جیهان
ترەمپ رایگەیاند پەلەی نییە بۆ دانوستان لەگەڵ ئێران و جەختیش دەكاتەوە ئاست وێرانكاریی وێستگە ئەتۆمییەكانی ئەو وڵاتە بەجۆرێك بوە كە ناتوانرێت یۆرانیۆمی تێدا تا بەرهەم بهێنرێت.
دۆناڵد ترەمپ سەرۆكی ئەمریكا بۆ یەكەمجار ئاشكرای كردوە كە كاتی بۆردومانەكانی ئەمریكا بۆسەر ئێران ئاشكرا بوە بۆ بە ناچاری بڕیاری داوە كە پێشوەختە هێرش بكرێتە سەر دامەزراوەی ئەتۆمیی فۆردۆ.
وتیشی: ئەمریكا بەشێوەیەك ئەو دامەزراوەیەی لەناوبردوە كە رەنگە ئێرانییەكان ناچاربن شاخێكی دیكە بدۆزنەوە بۆ ئەوەی دامەزراوەیەكی هاوشێوەی فۆردۆ دروست بكەنەوە.
لە لایەكی دیكەوە پێگەی ئەكسیوس بڵاویكردوەتەوە : ستیڤ ویتكۆف، نوێنەری سەرۆكی ئەمریكا بۆ كاروباری رۆژهەڵاتی ناوەڕاست بە لێپرسراوانی ئێرانی راگەیاندوە كە پێویستە دانوستانە ئەتۆمییەكان بە بێ نێوەندگیریی لە نێوان واشنتۆن و تاران دەستپێبكاتەوە و دەبێت گفتوگۆكانیش بە خێرایی بگاتە ئەنجام.
بەپێی زانیارییەكانی ئەو پێگەیە ئەمریكا، بەریتانیا، فەرنسا و ئەڵمانیا كۆتایی مانگی ئابیان وەك دوا وادە بۆ دەستپێكردنەوەی دانوستانەكانی نێوان ئەمریكا و ئێران دیاری كردوە .
سەرۆكی ئۆكراین دەڵێت، پەیوەندییەكی باشی لەگەڵ ترەمپ ئەنجامداوە و ترەمپیش مۆڵەتێكی 50 رۆژە دەداتە پوتن.
ڤۆلۆدیمیر زیلینسكی سەرۆكی ئۆكراین رایگەیاند، پەیوەندییەكی تەلەفۆنی زۆر باشی لەگەڵ دۆناڵد ترەمپ سەرۆكی ئەمریكا ئەنجامداوە و سوپاسی كردوە بۆ ئەو هەڵوێستە ئەرێنیەی بەرامبەر كیێڤ هەیەتی و ئامادەیی ترەمپیشی بۆ كاری هاوبەش لە پێناو بەدیهێنانی ئاشتی بەرز نرخاند.
پێشتریش ترەمپ رایگەیاندبوو، لە رۆڵی ڤلادیمیر پوتن سەرۆكی روسیا رازی نییە و مۆڵەتی 50 رۆژی پێداوە بۆ راگرتنی شەڕ لەگەڵ ئۆكراین، ئەگەر نا باج بەسەر مۆسكۆدا دەسەپێنێت.
سەرۆکی ئەمریکا پەیامێک ئاڕاستەی سەرۆکی روسیا دەکات و دەڵێت: لەماوەی 50 رۆژدا شەڕ لە ئۆکراین رانەگرن، سزای زۆر قورس بەسەر روسیادا دەسەپێنم.
دۆناڵد ترەمپ سەرۆکی ئەمریکا رایگەیاند، لە هاوتا روسیەکەی 'پوتن' زۆر بێ هیوا بووە و دەبێت لە زووترین کاتدا کۆتایی بە شەڕی ئۆکراین بهێنرێت.
ئاماژەی بەوەشکرد، لەماوەی 50 رۆژدا ئەگەر سەبارەت بە ئۆکراین نەگەنە رێککەوتن، سزای زۆر قورس بەسەر روسیادا دەسەپێنم.
ترەمپ وتیشی، ئەم سزایانەی ئێستا لاوکین و سزاکانی داهاتوو بە ڕیژەی 100٪ دەبێت.
ئەم قسانەی لەترەمپ لە میانەی دیدارێکدا بوو لەگەڵ مارک روتە سکرتێری گشتی ناتۆ لە کۆشکی سپی، کەتێیدا رایگەیاند، هاوکاری ناتۆ دەکات و چەکی پێشکەوتوویان پێدەدات.
وەزیری ناوخۆی بەریتانیا ئاشكرایدەكات، لەگەڵ عیراق لە قۆناغی كۆتاییداین بۆ جێبەجێكردنی بڕیاری دیپۆرتكردنەوەی كۆچبەرە كورد و عیراقیەكان.
بەپێی هەواڵێكی رۆژنامەی سەندەی تایمز، بەریتانیا دەیەوێت بەخێرایی ئەو كۆچبەرە عیراقی و كوردانە دیپۆرت بكاتەوە كە دەگەنە بەریتانیا یاخوود مافی مانەوەیان نییە.
لای خۆیەوە ئیڤێت كوپەر وەزیری ناوخۆی بەریتانیا رایگەیاندووە، لەگەڵ عیراق لە قۆناغی كۆتاییداین بۆ دیپۆرتكردنەوەی ئەو كۆچبەرانە.
رۆژنامەكە دەڵێت، بەریتانیا پێیوایە كۆچبەرە كوردەكان لەناو تۆڕەكانی قاچاخچێتی كۆچبەراندا زاڵبوون.
لە ماوەی رابردوودا دەزگای تاوانی نیشتیمانی بەریتانیا شانبەشانی هێزە ئەمنیەكانی هەرێمی كوردستان چەند ئۆپراسیۆنێكیان بۆ دەستگیركردنی ژمارەیەك قاچاخچی لە هەرێمی كوردستان ئەنجامدا.
هەفتەی رابردوو بەریتانیا و فەرەنسا رێككەوتنێكی نوێیان بۆ دیپۆرتكردنەوەی ئەو كۆچبەرانە ئیمزا كرد كە لە كەناڵی ئینگلیزەوە دەگەنە بەریتانیا.
هێزی ئاسمانی ئۆکراین رایگەیاند، روسیا لە شەوی هەینی - شەممە 597 فڕۆکەی بێ فڕۆکەوان و 26 مووشەکی بەرەو ئوکرانیا هەڵداوە، ئاماژەی بەوەداوە؛ هێرشەکانی روسیا زیاتر بوون.
هێزی ئاسمانی ئۆکراین لە راگەیێندراوێکدا بڵاوی کردەوە: “روسیا بە 623 چەکی ئاسمانی هێرشی کردووە” و رونی کردەوە کە ئەم چەکانە بریتین لە 597 فڕۆکەی بێ فڕۆکەوان و 26 موشەک.
هێزەکانی بەرگری ئوکراین سەرکەوتووانە نزیکەی 344 لەم چەکانەیان شکاندووە، کە بریتین لە:
- 25 مووشەک
- 319 فڕۆکەی بێ فڕۆکەوان
زیادبوونی هێرشەکان
راپۆرتەکان ئاماژە بەوە دەکەن کە لە رۆژی شەممە، روسیا شەپۆلێکی تری هێرشی موشەکی و فرۆکەی بێ فڕۆکەوانی بە بۆ سەر رۆژئاوای ئۆکراین ئەنجامداوە.
بەپێی ئاژانسە هەواڵیەکان؛ لە چەند رۆژی رابردوودا هێرشەکانی روسیا بۆ سەر ئۆکراین زیادیانکردووە.
ئیمانوێل ماکرۆن سەرۆکی فەڕەنسا و کییەر ستارمەر سەرۆک وەزیرانی بەریتانیا رێککەوتنێکی نوێیان بە ئامانجی رێگریکردن لە کۆچبەران بۆ پەڕینەوە لە کەناڵی ئینگلیز ئەنجام دا و باسیشیان لە سەپاندنی سزای زیاترکرد بەسەر روسیادا، هاوکات ماکرۆن؛ "چارەسەری دوو دەوڵەتیی بە تاکە هیوای ئاشتی" ناوبرد لە رۆژهەڵاتی ناوەڕاست.
بەپێی راپۆرتی BBC، ئەم رێککەوتنە نوێیە لە ئەنجامی دانیشتنەکانی ئەمڕۆ هاتووەتە ئاراوە و ئامانجی سەرەکی رێگریکردنە لە دەیان هەزار کۆچبەر کە بە بەلەمی بچووکەوە هەوڵی پەڕینەوە لە کەناڵی ئینگلیز دەدەن.
جێگەی تێبینیە کە ئەم سەردانەی ماکرۆن بۆ لەندەن کە سێ رۆژی خایاند، یەکەم سەردانی سەرۆکێکی ئەوروپایی بووە بۆ بەریتانیا دوای دەرچوونی ئەم وڵاتە لە یەکێتیی ئەوروپا.
ئامارەکان رونی دەکەنەوە کە تا ئەم ساتەی ئەمساڵ، زیاتر لە 20 هەزار کەس لەو رێگەیەوە گەشتیانکردووە، ئەمەش نیگەرانی زۆری بۆ هەردوو لایەن دروستکردووە.
کییەر ستارمەر لە کۆنفرانسی رۆژنامەوانیدا رایگەیاند: “لەگەڵ فەرەنسا دەبێت هێز و سەرکردایەتی بەکاربهێنین بۆ رووبەروو بوونەوەی ئاستەنگەکانی کۆچی نایاسایی”.
هەروەها وتیشی: “هەمومان هاوڕاین لەسەر ئەوەی کە دۆخی کەناڵی ئینگلیز ناتوانێت وەک ئەوەی هەیە بەردەوام بێت، بۆیە ئێمە تاکتیکی نوێ دەهێنینە گۆڕەپانەکەوە و مەبەستێکی نوێ بۆ بەرەنگاربوونەوەی کۆچی نایاسایی و شکاندنی مۆدێلی بازرگانی باندە تاوانبارەکان جێبەجێدەکەین”.
دەربارەی کۆچبەران و باندە تاوانبارەکان:
زۆرێک لەو کۆچبەرانەی کە ڤیزا و مۆڵەتیان نییە و لە رێگەی دەریاوە لە فەڕەنسا بەجێدەهێڵن، هەوڵدەدەن بە بەلەمی بچووک بپەڕنەوە بۆ بریتانیا. ئەوان زۆرجار بڕێکی زۆر لە پارە دەدەن بەو باندە تاوانبارانەی کە بەلەمەکان لە باکووری فەرەنسا رێکدەخەن و دەیانگوازنەوە بۆ بریتانیا.
وردەکاریەکانی رێککەوتنە نوێیەکە:
بەپێی ڕێککەوتنی نوێ:
- فەڕەنسا رازی دەبێت بە وەرگرتنەوەی ئەو کۆچبەرانەی کە پەڕینەوەیان بۆ بریتانیا رەتدەکرێتەوە و ناتوانن پەیوەندی خێزانییان لەگەڵ بریتانیا بسەلمێنن.
- بریتانیا مافی پەنابەری دەداتە یەک کۆچبەر لە فەڕەنسا کە بتوانێت پەیوەندی خێزانی بە بریتانیاوە بسەلمێنێت.
ئەم هەنگاوە هاوبەشە ئامانجی لە کەمکردنەوەی کۆچی نایاسایی و گرتنی باندە تاوانبارەکانە کە لەم بازرگانیەدا بەشداری دەکەن.
بەریتانیا و فەڕەنسا رایانگەیاند ئامادەن هەماهەنگی بكەن لەسەر بەكارهێنانی چەكی ئەتۆمی.
ئیمانوێل ماكرۆن سەرۆكی فەڕەنسا و كیێر ستارمەر سەرۆك وەزیرانی بەریتانیا ڕاگەیەندراوێكیان ئیمزا كرد كە ئامادەیی هەردوو وڵاتەكە دەردەخەن بۆ هەماهەنگی كردن لە بەكارهێنانی چەكی ئەتۆمی لە كاتی پێویستدا بۆ بەرگریكردن لە وڵاتانی ئەوروپا.
لە راگەیەندراوێكی هاوبەشدا فەڕەنسا و بەریتانیا ڕایانگەیاند كە هەڕەشەی زۆر گەورە بۆ سەر وڵاتانی ئەوروپا ڕاستەوخۆ وەڵامدانەوەی دەبێت لە لایەن هەردوو وڵاتەكەوە، و دوپاتیشیان كردەوە كە بڕیاری بەكارهێنانی چەكی ئەتۆمی سەربەخۆ دەبێت و هەر وڵاتێك خۆی بڕیاری لێدەدات.
رێككەوتنەكەی نێوان فەڕەنسا و بەریتانیا هەماهەنگی بۆ پەرەپێدانی موشەكی دوور مەوداش لەخۆ دەگرێت و هەروەها پێكەوە كار دەكەن لە بوارەكانی ژیری دەستكرد و تەكنەلۆژیای بەرگری پێشكەوتوو.
ئەم ڕێككەوتنانە لە میانەی سەردانە سێ ڕۆژییەكەی سەرۆكی فەڕەنسا بوو بۆ بەریتانیا.
دەزگای هەواڵگری ئیسرائیل رەتیدەكاتەوە ئێران پێش هێرشەكەی ئەمریكا بۆسەر دامەزراوە ئەتۆمییەكانی توانیبێتی یۆرانیۆمی پیتێنراو بگوازێتەوە.
ئاژانسی هەواڵی رۆیتەرز لە زاری لێپرسراوێكی باڵای دەزگای هەواڵگری ئیسرائیل لە بارەی هێرشەكانی ئەمریكا بۆ سەر دامەزراوە ئەتۆمییەكانی ئێران بڵاویكردەوە، زانیارییە هەواڵگرییەكانی ئیسرائیل ئاماژە بەوە دەكەن كە یۆرانیۆمە پیتێنراوەكەی ئێران لە دامەزراوەكانی فۆردۆ و ناتانز و ئەسفەهان پێش هێرشەكانی ئەمریكا نەگوازراوەتەوە.
رۆیتەرز راشیگەیاندوە، پێشتریش نیكۆلاس لێرنەر، سەرۆكی دەزگای هەواڵگری دەرەكی فەرەنسا دووپاتیكردوەتەوە كە پاریسیش زانیاری دروستی دەستكەوتوە كە شوێنی هەڵگرتنی یۆرانیۆمە پیتێنراوەكەی ئێران بەهۆی هێرشەكانی ئەمریكاوە زیانی زۆری بەركەوتووە.
ئەمە لە كاتێكدایە كە دۆناڵد ترەمپ سەرۆكی ئەمریكا چەند جارێكی تەئكیدی لەسەر ئەوەكردووەتەوە كە زیانی زۆریان بە دامەزراوە ئەتۆمییەكانی ئێران گەیاندووە، دواتریش عەباس عراقچی وەزیری دەرەوەی ئێرانیش دانی بەوەدانا كە بەهۆی هێرشەكانی ئەمریكاوە زیان بە دامەزراوە ئەتۆمییەكانی وڵاتەكەی گەیشتووە.
لە چوارچێوەی بڕیاری كەمكردنەوەی ژمارەی كارمەندانی ئاژانسە فیدراڵییەكان لە ئەمریكا ، زیاتر لە دوو هەزار كارمەند لە ئاژانسی ناسا دووردەخرێنەوە .
رۆژنامەی پۆلەتیكۆی ئەمریكی ئاشكرایكردووە ، بەهۆی هەوڵەكانی ئیدارەی ئەمریكا بۆ كەمكردنەوەی ژمارەی كارمەندانی ئاژانسە فیدراڵییەكان ، دوو هەزار و 145 كارمەند لە ئاژانسی ناسا لە كارەكانیان دوردەخرێنەوە كە زۆرینەیان لە پلە و پۆستی باڵادان ، هەروەها ئاماژە بۆ ئەوە كراوە كە ئاژانسی ناسا پێشنیازی خانەنشینی پێشوەختە و كڕینی پشك و دەستلەكاركێشانەوەی دواخراوی خستوەتە بەردەم ئەو كارمەندانە .
لە سەرەتای دەستبەكاربوونی ئیدارەكەی ترەمپەوە ، پیشەسازی بۆشایی ئاسمانی ئەمریكا و هێزی كاری ناسا كە 18 هەزار كارمەند لە خۆ دەگرێت ، روبەروی ئاستەنگی زۆر بوەتەوە ئەوەش بەهۆی هەوڵی كەمكردنەوەی كارمەند و كەمكردنەوەی بودجەی ئاژانسەكە كە ڕەنگە ببێتە هۆی هەڵوەشاندنەوەی دەیان پرۆگرامی زانستی لە داهاتوودا .
وەزارەتی گەنجینەی ئەمریكا سزا نوێی بە سەر 21 كۆمپانیادا سەپاند، بە تۆمەتی دابینكردنی هاوكاری دارایی بۆ سوپای پاسدارانی ئێران.
وەزارەتی گەنجینەی ئەمریكا لە رێگەی نوسینگەی كۆنترۆڵكردنی سەروەت و سامانی دەرەكی ناسراو بە ئۆفاك ، سزای بەسەر 21 كۆمپانیا سەپاند كە بنكەكانیان لە هۆنگ كۆنگ، ئیمارات و توركیان بەتۆمەتی خۆدزینەوە لە سزاكان و دابینكردنی هاوكاری دارایی لە رێگەی فرۆشتنی نەوتەوە بۆ سوپای سوپای پاسدارانی ئێران.
ئۆفاك روونیشیكردەوە، ئەو كۆمپانیانەی لە لیستی سزادراوانی وەزارەتی گەنجینەی ئەمریكادان، دوو كۆمپانیایان بنكەكەیان لە توركیایە، یەكێكیان لە ئیماراتە و 18 ی دیكەشیان لە هۆنگ كۆنگە .
ئەمە لە كاتێدایە، وەزارەتی گەنجینەی ئەمریكا رۆژی پێنجشەممەی رابردووش سەپاندنی سزای بەسەر تۆڕێكی بازرگانیدا راگەیاند، كە نەوتی ئێرانیان بە قاچاخ گواستووەتەوە بەناوی نەوتی عیراقەوە.
كەسێك بە بەكارهێنانی ژیری دەستكرد دەنگی خۆی دەگۆرێت بۆ دەنگی ماركۆ روبیۆ وەزیری دەرەوەی ئەمریكا و پەیوەندی رەسمی كردووە بە كەسایەتی سیاسیەوە.
بەپێی زانیاریەكان، ئەنجامدەری ئەو كارە، بە ئامانجی گەیشتن بە هەژمار و زانیاری كەسەكان ئەو كارەی ئەنجامداوە و لە رێگەی ژیری دەستكردەوە دەنگی خۆی گۆڕیوە و پەیوەندی كردووە بە سێ وەزیری دەرەوەی پێشووی ئەمریكا و كەسایەتی سیاسی دیكەوە.
وەزارەتی دەرەوەی ئەمریكا بە ئاژانسی رۆیتەرزی رایگەیاندووە ، لە ناوەڕاستی مانگی حوزەیراندا كەسێك پەیوەندی كردووە بە چەند وەزیرێك و حاكمی ویلایەتێك و ئەندامێكی كۆنگرێس لە رێگەی بەرنامەی سیگناڵەوە.
هەروەها وەزارەتی دەرەوەی ئەمریكا هۆشداری ناردووە بۆ سەرجەم وەفدە دیپلۆماسیەكان و كونسوڵخانەكان و پێشنیاری كردووە كارمەندەكانیان زیاتر ئاگاداربن دەربارەی هەژماری ساختە.
دۆناڵد ترەمپ سەرۆكی ئەمریكا و بنیامین ناتانیاهۆ سەرۆك وەزیرانی ئیسرائیل لە كۆشكی سپی كۆبوونەوە و ترەمپ وتی، حەماس ئاگربەستی دەوێت و دەرفەتیش هەیە بۆ گەیشتن بە رێككەوتنی ئاشتی.
ترەمپ لەو كۆبوونەوەیەدا رایگەیاند، بزووتنەوەی حەماس ئاگربەستی لە غەززە دەوێت و دەرفەتیش لە بەردەمدایە بۆ گەیشتن بە رێككەوتنی ئاشتی.
لەبارەی گواستنەوەی فەلەستینییەكانیش لە كەرتی غەززە وتی، وڵاتانی دراوسێی ئیسرائیل هەماهەنگی باش لەو بارەیەوە دەكەن، لەسەر ئەگەری چارەسەری دوو دەوڵەتیش لە رۆژهەڵاتی ناوەڕاست، بە نازانم وەڵامی دایەوە.
ناتانیاهۆش وتی، ئەگەری بەدیهێنانی ئاشتی لە رۆژهەڵاتی ناوەڕاست هەیە، لەگەڵ ئەمریكاش كار دەكەن بۆ دۆزینەوەی ئەو وڵاتانەی داهاتوویەكی باشتر بۆ فەلەستینییەكان بنیات دەنێن، وتیشی، نزیكن لە گەیشتن بە رێككەوتن لە غەززە.
لە پێكدادانێكدا لە باكوری غەززە، پێنج سەربازی ئیسرائیلی كوژران و 14ی تریش برینداربوون.
میدیاكانی ئیسرائیل بڵاویانكردەوە، ژمارەیەك سەربازی ئیسرائیلی كەوتوونەتە بۆسەیەكەوە لە باكوری غەززە و پێكدادان رویداوە و بۆمبی چێندراو و هاوەنیش بەكارهاتووە و بەهۆیەوە پێنج سەربازی ئیسرائیلی كوژران و 14ی تریش برینداربوون، دواتر هەلیكۆپتەرێكی ئیسرائیلی لە ناوچەی "بەیت حانون" لە باكوری غەززە نیشتووەتەوە، بۆ رزگاركردنی سەربازەكانی ئیسرائیل.
بەپێی ئامارێكیش لە سەرەتای دەستپێكردنی جەنگی غەززەوە، 849 سەربازی ئیسرائیلی كوژراون و ژمارەی بریندارەكانیش گەیشتووەتە نزیكەی پێنج هەزار و 800 كەس، كە 862یان برینیان سەختە.
شەش رۆژە ئاگرەكەی دارستانەكانی پارێزگای لازقیە لە سوریا بەردەوامە و بەهۆیەوە سەدان خێزان ماڵەكانیان بەجێهێشتووە.
ئاژانسی رەسمی سوریا "سانا" بڵاویكردەوە، تیمەكانی ئاگركوژێنەوە بەردەوامن لە هەوڵەكانیان بۆ كۆنترۆڵكردنی ئاگرەكە و هەوڵ دەدەن نەگاتە دارستانە سروشتییە گەورەكان.
وەزیری فریاگوزاری و كارەساتە سروشتییەكانی سوریاش رەوشەكەی بە كارەساتبار و خەمناك وەسفكردووە.
ئادەم عەبدولمەولا رێكخەری نەتەوە یەكگرتووەكان بۆ كاروباری مرۆیی لە سوریا وتویەتی، تیمەكانی رێكخراوەكە لە كەناراوەكانی سوریا بڵاوكراونەتەوە و ئاگرەكەش سەدان خێزانی ناچار كردووە ماڵەكانیان بەجێبهێڵن و روبەرێكی فراوانی زەوی كشتوكاڵی و ژێرخانی زیندووش سوتاون.
تیمی ئاگركوژێنەوەی وڵاتانی توركیا و ئوردنیش چوونەتە پاڵ تیمی بەرگری شارستانی سوریا، بۆئەوەی بە زووترین كات ئاگرەكە كۆنترۆڵ بكرێت.
رێکخراوی جیهانی مافەکانی مرۆڤ "هیومان رایتس وۆچ" رایگەیاند، کە دوایین ئامارە جیهانیەکانی تایبەت بە پەروەردە ئەوە نیشاندەدەن، کە 272 ملیۆن منداڵ و گەنج لە ساڵی 2024دا لە قۆناخی سەرەتایی و ناوەندی بێبەشبوون لە خوێندن.
بەپێی راپۆرتەکە، نزیکەی 200 ملیۆن منداڵ لە دەرەوەی خوێندنی ئامادەیین، کە ئەم ژمارەیە بەراورد بە ساڵی 2023 بە نزیکەیی 21 ملیۆن زیادیکردووە.
رێکخراوەکە ئاماژەی بەوەداوە، کە ئەم ژمارە "شۆککەرە" تەواوی ئامارەکە نییە، چونکە پەیمانگەی یونسکۆ بۆ ئامار و راپۆرتەکانی چاودێریە جیهانیەکانی پەروەردە باس لەوە دەکەن کە لەو ناوچانەدا، کە شەڕی تێدان، 13 ملیۆن منداڵ لە دەرەوەی قوتابخانەن.
رێکخراوەکە ئاماژەی بەوەداوە کە ئەگەر ئامارەکە هەموو ئەو منداڵانە لە خۆ بگرێت کە لە جیهان و لەو ناوچانەی لە شەڕیان تێدایە لە سودان و غەززەوە ، "کۆی گشتی منداڵان دەگاتە نزیکەی 285 ملیۆن".
ژمارەی گیانلەدەستدان بەهۆی لافاوەكەی ویلایەتی تەكساسی ئەمریكاوە بۆ 82 كەس بەرزبووەوە و لانیکەم 52 کەسی دیکە بێسەروشوێنن.
بەهۆی ئەو لافاوەی لە رۆژی هەینییەوە لە ویلایەتی تەکساسی ئەمریکا دەستی پێ کردووە، تاوەکو ئێستا 82 کەس گیانیان لەدەستداوە کە 28یان منداڵن.
بەهۆی لافاوەکەوە 52 کەس بێسەروشوێنن، کە 11 خوێندکاری کچی کەمپێکی هاوینە و راوێژکارێکی کەمپەکە لەناو بێسەروشوێنبووەکاندان.
کەپمەکانی کامپ میستیک یەکێکە لەو خێوەتە هاوینەییانەی خوێندکاران، کە لە وەرزی هاویندا بە هەماهەنگی قوتابخانەکان رێکدەخرێت، بەپێی دوایین ئامارەکان تاوەکو ئێستا 68 گیانلەدەستدان لەو کەمپاندا تۆمارکراوە.
بەهۆی لافاوەکەوە ئاستی ئاوی روباری گوادالوپی ناوەندی تەکساس زیاتر لە هەشت مەتر بەرزبووەتەوە. لەلایەکی دیکەوە شارەزایانی کەشناسیی پێشبینی ئەوە دەکەن شەپۆلی بارانبارینی بەخوڕ و رەشەبای بەهێز زیاتر ببێت و هۆشداریان داوەتە سەرجەم ئەو کەسانەی نیشتەجێی نزیک رووبارەکانن ماڵيکانیان چۆڵ بکەن.