کوردستان
کۆمیسیۆنی باڵای سەربەخۆی هەڵبژاردنەکان دەستپێکردنەوەی پرۆسەی تۆمارکردنی بایۆمتری رادەگەیەنێت، ئاماژەی بەوەشکردوە بۆ ئەمساڵ لە دایکبوانی ساڵی 2008 تۆمار دەکرێن.
لە راگەیەندراوێکدا، کۆمیسیۆنی باڵای سەربەخۆی هەڵبژاردنەکان رایدەگەیەنێت؛ لە سبەینێ دووشەممە 20-4-2026وە دەست بە تۆمارکردنی بایۆمەتری دەکەنەوە.
کۆمیسیۆن ئاماژەی بەوەشکردوە، لەم قۆناغەدا لەدایکبووانی ساڵی 2008 تۆمار دەکرێن، بۆئەوەی لەدواتردا ببنە خاوەن کارتی بایۆمتری دەنگدان.
هەروەها کۆمیسیۆن هاووڵاتیان ئاگادار دەکاتەوە، ناوەندەکانی تۆمارکردن جگە لە رۆژانی هەینی و شەممە، رۆژانە لە سەعات 8:30 بەیانی تا 3:00 عەسر کراوە دەبن.
بەڕێوەبەرایەتی پۆلیسی پارێزگای هەڵەبجە، بڵاویکردوەتەوە، کەسێکی تەمەن 24 ساڵیان دەستگیر کردوە، بە تۆمەتی بردنی دەرگای نۆرینگەیەک و بردنی کامێرای چاودێری نۆرینگەکە لە قەزای خورماڵدا.
پۆلیسی هەڵەبجە ئەماژەی بەوەکردوە، دوای ئەوەی لەلایەن هاووڵاتیەکەوە سکاڵاتۆمارکرا لەبنکەی پۆلیسی خورماڵ سەربە بەڕێوەبەرایەتییان لەسەرئەوەی کە دەرگای نۆرینگەکەی لەنێو بازاڕی خورماڵدا شکێنراوە و کامێراکانی چاودێری نۆرینگەکەی دزراوە.
لە لایەن بنکەی پۆلیسی خورماڵ دوای لێکۆڵینەوە و بەدواداچون توانرا لە ماوەیەکی کەمدا تۆمەتبار دەستنیشانبکرێت و بەفەرمانی دادوەری لێکۆڵینەوە دەستگیربکرێت.
پۆلیسی هەڵەبجە دەڵێت؛ تۆمەتبارەکە دانی بەتاوانەکەیدا ناوە و پەراوی لێکۆڵینەوەی بۆ کراوەتەوە.
قوباد تاڵەبانی، پەیامێکی پیرۆزبایی ئاڕاستەی عەممار حەکیم کردووە بەبۆنەی هەڵبژاردنەوەی بە سەرۆکی رەوتی حیکمەی نیشتمانی.
لە پەیامەکەی قوباد تاڵەبانیدا هاتووە: دووبارەبوونەوەی متمانەدان بە بەڕێزتان، رەنگدانەوەی رۆڵی کاریگەرتانە لە گۆڕەپانی سیاسیی عێراق و بەشداربوونی کاراتانە لە بەهێزکردنی کاری نیشتمانیی هاوبەش لەنێوان پێکهاتە جیاوازەکانی گەلی عێراق، بەو ئاراستەیەی کە خزمەت بە سەقامگیریی وڵات دەکات.
دەقی پەیامەکە
بەڕێز جەنابی سەماحەتی سەید عەممار حەکیم
بەبۆنەی دووبارە هەڵبژاردنەوەتان وەک سەرۆکی رەوتی حیکمەی نیشتمانی بۆ خولێکی نوێ، گەرمترین پیرۆزباییتان ئاراستە دەکەم و لە راپەڕاندنی ئەرک و بەرپرسیارێتییەکانتان بۆ ئەم قۆناغە گرنگە، هیوای سەرکەوتنتان بۆ دەخوازم.
دووبارەبوونەوەی متمانەدان بە بەڕێزتان، رەنگدانەوەی رۆڵی کاریگەرتانە لە گۆڕەپانی سیاسیی عێراق و بەشداربوونی کاراتانە لە بەهێزکردنی کاری نیشتمانیی هاوبەش لەنێوان پێکهاتە جیاوازەکانی گەلی عێراق، بەو ئاراستەیەی کە خزمەت بە سەقامگیریی وڵات دەکات.
چاوەڕوانی هەوڵی بنیاتنەری زیاترین بۆ برەودان بە هاوکاری و لێکتێگەیشتن لەنێوان هەموو هێزە نیشتمانییەکان بە جیاوازیی بیروبۆچوون و ئینتیماکانیانەوە.
لەگەڵ ئەوپەڕی ڕێز و خۆشەویستیم.
قوباد تاڵەبانی
جێگری سەرۆكوەزیرانی هەرێمی كوردستان
بەڕێوەبەرایەتی گشتی کەشناسی و بوومەلەرزەزانی هەرێمی کوردستان رایگەیاند کە کاریگەری ئەو شەپۆلە بارانبارینەی رووی لە ناوچەکە کردووە بۆ ئەمڕۆ یەکشەممە بەردەوامی دەبێت و پێشبینی دەکرێت لە کاتەکانی نیوەڕۆ و دوای نیوەڕۆدا لە ناوچە جیاجیاکان بە شێوەیەکی بەرچاو چالاک ببێتەوە، کە زۆرجار بارانەکە بە شێوەی لێزمە و شەستەباران دەبێت و هەورە تریشقە و ئەگەری بارینی تەزرەشی لەگەڵدا دەبێت.
بەپێی راپۆرتی کەشناسی، پشکی شێری دابارین بۆ ئەمڕۆ لە سنووری باکووری پارێزگای هەولێر و دەوروبەری کۆیە و ئیدارەی سۆران دەبێت، هاوکات بەشەکانی رۆژهەڵاتی پارێزگای دهۆک بەتایبەت ناوچەکانی ئاکرێ و زاویتە و دینارتە و مێرگەسوور بارانی چڕیان لێ دەبارێت، لە کاتێکدا لە سنووری پارێزگای سلێمانی و ئیدارە سەربەخۆکان دابارین بە شێوەی شەستەبارانی کورتخایەن و هەورە تریشقە دەبێت.
کەشناسی ئاماژەی بەوەش کردووە کە پلەکانی گەرما جێگیر دەبن و خێرایی با بەراورد بە دوێنێ کەمتر دەبێتەوە، و ئەم کەشە بەهارییە ناجێگیرە بۆ سبەی دووشەممەش بەردەوام دەبێت، بە جۆرێک کە لە کاتەکانی دوای نیوەڕۆدا دووبارە شەپۆلەکە چالاک دەبێتەوە و کاریگەرییەکەی لەسەر پارێزگای دهۆک و ناوچە شاخاوییەکانی زیاتر دەبێت.
بۆ سبەی لە پارێزگاکانی هەولێر و سلێمانی و هەڵەبجە و کەرکووک، بارانەکە زیاتر بە شێوەی بارانی بەهاری و تاوە بارانی کورتخایەن دەبێت، کە ئەمەش تایبەتمەندی کەشی ئەم وەرزەیە و دەبێتە هۆی ئەوەی بڕی باران لە ناوچەیەک بۆ ناوچەیەکی تر بە شێوەیەکی بەرچاو جیاواز بێت.
دوای تێپەڕبوونی كەمتر لە 24 سەعات بەسەر بانگەوازەكەی هەسەدە بۆ دەستگیركردنی ئەو كەسەی هێرشی كردبووە سەر سیمبولە كوردییەكان لە قامیشلۆ، دەستگیر كرا
ئاسایشی ناوخۆی قامیشلۆ بڵاویكردەوە، دوای چاودێرییەكی ورد و هەماهەنگی لەگەڵ دەزگاكانی ئاسایشی گشتی، بەرەبەیانی ئەمڕۆ هەڵیانكوتاوەتە سەر شوێنی نیشتەجێبوونی تۆمەتبار حسێن حەسۆ و دەستگیریان كردووە.
ئەم ئۆپەراسیۆنەش دوای ئەوە هات، تۆمەتبار لە گۆڕەپانی 'دەواری زۆری' لە شاری قامیشلۆ، سووكایەتی بە سیمبولە نەتەوەییەكان كردبوو، ئەمەش ناڕەزایەتییەكی زۆری لەسەر ئاستی جەماوەری و سیاسی لە رۆژئاوای كوردستان لێكەوتەوە.
ئاساییش ئاماژەی بەوە كردووە، لێكۆڵینەوە سەرەتاییەكان دەریانخستووە پاڵنەری ئەم كارە هەوڵێك بووە بۆ نانەوەی فیتنە و تێكدانی گیانی پێكەوەژیانی ئاشتییانە لە نێوان پێكهاتەكانی ناوچەكەدا.
لە كۆتایی راپۆرتەكەدا، فەرماندەیی ئاساییش جەختی كردووەتەوە كە پابەندن بە پاراستنی دەستكەوتە كۆمەڵایەتییەكان و لێپرسینەوە لە هەر كەسێك كە بیەوێت دەست بۆ ئاسایش و سەلامەتی هاوڵاتییان ببات.
بافڵ جەلال تاڵەبانی سەرۆکی یەکێتیی نیشتمانیی کوردستان، بەبۆنەی هەڵبژاردنەوەی وەک سەرۆکی رەوتی حیکمە پەیامێکی پیرۆزبایی ئاڕاستەی عەممار حەکیم کرد
دەقی پەیامەکە:
برای ئازیزم جەنابی سەید عەممار حەکیم، سەرۆکی ڕەوتی حیکمەی نیشتمانی، بەبۆنەی نوێکردنەوەی متمانەی ڕەوتی حیکمەی نیشتمانی بە بەڕێزتان وەک سەرۆکی ڕەوتەکە بۆ خولێکی نوێ، بە ناوی یەکێتیی نیشتمانیی کوردستانەوە گەرمترین پیرۆزباییتان ئاراستە دەکەین و هیوای بەردەوامیی سەرکەوتن و لێهاتووییتان بۆ دەخوازین لە ئەرکەکانی داهاتووتاندا.
نوێکردنەوەی متمانە بە جەنابتان، پشتگیرییە بۆ کاروانی سیاسی و بەهێزکردنی سەقامگیری، ئەوەش وامان لێدەکات چاومان لە هەماهەنگی و هاوکاریی زیاتری نێوان هێز و لایەنە نیشتمانییەکان بێت، بە شێوەیەک کە خزمەت بە هاووڵاتیان بگەیەنێت و ڕێڕەوەکانی چاکسازی و بونیادنان لە وڵاتدا بچەسپێنێت.
بافڵ جەلال تاڵەبانی
سەرۆکی یەکێتیی نیشتمانیی کوردستان
قوباد تاڵەبانی لێپرسراوی مەکتەبی سکرتارییەتی سەرۆک مام جەلال سەردانی دەڤەری سۆرانی کرد و لە رێورەسمی ئاڵوگۆڕکردنی لێپرسراوی مەڵبەندی دەڤەرەکە بەشداربوو
لە دوای سەردانەکەی بۆ دەڤەری راپەڕین و ئاڵوگۆڕ لە پۆستی مەڵبەندی ئەو دەڤەرە، قوباد تاڵەبانی، لێپرسراوی مەکتەبی سکرتارییەتی سەرۆک مام جەلال بۆ هەمان مەبەست سەردانی دەڤەری سۆرانی کرد و لە رێوڕەسمێکدا لە مەڵبەندی سۆران، هەڤاڵ خدر مستەفا ماڵئاوایی لە پۆستەکەی کرد و هەڤاڵ کاروان گەزنەیی وەک لێپرسراوی نوێی مەڵبەند دەستبەکار بوو.
قوباد تاڵەبانی لە وتارەکەیدا بە ناوی سەرۆک بافڵ و خۆی و هەموو سەرکردایەتیی یەکێتییەوە سوپاس و دەستخۆشی ئاراستەی هەڤاڵ خدر مستەفا کرد کە لە ماوەی کارکردنیدا وەک لێپرسراوی مەڵبەندی سۆران زۆر دڵسۆزانە ئەرکەکانی خۆی جێبەجێ کردووە. وتیشی: لەگەڵ ئەوەی کارکردن لە دەڤەری سۆران هەمیشە سەخت و پڕ لە تەحەدا و کێشە بووە، بەڵام کاک خدر بە هاوکاریی ئەندامانی مەڵبەند و کادران و دڵسۆزانی یەکێتی، زۆر سەرکەوتووانە سیاسەتی یەکێتی لە سنوورەکە جێبەجێ کردووە.
لێپرسراویی مەکتەبی سکرتارییەتی سەرۆک مام جەلال بە ناوی خۆی و سەرۆک بافڵ و سەرکردایەتیی یەکێتیشەوە پیرۆزبایی لە هەڤاڵ کاروان گەزنەیی کرد و رایگەیاند: کاک کاروان گەنجێکی پێگەیشتوو و دڵسۆز و بە توانای یەکێتییە و دڵنیاین بە هاوکاریی ئەندامانی مەڵبەند و کادران و جەماوەری یەکێتی سەرکەوتوو دەبێت لەم ئەرکە نوێیەیدا. پشتیوانیی خۆی و سەرۆک بافڵ و هەموو سەرکردایەتیی یەکێتیشی بۆ دەربڕی.
لە بەشێکی دیکەی وتارەکەیدا قوباد تاڵەبانی باسی لە سەنگ و پێگەی یەکێتی کرد لە کوردستان و عیراق و ناوچەکەدا و رایگەیاند: یەکێتی چیتر ئەو یەکێتییەی پێش چەند ساڵ نییە کە تەنیا بە کێشەکانی ناوخۆیەوە سەرقاڵ بوو، بەڵكو یەکێتی ئێستا بە سەرۆکایەتیی سەرۆک بافڵ یەکێکە لە هێزە هەرە کاریگەرەکانی عیراق و وەک یەكێتییەکەی سەردەمی مام جەلال، لە بەغداد رۆڵی گرنگ دەبینێت لە داڕشتنەوەی سیاسەت و کردنەوەی گرێکوێرەکان.
وتیشی یەکێتی ئێستا ئەو هێزەیە لە واشینتۆن و تاران و پاریس و مۆسکۆ و هەموو ناوەندە گرنگەکان حیساب بۆ بۆچوون و سیاسەتی دەکرێت.
لە رێوڕەسمێکدا لە مەڵبەندی راپەڕینی یەکێتیی نیشتمانیی کوردستان، بە سەرپەرشتیی قوباد تاڵەبانی، لێپرسراوی مەکتەبی سکرتارییەتی سەرۆک مام جەلال، گۆڕانکاری لە پۆستی لێپرسراوی مەڵبەندی راپەڕین کرا و هەڤاڵ جەزای سەید مەجید ماڵئاوایی لە پۆستەکەی کرد و هەڤاڵ حەیدەر سەعید وەک لێپرسراوی نوێ دەستبەکار بوو.
لە رێوڕەسمەکەدا، قوباد تاڵەبانی وتارێکی پێشکەش کرد و تیایدا دەستخۆشی لە هەڤاڵ جەزای سەید مەجید کرد کە لەگەڵ ئەوەی لە قۆناغێکی سەختدا ئەرکی لێپرسراوی مەڵبەندی راپەڕینی پێ سپێردرابوو، بەڵام بەهۆی دڵسۆزییەکەی و شارەزاییەکەی لە ئیدارەدان و هەروەها بەهۆی هاوکاریی ئەندامانی مەڵبەند و هەموو تێکۆشەرانی یەکێتی توانی بە شێوەیەکی زۆر سەرکەوتووانە پێگەی یەکێتی لە دەڤەرەکەدا بەهێزتر بکات.
وتیشی ئێستا کاک جەزا دەتوانێت بەوپەڕی سەربەرزییەوە ماڵئاوایی لە پۆستەکەی و لە دەڤەری راپەڕین بکات.
لێپرسراوی مەکتەبی سکرتارییەتی سەرۆک مام جەلال، پیرۆزباییشی لە هەڤاڵ حەیدەر سەعید کرد و رایگەیاند: لەناو ئەو هەموو کادر و خەڵکە دڵسۆزەی یەکێتی لە سنوورەکەدا هەیەتی، دەستنیشانکردنی کەسێکی نوێ بۆ ئەو پۆستە کارێکی ئاسان نەبوو، بەڵام پێگە و دڵسۆزی و ئەزموونی دەوڵەمەندی کاک حەیدەر هۆکار بوو بۆ دەستنیشانکردنەکەی.
وتیشی ئێمە دڵنیاین کە هەڤاڵ حەیدەر بە هاوکاری و کاری پێکەوەیی لەگەڵ ئەندامانی مەڵبەند و هەموو تێکۆشەران و یەکێتییە دڵسۆزەکانی سنوورەکە دەتوانێت لەم ئەرکەدا سەرکەوتوو بێت. لەمبارەیەوە پشتیوانیی سەرۆک بافڵ و خۆی و هەموو سەرکردایەتیی یەکێتیشی بۆ دەربڕی.
لە بەشێکی دیکەی وتارەکەیدا، قوباد تاڵەبانی ئاماژەی بە دۆخی ئێستای یەکێتی کرد و رایگەیاند: یەکێتی ساڵ لە دوای ساڵ لە سەر ئاستی کوردستان و عێراق و ناوچەکەدا پێگەی بەهێزتر دەبێت. وتیشی یەکێتیی ئێستا لە بەغدا بووەتەوە بە یەکێتییەکەی مام جەلال و کۆکەرەوەی هەموو لایەنەکان.
سەبارەت بە پێگەی یەکێتی لەسەر ئاستی نێودەوڵەتیش رایگەیاند، ئێستا یەکێتی بەهۆی سیاسەت و هەڵوێستەکانی چەند ساڵی رابردوو و هەروەها بەهۆی سەرکردایەتیی ژیرانەی سەرۆک بافڵەوە لە هەموو ناوەندەکانی بڕیاردانی ناوچەکە و جیهاندا گوێی لێ دەگیرێت و رۆژ لە دوای رۆژیش پێگەی لەسەر ئاستی نێودەوڵەتیدا بەهێزتر دەبێت.
بەبۆنەی شەهیدبونی سێ پێشمەرگەی حزبی دیموکراتی کوردستانی ئێران، شاناز ئیبراهیم ئەحمەد، پەیامێکی هاوخەمی بڵاوکردەوە .
لە پەیامەکەدا، شاناز ئیبراهیم ئەحمەد ئاماژەی بەوەکردوە، دیسان خاکی پیرۆزی کوردستان سێ رۆڵەی ئازیزی خۆی لە باوەش گرت و تێکەڵ بە کاروانی سەربەرزی شەهیدانی کردن.
دەقی پەیامەکەی شاناز ئیبراهیم ئەحمەد
بە داخ و کەسەرێکی زۆرەوە هەواڵی دڵتەزێنی شەهیدبوونی سێ پێشمەرگەی حزبی دیموکراتی کوردستانی ئێران (شاهین ئازەربەرزین - نەدا ئەمیری – سەمیرا ئەڵڵایاری)م بە هۆی هێرشی درۆنییەوە پێگەیشت.
دیسان خاکی پیرۆزی کوردستان سێ رۆڵەی ئازیزی خۆی لە باوەش گرت و تێکەڵ بە کاروانی سەربەرزی شەهیدانی کردن.
لەگەڵ دەربڕینی هاوخەمی قووڵی خۆم بۆشەهیدبوونی ئەو سێ رۆڵە تێکۆشەرە، هەزاران سڵاو بۆ رۆحی زیندوویان ئەنێرم. بەشداری لە خەمی بنەماڵەکانیان و خەمی هەموو خەڵکی کوردستان ئەکەم بۆ ئەم کۆستە گەورەیە.
شاناز ئیبراهیم ئەحمەد
کۆچەر تاهیر، سەرۆكی ئەنجومەنی كارگەكانی غازی سلێمانی رایگەیاند، قەیرانی غاز، کۆتایی دێت و پێش جەنگەکە 120 تۆن غاز دەهات بۆ سلێمانی لە ئێستادا زیادبوە بۆ 140 تۆن و ئاماژەی بەوەشکرد ئەمڕۆ لە ناو سلێمانیدا 35 هەزار بتڵی غاز بە کۆبۆنی خۆراک دابەش دەکەن .
کۆچەر تاهیر، سەرۆكی ئەنجومەنی كارگەكانی غازی سلێمانی لە لێدوانێكدا بە كوردسات نیوزی رایگەیاند، دڵنیایی دەدەن بە هاووڵاتیانی سلێمانی لە پێنج رۆژی داهاتوودا كۆتایی بە قەیرانی غازی ماڵان دێت و لە راۆژانی داهاتوشدا رۆژانە 20 هەزار بتڵ دابەشدەکەن.
کۆچەر تاهیر ئاماژەی بەوەشکرد، پێش جەنگەکە 120 تۆن غاز بۆ سلێمانی دەهات، بەڵام لە ئێستادا بۆ ئەوەی قەیرانەکە نەمێنێت ئەو بەشەی سلێمانی بۆ 140 تۆنی رۆژانە زیاد کراوە و بڕیاریشە لە سبەینێوە زیاتر بکرێت بۆ 160 تۆن، تاوەکو هەموو هاووڵاتیەک غاز لەبەردەم ماڵەکەیدا بەدەست بهێنێت.
لەبارەی دابەشکردنی غازیش بەکۆبۆنی خۆراک، ناوبراو بە کوردسات نیوزی راگەیاند، ئەمڕۆ 35 هەزار بتڵ غاز بە کۆبۆنی خۆراک دەدرێتە هاووڵاتییان و دڵنیایشیدا ئەگەر جەنگ دەستپێنەکاتەوە لە سەری مانگەوە بە بێ کۆبۆن غاز بۆ هاووڵاتیان وەک رابردوو بەردەست دەبێت.
کەشانسی هەرێم بڵاویکردوەتەوە، ئاسمان بە گشتی هەوری تەواو دەبێت و باران بارین دەستپێدەکاتەوە و بە گویریە پێشبینیەکان بارانەکە ترەزەشی لەگەڵدا دەبێت و پلەکانی گەرماش نزم دەبنەوە.
ئەمڕۆ شەممە، بەڕێوەبەرایەتی گشتی کەشناسی و بوومەلەرزەزانی هەرێم، پیشبینی 48 سەعاتی داهاتوی بڵاوکردەوە بە گوێرەی پێشبینییەکان، ئاسمان هەور دەبێت و لە ناوچە جیاجیاکان ئەگەری بارینی باران هەیە و پلەکانی گەرماش دوو بۆ چوار پلە بە راورد بە تۆمارکراوەکانی دوێنێ نزم دەبنەوە.
لەبارەی کەشی سبەینێشەوە، کەشانسی دەڵێت؛ ناسەقامگیری کەش بەردەوامی دەبێت، ئاسمان بە زۆری هەوری تەواو دەبێت و لێزمە باران لە زۆربەی ناوچەکان لە کاتی جیا جیا دەبارێت و هەورەبروسکەشی لەگەڵدا دەبێت.
کەشناسی ئاماژەی بەوەشکردوە، پلەکانی گەرما بەراورد بە تۆمارکراوەکانی ئەمڕۆ دوو بۆ سێ پلە نزم دەبنەوە.
بەرزترین پلەکانی گەرمای پێشبینیکراو بە پلەی سیلیزی
هەولێر؛ 20 پلەی سیلیزی
پیرمام؛ 16 پلەی سیلیزی
سۆران؛ 17 پلەی سیلیزی
حاجی ئۆمەران؛ 13 پلەی سیلیزی
سلێمانی؛ 19 پلەی سیلیزی
چەمچەماڵ؛ 20 پلەی سیلیزی
دهۆک؛ 19 پلەی سیلیزی
زاخۆ؛ 19 پلەی سیلیزی
هەڵەبجە ؛21 پلەی سیلیزی
گەرمیان؛ 25 پلەی سیلیزی
وەزارەتی تەندروستیی هەرێمی کوردستان لەبارەی کەیسی گیانلەدەستدانی 'غەزەل مەولان' راگەیەنراوێکی بڵاوکردووەتەوە و تێیدا هاتووە: دامودەزگاکانی تەندروستی هەمیشە پێویستە بە ئەرکی مرۆڤانەی پاراستنی گیانی هەرکەسێک هەڵبستن
دەقی راگەیەنراوەکە:
ڕاگەیاندراوێک لە وەزارەتی تەندروستی ...
دوابەدوای ڕەوانەکردنی بریندار (غەزال مەولان) لە نەخۆشخانەی (شۆڕش)ی دەزگای تەندروستی پێشمەرگە بۆ نەخۆشخانەی (بەخشین)ی کەرتی تایبەت و ئەنجامنەدانی ڕێککاری پزیشکی و وەرنەگرتنی لە نەخۆشخانە و دەرەنجام گیان لەدەستدانی.
وەزارەتی تەندروستی حکومەتی هەرێمی کوردستان ڕاستەوخۆ لەگەڵ تەندروستی سلێمانی لەسەر هێڵ بووە لەگەڵ داواکاری گشتی پاڵپشت بە یاسای مافی نەخۆش ژمارە 4 ی ساڵی 2020 و پەیڕەوی لێکۆڵینەوە ژمارە 16ی ساڵی 2022، ڕاسپاردەکراون بۆ لێکۆڵینەوەکردن بۆ ئەم دۆسیەیە بۆ ئاشکراکردن و دڵنیابوونەوە لەتەواوی ڕاستیەکانی ئەم ڕوداووە بۆ وەرگرتنی ڕێکاری یاسایی و بەسزا گەیاندنی سەرپێچیکاران کە بەدڵنیایی جێگای قەبوڵکردن نیە و ڕێکاری پێویست دەگیرێتەبەر.
دامودەزگاکانی تەندروستی هەمیشە پێویستە بە ئەرکی مرۆڤانەی پاراستنی گیانی هەرکەسێک هەڵبستن و نابێت بکەونە ژێر هیچ گوشار و نیازێکی سیاسی.
وەزارەتی تەندروستی
حکومەتی هەرێمی کوردستان
16 نیسان 2026
بافڵ جەلال تاڵەبانی دەنگۆی دیارنەمانی چەكی ئەمریكی لەلایەن كوردەكانەوە رەتدەكاتەوە و دەڵێت، دەتوانن بیسەلمێنن لە سلێمانییەوە هیچ چەكێك لە ئەمریكاوە وەرنەگیراوە و نەبراوە
بافڵ جەلال تاڵەبانی سەرۆكی یەكێتیی نیشتمانیی كوردستان لە چاوپێكەوتنێكدا لەگەڵ رۆژنامەنوسی بەریتانی پییرس مۆرگان لە وەڵامی بانگەشەی دۆناڵد ترەمپ بۆ ناردنی چەك و دیارنەمانیان لەلایەن كوردەكانەوە رایگەیاند، دەتوانین بیسەلمێنن هیچ كەسێك ئەو چەكانەی نەبردووە و لێپرسراوانی ئەمریكا دەتوانن لێكۆڵینەوە لەو بابەتە بكەن.
لە بەشێكی چاوپێككەوتنەكە سەرۆك بافڵ رایگەیاند، پێویستە ئەمریكا هەوڵی رێككەوتنێك بدات كە كێشەكان لە ریشەوە چارەسەر بكات و ئەمەش لە بەرژەوەندی كۆمارییەكان دەبێت، بەڵام دەبێت ئارامی لەسەر بگیرێت.
لە بارەی گۆڕینی دەسەڵاتی ئێرانەوە سەرۆكی یەكێتی نیشتمانی كوردستان وتی، هێرشە ئاسمانییەكانی سەر ئێران كاریگەری پێچەوانەی هەبووە و خەڵكی زیاتر یەكگرتووبوون و ناتوانرێت بە بۆردومانكردن سۆزی خەڵك رابكێشێت.
دەست لە كاركێشانەوەی رێبوار تەها لە پۆستی پارێزگاری كەركوك پەسەندكرا و محەمەد سەمعان بە پارێزگاری نوێ هەڵبژێردرا.
پەیامنێری كوردسات نیوز رایگەیاند، رێبوار تەها دەستی لە پۆستی پارێزگار كێشایەوە و محمد سەمعان بە دەنگی 12 ئەندامی ئەنجومەنی پارێزگا بە پارێزگاری نوێی كەركوك هەڵبژێردرا.
بڕیاریشە لە بەشی دووەمی كۆبوونەوەی ئەنجومەنی پارێزگاكە دەنگ لەسەر پۆستە ئیدارییەكانی تری پارێزگاكە بدرێت كە 13 پۆستیان بۆ یەكێتیی نیشتمانیی كوردستان یەكلاكراونەتەوە.
دوای هەڵبژاردنیشی بە پارێزگاری كەركوك، محەمەد سەمعان ستایشی هەڵوێستەكانی بافڵ جەلال تاڵەبانی سەرۆكی یەكێتی كرد و دوپاتیشیكردەوە درێژە بە كارە گرنگ و پڕ بایەخەكانی رێبوار تەها دەدات.
بەپێی زانیارییەكانی كوردسات نیوز، پۆستی جێگری سەرۆكی ئەنجومەنی پارێزگا و قائیمقامی قەزای ناوەندی كەركوك، قائیمقامی قەزای داقوق و سێ یاریدەدەر و پێنج راوێژكاری پارێزگار و فەرماندەی پۆلیسی كەركوك و بەڕێوەبەری ناحیەی قەرەهەنجیر بۆ كورد دەبێت.
كۆبوونەوەی ئەنجومەنی پارێزگای كەركوك بۆ ئاڵوگۆری پۆستی پارێزگار و ئەنجامدانی چەند گۆڕانكاریەك لە پۆستە ئیداریەكانی پارێزگاكە بەڕێوەدەچێت و رێككەوتن كراوە زۆرینەی پۆستەكان بۆ كورد بێت
بەپێی زانیارییەكانی كوردسات نیوز و بەپێی رێككەوتنی لایەنە سیاسیەكانی كەركوك، پۆستی قائیمقامی قەزای ناوەندی كەركوك، قائیمقامی قەزای داقوق و جێگری پارێزگاری كەركوك، سێ یاریدەدەر و پێنج راوێژكاری پارێزگار و فەرماندەی پۆلیسی كەركوك و بەڕێوەبەری ناحیەی قەرەهەنجیر، بۆ كورد دەبێت.
هەربەپێی زانیارییەكانی كوردسات نیوز، لێپرسراوانی كورد لە كەركوك هەمان دەستكراوەیی پێشوویان دەبێت لەڕوی راگەیاندنی پڕۆژە و خزمەتكردنی هاووڵاتیانی پارێزگاكە.
بەپێی رێككەوتنەكان هەر یەك لە ئاڤێستا شێخ محەمەد دەكرێت بە قائیمقامی ناوەندی كەركوك و عەدنان حوسێن، دەبێتە بە قائیمقامی قەزای داقوق.
وتەبێژی یەکێتی دەڵێت: ئاڵوگۆڕی پۆستی پارێزگاری كەركوك هیچ پەیوەندی بە سەرۆك كۆمارەوە نییە و ئاڵوگۆڕی پۆست پرۆسەیەكی دیموكراسییە.
کاروان گەزنەیی وتەبێژی یەکێتیی نیشتمانیی کوردستان لە کۆنفرانسێکی رۆژنامەوانیدا رایگەیاند، سوپاسی رێبوار تەها دەكەین بۆ ئەو كارانەی ئەنجامیداوە.
وتیشی، دەبێت راستگۆ بین لەگەڵ هاوپەیمان و خەڵكەكەمان و هەندێك لایەن لەسەر ئاڵوگۆڕی پۆستەكە شڵەژاون.
وتەبێژی یەکێتی ئەوەشی خستەڕوو، ئاڵوگۆڕی پۆستی پارێزگاری كەركوك هیچ پەیوەندی بە سەرۆك كۆمارەوە نییە و ئاڵوگۆڕی پۆست پرۆسەیەكی دیموكراسییە.
کاروان گەزنەیی دەشڵێت؛ با چەواشەكردنی میللەت كۆتایی بێت و ئێمە خەریكی چارەسەركردنی كێشە و پرسە نیشتمانییەكانین، ئەمەش سیاسەتی راستگۆ و حەكیمانەی سەرۆك بافڵە.
سەبارەت بە پێکهێنانی حکومەتی هەرێمیش رایگەیاند، لەسەر بنەمای كورسی گفتوگۆی پێكهێنانی حكومەت دەستپێدەكەینەوە و هیوادارین حكومەتی نوێی هەرێم كارا و خزمەتگوزار بێت.