کوردستان
بەپێی رۆژمێری رەسمی حکومەتی هەرێمی کوردستان بۆ ئەمساڵ، لە مانگی ئایاردا تەنها یەک رۆژ پشووی رەسمی تێدایە.
ساڵانە حکومەتی هەرێمی کوردستان رۆژمێری رەسمی بڵاودەکاتەوە و تیایدا بۆنە و پشووە رەسمییەکان دیاری دەکات.
بەپێی رۆژمێرەکە، بۆ مانگی ئایاری ئەمساڵ تەنها 1ی ئایار؛ بە بۆنەی رۆژی کرێکارانی جیهانەوە پشووی رەسمی دەبێت.
بەوپێیەش، رۆژی پێنجشەممەی ئەم هەفتەیە، لە سەرجەم دامودەزگا حکومی و ناحکومییەکانی حکومەتی هەرێمدا پشوو دەبێت و بەهۆی ئەوەی دوو رۆژی دوای ئەوە بەر رۆژانی هەینی و شەممە دەکەوێت کە پشووی هەفتەن، لە رۆژی 4ی ئایارەوە دەام دەست پێ دەکاتەوە.
کەشەشناسیی هەرێم پێشبینییەکانی کەشوهەوای ئەمڕۆ و سبەینێی بڵاوکردەوە و باس لەوە دەکات، سبەینێ لە بەشێک لە ناوچەکانی دەڤەری پشدەر ئەگەری تاوەباران و هەورەبروسکە هەیە.
کەشناسیی هەرێم رایگەیاند، ئەمڕۆ دووشەممە، ئاسمان بەگشتى نیمچەهەور دەبێت و پلەکانی گەرما نزیک دەبنەوە لە پلەکانی گەرمای دوێنێ، تەنها لە ناوچە شاخاوییەکان نەبێت نزم دەبنەوە.
کەشناسیی هەرێم راشیگەیاندووە، سبەینێ سێشەممە، ئاسمان نیمچەهەور دەبێت و لە ناوچە شاخاوییە سنووريیەکان هەوری تەواو دەبێت، لە کاتەکانی دوای نیوەڕۆ لە ناوچە سنووریيەکانی رۆژهەڵات و له هەندێک لە ناوچەکانی ده‌ڤه‌رى پشدەر ئەگەری کەمێک تاوەباران و بروسکە هەیە.
بەپێی پێشبینییەکانی کەشناسی، سبەینێش پلەکانی گەرما هاوشێوەی ئەمڕۆ دەبن.
بەرزترین پلەکانی گەرمای پێشبینیکراو بە پلەی سیلیزی بۆ سبەینێ بەم جۆرە دەبن:
هەولێر : 32 پلەی سیلیزی
سلێمانی : 28 پلەی سیلیزی
دهۆک : 28 پلەی سیلیزی
کەرکوک : 33 پلەی سیلیزی
زاخۆ : 29 پلەی سیلیزی
هەڵەبجە : 29 پلەی سیلیزی
سۆران : 25 پلەی سیلیزی
حاجی ئۆمەران : 17 پلەی سیلیزی
گەرمیان :35 پلەی سیلیزی
نوسینگەی رۆژنامەوانی سەعدی ئەحمەد پیرە دەنگۆی گۆڕانکارییکردنی لە پۆستی وتەبێژی یەکێتیی نیشتمانیی کوردستان رەتکردەوە.
نوسینگەی رۆژنامەوانی سەعدی ئەحمەد پیرە وتەبێژی یەکێتیی نیشتمانیی کوردستان بە کوردسات نیوزی راگەیاند، هەموو ئەو دەنگۆیانە رەتدەکەنەوە کە لە بەشێک لە سۆشیاڵ میدیادا باس لە گۆڕانکاری لە پۆستی وتەبێژی یەکێتی دەکەن.
ئاماژەی بەوەشکرد، بە بڕیاری مەکتەبی سیاسی یەکێتی، سەعدی ئەحمەد پیرە وتەبێژی رەسمی یەکێتییە.
دوێنێ، ئەنجومەنی سەركردایەتی یەكێتیی نیشتمانیی كوردستان بە سەرۆكایەتی بافڵ جەلال تاڵەبانی سەرۆکی یەکێتی، لە مەکتەبی سیاسی یەکێتی کۆبووەوە و لەدوای کۆبوونەوەکەش بەشێکی میدیاکان باسیان لە گۆڕانکاریی لە پۆستی وتەبێژی یەکێتیدا دەکرد.
پەیامنێری کورددسات نیوز باسی لەوەکرد، بەهۆی تەزووی کارەباوە کرێکارێک لە کەرکوک لە کاتی کارکردندا گیانی لەدەستدا.
پەیامنێری کوردسات نیوز ئاماژەی بەوەکرد، روداوەکە ئێوارەی دوێنێ رویداوە لە گەڕەکی تەپەی شاری کەرکوک.
وتیشی، کرێکارەکە ناوی ئاراس عەلی بووە و پیشەی تەختەبەستی سەربان بووە، لەکاتی کارکردندا بەهۆی بەرکەوتن بە تەلی کارەباوە، دوای گەیاندنی بە نەخۆشخانە گیانی لەدەستداوە.
ئاراس عەلی، دانیشتووی گەڕەکی رەحیماوا بووە و باوکی دوو منداڵ بووە.
بەرگری شارستانی هەولێر زانیاریی لەبارەی ئاگرەکەی دوێنێی رێستۆرانتێکی سەر رێگای پیرمام بڵاوکردەوە و ئاماژەی بەوەکردووە، کارمەندێکیان بریندار بووە و چارەسەری پێویستی بۆ کراوە.
ئێوارەی دوێنێ یەکشەممە، ئاگرێکی گەورە لەسەر رێگای پیرمام- هەولێر، لە ریستۆرانتێکی کۆمەڵگەیەکی گەشتیارییدا کەوتەوە.
بەپێی زانیارییەکانی بەرگری شارستانی هەولێر بڵاویکردووەتەوە، ئاگرەکە لە سەعات 5:22 خولەکدا کەوتووەتەوە و تیمەکانی بەرگری شارستانی گەیشتوونەتە شوێنی روداوەکە.
ئاماژەی بەوەشکردووە، پلانی تیمەکانیان ئەوە بوو ئاگرەکە زیاتر تەشەنە نەکات و نەگاتە خانووەکانی کۆمەڵگە نیشتەجێبوونەکە، دوای جێبەجێکردنی ئەو پلانە دەستیان کردووە بە کوژاندنەوەی ئاگرەکە و بەماوەی یەک سەعات و 30 خولەک و لەرێگای تیمی هەشت بنکەی بەرگری شارستانییەوە ئاگرەکە کۆنتڕۆڵ کراوە.
ئەوەش هاتووە، لە ئێستادا تیمەکانی دیکەی بەرگری شارستانی و لێکۆڵینەوە سەرقاڵی دۆزینەوەی هۆکاری کەوتنەوەی ئاگرەکەن.
سبەینێ یەکێتی و پارتی لە ئاستی باڵا لەسەری پرسی پێکهێنانی کابینەی نوێی حکومەت لە هاوینەهەواری دوکان کۆدەبنەوە.
سەعدی ئەحمەد پیرە وتەبێژی یەکێتیی نیشتمانیی کوردستان بە کوردسات نیوزی راگەیاند : سبەینێ لە هاوینەهەواری دوکان لە ئاستی باڵا یەکێتی و پارتی بەسەرۆکایەتی بافڵ جەلال تاڵەبانی و مەسرور بارزانی کۆدەبنەوە.
ئاماژەی بەوەشکرد، لە کۆبونەوەکەدا پرسی پێکهێنانی کابینەی نوێی حکومەت تاوتوێ دەکرێت و چاوەڕوان دەکرێت زۆر لایەنی گرنگی پەیوەیست بە پێکهێنانی کابینەی دەیەم یەکلابکرێتەوە.
ئیدارەی خۆبەڕێوەبەری لەباكور و رۆژهەڵاتی سوریا دەڵێت، یەكگرتوویی كورد بە هەنگاوێك بەرەو سوریایەكی یەكگرتوو و دیموكراسی دەبینێت.
ئیدارەی خۆبەڕێوەبەری لەباكور و رۆژهەڵاتی سوریا لە پەیامێكیدا بۆ بەڕێوەچوونی كۆنفرانسی یەكڕیزیی و هەڵوێستی كوردی لە رۆژئاوای كوردستان رایگەیاندوە، لەژێر رۆشنایی پێشهاتە ئەرێنییەكانی ئەو یەكگرتووییەی كورد، پابەندبوونی بە بەردەوامیدانی گفتوگۆكانیان لەگەڵ حكومەتی سوریا دووپاتدەكاتەوە، كە رێگەخۆشكەرە بۆ دەستەبەركردنی مافی هەموو پێكهاتەكان.
دەشڵێت، بە ئومێدەوە لە یەكخستنەوەی ریزی پێكهاتەكانی سوریا دەڕوانن، كە كاری لیژنەكانی دیالۆگ لەگەڵ سوریا بەرەوپێش دەبات و دەبێتە هۆی دامەزراندنی دەستوور و سەردەمێكی نوێ لە سوریا.
بە ئامادەبوونی د.لەتیف رەشید سەرۆک کۆماری عیراق و شاناز ئیبراهیم ئەحمەد خانمی یەکەم، دەزگای نوسەر و روناکبیر ئیبراهیم ئەحمەد، رۆژی شەممە، 26-4-2025 رێوڕەسمی خەڵاتی زێڕینی "بلە"ی لە شاری سلێمانی بەڕێوەبرد.
لە مەراسیمەکەدا هەریەک لە بافڵ جەلال تاڵەبانی سەرۆکی یەکێتیی نیشتمانیی کوردستان و قوباد تاڵەبانی جێگری سەرۆکی حکومەتی هەرێمی کوردستان و عەمار حەکیم سەرۆکی رەوتی حیکمەی نیشتمانی و محەمەد حەلبوسی سەرۆکی پارتی پێشکەوتن و رەیان کیلدانی سەرۆکی بزووتنەوەی بابیلۆن و عەبد سادە فورەیجی ئەمینداری گشتی نەهجی نیشتیمانی و ئیبراهیم بەحر علوم سەرۆکی دامەزراوەی عەلامەین و سەرکردە و سەرۆکی حزب و هێزە سیاسییە کوردییەکان و عێراقییەکان ئامادەی بوون.
لە رێوڕەسمەکەدا شاناز ئیبراهیم ئەحمەد خانمی یەکەمی عیراق وتارێکی پێشکەش کرد و رایگەیاند، سەرەڕای تێپەڕبوونی 25 ساڵ بەسەر کۆچی دوایی ئیبراهیم ئەحمەد، رۆژ لە دوای رۆژ گیانی ئەو لە هەموو کاتێک زیاتر لە ئێمە نزیکتر دەبێت ، راشیگەیاند؛ کاتێک تەماشای لاپەڕەکانی مێژوو دەکەین، دەبینین لە ماوەی سییەکانی سەدەی رابردوودا، لە نامیلکەی (کورد و عەرەب)دا، نوسەر و روناکبیر و خەباتگێڕ ئیبراهیم ئەحمەد پێشنیاری شەراکەتی راستەقینەی بۆ کورد و عەرەب کردووە بۆ ئەوەی بە هاوئاهەنگی و ئارامی لەسەر ئەم خاکە بژین. ئەم پێشنیازە لەو کاتەدا زەنگێکی ئاگادارکردنەوە بوو بۆ دەسەڵاتداران و هەر بەوهۆیەشەوە ئیبراهیم ئەحمەد لەسەر ئەوە دادگایی کرا . دوای سەدەیەک ئەم هاوبەشییە راستەقینەیە هێشتا بەدی نەهاتوە و رەنگدانەوەی نەهاتنەدی بۆتە هۆی دروستبونی کێشەی نێوان هەولێر و بەغداد .
هاوکات خانمی یەکەم داوای دۆزینەوەی چارەسەری ریشەیی کرد بۆ کێشە هەڵپەسێردراوەکانی نێوان حکومەتی ناوەند و حکومەتی هەرێم، بەتایبەت مەسەلەی موچەی فەرمانبەرانی هەرێم. هەروەها جەختیکردەوە لە گرنگی هەوڵدان بۆ گەڕاندنەوەی روفاتی ئەنفالکراوان بۆ کەسوکار و ئازیزانیان و قەرەبووکردنەوە و هێنانەدی دادپەروەریش بۆ کەسوکاری قوربانیانی بۆردومانکردنی هەڵەبجە بە چەکی کیمیایی.
لە وتارەکەیدا خانمی یەکەم جەختیکردەوە کە پێکەوەژیانی ئاشتیانە پێویستی بە بیرکردنەوەی باش هەیە، وەک ئەوەی روناکبیر و نوسەر ئیبراهیم ئەحمەد لە سەرەتای شەستەکاندا تێگەیشتووە، بەتایبەتی مەترسیی ماددەی سێی دەستووری کاتی ئەوسای عیراق، کە لە دوو ژمارەی رۆژنامەی (خەبات)دا لەسەری نووسیویەتی، کە خۆی سەرنوسەری رۆژنامەکە بوە بەهۆی ئەوەوە لەسەر ئەو بابەتە دادگایی کراوە کە نووسیویەتی، ئەوەی تا ئێستا دەیبینین ئەوەیە کە ئەو مادە و بڕگانەی لە دەستووری عیراقدا هەن بۆ پێکەوەژیانی ئاشتیانە نەک هەر فەرامۆش کراون بەڵکو هیچ کاریان پێ ناکرێت کە دەتوانن رێگەیەک بن بۆ گەیشتن بە پێکەوەژیانی راستەقینە، بەتایبەتی مەلەفی کەرکوک و ئەو ناوچانەی کە کەوتوونەتە چوارچیوەی مادەی (140)ی دەستوورەوە.
لە کۆتایی مەراسیمەکەدا خەڵات بەسەر ژمارەیەک کەسایەتی دیاری بوارە جیاوازەکاندا دابەشکرا.
بۆ پێزانینی هەڵوێستە نەمر و مرۆڤدۆستانەکانی و هەڵوێستی بەرانبەر نادادپەروەری و زوڵم و داکۆکیکردن لە گەلی کورد، خەڵاتێک پێشکەش بە خوالێخۆشبوو ئایەتوڵڵا سەید موحسین حەکیم (سڵاو و سەلامی خودای لەسەر بێت) کرا کە خەڵاتەکە لە لایەن سەرۆک کۆمار د.لەتیف رەشید پێشکەش بە سەید عەممار حەکیم سەرۆکی ڕەوتی حیکمەی نیشتمانی کرا.
خەڵاتێکی دیکە پێشکەش بە نووسەر ساڵح حسێن محەمەد کرا کە زیاتر لە 90 کتێبی جیاوازی بە زمانی کوردی نووسیوە و زیاتر لە حەوت هەزار وێنەی گرتووە کە لە شاری ئامودا لە رۆژئاوای کوردستان لە دایک بووە.
خەڵاتێکی دیکە بەخشرایە خاتوو زارا محەممەدی، خەڵکی پارێزگای سنەی ئێران، بۆ نووسین و هەوڵەکانی بۆ بڵاوکردنەوەی فەرهەنگ و زمانی کوردی.
مەراسیمەکە بریتی بوو لە پێشکەشکردنی خەڵاتی زێڕینی بلە بە هونەرمەند عوسمان کەمەنی بۆهۆرەو گۆرنیەکانی ناوچەی هەورامان.
هەروەها رێز لە تیپی وەرزشی ئامەد گیرا کە لە ساڵی 1972 لە باکووری کوردستان دامەزراوە. خەڵاتەکە لەلایەن قوباد تاڵەبانی پێشکەش بە سەرۆکی تیپی وەرزشیەکە کرا.
فەهیمە واحید تێکۆشەر و رزگاربووی هەڵمەتەکانی ئەنفال و جینۆساید و هێرشی کیمیایی، کە شەش منداڵی خۆی و یەکێک لە نەوەکانی بۆتە قوربانی، خەڵاتی زێڕینی بلەی پێ بەخشرا.
خەڵاتێکی دیکە بەخشرایە تێکۆشەری شەهید ئەفدۆ عەبدی، چالاکوانی دیاری خەڵکی کۆبانی کە بەشداری شۆڕشی گەلی سوریای کردبوو.
هەروەها خەڵاتێک لەلایەن شاناز ئیبراهیم ئەحمەدەوە پێشکەش بە ژەنەڕاڵ مەزلوم عەبدی فەرماندەی هێزەکانی سوریای دیموکرات کرا و لەلایەن بافڵ جەلال تاڵەبانی سەرۆکی یەکێتیی نیشتمانیی کوردستانەوە وەرگیرا.
یاسای بە پارێزگابوونی هەڵەبجە رەوانەی سەرۆكایەتی كۆماری عیراق كرا و وەزارەتی پلاندانیش نەخشەی سنوری پارێزگای هەڵەبجەی بڵاوكردەوە.
یاسای بە پارێزگابونی هەڵەبجە بەرەسمی رەوانەی سەرۆكایەتی كۆمار كرا، بەمەبەستی پەسندكردنی یاساكە لەلایەن سەرۆك كۆمارەوە، دوای پەسندكردنی یاساكەش لە رۆژنامەی وەقائعی عیراقی بڵاودەكرێتەوە و وەك 19هەمین پارێزگای عیراق دەناسێنرێت.
وەزارەتی پلاندانانی عیراقیش نەخشەی سنوری پارێزگاكەی پەسەندكردووە، بەپێی نەخشەكە سنوری پارێزگاكە ناحیەكانی سیروان و خورماڵ و بیارە و بەمۆ و قەزای ناوەندی هەڵەبجە دەگرێتەوە.
ئەوەش لە كاتێكدایە لە 14ی ئەم مانگەدا ئەنجومەنی نوێنەرانی عیراق بە زۆرینەی دەنگ هەڵەبجەی وەك 19هەمین پارێزگای عیراق پەسەندكرد.
ئێواره‌ی ئەمڕۆ لە عەممان، نێچیرڤان بارزانی، سەرۆکی هەرێمی کوردستان، لەگەڵ ئەیمەن سەفەدی، جێگری سەرۆکوەزیران و وەزیری دەرەوەی ئوردن، کۆبوەوە.
لە کۆبونەوەکەدا هەردوولا باسیان له بره‌ودانی زیاتر به پەیوەندییەکانی عێراق و هەرێمی کوردستان له‌گه‌ڵ ئوردن لە بوارە جیاجیاكاندا كرد، هه‌روه‌ها پێشهاتە ناوچەیی و نێودەوڵەتییەکانیان تاوتوێ كرد و جەختیان لەسەر گرنگیی هەماهەنگی بۆ پاراستنی سەقامگیری لە ناوچەکەدا کردەوە.
نێچیرڤان بارزانی سەرۆکی هەرێمی کوردستان وێڕای ده‌ربڕینی پێزانینی خۆی بۆ پەیوەندییه‌كانی هه‌رێمی كوردستان و عێراق له‌گه‌ڵ ئوردن، ستایشی رۆڵی ناوچەیی و هەوڵەکانی ئوردنی بۆ بەهێزکردنی ئاشتی کرد.
لەلای خۆشیەوە وه‌زیری ده‌ره‌وه‌ی ئوردن، وێڕای ده‌ربڕینی خۆشحاڵیی خۆی به سه‌ردانی سەرۆکی هه‌رێمی كوردستان، خواستی ئوردنی بۆ فراوانکردنی هاوکاری لەگەڵ عێراق و هەرێمی کوردستاندا، دووپات کردەوە.
ئەنجومەنی سەركردایەتی یەكێتیی نیشتمانیی كوردستانی بەسەرۆكایەتی بافڵ جەلال تاڵەبانی كۆبوەوە.
لەكۆبوونەوەكەدا كە ئەمڕۆ لە هۆڵی كۆبوونەوەكان لە مەكتەبی سیاسی ، لە سلێمانی بەڕێوەچوو ، ئەندامانی سەركردایەتی وێڕای دەربڕینی پشتیوانیان بۆ زیاد جەبار ئەندامی سەركردایەتی ، ستایشی ئارامی و دان بەخۆدا گرتنیان کرد.
هەروەها جەختکرایەوە كە دڵنیان دامودەزگا ئەمنییەكان رێكاری یاسایی و ئینزباتی پێویستیان گرتۆتە بەر بەرانبەر بەوانەی لە روداوی دوێنێدا پەلاماری پاسەوانەكانی زیادیان دا.
ئەنجومەنی سەرکردایەتی هەروەها دەستخۆشی لە سەرۆك بافڵ کرد سەبارەت بە بڕیاری دروستكردنی لیژنەیەك بۆ رێكخستنەوەو چاكسازی لە كاروباری هێزە ئەمنییەكانی تایبەت بە دەزگا حیزبی و مەدەنییەکان کە بڕیار وایە خودی زیاد جەبار سەرپەرشتی لیژنەی ناوبراو بكات.
هەروەها لە كۆبوونەوەکەدا دەربارەی گۆڕانكارییە ناوخۆییەکان بڕیاری پێویستی لە بارەوە درا.
کونسوڵی گشتی ئەمریکا لە هەرێمی کوردستان سەردانی مەزاری سەرۆک مام جەلالی کرد و تاجەگوڵینەی رێز و وەفای دانا.
ستیڤ بیتنەر کونسوڵی گشتیی کونسوڵخانەی ئەمریکا لە هەرێم سەردانی مەزاری سەرۆکی پێشوی عیراق سەرۆک جەلال تاڵەبانی لە سلێمانی کرد بۆ دانانی تاجەگوڵینەی رێز و وەفا.
ستیڤ بیتنەر ئاماژەی بەوەکرد، لەگەڵ ئەوەی وەک دەوڵەتمەدارێک بەوە ناسراو بوو کە دەیتوانی لەگەڵ گشت لایەنە سیاسیەکان کاربکات، لە هەمان کاتدا سەرۆک مام جەلال نموونەیەکی درەوشاوەی سەرکردایەتیکردن بوو بۆ گشت عیراق.
سوپای توركیا لە برادۆست بازگە دادەنێت و رێگریی لە هاتوچۆی دانیشتوانی ئەو ناوچەیە دەكات، پەكەكەش دەڵێت، سەرەڕای ئاگربەست هێرشەكانی توركیا بەردەوامن.
پەیامنێری كوردسات نیوز لە برادۆست رایگەیاند، سوپای توركیا لە ناوچەی گەروی سیران بازگەی داناوە و لێپێچینەوە لە دانیشتووانی ناوچەكە و ئەو كەسانە دەكات كە لەو رێگایەوە هاتوچۆ دەكەن.
سوپای توركیا بە دروستكردنی ئەو بازگەیە هاتوچۆی دانیشتووانی ناوچەی دەشتەهێرتی قەزای سیدەکان و گوندەكانی رووبەڕووی كێشە كردووەتەوە، هاوکات، رێگە نادرێت ئۆتۆمبێل لەو ناوچەیەدا هاتوچۆ بكات.
ئەو هەنگاوی توركیا لە كاتێكدایە، لە وەرزی بەهاردا سەدان كەس لە دانیشتووانی گوندەكان سەردانی ئەو ناوچانە دەكەن بە مەبەستی هێنانی گیای بەهارە.
هاوكات ناوەندی راگەیاندنی هێزەكانی پاراستنی گەل 'هەپەگە' بڵاوی كردووەتەوە، سوپای توركیا لە سێ رۆژی رابردوودا لە چیای جودی و ناوچەی زاپ هێرشی كردووەتە سەر گەریلا و بەهۆی هێرشەكانەوە دوو گەریلا گیانیان لەدەستداوە.
قوباد تاڵەبانی، لێپرسراوی مەکتەبی سکرتارییەتی سەرۆک مام جەلال، سەردانی زیاد جەبار، ئەندامی سەرکردایەتی و بەرپرسی مەڵبەندی یەکێتی لە سلێمانی کرد.
سەردانەکە پاش نیوەڕۆی ئەمڕۆ یەک شەمە بە بەمەبەستی گەیاندنی پەیامی سەرۆک بافڵ و هەواڵ پرسین بوو و هەڤاڵ زیادی دڵنیا کردەوە لەوەی رێکاری یاسایی دەگیرێتەبەر بەرامبەر بەو هەڵەیەی دوێنێ بەرامبەر پاسەوانەکانی ئەنجامدرا.
روداوێکی هاتوچۆ لەسەر شەقامی پشتێنەیی کەرکوک رویدا و بەهۆیەوە سێ کەس بریندار بوون.
پاشنیوەڕۆی ئەمڕۆ روداوێکی هاتوچۆ لەسەر رێگای شەقامی پشتێنەیی کەرکوک رویدا و بەهۆیەوە سێ کەس بریندار بوون و بۆ نەخۆشخانە گواستراونەتەوە.
روداوەکە بە جۆرێک بووە، بەپێی وتەی شایەتحاڵەکان بەهۆی تیژڕەوییەوە ئۆتۆمبێلی یەکەم کە لە جۆری پاجیرۆ بووە کۆنتڕۆڵی لەدەستداوە و خۆی کێشاوە بە دورگەی ناوەندی شەقامەکەدا، دواتر خۆی کێشاوە بە ئۆتۆمبێلێکی دیکەدا و وەرگەڕاوە.
لە ئەنجامی روداوەکەدا سێ سەرنشینی ئۆتۆمبێلی یەکەم بریندار بوون، وەک شایەتحاڵەکانیش باسی دەکەن، بەپێی ئەوەی ئەوان بینیویانە، یەکێکیان شانی دەرچووە و یەکێکی دیکەشیان بەهەمان شێوە شانی دەرچووە و پشتیشی زیانی پێگەیشتووە.
باسیان لەوەشکرد، ئۆتۆمبێلەکە شەش کەسی تێدا بووە و لە بەغداوە هاتوون.
بەشێوەیەکی گشتی دانیشتووانی ئەو شوێنە باس لەوەدەکەن، زۆرینەی روداوەکانی هاتوچۆ لەسەر ئەو شەقامە بەهۆی تیژڕۆیی و نەشارەزاییەوەیە، کە خەڵکی دەرەوەی کەرکوک شارەزای ئەو شەقامە نین و هەندێک جار خێرایی ئۆتۆمبێلەکانیان دەگاتە سەروو 150 کیلۆمەتر لە سەعاتێکدا، بەوهۆیەشەوە لەکاتی پێچکردنەوەیەک یان شتێکی کتوپڕدا کۆنتڕۆڵی دۆخەکەیان پێ ناکرێت.
قائیمقماییەتی سلێمانی هۆشداری "توند" دەداتە کارگەکانی دروستکردنی شیرینی و رایگەیاندووە، هه‌ر كارگه‌یه‌كی شیرینی كاكڵه گوێزی خراپبوو به‌كاربهێنێت، به‌جۆرێك سزا ده‌درێت جارێكی دیكه سه‌رپچی نه‌كاته‌وه.
قائیمقماییەتی سلێمانی رایگەیاندووە، لە گەڕانی لیژنەکاندا دەست بەسەر 817 کیلۆگرام کاکڵەگوێزی خراپبوودا گیراوە، ئاماژەی بەوەشکردووە، سەرەتا چوار کارتۆنی 10 کیلۆگرامی کاکڵەگوێزی خراپبوو؛ لە دوکانێکی شیرینیدا دەستی بەسەردا گیراوە، دواتر سەرچاوەکەی ئاشکرا کراوە.
قائیمقامییەتی سلێمانی روونیشیکردووەتەوە، دوای بەدواداچوونی لیژنەکان توانراوە لەناو بازاڕدا ئەو کۆگایە بدۆزرێتەوە کە کاکڵەگوێزەکانی هەبووە و دەست بەسەر 62 کارتۆن کاکڵەگوێزدا گیراوە، هەروەها کارگەی شیرینییەکە و خاوەنی کۆگاکەش رووبەڕووی رێکاری یاسایی دەکرێنەوە.
ئەوەش هاتووە، خاوەنی کۆگاکە بەنیاز بووە کاکڵەگوێزەکان بەسەر دوکانی شیرینییەکاندا ساغ بکاتەوە.
لەوبارەیەشەوە، ئازاد نه‌بی نوێنه‌ری به‌ڕێوه‌به‌رایه‌تی ته‌ندروستی له لیژنه‌كانی قائیمقامییه‌تی سلێمانی رایگه‌یاندووە، هه‌ر كارگه‌یه‌كی شیرینی كاكڵه گوێزی خراپبوو به‌كاربهێنێت، له‌لایه‌ن لیژنه‌كانه‌وه پسوڵه‌ی سه‌رپێچی بۆ ده‌كرێت و به‌جۆرێك سزا ده‌درێت جارێكی دیكه له شوێنه‌كه‌یدا سه‌رپچی نه‌كاته‌وه.
داواشی لە کارگەکانی شیرینی و هەویرەمەنی کرد، خۆیان له به‌كارهێنانی گوێزی خراپبو بپارێزن.