بەڕێوەبەرایەتی گشتی کەشناسی و بومەلەرزەزانی ھەرێم راگەیاند، لە ئەنجامی درێژبوونەوەی نزمە پاڵە پەستۆی دەریای ناوەڕاست، ھەرێمی کوردستان بە کەشێکی ناسەقامگیر تێدەپەڕێت، لە ئێوارەی ڕۆژی سێ شەممەوە شەپۆڵێکی بارانبارینی بەھێز تەواوی ناوچە جیاجیاکان دەگرێتەوە.

ئاماژەی بۆ ئەوەشکردوە، لە ماوەی ھاتنی ئەو شەپۆلەدا، لەشەوی سێ شەممە بارانبارین دەگۆڕێت بۆ بارانی مامناوەند و لەرۆژی چوارشەممە شێوازی دابارین دەگۆڕێت بۆ تاوە بارانی بەردەوام و بەھێز و بەرزبوونەوەی ئاستی ئاو لە ناوچە جیاجیاکانی ھەرێم، ھەروەھا ئەو شەپۆلە درێژدەبێتەوە بۆ رۆژی پێنج شەممە و شەپۆڵی بارانبارین تا رۆژی ھەینی بەردەوامی دەبێت بە لاوازی تەنیا لەسەر ناوچە شاخاوییەکان دەمێنێتەوە.

لە بەشێکی تری راگەیەنراوەکەدا ھاتووە، ئاستی بارانی پێشبینیکراو لە ناوچەکان لە ماوەی کاریگەری ئەو شەپۆلە لە سەرووی ٦٠ ملم دەبێت، لە ھەندێک ناوچە زیاتر دەبێت بە تایبەت بەشی رۆژھەڵاتی ناوچە شاخاوییەکانی ھەرێم.

ئومێد خۆشناو پارێزگاری ھەولێر داوای لە فەرمانگە پەیوەندیدارەکان کرد، بەیەک تیم لە کاتی دروستبوونی لەفاودا کار بکەن.

لە پارێزگای ھەولێر کۆبوونەوەی نێوان پارێزگار و لێپرسراوانی فەرمانگەکانی پارێزگاکە سەبارەت بە ئامادەکاریی بۆ کەمکردنەوەی زیانەکانی لافاو بەرێوەچوو.

تیایدا پارێزگاری ھەولێر دوای بەدواداچوونی بۆ سەرجەم ئەو ھەنگاو و ڕێکارانەی لە ماوەی ڕابردوودا لەلایەن فەرمانگە خزمەتگوزارییەکانەوە بۆ کەمکرنەوەی مەترسیەکانی ڕوودانی لافاو و چارەسەرکردنی ھۆکارەکانی دروست بوونی گیراوەتەبەر، ئەوەشی راگەیاند، پڕۆسەی پاککردنەوەی ڕێرەی ئاوی سروشتی باران و ئاوی قورس و کەند و سەرجەم چاڵەکانی ئاو وەرگرتن و مەنھۆلەکان و خاوێنکردنەوەی ئاوەڕۆکان و ھەموو ئەو شوێنانەی کە دەبنە ھۆکاری کۆبوونەوەی ئاو و مەترسی دروستبوونی لافاو لە سنووری پارێزگای ھەولێر بەردەوام دەبێت. ئەو ئامادەکارییانە لە کاتێکدایە کە ھۆشداریی دراوە بەرامبەر بە شەپۆلێکی بارانبارینی بەخور لە ھەرێمی کوردستان و عێراق کە ماوەی چەند رۆژێک دەخایەنێت.

دامەزراوەی سەرۆک جەلال تاڵەبانی لە چوارچێوەی بوارەکانی کارکردنیدا بایەخ دەدات بە پەرەپێدانی ئاستی خوێندن لە زانکۆکانی ھەرێمی کوردستان، پاش سەردانکردن ودرووستکردنی پەیوەندییەکانی  لەگەڵ باڵیۆزخانە و کونسوڵە گشتییەکانی وڵاتانی بیانی لە عێراق و ھەرێمی کوردستان، داوامان لێکردن کە چەند کورسییەکی خوێندن (سکۆلەرشیپ) بۆ دامەزراوەکەمان تەرخان بکەن بۆئەوەی بتوانین لەڕێگەی دامەزراوەکەوە سوودێکی باش بە زانکۆ و خوێندکارانی ھەرێمی کوردستان بگەێنین.

لەم چوارچێوەیەدا، کۆنسوڵی گشتیی وڵاتی چین لە ھەولێر لە دەستپێشخەرییەکدا ژمارەی پێنج کورسی بۆ خوێندنی ماستەر و دکتۆرا بە تەواوی خەرجییەکانییەوە لە وڵاتی چین بەخشی بە دامەزراوەی سەرۆک جەلال تاڵەبانی. دامەزراوەکەمان بە ھەماھەنگیکردن لەگەڵ زانکۆکانی سلێمانی، زانکۆی پۆلیتەکنیکی سلێمانی و زانکۆی کۆیە، ژمارەی کورسییەکانی لەنێوان زانکۆکاندا بەم شێوەی خوارەوە دابەشکرد:

زانکۆی سلێمانی (٢) کورسی.
زانکۆی پۆلیتەکنیک (٢) کورسی.
زانکۆی کۆیە (١) کورسی.

ئەو بوارانەی لەلایەن زانکۆکانەوە وەک بواری پێویست دیاریکراون بریتین لە:

Doctoral Program of Theoretical Economics (National Development) Peking University. (١)  seat. (زانکۆی سلێمانی)

Master Program on Traffic and Transportation Engineering, Beijing Jiaotong University. (١) seat. (زانکۆی سلێمانی)

Master program of Information and communication Engineering, Huazhong University of Science and Technology. (١) seat. (زانکۆی پۆلیتەکنیک)

Master program of Advanced Nursing Practice and Medical Technology in Developing Countries, Central South University, (١) seat. (زانکۆی پۆلیتەکنیک)

Master program of Industrial Engineering, Hunan University, (١) seat.(زانکۆی کۆیە)

خوێندکارانی زانکۆکانی سەرەوە دەتوانن لەڕێگەی زانکۆکانیانەوە داواکاری پێشکەش بە زانکۆکانیان بکەن بۆ ئەنجامدانی کاری پێویست وە ھەڵبژاردنی کاندیدانی شایستە بەپێی پێوەرەکانی زانکۆکانی ھەرێمی کوردستان و زانکۆکانی وڵاتی چین ئەنجام دەدرێت لەڕێگەی زانکۆکانی سەرەوە.

د. ئارام محەمەد وەزیری خوێندنی باڵا و توێژینەوەی زانستی ھەرێم بە رۆژنامەنووسانی راگەیاند، دەرماڵەی خوێندکاران یەکێکە لە مافە رەواکانی خوێندکاران و لە ماوەی رابردووشدا داوایانکردووە، بە یاسا لە پەرلەمانی کوردستان دەرماڵەی خوێندکاران زیادبکرێت.

وتیشی، پێشنیازیان کردووە دەرماڵەی خوێندکارانی ناوشار بکرێتە ١٠٠ ھەزار دینار و دەرماڵەی خوێندکارانی دەرەوەی شاریش بکرێت بە ١٥٠ ھەزار دینار، ئەو پێشنیازەشیان ناردووە بۆ ئەنجومەنی وەزیران بۆ ئەوەی لە پەرلەمان بە یاسا رێکبخرێت.

وەزیری خوێندنی باڵا ئاماژەی بەوەشکردووە، چاوەڕواندەکەن رەوشەکە لەباربێت، رەوشی دارایی باشتر بێت، بۆ ئەوەی خزمەتی زیاتری خوێندکاران بکرێت.

فەرماندەی گشتی ھەسەدە دەشڵێت، ئامانجێکی تری تورکیا ئەوەیە کە ھەوڵدەدەن بە بەئامانجگردنی کوردان، لە ھەڵبژاردندا سەرکەوتن بەدەستبھێننەوە.  

مەزڵوم کۆبانی جەختیشی کردەوە لەوەی، ھێرشەکەی تورکیا بێ ئەنجام بوو، ناڕەزاییەکی گەورەشی لەسەر ئاستی نێودەوڵەتی لێکەوتەوە و  ئەوە جاری یەکەم نییە تورکیا ئەوان بە ئامانج دەگرێت.

مەزڵوم کۆبانی سوپاسی ھەڵوێستی حکومەتی عێراق و ھاوپەیمانی نێودەوڵەتیشی کرد و رایگەیاند، خەباتی ئەوان لەپێناو یەکڕیزی و تەبای و شەڕی دژی داعش بەردەوام دەبێت. 

بەشدار حەسەن پارێزەر لە تۆڕی کۆمەڵایەتی فەیسبوک بڵاویکردەوە، بڕیاربوو ئەمڕۆ لە ئۆفیسی کەنەکە لە ھەولێر ژمارەیەک لە نوێنەرانی ھێز و لایەنەکان و کەسایەتییەکان کۆببنەوە و تەنھا راگەیەندروێکی ناڕەزایی دەربڕین بڵاوبکەنەوە سەبارەت بە بۆردوومانەکەی تورکیا بۆ سەر فڕۆکەخانەی نێودەوڵەتی سلێمانی، بەڵام ھێزە ئەمنییەکانی ھەولێر رێگریان کرد و رێگەیان نەدا کە کۆبوونەوەکە بکرێت. 

بەشدار حەسەن باسی لەوەشکرد کە، بەر لە بۆردوومانەکە، تورکیا گەشتەکانی لەگەڵ سلێمانی راگرت، ئەوانەش ئاماژەیەکی روونن بۆ قوڵی پەیوەندی و ھەماھەنگی ئەمنی و سیاسی نێوان ئەقەرە و ھەولێر. 

بەڕێوەبەرایەتی کەشناسی و بومەلەرزەزانی ھەرێمی کوردستان بڵاویکردەوە، ئەمڕۆ و سبەی ئاسمانی ھەرێم لەنێوان نیمچە ھەور و ھەوری تەواودا دەبێت و نمەباران دەبارێت.

ئارام عەلی، وتەبێژی بەڕێوەبەرایەتی بەرگری شارستانی سلێمانی بە کوردسات نیوزی راگەیاند، لەئەگەری ھاتنی ھەر شەپۆلێکی بەخوڕی بارانبارین تیمەکانیان لە بەڕێوەبەرایەتی بەرگری شارستانی دەکەوتنە حاڵەتی ئامادەباشییەوە بۆ ھاوکاریکردنی ھاوڵاتیان و کردنەوەی ئەو رێگایانە بەھۆی کۆبوونەوەی ئاو دادەخرێن.

ھاوکات بێوار عەبدولعەزیز، وتەبێژی بەرگری شارستانی دھۆک بە کوردسات نیوزی راگەیاند، بۆ ئەگەری دروستبوونی لافاو بەشێک لە تیمەکانیان خستوەتە حاڵەتی ئامادەباشییەوە، ئەگەریش کاریگەری بارانبارین زیاتر ببێت تەواوی تیمەکانیان دەگەڕێنەوە و ھاوکاری ھاوڵاتیان دەکەن.

ئەحمەد عەلی رۆژنامەنووس لەكاتی بەجێگەیاندنی ئەركی رۆژنامەوانی لەسەر چیای پیرەمەگروون كەوتەخوارەوە و گیانیلەدەستدا

دەقی پەیامەکەی مەکتەبی راگەیاندنی یەکێتیی نیشتمانیی کوردستان:

پرسە و سەرەخۆشی 

بەڕێزان بەڕێوەبەری گشتی و کارمەندانی کەناڵی nrt 
بەرێزان بنەماڵە و کەسوکاری کۆچکردوو 
بەداخەوە هەواڵی کۆچی دوایی وێنەگرو رۆژنامە نووس کاک ئەحمەد عەلیمان پێ گەشت  کە لەکاتی راپەڕاندنی ئەرکی پیرۆزی رۆژنامەوانیدا گیانی لەدەست دا. 

بەناوی مەکتەبی راگەیاندنی یەکێتیی نیشتمانیی کوردستانەوە سەرەخۆشی و هاوخەمی خۆمان بە ئێوە و ماڵباتی میدیایی  رادەگەیەنن و داواکارین لە خوای گەورە کۆچ کردوو بە بەهەشتی بەرینی شاد بکات و دوا کۆست و خەمی  هەمووان بێت ...  

مەکتەبی راگەیاندنی 
یەکێتیی نیشتمانیی کوردستان

مەزڵوم کۆبانێ لە تویتێکدا نوسیوێتی، دەستخۆشی لە گەلەکەمان دەکەین لە شاری سلێمانی، کە ھەڵوێست و کاردانەوەی راستەقینەیان بەرامبەر بە ئامانجگرتنی ئێمە و گروپی دژی داعش ھەبووە، دەشڵێت، خەڵکی سلێمانیان واناسیوە کە پارێزەری یەکێتی نیشتمانی گەلی کوردن و بەرگریکارن لە شۆڕشی رۆژئاوا. 

مەزڵوم کۆبانێ لە تویتێکی دیکەشدا ھیوای خواستووە، گەل و کەسەکان لە ھەرێمی کوردستان کاردانەوەی جەماوەری گونجاو بنوێنن بەرامبەر بە دەستدرێژییەکانی تورکیا. 

تاقیکردنەوەی نیشتیمانی پۆلی نۆی بنەڕەتی 
 
١- لەبەر بەرژەوەندی قوتابیان و خوێندکاران ، ئاگاداری (لیژنەی باڵای تاقیکردنەوەکان) م کردۆتەوە ، کە تاقیکردنەوەی نیشتیمانی پۆلی ٩ی بنەڕەتی لە خولی یەکەمدا ( ڕۆژ نا ڕۆژێک ) دابنێن . بەجۆرێک  لە رێکەوتی ٢٩ی ٤ی ٢٠٢٣ دەستپێبکات و لە  رێکەوتی ١٠ی ٥ی ٢٠٢٣ کۆتا تاقیکردنەوەی خولی یەکەم بێت ، و لەچەند رۆژی داھاتوو خشتەی تاقیکردنەوەکانی خولی یەکەم بڵاوبکەنەوە. 

٢- سەرپەرشتیاران بەشێوەیەکی چالاکانە ڕۆڵ دەگێڕن لە تاقیکردنەوەکان بە سەرپەرشتیارانی بنەڕەتی و ئامادەییەوە ، دابەش دەبن بەسەر قوتابخانەکان ( حکومی و ناحکومی ) و لە قوتابخانەکان و ھۆڵەکانی تاقیکردنەوە دەمێننەوە. 

٣- نابێت مامۆستایانی پۆلی نۆی بنەڕەت لە قوتابخانە (حکومی و ناحکومییەکان)  چاودێری ھۆڵەکانی تاقیکردنەوەی پۆلی نۆی بنەڕەتی بن. 

ئالان حمە سعید ێالح 
وەزیری پەروەردە 
   ٩ی ٤ی ٢٠٢٣

ھەرێم کەمال ئاغا سەرۆکی فراکسیۆنی یەکێتی لە ئەنجومەنی نوێنەران بە کوردسات نیوزی راگەیاند، سبەینێ وەفدێکی لیژنەی ئاسایش و بەرگری ئەنجومەنی نوێنەران دەگاتە سلێمانی بەمەبەستی بەدواداچوون و لێکۆڵینەوە لە ھێرشەکەی سەر فڕۆکەخانەی نێودەوڵەتی سلێمانی.

ئاماژەی بەوەشکرد، وەفدەکە لەلایەن عەباس زاملی سەرۆکی لیژنەی ئاسایش و بەرگرییەوە سەرۆکایەتی دەکرێت.

رۆژی شەممە، دوای رۆژێک لە ھێرشەکەی سەر فڕۆکەخانەی نێودەوڵەتی سلێمانی، لەسەر راسپاردەی محەمەد شیاع سودانی سەرۆک وەزیرانی عێراق، وەفدێکی باڵای عێراق بۆ لێکۆڵینەوە لە ھێرشەکە گەیشتە سلێمانی.

بزوتنەوەی گۆڕان لە راگەیەنراوێکدا سەبارەت بە ھێرشکردنە سەر فڕۆکەخانەی سلێمانی ئاماژەی بۆ ئەوەکرد، ئێوارەی رۆژی ھەینی لە ڕێگەی ھێرشی ئاسمانی و درۆنەوە، فڕۆکەخانەی نێودەوڵەتیی سلێمانی، بە ئامانج گیرا، بە توندی ئیدانەی ئەو دەستدرێژی و ھێرشە ناڕەوایە بۆسەر دامەزراوەیەکی مەدەنی و گرنگی وەک فرۆکەخانەی نێودەوڵەتی سلێمانی دەکات.

بزوتنەوەی گۆڕان داوا لە دامەزراوە رەسمییەکان دەکات، ھەموو ڕێکارێک بگرنەبەر، بۆ پاراستنی ئاشتی و ئاسایش و ئارامی پارێزگای سلێمانی و ھەرێمی کوردستان بەیەکەوە.

دەقی پەیامەکەی مەکتەبی سیاسی یەکێتی:

هێرش کردنە سەر فرۆکەخانەی  نێو دەوڵەتی سلێمانی ، پیلانێکی پێشوەختە بۆ دارێژراوی  مخابەراتی و جاسوسیانەی دەرەکی و ناوخۆییە کە هەروەک چاوساغی  هێنانی  لەشکری  داگیرکەرە بۆ نێو خاکی  هەرێمی کوردستان، بۆیە ئەم پەلاماردانە بە توندی ئیدانە دەکەین، چاوەرێ‌ بووین  لایەنی پەیوەندیدار لەبری پاساو هێنانەوەو ڕەویەتیدانی کوێرانە بەم تاوانە ، رێوشوێن و بەدواداچوون و سەرکۆنەی بکردایە، بەڵام وەک پیشەی رابردوییان کەمینیەکی خۆسەپێنی نێو پارتی، کە پەیوەندی ژێر بە ژێر و تایبەتیان هەیە، دەبنە چاوساغ و دام و دەزگاکانی حکومەت بۆ کاری هەواڵگری دەوڵەتان و تێکدانی ئاسایشی هەرێمی کوردستان و پارێزگای سلێمانی بەکاردێنن.

یەکێتیی نیشتمانیی کوردستان، هەمیشە  بروای بە یەکێتیی و یەکڕیزی خەڵک و لایەنە سیاسیەکانی کوردستان بووە، هەروەک ئامانجی بووە لەسەر ئاستی بەشەکانی تری کوردستانیش هاوکاری و هەماهەنگی و پەیوەندی دۆستانە هەبێت لەسەر بنەمای پاراستنی بەرژەوەندییە نەتەوەییەکان، هەروەک دەستدرێژی و هێرشکردنە سەر هەر ناوچە و پارێزگایەکی هەرێمی کوردستان بە تاوان دەزانێت و سەرکۆنەی دەکات، چونکە لەچوارچێوەی دیدی نەتەوەییانەی خۆی هەموو هەرێمی کوردستان بە پیرۆز دەبینێت و لەم پێناوەدا خەباتی نەپساوەی کردووە و خوێنی رشتووە.
روورەشی بۆ دوژمنانی کورد و دەستوپێوەند و چاوساغەکانیان


مەکتەبی سیاسی
یەکێتیی نیشتمانیی کوردستان

کاروان یاروەیس، ئەندامی ئەنجومەنی نوێنەرانی عێراق رایگەیاند، لەسەر بڕیاری محەمەد شیاع سودانی سەرۆکوەزیرانی عێراق، بڕیارە ئەمڕۆ وەفدێکی باڵای عێراق بە سەرۆکایەتی قاسم ئەعرەجی راوێژکاری ئاسایشی نەتەوەیی عێراق سەردانی سلێمانی بکات بە مەبەستی لێکۆڵینەوە لە ھێرشەکەی سەر فڕۆکەخانەی نێودەوڵەتی سلێمانی.

راشیگەیاندووە، بڕیارە ئەنجومەنی نوێنەرانی عێراقیش لیژنەیەکی تایبەت بە دەرخستن و ئاشکراکردنی ڕاستییەکان لە لیژنە پەیوەندارەکانی ئەنجومەنی نوێنەران پێکبھێنێت بۆئەوەی سەردانی سلێمانی بکات.

دەقی پەیامی بزووتنەوەی سەربەخۆییخوازانی کوردستان....

ڕژێمی تورکیا بە سەرۆکایەتی ئەردۆغان، لە ئێستادا چ لە ئاستی ناوخۆیی و چ لە ئاستی ناوچەیی و جیھانیدا، بە تایبەت لە پێوەندی بە پرسی کورد لە باکوور و ڕۆژئاوای کوردستان لە گەڵ شکستی گەورە بەرەوڕوو بۆتەوە و ھەر بۆیە لە بەرەبەری ھەڵبژاردنەکانی سەرۆک کۆماریی تورکیە دا، بە مەبەستی قەرەبووکردنەوە و حەشاردانی شکستەکانی و ھەروەھا بەلاڕێدابردنی بیروڕای گشتی،بە دروستکردنی قەیران و ئاڵۆزی دەیھەوێ جارێکی دیکە سەرۆکایەتی تورکیە بە دەستەوە بگرێتەوە.

ھێرشکردنە سەر فڕۆکە خانەی نێودەوڵەتی سلێمانی، جیا لەوەی کردەوەیەکی تیرۆریستیی ڕژیمی تورکیایە، تێیدا ئامانج تێکدانی ئەمنیەت و ئاسایش و دروستکردنی دووبەرەکی و ئاژاوە نانەوە لە نێوان ھێزە کوردستانیەکان و ھاوکات پێشێلکردنی ئاشکرای سەرەوەریی سیاسیی خاک و ئاسمانی ھەرێمی کوردسنانە و ھیچ پاساوێک ھەڵناگرێ.

بزووتنەوەی سەربەخۆییخوازانی کوردستان، جارێکی دیکە وێڕای مەحکوومکردنی ئەم کردەوە تیرۆریستیەی داگیرکەرانی تورک، لەم باوەڕە دایە: لە وەھا  ھەلومەرجێک دا کە داگیرکەرانی کوردستان ھەر جارە و بە بیانوویەک، سەرەوەرییەکانی گەلی کوردستان پێشێل دەکەن و ھەوڵی تێکدانی یەکڕیزیی نیشتمانیی  نەتەوەکەمان دەدەن، ئەرکی ھەموو ھێزە کوردستانیەکانە کە پاساو بۆ کردەوە تیرۆریستیەکانی داگیرکەرانی کوردستان نەھێننەوە و  وێڕای ئیدانەکردنی ئەم چەشنە ھێرشانە، ھەوڵی جیددیان لە پێناو یەکڕیزی و یەکگرتوویی ناوماڵی کورد بخەنە گەڕ و بەرژەوەندیی تەسکی حیزبی و تاکە کەسی نەکەنە قوربانیی بەرژەوەندیی باڵای نەتەوەیی.

شایانی باسە کە بە پێی سەرچاوەکانی ھەواڵ ئێوارەی ڕۆژی ھەینی ٧ی ئاوریلی ٢٠٢٣ی زایینی، فڕۆکە خانەی نێودەوڵەتی سلێمانی کرایە ئامانجی ھێرشی درۆنێکی سەر بە ڕژیمی تورکیە کە خۆشبەختانە زیانی گیانی لێنەکەوتەوە.

بزووتنەوەی سەربەخۆییخوازانی کوردستان
١٩ی خاکەلێوەی ٢٧٢٣ی کوردی
٨ی ئاپریلی ٢٠٢٣ی زایینی