بەڕێوەبەرایەتی کەشناسی و بومەلەرزەزانی ھەرێمی کوردستان لە راگەیەندراوێکدا ئاماژەی بەوە کردوە، لە ٤٨ سەعاتی داھاتوودا ئاسمان بە شێوەیەکی گشتی ساماڵ دەبێت لەگەڵ بوونی تۆز و خۆڵێکی کەم بە تایبەتی لە ناوچەکانی باشووری ھەرێم و ھەندێ کاتیش ئەگەری بەھێزبوونی کاریگەرییەکەی ھەیە و خێرایی باش لەسەرخۆ و مام ناوەند دەبێت.

ڕاشیگەیاند، ھەر لە ٤٨ سەعاتی داھاتوودا پلەکانی گەرما بەرز دەبێتەوە بە نزکەی ١ تا ٢ پلە بەراورد بە پلە تۆمارکراوەکانی ڕۆژانی پێشوو.

‎دەقی پرسەنامەکە: 

بەڕێزان خزمانی ھەشەزینی، خانەوادە و کەسوکاری خاتوو  نەغەدە شێخ عەزیز شێخ بابە عەلی

‎بۆ كۆچی دوایی خاتوو نەغەدە، هاوسەری كۆچكردوو د. مارف عومەر گوڵ، پرسە و هاوخەمی خۆمان ئاڕاستەی بەڕێزتان دەكەین و خۆمان بە هاوبەشی خەمتان دەزانین.

‎لەخوای گەورە داواكارین رۆحی كۆچكردوو بە بەهەشتی بەرین شاد بكات و سەبووری بە هەموولایەك ببەخشێت.

‎دڵسۆزتان 
‎بافڵ جەلال تاڵەبانی 
‎سەرۆکی یەکێتیی نیشتمانیی کوردستان 
‎١٢ی ئابی ٢٠٢٢

ڕێکخراوی مافی مرۆڤی ھەنگاو رایگەیاند، کۆڵبەرەکە ناوی "عەبدوڵا حەجەری"یە و خەڵکی شاری بانەیە و لە دەوروبەری گوندی ھەنگەژاڵە لە سنووری شاری بانە، لە نزیکەوە بە چەکی ساچمەیی تەقەی لێکراوە و بە سەختی بریندارە. دواتر بەھۆی سەختی برینەکەی رەوانەی ناوەندە پزیشکییەکانی تەبرێز کراوە.  

بەپێی راپۆرتێکی ڕێکخراوی مافی مرۆڤی ھەنگاو، حاڵەتەکانی تەقەکردن لە کۆڵبەران زیادی کردووە و مانگی ڕابردوو ٣٧ کۆڵبەر و کاسبکار لە سنوورەکانی کوردستان بە تەقەی ھێزەکانی ئێران بوونەتە قوربانی

ژەنەراڵ جۆن برێنان فەرماندەی گشتی ھێزەکانی ھاوپەیمانی نێودەوڵەتی دژی داعش رایگەیاند، لەگەڵ نوێنەرانی خۆجێیی مەترسییەکانی پەرەسەندنە سەربازییەکانی ئەمدواییەیان لە ڕۆژئاوای کوردستان خستوەتەڕو.

ژەنەراڵ برینان داوایکردوە لەسەرجەم ھاوپەیمانەکانیان پارێزگاری لە بەردەوامی ھەڵمەتەکانی رووبەرووبوونەوەی تیرۆرۆ بکەن.

 د. ھێمن میرانی بەڕێوەبەری گشتیی دیوانی وەزارەتی ناوخۆ ڕایگەیاند،  ھەموو شوێنە فەرمی و نا فەرمییەکانی فرۆشتنی چەکی بێمۆڵەت داخراون، لە جێگەی ئەوە شوێنێکی مۆدێرن دابین دەکرێت و بەشێوەیەکی سنوردار کڕین و فرۆشتن و چاککردنەوەی چەکی تێیدا ئەنجام دەدرێت.

وتیشی، ژمارەی ئەو چەکانەی دەستی بەسەردا داگیراوە زۆر نین، ماوەی ساڵێکیش دانراوە بۆ ئەوەی ھاوڵاتیان چەکە بێمۆڵەتەکانیان ڕادەست بکەن.

میرانی ئاماژەی بەوەشکرد، بڕیار ھەیە بۆ ئەوانەی کە لە ھێزەکانی ناوخۆ و پۆلیس کار دەکەن، تا لە دوای دەوامی فەرمی چەکەکانیان لە شوێنێکی تایبەت دابنێن بۆ ئەو مەبەستەش دەست بە زەمینەسازی و ئامادەکاری کراوە و ساڵێک دانراوە بۆ پڕۆسەی دروستکردنی کۆگای چەک بۆ ئەوەی ئەو کارمەندانەی دەوامیان تەواو دەبێت چەکەکانیان دابنێن تاوەکو دەگەڕێنەوە دەوامی خۆیان.

بافڵ جەلال تاڵەبانی سەرۆکی یەکێتی نیشتیمانی کوردستان لەبەردەم کەسی یەکەمی حزبەکان و جێنین پلاسخارت، نوێنەری تایبەتی سکرتێری گشتی نەتەوە یەکگرتووەکان لە عێراق بەراشکاوی باسی ئەو گرفتانەی کرد و رایگەیاند، ناکرێت لە سلێمانی گرفتی موچە ھەبێت و ئەوان وەک حزب پارە بۆ دەرماڵەی خوێندکار و کۆمپانیاکانی پاککەرەوە دابین بکەن.

دوای کۆبونەوەکەش سەرۆکی یەکێتی بە کوردسات نیوزی راگەیاند، باسیان لە خراپی دۆخی سلێمانی کردووە و جەختیان لەوەکردوەتەوە پێویستە سەرجەمیان چارەسەر بکرێن.

سەرۆکی یەکێتی بەئاشکرا ھۆشداری ئەوەیداوە گەر بێت و ئەو گەمارۆیەی لەسەر سلێمانی ھەیە بەردەوامبێت ئەوا ئەگەری ھەیە یەکێتی لە حکومەتی ھەرێم بکشێتەوە.

لەبارەی بەڕێوەچوونی ھەڵبژاردنیشەوە، سەرۆک بافڵ جەلال تاڵەبانی رایگەیاند، ئەوان لەگەڵ بەڕێوەچوونی ھەڵبژاردنن بۆ رۆژی ھەڵبژاردنیش کات دیارینەکراوە، چونکە ھێشتا کاتیان لەبەردەست ماوە.

دوای کۆبونەوەکە، دەنگۆی ئەوە بڵاوکرایەوە سەرۆک بافڵ جەلال تاڵەبانی لە کۆبونەوەکە باسی ئەوەی کردووە گوایە ھەوڵی تیرۆکردنی دراوە، بەڵام سەرۆکی یەکێتی ئەو دەنگۆی رەتکردەوە و ئاماژەی بەوەکرد، ھەوڵی تیرۆرکردنی نەدراوە، بەڵکو تەنھا چاودێری کراون.

ھاوکات عەبدولستار مەجید ئەندامی ئەنجومەنی سیاسی کۆمەڵی دادگەری کوردستان کە بەشداری کۆبونەوەی لایەنەکانی کردبوو رایگەیاند، لە کۆبونەوەکەدا سەرۆکی یەکێتی باسی لە ئابڵوقەی ئابوری بۆ سەر سلێمانی کردووە کە بۆچی دەبێت ئەوان پارە بۆ چارەسەری گرفتەکانی دابینبکەن، وتیشی، سەرۆکی یەکێتی وتویەتی، ئەگەر ھەر حزبەکەی پارەی خزمەتگوزارییەکان دابین بکات ئەوا بیریان لەوەکردوەتەوە لە حکومەت بکشێنەوە.

وەک دانیشتوانەکەی باسی دەکەن، ماوەی چەند ساڵێکە حکومەتی ھەرێم پارێزگای سلێمانی و دەوربەری پشتگوێخستووە ئەوەش وایکردووە چەندین گرفتی جۆراوجۆر لە سنورەکەیان سەرھەڵبدات، بەڵام سەرباری گەمارۆکانی حکومەت، زۆرکات بە بڕیاری سەرۆک بافڵ جەلال تاڵەبانی پارەی پێویست بۆ چارەسەری کێشەکانی سلێمانی تەرخانکراوە.

ئێستاش سەرۆکی یەکێتی دەیەوێت حکومەت بەئەرکی خۆی ھەستێت و ھاوشێوەی ناوچەکانی دیکە چارەسەری ئەو گرفتانە بکات کە لە بەشێکی کەرتی حکومی سلێمانیدا دروستبوون.

بەشدار حەسەن سەرۆکی تیمی پارێزەرانی دەستگیرکراوانی بادینان بە کوردسات نیوزی راگەیاند، دوو پارێزەرییان سەردانی چاکسازی گەورانی ھەولێریان کردووە بۆ لای دەستگیرکراوە مانگرتووەکانی بادینان و ئاگاداربوون لە چۆنیەتی بەڕێوەچوونی کارەکانیان.

 وتیشی، چاوەڕواندەکەن ئەمڕۆ داواکاری گشتی بۆچوونی خۆی بدات سەبارەت بە چارەنووسی دەستگیرکراوە مانگرتووەکانی بادینان.

جەختی لەوەشکردەوە، کارەکانی ئەو دەستگیرکراوانە زۆر بە سستی بەڕێوەدەچن و ئەگەر بڕیارێکیان لەبارەوە نەدرێت، مەترسی لەسەر ژیانیان دروستدەبێت.

ماوەی دوو ھەفتەیە پێنج دەستگیرکراوی شیلادزێ دژی ئازادنەکردنیان بەمەرج مانیان لە خواردن گرتووە و رەوشی تەندروستیان خراپە.

د. پێشڕەو حەمەجان یاریدەدەری سەرۆکی زانکۆی سلێمانی بۆ کاروباری خوێندکاران بە کوردسات نیوزی رایگەیاند، ئەمڕۆ ئەنجوومەنی زانکۆی سلێمانی کۆدەبێتەوە بۆ گفتوگۆکردن سەبارەت بە جێبەجێکردنی سیستمی یەکپۆشی و ھەروەھا داتاکانی سەرەتایی خوێندکارانیش لەسەر یەکپۆشی لەنێو زانکۆ دەخرێنەڕوو.

ئەوەش لە کاتێکدایە کە رۆژی چوارشەممە سەرۆکی زانکۆی سەڵاحەدین ڕایگەیاند، بۆ ساڵی نوێی خوێندن سیستمی یەکپۆشی خوێندکاران لەھەموو کۆلێژەکان جێبەجێدەکەن و ھەر خوێندکارێکیش پێوەی پابەندنەبێت سزادەدرێت.

دەقی پەیامەکە:

پەیامێک لە تیمی پارێزەرانی سزادراوانی بادینان بۆ ھەردوو بەڕێزان وەزیری کار و کاروباری کۆمەڵایەتی و وەزیری ناوخۆی حکومەتی ھەرێمی کوردستان :

سڵاووریز..

بەپێی یاسا دەبێ ئیدارەی چاکسازی لە دەست فەرمانبەری مەدەنی بێت نەک ئەفسەری سەربازی ھەروەک لە ھەمو چاکسازییەکانی گەوران و ئافرەتان و منداڵان لەسەرتاسەری ھەرێمی کوردستان گشت بەڕێوەبەرەکان فەرمانبەری مەدەنیین و سەر بە وەزارەتی کار و کاوباری کۆمەڵایەتین ، ناکرێ و سەرپێچی یاسایە کە بەڕێوەبەرایەتی چاکسازی گەورانی ھەولێر لەدەست ئەفسەری سەربازی بێت بۆیە داواکارین لە ھەردوو بەڕێزتان کە ئەم بەڕێوەبەرایەتیە بگەڕێندرێتەوە بۆ وەزارەتی کار و کاروباری کۆمەڵایەتی و تاکو لەژێر یاسا و ڕێنماییەکانی بەرکاری وەزارەتی کار و کاروباری کۆمەڵایەتی ئیش و کارەکانی سزادراوان و پێشکەش کردنی خزمەتگوزاری و مامەڵەکردن لەگەڵ سزادراوان و کەس و کاریان و پارێزەرانیان بە ڕێڕەوی یاسایی خۆی دابڕوات .  لەگەڵ ڕێزدا 

تیمی پارێزەرانی داکۆکیکار لە ڕۆژنامەنوس و چالاکوانانی سزادراوی بادینان 
١١/٨/٢٠٢٢

لە راگەیەندراوێکی ھاوبەشدا ٣٠٨ رۆشنبیر و ئەکادیمی و رۆژنامەنووس و نوسەر و ھونەرمەندی تورکی دژایەتی خۆیان بۆ ئۆپراسۆنە چاوەڕوانکراوەکەی تورکیا بۆ سەر رۆژئاوای کوردستان دەردەبڕن و ئیدانەی ھێرشەکانی تورکیاش دەکەن بۆ سەر ھەرێمی کوردستان. 

لە راگەیەندراوەکەدا ئەوەشیان خستووەتەڕوو، بیانوی تورکیا بۆ روبەڕوبوونەوەی ھەڕەشەکان لەڕێی ئەو ئۆپراسیۆنەوە تەنھا پاساوێکە کە ھاوپەیمانی دەسەڵاتدار دروستیکردووە. دەشڵێن ئەو ئۆپراسیۆنە سودی بۆ ھیچ کەسێک نابێت جگە لە دەسەڵاتدارانی تورکیا، بەڵکو زیانیشی بۆ گەل دەبێت. 

رۆشنبیرانی تورکیا راشیانگەیاندووە، تەرخانکردنی پارە بۆ چەک و جەنگ لە وڵاتێکدا کە ملیۆنان کەس لە ھەژاریدا دەژین، کێشە ئابورییەکان و قورسی ژیان زیاتر دەکات، ھەروەھا رەخنەشیان لە ھاوپەیمانی ئۆپۆزسیۆن گرتووە کە ھەڵوێستێکی توند نییە و دەڵێن ئەگەر ھەڵوێستی جدی رانەگەیەنن، ئۆپۆزسیۆنیش دەستی دەبێت لەو ئۆپراسیۆنەدا.

بەکر عەلی سەرۆکی کۆمەڵەی پەنابەرە گەڕاوەکانی ئەوروپا لە کۆنفرانسێکی رۆژنامەوانیدا دوایین زانیاری لەبارەی نقومبوونی بەلەمەکەی دەریای ئیجە ئاشکراکرد و رایگەیاند، ئەو ٩٣ کۆچبەرە کە کورد و ئەفغانی و ئێرانین و سێ بەشیان خەڵکی ھەرێمی کوردستانن.

وتیشی، تائێستا ٢٩ لە کۆچبەرەکان رزگارکراون کە لە رەگەزی نێرن و ٦٤شیان بێسەروشوێن و تائێستاش گەڕان بەدوایاندا بەردەوامە.

 

محەمەد شوکری سەرۆکی گشتی دەستەی وەبەرھێنانی ھەرێم بە کوردسات نیوزی راگەیاند، لەئێستادا دابەشکردنی یەکەکانی نیشتەجێبوون بەپێی پارێزگا و ئیدارە سەربەخۆکان تەواوبووە کە ھەر ناوچەی چەند یەکەی نیشتەجێبوونی بەردەکەوێت.

وتیشی، لە زۆربەی شوێنەکان زەوی بۆ دروستکردنی یەکە نیشتەجێبووەکان تەرخانکراوە و لیژنەکانیش بەردەوامن لە کارەکانیان بۆ دەستنیشانکردنی وەبەرھێنەرەکان، بۆیە ھەموو ھەوڵەکان چڕکراوەنەتەوە تا مانگی ئەیلولی داھاتوو دەست بەدروستکردنی یەکەکان بکرێت.

وتیشی، ٢٠ ھەزار یەکە نیشتەجێبووەکە لە ھەموو ھەرێم بۆ کرێچی و کەمدەرامەتان دروستدەکرێن، لەو چوارچێوەیەشدا ١٢٠ ھەزار فۆرم پڕکراوەتەوە، لەلایەن لیژنەکانەوە لە پارێزگاکان و ئیدارە سەربەخۆکان فۆڕمەکان جیادەکرێنەوە، بۆ ئەوەی خەڵکی شایستە دیاریبکرێن.

شیخ حسێن حەمەساڵح نوێنەری دەزگای لوتکە لە وڵاتی یۆنان رایگەیاند، سەرجەم ئەو کۆچبەرانەی ڕزگار بووی ڕووداوەکەن ھیچیان نە ھاوڵاتی کوردن نە عێراقین، بەمەبەستی دیاریکردنی ناسنامەی بیسەرووشوێنبووانی ئەو ڕووداوە پۆلیسی دەریاوانی کەناراوەکانی یۆنان ڕایگەیاندووە لە ئیستادا ھیچ زانیارییەکی رەسمی لەبەر دەست نییە، کە بێسەرووشوێنبووەکان ھاوڵاتی عێراقی بن.

ئاری جەلال سەرۆکی دەزگای لوتکەش رایگەیاند، تا ئێستا ھیچ خانەوادەیەکی عێراق و کورد ناو و ناسنامەی کەسوکاریان لە ئۆفیسی سەرەکی و نوێنەرایەتییەکانی لوتکە تۆمار نەکردووە.

وتیشی، لەکاتی ھەر ڕووداوێک لە ماوەی ساڵانی ڕابردوو لە ڕێگەی کۆچی نایاسایی کە ڕوویدابیت کاتی ویستوە بۆ پشتڕاستکردنەوەی ناسنامەی قوربانییەکان بەو پێیەی سەرجەم کۆچبەرانی بە نایاسای کۆچ دەکەن و ھیچ لایەنێکی رەسمی ئاگادار نییە لە بوونی ژمارەی دروست لە ناو یەختەکان و ناسنەمی ڕاستەقینەیان.

دەزگای لوتکە کەسوکاری کۆچبەرانی کورد و عێراقی ئاگادار دەکاتەوە کە نەکەونە داوی ھیچ گروپ و باندێک بەناوی لایەنی پەیوەندیدار تایبەت بە کۆچبەران و پەنابەران کە سۆرەخی ڕۆڵەکانیان بۆ بکەن.

لەمەڕاسیمەکەدا کەلەلایەن رێکخراوی پەرەپێدانی بیری نوێ وبەشی گەنجانی نوسینگەی جێگری سەرۆک وەزیران رێکخرابوو و ئەمڕۆ پێنج شەممە ١١/٨ لە سلێمانی بەڕێوەچوو، قوباد تاڵەبانی رایگەیاند، کاتێ باسی داھێنانی تەکنەلۆژیا دەکەین بیرمان دەچێ بەلای وڵاتە پێشکەوتوەکان، بەڵام ئێوە ئەوەتان رەتکردووەتەوە و سەلماندووتانە کەگەنجەکانی خۆمان، کوڕان و کچانی کوردستان دەتوانن داھێنەربن.

وتیشی، دەرفەتێکمان بۆ رەخساوە کەببینە ناوەندێک بۆ داھێنانی تەکنەلۆژیا بۆ کوردستان و عێراق و ناوچەکە، چونکە کۆمەڵگەیەکی گەنج و توانایەکی مرۆیی بەھێزمان ھەیە و بەلای کەمەوە دەتوانین ببینە ناوەندێک بۆ داھێنانی تەکنەلۆژیا لەرۆژھەڵاتی ناوەڕاست. 

جێگری سەرۆکی ئەنجومەنی وەزیران جەختی کردەوە کە بازاری کوردستان بازارێکی فراوانە و دەرفەتێکی گەورەیان لەبەردەستدایە، چونکە تەکنەلۆژیا رۆڵێکی گرنگ دەبینێت لە دروستکردنی ئابورییەکی بەھێز لەکوردستان، وتیشی، بۆ ئەمەش ھاوکارتان دەبین و ھانی کۆمپانیا گەورەکان دەدەین تا پشتیوانتان بن.

قوباد تاڵەبانی بەبەشداربوانی تێک فێستی راگەیاند، داھێنانەکانتان رۆڵێکی گرنگ دەبینێت لەبەھێزکردنی کەرتی تایبەت و زیادکردنی ھەلی کار چونکە دەزانین نەوت و گاز ھەمیشەیی نیە و رەنگە لەئایندەدا نەمێنێت ئەوکات زیاتر پێویستمان بەداھێنانی تەکنەلۆژیا دەبێت.

ھەر لەبارەی گرنگی تەکنەلۆژیاوە، قوباد تاڵەبانی ئاماژەی بەکاریگەریی گۆرانکارییەکانی کەشوھەوا و ژینگە کرد و وتی، کاتێ کەدەڵێین دەمانەوێ کوردستان سەوز بکەینەوە خۆمان  لەبەردەم تەحەدایەکی گەورەدا دەبینینەوە کە وشکەساڵییە و دەشزانین کەناتوانین بەسیاسەتی کۆن تێی پەڕێنین و پێویستمان بەداھێنانە لەبواری ئاودێری و بیرۆکەی نوێ بەپشتیوانی تەکنەلۆژیا. 

لەکۆتایی وتەکانیدا قوباد تاڵەبانی جێگری سەرۆکی ئەنجومەنی وەزیران دووپاتی کردەوە کە؛ دەکرێ سەرەڕم بن بۆ رووبەرووبونەوەی رکابەرییەکان و چارەسەری ئەو بۆشاییانەی ئەمرۆ ھەن لەبەرێوەبردن و سستمی موچە و دابەشکردنی، لەوبارەیەوە پشتیوانی خۆی بۆ دووپاتکردنەوە و پێی راگەیاندن؛ بەھیوام ساڵ لەدوای ساڵ داھێنانتان زیاتر بێت تا ببێتە پرۆژەیەکی ستراتیژی بۆ سلێمانی و لەئایندەشدا ببێت بەفێستیڤاڵێکی نێودەوڵەتی.

راگەیاندنی پارێزگای ھەولێر لە راگەیەندراوێکدا ئاماژەی بەوەکرد، لەم ھەفتەیەدا لەکۆی پشکنینی ٤١ وێستگە، لەلایەن لیژنەی پشکنین و چاودێریکردنی بەنزینخانەکانی سەر بە بەڕێوەبەرایەتی نەوت و کانزاکانی ھەولێر، ١٣ بەنزینخانەی تر لە ھەولێر و دەوروبەری بەھۆی دەستکاریکردنی کوالیتی بەنزین و خراپی ئەو بەنزینەی دەیفرۆشن بە ھاوڵاتیان  سزادراون و ڕێکاری یاسایی لەبەرامبەر خاوەنەکانیان گیراوەتەبەر.

راشیگەیاند، لەسەرەتای مانگی ٦ی ئەمساڵ تاکو ئەمڕۆ پێنجشەممە ١١ی ئابی ٢٠٢٢ کۆی گشتیی ئەو بەنزینخانەی کە سزادراون ٢٠١ بەنزینخانەن، لەو ژمارەیەشدا سێ بەنزینخانە بەھۆی زیاتر لەجارێک سەرپێچی و دەستکاریکردنی کوالیتیی و فرۆشتنی بەنزینی خراپ بەھاوڵاتییان، ناوەکانیان بڵاو دەکەنەوە. 

پارێزگای هەولێر دڵنیای بە ھاوڵاتیان دەدات، لیژنەی پشکنین و چاودێریکردنی بەنزینخانەکان بەردەوامە لەگرتنە بەری ڕێکاری یاسایی پێویست بەرامبەر ھەر کەس و خاوەن بەنزینخانانەیەک کە بەنزینی خراپ بفرۆشێتە ھاوڵاتییان و دەستکاری کوالێتی بەنزین 

لەوبارەیەوە بەڕێوەبەری گشتی بازرگانی نەوزادشێخ کامیل ڕایگەیاند: پاش ئەوەی پرۆسەی وەرگرتنی گەنم لە ٢٠٢٢/٥/٢٥ ڕاگەیەنرا لە ھەرێمی کوردستان دەستبەوەرگرتنی گەنم کرا و لە کۆنفڕانسێکی رۆژنامەوانیدا پرۆسەی وەرگرتنی گەنم لە سایلۆکان کۆتای ھات.

 بەڵام بەھۆی بونی ژمارەیەکی زۆر لەبارھەڵگر لە بەردەم سایلۆکان کە گەنمیان ھێنابوو بەناچاری پرۆسەی وەرگرتنمان درێژە پێدا تا ڕۆژی پێنج شەممە ڕێکەوتی ٢٠٢٢/٨/١١ وبەیە کجاری پرۆسەی وەرگرتنی گەنم ڕادەگیرێت .

لە ئێستاشدا بڕی گەنمی وەرگیراو بەم جۆرە یە 

سلێمانی: (١٤١٫٢١٧٫٤٠٠) سەدوچل ویەک ھەزار و دوسەد و حەڤدە تەن وچوارسە دکیلۆ .

ھەولێر: (١٢٣٫٠٤٦٫١٦٠) سەدوبیست وسێ ھەزارو چل وشەش تەن وسەدوشەست کیلۆ .

دھۆک: (٥٨٫١٢٣٫٤٨٠) پەنجاوھەشت ھەزارو سەدوبییت وسێ تەن وچوارسەدو ھەشتا کیلۆ .

کۆی گشتی گەنمی وەرگیراو لە ھەرێمی کوردستان بریتی یە لە

(٣٢٢٫٣٨٧,٠٤٠) سێ سەدو بیست ودوھەزارو سێ سەدو ھەشتاوحەوت تەن وچل کیلۆ وەرگیراوە .