ئەحمەد شەرع، سەرۆکی کاتیی سوریا لە چاوپێکەوتنێکی میدیایدا رایگەیاند، کاردەکەین بۆ گەیشتن بە رێککەوتنی ئەمنیی لەگەڵ ئیسرائیل، بەبێ دەستبەرداربونی بەرزاییەکانی جۆلان.

ئاماژەی بەوەشکردوە، ئەگەر ئەم رێککەوتنە سەرکەوتوو بێت، رێگە خۆشدەکات بۆ ئاشتییەکی هەمەلایەنە، بەبێ ئەوەی سوریا دەستبەرداری مافی خۆی بێت بۆ بەرزاییەکانی جۆلان.

لەبارەی دەستوەردانی سوریا لە لوبنان، سەرۆکی کاتی سوریا دیمەشق بە هیچ شێوەیەک نیازی نییە لە روی سەربازییەوە دەستوەردان لە لوبناندا بکات.

ئەحمەد شەرع، لە بەشێکی دیکەی قسەکانیدا جەختیکردوەتەوە، خۆیان لە روبەڕوبونەوە لەگەڵ ئیسرائیلدا دەپارێزن و پاڵپشتی حکومەتی لوبنانیش دەکەن بۆ ئەوەی چەک تەنها لە دەستی حکومەتدا بێت.

تاران پەیامێكی ئاشتی بۆ ناوچەكە دەنێرێت و دووپاتی دەكاتەوە كە پاراستنی سەقامگیری وڵاتانی دراوسێ لە پێشینەی كارەكانیەتی.

عەباس عراقچی، وەزیری دەرەوەی ئێران رایگەیاند، وڵاتەكەی دراوسێكانیان بە دوژمن نازانێت و رێكارەكان تەنیا دژی ئەمریكا بوون.

وتیشی: تاران دوای شەڕ بەردەوام دەبێت لە گفتوگۆ بۆ بنیاتنانەوەی متمانە و باشتركردنی رەوشەكە.

ئاماژەی بەوەشكرد: لە ماوەی شەڕدا تەنیا بنكە سەربازییەكانی ئەمریكایان كردووەتە ئامانج.

جەختیشی كردەوە: وڵاتانی ناوچەكە دەبێت لە كەشێكی ئارامدا بژین و رێگە نەدەن پەیوەندییەكان ببنە هۆكارێك بۆ زیادبوونی گرژییەكان.

وەزارەتی دەرەوەی ئێران دانوستانەکانی لە گەڵ عومان  سەبارەت بە کەشتیرانی لە هورمز بە "بەسوود" وەسف کرد.

ئیسماعیل بەقائی، وتەبێژی وەزارەتی دەرەوەی ئێران رایگەیاند: ئێران و عومان رۆژانی هەینی و شەممە لە تاران لەسەر ئاستی جێگرانی وەزیرانی دەرەوە چەند گەڕێکی دانوستاندنیان ئەنجامداوە، و گفتوگۆکانیش بەسوود بون.

ئاماژەی بەوەش کرد کە هەردوولا راوێژ و بۆچوونیان ئاڵوگۆڕ کردووە سەبارەت بە بنەما هاوبەشەکان و میکانیزمە جێبەجێکارییەکان بۆ بەڕێوەبردنی هاتووچۆی دەریاوانیی ئارام لە گەروی هورمز، بە لەبەرچاوگرتنی مافی سەروەریی هەردوو وڵاتی کەناراوەکە.

بەقائی وتیشی: ئەم دانوستاندنانە "بەسوود" بوون و "پێشکەوتن" بەدەستهاتووە، هەروەها روونی کردەوە کە وەفدی عومانی ئێوارەی شەممە تارانی جێهێشتووە، بەڵام راوێژکارییە تەکنیکی و سیاسییەکانی نێوان هەردوولا بەردەوامن.

لە وەڵامی پرسیارێکدا سەبارەت بە دۆخی ئێستای گەروی هورمز، بەقائی رایگەیاند کە هیچ گۆڕانکارییەک بەسەر رەوشی هاتووچۆی پەڕینەوە لە گەروەکەدا نەهاتووە.

ئاژانسی هەواڵی ئەسۆشێتد پرێس (AP) بڵاویکردەوە، دوای 13 رۆژ لە هێرشی ئەمریکا بۆ سەر ئێران، واشنتۆن هێرشەکانی راگرت و لە ئێستادا  رێڕەوی دیپلۆماسی لەنێوان تاران و واشنتۆن کارایە و هەردوولا خوازیاری ئاگربەستن.

ئاژانسەکە لە زاری بەرپرسێکی هەرێمییەوە، کە بەشدارە لە هەوڵەکانی نێوەندگیری لەنێوان تاران و واشنتن زانیارییەکانی بڵاوکردوەتەوە.

ئاماژەی بەوەکردوە، وەستانی هێرشەکانی ئەمریکا و هێرشە بەرپەرچدانەوەکانی ئێران بۆ سەر وڵاتانی دراوسێی لە ناوچەکە ئاماژەیەکی ئەرێنییە و هاوکارێکی باشی بەردەوامبوونی هەوڵەکانە بۆ هێورکردنەوەی ئاڵۆزییەکان.

بەگوێرەی زانیارییەکانی ئاژانسەکە، لەئێستادا  هەردوو لایەنی ئەمریکی و ئێرانی ئارەزووی ئەوە دەکەن بگەڕێنەوە بۆ رێککەوتنی ئاگربەستی کاتی، ئەم هەنگاوەش وەک دەرفەتێک دەبینرێت بۆ رێگریکردن لە تەشەنەسەندنی زیاتری گرژییە سەربازییەکان لە ناوچەکەدا.

سوپای پاسدرانی ئێران رایگەیاند، ئامارەکانی واشنتۆن سەبارەت بە زیانە گیانییەکانی هێزەکانیان  دورە لە راستییەوە و ئاماژەی بەوەکردوە ژماەی کوژراوەکانیان 200 کەسی تێپەراندوە.

سەردار حسێن محبی، وتەبێژەکەی سوپای پاسدارانی  بە ئاژانسی تەسنیمی راگەیاندوە، ئەمریکا راستییەکان دەشارێتەوە و لە دوای شکاندنی ئاگربەستەوە لە ئاکامی هێرشکردنە سەر هەشت بنکە و ناوەندی جێگیربوونی هێزەکانی ژمارەی کوژراوانی ئەمریکی 200 کەسی تێپەڕاندووە و ژمارەی بریندارەکانیش زۆر لەوە زیاترە.

وتەبێژەکەی سوپای پاسداران جەختیشی کردەوە، دەبێت هاووڵاتییانی ئەمریکی رێگە بە فەرماندەکانیان نەدەن راستییەکانیان لێ بشارنەوە.

هاوکات داوای لە حکومەتی ئەمریکا کرد کە رێگە بە رۆژنامەنوسان بدات سەردانی شوێنی هێرشەکان بکەن  تاوەکو خۆیان قەبارەی  راستەقینەی زیانە گیانییەکان هەڵسەنگێنن.

پێگەی هەواڵیی وای‌نێتی ئیسرائیلی بڵاوی کردەوە، لێپرسراوانی ئیسرائیل پێشبینییان دەکرد هێرشی بەرفراوانی ئەمریکا بۆ سەر ئێران لە شەوی هەینیدا دەستپێبکات، کە پێشتر دوناڵد ترەمپ رایگەیاندبوو لێکۆڵینەوەی لەسەر دەکات.

بە گوێرەی زانیارییەکانی میدیا ئیسرائیلییەکە، پاشەکشەی دۆناڵد ترەمپ لە ئەنجامدانی هێرشەکە لە دوا ساتەکاندا بۆ بەخشینی دەرفەتێکی دیکە بووە بە تاران.

 ئەمەش دوای ئەوەی وڵاتانی قەتەر و عومان لە پشت پەردەوە فشارێکی زۆریان خستە سەر ئێران تاوەکو نەرمی لە هەڵوێستەکانیدا بنوێنێت و رێگری لە هاوێشتنی ئەو هەنگاوە سەربازییە نزیکەی مسۆگەرەی ئەمریکا بگرن.

 لەگەڵ ئەوەشدا، لێپرسراوانی ئیسرائیلی پێیان وایە لەبەریەک هەڵوەشانەوەی تێگەیشتنەکانی نێوان تاران و واشنتۆن وا دەکات ئاسۆی گەیشتن بە رێککەوتنێکی هەمیشەیی ناچاری نزیک بێتەوە لە سفر، بەجۆرێک کە ئەم دەرفەتە نوێیەی  سەرۆکی ئەمریکا تەنها مۆڵەتێکی کاتی دەبێت بۆ ئێران تا کاتی پێ بڕوات و هیچ گۆڕانکارییەک لە هەڵسەنگاندنە بنەڕەتییەکانی ئیسرائیلدا ناکات.

رۆژنامەی 'تەلەگراف' رایگەیاند، سەرەڕای لێدوانەکانی ترەمپ سەبارەت بەوەی تواناکانی سوپای پاسداران بەتەواوی تێکشکێندراوە، هێرشە موشەکییەکانی ئێران دەریانخستووە هەڕەشەی موشەکیی ئەو وڵاتە بۆ سەر بنکەکانی ئەمریکا بەردەوامە.

راپۆرتێکی رۆژنامەی تەلەگراف'ـی بەریتانی ئاشکرای کردووە، سەرەڕای پێداگرییەکانی دۆناڵد ترەمپ بەوەی سوپای ئێران بەتەواوی تێکشکێندراوە و راگەیەندراوەکانی پیت هیگسێت، وەزیری جەنگی ئەمریکا کە جەختی کردەوە، "بەرنامەی موشەکیی تاران لەناوچووە"، هێرشە موشەکییەکانی ئەم دواییەی ئێران دەریانخستووە، هەڕەشەی موشەکیی ئەو وڵاتە بۆ سەر بنکەکانی ئەمریکا هێشتا بەردەوامە.

راشیگەیاند، هێرشی موشەکی ئێران بۆ سەر ئوردن و کوژرانی سێ سەربازی ئەمریکی، ئاماژەیەکی روونە بۆ ئەوەی دوای چەندین مانگ لە بۆردومانی بەردەوامی ئەمریکا و ئیسرائیل، ئیران هێشتا کۆگایەکی گەورەی موشەکی لەبەردەستدایە.

لێپرسراوێکی ئێران بە رۆژنامەکەی راگەیاندووە، ئەمریکییەکان خۆیان هۆکاری سەرەکین لەپشت باشترکردنی موشەکەکانیان، لە سەرەتای جەنگەوە ئەگەر شوێنی هەڵدانی موشەکێک بپێکرایە، 15 سەعاتی دەویست تا دووبارە چالاک بکرێتەوە، بەڵام ئێستا ئەو کاتە کەمبووەتەوە بۆ کەمتر لە 30 خولەک.

هاوکات سەردار شێکارچی، وتەبێژی هێزە چەکدارەکانی ئێران بە رۆژنامەی 'تەلەگراف'ـی راگەیاندووە، "بەرهەمهێنانی موشەک و درۆن لە ناو جەرگەی شەڕەکەدا نەک نه‌وەستاوە، بەڵکو راستەوخۆ لە هێڵی بەرهەمهێنانەوە دەبرێنە مەیدانی جەنگ".

لەلایەکی دیکەوە بەرپرسانی ئەمریکیش رایانگەیاندووە، تاران دەستیکردووە بە بەکارهێنانی موشەکی زۆر خێرا کە لە کۆتا ساتەکانی نزیکبوونەوە لە ئامانجەکان، سیستمی بەرگریی ئاسمانیی ناتوانێت بەرپەرچیان بداتەوە.

بەپێی راپۆرتێکی رۆژنامەی نیویۆرک پۆست، هێزە تایبەتەکانی ئەمریکا پلانێکی سەربازیی بەناونیشانی "ئاڵۆزترین ئۆپراسیۆنی مێژوو" تاوتوێ دەکەن، بە مەبەستی چوونە ناو بنکە ئەتۆمییەکان لە قوڵایی خاکی ئێران و دەستبەسەرداگرتنی کۆگاکانی یۆرانیۆمی پیتێنراو. 

رۆژنامەی 'نیویۆرک پۆست' لە راپۆرتەکەدا ئاماژەی بەوەکردووە، ئۆپراسیۆنەکە بەشێوەی زەمینی دەبێت و پێویستی بە هەزاران سەرباز و هێزی تایبەت هەیە بۆ گەمارۆدانی بنکەکانی وەک فۆردۆ و ئیسفەهان.

ئاماژەی بەوەشكردووە، تیمە سەربازیی و ئەندازیارییەکانی ئەمریکا دەبێت رێڕەوە روخاوەکان بکەنەوە و مینە چێنراوەکانی سوپای پاسداران پوچەڵ بکەنەوە، رێڕەوێکی ئاسۆیی و ئاسمانیش بۆ رزگارکردن و گواستنەوەی کەرستەکان دابین بکەن.

شارەزایان ئاماژە بەوە دەکەن، هۆکاری بیرکردنەوە لە ئۆپراسیۆنی زەمینی، بنبەستبوونی گفتوگۆ دیپلۆماسییەکانە و هەروەها نەبوونی دڵنیایی لەوەی ئایا هێرشی ئاسمانی دەتوانێت بەتەواوەتی ئەو ناوەندە ئەتۆمییە قووڵانەی ژێر زەوی تێکبشکێنێت یان نا.

هۆشداریش دەدەن؛ ئۆپراسیۆنەکە تێچوویەکی سەربازیی زۆری دەوێت، چونکە پاراستنی ناوچەیەکی گەورەی شەڕ لەناو خاکی ئێراندا بۆ ماوەیەکی پێویست بە مەبەستی گواستنەوەی یۆرانیۆمی پیتێنراو، ئاستەنگێکی لۆجیستی کۆنتڕۆڵ نەکراوە.

محەمەد باقر زولقەدر، ئەمینداری ئەنجومەنی باڵای ئاسایشی نیشتمانیی ئێران، دەڵێت مەرجی کۆتاییهاتنی ئۆپراسیۆنە سەربازییەکانی وڵاتەکەی پەیوەستە بە خۆبەدەستەوەدانی تەواوەتیی ئەمریکا.

زولقەدر لە پەیامێكدا ئاماژەی بەوە كردوو: هەموو دوكەڵێك لە ناوچەكەوە بەرز بێتەوە، نیشانەی پێكان و ئامانجگرتنی راستەوخۆی بنكەیەكی سەربازی، ئاسایشی، یان دارایی ئەمریكییە.

رونیشیكردەوە: بۆردومانە ئاراستەكراو و بەردەوامەكان گوزارشت لە توڕەیی گەلی ئێران دەكەن بەرانبەر سیستمی هەژموونگەری.

جەختیشی كردەوە: هیچ وەستانێك لە ئۆپراسیۆنە سەربازییەكاندا نایەتە ئاراوە تا بڕیاری كۆتایی و هاتنەدی ئامانجەكان.

 

بزووتنەوەی ئەنساروڵڵا (حوسییەکان)، دوو ئۆپراسیۆنی سەربازییان بۆ سەر دامەزراوەکانی کۆمپانیای "ئارامکۆ" لە شارەکانی جیزان و یەنبەع لە سعودیە ئەنجام داوە.

یەحیا سەریع، وتەبێژی سەربازیی بزووتنەوەکە رایگەیاند: ئۆپراسیۆنی یەکەم "ئامانجە هەستیارەکانی" لە جیزان پێکاوە، لەکاتێکدا ئۆپراسیۆنی دووەم دامەزراوەکانی یەنبەعی کردووەتە ئامانج، ئەوەش بە بەکارهێنانی مووشەکی بالیستی، کروز و فڕۆکەی بێفڕۆکەوان، هەروەها ئاماژەی بەوەش کرد کە هەردوو ئۆپراسیۆنەکە ئامانجەکانی خۆیان پێکاوە.

سەریع روونی کردەوە کە ئەم هێرشە وەک وەڵامدانەوەیەک بووە بۆ ئەو هەڵمەتە ئاسمانییانەی کە شار و بەندەری حودەیدە و دوورگەی کەمرانیان کردبووە ئامانج، هاوکات جەختی لە بەردەوامیی "گەمارۆی دەریایی" کردەوە و هۆشداریشی دا لە پەرەپێدانی زیاتری ئۆپراسیۆنەکانیان لە قۆناغی داهاتوودا.

سكرتێری گشتی نەتەوەیەكگرتووەكان و سەرۆكی سوریا جەختیان لەسەر سەروەری و یەكپارچەیی سوریا كردەوە.

ئەنتۆنیۆ گوتێرێس سكرتێری گشتی نەتەوەیەكگرتووەكان و ئەحمەد شەرع سەرۆكی سوریا، لە دیمەشق كۆبونەوە، لە دیدارێكدا رێگەكانی بەهێزكردنی هاوكارییەكان لە نێوان سوریا و نەتەوەیەكگرتووەكان تاوتوێكران، هەردوولاش جەختیان لەسەر رێزگرتن لە سەروەری و یەكپارچەیی و یەكگرتوویی خاكی سوریا كردەوە.

هاوكات ئەسعەد شەیبانی، وەزیری دەرەوەی سوریا لە كۆنفرانسێكی رۆژنامەوانیدا رایگەیاند، رێگەكانی پەرەپێدانی هاوكارییەكانیان لەگەڵ نەتەوە یەكگرتووەكان تاوتوێكرد بۆ بەهێزكردنی هەوڵەكانی سەرلەنوێ ئاوەدانكردنەوەی سوریا.

هەروەها گۆتێرێسیش رایگەیاند، هەر پێشێلكارییەك بۆ یەكپارچەیی خاكی سوریا قبوڵ ناكرێت، كۆمەڵگەی نێودەوڵەتی دەبێت بەرپرسیارێتی خۆی لەو بابەتە لە رێگەی ئەنجومەنی ئاسایشەوە لە ئەستۆ بگرێت.

پەیامنێری كوردسات نیوز رایگەیاند، بەهۆی پێكدادانی دوو پاس لەسەر رێگای دیمەشق-دێرەزوور لە سوریا كە پاسێكیان هێزی ئەمنی سوریای تێدابووە، ژمارەیەكی زۆر گیانیان لەدەستداوە و برینداربوون.

نەجیب نەعسان بەڕێوەبەری فریاكەوتن لە وەزارەتی تەندروستی سوریاش رایگەیاندووە، بەهۆی روداوەكەوە تائێستا 35 كەس گیانیان لەدەستداوە و 30 كەسی تریش برینداربوون و هەندێكیشیان برینەكانیان سەختە و تەندروستییان نا جێگیرە.

وەزیری دەرەوەی ئێران، عەباس عراقچی، ئەمڕۆ شەممە، جەختی کردەوە لەوەی بەندی پێنجەمی یاداشتی لێکتێگەیشتن لەبارەی گەروی هورمز روونە و دەقەکەی دەڵێت ئێران ئەو لایەنەیە کە میکانیزمی پەڕینەوە لە گەروەکە دیاری دەکات.

عراقچی وتی: کاتی خۆی کردنی رێڕەوێکی جیاواز لەلایەن ویلایەتە یەکگرتووەکانەوە لەگەڵ بەندەکانی یاداشتی لێکتێگەیشتنەکەدا ناگونجێت، هەروەها ئاماژەی بەوەش کرد: دەبوو واشنتۆن راوێژ لەگەڵ تاران بکات سەبارەت بە زیادکردن یان سڕینەوەی هەر رێڕەوێک لە هورمز تاوەکو لە چوارچێوەی بەندی پێنجەمدا بێت.

وتیشی: ئێران دوای روودانی حاڵەتەکانی پێكدادان لە گەروی هورمز، لە کاتی دانوستانەکانی سویسڕادا بڕیاری دا هێڵێکی پەیوەندیی راستەوخۆ بکاتەوە بۆ لادانی لێکتێنەگەیشتن، ئاماژەی بەوەش دا: پێشهاتەکان دەریانخست کە بابەتەکە لە لێکتێنەگەیشتنێکی سادە تێپەڕیوە و لایەنی بەرانبەر سوور بووە لەسەر دروستکردنی رێڕەوی تر.

ئاماژەی بەوەشکرد: واشنتۆن هەوڵی دەدا باری دۆخەکە بەرەو گرژی ببات، تۆمەتباریشی کردن بە پێشێلکردنی رێککەوتنەکە و بوونە هۆی گەیشتن بە دۆخی ئێستا.

سعودیە هێرشیكردە سەر چەند پێگەیەكی حوسییەكان لە یەمەن و  بەهۆی هێرشی پێچەوانەی حوسییەكانیشەوە كارەبا لە زۆربەی شارەكانی سعودیە بڕا.

فەرماندەیی هێزە هاوبەشەكانی هاوپەیمانان لە سعودیە رایگەیاند، هێرشیان كردووەتەسەر چەند پێگەیەكی حوسییەكان لە بەندەری حودەیدە و بەهۆی هێرشەكانیشەوە حوسییەكانیان ناچاركردووە سەرجەم بەندەرەكانی یەمەن بكەنەوە.

ئاژانسەكانیش بڵاویانكردەوە، بەهۆی هێرشی حوسییەكانەوە كارەبای زۆربەی شارەكانی سعودیە بڕاوە و حوسییەكان ژێرخانی سعودیە دەكاتە ئامانج.

حوسییەكانیش لە راگەیەنراوێكدا بە ئامانجگرتنی بەندەری حودەیدەی یەمەنی پشتڕاستكردەوە و رایگەیاند، سعودیە دامەزراوەی مەدەنی لە بەندەری حودەیدە كردووەتە ئامانج و ئەوەش سزادانی بە كۆمەڵی خەڵك و برسیكردنیانە.

ئاماژەی بەوەشكردووە، بە ئامانجگرتنی دامەزراوە مەدەنییەكان پێشێلكردنی یاسا نێودەوڵەتییەكانە و كۆمەڵگەی نێودەوڵەتی دەخاتە بەردەم بەرپرسیاریەتی ئەخلاقی و یاسایی و ئەو هێرشەش بەبێ وەڵام تێناپەڕێت.

رۆژی دووشەممە حوسییەكان قەدەغەی هاتوچۆی دەریاییان بۆسەر سعودیە راگەیاند لە بەرانبەر گەمارۆی ئەمریكا بۆسەر بەندەرەكانی ئێران.

ئەمڕۆ شەممە، ئەنتۆنیۆ گۆتێرێس، سکرتێری گشتی نەتەوە یەکگرتووەکان گەیشتە دیمەشقی پایتەختی سوریا، بە مەبەستی راگەیاندنی پشتگیریی رێکخراوەکە بۆ وڵاتەکە لە قۆناغی گواستنەوەدا بەرەو بنیادنانی دەوڵەتێکی سەقامگیرتر و گشتگیرتر.

ئاژانسی هەواڵی "سانا"ی سوری بڵاویکردەوە، ئەسعەد شەیبانی وەزیری دەرەوەی سوریا لە فرۆکەخانەی نێودەوڵەتیی دیمەشق پێشوازی لە گوترێش و وەفدە یاوەرەکەی کردووە.

ئەم سەردانەی گۆتێرێس، یەکەم سەردانی سکرتێری گشتیی نەتەوە یەکگرتووەکانە بۆ سوریا لە دوای دەستپێکردنی جەنگی ناوخۆی ئەو وڵاتە لە ساڵی 2011، کە بووە هۆی کوژرانی سەدان هەزار کەس و ئاوارەبوونی ملیۆنان سوری. سەردانەکە بە وەرچەرخانێکی گرنگ دادەنرێت لە دوای روخانی ڕژێمی بەشار ئەسەد لە کۆتاییەکانی ساڵی 2024، کە بووە هۆی کۆتاییهاتنی جەنگ.

بڕیارە لە چوارچێوەی سەردانەکەیدا، گوترێس لەگەڵ ئەحمەد شەرع، سەرۆکی سوریا و ئەسعەد شەیبانی وەزیری دەرەوە و ژمارەیەک لە لێپرسراوانی حکومەت و نوێنەرانی کۆمەڵگەی مەدەنی کۆببێتەوە.

وتەبێژی نەتەوە یەکگرتووەکان رایگەیاند، گوترێس لە دیدارەکانیدا جەخت لەوە دەکاتەوە کە سوریا لەبەردەم دەرفەتێکدا بۆ تێپەڕاندنی شوێنەوارەکانی جەنگ و دانانی بەردی بناغە بۆ داهاتوویەکی سەقامگیرتر، گشتگیرتر و گەشەسەندووتر بۆ سەرجەم هاووڵاتیانی سوریا.

تاران ئەمریکا بە تێکدانی ئاسایشی گەروی هورمز تۆمەتبار دەکات و وەزیری دەرەوەی ئێران رایدەگەیەنێت؛ واشنتۆن بەڵێنەکانی کۆتاییهێنان بە جەنگی پێشێل کردووە.

وەزارەتی دەرەوەی ئێران ئاشکرایکرد، عەباس عراقچی وەزیری دەرەوەی ئێران لەگەڵ هاوتا چینییەکەی گفتوگۆی کردووە دەربارەی لێکەوتەکانی "پێشێلکارییەکانی ئەمریکا بۆ بەندەکانی لێکتێگەیشتنی کۆتاییهێنان بە جەنگ" و واشنتۆنی بە بەرپرسیار زانی لە نەبوونی ئاسایش لە گەروی هورمز.

وەزارەتی دەرەوەی ئێران ئاماژەی بەوەشکرد، عراقچی لە کۆبوونەوەکەیدا لەگەڵ وەزیری دەرەوەی چین جەختی کردووەتەوە کە تێکچوونی ئاسایشی گەرووی هورمز دەرئەنجامی پابەندنهەبوونی ئەمریکایە بە بەڵێنەکانی، هاوکات سەرکۆنەی هێرشەکانی ئەمریکای کرد کە ژێرخانی ئابوری و خزمەتگوزارییەکانی ئێرانیان کردووەتە ئامانج.

لە بەشێکی تری کۆبوونەوەکانیدا و لە پەیوەندییەکی تردا لەگەڵ وەزیری دەرەوەی روسیا، عراقچی جەختی لەسەر ئیرادەی تاران کردەوە بۆ رێگریپێکردن لە ئەمریکا تا گەروی هورمز بۆ مەبەستی خۆی بەکارنەهێنێت.