کوردستان
ئەمڕۆ دووشەمە ٢٥ی ١٠ی ٢٠٢١ سەعات ١٠ی بەیانی وەزارەتی خوێندنی باڵا و توێژینەوەی زانستی، وردەکاری و داتای وەرگیراوان لە زانکۆ و پەیمانگە حکومییەکان لەھەرێمی کوردستان بۆ ساڵی نوێی خوێندنی (٢٠٢١-٢٠٢٢) ڕادەگەیەنێت.
لە ھەفتەی رابردوەوە نرخی نەوت بەردەوامە لە بەرزبونەوە و ئەمڕۆ لەگەڵ کردنەوەی بازاڕەکاندا، نرخی نەوتی برێنت بەرێژەی ٠.٨٪ بەرز بوەتەوە و نرخی ھەر بەمیلێک گەیشتوەتە ٨٦ دۆلار و ٢٤ سەنت، نرخی نەوتی ئەمریکاش بەرێژەی ١٪ بەرزبوەتەوە و بەھای ھەر بەرمیلێک نەوتی تەکساس گەیشتوەتە ٨٤ دۆلار و ٥٣ سەنت کە بەراورد بە رۆژی یەک شەممە ٧٧ سەنت بەرز بوەتەوە.
بەرزبونەوەی نرخی نەوت لە کاتێکدایە، لە ئەمریکا و زۆرێک لە وڵاتانی جیھان خواست لەسەر سوتەمەنی بە شێوەیەکی بەرچاو زیادیکردوە.
د.خەتاب عومەر بەڕێوەبەری گشتی لە وەزارەتی خوێندنی باڵا رایگەیاند، ٥٢ ھەزار و ٥٣٢ دەرچووی ئەمساڵ و ساڵانی رابردوو داواکارییان بۆ وەرگرتن لە زانکۆ و پەیمانگاکان پێشکەش کردووە و زیاتر لە ٤٣ ھەزاریان وەرگیراون.
راشیگەیاند، ٦٢%ی خوێندکاران لە خوێندنی بەیانیان بە زانکۆلاین وەرگیراون و ٢١% لە پارالێڵ و ١٧%ش لە خوێندنی ئێواران وەرگیراون.
وەزارەتی خوێندنی باڵا راشیگەیاند، ھەر خوێندکارێک وەرنەگیراوە یان وەرگیراوە و نیگەرانیی ھەیە، دەتوانێت سکاڵا تۆمار بکات.
ئەنجومەنی پارێزگای ھەولێر کۆبووەوە و بەپێی بەرنامەی کاری کۆبونەوەکەش دەنگ لەسەر بە قەزاکردنی ھەردوو ناحیەی عەنکاوا و پیرمام درا و بەدەنگی سەرجەم ئەندامانی ئەنجومەنی پارێزگای ھەولێر بڕیارەکە پەسەند کرا.
بڕیاریشە دواتر وەزارەتی ناوخۆی ھەرێم رێکاری یاسایی بگرێتەبەر بۆ جێبەجێکرنی رێکارە کارگێڕییەکان، پێداچونەوەش بە ھەیکەلی کارگێڕی ھەردوو قەزاکەدا دەکرێت.
وەزارەتی دارایی و ئابووری حکومەتی ھەرێم رایگەیاندوە، رۆژی سێ شەممە ٢٦ی ١٠ی ٢٠٢١ مووچەی لیواکان و دیوانی وەزارتی پێشمەرگە دابەشدەکرێت
جوتیار عادل وتەبێژی حکومەتی ھەرێمی کوردستان لە دوای کۆبوونەوەکە لە کۆنفرانسێکی رۆژنامەوانیدا رایگەیاند، ئاستی پابەندبوونی ھاووڵاتیان بە رێنماییە تەندروستییەکان کەمبووەتەوە و رێژەی توشبووانی کۆرۆنا لەھەرێمی کوردستان بەرزبووەتەوە.
وتیشی، داوا لە ھاووڵاتیان دەکەین پابەندی رێنماییە تەندروستییەکان بن و پێویستە لەشوێنە گشتییەکان رێکارەکانی خۆپارێزی پەیڕەو بکرێت.
وتەبێژی حکومەتی ھەرێمی کوردستان راشیگەیاند، پرۆسەی خوێندن بەردەوام دەبێت، بەڵام بەستنی ماسک لەخوێندنگەکان ناچارییە.
ئاشکراشیکرد، تاکۆتایی ئەمساڵ دەبێت سەرجەم فەرمانبەران ڤاکسینی کۆرۆنا وەربگرن و ھەر فەرمانبەرێک ڤاکسینی کۆرۆنا وەرنەگرێت رێکاری بەرامبەر دەگیرێتەبەر.
لەباری مامۆستایانیشەوە جوتیار عادل وتی، دەبێت مامۆستایان تا ١ی مانگی ١٢ ڤاکسینی کۆرۆنا وەربگرن.
لە کۆنفرانسێکی رۆژنامەوانیدا باڵیۆزی روسیا لە عێراق ھیوای خواست چیتر دیمەنە تراژیدیاکان لە ھەڵەبجە دووبارە نەبنەوە و لە داھاتوودا زیاتر پەیوەندییەکان بەرەو پێش بچن.
بژار ئەکرەم لێپرسراوی بەشی پێشبینییەکان لە کەشناسی ھەرێم بە کوردسات نیوزی راگەیاند، بەپێی داتاکان ھەر ساڵێک وشکەساڵی بووبێت ساڵی دواتر باران زۆر باریووە، بەڵام بۆ ئەمساڵ ھێشتا ھەموو ئاماژەکان دەرنەکەوتوون بۆ ئەوەی بڕیار لەسەر وشکەساڵی بدرێت. وتیشی، ژمارەیەک لە کەشناسان پێشبینی دەکەن ئەمساڵیش وەک ساڵی رابردوو وشکەساڵی بێت.
ئاری ئەحمەد بەڕێوەبەری گشتی ئاو و ئاوەڕۆی ھەرێمیش بە کوردسات نیوزی راگەیاند، دوای چەند کۆبونەوەیەک لەگەڵ وەزارەتەکانی کشتوکاڵ و شارەوانی، چەند پێشنیازێک دراوەتە ئەنجومەنی وەزیران و بڕیارە ١٢ پرۆژەی ئاو و دروستکردنی چەند بەنداوێکی گەورە و بچووکیش جێبەجێ بکرێن و بۆ پاراستنی ئاوی ژێر زەویش رێگری لە لێدانی بیر بکرێت، بۆئەوەی ئەمساڵ ھەرێمی کوردستان وەک ساڵی رابردوو تووشی قەیرانی کەمئاوی نەبێت.
مستەفا کازمی سەرۆک وەزیران و فەرماندەی گشتی ھێزە چەکدارەکانی عێراق لە نوسراوێکدا فەرمانی کردووە وەزارەتەکانی بەرگری و دارایی عێراق ئەرکی دارایی و پلەی لیوای ٢٠ی وەزارەتی پێشمەرگە لە ئەستۆ بگرن، کارەکانیش بۆ تێکەڵکردنی لیوایەکی پێشمەرگە و لیوایەکی وەزارەتی بەرگری عێراق بۆ دروستکردنی دوو لیوای نوێ بە رێککەوتنی ھەردوولا بەردەوامە.
بەپێی لێدوانی بەرپرسانی وەزارەتی پێشمەرگەی ھەرێم، لیوایەکیان لە سنووری خانەقین تا کەرکوک جێگیر دەکرێت و لیوایەکەی تریش لە کەرکوک تا مەخمور و دەشتی نەینەوا جێگیر دەکرێت.
لە چەند بەنزینخانەیەكی سلێمانی بەنزینەكەی حكومەتی عێراق بە 690 دینار دەفرۆشرێت
محەمەد حەسیب بەڕێوەبەری نەوت و كانزاكانی سلێمانی بەكوردسات نیوزی راگەیاند، لە بەنزینخانەی بەختیار و قەیوانی 2 و حەوایی و بامۆك، نرخی یەك لیتر بەنزین بە 690 دینارە، ئەویش داوای ئەوە حكومەتی عێراق بڕیاریدا رۆژانە بەشە بەنزینێك رەوانەی هەرێم بكات، لەبارەی دابەشكردنی نەوتیشەوە محەمەد حەسیب رایگەیاند، ئێستا لە قەزای پێنجوێن دەستیان بە دابەشكردنی نەوت كردووە و لە رۆژانی داهاتووشدا لەقەزا و ناحیەكان و ناوشاری سلێمانی دەست بەدابەشكردنی نەوت دەكەن.
شەماڵ نامیق قایمقامی قەزای كفری رایگەیاند، ئەو پڕۆژەیە بە بودجەی زیاتر لە 205 ملیۆن دینار جێبەجێ دەكرێت و لەسەر بودجەی 8%ی داهاتی بەڕێوەبەرایەتی گشتی كارەبای سلێمانییە و بەشێك لە كارەكان تەواو كراون.
حازم كەریم بەڕێوەبەری گشتی كارەبای گەرمیان رایگەیاند، تا ئێستا 3 جار حاڵەتی دزیكردن لە ئاسنی تاوەرەكانی كارەبای نێوان شار و شارۆچكەكانی گەرمیان روویداوە و لەسەر ئەو رووداوانەش چەند كەسێك دەستگیركراون و روبەڕوی دادگا كراونەتەوە.
بافڵ تاڵەبانی رووی قسەكانی كردە فەیسەڵ كەریم خانی برادۆستی و پێی ڕاگەیاند بنەماڵەكەتان لای یەكێتی جێگای رێز و پێزانینە، ئەو دەنگانەی لە هەڵبژاردن بەدەست هاتووە جێگای شانازی هەموولایەكیان بووە و نرخاندنیش بۆ ماندووبوونتان دەكەن و ئێوە هەمیشە پێگەی تایبەتتان لای یەكێتی هەیە و هەمیشە پێكەوە دەبین بۆ خزمەتكردنی خەڵك و بوژاندنەوەی یەكێتییەكەتان كە هەمیشە پشت و پەنا بوون، و لە رۆژانی سەختدا لەگەڵمان بوون.
ژووری ئۆپه‌راسیۆنی پارێزگای هه‌ولێر چەند بڕیارێكیان دەركرد پێناو پاراستنی سه‌لامه‌تی ته‌ندروستی گشتیی شاره‌كه‌مان و هەستیاری و مەترسیداری ئه‌و دۆخه نه‌خوازراوه‌ی کە به‌هۆی هەڵکشان و تەشەنەسەندنی ڤایرۆسی کۆرۆنا هاتۆته ئاراوه
بڕیارەكان پێكهاتووە :
یه‌كه‌م/ داوا لە هاوڵاتییانی شارەکەمان دەکەین لەپێناو پاراستنی تەندروستی و سەلامەتی گشتیی، هەموو ئەو گردبوونەوە و ئاهەنگانەی لە هۆڵی مزگەوتەکان، ماڵ، شوێنە گشتییەکان، بەبۆنەی یادی لەدایک بوونی فەخری کائینات پیشەوای مرۆڤایەتی (محمەد)(د.خ) لەسەربێت ڕابگرن، لەهەولێری پایتەخت ئەوەی پێویست بووە بۆ ئەم یادە مەزن و پیرۆزە لەئەنجامدانی ڕێورەسم و یادکردنەوەی ئەم ڕۆژە پڕشکۆیە ئەنجامدراوە، بۆیە داوکارین هاڵاتییان و هاوشاریانی شارەکەمان پابەندبن بەم بڕیارەوە.
دووەم/ سه‌رجه‌م قائیمقام و بەڕێوەبەری ناحییەكانی سنووری پارێزگای هه‌ولێر، ده‌بێت تەواوی ئه‌و رێكارانه‌ی ژووری ئۆپەراسیۆن وه‌كو خۆی جێبه‌جێ بكه‌ن، ده‌سه‌ڵاتی تەواویشیان پێده‌درێت له هه‌ر شوێنێك پێویستی کرد رێكاره‌كان توندتر بكه‌ن.
سێیەم/ بەستنی ماسک بۆ ھەموو ئەو کەسانەی ڤاکسینیان وەرگرتووە و ئەوانەشی ڤاکسینیان وەرنەگرتووە لە شوێنە داخراوەکان دەبێتە ئیلزامی و قائیمقام و بەڕێوەبەری ناحییەکان چاودێری دەکەن.
چواره‌م/ سه‌رجه‌م فه‌رمانگه و به‌ڕێوه‌به‌رایه‌تییه‌كانی سنووری پارێزگای هه‌ولێر، ده‌بێت ڕێنماییه ته‌ندروستییه‌كان و ڕێكاره‌كانی خۆپارێزی جێبه‌جێبكه‌ن به‌تایبه‌تی به‌ستنی (ماسك) و دروستنه‌كردنی گردبوونه‌وه و قه‌ره‌باڵغی، هه‌روه‌ها ڕێگه‌نه‌ده‌ن هیچ هاوڵاتییه‌ك بۆ ڕاییكردنی مامه‌ڵه‌كانی به‌بێ به‌ستنی (ماسك) بچێته نێو هیچ فه‌رمانگه و دام و ده‌زگایه‌كی حكومی، هه‌ر به‌ڕێوه‌به‌رایه‌تی و فەرمانگە و فه‌رمانبه‌رێك سه‌رپێچی له‌و بڕیاره بكات، به‌ڕێوه‌به‌ر و به‌رپرسانی ئه‌و فه‌رمانگه و بەڕێوەبەرایەتییە به‌رپرسیارن.
پێنجەم/ ھەموو فەرمانبەرانی فەرمانگە و دام و دەزگاکانی حکومی لەسنووری پارێزگای هەولێر بە ھێزەکانی ناوخۆ و پێشمەرگە، لە ماوەی دوو مانگدا دەبێت ڤاکسین وەربگرن، بە پێچەوانەوە بەپێی یاسای بەرزەفتی فەرمانبەران مامەڵەیان لەگەڵدا دەکرێت.
شەشەم/ پرسەدانان لە (کۆڵان - هۆڵ - ماڵ - ژێرخێوەت - باخچە و هەرشوێنێکی تر) قه‌ده‌غه‌یه و هه‌ر كه‌سێك پابه‌ند نه‌بێت سزا ده‌درێت و بنکەکانی پۆلیس ڕاسپێردراون چاودێری سنوورەکانی خۆیان بکەن.
حەوتەم/ ھەموو ئەوانەی لە کەرتی تایبەت کار دەکەن، پێویستەکارتی ڤاکسینیان ھەبێت.
هه‌شته‌م/ مامۆستا و فەرمانبەرانی قوتابخانە و زانکۆ و پەیمانگەکان و ئەو قوتابیانەی کە تەمەنیان لە سەرووی 18 ساڵەوەیە، دەبێت تاوەکو 2021.12.1 ڤاکسینیان وەرگرتبێت.
نۆیه‌م/ داواده‌كه‌ین هه‌روه‌ك چۆن لە ڕابردوودا مامۆستایانی ئایینی هاوکارمان بوونە، بە هەمان شێوە ھاوکاربن لە بڵاوکردنەوەی ھۆشیاری تەندروستیی و رێنماییە تەندروستییەکان و ڕێکارەکانی خۆپارێزی.
دەیەم/ دایکان و باوکان دەتوانن تاوەکو 2021.10.31 بڕیار بدەن کە منداڵەکانیان بچنە قوتابخانە یان بەشێوەی ئۆنلاین بخوێنن.
یازده‌یه‌م/ لە کۆڕوکۆبوونەوەکاندا دەبێت بەشداربووان یان کارتی ڤاکسینیان پێ بێت، یاخود پشکنینی کۆرۆنایان کردبێت، بۆ ئەو مەبەستەش خاوەنی (هوتێل، هۆڵ، شوێنەکان) بەرپرسیارن و لەلایەن دەزگا پەیوەندیدارەکانەوە چاودێری دەکرێن.
دوازدەیەم/ له دوای بڵاوبوونەوەی ئەم ڕاگەیندراوە، ژووری ئۆپه‌راسیۆنی پارێزگای هه‌ولێر، هێزه‌كانی پۆلیسی هاتووچۆی ڕاسپاردووە ڕێکاری تایبەت بەرامبەر شوفێران و سەرنشینانی بگرنەبەر کە پابەند نین بە ڕیکارەکانی خۆپارێزی و ڕێنماییە تەندروستییەکان، بەتایبەتی بەستنی (ماسک).
سێزدەیەم/ ژووری ئۆپەراسیۆنی پارێزگای هەولێر، بەڕەچاوکردنی کار و کەسابەت و بژێوی ژیانی هاوڵاتییان، بژاردەی کەرەنتین و قەدەغەی تەواوەتی هاتووچۆی هەڵنەبژارد، بەڵام ئەگەر لەهەر قەزا و ناحییە و شوێن و گەڕەک و کۆڵانێک هاوڵاتییان پابەندی ڕێکارەکانی خۆپارێزی و ڕێنماییە تەندروستییەکان نەبن و مەترسیەکان پەرەی سەند، ئەوا لەپێناو پاراستنی تەندروستی و سەلامەتی گشتیی شاره‌كه‌مان، رێكاره‌كان توندتر دەکرێن، بۆیە داوا لەهەموولایەک دەکەین پابەندبن، تاوەکو بارودۆخەکە و ڕەوشی تەندروستیی لەوەی هەیە سەختر نەبێت.
چوارده‌یه‌م/ ئه‌م رێكارانه له‌كاتژمێر 12ی ئه‌مشه‌و 25 له‌سه‌ر 26ی 10ی 2021 دەچێتە بواری جێبەجێکردنەوە.
ھاوکات سەرکونسوڵگەری ئێران لە سلێمانی رایگەیاند، بەپێی ڕێکەوتنەکانی پێشووی نێوان ئێران و عێراق، ھاووڵاتییانی عێراقی دەتوانن، تەنیا بە ھەڵگرتنی پاسپۆرتی باوەڕپێکراو و ماوەبەسەرنەچووی عێراقی و بە ڕەچاوکردنی ڕێکارەکانی تەندروستی لە سنورە ئاسمانیەکانەوە بچنەناو خاکی ئێرانەوە.
ھەروەھا"ئیرەج مەسجدی"باڵیۆزی ئێران لە بەغداد ئاماژەی بۆ ئەوەکردە، ھاووڵاتییانی ئێران دەتوانن بە فڕۆکە و بەبێ ڤێزە و بە پاسپۆرت و بەڕەچاوکردنی پرۆتۆکۆڵی تەندروستی گەشت بۆ عێراق بکەن، ھاوکات رێگە بە ھاووڵاتییان عێراقیش دەدرێت بەبێ ڤیزەی چوونە ناوەوە سەردانی ئێران بکەن.