عیراق
راوێژكارێكی سەرۆك وەزیرانی عیراق رایدەگەیەنێت، رێژەی بێكاری لە 17%ەوە بۆ 13% دابەزیوە.
مەزهەر محەمەد ساڵح راوێژكاری سەرۆك وەزیرانی عیراق رایگەیاند، حكومەت دەیان پرۆژەی خزمەتگوزاری جێبەجێكردووە بۆئەوەی ئابورییەكەی لە پشتبەستن بە نەوت دوور بكەوێتەوە، وەك پرۆژەی بنیاتنانی یەك ملیۆن یەكەی نیشتەجێبوون و سەدان خوێندنگە و نەخۆشخانە و پرد و رێگاوبان و تۆڕی كارەبا و ئاو.
وتیشی، سیاسەتی چاكسازیی حكومەتی عیراق پابەندی رێنماییەكانی سندوقی دراوی نێودەوڵەتی بووە و بەهۆیەوە رێژەی بێكاری لە عیراق لە 17%ەوە بۆ 13% كەمبووەتەوە.
راوێژكارەكەی سودانی ئاماژەی بەوەشكرد، برەودان بە كەرتی نانەوتی پێویستی بە وەرچەرخانێكی راستەقینە هەیە، حكومەتی ئێستای عیراقیش هەنگاوەكانی بەرەو ئەو ئاراستەیەیە.
سبەینێ گەشتە ئاسمانییەکانی عیراق بۆ ئێران دەستپێدەکاتەوە، وەزارەتی گواستنەوەش دەڵێت: لە یەکەم هەفتەدا چوارجار گەشتەکان ئەنجام دەدرێت.
وەزارەتی گواستنەوەی عیراق رایگەیاند، سبەینێ سێشەممە 15ـی7ـی2025، گەشتە ئاسمانییەکانی عیراق بۆ ئێران دەستپێدەکاتەوە.
ئاماژەی بەوەشکرد، گەشتەکان لەهەفتەی یەکەمدا چوارجار ئەنجامدەدرێت، دوو گەشت لە فڕۆکەخانی نێودەوڵەتی بەغداد لەرۆژانی شەممە و سێشەممە، هەروەها دوو گەشتی دیکەs لە رۆژانی یەکشەممە و چوارشەممە لە فڕۆکەخانەی نێوەدەوڵەتی نەجەفەوە ئەنجامدەدرێت.
جێگەی ئاماژەیە لە ماوەی مانگی رابردوودا بەهۆی جەنگی نێوان ئیسرائیل و ئێران و رەوشی ئەمنییەوە گەشتە ئاسمانییەکان نێوان هەردوو وڵات راگیرابوون.
سەرۆک کۆماری عیراق و باڵیۆزی تورکیا کۆبوونەوە و د. لەتیف رەشید ئاماژەی بەوەکرد،. رێککەوتنی نێوان پەکەکە و تورکیا بنەمایەکی گرنگە بۆ چەسپاندنی ئاسایش و سەقامگیری لە سەرتاسەری ناوچەکەدا.
ئەمڕۆ دووشەممە، د. لەتیف رەشید سەرۆک کۆماری عیراق لەگەڵ ئەنیل بۆرا ئینان باڵیۆزی تورکیا لە عیراق کۆبووەوە.
لە کۆبوونەوەکەدا سەرۆک کۆمار جەختی لە گرنگی بەهێزکردنی پەیوەندییە دووقۆڵییەکانی نێوان هەردوو وڵات کردەوە و رێککەوتنی نێوان پارتی کرێکارانی کوردستان 'پەکەکە' و تورکیا و پرۆسەی چەک دانانی بەرز نرخاند.
سەرۆک کۆمار ئاماژەی بەوەش کرد، ئەم هەنگاوە بنەمایەکی گرنگە بۆ چەسپاندنی ئاسایش و سەقامگیری لە سەرتاسەری ناوچەکەدا .
باڵیۆزی تورکیاش ئەوەی خستە روو، پەیوەندییە دووقۆڵییەکان گەشەسەندنێکی ئەرێنی بەخۆوە دەبینێ لە بوارە جیاجیاکاندا.
کۆمەڵەی پیشەسازی نەوتی کوردستان 'ئەپیکور' راگەیەنراوێکی لەبارەی نەوت و هەناردەی نەوتەوە بڵاوکردەوە و ئاماژەی بەوەکردووە، پێویستە بە شێوەیەكی خێرا و روون شایستە داراییەكانمان پێ بدرێت.
کۆمەڵەی پیشەسازی نەوتی کوردستان 'ئەپیکور' راگەیەنراوێکی لەبارەی نەوت و هەناردەی نەوتەوە بڵاوکردەوە و تێیدا هاتووە، جەخت لە دەستپێكردنەوەی هەناردەی نەوت دەكەنەوە لەڕێی بەندەری جەیهانەوە.
لە راگەیەنراوەکەدا هاتووە، "دانوستانەكانی نێوان هەردوو حكومەتی هەرێم و بەغداد بە مەبەستی هەناردەی نەوت چڕكراونەتەوە و هیچ كات بەشداریی هیچ كۆبوونەكەیەكمان نەكردووە كە پێچەوانەی ئەو گرێبەستانە پێشنیاز كرابێت".
ئاماژە بەوەشکراوە، "ئامادەی دەستپێكردنەوەی هەناردەی نەوتین بە مەرجی پابەندبوون بەو گرێبەستانەی كە هەن، پێویستە رێز لە گرێبەستی هاوبەشیی بەرهەمهێنان بگیرێت".
لە راگەیەنراوەکەدا ئەوەش خراوەتە روو، "پێویستە بە شێوەیەكی خێرا و روون شایستە داراییەكانمان پێ بدرێت، پێویستە چارەسەری ئەو پارەیە بكرێت كە هێشتا نەدراوەتەوە بە كۆمپانیاكان و شایستە داراییەكانمان بدرێتەوە لەڕێگەی كاشەوە بێت یاخود پشكی نەوتی شایستە وەك خۆی".
ئەوەش لە کاتێکدایە، لە مانگی ئازاری ساڵی 2023ـەوە هەناردەی نەوتی هەرێم لە رێگای بەندەری جەیهانەوە راگیراوە و لەو کاتەشەوە تاوەکو ئێستا ناکۆکی لەنێوان حکومەتی عیراق و هەرێمدا هەیە لەسەر دەستپێکردەنەوەی هەناردە.
ئەنجومەنی نوێنەرانی عیراق سبەینێ كۆدەبێتەوە و كارنامەكەی هەشت بڕگە لەخۆی دەگرێت، یەكێكیان هەمواری یاسای ئەنجومەنی نوێنەران و پێكهێنانیەتی.
فەرمانگەی راگەیاندنی ئەنجومەنی نوێنەرانی عیراق لە راگەیەنراوێكدا كارنامەی دانیشتنی سبەینێی ئەنجومەنەكەی بڵاوكردەوە كە هەشت بڕگە لەخۆی دەگرێت.
تەوەری یەكەم دەنگدانە بە سەرۆك و ئەندامانی ئەنجومەنی راژەی فیدرالی و تەوەری دووەم دەنگدانە بە سەرۆكی ئەنجومەنی دەوڵەت.
لە تەوەری سێیەمدا دەنگ دەدرێت لەسەر هەمواری یەكەمی یاسای گۆڕینی بڕوانامەكان، یەكێكی تر لە تەوەرەكان گفتوگۆكردنە لەبارەی پرۆژەیاسای پارێزگاریكردن و باشكردنی ژینگە.
وەك ئەوەی لە كارنامەكەشدا هاتووە، تەوەری هەشتەم تایبەت دەبێت بە گفتوگۆكردن لەبارەی هەمواری یاسای ئەنجومەنی نوێنەران پێكهێنانی ئەنجومەنەكە.
وەزارەتی بازرگانی عیراق رایگەیاند، ئامادەكاری كراوە لە مانگی هەشتی ئەمساڵدا كارتی ئەلیكترۆنی كۆبونی خۆراك لە كەركوك و نۆ پارێزگای تر دابەش بكرێت.
تالب حسێن نیعمە بەڕێوەبەری گشتی فەرمانگەی پلاندانان لە وەزارەتی بازرگانی عیراق رایگەیاند، لە مانگی هەشت دەستدەكرێت بە دابەشكردنی كارتی ئەلیكترۆنی كۆبۆنی خۆراك لە 10 پارێزگا لە نێوانیاندا پارێزگای كەركوك.
دەشڵێت، تائێستا لە كۆی 42 ملیۆن كەس كە ناویان لە كۆبونی خۆراك تۆمار كراوە زیاتر لە 34 ملیۆن كەس كارتی ئەلیكترۆنیان پڕكردوەتەوە.
وتیشی، پرۆسەی خۆتۆماركردن و نوێكردنەوەی زانیاری كۆبونی خۆراك بەشێوەی ئەلیكترۆنی بەردەوامە و یەك ملیۆن و 880 هەزار كەسیش ناوەكانیان سڕاوەتەوە بەهۆی ناوی دوبارە و مردن و گەشتی دەرەوەی وڵات.
ئاماژەی بەوەشكردووە، لە پارێزگای كەربەلا سەرجەم هاووڵاتیان كارتی ئەلیكترۆنییان پڕكردووەتەوە.
وەزیری نەوتی عیراق رایگەیاند، لەسەر زۆرینەی كێشەكان بەردەم دەستپێكردنەوەی هەناردەی نەوت لەگەڵ هەرێم گەیشتوونەتە رێككەوتن تەنها رێژەی بەكارهێنانی ناوخۆیی نەبێت.
حەیان عەبدولغەنی، وەزیری نەوتی عیراق رایگەیاند، بەپێی یاسای بودجە پێویستە حكومەتی هەرێم رۆژانە بڕی 400 هەزار بەرمیل نەوت رادەستی كۆمپانیای سۆمۆ بكات تاكو لە رێگەی بەندەری جەیهانی توركیاوە بە بازاڕبكرێت.
ئەوەشی خستەڕو، لەگەڵ حكومەتی هەرێم لەسەر زۆرینەی كێشەكانی بەردەم دەستپێكردنەوەی هەناردەی نەوتی هەرێم گەیشتوونەتە رێككەوتن، تەنها رێژەی بەكارهێنانی ناوخۆیی نەبێت، كە حكومەتی عیراق ئامادەیە رۆژانە 46 هەزار بەرمیلی نەوت بداتە هەرێم و لەبەرانبەردا حكومەتی هەرێم داوای 65 هەزار بەرمیل دەكات، ئەوەش پێشێلكردنی یاسای بودجەیە.
وەزیری نەوتی عیراق ئاماژەی بەوەشدا، ئامادەن بۆ وەرگرتنی نەوتی هەرێم و بە بازاڕكردنی لە رێگەی كۆمپانیای سۆمۆوە، دەوڵەتی توركیاش ئامادەیی نیشانداوە بۆ دەستپێكردنەوەی هەناردەی نەوتی هەرێم لە بەندەری جەیهانەوە و لەئێستادا تەنها چاوەڕێی حكومەتی هەرێم دەكەن نەوت رادەستی سۆمۆ بكات.
وتیشی، بەهۆی راگرتنی هەناردەی نەوتی هەرێمەوە، حكومەتی عیراق رۆژانە 300 هەزار بەرمیل لە پشكی خۆی لە رێكخراوی ئۆپێك لەدەستدەدات و هیچ سوودێكیش لەو بڕە نەوتە نابینێت.
وەزارەتی پەیوەندییەکانی عیراق ئاشکرایکرد، رێژەی بەکارهێنەرانی ئینتەرنێت ژمارەی پێوانەیی تۆمارکردووە و رێژەی لە 82٪ـی دانیشتوانی تێپەڕاندووە.
وەزارەتی پەیوەندییەکانی عیراق لە راگەیەنراوێکدا بڵاویکردەوە، رێژەی بەکارهێنەرانی ئینتەرنێت لە ساڵی 2024دا رێژەی لە 82٪ـی دانیشتوانی تێپەڕاندووە، ئەمەش بە بەراورد بە ساڵی 2019 بەرزبوونەوەی پێوانەیی تۆمارکردووە، کە لەو ساڵەدا رێژەکە تەنها لە 44٪ بووە.
ئاماژەی بەوەشکردووە، ئەم پێشکەوتنە بەرچاوە دەگەڕێتەوە بۆ خێراکردنی گۆڕانکاری دیجیتاڵی و فراوانکردنی تۆڕی فایبەر ئۆپتیک ' FTTH' لەتەواوی پارێزگاکان، هەروەها رەخساندنی ژینگەیەکی کێبڕکێکار و پێشکەشکردنی خزمەتگوزارییەکان یەکێکی دیکەیە لە هۆکارەکان.
وەزارەتی پەیوەندییەکانی عیراق راشیگەیاندووە، بەهاوبەشی کەرتی گشتی و تایبەت، وەزارەتەکەیان بەردەوامە لە پێشکەشکردنی خزمەتگوزاری زیاتری ئینتەرنێت و چەسپاندنی بناغەیەکی ژێرخانی دیجیتاڵی پێشکەوتوو بۆ عیراق.
سەرۆکایەتی کۆمار پێشوازی له دەستپێکردنی پرۆسەی "چەکدانانی پارتی کرێکارانی کوردستان" دەکات که هەنگاوێکی گرنگی مێژووییە و رێگەخۆشدەکات بۆ کۆتاییهێنان بەململانێی چەکداری و پێشێلکارییه ئەمنییەکان که دەیان ساڵه چەندین هاووڵاتی تێدا بوون بە قوربانی و دەرگا بۆ داهاتوو دەکاتەوە کە یارمەتیدەرە بۆ بەهێزکردنی دەرفەتی ئاشتی لە ناوچەکەدا.
سەرۆکایەتی کۆمار داوای پابەندبوونی تەواو دەکات بە پاراستنی ئاسایش و سەقامگیری و پاراستنی مافە رەواکانی هەموو لایەنەکان.
جەختیش لەوە دەکاتەوە، کە ئەم هەنگاوە کارێکی گرنگە بۆ پتەوکردنی ئاسایش و سەقامگیری لە سەرانسەری ناوچەکەدا و رێگەخۆشکەر دەبێت بۆ پتەوکردنی پەیوەندییە دووقۆڵییەکانی نێوان عیراق و تورکیا، لەسەر بنەمای رێزگرتنی هاوبەش بۆ سەروەری و دەستەبەرکردنی ئاسایش و سەلامەتی هەردوو گەلی دۆست.
سەرۆکایەتی کۆمار پشتیوانی تەواوی خۆی بۆ سەرکەوتنی ئەم هەنگاوه تا کۆتایی رادەگەیەنێت و هەموو ئەو ئامانجه خوازراوانەی بەدەست بێنێت له داخستنی لاپەڕەی پڕ ئازاری رابردوو و کردنەوەی لاپەڕەیەکی نوێ به ناونیشانی هاوکاری و هەماهەنگی هاوبەش بۆ خزمەتکردنی هەموو لایەک.
عیراق پێشوازی لە هەنگاوەكەی پەكەكە دەكات سەبارەت بە لەناوبردنی چەك و هیواخوازە ببێتە هۆی پاراستنی سەروەری عیراق و توركیا.
وەزارەتی دەرەوەی عیراق لە راگەیەنراوێكدا ئەم هەنگاوەی پەكەكەی بە پێشهاتێكی گرنگ وەسف كردووەو دەڵێت، ئەم هەنگاوە دەرفەتێكی راستەقینەیە بۆ پاڵپشتیكردنی هەوڵەكان بەرەو ئاشتەوایی بەردەوام لە ناوچەكەدا.
هەروەها وەزارەتەكە پشتیوانی تەواوی عیراق بۆ ئەم پرۆسەیە دەردەبڕێت و جەخت لەوە دەكاتەوە كە ئەم هەنگاوە رێگە خۆشدەكات بۆ قۆناغێكی نوێی هاوكاریی بنیاتنەر لەگەڵ توركیای دراوسێ لەسەر بنەمای هاوبەش بۆ روبەڕووبوونەوەی ئاڵنگارییە ئەمنییەكان، بەمەش سەروەری عیراق و توركیا پارێزراو دەبێت و ئاسایش و سەقامگیری فەراهەم دەكات.
لە كۆتایی راگەیەنراوەكەدا هیوای ئەوەشی خواستووە كە ئەم دەستپێشخەرییە بەشداربێت لە داخستنی لاپەڕەی گرژییە سیاسی و ئەمنییەكان و ببێتە خاڵی دەستپێك بۆ گفتوگۆیەكی بەرپرسیارانەی ناوچەیی.
سەرۆكی پێشووی پەرلەمانی عیراق رایگەیاند، ئەو هەڵبژاردنەی بڕیارە 11ی 11 ئەمساڵ بەرێوەبچێت، پێویستی بە ئامادەكاری زۆر هەیە، هاوكات ئاماژەی بەوەشكرد كە لە ماوەی داهاتوودا لایەنێكی سیاسی لە گۆرەپانی سیاسی نامێنێت.
سەلیم جبوری، سەرۆكی پێشووی پەرلەمانی عیراق لە میانی چاوپێكەوتنێكیدا لەگەڵ میدیاكانی عیراق رایگەیاند، هەڵبژاردنەكان پێویستیان بە ئامادەكاری زۆر باش هەیە.
ئاماژەی بەوەشكرد، هەستێك لەنێو سوننەدا هەیە كە لایەنی سیاسی هەیە لە قۆناغی داهاتوودا بەهۆی گۆڕانی هەلومەرجی ناوچەكە لە گۆڕەپانی سیاسی عیراقدا بونی نامێنێت، راشیگەیاند، هێزە سیاسییەكان ناچاردەبن مامەڵە لەگەڵ ئەو هەلومەرجە نوێدا بكەن كە لە ناوچەكەدا زاڵ بووە.
سەرۆكی پێشووی پەرلەمانی عیراق ئاماژەی بەوەشدا كە هیچ گۆڕانكارییەك نابێت رێگری لە ئەنجامدانی هەڵبژاردن لە كاتی خۆیدا بكات، وتیشی، كۆمەڵگەی نێودەوڵەتی دەیانەوێت لە رێگای هەڵبژاردنەوە گۆڕانكاری لە عیراقدا بەدیبهێنرێت.
جبوری جەختی لەسەر پێویستی چاودێریكردنی ئەو كەسانە كردەوە كە هەوڵ دەدەن دامەزراوە سەربازییەكان لە كاتی هەڵبژاردنەكاندا بۆ خۆیان بەكاربهێنن.
كۆمسیۆنی باڵای سەربەخۆی هەڵبژاردنەكانی عیراق هۆشداری دەدات لە بڵاوكردنەوەی ناوی كاندیدەكانی هەڵبژاردن پێش ئەوەی بە رەسمی پەسەند بكرێن.
عیماد جەمیل سەرۆكی تیمی راگەیاندنی كۆمسیۆن رایگەیاندووە، هەندێك كەس ناوی خۆیان بڵاودەكەنەوە وەك كاندید بۆ هەڵبژاردنی ئەنجومەنی نوێنەرانی عیراق، ئەوەش پێشێلكردنی یاسایە و كاریگەری نەرێنی دەبێت، چونكە تا ئەنجومەنی كۆمسیاران ناوەكان پەسەند نەكات، هیچ كام لەو كەسانەی ناوی خۆیان بۆ كاندید بوون تۆماركردوە بە رەسمی كاندیدی هەڵبژاردن نین.
هەروەها رایگەیاندوە لە ئێستادا كاری وردبینیكردنی ناوەكان بەردەوامە و رەوانەی لایەنە پەیوەندیدارەكان دەكرێت بۆ زانینی باری یاسایی كاندیدەكان .
وادەی داواکاری بۆ کارمەندانی سەرسنوق بۆ هەڵبژرادنەکان درێژکرایەوە، کۆمیسیۆنی هەڵبژاردنەکانی عیراقیش دەڵێت: تا 20ـی ئەم مانگە دەتوانرێت داواکاری پێشکەش بکرێت.
كۆمسیۆنی باڵای سەربەخۆی هەڵبژاردنەكانی عیراق، بڵاویکردەوە ماوەی پێشکەشکردنی داواکاری بۆ کارمەندانی سەرسندوق بۆ هەڵبژاردنەکانی ئەنجومەنی نوێنەرانی عیراق تا رۆژی 20-7-2025 درێژکرایەوە.
ئاماژەی بەوەشکردوە، دەبێت پێش 20ـی ئەم مانگە داواکار فۆڕمی داواکاری بۆ کارمەندی سەرسندوق، پێشکەشی نزیکترین بنکەی تۆماکردن بکات.
بەپێچەوانەی چاوەڕوانییەكان، لە كۆبوونەوەی ئەمڕۆی ئەنجومەنی وەزیرانی عیراق بڕیار لەسەر ناردنی پارە بۆ موچەی مانگەكانی پێنج و شەشی موچەخۆرانی هەرێم نەدرا، بەڵام سودانی لیژنەیەكی وزاری پێنج كەسی پێكهێنا بۆ ئەوەی بەدواداچوون بۆ كێشەكە بكات .
نووسینگەی سەرۆك وەزیرانی عیراق بڵاویكردەوە، لە كۆبوونەوەكەدا لەبارەی پابەندییە داراییەكانی نێوان بەغداد و هەولێر، ئەنجومەنی وەزیران تاوتوێی دوو رەشنووسی كردووە بۆ رادەستكردنی نەوت و داهاتی نانەوتی هەرێم و پرسی موچەی فەرمانبەران و بە بانكیكردنی موچەكانیان، رەشنووسەكانیش یەكێكیان لەلایەن حكومەتی عیراق و ئەوەی تریان لەلایەن حكومەتی هەرێمەوە ئامادەكراوە.
ئەوەشی خستووەتەڕو، محەمەد شیاع سودانی سەرۆك وەزیرانی عیراق لە كۆبوونەوەكەدا بڕیاریداوە بە پێكهێنانی لیژنەیەكی وزاری، بە سەرۆكایەتی جێگری سەرۆك وەزیران و وەزیری پلاندانان و ئەندامێتی وەزیرانی ئاوەدانكردنەوە و خوێندنی باڵا و داد و تەندروستی بۆ تاوتوێكردنی ئەو دوو رەشنوسە بە هەماهەنگی لەگەڵ لایەنە پەیوەندیدارەكانی نێوان هەردوو حكومەتی عیراق و هەرێم، دواتریش لیژنەكە راپۆڕتێك بۆ ئەنجومەنی وەزیرانی بەرز دەكاتەوە بۆ تاكو لە زووترین كاتدا بڕیاری لەسەربدرێت.
هاوكات، هەڵۆ عەسكەری وەزیری ژینگەی عیراق بە كوردسات نیوزی راگەیاند، لیژنەكە كە دوو ئەندامیان كوردن رۆژی چوار شەممە یەكەم كۆبوونەوە دەكەن و بە هیوان لەماوەی 24 بۆ 48 سەعاتی داهاتوودا كارەكانیان تەواو بكەن و راپۆرتێك بۆ ئەنجومەنی وەزیران بەرز بكەنەوە، بۆ ئەوەی هەرچی زووە كۆبوونەوەی نا ئاسایی ئەنجومەنی وەزیرانی بۆ رێكبخرێت و بڕیاری لەسەر بدرێت.
سەرچاوەیەكی ئەمنی كشانەوەی هێزەكانی هاوپەیمانی نێودەوڵەتی لە بنكەی سەربازیی عەین ئەسەد ئاشكرا دەكات.
سەرچاوەكە بە ئاژانسی سۆمەرییە نیوزی راگەیاندووە، هێزەكانی هاوپەیمانی نێودەوڵەتی لە بنكەی سەربازیی عەین ئەسەد لە رۆژئاوای ئەنبار ئامادەكاری دەكەن بۆ كشانەوەی تەواوەتی لەو بنكەیە.
سەرچاوەكە وتیشی، كشانەوەكە لە چەند رۆژی داهاتوودا دەبێت، بەڵام وردەكاری زیاتری نەخستووەتەڕوو.
بنكەی عەین ئەسەد دەكەوێتە ناوچەی بەغدادی لە پارێزگای ئەنبار و دووەم گەورەترین بنكەی ئاسمانییە لە عیراق.
د.لەتیف رەشید سەرۆک کۆماری عیراق و محەمەد شیاع سودانی سەرۆک وەزیران کۆبوونەوە و باسیان لە پرسی موچەی موچەخۆرانی هەرێم و دوایین دۆخی ناوچەکە و هەڵبژاردنی داهاتووی عیراق کرد.
ئەمڕۆ دووشەممە، د.لەتیف رەشید سەرۆک کۆماری عیراق و محەمەد شیاع سودانی سەرۆک وەزیران کۆبوونەوە و لە کۆبوونەوەکەدا باسیان پرسی دابینکردنی موچەی موچەخۆرانی هەرێم و کارکردن بۆ چارەسەری کێشە هاوبەشەکان کرد بە پشتبەستن بە دەستور و یاسا کارپێکراوەکان.
هەر لە کۆبوونەوەکەدا باس لە ئامادەکارییەکان بۆ هەڵبژاردنی داهاتووی پەرلەمانی عیراق کرا بۆ ئەنجامدانی لەکاتی دیاریکراوی خۆیدا، بۆئەوەی کە ئەنجامەکانی رەنگدانەوەی خواستی راستەقینەی عیراقییەکان بێت.
سەرۆک کۆمار و سەرۆک وەزیران لە کۆبوونەوەکەدا گفتوگۆیان لەبارەی دۆخی ناوچەکە و پەرەسەندنەکان لەسەر ئاستی هەرێمی کرد، هەروەها ئەو ئاڵنگارییانەشی کە لە داهاتوودا ئەگەری هەیە رووبەڕووی ناوچەکە ببنەوە.