریی دا و رایگەیاند، ئێران هەرگیز خاوەنی چەکی ئەتۆمی نابێت، و هەوڵدان بۆ بەدەستهێنانی هۆکارێک دەبێت بۆ ئەوەی ئەمریکا هێرش بکاتە سەریان. ترەمپ ئاماژەی بەوەش کرد کە ئێران بژاردەیەکی توندی لەبەردەمە، یان ئەوەتا هەموو شتێک بە ئەمریکا دەبەخشێت کە دەیەوێت، یان بە تەواوی بوونی نامێنێت.

لە بەشێکی تری لێدوانەکانیدا، ترەمپ باس لە پرسی وزە و ئابووری کرد و رایگەیاند، لە سایەی هێزی سوپای ئەمریکاوە، ئێستا کۆنتڕۆڵی تەواوی گەرووی هورمز کراوە و قەبارەی هەناردەی نەوت لەو رێگەیەوە لە ئاستی پێش جەنگیش زیاترە. داوای لە پاڵاوگەکان و فرۆشیارانی تاکەکەسی کرد کە دەستبەجێ نرخەکان دابەزێنن، چونکە بڕێکی زۆر سوتەمەنی دابین کراوە و لەم دواییانەشدا روسیا رازی بووە ملیۆنان بەرمیل گازوایل بۆ ئەمریکا بنێرێت.

لە کۆتایی لێدوانەکانیدا، ترەمپ رەخنەی لە نەدانی خەڵاتی نۆبڵی ئاشتی بە ئەمریکا گرت و ئەوەی خستەڕوو، نەدانی ئەو خەڵاتە بەڵگەیەکی تر نیشان دەدات کە وڵاتانی وەکو نەرویژ و لایەنەکانی دیکە بەردەوام بەدوای سوودوەرگرتنەوەن لە پێگەی ئەمریکا.

بوومەلەرزەیەکی بەهێز بە گوڕی هەشت پلەی رێختەر پەنەمای هەژاند، ناوەندەکانی دەستنیشانکردنی زەمینلەرزەش هۆشداری دەدەن لە دروستبوونی شەپۆلی تسۆنامی لە کەناراوەکانی ئەمریکا و کەنەدا.

ئەمڕۆ، بوومەلەرزەیەکی بەهێز بە گوڕی هەشت پلە بە پێوەری رێختەر بەشێکی بەرفراوانی وڵاتی بنەمای هەژاند، بەهۆیەوە بەڕێوەبەرایەتییەکانی بەرگریی شارستانی و ناوەندەکانی دەستنیشانکردنی زەمینلەرزە هۆشدارییان لە ئەگەری دروستبوونی شەپۆلی وێرانکەری تسۆنامی دا.

بەپێی زانیارییەکانی دەستەی رووپێوی جیۆلۆجیی ئەمریکا، ناوەندی بوومەلەرزەکە لە کەناراوەکانی باشوری پەنەما بووە، ئاژانسی فرانس پرێس بڵاویکردەوە، گوڕی بوومەلەرزەکە هێندە بەهێز بووە لەلایەن دانیشتووانی پەنەمای پایتەختەوە هەستی پێکراوە و ترس و دڵەراوکێی زۆری لەناو هاووڵاتییاندا دروستکردووە.

هاوکات، ناوەندی نیشتمانیی ئەمریکی بۆ هۆشداریی تسونامی راگەیەنراوێکی بڵاوکردەوە و تێیدا ئاماژەی بەوەکرد، مەترسیی بەرزبوونەوەی شەپۆلەکان و رودانی تسۆنامیی وێرانکەر هەیە کە رەنگە کاربکاتە سەر ویلایەتەکانی (کالیفۆرنیا، ئۆریگۆن، واشنتن، ئەلاسکا) لە ئەمریکا، بێجگە لە هەرێمی کۆلۆمبیای بەریتانی لە وڵاتی کەنەدا.

سێنتکۆم ئاستی جێبەجێکردنی گەمارۆ دەریاییەکەی بۆ سەر ئێران توندتر دەکاتەوە و رایدەگەیەنێت، هێزە دەریاییەکانیان لە گەروی هورمزدا رێڕەوی 133 کەشتیی بازرگانییان گۆڕیوە.

فەرماندەیی ناوەندیی هێزەکانی ئەمریکا سێنتکۆم رایگەیاند، لە چوارچێوەی جێبەجێکردنی گەمارۆ دەریاییە توندەکەیان بۆ سەر ئێران، تا رۆژی 9ی تشرینی یەکەم هێزەکانیان رێڕەوی 133 کەشتیی بازرگانییان گۆڕیوە.

سێنتکۆم لە هەژماری رەسمی خۆی خۆی وێنەی هێلیکۆپتەرێکی سەربازیی بڵاوکردووەتەوە و رایگەیاندووە: "فڕۆکەیەکی هێزی دەریایی ئەمریکا لە جۆری 'MH-60S Sea Hawk'  لەسەر سەکۆی کەشتیی جەنگیی ئاسمانیی 'USS John Paul Jones' فڕیوە، کە بەشێکە لە هەوڵەکانی توندکردنی گەمارۆ تۆکمەکەی ئەمریکا بۆ سەر ئێران."

بەپێی راگەیەنراوەکەی فەرماندەیی ناوەندیی ئەمریکا، رێڕەوگۆڕینی ئەم کەشتییە بازرگانییانە بە ئامانجی دڵنیابوونەوەیە لە جێبەجێکردنی تەواوەتیی سزاکان و پابەندبوونی کەشتییەکان بە بڕیاری گەمارۆدانی دەریایی ئێران

.

سەرۆکی حکومەتی هەرێم هێرشەکانی سەر فڕۆکەخانەکانی ریاز و ئەبها بەتوندی سەرکۆنە دەکات، هاوکات جەخت دەکاتەوە بەئامانجگرتنی خەڵکی سیڤیل قبووڵنەکراوە.

مەسرور بارزانی، سەرۆکی حکومەتی هەرێمی کوردستان لە پەیامێکدا رایگەیاند، هێرشکردنە سەر فڕۆکەخانەی نێودەوڵەتیی شا خالید لە ریاز و فڕۆکەخانەی نێودەوڵەتیی ئەبها قبووڵکراو نییە و جەختی کردەوە کە بە ئامانجگرتنی خەڵکی سیڤیل و ژێرخانی مەدەنی رەتکراوەیە.

لە پەیامەکەیدا سەرۆکی حکومەتی هەرێمی کوردستان ئاماژەی بەوەکرد، "پرسە و سەرەخۆشی لە کەسوکاری قوربانیان دەکەم و هاوسۆزیی خۆمان لەگەڵ گەل و سەرکردایەتیی شانشینی عەرەبستانی سعودی دەردەبڕین."

ترەمپ جەخت لە کۆتاییهێنان بە جەنگ لەگەڵ ئێران دەکاتەوە و رادەگەیەنێت، واشنتۆن بە تەواوی رێگری لە تاران کردووە بێتە خاوەنی چەکی ئەتۆمی.

دۆناڵد ترەمپ، سەرۆکی ئەمریکا رایگەیاند، واشنتۆن رێگریی تەواوی لە تاران کردووە بێتە خاوەنی چەکی ئەتۆمی، دەشڵێت"بەم زووانە بە رێگەیەک لە رێگەکان کۆتایی بە دۆسیەی ئەتۆمیی ئێران دەهێنین."

لەبارەی توانای سەربازیی ئێرانەوە، ترەمپ جەختی کردەوە، تاران چیتر هێزێکی ئەوتۆی نەمێنێتەوە و وتی: "ئێران چیتر سوپا، هێزی دەریایی، هێزی ئاسمانی و سیستمی بەرگریی دژە فڕۆکەی بەدەستەوە نەماوە."

لە بەشێکی تری قسەکانیدا، سەرۆکی ئەمریکا تیشکی خستەسەر رەوشی گەروی هورمز و رایگەیاند، گەمارۆیەکی توندی دەریاییشیان بەسەر گەروەکەدا سەپاندووە و رێگە بە هیچ هاتوچۆیەک بەرەو ئێران یان لە ئێرانەوە نادەن.

سەبارەت بە هەناردەکردنی نەوتیش ئاشکرایکرد، "دوێنێ زۆرترین بڕی نەوت لە سەرەتای دەستپێکردنی جەنگەکەوە لە گەروی هورمزەوە تێپەڕیوە کە گەیشتووەتە 28 ملیۆن بەرمیل."

لە کۆتاییدا ترەمپ دڵنیایی دا کە جەنگ لەگەڵ ئێران زۆر بە زوویی کۆتایی پێدێت و ئەمریکا هەموو توانایەکی هەیە بۆ ئەوەی بە هەر رێگەیەک بێت کۆتایی بەم رووبەڕووبوونەوەیە بهێنێت.

لە حەسەكەی رۆژئاوای كوردستان ئاڵۆزییەكان بەردەوامە و هێزەكانی ئاسایشی ناوخۆش خراونەتە حاڵەتی ئامادەباشیدا.

دوایی ئەوەی كە رۆژی رابردوو و لە کاتی هەڵكردنی ئاڵای سوریا لە پارێزگای حەسەكە رێوڕەسمێک بەڕێوەچوو، عەرەبەكانی شاری حەسەكە دەستیانكرد بە خۆپیشاندان لە دژی كوردەكان و هەڕەشەیان لە كوردەكان كرد و ئەوە بووە هۆی ئاڵۆزی لەناو ئەو شارە و هێزەكانی ئاسایشی ناوخۆ هەوڵی كۆنترۆڵكردنی رەوشەكەیان دا.

ئەمڕۆش لە دوایی نوێزی هەینی لە سێ گەڕەكی عەرەبنشینی غوەیران ، نشوە و عەزیزیەی سەر بە شاری حەسەكە جارێكی تر عەرەبەكانی ئەو گەڕەكە هەوڵی ئاژاوەگێڕیان دا و لە دژی هاووڵاتییانی كورد خۆپیشاندانیان ئەنجام دا و لە ئەنجامدا هێزەكانی ئاسایشی ناوخۆ لە ناو شار بڵاوەیان پێكرا و خرانە حاڵەتی ئامادەباشیدا.

لەلای خۆشیەوە، نورەدین ئەحمەد، پارێزگاری حەسەکە رایگەیاند، "داوا لە هەمووتان دەکەم، بەتایبەتی گەنجان، کە ژیرانە بیربکەنەوە و خۆڕاگر بن، هێزەکانی ئاسایش رۆڵە و برای ئێوەن و ئەرکیان پاراستنی ئێوە و دامەزراوە نیشتمانییەکانە، وەرن با دەست لە ناو دەست بنێین بۆ لەناوبردنی هەلی هەر لایەنێک کە هەوڵ دەدات هەست و نەستتان بقۆزێتەوە بۆ کێشکردنی وڵات بەرەو پشێوی و توندوتیژی."

هاوکات لەگەڵ بەردەوامبوونی گرژییەکان، پەیامنێری کوردسات نیوز رایگەیاند، بەهۆی ئاڵۆزییەکانەوە سێ هاووڵاتی مەدەنی کورد بریندرابوون.

پارێزگاری حەسەکە داوای هێوربوونەوە و پاراستنی ئارامی لە هاووڵاتییان دەکات و رایدەگەیەنێت؛ داوا لە گەنجان دەکەم دان بە خۆیاندا بگرن و رووبەڕووی هێزە ئەمنییەکان نەبنەوە.

نورەدین ئەحمەد، پارێزگاری حەسەکە لە هەژماری تایبەتی خۆی لە تۆڕی کۆمەڵایەتیی  ئێکس پەیامێکی ئاراستەی هاووڵاتییانی پارێزگاکە کرد و رایگەیاند، ئەمڕۆ بە دڵسۆزییەوە بۆ ئاسایش و سەلامەتیی هەر تاکێکی ئێوە و ئاسایشی وڵاتەکەمان روتان تێدەکەم، دەربڕینی داواکردنی مافەکان مافێکی رەوایە و یاسا گەرەنتی کردووە، ئێمەش بە هەموو رێز و پێزانینێکەوە گوێ لە دەنگتان دەگرین."

ئاماژەی بەوەشکرد، بۆ ئەوەی دەنگتان بە بەرزی و بەهێزی بپڕێتەوە، پێویستە هەموومان پارێزگاری لە ئاشتییانەبوونی ئەم جووڵانەوانە بکەین. تێکدانی موڵکوماڵ یان چوونە ناو ڕووبەڕووبوونەوە لە بەرژەوەندیی دۆزەکەتاندا نییە، بەڵکو سەرنجەکان لەسەر داواکارییە رەواکانتان دوور دەخاتەوە و زیان بە ئاسایشی کۆمەڵگە دەگەیەنێت."

پارێزگاری حەسەکە راشیگەیاند، "داوا لە هەمووتان دەکەم، بەتایبەتی گەنجان، کە ژیرانە بیربکەنەوە و خۆڕاگر بن، هێزەکانی ئاسایش رۆڵە و برای ئێوەن و ئەرکیان پاراستنی ئێوە و دامەزراوە نیشتمانییەکانە، وەرن با دەست لە ناو دەست بنێین بۆ لەناوبردنی هەلی هەر لایەنێک کە هەوڵ دەدات هەست و نەستتان بقۆزێتەوە بۆ کێشکردنی وڵات بەرەو پشێوی و توندوتیژی."

سکۆت بیسێنت، وەزیری گەنجینەی ئەمریکا رایگەیاند، وڵاتەکەی بەنیازە دەست بەسەر نزیکەی یەک ملیار دۆلار لە ئۆسۆڵ و سەرمایەی دراوە دیجیتاڵییەکانی (کریپتۆ) سەر بە ئێراندا بگرێت.

ئەم هەنگاوە لە چوارچێوەی هەڵمەتێکدایە بۆ گۆشەگیرکردنی تاران لە رووی ئابوورییەوە و سنوردارکردنی دەستگەیشتنی بەرپرسانی ئێرانی بە سەرچاوە داراییەکان.

وەزیری گەنجینەی ئەمریکا روونیشی کردەوە: ئامانج لەم هەڵمەتە تەسککردنەوەی کەناڵە داراییەکانی دەستی ئێرانە بۆ رێگریکردن لە گواستنەوە و بەکارهێنانی سەرمایەکانی، کە بەشێکە لە رێکارە توندەکانی ئەمریکا بۆ سەپاندنی سزای ئابووری زیاتر بەسەر تاراندا.

سەرۆک کۆماری ئێران سەرکەوتنی هەر گفتوگۆیەکی وڵاتەکەی لەگەڵ ئەمریکا دەبەستێتەوە بە نەهێشتنی هەڕەشەکان.

مەسعود پزیشکیان، سەرۆک کۆماری ئێران رایگەیاند، سەرکەوتنی گفتوگۆکان لەگەڵ ئەمریکا بۆ کۆتاییهێنان بە جەنگ، بەستراوەتەوە بەوەی بەبێ بوونی "پەستان و هەڕەشە" ئەنجام بدرێن.

لە وتارێکیدا لە میانی لووتکەی وڵاتانی سەربەخۆ لە تورکمانستان، پزیشکیان ئاماژەی بەوەکرد، "دیالۆگ هیچ واتایەکی نابێ و دەرفەتی سەرکەوتنی نابێت، مەگەر لەسەر بنەمای رێزی پابەندبوونی دوولایەنە بێت."

مەسعود پزیشکیان جەختیشیکردەوە، دانوستانکردن بێواتایە "ئەگەر دوور نەبێت لە پەستان و هەڕەشەکان."

ئەم لێدوانانەی سەرۆک کۆماری ئێران لە کاتێکدایە، رۆژی پێنجشەممە دۆناڵد ترەمپ، سەرۆکی ئەمریکا ئاماژەی بە ئەنجامدانی "گفتوگۆی بەرهەمدار" لەگەڵ تاران کرد و ئەگەری ئەنجامدانی هێرشی نوێی بۆ سەر ئەو وڵاتە لانی کەم پێش هەڵبژاردنەکانی نیوەی خولەکەی بەدوور زانی.