وەزارەتی دارایی و ئابووری ھەرێم لە راگەیەندراوێکدا بڵاویکردەوە، ئاوات جەناب نوری وەزیری دارایی و ئابووری ھەرێم پێشوازی لە وەفدێکی باڵای دیوانی چاودێری دارایی عێراق و ھەرێمی کوردستان کرد بۆ وردبینیکردن لەو داتا و زانیارییانەی حکومەتی ھەرێم پێشکەشی حکومەتی عێراقی کردووە، سەبارەت بە داھات و خەرجییەکانی ھەرێم.

لای خۆیەوە، وەزیری دارایی ھەرێم ئاماژەی بەوەدا، دەرگای وەزارەت و دامودەزگاکانیان ھەمووکات کراوەیە بە رووی تیمەکانی چاودێری دارایی بۆ وردبینی و بەدواداچوونی ھەر داتا و زانیارییەکان. 

لای خۆشیانەوە، وەفدی دیوانی چاودێری دارایی عێراق رایگەیاند، بەچەند تیمێکی جیاواز سەرقاڵی کۆبوونەوە و سەردانی مەیدانین لەدامودەزگاکانی وەزارەتی دارایی و وەزارەتەکانی دیکەی حکومەتی ھەرێم و لە نزیکترین کاتدا ڕاپۆرتەکانی خۆیان ئامادە دەکەن و ئاڕاستەی لایەنی پەیوەندیداری دەکەن.

بەگوێرەی نوسراوەکە کە ئیمزای ئاوات جەناب نوری وەزیری دارایی و ئابوری لەسەرە ئاماژە بەوەکراوە، ھەردوو وەزارەتی دارایی و پەروەردە رەزامەندن لەسەر ئەوەی مامۆستایانی وانەبێژ بکرێن بە گرێبەست، بۆ ئەو مەبەستەش داوایان لە سەرۆکایەتی ئەنجومەنی وەزیران کردووە مانگانە بودجەیەک بەبڕی چوار ملیار و ٢٥٥ ملیۆن دیناریان بۆ تەرخان بکات.

ھاوکات عەلی رەئوف نوێنەری مامۆستایانی وانەبێژ بە کوردسات نیوزی راگەیاند، پێشتریش چەندجارێک ھەمان نوسراو بۆ سەرۆکایەتی ئەنجومەنی وەزیران بەرزکراوەتەوە، بەڵام  سەرۆکایەتی ئەنجومەنی وەزیران نوسراوەکەی رەتکردووەتەوە.

وتیشی، ئەوان داوای دامەزراندن دەکەن نەک گرێبەست، چونکە مامۆستا ھەیە ١٥ ساڵە وانەبێژە و ناکرێت ١٥ ساڵی دیکەش مامۆستای گرێبەست بێت، بۆیە گردبوونەوەکانیان بۆ مەبەستی دامەزراندن بەردەوام دەبێت.

ھونەر  جەمال وتەبێژی وەزارەتی دارایی حکومەتی ھەرێم لە بەرنامەی تا یەکی کوردسات نیوزدا رایگەیاند، لەئێستادا لیژنەیەکی چاودێری دارایی عێراق لە ھەرێمە و وردبینی لە سەرجەم خەرجیی و داھاتەکانی کوردستان دەکات.

وتیشی، دوای دەرچوونی رێنماییەکانی تایبەت بە یاسای بودجە لە رۆژنامەی وەقائیع، پێویستە لە ١٨ تا ٢٥ـی ئەم مانگەدا مووچەی فەرمانبەران و شایستە داراییەکانی دیکە ھەرێم رەوانە بکرێت.

پەیوەست بە داھاتی ناوخۆش، وتەبێژی وەزارەتی دارایی ئاماژەی بەوەکرد، بۆچوونی جیاوازیان ھەیە لەگەڵ بەغداد سەبارەت بە داھاتی فیدراڵییەکان و تیمە ھونەرییەکانی ھەردوولا لەو بارەیەوە لە گفتوگۆدان.

دەشڵێت، بەپێی یاسا داھاتەکانی باج و رسومات داھاتی پارێزگاکانە، بەڵام خاڵە سنورییەکان بەپێی یاسای ئیدارەی مالی لەسەدا ٥٠ ی دەبێت بگەڕێتەوە، بەڵام بەحوکمی دابڕانی ١٠ ساڵەی نێوان ھەرێم و بەغداد گفتوگۆکان کاتی دەوێت بۆ ئەوەی بگەن بە ئەنجام لەو بارەیەوە.

دەقی پەیامەکەی بافڵ جەلال تاڵەبانی سەرۆکی یەکێتیی نیشتمانیی کوردستان:

بەڕێز محەمەد حاجی مەحمود، سەرۆکی پارتی سۆسیال دیموکراتی کوردستان

لە ساڵیادی دامەزراندنی پارتە تێکۆشەرەکەتاندا، پیرۆزباییەکی گەرم ئاڕاستەی ئێوەی بەڕێز، سەرکردایەتی، ئەندام و لایەنگرانتان دەکەم و ھیوای بەردەوامی و سەرکەوتنتان بۆ دەخوازم.
ھیوادارم ئەم یادە دەرفەتێک بێت بۆ بەھێزترکردن و پەرەپێدانی پەیوەندییەکانمان و کاری ھاوبەش لەنێوان سەرجەم ھێز و لایەنە سیاسییەکانی ھەرێم لەپێناو پاراستنی یەکڕیزیی کورد و بەدیھێنانی ئامانجە باڵاکانی گەلەکەمان.

 
بافڵ جەلال تاڵەبانی 
سەرۆکی یەکێتیی نیشتمانیی کوردستان

وەزارەتی ئاوەدانکردنەوە و نیشتەجێکردنی حکومەتی ھەرێم لە راگەیەندراوێکدا ئاماژەی بەوەکردووە، ئەمڕۆ دانا عەبدولکەریم وەزیری ئاوەدانکردنەوە و نیشتەجێکردن، پڕۆسەی دابەشکردنی فۆڕمی یەکەی نیشتەجێبون و کاراکردنی فۆڕمەکە بەشێوەی ئۆنلاین و وردەکاری پڕۆسەکە، بۆ کەمدەرامەت و  کرێنشینان رادەگەیەنێت.

ھاوکات، مەریوان حەسەن وتەبێژی وەزارەتی ئاوەدانکردنەوە و نیشتەجێکردنی ھەرێم بە کوردسات نیوزی راگەیاند، وەزیری ئاوەدانکردنەوە مەرجەکانی پڕکردنەوەی فۆڕمەکە بڵاودەکاتەوە بۆ نزیکەی ١٠ ھەزار یەکەی نیشتەجێبوون بۆ کەمدەرامەتان و کرێنشینان کە لە ناوچە جیاجیاکانی ھەرێم دروستکراون، وتیشی، ئەو فۆڕمە بەشێوەی ئۆنلاین بۆ ئەو یەکەی نیشتەجێبووانە رادەگەیەنرێت.

دەقی پەیامەکەی کۆسرەت رەسوڵ:

برای بەڕێزم کاک محەمەدی حاجی مەحمود- سەرۆکی پارتی سۆسیال دیموکراتی کوردستان

بەبۆنەی چل و حەوتەمین ساڵەی دامەزراندنی حزبەکەتان، پیرۆزبایی خۆم ئاراستەی جەنابت و ھەڤاڵانی سەرکردایەتی و ئەندام و لایەنگرانتان دەکەم، دەخوازم ھەمیشە لە پێشکەوتن و سەرکەوتنی بەردەوامدا بن.

پارتی سۆسیال دیموکراتی کوردستان لەمێژووی بزووتنەوەی رزگاریخوازی گەلی کوردستان رۆڵێکی دیارو کارای ھەبووە، لە خەباتی شاخ و شار خەباتی کردووە لەپێناو میللەتەکەمان، ھێزێکی کاریگەرەو خاوەن مێژوویەکی پڕ سەروەرییە.

وێڕای دووبارە پیرۆزباییم لێتان ئومێد دەکەم ئەم یادە بکەینە ھەوێنی یەکڕیزی و تەبایی نێوان لایەنەکان و ھەمووان ھەوڵ بدەن بۆ چارەسەری بنەڕەتی کێشەکان و پێشکەشکردنی باشترین خزمەتگوزاری بە میللەتەکەمان.


کۆسرەت رەسول عەلی
سەرۆکی ئەنجومەنی باڵای سیاسی و بەرژەوەندی
یەکێتیی نیشتمانیی کوردستان

دەقی پەیامەکەی قوباد تاڵەبانی: 

بەڕێز محەمەدی حاجی مەحمود
سکرتێری گشتیی پارتی سۆسیال دیموکراتی کوردستان

بە بۆنەی یادی چل و حەوت ساڵەی دامەزراندنی پارتی سۆسیال دیموکراتی کوردستان، گەرمترین پیرۆزبایی ئاراستەی بەڕێزتان و سەرکردایەتی و سەرجەم ئەندامان و لایەنگرانی پارتەکەتان دەکەین و ھیوای سەرکەوتنتان بۆ دەخوازین.

لەم یادەدا ڕێز دەگرین لە خەبات و قوربانیدانی پارتەکەتان و بە تایبەتیش رۆڵی پارتی سۆسیال دیموکراتی کوردستان لە بزووتنەوەی رزگاریخوازانەی گەلی کورد لە سەردەمی رژێمی بەعس بەرز دەنرخێنین. 

بۆ ئەم قۆناغەش جەخت دەکەینەوە لەسەر پێویستیی تەبایی و پێکەوەکارکردنی سەرجەم ھێزە سیاسییەکانی کوردستان لەپێناو داکۆکیکردن و دابینکردنی مافە دەستورییەکانی گەلەکەمان و لەم چوارچێوەیەشدا ھەماھەنگی و پێکەوەکارکردنی زیاتر لەنێوان یەکێتیی نیشتمانیی کوردستان و پارتی سۆسیال دیموکراتی کوردستان بە پێویست دەزانین.

قوباد تاڵەبانی
سەرپەرشتیاری مەکتەبی سکرتارییەتی سەرۆک مام جەلال

شارەوانی سلێمانی رایگەیاند، ئەمڕۆ دوا ڕۆژی کارکردن بوو لە قۆناغی دووەمی جێبەجێکردنی پڕۆژەی یەکتربڕی نزیک باخی بەختیاری، شەقامەکە بە ئاڕاستەی ڕۆشتن و ھاتن بەڕووی شۆفێراندا کرایەوە.

ئاماژەی بۆ ئەوەشکردووە، دوای کردنەوەی شەقامەکە دەست دەکرێت بە قۆناغی سێیەمی جێبەجێکردنی پڕۆژەکە کە پێکھاتووە لە جێبەجێکردنی بڕگەکانی ناوەوەی ئەندەرپاسەکان و شەقامی لادان، لەگەڵ بەشێک لە شەقامی ھەواری زانکۆ و شەقامی قلیاسان.

پڕۆژەکەش لەلایەن کۆمپانیای دەروازەی گەرمیان و لەژێر سەرپەرشتیاری ئەندازیارانی سەرۆکایەتی شارەوانی جێبەجێدەکرێت.

وەزارەتی ئاوەدانکردنەوە و نیشتەجێکردنی حکومەتی ھەرێم لە راگەیەندراوێکدا ئاماژەی بەوەکردووە، رۆژی سێشەممە دانا عەبدولکەریم وەزیری ئاوەدانکردنەوە و نیشتەجێکردن، پڕۆسەی دابەشکردنی فۆڕمی یەکەی نیشتەجێبون و کاراکردنی فۆڕمەکە بەشێوەی ئۆنلاین و وردەکاری پڕۆسەکە، بۆ ھاووڵاتیانی کەمدەرامەت رادەگەیەنێت.

ھاوکات سەرچاوەیەکی تایبەتیش لە وەزارەتی ئاوەدانکردنەوەی ھەرێم بە کوردسات نیوزی راگەیاند، نزیکەی ١٠ ھەزار یەکەی نیشتەجێبوون بۆ کەمدەرامەتان لە ناوچە جیاجیاکانی ھەرێمی کوردستان دروستکراون و ئەو فۆڕمەش بەشێوەی ئۆنلاین بۆ ئەو یەکەی نیشتەجێبووانە رادەگەیەنرێت.

"کوێستان محەمەد" لە نوسراوێکدا کە ئاڕاستەی ئەنجومەنی دادوەری کردووە، دەڵێت نوسراوی تایبەت بە جوڵاندانی سکاڵا دژی شێروان شێروانی کە دادگای تاوانی دووی ھەولێر ئاماژەی پێکردووە، نوسراوی بەڕێوەبەرایەتی چاکسازی گەورانی ھەولێر نییە کە سەر بە وەزارەتی کارو کاروباری کۆمەڵایەتییە، بەڵکو نوسراوی فەرمانگەی داواکاری گشتی لە چاکسازی گەورانی ھەولێرە. 

جەختیشی کردووەتەوە لەوەی، وەک وەزارەت و بەڕێوەبەرایەتی گشتی چاکسازی کۆمەڵایەتی و بەڕێوەبەرایەتی چاکسازی گەورانی ھەولێر، ھیچ سکاڵایەک و داواکارییەکیان لەسەر شێروان شێروانی نەبووە و ھیچ نوسراوێکی رەسمیان لەوبارەیەوە نییە، بۆیە داواکارن ئەو ھەڵەیە چاک بکرێتەوە و ناوی ئەو لایەنە دیاری بکرێت کە نوسراوەکەی کردووە. 

لە دیدارێکەدا باڵێۆز د.محەمەد سابیر رایگەیاند، وەک دامەزراوەی سەرۆک جەلال تاڵەبانی، چاومان لە دروستکردنی پەیوەندی بەھێزە لەگەڵ رێکخراو دامەزراوە ھاوشێوەکان لە بەغدادو تەواوی عێراق، باسی لەوەشکرد لە ماوەی چەند مانگی رابردووی کارکردنی دامەزراوەکە کارمان لەسەر بەتینی پەیوەندی زانستی لەگەڵ زانکۆکان بەگشتی کردوە، ئەوەشی راگەیاند: دەمانەوێت لەسەر ئاستی عێراقدا خزمەتی زانستی و رۆشنبیری و کلتوری بکەین.

ھەر لەدیدارەکەدا سەرۆکی دامەزراوەی سەرۆک جەلال تاڵەبانی، سوپاسی جێگری یەکەمی سەرۆکی ئەنجومەنی نوێنەران  کرد، وەک وەفادارێک سەرە رای ئەرکە زۆرەکانی ھاوکارو ھەماھەنگی سەرخستنی کارەکانی دامەزراوەی سەرۆک جەلال تاڵەبانییە.

لای خۆیەوە د. موحسین مەندەلاوی، خۆشحاڵی خۆی دەربڕی بەسەردان و بەسەرکردنەوەی سەرۆک و وەفدی دامەزراوەی سەرۆک جەلال تاڵەبانی؛ باسی لەوەشکرد، لای خۆیەوە بەردەوام ھاوکارو ھەماھەنگی بەرنامەو چالاکییەکانی ئایندەی دامەزراوەی سەرۆک جەلال تاڵەبانی دەبێت.

رەنج پشدەری چالاکوانی بواری کۆچبەران بڵاویکردووەتەوە، ترس ھەیە کە یەختێکی کۆچبەرانی نایاسایی بە ٤٨ سەرنشینەوە لە دەریای ئیجە تێکشکابێت، کە ژمارەیەکیان کوردن. 

دەشڵێت، یەکێک لە کۆچبەرەکانی سەر یەختەکە پەیوەندی بە کەسوکارییەوە کردووە و داوای بەھاناوەچوونی کردووە، بەھۆی خراپبوونی یەختەکەیان لە ئاوەکەدا. 

ئەو کۆچبەرانە ماوەی زیاتر لە سێ رۆژ و دوو شەوە لە ئاودان و چارەنووسیان نادیارە.

دوێنێش، دوو یەختی کۆچبەران بە شەپۆلەکانی دەریاوە لە ئاوەکانی ئیتاڵیا تێکشکان، کە لە لیبیاوە بەرەو ئیتاڵیا بەڕێکەوتبوون. 

دەقی روونکردنەوەکە... 
( ڕونکردنەوەیەک بۆ ڕای گشتی )    

لەوەڵامی لێدوانی چەند پەرلەمانتارێکی کورد لە پەرلەمانی عێراق و چەند میدیایەک کە ئاماژەیان بەوە کردووە وەفدی ھەرێم ژمارەی ناڕاستیان لەبارەی داھاتی ناوخۆی ھەرێم داوە بە بەغداد. 
بۆ ڕای گشتی و ھەموو لایەکی ڕوون دەکەینەوە سەرلەبەری ئەو تۆمەت و لێدوانانە ناڕاست و چەواشەکارین، نزیکەی دوو ساڵە پەیوەندیەکی تەندروست و بەردەوام لە نێوان دیوانی چاودێری دارایی حکومەتی فیدراڵی و دیوانی چاودێری دارایی ھەرێم ھەیەو ساڵی ٢٠٢٢ سەرجەم ڕاپۆرتەکانی ھەرێم دەربارەی خەرجی و داھاتی نەوت و ناوخۆ دوای وردبینی لەلایەن دیوانی چاودێری دارایی حکومەتی فیدراڵی و ھەرێم پەسەند کراون. 

ڕۆژی ٢٠٢٣/٧/١٦ تیمێکی تەکنیکی وەزارەتی دارایی ھەرێم سەردانی وەزارەتی دارایی عێراقیان کرد بۆ ئەوەی لە سەر شێوازی ئامادەکردن و پێشکەش کردنی ڕاپۆرتی مانگانەی تەرازوی پێداچونەوە گفتوگۆبکەن بەو شێوازەی کە عێراق داوای دەکات، ڕاستەوخۆ دوای گەڕانەوەیان بۆ ھەرێمی کوردستان ڕاپۆرتی تەرازوی پێداچونەوەی پێنج مانگی سەرەتای ٢٠٢٣ یان بۆ بەغداد ناردووە، لە ٢٠٢٣/٧/٣٠ ڕاپۆرتی تەرازوی پێداچونەوەی مانگی حوزەیرانیان پێشکەش کردووە. 

بۆ زانیاری ھەموو لایەک دیوانی چاودێری دارایی حکومەتی فیدراڵی لەگەڵ دیوانی چاودێری دارایی ھەرێم بەھاوبەشی بەرپرسیارن بۆ وردبینی و پەسەندکردنی ڕاپۆرتی تەرازووی پێداچونەوەی مانگانە نەک وەزارەتی دارایی، لەڕۆژی پێنج شەممەی ڕابردوو ٢٠٢٣/٨/٣ وە وەفدێکی دیوانی چاودێری دارایی حکومەتی فیدراڵی و دیوانی چاودێری دارایی لە وەزارەتی دارایی ھەرێمن بەمەبەستی وردبینی تەرازووی پێداچونەوەی شەش مانگی ڕابردووی ھەرێمی کوردستان. 

بۆیە بۆ ئەو پەرلەمانتارە بەڕێزانە باشترە پێش ئەوەی قسە لەسەر بابەتێک بکەن پەیوەندی بەلایەنی فەرمیەوە بکەن و زانیاری دروست لەبارەیەوە بەدەست بێنن.   
ڕاگەیاندنی وەزارەتی دارایی و ئابوری. 
   ٢٠٢٣/٨/٦

بەڕێوەبەرایەتی پۆلیسی ڕاپەڕین رایگەیاند، ئێوارەی ئەمڕۆ لە ناحیەی چوارقوڕنە بەھۆی کێشەیەکی کۆمەڵایەتی لەنێوان دوو لایەن لە ئەنجامی تەقەکردن سێ کەس بریندابوون.

ئاماژەی بەوەشکرد، ھێزەکانی پۆلیس گەیشتنە شوێنی رووداوەکە و رێکاری یاسایی گیرایەبەر و پەڕاوی لێکۆڵینەوە بۆ رووداوەکە کرایەوە و لە نەخۆشخانە چارەسەری پێوست بۆ بریندارەکان کراوە.

ئاشکراشیکرد، لەسەر رووداوەکە دوو کەس بەبڕیاری دادوەر ڕاگیراون و تۆمەتبارێکی تریش لەلایەن بەڕێوەبەرایەتی ئاسایشی راپەڕین دەستگیر کراوە، لێکۆڵینەوە لە روداوەکە بەردەوامە.

ڕێکخراوی پاڵپشتی کفری لە راگەیاندراوێکدا ئاماژەی بەوەکردووە، لە چوارچێوەی ھەوڵەکانیاندا بۆ داکۆکیکردن لە داواکارییەکانی دانیشتوانی شارەکەیان، ئەمڕۆ یەکشەمە، سەردانی بافڵ جەلال تاڵەبانی سەرۆکی یەکێتیی نیشتمانیی کوردستان و قوباد تاڵەبانی جێگری سەرۆکی حکومەتی ھەرێممان کرد.

دەشڵیت، سەرجەم داواکارییەکانی کفرییان خستەڕوو، بڕیاری خێرا بۆ جێبەجێکردنی بەشێکی زۆر لە داواکارییەکان درا، تەواوی داواکارییەکانی تریش لیژنە بۆ جیبەجێکردنیان پێکھێنراو بەم نزیکانە لیژنەکان دەستبەکاردەبن.

راشیگەیاند، جدییەتیان لە بڕیارەکاندا دەبینی، دواتر وردەکاری دانیشتنەکان بۆ ڕای گشتی دەخەنەڕوو.

بامیلا سمیس وتەبێژی پۆلیسی واشنتۆن لە کۆنگرەیەکی رۆژنامەنوسیدا رایگەیاند، شەقامی گود ھۆب لە باشری رۆژھەڵاتی واشنتۆنی پایتەخت رووداوێکی تەقەکردن روویداوە بەوھۆیەوە سێ کەس گیانیان لەدەستداوە و دووانی تریش برینداربوون لە ئێستادا گواستراونەتوەە بۆ نەخۆشخانە بۆ وەرگرتنی چارەسەری پێویست.

وتیشی تا ئێستا کەس لەسەر رووداوەکە دەستگیرنەکراوە بەڵام لێکۆڵینەوە لە رووداوەکە دەستیپێکردوە.

وتەبێژی پۆلیسی واشنتۆن داوایەکی ئاراستەی کۆنگرێسی وڵاتەکەی کرد کە کارەکانیان سەبارەت بە سەپاندنی سزا بەسەر ئەو کەسانەی چەک بەکاردەھێنین خێراتر بکەن بۆئەوەی دڵنیای پێویست بدرێتە ھاوڵاتیان.