هەمەڕەنگ
(ئیلۆن مەسک) خاوەنی نوێی توڕی کۆمەڵایەتی تویتەر رایگەیاند، تویتەر ھەمیشە بێبەرامبەر دەبێت بۆ بەکارھێنەرانی ئاسایی، بەڵام بۆ دامەزراوە بازرگانی و حکومییەکان بە پێچەوانەوە دەبێت، وتوشیەتی، دەیەوێت کۆمپانیای تویتەر بکات بە کۆمپانیایەکی گشتگیر لە دوای سێ ساڵ لە کڕینی کۆمپانیاکە.
ئاژانسی ھەواڵی رۆیتەرزیش لەسەر زاری سێ سەرچاوە لە گەورە کۆمپانیاکانی ریکلام ئاشکرایکردووە، توێتەر دەرفەتێکی نوێی بڵاوکردنەوەی ریکلامی راگەیاندووە، و گرێبەسستەکانی پێشووش کە ئیمزاکراون بەردەوام دەبن.
ئاماژەی بۆ ئەوەشکردووە، بە خاوەندارێتی مەسک، کۆمپانیاکە گۆڕانکارییەکی ئەوتۆ لە سیاسەتەکانی ناکات، وەک ئەوەی پێشتر بانگەشەی بۆ کردووە، بە تایبەتی کە لە ساڵی ٢٠٢١ داھاتی کۆمپانیاکە لە ڕیکلام ٥ ملیار دۆلار بووە.
کلیپی "دڵی مەست" لە ئێستادا لە وڵاتی ئێران لە قۆناغەکانی کۆتاییدایە و بەڕێوەبەری وێنەگرتن و دەرھێنان و مۆنتاژی کلیپەکەش لەلایەن فوئاد فارابی ئەنجام دەدرێت، کلیپەکەش لە شاری کرماشان ئەنجامدراوە.
ئەمڕۆ ٢٣ی نیسان، گۆگڵ لە رووکاری گەڕانی ئینتەرنێتدا، وێنەی نەزیھە سەلیمی داناوە کە ژنێکی وێنەکێشی عێراقیە، وەک ئاماژەیەک بۆ کاریگەری ئەو ژنە لەسەر ھونەری وێنەکێشان، گووگڵ لەبارەی نەزیھە سەلیمەوە نووسیوویەتی، "وێنەکێش و مامۆستای زانکۆ و یەکێکە لەو ھونەرمەندانەی زۆرترین کاریگەری لەسەر ھونەری ھاوچەرخی عێراقی ھەبووە"، ھاوکات سەرۆک مام جەلال نەزیھە سەلیمی وەسفکردووە بەوەی "یەکەم ژنی عێراقیە بناغەی ھونەری ھاوچەرخی عێراقی دامەزراندووە".
نەزیھە سەلیم لە ساڵی ١٩٢٧ لە شاری ئیستانبوڵی تورکیا لە دایک و باوکێکی عێراقی لە دایکبووە و ١٥ی شووباتی ٢٠٠٨ بەھۆی جەڵتەی مێشکەوە کۆچی دوایی کردووە، لە کارە ھونەرییەکانیدا تیشکی خستووتە سەر ژنانی عێراقی لە ناوچە لادێییەکان و ژیانی جوتیاران بە بەکارھێنانی رەنگی گەش.